جێگری سەرۆک وەزیرانی تورکیا رایگەیاند، کە لە چەند کاژێری رابردوودا، 45 هەزار کوردی رۆژئاوای کوردستان، روویان لە تورکیا کردووە.

نوعمان کورتوڵمووش، جێگری سەرۆک وەزیرانی تورکیا رایگەیاند، لە شەوی 19/20.9.2014، نزیکەی 45 هاووڵاتی کۆبانی، روویان لە وڵاتی تورکیا کردووە.

بە پێی گوتەی نوعمان کورتوڵمووش، ئەو ئاوارانە لە هەمان شەودا شوێنی مانەوەیان بۆ دابینکراوە.

بەهۆی هێرشی چەکدارانی گرووپی داعش بۆ سەر کانتۆنی کۆبانی لە رۆژئاوای کوردستان، دەیان گوند چۆڵکراون و چەکدارانی داعش دەستیان بەسەردا گرتوون و هاونیشتمانییانیش، لە ترسی چەکدارانی داعش، روویان لە باکووری کوردستان و تورکیا کردووە.

20/09/2014

پۆڵ برێمەر، حاکمی مەدەنی ئەمریكا لە عێراق لە ساڵانی 2003 و 2004 رایگەیاند، بوونی هێزی پیادەی ئەمریكی لەسەر خاكی عێراق پێویستە بۆ رزگاركردنی ناوچەكانی ژێر دەسەڵاتی چەكدارانی گروپی داعش و كورد هەڕەشەی سەربەخۆییان دەكرد، ئەگەر سوپای پێشوو هەڵنەوەشێنرێتەوە.

پۆڵ برێمەر لە هەڤپەیڤینێكدا لەگەڵ رۆژنامەی شەرقولئەوسەتی سعودی رایگەیاند: "پێش ئەوەی من بگەمە بەغدا، سوپای عێراق بوو بە هەڵم و ونبوو، تەنانەت پێش گەیشتنی من بۆ بەغدا جەنەڕاڵ جۆن ئەبو زەید، ئەو راستییەی بە جۆرج بۆش، سەرۆكی ئەوكاتی ئەمریكا، راگەیاند".

برێمەر زیاتر دەڵێ "كورد و شیعە لە ئەگەری  هەڵنەوەشاندنەوەی سوپای عێراق، هەڕەشەیان دەکرد، تەنانەت كورد هەڕەشەی سەربەخۆییان دەكرد ئەگەر سوپای پێشوو هەڵنەوەشێنرێتەوە، شیعەش دەیانگوت ئەو سوپایە بەبێ سەدام حوسێنیش هەر سوپای سەدامە".

حاکمی مەدەنی پێشووی عێراق لەبارەی لێدانی داعش لە سووریا ئاماژەی بەوەكرد، كە "ئەمریكا هیچ كات هەماهەنگی لەگەڵ رژێمی بەشار ئەسەد لە سووریا ناكات و هێرشی ئاسمانی ئەمریكا بۆ سەر داعش لە سووریا نزیكبووەتەوە، چونكە شكستپێهێنانی داعش لە عێراق بەبێ شكستپێهێنانی لە سووریا ئەستەمە، جگە لەوەی پێویستە لەسەر ئەمریكا بە دوو هێندەی ئێستا هاوكاری كورد بكات".

پۆل برێمەر دەشڵێ، "پێویست بوو لەسەر ئەمریكا پێش سێ ساڵ هێزی ئاسمانی سووریا لەناو ببات، هاوكات هیچ هەماهەنگییەكی نهێنی لە نێوان ئەمریكا و ئێراندا نییە، تەنیا هەردوولا بەرژەوەندی هاوبەشیان هەیە لە شكستپێهێنانی داعش".

برێمەر ئەوەشی خستەڕوو، كە "نووری مالیكی ئەو ئەفسەرانەی لە سوپا دوور خستەوە، كە لەلایەن سوپای ئەمریكاوە مەشقیان پێكرابوو، بۆیە سوپای عێراق لە موسڵ بەرگری نەكرد و رووخا و ئێستاش نەیاری دروستكردنی پاسەوانی نیشتمانییە لە عێراق، هاوكات بوونی گرووپی چەكداریی عەسائیبی ئەهلی حەق كە لەلایەن ئێرانەوە پاڵپشتی دەكرێن، تووشی دڵە راوكێی كردووم".

