<sup>ڤلادیمێر پوتین، سەرۆكی رووسیا لە سەردانەكەی بۆ ئەنقەرە و لە كۆنفڕانسێكی رۆژنامەوانیدا لەگەڵ رەجەب تەییب ئەردۆغان، سەرۆككۆماری توركیا مژدانەی ئەوەی دایە توركیا، كە سەدا 6 لە نرخی گازی سروشتی بۆ ئەو وڵاتە دادەبەزێنێت.

داشكاندنەكە لە سەرەتای ساڵای داهاتووەوە دەبێت و لەكۆبوونەوەی فیدراسیۆنی كۆنسەی باڵای هەماهەنگی نێوان رووسیا- توركیا بڕیاری لەسەر دراوە.

پوتین گوتی: "لە 1ی كانوونی دووەمی 2015ەوە نرخی گازی سروشتی رووسیا بۆ توركیا سەدا 6 دادەبەزێنین، لە داهاتوودا ئەو ژمارەیە زیاتریش دەبێت، ئەمە دەكەوێتە سەر ئەو هەماهەنگییەی نێوانمان چۆن دەبێت".

هاوكات لەسەر داوای توركیا 3 ملیار مەتر چوارگۆشە گازی زیاتر هەناردەی توركیا دەكرێت.

سووریا وەك تەوەرێكی سەرەكی كۆبوونەوەكە

رووسیای پشتیوانی ئەسەد و توركیای خوازیاری رۆیشتنی رژێمەكەی لە كۆبوونەوەكەیاندا نەیانتوانی بگەنە روانگە و هەڵوێستێكی هاوبەش لەسەر سووریا و هێشتا جیاوازی تێڕوانینیان درێژەی هەیە.

ئەردۆغان لە بارەی سووریاوە گوتی: "رژێمی ئێستای سووریا بەرەنجامی زوڵم، كوشتن و تیرۆرە و زۆر بە روونی گوتووومە كە دەبێ رابگیردرێ. ئەگەرچی ئێمە  و رووسیا لەسەر چارەسەركردنی ئەو كێشەیە هاوڕاین، بەڵام خاڵی بنەڕەتی چۆنێتی ئەو چارەسەركردنەیە كە جیاوازیمان هەیە".

هەروەها گوتی: "ئێمە و رووسیا لە هەمبەر داعش هەمان تێڕوانینمان هەیە و هیچ كێشەیەكمان لەبارەی بەرەنگاربوونەوەی تیرۆرەوە نییە، ئێستا داعش سەدا 40 ی خاكی عێراق و سەدا 30 خاكی سووریای بەدەستەوەیە، كە بەشێك لە پشتیوانییەكەی لە رژێمی سووریاوە وەردەگرێت".

ڤلادیمێر پوتین، سەرۆكی رووسیا تۆپی كێشەكەی خستە مەیدانی خەڵكی سووریا و گوتی، كە لەگەڵ هەموو لایەنەكان لە پەیوەندیدا دەبن و ئاماژەی بەوەكرد: "هەموومان دەزانین كە رەوشی سووریا ئاسایی نییە، ئایا ئێمە پێداگر دەبین لە مانەوەی ئەسەد؟ ئەم پرسیارە رووبەڕووی خەڵكی سووریا دەكەمەوە، لەوێ هەڵبژاردن كرا، قسەو باسی جیاوازی لەبارەوە كرا، بەڵام هەموومان بینیمان كە ئەسەد زۆرینەی دەنگەكانی بەدەستهێنا".

بازرگانی بە بەهای 100 ملیار دۆلار

ئەم سەردانەی پوتین بە ئامانجی پێشخستنی پەیوەندی و هەماهەنگییەكانی وزە و بازرگانییە، ئەردۆغان گوتی "دەمانەوێ پەیوەندی بازرگانیمان بگەیێنینە 100 ملیار دۆلار"، لە روانگەی پوتینەوە ئامانجێكی سەختە، بەڵام وەك خۆی دەڵێت "دەبێ وەدیبێت".

پوتین گوتیشی: "ئامادەین رێژەی هەناردەكردنی وزە بۆ توركیا بەپێی خواستی ئەو وڵاتە بەرز بكەینەوە و توانای بۆری هەناردەكاری گازپڕۆم زیاد بكەین".</sup>

^2/12/2014

http://rudaw.net/sorani/middleeast/iran/011220144

<sup>سوپای پاسدارانی ئێران بەردەوامە لە دروستکردنی چەک و مووشەکی درێژمەودا و رایگەیاندووە، مووشکی سجیل دوویان دروستکردووە، کە "لە توانایدایە هەموو بستێکی خاکی ئیسرائیل بکاتە ئامانج".

