<sup>هاوسەرۆکی پارتی دیموکراسی گەلان بەتووندی وەڵامی سەرۆکی پارتی بزووتنەوەی نەژادپەرستی دایەوە.

سەلاحەددین دەمیرتاش، هاوسەرۆکی پارتی دیموکراسی گەلان HDP و بەربژێری سەرۆک کۆماری تورکیا بەتووندی وەڵامی دەوڵەت باخچەلی، سەرۆکی پارتی بزووتنەوەی نەژادپەرستی دایەوە، کە گوتبووی "کۆمیسیۆنی باڵای هەڵبژاردنەکان رێگە بە دەمیرتاش نادات ببێتە کاندید". دەمیرتاش گوتی: " ئەو ئیرادەیەی خەڵک داویەتی پێیان بەرامبەر کەس ملکەچ ناکات". هاوکات قسەکانی باخچەلی بە سنووربەزاندن زانی و پێی گوت "سنووری خۆی بزانێت".

هاوسەرۆکی HDP پێیوابوو ئەو دوو کاندیدەی لەگەڵی رکەبەرایەتی دەکەن، هەردوو خاوەنی یەک بۆچوونن و دەوڵەت بە باوکی گەل دەزانن و مافی لێدان و جنێودان دەدەن بە دەوڵەت. دەمیرتاش گوتی ئەوان جیاوازن و دەوڵەت بە خزمەتکاری گەل دەزانن و هەتا دەگەنە ئەو ئامانجە بەردەوام دەبن لەسەر خەباتکردن.

10 ی ئابی ئەمساڵ هەڵبژاردنی سەرۆک کۆماری لە باکووری کوردستان و تورکیا  ئەنجام دەدرێت ، هەریەک لە رەجەب تەییب ئەردۆغان، سەلاحەددین دەمیرتاش و ئەکمەلەددین ئیحسانئۆغڵو کاندیدن بۆ ئەو پۆستە.</sup>

^7/7/2014

<sup>كۆسرەت رەسوڵ عەلی، جێگری سەرۆكی هەرێمی كوردستان پێیوایە دەبێت بۆ هەر هەنگاوێك بەرەو سەربەخۆیی كوردستان بارودۆخی ناوچەكە لەبەرچاوبگیرێت، ئەگینا وەك خۆی دەڵێ "سەركێشییەكی خراپە".

كۆسرەت رەسوڵ، كە هاوكات جێگری یەكەمی سكرتێری گشتیی یەكێتیی نیشتمانیی كوردستانیشە، لەبارەی گشتپرسی و هەنگاوەكانی سەركردایەتی كورد بۆ سەربەخۆیی بە ئاژانسی رۆیتەرزی راگەیاندووە: "هەموو خەڵكی كوردستان پشتگیریی دەوڵەتی كوردی دەكەن، بەڵام دەبێ سەركردایەتییەكەی ئەوە لەبەرچاو بگرن كات گونجاوە یاخود نا".

ئەو پێیوایە، ئەگەر كەشوهەوای سیاسی لەبار نەبێ، دەبێت چەند ساڵی دیكە ئەو پرسە دوابخرێت ‌و دەڵێ "ئەگەر وانەكرێ ئەوە سەركێشییەكی خراپە".

رۆیتەرز بۆچوونی دیپلۆماتێكی بیانیشی لەو بارەوە وەرگرتووە بەبێ ئەوەی ناوی بهێنێت. بەرای ئەو دیپلۆماتە كورد ئێستا لە پێگەیەكی زۆر باشدایە، بەڵام دەڵێ "رۆیشتنیان بەرەو سەربەخۆیی رەنگە زیانی زیاتری هەبێت وەك لە دەستكەوت".

