<sup>وەزیری دەرەوەی ئێران لە پەیوەندییەكی تەلەفۆنیدا لەگەڵ وەزیری دەرەوەی توركیا، نیگەرانی وڵاتەكەی دەربڕی لە دەستتێوەردانی سەربازی توركیا لە خاكی سووریا.

محەممەد جەواد زەریف، وەزیری دەرەوەی ئێران ئێوارەی ئەمڕۆ دوای بڕیارەكەی پەرلەمانی توركیا كە رەزامەندی دەربڕی بۆ ئەنجامدانی ئۆپەراسیۆنی سەربازی لە سووریا و عێراق دژی داعش،  لەپەیوەندییەكی تەلەفۆنیدا لەگەڵ مەولود چاوشئۆغڵو، وەزیری دەرەوەی توركیا رەخنەی لەو رێگەچارانە گرت كە بۆ بەرەنگاربوونەوەی تیرۆر لە ناوچەكە هاتوونەتە ئاراوە و نیگەرانی خۆی دەربڕی لە هەر هەنگاوێك كە ئەو دۆخەی ئێستا لە ناوچەكە هەیە ئاڵۆزتر بكات.

وەزیری دەرەوەی ئێران داوادەكات وڵاتانی ناوچەكە بە بەرپرسیاریەتییەوە مامەڵە بكەن و نەبنە یارمەتیدەری خراپتربوونی دۆخی ناوچەكە. لەبەرامبەریشدا وەزیری دەرەوەی توركیا بە روونكردنەوەی چۆنیەتی بەشداری سەربازی توركیا لە هاوپەیمانێـی نێودەوڵەتی دژی داعش رایگەیاند،" پابەندین بە یەكپارچەیی خاك و سەربەخۆیی وڵاتانی ناوچەكە ".

پەرلەمانی توركیا لە دانیشتنی ئەمڕۆیدا 2ی تشرینی یەكەمی 2014، بە 298 دەنگی بەڵێ بەرامبەر 98 دەنگی نەخێر، رەزامەندی لەسەر پڕۆژەپێشنیازی حكومەتی ئەنقەرە دەربڕی بۆ رووبەڕووبوونەوەی گرووپی دەوڵەتی ئیسلامی (ناسراو بە داعش) و ئەنجامدانی ئۆپەراسینی سەربازی لە عێراق و سووریا دژی ئەو گرووپە.

بەپێی پرۆژەكە، هەركاتێك كۆماری توركیا هەستی بە مەترسی دەرەكی كرد لەسەر ئاسایشی نیشتمانی، ئەوا دەتوانێت ئۆپەراسیۆنی سەربازی لە دەرەوەی خاكی وڵاتەكەی ئەنجامبدات.</sup>

^2/10/2014

هاوسەرۆكی پارتی دیموكراتی گەلان HDP ناوەڕۆكی كۆبوونەوەكەی لەگەڵ سەرۆك وەزیرانی توركیا ئاشكرا كرد و داوایکرد، کە "توركیا راهێنانی سەربازی بە شەڕڤانانی یەپەگە بدات".

لە بارەی كۆبوونەوەكە، كە رۆژی چوارشەممە 1ـی ئۆکتۆبەر لە باڵەخانەی ئەنجوومەنی وەزیرانی تورکیا بەڕێوەچوو، سەڵاحەدین دەمیرتاش، هاوسەرۆکی پارتی دیموکراتی گەلان، رایگەیاند، "ئەحمەد داودئۆغڵو، سەرۆک وەزیرانی تورکیا دەڵێ، (پێویستە داعش لە دەوروبەری كۆبانێ و عێراق وەدەربنرێ)، بەڵام ئێمە دەنگی نەخێر بە پڕۆژەیاسای رێگەپێدانی پەرلەمان بە سوپای توركیا بۆ ئەنجامدانی کردەوەی سەربازی لە دەرەوەی سنوور دەدەین".

دەمیرتاش لە زاری داودئۆغڵوەوە بیستوویەتی، کە "توركیا هاوكاری داعش ناكات". لەبارەی كردنەوەی سنووری توركیا بە رووی هاونیشتمانییانی كۆبانێش قسەیان كردووە و داودئۆغڵو پێیگوتووە، كە "دەروازەی سنووریی كۆبانێ بەرووی هەموو هاوكارییەكی مرۆیی كراوە دەبێت".