خێرایی ئەو مووشەکە ١٩٠٠ کیلۆمەترە و ئەمە یەکەمجارە ئێران بتوانێت، مووشەکێک دروست بکات کە سووتەمەنییەکەی لە جۆری وشک بێت. پێشتر ئێران مووشەکی قەدەر و شەهابی دروست کردبوو کە مەودای ٢ هەزار کیلۆمەتری دەبڕی بەڵام، سووتەمەنییەکەی لە جۆری شل بوو.</sup> 

^2/12/2014

<sup>ئەندامێكی شاندی دانوستاندنكاری پارتی دیموكراسی گەلان HDP لەسەر زاری عەبدوڵڵا ئۆجەلانەوە هۆشداری بە پارتی داد و گەشەپێدان دەدات بەرامبەر ئەگەری روودانی كودەتای سەربازی.

سرری سورەییا ئۆندەر، ئەندامی شاندی دانوستاندنكاری پارتی دیموكراسی گەلان رایگەیاند، كە لە داویین سەردانیاندا بۆ دوورگەی ئیمراڵی، عەبدوڵڵا ئۆجەلان، سەرۆكی بەندكراوی پارتی كرێكارانی كوردستان PKK باسی لە گۆڕانكارییەكانی نێو ئەنجوومەنی ئاسایشی نەتەوەیی توركیا و هێزە تایبەتەكان كردووە، كە لە لایەن حكومەتەوە ئەنجامدەدرێن و گوتوویەتی "ئەو جۆرە گۆڕانكارییانە میكانیزمی كودەتا دەخەنەكار و یەكەم كەسیش حكومەت دەڕووخێنن".

ئۆندەر ئەوەشی خستەڕوو كە ئۆجەلان فەرمانی كردووە پارتی دیموكراسی گەلان HDP لە هەڵبژاردنی داهاتوودا وەكو پارت بەشدارببێت، بە پێچەوانەی هەڵبژاردنەكانی پێشووەوە كە لەبەر مەترسی نەبڕینی بەربەستی  10% ی هەڵبژاردن بە لیستی كاندیدی سەربەخۆ بەشدارییان دەكرد.</sup>

^1/12/2014

<sup>پارێزگای سنە چەندین کانگای دەوڵەمەندی تێدایە، کە بە بەرهەمهێنانی مادەکانی، دەتوانێت رۆڵێکی باش لە بووژانەوەی ئابووری ئەو پارێزگایە بگێڕێت.

بەرهەمهێنان لە کانگاکانی ئەو پارێزگایە، یەک لەوان کانگاکانی شاری قۆروە وەک پێویست سەرمایەگوزاری بۆ نەکراوە و کەڵکێکی ئەوتۆی بۆ خەڵک نییە. هەڵبەت هەندێک لە سەرمایەداران بە پرۆژەکانیان هەلی کاریان بۆ ژمارەیەکی کەم لە خەڵک رەخساندووە، بەڵام مووچەکانیان ماندووێتییەکەیان قەرەبوو ناکاتەوە.

ئەو بەرهەمە کانگایانەش بە خاوی دەنێردرێنە دەرەوەی شار و گوندەکانی ئەو پارێزگایە و جیا لەوەی قازانجی بۆ هاونیشتمانیان نابێت، خەسارێکی بەرچاوی بۆ ژینگە و کشتوکاڵی خەڵکی بوومی بە دواوە دەبێت.

جێگری پلاندانان و ئاوەدانی  قایمقامی قۆروە دەڵێت: خاو فرۆشی، نەبوونی کەرەستەی پیشەسازی، رەچاونەکردنی یاسای ژینگەپارێزی و بەرهەمە کانگاییەکان یەکێک لە گرفتەکانی کانگاکانی شاری قۆروەیە.

بە پێی ئامارە راگەیێندراوەکان، ٣ کانگای چالاکی بەردی مەڕمەڕ، ٣٢ کانگای چالاکی بەردی مەڕمەڕیت، ٩ کانگای بەردی مەڕمەڕیتی سوور، ٣ کانگای بەردی گەچی، ١٢ کانگای بەردی ئاسن، ١٢ کانگای بەردی ئاهەک، ٦٤ کانگای بەردی لاشە، ١ کانگای بەرد، ٣ کانگا پووکە، ١ کانگای فلۆرین، ٢ کانگای سیلیس، ١ کانگای ئانتیموان و ١ کانگای تراورتن لە پارێزگای سنەدا هەن، کە بە گشتی ١٤٢٠ ئەندازیار، تێکنێسیەن و کرێکار تێیدا کار دەکەن.