ئێستا پرسی سەربەخۆیی باشووری كوردستان بووەتە رۆژەڤی میدیاكانی ناوچەكە و جیهان، بەتایبەت دوای ئەوەی مەسعود بارزانی، سەرۆكی هەرێمی كوردستان پەرلەمانی راسپارد بۆ گرتنەبەری رێوشوێنی یاسایی بۆ ئەنجامدانی گشتپرسی لە كەركووك و ناوچە دابڕێنراوەكان بەمەبەستی گەڕاندنەوەیان بۆ سەر باشووری كوردستان.</sup>

^7/7/2014

دامەزراوەی كاروبارە ئایینییەكان لە توركیا، ئیمامی مزگەوتێكی گەورەی ئەنقەرە، كە كارمەند و پیاوە باڵادەستەكانی دەوڵەت رووی تێدەكەن، لەسەر كارەكەی دوورخستەوە، بەهۆی ئەوەی فێڵی لە نوێژكەران كردبوو و زیاتر لە 3 ملیۆن دۆلاری لێوەرگرتبوون و نەیدابوویەوە.

دوای ئەوەی ژمارەیەكی زۆر لە نوێژكەرانی ئەو مزگەوتە سكاڵایان لە دژی ئیمامەكە تۆماركرد، لەسەرتای مانگی رەمەزان لە كارەكەی دوورخرایەوە.

كاتێك لەسەركارەكەی دوورخرایەوە، ئیمامەكە لێكۆڵینەوەی لەگەڵ كرا و ئەوەی بەسەردا ساخبووەوە، كە نوێژكەرانی هەڵخەڵەتاندووە و نزیكەی 7 ملیۆن لیرەی توركی (3.4 ملیۆن دۆلار)ی لێقۆزتوونەتەوە و ئەمەش دوای ئەوەی پێیگوتوون، دەتوانێت لە ماوەیەكی كەمدا پارەكەیان بە زیادەیەكی زۆرەوە بداتەوە.

06/07/2014

یاریدەدەری وەزیری دەرەوەی ئێران رایدەگەیێنێ، دەوڵەتی كوردی خەونی نەتەنیاهۆیە و رێگەنادەین بێتەدی.

بەپێی هەواڵێكی ئاژانسی فارس، ئەمیر عەبدوڵڵاهیان، یاریدەدەری وەزیری دەرەوەی ئێران بۆ کاروباری رۆژهەڵاتی ناوەڕاست و باکووری ئەفریقیا رایگەیاندووە، دابەشكردنی عێراق پیلانێكی سەهیۆنییە، ئەوەمان لە بیرە، كە تەنیا بەرپرسێك باسی سەربەخۆیی كوردستان بكات بە خۆشحاڵییەوە و پێشوازی لێبكات و هانی هەڵوەشانەوەی ناوچەكە بدات، نەتەنیاهۆیە.
 
یاریدەدەری وەزیری دەرەوەی ئێران جەخت لەوەدەكاتەوە، كە بەهیچ شێوەیەك رێگەنادەین خەونی نەتەنیاهۆ، سەرۆك وەزیرانی ئیسرائیل لە عێراق و ناوچەكە بێتەدی.

ئەمیر عەبدوڵڵاهیان ئاماژە بەوەشدەكات، قسەكردن لەبارەی سەربەخۆیی كوردستانی عێراق، ئەنجامەكەی گەڕانەوەی كوردستانە بۆ پێش سەردەمانی رابردوو، ئێمە چەندین جار ئەو بابەتەمان بەشێوەیەكی برایانە و دۆستانە لەگەڵ بەرپرسانی كوردستان باس كردووە.

06/07/2014

سەرۆكی هەرێمی كوردستان دەڵێت، عێراق پارچە پارچە دەبێت و كوردیش پلان بۆ جیاكردنەوەی هەرێمی خۆی دادەنێت و دەنگی خەڵكی كوردستانیش كاریگەرترە لە هەموو لایەنێكی دەرەكی.

مەسعود بارزانی، سەرۆكی هەرێمی كوردستان، لە دیدارێكیدا لەگەڵ رۆژنامەی ڤێڵت ئەم زۆنتاگی ئەڵمانی رایگەیاندووە، "پەرلەمانی كوردستان ئامادەكاری گشتپرسی دەكات بۆ سەربەخۆیی هەرێمی كوردستان" و گوتوشیەتی، "ئەمریكا لەو هەنگاوەی ئێمە ناڕازیی نییە".

