وەزیری بەرگریی ئێران هۆشداریدایە رێکخراوی دەوڵەتی ئیسلامی (ناسراو بە داعش) لەسەر مەزارگەکانی شیعە لە عێراق و رایگەیاند: "ئێمە بە راشکاوانە رایدەگەیێنین مەزارگە پیرۆزەکانی شیعە لە عێراق هێڵی سوورن بۆ کۆماری ئیسلامی ئێران و ئەگەر داعش یان هەر گرووپێکی چەکدار بیەوێت ببێتە مەترسی بۆ ئەو شوێنانە، ئەوا کۆماری ئیسلامی ئێران دەستتێوەردان دەکات".
حوسێن دێهقان، وەزیری بەرگریی ئێران ئەمڕۆ لە کۆنفڕانسێکی رۆژنامەوانیدا لە تاران سەبارەت بە قسەکانی وەزیری دەرەوەی عێراق، کە گوتبووی عێراق لاریی نییە لەوەی ئێران هێرشی ئاسمانی بکات بۆ سەر چەکدارانی داعش، گوتی: "ئێمە سنوورێکمان هەیە کە بۆمان زۆر گرینگە، ئەگەر داعش بیەوێت ببێتە هەڕەشە بۆ سنوورەکانمان بێگومان بەرەوڕوویان دەبینەوە، بەڵام ئەمڕۆ پێویست ناکات دەستتێوەردان بکەین، بەڵام ئەگەر دەوڵەتی عێراق بە شێوەی فەرمی داوای یارمەتی لە ئێمە بکات، بێگومان ئێمە هەنگاو دەنێین بۆ ئەوەی یارمەتییان بدەین".
سەبارەت بە بوونی قاسم سلێمانی لە عێراق، وەزیری بەرگریی ئێران، گوتی: "تەنانەت ئەگەر سەردار قاسم سلێمانی رۆیشتووەتە عێراق و دەڕوات، بۆ راوێژکاری و مەشقپێکردنە، ئێمە هێزێکمان بە ناوی هێزی ئێرانی لە سووریا و عێراق نییە، ئەوانەی کە لەوێن بۆ مەشقپێکردنی هێزەکانی عێراق و سووریایەو راوێژیان پێدەکەن بۆ ئۆپەراسیۆنە سەربازییەکان".
ئەو قسانەی وەزیری بەرگری ئێران لە کاتێکدایە، کە لەماوەی رابردوو وێنەی قاسم سلێمانی و هێزێکی ئێرانی لەگەڵ سوپای بەدر و میلیشیا شیعەکانی عێراق لە کاتی شەڕ لە ناوچەکانی ئامرلی و سەعدیە و جەلەولا بینراون و وێنەکانیشیان بڵاوکراوەتەوە.
لە بەشێکی دیکەی قسەکانیدا دێهقان ئاماژەی بە هێزی مووشەکی ئێران کرد و ئێرانی بە چوارەمین هێزی مووشەکی جیهان ناوبرد لە دوای وڵاتانی ئەمریکا، رووسیا و چین.
20/12/2014