عەبدولمحەممەد زاهێدی پارێزگاری سنە دەڵێت: راستە کە خام فرۆشی لەو پارێزگایەدا دەکرێت، بەڵام ئێستا یەکێک لە یەکە بەرهەمهێنەرەکان رێگەی پێدراوە کە بە ئاڵوگۆر لە مادەکانگایەکان، بەرهەمی نوێ پێکبێنێت و ئەگەر کەرتە تایبەتەکان توانای بەرهەمهێنانیان نەبێت، حکوومەت لە رێگەی کۆمپانیای ئۆمیدڕوەوە دێتە نێو کاری بەرهەمهێنانی مادە کانگاییەکان.

زاهێدی ئاماژەی بە سەرمایە سەرگەردانەکان کردووە و گوتوویەتی: بە لەبەرچاو گرتنی ئەو داهاتە کەمەی کە خەڵی ئەو پارێزگایە لە ساڵدا هەیانە، سەرمایەی سەرگەردانی زۆر هەن، کە نە لە مامەڵەی بانکییەکاندا هەن و نە لە پەرەسەندی ئابووری پارێزگای سنە بە کار دەبردرێن.

جێگری پیشەسازی، بازرگانی و بازرگانی پارێزگای سنە دەڵێت: پێویستە خەڵک و بەرپرسانی حکوومی هەوڵبدەن سەرمایەداران رابگرن و پشتیوانییان لێ بکەن بۆ ئەوەی ئەوانیش بە مەبەستی رەخساندنی هەلی کار بۆ خەڵک هەنگاو هەڵبگرن.</sup>

http://rudaw.net/sorani/kurdistan/3011201423

فەلاح رەحیمی

^1/12/2014

<sup>ئەمڕۆ ڤلادیمێر پوتین، سەرۆكی رووسیا سەردانی توركیا دەكات، ئەگەرچی جیاوازییە سیاسییەكانی نێوانیان بە روونی دیارە، بەڵام تادێ هەماهەنگییە بازرگانییەكانیان پەرە پێدەدەن.

ئامانجی ئەو هەماهەنگییە بازرگانییە ئەوەیە قەبارەی بازرگانی نێوانیان، كە ئێستا 32 ملیار دۆلارە، تاوەكو ساڵی 2020 بیگەیێننە 100 ملیار دۆلار.
بیانووی هاتنی پوتین بەشداریكردنە لە كۆبوونەوەی كۆنسەی هەماهەنگی باڵای نێوان هەردوو وڵات كە لە توركیا ئەنجام دەدرێت.

 تورگوت گور، سەرۆكی فەخری ئەو كۆنسەیە دەڵێت: "لە لایەكەوە پرسی سیاسی، لەگەڵیشیدا پرسی ئابووری دەخرێتە رۆژەڤەوە، لەنێوان رووسیا و توركیا هەماهەنگی و پەیوەندی سیاسی، ئابووری، سەربازی هەیە و لە چەند ساڵی داهاتوودا زیاتریش پەرەیان پێدەدەین".

هەناردەكردن لەنێوان هەردوو وڵات كە لەساڵی 2003 ، 1.3 ملیار دۆلار بوو گەیشتووەتە 7 ملیار دۆلار، هاوردەكردنیش لە 5.4 ملیار دۆلارەوە بۆ 25 ملیار دۆلار بەرزبووەتەوە.

توركیا داوای داشكاندن لە رووسیا دەكات 

بەهۆی هاوردەكردنی سەرچاوەكانی وزەوە، هاوسەنگی پەیوەندی بازرگانی لە بەرژەوەندی توركیا شكاوەتەوە. تورگوت گور دەڵێ: "ئەم رەوشە تەواو ئاساییە، بەڵام لە دەرەوەی وزە پەیوەندییەكان نە باش نە خراپن".

هەروەها دەڵێ: "ئێمە ساڵانە بەبەهای  6-7 ملیار دۆلار هەناردەكاریمان بۆ رووسیا هەیە، هەناردەی ئەوانیش بۆ توركیا نزیكە لەمەوە، بەڵام ئێمە ناچارین وزە لە رووسیا وەربگرین".
تورگوت گور ئاشكرای دەكات، كە وزە گرنگترین پرس دەبێت كە لەم سەردانەی پوتین باسی لێوە دەكرێت.