بارزانی لە دیمانەی ئەو رۆژنامە ئەڵمانییە، جەختی لە مافی سەربەخۆیی بۆ كورد كردووەتەوە و سەبارەت بە بۆچوونی وڵاتانی دراوسێی عێراق لە بەرامبەر سەربەخۆیی كوردستاندا، ئاماژەی بۆ پەیوەندییەكانی نێوان توركیا و باشووری كوردستان كردووە و گوتویەتی، "پەیوەندییەكانمان لە 10 ساڵی رابردوودا لەگەڵ توركیا پێشووەچوونی زۆریان بەخۆوە بینیووە، ئێستا پەیوەندییەكانمان زۆرباشن، دەكرێت توركیا بە دراوسێ باشەكە وەسفبكەین، توركیاش لە جاڕدانی سەربەخۆیی هەرێمی كوردستان لاری نییە".

هەرچی پەیوەندی بە ئێرانیشەوە هەیە، لە وەڵامی پرسیاری رۆژنامەنووسە ئەڵمانییەكەدا، بارزانی دەڵێت؛ ناكرێت هەمیشە سیاسەتمەدارەكانی عێراق بیر لە كاریگەری وڵاتانی دیكە بكەنەوە، بۆ كوردیش ئەوەی هەژماردەكرێت، بەرژەوەندی كوردە. 

بارزانی وایدەبینێت، كە كەس ناتوانێ بەربەست لەپارچەپارچەبوونی عێراق بگرێت و دەڵێت، "لێرە شووناسی كوردی و سوننی و شیعی و مەسیحیمان هەیە، بەڵام شوناسی عێراقیمان نییە، بارودۆخی عێراق ئێستا بەهۆی داعش و سیاسەتەكانی حكومەتی عێراق لەژێر هەڕەشەدایە"، هەروەك گوتویەتی "ئەگەر مالیكی، كە ئێستا ویلایەتەكەی تەواوبووە، دەستی لەدەسەڵات هەڵگرتبا، رەنگبوو بارودۆخی عێراق لە 8 ساڵی رابردوو باشتربووایە".

سەبارەت بە هاوكارییەكانی ئەمریكا بۆ سەربەخۆبوونی كوردستان، بارزانی دەڵێت: ئەمریكا هاوكارییەكی فیعلی ئێمە ناكات، بەڵام لەهەمانكاتیشدا لە دژی پرۆسەكە ناوەستێت، سەرۆكی هەرێمی كوردستان ئاماژەی بەوەشكردووە، كە هەندێك لە سیاسەتمەدارەكانی ئەمریكا پشتیوانی لە كورد دەكەن و هەندێكیشیان پشتیوانی لێناكەن، بەڵام سەربەخۆیی كوردستان پرسی خەڵكی كوردستانە.

سەبارەت بە چارەنووسی كوردی پارچەكانی دیكەی كوردستان، بارزانی لەو هەڤپەیڤینەیدا ئاماژەی بەوەكردووە، كوردی پارچەكانی دیكە دەبێت خۆیان بڕیار لەسەر چارەنووسی خۆیان بدەن. 

سەبارەت بە كشانەوەی هێزەكانی ئەمریكا لە عێراق، بارزانی باسی لەوە كردووە، كە ئەو لەگەڵ كشانەوەی یەكجارەكی هێزەكانی ئەمریكا نەبووە، چونكە متمانەی بە سوپاكەی مالیكی نەبووە، كە بتوانێت سەقامگیری عێراق بپارێزێت.

06/07/2014

سەرۆکی هەرێمی کوردستان، دەڵێت عێراق پارچە پارچە دەبێت و کوردیش پلان بۆ جیاکردنەوەی هەرێمی خۆی دادەنێت و دەنگی خەڵکی کوردستانیش لە هەموو لایەنێکی دەرەکی کاریگەرترە. 