فەرمانڕەوای مەدەنی پێشووی ئەمریكا لە عێراق هاوكات جەخت لەوەدەكات، کە "بوونی هێزی پیادەی ئەمریكی لەسەر خاكی عێراق پێویستە بۆ رزگاركردنی ئەو ناوچانەی چەكدارانی داعش داگیریان كردووە، هاوكات بڕیاری كشانەوەی سوپای ئەمریكا لە ساڵی 2011 لە عێراق، هەڵەبوو".

برێمەر هەروەها لە وەڵامی پرسیارێك لەبارەی ئەوەی ئەگەر ئەو راوێژكاری داعش بووایە، بەچی ئامۆژگارییانی دەكرد، دەڵێ "ئامۆژگارییان دەكەم درێژە بە جەنگیان لە دژی ئەمریكا بدەن، چونكە هێستا دیار نییە ئەمریكا بۆ ماوەیەكی دوور و درێژ بەشداری لە جەنگی دژی داعش دەكات یان نا، بۆ درێژكردنەوەی".

20/09/2014

وەزارەتی پێشمەرگەی حكومەتی هەرێمی كوردستان راگەیێندراوێكی لەبارەی هێرشی چەكدارانی داعش بۆ سەر كۆبانی بڵاوكردەوەو تێیدا هاتووە، كە وەزارەتی پێشمەرگە ئامادەیە هەرچی لەتوانایدا بێت بۆ هاوكاریكردنی كۆبانی بكات.

لە راگەیێندراوەكەدا وەزارەتی پێشمەرگە داواش لە وڵاتانی هاوپەیمان دەكات هاوكاری پێشكەش بە كوردانی رۆژئاوا بكەن و دەڵێ "چونكە هەمان دوژمن پەلاماریان دەدات".
 
دەفی راگەێندراوەكە:
راگەیێندراوێكی وەزارەتی پێشمەرگەی حكومەتی هەرێمی كوردستان
لەبارەی پەلاماردانی دڕندانەی داعش بۆ سەر كوردانی رۆژئاوا

هێرشی داعشی تیرۆرستی جیهانی بۆ سەر كوردانی برامان لە كۆبانیی رۆژئاوای كوردستان مەترسیەكی ترە بۆ سەر گەلی كوردستان بە گشتی، بۆیە ئەركی سەرشانی هەموو لایەكمانە، پشتیوانی و هاوكارییان بكەین بەهەر شیوەیەك پێویست بكات و لە تواناماندا بێت ، ئێمە وەكو وەزارەتی پێشمەرگەی حكومەتی هەرێمی كوردستان سەرەڕای ئەو رووبەڕووبو‌ونەوە فراوانەی لە ئەستۆمانە لە باشو‌وری كوردستان، ئامادەین هەرچی لە تواناماندایە لەو پێناوەدا بیكەین و داواش لە وڵاتانی هاوپەیمانمان دەكەین هاوكاری پێشكەش بە كوردانی رۆژئاوا بكەن، چونكە هەمان دوژمن پەلاماریان دەدات.

وەزارەتی پێشمەرگەی حكومەتی هەرێمی كوردستان
19 \9\2014

^{بەناوی خودای بەخشندە و میهرەبان
هێرشی دڕندانەی تیرۆریستانی داعش بۆ سەر خوشك و براكانمان لە كۆبانێ بەشێكە لە ئەو نەفیرعام و دوژمنكارییەی تیرۆریستان لەدژی گەلی كوردستان ئەنجامی دەدەن. وەحشیگەری و پەلاماری تیرۆریستانی داعش بۆسەر كۆبانێ و ڕۆژئاوای كوردستان هەڕەشەیە بۆ هەموو گەلی كوردستان و شەرەف و كەرامەت و مان و نەمانی گەلەكەمانی كردۆتە ئامانج.
داوا لە هەموو لایەنە كوردستانییەكان دەكەم هەموو ناكۆكییەكانیان وەلا بنێن و بەیەكەوە بەرگری له كەرامەت و خاك و ژیانی هاووڵاتیانی كۆبانێ بكەن. بەرگریكردن لە خاك و خەڵكی كوردستان ئەركێكە لەسەر شانی هەموومانە و لەسەرووی هەموو ئەركێكی دیكەیە.
داوا لە كۆمەڵگەی نێودەوڵەتییش دەكەم بە زووترین كات هەموو ڕێوشوێنێك بگرنەبەر بۆ پاراستنی كۆبانێ و خەڵكی ڕۆژئاوای كوردستان لە دەستی تیرۆریستان. چونكە تیرۆریستانی داعش لە هەر شوێنێك بن دەست لە تاوان و كارەسات ناپارێزن و دەبێ لە هەر شوێنێك بێت لێیان بدرێت و تێكبشكێندرێن.}

^{مسعود بارزانی
سەرۆكی هەرێمی كوردستان
19ـی ئەیلوولی 2014}

<sup>مەكتەبی سیاسی یەكێتیی نیشتمانیی كوردستان راگەیێندراوێك لەسەر گەمارۆدانی شاری كوبانی رۆژئاوای كوردستان بڵاودەكاتەوە و رایدەگەیەنێت، پێویستە ئەنجوومەنی ئاسایش‌و ئەمریكا‌و وڵاتانی رۆژئاوا بە هانای شاری كوبانی بچن ‌و خەڵكەكە لە مەترسی گرووپی داعش رزگار بكەن.