هاوسەرۆكی HDP هۆكاری خواستی توركیا بۆ دروستكردنی هەرێمێكی دژە فڕین لە باكووری سووریا (رۆژئاوای كوردستان) ئاشكرا دەكات و دەڵێ، كە "گوایە ئامانجی توركیا ئەوەیە رێگری لە فڕۆكەكانی رژێمی سووریا بكرێت لە ئاسمانی هەرێمەكەدا بفڕن".

لەبارەی پرۆژەیاسای رێگاپێدانی پەرلەمانی توركیا بە سوپای ئەو وڵاتە بۆ ئەوەی ئۆپەراسیۆنی سەربازی لە دەرەوەی سنوور ئەنجامبدات، دەمیرتاش گوتی: "توركیا دەڵێ كە ئەم پڕۆژە یاسایە پڕۆژە یاسای شەڕكردن نییە، چونكە ئەگەر وەك راگەیاندنی شەڕ لە دژی پەكەكە بناسێنرێ، زیان بە رۆحییەتی پڕۆسەی ئاشتی دەگەیەنێت".

دەمیرتاش بەباشی دەزانێ، كە توركیا راهێنانی سەربازی بە شەڕڤانانی یەپەگە بدات و چەكیان پێبدات، بە بۆچوونی ئەو، ئەم رێگایە لۆژیكیترە و پەرە بە پەیوەندی كورد- تورك دەدات.

ئەو دەڵێ: "گەنگەشەی ئەوە دەكرێ كە ئەگەر توركیا چەك بە YPG بدات سبەی رۆژێ ئاگربەست كۆتایی پێدێت و ئەو چەكانە بەرەوڕووی توركیا دەبنەوە"، بەڵام ئەگەر پڕۆسەی ئاشتی بە رێگایەكی تەندروستدا بڕوات، ئەم نیگەرانییانە نامێنن".

دەمیرتاش ئاشكرای كرد، كە دەنگی "نەخێر" بە پڕۆژە یاساكە دەدەن، كە ئەمڕۆ پێنجشەممە 2ـی ئۆکتۆبەر لە پەرلەمانی توركیا دەنگدانی لەسەر دەكرێت و گوتی: "دەنگدان بە نەخێر مانای ئەوە نییە بڵێین بێندەگ بن بەرامبەر ئەوەی لەسووریا روودەدات، رەخنەی زۆرمان لە ئەنجامدانی ئۆپەراسیۆنی زەمینی سوپای توركیا هەیە، پشتیوانیكردنی ئەو هێزانەی راستەوخۆ رووبەڕووی رژێم و داعش دەبنەوە ئەنجامی باشتر بەدەستەوە دەدات".

02/10/2014

هاوسەرۆكی پارتی یەكێتی دیموكراتی PYDدەڵێت، دروستكردنی هەرێمی پاراستن، داگیركردنە و ئاماژە بەوە دەكات، كاتێك پەیەدە بەرەنگاری رژێمی سووریا دەبووینەوە، "تورکیا بە بەردەوامی هەماهەنگییان لەگەڵ رژێمی سووریا هەبوو".

ساڵح موسلیم، هاوسەرۆكی پارتی یەكێتی دیموكراتی رەخنە لە قسەكانی وئەحمەد داودئۆغڵو، سەرۆک وەزیرانی تورکیا دەگرێت و دەڵێت: "ژمارەیەكی زۆر كەسمان شەهید بوو، لە زیندانەكان بەرخودانیان كرد، بەڵام ئەوان لە حەلەب و دیمەشق بەوانیان دەگوت براكانمان، ئێمەش لەو كاتەی ئەوان قۆڵیان نابووە قۆڵی رژێم، لەشەڕدابووین لەگەڵ ئەو رژێمە".

ساڵح موسلیم ئاماژەی بەوەشکرد، کە "خەڵكی رۆژئاوای كوردستان خاكی خۆیان دەپارێزن و دروستكردنی هەرێمی پاراستن لەلایەن توركیاوە، وەك داگیركاری سەیر دەكەین".

