^{ئەفیخاى ئەدرعى، وتەبێژى سوپاى ئیسرائیل بە زمانى عەرەبى لە تۆڕى کۆمەڵایەتیی ئێکس بڵاویکردوەتەوە؛"بە فەرمیی کوشتنى تیرۆرست حەسەن نەسروڵا رادەگەیەنین".}

^{لە بەیاننامەکەدا وتەبێژى سوپاى ئیسرائیل دەڵێت: رۆژى رابردو سوپاى ئیسرائیل، حەسەن نەسروڵا ئەمیندارى گشتى حیزبوڵا و عەلى کارکى، سەرۆکى بەرەى باشورى حیزبوڵا و ژمارەیەک بەرپرسی دیکەى کوشت.}

^{دەشڵێت: فڕۆکەکانى هێزى ئاسمانیی بە رێنمایی وردى هەواڵگریی هێرشەکەیان بۆسەر بنکەى سەرەکیی حیزبوڵا ئەنجامدا کە دەکەوێتە ژێرزەمینى بینایەکى نیشتەجێبونەوە و لەکاتى هێرشەکەدا بەرپرسانى باڵاى حیزبوڵا لە شوێنەکەدابون و پلانیان دژى هاوڵاتییانى ئیسرائیل دادەنا.}

^{ئاماژە بۆ ئەوەشکراوە کە سوپاى ئیسرائیل بەردەوام دەبێت لە بەئامانجگرتنى هەمو کەسانەى کە دژى ئیسرائیل کاردەکەن.}

^{هاوکات میدیا ئیسرائیلییەکان جەختیان کردوەتەوە کە دەزگا ئەمنییەکانى ئیسرائیل بەڵگەیان لایە کە حەسەن نەسروڵا، ئەمیندارى گشتى حیزبوڵاى لوبنان لە ئۆپەراسیۆنێکدا شەوى هەینى کوژراوە.}

^{راستەوخۆ دواى ئەنجامدانى هێرشى ئاسمانیی بەرفراوان لەلایەن ئیسرائیل و بۆسەر بارەگاى سەرەکیی حیزبوڵا لە لوبنان، میدیاکان باسیان لە چارەنوسى نادیارى حەسەن نەسروڵا دەکرد و میدیا ئیسرائیلییەکانیش هەر زو رایانگەیاند؛ نەسروڵا لە هێرشەکەدا کوژراوە}

28/9/2024