توركیا بە رێژەی سەدا 58 بە رووسیاوە بەستراوەتەوە، بۆیە ئەنقەرە داوای داشكاندن لە نرخی گاز دەكات لە رووسیا، چونكە ئەو پارەیەی توركیا لە هەزار مەتر چوارگۆشەی گازی سروشتی دەیداتە توركیا زیاترە لە نرخی گازی ئەمریكا، لە كاتێكدا كە نرخی هەزار مەتر چوارگۆشە گازی ئەمریكا 350 دۆلارەو  رووسیا 410 دۆلار، لەمەوە توركیا دوای ئەڵمانیا، دووەم كڕیاری گاز پڕۆمە.

كۆبوونەوەی "دوو تەنیا"

رووداوەكانی ئۆكراینا و هاتنی داعش و دوورەپەرێزی توركیا لەو هاوپەیمانێتییە نێودەوڵەتییەی دژی داعش پێكهێنراوە، وایكرد توركیا و رووسیا پەیوەندییە نێودەوڵەتییەكانیان بكەوێتە تەنگژەوە و وەك "دوو تەنیا" وڵاتی جیهان دەربكەون.

ڤلادیمێر پوتین، سەرۆكی رووسیا لەگەڵ هاوتا توركییەكەی، رەجەب تەییب ئەدۆغان كۆدەبێتەوە و دواتر لەگەڵ ئەحمەد داودئۆغڵو، سەرۆكوەزیرانی توركیا كۆبوونەوە ئەنجام دەدات.</sup>

فه‌رهاد چۆمانی

^1/12/2014

http://rudaw.net/sorani/middleeast/iran/30112014

<sup>"ئەگەر حکومەت هەموو کەنداوی فارس بکات بە پارە ،دیسان لە دەرمانی خەڵکدا سەرکەوتوو نابێت"، ئەمە گوتەی وەزیری تەندروستی و راهێنانی پزیشکی ئێرانە ، کە کۆمەڵگەی پزیشکی و خەڵکی ئەو وڵاتەی سەرسام کردووە.

حەسەن قازی زادەی هاشمی لە وتارێکدا لە نوێژی هەینی شاری تاران هۆشداریداوە سەبارەت بە بەرزبوونەوەی رێژەی جەڵتەی مێشک و دڵ لە ئێران و رایگەیاندووە، کە 20 لەسەدی ئێرانییەکان فشاری خوێنیان هەیە و داوای لە خەڵکی ئێران کردووە کە گرینگی بدەن بە پێشگیریکردن و خۆپاراستن لە نەخۆشی.

وەزیری تەندروستی کابینەی حەسەن رۆحانی هاوکات داوای لە دانیشتووانی ئێران کردووە، بە وردی چاودێری چەندی و چۆنایەتی خواردەمەنییەکان بکەن ، چونکە حکومەت توانای دەرمانی هەموو نەخۆشەکانی نییە.

ئەو هۆشدارییەی وەزیری تەندروستی ئێران لە کاتێکدایە کە ماوەیەک پێش ئێستا بەرپرسێکی وەزارەتی تەندروستی ئێران رایگەیاندبوو، کە دانیشتووانی ئێران لەژێر مەترسی کەمخواردن و نەبوونی ئەمنییەتی خواردنن و باڵا و کەشی خەڵکی ئێران بە بەراوردی پێشووی بە شێوەی نێونجی دابەزیوە .

هاوکات ئاژانسی هەواڵی حکومی ئیرنا ئاکامی لێکۆڵینەوەیەکی بڵاوکردووەتەوە ،کە نیشاندەدات یازدە لەسەدی دانیشتووانی ئێران تووشی نەخۆشی شەکرە بوون و لە پێنج ساڵی رابردوودا ئەو نەخۆشییە 35 لەسەد پەرەی سەندووە.

بە پێی ئامارە فەرمییەکانی وەزارەتی تەندروستی ئێران، ژمارەی تووشبووان بە نەخۆشی شەکرە لە ساڵی 2011 ی زایینیدا ،4 ملیۆن و 500 هەزار کەس بووە، کە ئەو ژمارەیە لە ساڵی 2014دا بۆ حەوت ملیۆن کەس بەرزبووەتەوە.
 