لە وەڵامی دەنگۆی بەزاندنی سنووری خاكی رۆژئاوای كوردستان و رەتكردنەوەی داودئۆغلو، كە گوتبووی: (كەس ناتوانێ ئەمە بسەلمێنێ) موسلیم گوتی: "هەموو كەس ئەو راستییە دەزانێت سنووریان بەزاندووە، بەڕێز داودئۆغڵو ناتوانێ لەو راستییەی، كە بەرچاوی هەموو خەڵكە وەك درۆزن دەربكەوێت".

لەبەشێکی دیکەی گوتەکانی، هاوسەرۆكی پارتی یەكێتی دیموكراتی رایگەیاندووە، "ئێمە هەمیشە دەستی برایەتیمان بۆ توركیا درێژكردووە، خەڵكی هەردوو دیوی سنوورەكەش خەڵكی خۆمانن، لەبەر ئەوە پاراستنی ئەمنییەتی سنوور بەر لە هەر كەس پەیوەندی بە خۆمانەوە هەیە".

ساڵح موسلیم پێیوایە كۆبانێ نوێنەرایەتی هەرچوار پارچەی كوردستان دەکات، "چارەسەركردنی كێشەی كورد لە كۆبانێ دەستپێدەكات و كۆبانێ ئێستا كوردی هەرچوار پارچەی كوردستانی یەكخستووە، بۆیە كۆبانێ خۆی رادەست ناكات، ناكەوێ، خەڵك و ئەو شەڕڤانانەی لەوێن تاوەکو كۆتایی بەرەنگاردەبنەوە".

02/10/2014

وەزارەتی بەرگری فەرەنسا رایگەیاند، لە چوارچێوەی هەوڵەكانی وڵاتانی هاوپەیمانی نێودەوڵەتی، كە ویلایەتە یەكگرتوەكانی ئەمریكا سەركردایەتی دەكات، وڵاتەكەی سێ فڕۆكەو كەشتییەكی جەنگی رەوانەی كەنداو دەكات.

وەزارەتی بەرگری فەرەنسا لە بەیاننامەیەكدا رایگەیاند:  بۆ هاوكاریكردنی هێزە سەربازییەكانی عێراق لە شەڕی داعش، فەرەنسا سێ فڕۆكەی جەنگی جۆری رافال لە ئیماراتی عەرەبی یەكگرتوو جێگیر دەكات، هاوكات كەشتییەكی جەنگیش دەنێرێتە كەنداو و بە بەكارهێنانی توانا دەریاییەكانمان، دەتوانین هاوكاری زیاتری عێراق بكەین لە رووی چاودێریكردنی جموجۆڵی گرووپە چەكدارەكان".

بە جێگیركردنی ئەم سێ فڕۆكەیە، ژمارەی فڕۆكە جەنگییەكانی فەرەنسا، كە بۆ هاوكاریكردنی عێراق لە ئیماراتی عەرەبی یەكگرتوو جێگیریكراون، دەبێتە 9 فڕۆكە.

هەوڵەكانی رێكخراوی داعش بۆ كۆنتڕۆڵكردنی سووریا و عێراق كۆمەڵگەی نێودەوڵەتی نیگەرانكردووە، لەم رووەوە ژمارەیەك وڵاتی رۆژئاوایی و عەرەبی نیگەرانی خۆیان لە ئاست هەوڵەكانی داعش نیشاندا بۆ كۆنترۆڵكردنی سوریاو عێراق، پێش ئەوەی هێزی هاوپەیمانان بەسەرۆكایەتی ئەمریكا هێرشە ئاسمانییەكانیان دژی بنكەو بارەگاكانی داعش لە سوریاو عێراق دەستپێبكات.

02/10/2014

هاوسەرۆكی پارتی دیموكراسی گەلان و سەرۆكوەزیرانی توركیا لە كۆبوونەوەیەكدا تاووتوێی دوایین پێشهاتەكانی پرۆسەی ئاشتییان كرد.

