ئاژانسی رۆیتەرز لە زاری چەند سەرچاوەیەکی ئاگادارەوە رایگەیاند، ئەمریکا و عێراق لەسەر پلانەکانی کشانەوەی هێزەکانی هاوپەیمانان لە عێراق گەیشتوونەتە لێکتێگەیشتن، بڕیارە تاوەکو ساڵی ٢٠٢٦ تەواوی هێزەکە لە عێراق بکشێنەوە.

^{ئەمڕۆ هەینی، چەند سەرچاوەیەکی ئاگادار بە ئاژانسی رۆیتەرزیان راگەیاند، پاش زیاتر لە شەش مانگ لە گفتوگۆکانی نێوانیان سەبارەت بە کشانەوەی هێزەکانی هاوپەیمانان لە عێراق؛ ئەمریکا و عێراق گەیشتوونەتە لێکتێگەیشتن لەسەر پلانی کشانەوەی هێزەکان.
سەرچاوەکان ئاماژەیان بەوەش کردووە، پلانی کشانەوەی هێزەکانی هاوپەیمانان لە عێراق پێویستی بە رێگەپێدانی کۆتایی ئەمریکا و عێراق و راگەیەندنی وادەکەی بە بڕیاری هاوبەشی هەردوولا هەیە.}

^{باسیان لەوەش کردووە، پلانەکە بە دوو قۆناغ جێبەجێ دەکرێت، بە جێبەجێکردنی قۆناغی یەکەم و تا مانگی ئەیلولی ساڵی ٢٠٢٥ سەدان سەربازی هێزەکە عێراق بەجێدەهێڵن، لە قۆناغی دووەم و تا کۆتایی ساڵی ٢٠٢٦ ئەوانەی دیکە کە ماون دەکشێنەوە و عێراق جێدەهێڵن.}

^{هەر لەوبارەیەوە، بەرپرسێکی باڵای ئەمریکا لە لێدوانێکدا بۆ ئاژانسەکە رایگەیاندووە، "ئێمە رێککەوتنێکمان هەیە، ئێستا تەنها پرسیارەکە ئەوەیە کەی رای بگەیەنین".}

^{ئەوەش هاتووە، ئەمریکا و عێراق لە هەوڵدان بۆ دروستکردنی پەیوەندییەکی راوێژکاریی نوێی هاوبەش کە رەنگە بەهۆیەوە بەشێک لە هێزەکانی ئەمریکا لە عێراق بمێننەوە لەدوای جێبەجێکردنی پلانی کشانەوەیان لە وڵاتەکەدا.}

^{ئەوەش دوای ئەوە دێت، لە ناوەڕاستی مانگی ئابی ئەمساڵ، وەزارەتی دەرەوەی عێراق رایگەیاند، بەهۆی پەرەسەندنی ململانێکانی نێوان ئێران و ئیسرائیل لە ناوچەکەدا، راگەیاندنی وادەی کۆتایی هێنان بە ئەرکی هاوپەیمانان لە عێراقدا دوا دەکەوێت. وتیشی، لەدوای کۆتاییهاتنی ئەرکی هاوپەیمانان لە ناوچەکەدا، پەیوەندییە هاوبەشەکانی نێوان عێراق و ئەمریکا لە بواری ئەمنی و ئاسایشدا بەردەوام دەبێت.}

^{ئەوەش لەکاتێکدایە، لە ماوەی ١٠ ساڵی رابردوودا ئەمریکا و عێراق پەیوەندییەکی هاوبەشی قوڵ و بەرهەمدارییان هەبووە لە پاراستنی دۆخی ئەمنی و ئاسایشی ناوچەکە بەهۆی بوونی گروپە چەکدارەکانی داعش لەو ناوچەیەدا.}

٦/٩/٢٠٢٤