مەسعود بارزانی، سەرۆکی هەرێمی کوردستان، لە دیدارێکیدا لەگەڵ رۆژنامەی ڤێڵت ئەم زۆنتاگی ئەڵمانی، لە ژمارەی ئەمڕۆ یەکشەممە 6ی تەمموز، رایگەیاندووە "پەرلەمانی کوردستان ئامادەکاریی بۆ گشتپرسی دەکات بۆ سەربەخۆیی هەرێمی کوردستان" و گوتووشیەتی "ئەمریکا لەو هەنگاوەی ئێمە ناڕازیی نییە".

بارزانی لە دیمانەی ئەو رۆژنامە ئەڵمانییە، جەختی لە مافی سەربەخۆیی بۆ کورد کردووەتەوە و سەبارەت بە بۆچوونی وڵاتانی دراوسێی عێراق لە بەرامبەر سەربەخۆیی کوردستان ئاماژەی بە پەیوەندییەکانی نێوان تورکیا و باشووری کوردستان کردووە و گوتوویەتی "پەیوەندییەکانمان لە 10 ساڵی رابردوو دا لەگەڵ تورکیا پێشڤەچوونی زۆریان بەخۆوە بینیوە، ئێستا پەیوەندییەکانمان زۆرباشن، دەکرێت تورکیا بە دراوسێ باشەکە وەسفبکەین، تورکیاش لە جاڕدانی سەربەخۆیی هەرێمی کوردستان لاریی نییە" .

هەرچی پەیوەندی بە پرسیاری لەمەڕ ئێرانەوە هەیە، لە وەڵامی پرسیاری رۆژنامەنووسە ئەڵمانییەکەدا بارزانی دەڵێت؛  ناکرێت هەمیشە سیاسەتمەدارەکانی عێراق بیر لە کاریگەریی وڵاتانی دیکە بکەنەوە، بۆ کوردیش ئەوەی ئەژمار دەکرێت بەرژەوەندی کوردە. 
 
بارزانی وایدەبینێت، کەس پێشی پێ لەپارچەپارچەبوونی عێراق ناگیرێت و دەڵێت "لێرە شوناسی کوردی و سوننی و شیعی و مەسیحیمان هەیە، بەڵام شوناسی عێراقیمان نییە، بارودۆخی عێراق ئێستا بەهۆی داعش و سیاسەتەکانی حکومەتی عێراق لەژێر هەڕەشەدایە"، هەروەک گوتوویەتی "ئەگەر مالیکی، کە ئێستا ویلایەتەکەی تەواوبووە، دەستی لەدەسەڵات هەڵگرتبا رەنگبوو بارودۆخی عێراق لە هەشت ساڵی رابردوو باشتربووایە".

سەبارەت بە هاوکارییەکانی ئەمریکا بۆ سەربەخۆبوونی کوردستان، بارزانی دەڵێ "ئەمریکا هاوکارییەکی فیعلی ئێمە ناکات، بەڵام لەهەمان کاتیشدا لە دژی پرۆسەکە ناوەستێت". سەرۆکی هەرێمی کوردستان ئاماژەی بەوەش کردووە، کە هەندێک لە سیاسەتمەدارەکانی ئەمریکا پستیوانی لە کورد دەکەن و هەندێکیشیان پشتیوانی لێناکەن، بەڵام سەربەخۆیی کوردستان پرسی خەڵکی کوردستانە.

سەبارەت بە چارەنووسی کوردی پارچەکانی دیکەی کوردستان، بارزانی لەو هەڤپەیڤینەیدا ئاماژەی بەوە کردووە، کوردی پارچەکانی دیکە دەبێت خۆیان بڕیار لەسەر چارەنووسی خۆیان بدەن. 

رۆژنامەنووسەکە پرسیاری "کەی سەبەخۆیی رادەگەیێنی" ئاراستەی بارزانی دەکات، وەڵامی بارزانیش بەمشێوەیە: "سەربەخۆیی مافێکی رەوای هەموو گەلێکە و پێش ئەوەی رایبگەیەنین پرس بە گەلەکەمان دەکەین".