دوای نیوەڕۆی نیوەڕۆی ئەمڕۆ 01-10-2014 سەڵاحەددین دەمیرتاش، هاوسەرۆكی پارتی دیموكراسی گەلان HDP سەردانی ئەحمەد داودئۆغڵو، سەرۆكوەزیرانی توركیای كرد.

بەپێی زانیارییەكان، مەبەستی سەردانەكە تاوتوێكردنی پێشهاتەكانی پرۆسەی چارەسەری بووە لەگەڵ ئەو پرۆژەیاسایەی شەوی پێشوو نێردرا بۆ پەرلەمانی توركیا بەمەبەستی پێدانی دەسەڵات بە سوپا بۆ ئەنجامدانی ئۆپەراسیۆنی سەربازی لە دەرەوەی سنوورەكانی ئەو وڵاتە.

هاوكات لە سەردانەكەدا، دەمیرتاش تێڕوانینەكانی سەبارەت بە كۆبانێ دوای سەردانەكەی بۆ ئەو شارە گەیاندە سەرۆكوەزیرانی توركیا و لە لێدوانێکدا رایگەیاندووە، کە کۆبوونەوەکە بەشێوەیەکی باش بەڕێوەچوو و زۆر ئەرێنی بووە".

دەمیرتاش لە کۆنگرەیەکی رۆژنامەوانیدا لەدوای کۆبوونەوەکە، پشتیوانی خۆی بۆ حکومەتەکەی داودئۆغڵو راگەیاند و گوتویەتی، "هەرچیمان لەدەست بێ بۆ بەرەوپێشبردنی پرۆسەی ئاشتی، دەیکەین".

هاوسەرۆکی پارتی دیموکراسی گەلان هەروەها سوپاسی داودئۆغڵو و حکومەتی تورکیای کردووە، لەبەرامبەر کردنەوەی سنوورەکانی تورکیا بەسەر ئاوارەکانی رۆژئاوای کوردستان.

لە كۆبوونەوەكەدا هەریەك لەیاڵچن ئاكدۆغان، جێگری سەرۆكوەزیرانی توركیا و سەلما ئیرماك، ئەندام پەرلەمانی پارتی دیموكراسی گەلان HDP بەشدار بوون.

01/10/2014

ئەندامێكی سەركردایەتیی یەكێتی رایدەگەیێنێت، كورد لە سوپا و دەزگا ئەمنییەكانی عێراق پەراوێزخراوە و بە پێی قەبارە و قورسایی خۆی مافی پێنەدراوە.
 
ئارێز عەبدوڵڵا، پەرلەمانتاری عێراق و ئەندامی سەركردایەتیی یەكێتی نیشتمانیی كوردستان بە تۆڕی میدیایی رووداوی راگەیاند:" دامودەزگا ئەمنییەكان و سوپای عێراق هاوسەنگی لە نێوان پێكهاتەكان تێدانییە، كورد لە زۆر دەزگا ئەمنی پشكی نییە یاخوود زۆر كەمە، ئەمەش لەگەڵ مەبدەئی تەوافوق و بەشداری حەقیقی ناگونجێ‌".
 
سەبارەت بە پشكەكانی كورد لە سوپای عێراق و دەزگا ئەمنییەكان، ئارێز عەبدوڵڵا دەڵێ‌:" سوپاسالار و سەرۆكی دەزگای هەواڵگری سەربازی كوردن، بۆیە ئەو دوو پۆستە ئەمنییە هەر لە لایەن كورد دەمێننەوە، بەڵام تاوەكو ئێستا ئەم بابەتە یەكلانەكراوەتەوە كە ئایا دەستكاری بەرپرس و فەرماندە سەربازییەكان دەكرێت یان نا، ئەم بابەتە بە دانوستاند و گفتوگۆكانی نێوان شاندی دانوستاندكاری كورد و لایەنەكانی دیكەی عێراق بە تایبەتی شیعەكان بەستراوەتەوە".
 