ئەو گوتانەی وەزیری تەندروستی ئێران لە کاتێکدا دێت ، کە لە چەند مانگی رابردوودا باس لە بەرزبوونەوەی رێژەی نەخۆشی شێرپەنجە لە ئێران دەکرێت و هەندێک لە پزیشکەکان و کارناسانی تەندروستی ئەو بەرزبوونەوەیە وەک بەرزە شەپۆلی شێرپەنجە پێناسە دەکەن.</sup>  

^{rudaw/ ئومێد بەرین}

^1/12/2014

<sup>بزووتنەوەی گۆڕان لە كۆبوونەوەی تایبەتی خۆیاندان، بۆ ئەوەی هەر ئەمڕۆ لەگەڵ شاندی یەكێتی کۆببنەوە بۆ بڕیاری كۆتایی لەسەر یەكلاییكردنەوەی پۆستەكانی پارێزگای سلێمانی.

ئاسۆ رەحیم، ئەندامی شاندی دانوستاندنكاری بزووتنەوەی گۆڕان، بە  تۆڕی میدیایی رووداوی راگەیاند، دەیانەوێت پێش كۆبوونەوەی كۆتایی نێوان بزووتنەوەی گۆڕان و یەكێتی، ئەمڕۆ دابنیشن لەگەڵ یەكێتی و بڕیاری كۆتایی لەسەر رێككەوتنی هەردوو هێزەكە بدەن لەسەر دابەشكردنی پۆستەكان.

راشیگەیاند كۆبوونەوەی ئەمڕۆیان تەنیا بۆ لێكتێگەشتنە بۆ ئەوەی كۆبوونەوەی ئایندەیان تەنیا بۆ راگەیاندنی رێككەوتنەكە بێت.

ئاسۆ رەحیم گوتیشی: "بەتەواوی نزیكبووینەتەوە لە یەكێتی و زۆربەی بەربەستەكانمان تێپەڕاندووە، لەئایندەیەكی زۆر نزیكدا رێككەوتنی كۆتایی رادەگەیەنین".</sup>

^30/11/2014

http://rudaw.net/sorani/middleeast/301120143

<sup>بەرپرسانی ئێران جەختدەكەنەوە کە لە هاوکاریكردنی هێزی پێشمەرگەی کوردستان دژی داعش بەردەوام دەبن و هەمیشە هاوكارییەكانیشیان ستراتیژین.

عەلی رەزا رەحمانی، وەزیری ناوخۆی ئێران بە تۆڕی میدیایی رووداوی راگەیاند،" هاوکاری ئێران بۆ باشووری کوردستان و عێراق ستراتیژین و  وڵاتەکەی لەو هاوکارییانە بەردەوام دەبێت".

هاوکات ئایەتوڵڵا تەها محەممەد، نوێنەری خامنەیی تایبەت بۆ تۆڕی میدیایی رووداو دەڵێت،" ئێران نەبووایە کۆتایی بە دەسەڵاتی هەریەک لە سوریا و عێراق و لوبنان دەهات".

ئەو قسانەی بەرپرسانی ئێران لە کاتێکدان، کە سەرەڕای ئەوەی وڵاتەکەیان ئەندامی ئەو هاوپەیمانێتییە نێودەوڵەتییە نییە کە ئەمریکا دژی داعش سەرۆکایەتی دەکات، کەچی ئێران لە رێگەی قاسم سولەیمانی لە عێراق و چەند ناوچەیەکی باشووری کوردستاندا بەشداری شەڕی دژی داعشی کردووە.

وەزیری ناووخۆی ئێران دەڵێت،" پشت بەخوا گەلی كورد و هاووڵاتانی عێراق لە بەرگریكردن بەردەوام دەبن و شەڕی داعش لە عێراق و كوردستان دووردەكەوێتەوە و ئەم بەڵایە لەنێودەبرێت، دیدی ئێمە بۆ كودستان و عێراق ستراتیژییە و هەمیەشە هاوكارییەكانیشمان سراتیژین".

هەروەها ئایەتوڵڵا تەها محەممەد، نوێنەری خامەنەیی لە ئێران دەڵێت،" لەهەر شوێنێك هەركەسێك بڵێت (لا إله إلا الله محمد رسول الله)، بەبرای خۆمانی دەزانین و بەئەركی خۆمانی دەزانین پارێزگارییان لێبكەین".</sup>

^30/11/2014

<sup>یاریدەدەری وەزیری وزەی ئێران رایگەیاند بەغدا و تاران رێكدەكەون لەسەر درێژكردنەوەى گرێبەستى دابينكردنی کارەبا بە عێراق تا کۆتایی ساڵی ٢٠١٥.