دەقی راگەیەنراوەكە:

راگەیەندراوێكی راگەیاندنی مەكتەبی سیاسی یەكێتی لەسەر گەمارۆدانی كۆبانی

جەماوەری گەلەكەمان!
وڵاتانی پشتیوانی كوردستان!
ئەی هێزە كوردستانی‌و عیراقییەكان!

چەند رۆژێكە، شاری كۆبانی كەوتۆتە بەر هێرشێكی فراوانی داعشەكان‌و بەهەموو چەكێكی قورس، ناوشارەكە بۆردومان دەكەن‌و زیانی زۆریان لەخەڵك‌و شارەكە داوە. شەهیدو بریندارێكی زۆریش دراوون. تەنانەت چاوەڕێی كارەساتی مرۆیش لەو شارەدا دەكرێ‌.

ئەم هێرش‌و شەڕە، لەكاتێكدا روو دەدات، خۆشبەختانە ئەمریكا‌و رۆژئاوا، بڕیاریان داوە لەهەموو شوێنێك هێرش بكەنە سەر داعش. كۆبانی، شارێكی رۆژئاوای كوردستانەو ئاشكرا، لەبەرچاوی هەموو دەوڵەتان‌و ناوچەكە، لەسەر دەستی داعشەكان قەتڵوعام دەكرێین.

یەكێتیی نیشتمانیی كوردستان، داوا دەكات ئەنجومەنی ئاسایش‌و ئەمریكا‌و وڵاتانی رۆژئاوا، بەهانای شاری كۆبانییەوە بچن‌و خەڵكەكە لەو جانەوەرانەی داعش رزگار بكەن. بەپەلەش كۆمەك بەخەڵكەكە بگەیەنن.

هەروەها داوا لە حكومەتی عیراق، كۆماری ئیسلامی ئێران‌و توركیاش دەكەین، هەرچییەكیان پێدەكرێ، هاوكاری ئەو قارەمانانە بكەن كە بەرگری لەشاری كۆبانی دەكەن‌و بۆ یارمەتیدانی خەڵكەكەش، بڕیاری مرۆیی بەپەلە بدەن‌و بگەیەنن.

حكومەتی كوردستانیش، ئەگەرچی هێزی پێشمەرگە لەشەڕێكی فراواندایە دژی داعش، بەڵام بەهەر رێگەیەك دەگونجێ‌‌و دەكرێ‌، پێویستە هیممەتی كوردستانی بۆ ئەو شارە كوردستانییە بكرێ‌. چونكە، هەموولایەك دەزانین شۆڕشگێڕانی رۆژئاوا، چ رۆڵێكی جوامێرانەیان لەكاتی كارەساتی شەنگالدا، بینی.

سڵاوتان لێبێ‌ .. خەڵكە خۆڕاگرەكەی كۆبانی.
سڵاوتان لێبێ‌ .. پارێزەرانی خەڵكی كۆبانی.
سڵاوتان لێبێ‌ .. شەهیدانی كۆبانی.

راگەیاندنی
مەكتەبی سیاسی
یەكێتیی نیشتمانیی كوردستان
2014/9/18</sup>

وڵاتی فەرەنسا یەكەم هێرشی ئاسمانی دژی داعش لە باكووری موسڵ ئەنجامدا.

فرانسوا ئۆلاندی سەرۆکی فەرەنسا، رۆژی پێنجشەممە 18ی ئەیلوولی 2014، لە كۆنفرانسێكی رۆژنامەوانیدا بڕیاری وڵاتەكەی لەبارەی هێرشكردنە سەر گرووپی دەوڵەتی ئیسلامی (ناسراو بە داعش) راگەیاند و گوتی، "بەدەنگ داوای هێزە عێراقییەكان دەچین و یارمەتی ئاسمانیان پێشکەش دەکەین، هەروەها بەیەکەوە بەرەنگاری تیرۆرستان دەبینەوە". 