ئەو ئەندامەی سەركردایەتی یەكێتی كە هاوكات پەرلەمانتاری عێراقیشە، رەخنە لە سیاسەتەكانی نووری مالیكی، سەرۆكوەزیرانی پێشووی عێراق لە ناو سوپاو دامەزراوە سەربازی و ئەمنییەكان دەگرێت و دەڵێت‌:" بە گوێرەی دەستوور سەرۆكوەزیران فەرماندە سەربازی و بەرپرسی دەزگا ئەمنییەكان كاندیددەكات و پەرلەمانی عێراق بە دەنگدان ئەو كەسانە دەستنیشاندەكات، بەڵام لە ماوەی 8 ساڵی رابردوودا مالیكی بەبێ‌ گەڕانەوە بۆ پەرلەمان هەموو بەرپرس و فەرماندە سەربازییەكانی دادەنان".

01/10/2014

پڕۆفیسۆر د.هەننەر فورتگ، پسپۆڕی كاروباری رۆژهەڵاتی ناوەڕاست و بەڕێوەبەری پەیمانگەی ئەڵمانی بۆ لێكۆڵینەوە جیهانییەكان (GIGA) لە زانكۆی هامبۆرگ، دەڵێت دراوسێیەكانی كورد نایانەوێ دەوڵەتێكی كوردی لە رۆژهەڵاتی ناوەڕاستدا دروست ببێت. بەڵام بارودۆخی رۆژهەڵاتی ناوەڕاست بە جۆرێك شڵەژاوە كە "كەس نازانێت ئەنجامەكەی چی دەبێت".

ئەو توێژەرە ئەڵمانە لە هەڤپەیڤینێكدا لەگەڵ گۆڤاری فۆكوس دەڵێ "لە دوای جەنگی یەكەمی جیهانییەوە لە عێراق نەتوانراوە هەستی هاووڵاتیبوون و بوونە نەتەوە لەنێو خەڵكەكەیدا دروست بكرێت، مرۆڤ ناتوانێت بڵێت كە خەڵكی عێراق وەكو هاونیشتمانی خۆشەویستییان بۆ دەوڵەتەكەیان نییە، بەڵام دەتوانێت بڵێت كە متمانەی هاونیشتمانیان بە دەوڵەتی عێراق هەمیشە لاواز بووە".

بەبڕوای ئەو، یەكێكی دیكە لە كێشەكانی عێراق ئەوەیە كە دراوسێكانی نایانەوێت دابەش ببێت "چونكە هەموو دراوسێكانی عێراق لە چەندین نەتەوە پێكدێن. ئەوان پێیانوایە دابەشبوونی عێراق واتە دابەشبوونی ئەوانیش".

فورتگ وەك زۆربەی پسپۆڕ و شارەزا رۆژئاواییەكان باسی رۆڵ و پێگەی كورد دەكات لە رۆژهەڵاتی ناوەڕاست و پێیوایە كورد بوونی خۆی لە جیهاندا سەلماندووە، بەڵام دەڵێت كورد بۆ مەسەلەی سەربەخۆیی دەبێت بە وریاییەوە بڕیار بدات.

لەوبارەوە دەڵێت "وڵاتانی رۆژئاوا دەزانن هەرێمی كوردستان لە رۆژهەڵاتی ناوەڕاستدا تەنیا جێگایەكی ئارامە. بەیارمەتی ئەمریكا و بە لەناوبردنی سەدام لە ساڵی 2003، كورد خۆی سەلماند كە تەنیا ئەوان بۆ بەرژەوەندییەكانی وڵاتانی رۆژئاوا هاوپەیمان و جێی متمانەن".

بە بۆچوونی فۆرتگ، ئەوەی ئێستا لە رۆژهەڵاتی ناوەڕاست روودەدات لە بەرژەوەندیی كوردە، بۆیە رۆژ بەڕۆژ پرسی سەربەخۆیی زیاتر دێننە پێشەوە "كورد حەز دەكات خۆی لە عێراق دووربخاتەوە و سەربەخۆیی خۆی فراوانتر بكات. بارودۆخی ئێستاش ئەوە ئاشكرا دەكات كە رۆژ بە رۆژ سەربەخۆیی كورد فراوانتر و بەهێزتر دەبێت".