بارزانی سەبارەت بە کشانەوەی هێزەکانی ئەمریکا لە عێراق، باسی لەوە کردووە، ئەو لەگەڵ کشانەوەی یەکجارەکی هێزەکانی ئەمریکا نەبووە، چونکە متمانەی بە سوپاکەی مالیکی نەبووە کە بتوانێت سەقامگیری عێراق بپارێزێت. 

06/07/2014

شاندێکی باڵای ئێران بە سەرۆکایەتی حەسەن دانایی فەر باڵیۆزی ئەو وڵاتە لە عێراق گەیشتە سلێمانی و لەگەڵ بەرپرسانی یەکێتی و گۆڕان کۆدەبنەوە.

بەهرۆز فەرەیدوون پەیامنێری رووداو ئاشکرایکرد، کە شاندەکە ئێستا لە کۆبوونەوەدان لەگەڵ نەوشیروان مستەفا رێکخەری گشتیی بزووتنەوەی گۆڕان.

06/07/2014

دەزگای رۆشنبیری و راگەیاندنی پارتی دیموكراتی كوردستان، وەڵامی هەواڵێكی میدیاكانی پارتی كرێكارانی كوردستان دەداتەوە‌و بە "سەرتاپا درۆ"و هێرش بۆ سەر مەسعود بارزانی و پارتی لەقەڵەم دەدات.

راگەیەنراوەكەی دەزگای راگەیاندن و رۆشنبیری پارتی، كە بەناوی گوتەبێژی ئەو دەزگایەوە لە ماڵپەری فەرمی ئەو حیزبە بڵاوكراوەتەوە، وەڵامی هەواڵێكی دوو ئاژانسی نزیك لە پەكەكەیە، كە بە ناونیشانی " بەبەڵگەوە هێرشی داعش لە ئوردن پیلانی بۆ داڕێژرا، PDK ش بەشداربووە" بڵاویان كردووەتەوە.

پارتی ئەو هەواڵە بە "درۆ" وەسفدەكات و دەڵێ "دژی جەنابی سەرۆك مەسعود بارزانی و پارتی دیموكراتی كوردستانە كە ئەوەندە سووك و سادە و ڕیسوایە، تەنیا مایەی پێكەنینە".

هەر لە راگەیەنراوەكەی پارتیدا هێرشێكی تووند كراوەتە سەر جەمیل بایك، هاوسەرۆكی كەجەكەو تێیدا هاتووە هاتووە "دڵنیاین هەموو گەلی كوردستان و عێراق و ناوچەكە، دەزانێت كە بە داخەوە پارتی كرێكارانی كوردستان PKK لەژێر رێبەرایەتیی جەمیل بایكدا بووەتە بەشێك لە پیلانێكی موخابەراتیی دژی سەرۆك بارزانی و پارتی دیموكراتی كوردستان".

دەقی وەڵامەكەی دەزگای راگەیاندن و رۆشنبیری پارتی

وەڵامدانەوەیەك بۆ درۆیەكانی PKK

دوێنێ ڕۆژنامەی (ئۆزگور گویندەم ) و ئەمڕۆش (ئاژانسی فرات نیووز) كە هەردووكیان سەر بە پارتی كرێكارانی كوردستان PKK-ن، چیرۆكێكیان لە درۆ داڕشتووە و بڵاو كردووەتەوە دژی جەنابی سەرۆك مەسعوود بارزانی و پارتی دیموكراتی كوردستان كە ئەوەندە سووك و سادە و ڕیسوایە، تەنیا مایەی پێكەنینە.

 PKK لەو چیرۆكە بێ بنەمایەیدا دەڵێ گوایە سەرۆك بارزانی چووەتە ئوردن بۆ ڕێكخستنی كۆبوونەوەیەك دژی مالیكی لەگەڵ ئوردن و لایەنە سوننەكان، دواتریش بەڕێز ئازاد بەرواری بەشداری لەو كۆبوونەوەیەدا كردووە بە ئامادەبوونی لایەنە سوننەكان، بەعسییەكان، ڕێكخراوی تیرۆریستیی داعش و چەند ڕێكخراوێكی تیرۆریستیی دیكە. لەو كۆبوونەوەیەدا پلانی هێرشی داعش و گرووپەكانی بۆ سەر مووسڵ و ناوچەكانی دیكە داڕێژراوە و بەپێی ئەو درۆ و دەلەسەیەی PKK،دواتر نووری مالیكی بەو كۆبوونەوەیەی زانیوە و پاش ئەوە ئێران ئەحمەد چەلەبی ناردووەتە لای سەرۆك بارزانی بۆ ڕازیبوونی بە كشانەوە لەو پلانە، بە پێی درۆیەكانی PKK.