بەپێی راگەیێندراوی كۆشكی ئیلزێ، كۆشی كۆماری فەرەنسا، كاژێر 9:40 خوولەكی بەیانی رۆژی هەینی 19ی ئەیلوول، ( 7:40 خوولەك بە كاتی هەولێر)، لە رێگەی فڕۆكەی رافال هێرشی ئاسمانی بۆ سەر عەمبارێكی چەكی گرووپی داعش لە باكووری شاری موسڵ ئەنجامدراوە.

لە راگەیەندراوەكەدا ئەوەش هاتووە، كە ئامانجەكان بە تەواوەتی پێكێندراون و لە رۆژانی داهاتووشدا ئۆپەراسیۆنەكان بەردەوام دەبن.

19/08/2014

ماوەی دوو رۆژە تورکیا دەرگای سنووری خۆی لە زیاتر لە پێنج هەزار کوردی دانیشتووی  60 گوندی دەوروبەری کۆبانێ کە لە ترسی داعش روویان لە سنووری تورکیا کردووە، داخستووە و ئەمڕۆ کاژێر 1 ی دوای نیوەڕۆ دەرگای سنووری کردەوە.

لە رۆژی پێنجشەممەوە 18ی ئەیلوولی 2014، هێزە ئەمنییەکانی تورکیا بۆ ئەوەی رێگا بە چوونە ئەودیو سنووری ئاوارەبووەکان نەدرێ، رێوشوێنێكی تووندیان گرتەبەر، بەم هۆیەشەوە گرژی و ئاڵۆزی لەنێوان ئاوارەبووەکان و هێزە ئەمنییەکاندا روویدا. گرووپێکی 100 کەسی بە بەرد ناڕەزاییان دەربڕی و هێزە ئەمنییەکانیش بە گازی فرمێسکڕێژ وڵامیان دانەوە.

لە سەروبەندی گرژی و ئاڵۆزییەکانی نێوان ئاوارەبووەکان و هێزە ئەمنییەکاندا، مینێک بە ژنێکی پەنجا ساڵەدا تەقییەوە و بریندار بوو، دوای ئەو رووداوەش دەرگای سنووری بەرووی ئاوارکاندا کرایەوە.

لەماوەی دوو رۆژی رابردوودا چەكدارانی داعش هێرشەكانیان بۆ سەر ناوچە كوردنشینەكانی رۆژئاوای كوردستان چڕكردوونەتەوە و 21 گو‌وندیان لە دەوروبەری كۆبانێ گرتوون. رووانگەی سووری بۆ مافەكانی مرۆڤ، كە بارەگاكەی لە لەندەنی پایتەختی بەریتانیایە، رۆژی پێنجشەممە رایگەیاند، چەند رۆژێكە شەڕێكی سەخت لەنێوان چەكدارانی داعش و شەڕڤانانی یەكینەكانی پاراستنی گەل یەپەگە لە رۆژئاوای كوردستان بەڕێوەدەچێت.

هەروەها رێدار خەلیل، گوتەبێژی یەپەگە رایگەیاند كە دۆخی كۆبانێ لە مەترسیدایە و داوای پشتگیریی نێودەوڵەتی كرد، گوتیشی "ئەگەر پشتیوانی نەكرێین لە كۆبانێ و دەوروبەری جینۆساید روودەدات".

<sup>ئەنجامی فەرمی گشتپرسییەكەی رۆژی پێنجشەممە 18ی ئەیلوولی سكۆتلەندا، بۆ بڕیاردان لەسەر مانەوە یان جیابوونەوە لە شانشینی یەكگرتوویی بەریتانیا راگەیێندرا و زۆرینەی سكۆتییەكان سەربەخۆییان رەتكردەوە، دوایی راگەیاندنی ئەنجامەكەش سەرۆكوەزیرانی بەریتانیا لە پەیامێكدا دڵخۆشی خۆی بە ئەنجامەكە راگەیاند.

بەپێی ئەنجامەكە،  55% ی بەشداربووان (یەك ملیۆن و 914 هەزار و 187 دەنگ) بە نەخێر بۆ جیابوونەوە و 45%ی بەشدرابووانیش (یەك ملیۆن و 539 هەزرا و 920 دەنگ) بە بەڵێ بۆ جیابوونەوە دەنگیان داوە.