بەبڕوای ئەو، كێشەی گەورەی كورد ئەوەیە كە خاكەكەیان لە نێوان چوار دەوڵەتدا پارچەپارچە كراوە و لەنێو ئەو وڵاتانەدا دەژین. ئەگەر لە ‌بارودۆخی ئەمڕۆدا دامەزراندنی دەوڵەتێكی كوردستانی زۆر ناواقعیش بێت، بەڵام وردە وردە دەرفەتی ئەوە فەراهەم دەبێت، ئەگەر حكومەتی هەرێمی كوردستان بتوانێت سوود لە سەركەوتنەكانی ئێستای وەربگرێت".

بەڵام دەشڵێت "پێویستە مەسعود بارزانی، سەرۆكی هەرێمی كوردستان بۆ بڕیارێكی لەوجۆرە باش بیربكاتەوە. چونكە سەربەخۆییەكی فراوانتر یان كۆنفیدراڵییەكی راستەقینە لەگەڵ عێراق بۆ بەرژەوەندی كورد باشتر دەبێت، لەبەر ئەوەی دراوسێكانی نایانەوێت دەوڵەتێكی سەربەخۆ لە كوردستان دابمەزرێ".

01/10/2014

سکرتێری گشتی حیزبی دیموکراتی کوردستان دەڵێت ساڵێک پێش ئێستا کاربەدەستانی کۆماری ئیسلامی ئێران لە رێگەی لایەنێکی سێیەمەوە، داوایان لەو حیزبە کردووە لەبارەی پرسی کورد و رێگەکانی چارەسەری ئەو پرسە لە رۆژهەڵاتی کوردستان، بۆچوونی خۆیانیان پێ بڵێن.  خالید عەزیزی بە ئاژانسی ئەنادۆڵی راگەیاندووە، لە بەرامبەر ئەو داواکارییەی کۆماری ئیسلامی ئێراندا، حیزبی دیموکراتی کوردستان پێی راگەیاندوون کە بەرپرسانی ئێران دەبێ سەرەتا ئەو راستییە بزانن کە نە کورد دەتوانێ حکومەتی کۆماری ئیسلامی برووخێنێ و نە کۆماری ئیسلامیش دەتوانێ کورد لەناوببات، بۆیە باشترە رێگەچارەیەکی سیاسی بۆ بدۆزرێتەوە.   بەگوتەی سکرتێری گشتی حیزبی دیموکراتی کوردستان، ئەوان پەیامێکیان بۆ بەرپرسانی ئێران ناردووە و تێیدا ئاماژەیان بە چوار خاڵ وەکو بنەما کردووە. یەکەم ئەوەی کە بەرپرسانی ئێران بگەڕێنەوە سەر ئەو بەشە لە قسەکانی ئایەتوڵڵا خومەینی کە باسی دانوستاندن و گفتوگۆ دەکات. خاڵی دووەمیشیان ئەوە بووە کە پرسی کورد پرسێکی سیاسی و نەتەوەییە و لە ژوورەکانی سوپای پاسداران و ئیتلاعات چارەسەر ناکرێ، بەڵکو ئەو پرسە دەبێ بچێتە سەر مێزی حکومەت. هەروەها وەکو بنەمای سێیەم پێیان راگەیاندوون، ئێوە كە باسی چارەسەركردنی پرسی كورد دەكەن بۆ خەڵک دەگرن و زیندانییان دەكەن، دەبێ ئازادیان بكەن و نیازپاكی پێشان بدەن. چوارەمیش ئەوەی کە پێیان گوتوون، ھێندە بەچاوی ئەمنی سەیری رۆژهەڵاتی كوردستان نەکرێ، کە بە گوتەی حیزبی دیموکراتی کوردستان لە تەواوی ناوچەکانی رۆژهەڵاتی کوردستان بنکەی سوپای پاسداران و بەسیج داندراوە.  بە گوتەی خالید عەزیزی، داواشیانکردووە بەرپرسانی ئێران لەگەڵ حیزبەکانی دیکەی رۆژهەڵاتی کوردستانیش قسە بکەن و بۆچوونیان وەربگرن، بەڵام ئەوان ئەو کارەیان نەکردووە.  سکرتێری گشتی حیزبی دیموکراتی کوردستان هەروەها دەڵێت تاوەکو ئێستا هیچ وەڵامێک بە پەیامەکەی ئەوان نەدراوەتەوە.  پێشمەرگەکانی حیزبی دیموکراتی کوردستان لە ماوەی رابردوودا بە ناوی پارێزەرانی رۆژهەڵاتی کوردستان، لە ناوچەکانی سەردەشت، مەریوان، سنە، ورمێ، شنۆ و پیرانشار لەگەڵ هێزەکانی حکومەتی ئێران تووشی پێکدادان بوون، کە بەهۆیەوە پێشمەرگەیەکی ئەو حیزبە شەهیدکراو و بە گوتەی پارێزەرانی رۆژهەڵاتی کوردستان زیاتر لە 20 کەس لە هێزەکانی حکومەتی ئێران کوژراون و بریندار بوون.  خالید عەزیزی لەبارەی ئەو تێکهەڵچوونانە رایگەیاندووە، جگە لە پێشمەرگە ئاشکراکانیان، هەزاران ئەندام و لایەنگری چەکداریان لەنێوخۆی رۆژهەڵاتی کوردستان هەیە، بەڵام رێنماییان پێداون کە هێرش نەکەنە سەر بنکەکانی کۆماری ئیسلامی ئێران، بەڵام لەو شوێنانەی کە هێرشیان بکرێتە سەر، بەدەنگ دێن و بەرگری لەخۆیان دەکەن.ئاماژە بەوەشدەکات، لەنێوخۆی حیزبی دیموکراتی کوردستاندا، قسە لەسەر چۆنیەتی دەستپێکردنی چالاکی چەکداری دەکرێ بۆئەوەی کە بتوانن جۆڵانەوەیەکی جەماوەری رێکخراو دروست بکەن. هاوکات جەخت لەسەر ئەوەشدەکاتەوە، ئەگەر کۆماری ئیسلامی ئێران رێگە بۆ خەباتی مەدەنی برەخسێنێ و چالاکی حیزبەکانی بکاتەوە، ئەوان ناچار بە چەک هەڵگرتن نابن.