ئێمە لە كاتێكدا سەرلەبەری ئەو چیرۆكە بەدرۆ دەخەینەوە، كە هەمان زمان و وتاری ناحەزانی دەسكەوتەكانی هەرێمی كوردستانە و جارێكی دیكە PKKو جەمیل بایك دووبارەی دەكەنەوە‌، لە هەمان كاتیشدا دڵنیاین هەموو گەلی كوردستان و عێراق و ناوچەكە، دەزانێت كە بە داخەوە پارتی كرێكارانی كوردستان PKK لەژێر ڕێبەرایەتیی جەمیل بایكدا بووەتە بەشێك لە پیلانێكی موخابەراتیی دژی سەرۆك بارزانی و پارتی دیموكراتی كوردستان، كە ئەمڕۆ جەنابیان و پارتی دیموكراتی كوردستان بەشی هەرە گرنگی خەباتی گەلی كوردستان بۆ سەرخستنی یەكڕیزیی نیشتمانی و پاراستنی خاكی كوردستان و ئەنجامدانی ڕیفراندۆم لەسەر چارەنووسی كوردستان لە عێراقدا بە ڕێوە دەبەن.

ئێمە لە كاتێكدا سەرلەبەری ئەو چیرۆكە هەڵبەستراوەی PKK ڕەت دەكەینەوە كە چەند ڕۆژ پێشتریش بە هەمان شێوە جەمیل بایك بۆ ڕازیكردنی ناحەزانی كوردستان و دوژمنایەتیكردنی پارتی دیموكراتی كوردستان، هەمان تۆمەتی بە ئاماژەیەك لە وتارێكدا خستە پاڵ پارتیمان، هەروەها لە جەمیل بایك و PKKشدەپرسین: ئێوە بە قسەی موخابەراتی كام وڵات دژایەتیی سەرۆك بارزانی و پارتی دیموكراتی كوردستان دەكەن لەو كاتەدا كە سەرۆك بارزانی و پارتی دیموكراتی كوردستان ئەو ئەركە پیرۆزە نیشتمانیانە بە ڕێوە دەبەن؟!

پارتی دیموكراتی كوردستان، هەمیشە لە بەرەی خەباتدا بووە لە دژی ڕێكخراوە تیرۆریستییەكان و بە درێژاییی تەمەنی حكوومەتی هەرێمی كوردستانیش كە پارتی دیموكراتی كوردستان بەشێكی هەرە سەرەكی بووە تیایدا، بەشێك بووە لە خەباتی كۆمەڵگەی نێودەوڵەتیی دژی تیرۆریزم. نە ئێستا و نە لە داهاتووشدا ئامادە نییە هاوپەیمانی لەگەڵ هیچ هێزێكی تیرۆریست و نادیموكراسیدا بكات، چ جای گرووپێكی تیرۆرستیی وەك داعش كە هەمیشە هەڕەشەی لە پارتی كردووە و پێش كۆنترۆڵكردنی مووسڵ و دوای ئەوەش ڕۆژانە لە سنووری دەسەڵاتی پارتی لەگەڵ پێشمەرگە لە ڕووبەڕوونەوەدایە و ڕۆژ نیە خەڵكی پارتی بە دەستی ئەو تیرۆرستانە شەهید و بریندار نەبن.