دەیڤید كامیرۆن، سەرۆكوەزیرانی بەریتانیا دوای راگەیاندنی ئەنجامەكە لە دەرەوەی باڵەخانەی داونینگ ستریت، گوتارێكی پێشكەشكرد و بە ئەنجامی ئەو گشتپرسییە خۆشحاڵبوو، كامیرۆن  گوتی:" دڵخۆشم بەوەی بەریتانیا بە یەكپارچەیی دەمێنێتەوە" و داوای یەكڕیزی خەڵكی وڵاتەكەی كرد. كامیرۆن راشیگەیاند:" وەكو ملیۆنان خەڵكی دیكە ئێستا منیش دڵخۆشم". هەروەها گوتیشی:" پێشتر لە كەمپەینەكەش گوتبووم ئەگەر سكۆتلەندا لێمان جیابێتەوە، ئەوە دڵم بە كۆتایهاتنی شانشینە یەكگرتووەكەمان دەشكێت".

سەرۆكوەزیرانی بەریتانیا باسی ئەوەیشی كرد كە سكۆتلەندا بەشێك بووە لە بەریتانیا، بۆیە لە كۆنەوە توانیویانە مێژوویەك بەیەەوە تۆماربكەن و لە داهاتووشدا دەتوانن زۆر دەستكەوتیان بەیەكەوە هەبێت لە شانشینی یەكگرتوودا. هەر لە گوتارەكەیدا كامیرۆن دانی بەوەدانا كە ئەو هەرچەندە زۆر باوەڕی بە یەكگرتوویی بەریتانیا هەیە، بەڵام لە هەمان كاتیشدا كەسێكی دیموكراسی خوازە، بۆیە هەنگاوە راستەكە ئەوەبووە رێگری لەبەردەم سكۆتلەندییەكان نەكرێت كاتێك داوای گشتپرسیان كرد، چونكە مافی خۆیانبووە دەنگ لەسەر چارەنووسی خۆیان بدەن.</sup>

^19/9/2014

^{محەممەد جەواد زەریف، وەزیری دەرەوەی ئێران، رەخنەی لە بانگهێشتنەکردنی وڵاتەکەی بۆ ناو ئەو هاوپەیمانێتییە نێودەوڵەتییە گرت، کە بۆ رووبەڕووبوونەوە و لێدان لە داعش لەلایەن ویلایەتە یەکگرتووەکانی ئەمریکاوە پێکهێنراوە و زیاتر لە 40 دەوڵەتی جیهان بەشداری تێدا دەکەن. زەریف لەمیانی لێدوانێکیدا لە ئەنجوومەنی پەیوەندییەکانی دەرەوە لە نیویۆرک گوتی: "هەندێک لەو وڵاتانەی کە بەشداریی کۆنگرەی پاریس و هاوپەیمانێتی دژ بە داعشیان کردووە، خۆیان پێشتر ئەوانە بوون کە هاوکاری گرووپی دەوڵەتی ئیسلامییان کردووە و بەهێزیان کردوون، تەنانەت تاوانبارن لە دروستبوونی داعشدا". زەریف رەخنەی تووندی لەو هاوپەیمانێتییە گرت و بە "هاوپەیمانێتی تۆبەکاران"ی ناوبرد، چونکە وەک ئەو دەڵێ "هەندێکیان پێشتر هاوکاری ئەو گرووپەیان کردووە و ئێستا دەیانەوێت پێگەی خۆیان راست بکەنەوە". زەریف ئاماژەی بەوەشکردووە، هێزە بیانییەکان ناتوانن کۆتایی بە هەڕەشەکانی داعش بهێنن و دەشڵێ "داعش خۆی بەرهەمی دەستتێوەردانە دەرەکییەکانە لە عێراق و سووریا". ویلایەتە یەکگرتووەکانی ئەمریکا لە دروستکردنی هاوپەیمانێتییەکدا بۆ بەرەنگاربوونەوەی داعش، لە دوایین ساتەکاندا ئێرانی لە بەشدرایکردن لەو هاوپەیمانێتییە دوورخستەوە، سەرەڕای ئەوەی چاوەڕوان دەکرا ئێران ببێتە لایەنێکی دیاری ئەو هاوپەیمانێتیە، بەتایبەت کە لایەنە عێراقی و کوردستانییەکان رایانگەیاندبوو ئێران هاوکاری سەربازی عێراقی کردووە لەجەنگی دژ بە داعشدا. رەخنەکانی وەزیری دەرەوەی ئێران لە بانگهێشتنەکردنی ئەو وڵاتە بۆ نێو هاوپەیمانێتییەکەی دژ بە داعش پێچەوانەی قسەی عەلی خامنەیی رابەری باڵای شۆڕشی ئیسلامیی ئێرانە، چونکە ئەو پێشتر گوتی "من داوای بەشداریکردنی ئێرانم رەتکردووەتەوەو ئەمریکا پێشنیازی بۆ کردووین".} 

^18/9/2014