01/10/2014

دوای‌ ئه‌وه‌ی‌ جۆرده‌ن ماتسۆنی‌ ئه‌مریكی‌ بۆ هاوكاریكردنی‌ هێزه‌كانی‌ یه‌په‌گه‌ له‌ رووبه‌ڕووبوونه‌وه‌ی‌ داعش رووی‌ له‌ رۆژئاوای‌ كوردستان كرد، له‌ په‌یجی‌ تایبه‌تی‌ خۆی‌ په‌یامێك و چه‌ند وێنه‌یه‌ك بڵاوده‌كاته‌وه‌.

ماتسۆن، له‌ تۆڕی‌ كۆمه‌لایه‌تی‌ فه‌یسبووك ده‌نوسێت"بۆ هه‌موو ئه‌وانه‌ی‌ كه‌ نازانن له‌ سوریام، من بۆ یه‌په‌گه‌ دژی‌ داعش شه‌ڕ ده‌كه‌م له‌م وڵاته‌، پێیان ده‌ڵێم من باشم، ناتوانم زۆر له‌سه‌ر خه‌ت بمێنمه‌وه‌، چونكه‌ له‌م رۆژانه‌دا شه‌ش كاتژمێر شه‌ڕمكردووه‌، به‌ڵام زۆر باشم".

له‌ به‌شێكی‌ دیكه‌ په‌یامه‌كه‌یدا ده‌ڵێت: "له‌ رووبه‌ڕووبوونه‌وه‌كاندا چه‌ند داعشێكی‌ نه‌زانمان ناردووه‌ بۆ جه‌هه‌نم، تكاتان لێده‌كه‌م دۆعا بۆ من و ئه‌مریكییه‌كان و كورده‌ جه‌نگاوه‌ره‌كانیش بكه‌ن و زۆر سوپاستان ده‌كه‌م".

هه‌روه‌ها ئه‌و شه‌ڕكه‌ره‌ ئه‌مریكییه‌، ده‌ڵێ‌: "هه‌وڵ ئه‌ده‌م چه‌ند وێنه‌یه‌كی‌ دیكه‌ی‌ خۆمتان بۆ بڵاوبكه‌مه‌وه‌ ئه‌گه‌ر به‌خت یاوه‌ر بێت و نه‌مرم".