ئێمە لە پارتی دیموكراتی كوردستان، پێداگیریی خۆمان لەسەر گرنگیی یەكڕیزیی هەموو لایەنە كوردستانییەكان دووپات دەكەینەوە، بۆیەش داوا لە سەركردایەتیی PKK دەكەین واز لە سیاسەتی دژایەتیكردنی پارتی دیموكراتی كوردستان بێنن، واز لە سیاسەتی ئاستەنگ دروستكردن بۆ خەباتی ڕزگاریی نیشتمانی و نەتەوەییی كوردستان بێنن و ڕێگە نەدەن هیچ كەسێك و هیچ دەزگایەكی هەواڵگری، هیچ سیاسەتێكتان دژی بەرژەوەندیی كوردستان بەسەردا بسەپێنێت و، واز لە سیاسەتی تێكدانی یەكڕیزیی گەلی كوردستان و پارتە سیاسییەكانی بێنن، چونكە ئەوە تووشی هەرەسێكی گەورەتان دەكات لەسەر ئاستی نیشتمانی و نەتەوەیی.

وتەبێژی دەزگای ڕۆشنبیری و ڕاگەیاندنی پارتی دیموكراتی كوردستان

06/07/2014

ئاژانسی نێودەوڵەتی وزە رەزامەندی دەربڕی لەسەر داواكارییەكی نێجیریا بۆ دروستكردنی وێستگەیەكی ئەتۆمی بەرهەمهێنانی كارەبا.

پەسەندكردنی داواكاریی نیجێریا پاش ئەوە هات، كە پچڕانی كارەبا بۆ چەندین كاژێر لە رۆژێكدا لە چەندین پارێزگای نیجێریا بە تایبەت ئەبوجای پایتەختی ئەو وڵاتە بەردەوامە.

وەزیری كارەبای نێجیریا رایگەیاند، كە پاش كۆبوونەوە و دانیشتنی لەگەڵ جێگری جێبەجێكاری ئاژانسی نێودەوڵەتی وزە، ئەو ئاژانسە داواكاریی نێجیریای بۆ دروستكردنی وێستگەی ئەتۆمی كارەبا دەربڕیوەو ئامادەیە هاوكاریی تەكنیكی بداتە ئەو وڵاتە.

گوتیشی نیجێریا بۆ دەستەبەركردنی كارەبای بەردەوام و رەنگاوڕەنگكردنی سەرچاوەكانی وزە سوورە لەسەر جێبەجێكردنی بەپەلەی ئەو پرۆژەیە.

بڕیارە لە یەكەم قۆناغیدا ئەو وێستەگە ئەتۆمییە بڕی 400 میگاوات كارەبا بۆ نیجێریا دەستەبەربكات و لە ماوەی 14 مانگدا جێبەجێكردنی كۆتایی پێبێت.

06/07/2014

دوای ئه‌وه‌ی ده‌نگۆی ئه‌وه‌بڵابووه‌وه‌ که‌ ئه‌بوبه‌کر به‌غدادی خه‌لیفه‌ی ده‌وڵه‌تی ئیسلامی داعش بریندارکراوه‌ له‌تۆڕی کۆمه‌ڵایه‌تی تویته‌ر یه‌که‌م ڤیدیۆی نوێژی هه‌ینی ئه‌بوبه‌کر به‌غداد له‌ شاری موسڵ بلاوکرایه‌وه‌ .

له‌ ڤیدیۆکه‌دا ئه‌بوبه‌کر به‌غدادی وتاری هه‌ینی پیشکه‌ش ده‌کات و ژماره‌یه‌ک هاوڵاتی ئاماده‌ی وتاری هه‌ینییه‌که‌ین و ژماره‌یه‌کی زۆری پاسه‌وانیش له‌ مزگه‌وته‌که‌دا بڵاوکراونه‌ته‌وه‌ بۆ پاراستنی ئه‌بوبه‌کر.

له‌ ڤیدیۆکه‌دا به‌ ئه‌بوبه‌کریان وتووه‌ ، خه‌لیفه‌ ئیبراهیم ئه‌میری موسڵمانان .

هەر ئەو هەژمارەی کە ڤیدیۆکەی بڵاوکردووەتەوە نوویسیویەتی ئەبوبەکر بەغدادی لە ساڵی ١٩٧١ لە دایکبووە تەمەنی ٤٣ ساڵە .

06/07/2014