هۆشەنگ فەلەحتیەن، دەڵێت وەزارەتی وزەی ئێران و لایەنی عێراقی، بڕیاریانداوە لە سەرەتای ساڵی ٢٠١٥  تا کۆتایی ساڵ گرێبەستى دابينكردنی کارەبا بەپێی مەرجەکانی پێشووتر درێژبکەنەوە.

ئاماژە بەوەش دەکات بە پێی رێککەوتنەکە ١٠٠٠ تا ١٥٠٠ مێگاواتی کارەبا لەلایەن ئێرانەوە بە عێراق دەدرێت. دەشڵێت کە بەکارهێنانی کارەبا لە وەرزی زستاندا لە لایەن عێراقەوە کەمدەبێتەوە و لە چەند رۆژی رابردوودا تەنها ٢٠٠ میگاواتی وەرگرتووە.

فەلەحتیەن دەڵێت کە ئێران کارەبا بە ٧ وڵاتی دراوسێ دەدات و داهاتی ساڵانەی لە فرۆشتنی ئەو کارەبایە دەگاتە ٩٠٠ ملیۆن دۆلار.

عێراق لەڕێی چوار ‌هێڵەوە کارەبا لە ئێرانەوە وەردەگرێت، کە هێڵی کرماشان-دیالە، سربیل زهەب-خانەقین، عەبدەن-بەسرە و هێڵی لرخە - عەمارەیە.

عێراق هەوڵی دامەزراندنی تۆڕی کارەبای هەرێمی دەدات، کە ناسراوە بە پرۆژەی عەرەبی بۆ گرێدانی هەشتەمی، کە هەر یەک لە سووریا، تورکیا، لوبنان، فەلەستین، ئوردن، میسر، لیبیا و عێراق لە خۆدەگرێت، بڕیارە لە ئایندەدا هێڵی کارەبای ئەو وڵاتانە پێکەوە گرێبدرێن.</sup>

رووداو - ئاژانسەکان

^30/11/2014

<sup>دوای ئەوەی شارەوانی شاری کرماشان لە رۆژهەڵاتی کوردستان بوونی دەستفرۆش و چەرچییەکانی لەناو شاردا قەدەخە کرد، شوێنێکی تایبەتی لەپەنا بێستوون بۆ دیاریکردوون کە رۆژانی هەینی دەتوانن کەڵکی لێوەرگرن و کاسبی لێبکەن.

ئەو بازاڕە رووبەرووی سەردانی زۆری خەڵک بووەتەوە ، چوون بە باوەڕی بەشێک لە خەڵک شتومەک و کەرەستەکانی نێو ئەو بازارە هەرزانتر لە شوێنەکان و بازارەکانی دیکەی کرماشانە .

کاری هونەری ،خواردنی ناوماڵ و میوە و سەوزی و جلوبەرگ و هەموو جۆرە کەرەستە و شتومەکێک لەو بازارەدا دەبێندرێ ،بە قەولی قەدیمیان سەری مار و مێرو لەو بازارەدا هەیە .

ئەگەرچی هەفتە بازارەکان خاوەنی مێژوویەکی کۆنن و لە ئێستاشدا لە زۆربەی شارەکانی رۆژهەڵاتی کوردستان بەرێوەدەچن ، بەڵام هەفتە بازاری کرماشان تایبەتمەندییەکی هەیە کە بازارەکانی دیکە نیانە ، هەفتە بازاری کرماشان لەناو جەرگەی شاردا هەڵکەوتووە لە شوێنێکی گەشتیاری . ئەوەش بەدڵی دەستفرۆش و چەرچی و بەزازەکانی ئەو بازارەیە و چاوێکیشیان هەر لەوەیە کە رێگەیان پێبدەن هەموو رۆژێک بازار بکەن .

شاری کرماشان یەکێک لە گەورە شارەکانی رۆژهەڵاتی کوردستانە و بەرپرسانی ئەو شارە لە چەند ساڵی رابردوودا هەوڵیانداوە سیمای ئەو شارە بگۆڕن ، گۆڕانکارییەک زیان لە مێژوو و جوگرافیای مرۆڤی نەدات ، هەرچەندە زۆرێک لە کارەکانیان بەرەورووی رەخنەی هاونیشتمانیانی کرماشان بووەتەوە . بەڵام پێدەچێ هەفتە بازاری کرماشان جگە لە فرۆشیاران دڵی شۆفێران و هاونیشتمانیانیشی رازی کردبێت.</sup>

^30/11/2014