له‌ دوای‌ ئه‌وه‌ی‌ چه‌كدارانی‌ داعش په‌لاماری‌ كانتۆنی‌ كۆبانی-یان دا، هه‌واڵه‌كانی‌ رۆژئاوای‌ كوردستان له‌ جیهاندا مانشێتی‌ میدیاكان بوو.

له‌و چوارچێوه‌یه‌شدا جۆرده‌ن ماتسۆنی‌ ئه‌مریكی‌ خۆی‌ گه‌یانده‌ رۆژئاوای‌ كوردستان و له‌گه‌ڵ گه‌ریلاكانی‌ یه‌په‌گه‌ ده‌ستی‌ به‌ شه‌ڕ دژی‌ داعش كرد.

شه‌ڕكردنی‌ ئه‌م ئه‌مركییه‌ له‌ كاتێكدایه‌ كه‌ هاوپه‌یمانیه‌كی‌ نێوده‌وڵه‌تی‌ بۆ رووبه‌ڕووبوونه‌وه‌ی‌ داعش پێكهاتووه‌ و له‌ ئێستادا چه‌كدارانی‌ ئه‌و رێكخراوه‌ بۆردومان ده‌كرێن.

30/09/2014

سوپای ئەمریكا رایگەیاند، كە بە هەموو شێوەیەك پشتگیریی لە پلانی رێكخستنەوە و مەشقپێكردن و پڕچەككردنی پێشمەرگە دەكات و دڵنیاییدا، كە هاوكارییەكانیان لە رووی مەشق و لۆجستییەوە درێژەی دەبێت.

ئەمڕۆ 30-9-2014 مستەفا سەید قادر، وەزیری پێشمەرگەی هەرێمی كوردستان لەگەڵ ژەنەراڵ چارڵی مۆر جێگری بەرپرسی نووسینگەی ئاسایشی سوپای ئەمریكا لە عێراق و كۆڵۆنێڵ فریمان نوێنەری سوپای ئەمریكا لە نووسینگەی ئۆپەراسیۆنی هاوبەش لە هەولێر كۆبووەوە.

بەپێی راگەیێندراوی وەزارەتی پێشمەرگە لە كۆبوونەوەكەدا دوایین پێشهاتە سەربازییەكانی ناوچەكە و پێشڕەوییەكانی پێشمەرگە و چۆنێتی گەیشتن و وەرگرتنی هاوكارییە سەربازییەكانی وڵاتانی هاوپەیمان بۆ پێشمەرگە باسیان لێوەكرا.

هەر بەپێی راگەیێنراوەكە مستەفا سەید قادر لە كۆبوونەوەكەدا سوپاسی هاوكاری و پاڵپشتی سەربازی و لۆجیستییەكانی ئەمریكا و وڵاتانی هاوپەیمانی نێودەوڵەتی كردووە، كە بە شێوەیەكی خێرا پشتگیرییەكانیان بۆ پێشمەرگە راگەیاند و ئێستاش لە مەیداندا هاوكار و پشتیوانی هێزی پێشمەرگەن.

لە بەشێكی دیكەی كۆبوونەوەكەدا كە ئەنوەری حاجی عوسمان بریكاری وەزارەت و جەبار یاوەر ئەمینداری گشتی وەزارەتی پێشمەرگە تێیدا ئامادەبوون، ئالیەتێكی نوێ بۆ رێكخستنەوەو مەشقپێكردن و پڕچەككردنی پێشمەرگە گفتوگۆی لەبارەوە كرا و شاندی سوپای ئەمریكا رایانگەیاندووە، كە بە هەموو شێوەیەك پشتگیری لەو پلانە نوێیە دەكەن و لە رۆژانی ئایندەیشدا كاری زیاتر لەسەر ئەم پرسە دەكەن و دڵنیاییشیان داوەتە وەزارەتی پێشمەرگە، كە وڵاتانی هاوپەیمانان لە سەر‌ووشیانەوە ئەمریكا، هاوكارییەكانی لە رووی مەشق و لۆجستییەوە درێژە پێبدات.

30/09/2014