<sup>میخائیل بۆگدانۆف ، جێگری وەزیری دەرەوەی سووریا رایگەیاند كە رووسیا دەیەوێت حكومەتی سووریا و ئۆپۆزسیۆنی سووری كۆبكاتەوە، بەبێ مەرجی پێشینەی هەردوولا.

هەروەها جێگری وەزیری دەرەوەی سووریا لەكاتی سەردانی دوێنیدا بۆ بەیروت رایگەیاند " ئێمە لە پەیوندیداین لەگەڵ حكومەتی سووریا و ئۆپۆزیسیۆنی سووری لەنێوخۆ و دەرەوەی سووریا ، كاری ئێمە ئەوەیە پەیوەندی راوێژكاریی ئامادەكاریی بۆ ئەنجامدانی دانوستاندنێكی بێ مەرج ئەنجامبدەین ". جێگری وەزیری دەرەوەی رووسیا گوتی ئامانجی ئەوان ئەوەیە هەردوولا دابنیشن و بیروڕا بگۆڕنەوە "چونكە لە كۆتاییدا ، گەلی سووریا بە حكومەت و ئۆپۆزیسیۆنەوە خاوەنی بڕیارە لەسەر چارەنووس و ئایندەی سووریا ".

هەروەها ڤلادیمێر پوتینی سەرۆكی رووسیا لەمانگی رابردوودا لەكاتی كۆبوونەوەی لەگەڵ وەلید موعەلیمی وەزیری دەرەوەی سووریادا ، باسی ئەو بیرۆكەیەی كردبوو .

میخائیل بۆگدانۆف ، جێگری وەزیری دەرەوەی سووریا ، بۆ ئەو مەبەستە لەگەڵ چەند بەرپرسێكی ئۆپۆزیسیۆنی سووریش كۆبووەتەوە لە ئیستەنبوڵ لەوانەش بەدر جاموس . هەروەها وەزارەتی دەرەوەی رووسیاش پێشوازی لە مەعاز خەتیب و قەدری جەمیل و چەند سەركردەیەكی ئۆپۆزیسیۆنی سووری كرد لە مۆسكۆ .

هەروەها بڕیارە جێگری وەزیری دەرەوەی رووسیا ، دوای لوبنان سەردانی توركیا بكات ، بۆ گفتوگۆكردن لەگەڵ چەند سەركردەیەكی ئۆپۆزیسیۆنی سووریا و بەرپرسانی توركیا لەبارەی سووریا.</sup>

^rudaw

^6/12/2014

<sup>دواى سێ مانگ له ‌گه‌یشتنى به‌ کۆبانێ، چاره‌نووسى ئه‌و ژنه‌ ئیسرائیلییه‌ زۆرترین هەواڵی لەسەر بڵاوکرایەوە‌، که‌ له‌نێو یه‌کینه‌کانى پاراستنى ژنان (یه‌په‌ژه‌)دا شه‌ڕى له‌دژى داعش ده‌کرد.

هەفتەی رابردوو پێگه‌کانى نزیک له‌ داعش هه‌واڵى به‌دیلگرتنی جیل رۆزنبێرگیان بڵاوکردەوه،‌ یه‌په‌گه‌ش ئاماژه‌ به‌وه‌ده‌دات، که‌ رۆزنبێرگ ون بووه‌و ئه‌گه‌ر به‌دیلیش گیرابێت دیل به‌دیلى پێده‌که‌ن، دواجار خۆی هاتە دەنگ و گوتی من دەژیم.

رۆزنبێرگ کێیه‌؟

جیل رۆزنبێرگ تەمەنی(31 ساڵ) و لەدایکبووی ‌که‌نه‌دایە،‌ به‌ڵام هه‌ڵگرى ره‌گه‌زنامه‌ى ئیسرائیلییە، به‌و پێیه‌ى دایکى ئیسرائیلى بووه‌و باوکیشى که‌نه‌دیه‌، ئه‌و له‌ساڵى 2006ه‌وه‌ له‌که‌نه‌داوه‌ روویکردۆته‌ ئیسرائیل‌ و په‌یوه‌ندى به ‌سوپاى ئه‌و وڵاته‌وه‌ کردووه‌‌و دوو ساڵ وەک فڕۆكه‌وان له‌ڕیزى سوپادا ماوه‌ته‌وه‌. 

ئەمە یه‌که‌م ژنى بیانیه‌ که‌ په‌یوه‌ندى بهم‌یه‌په‌ژه‌وه کردبێت‌. کە له‌گه‌ڵ 10 که‌سى بیانى دیکەدا له‌ سنوورى عێراقه‌وه‌ روویکردۆته‌ سووریا.

سه‌رچاوه‌ میدیاییه‌کان ئاماژه‌ به‌وه‌ده‌ده‌ن، جیل رۆزنبێرگ له‌ڕێگه‌ى هه‌رێمى کوردستانه‌وه‌ خۆى گه‌یاندۆته‌ کۆبانێ، مانگى رابردوو له‌لێدوانێکیدا بۆ رادیۆى ئیسرائیل، رۆزنبێرگ باس لە چوونی بۆ کۆبانێ دەکات، به‌بێ ئه‌وه‌ى ئاماژه‌ به‌چۆنیەتى چوونى بکات له‌هه‌رێمی کوردستانەوە بۆ کۆبانێ و گوتویه‌تى "کورد مرۆڤی باشن و هەروەها برای ئێمەن و هاوشێوەی ئێمە ژیانیان خۆشدەوێت".

پێگەکانی نزیک له‌داعش، رایانگەیاند، ئه‌و ژنه‌ ئیسرائیلییه‌ کاتێک ده‌ستگیرکراوه‌ که‌ داعش سێ هێرشى خۆکوژى بۆ سه‌ر چه‌ند پێگه‌یه‌کى یه‌په‌ژه‌ له‌کۆبانێ ئه‌نجامداوه‌، که‌ به‌هۆیه‌وه‌ ژماره‌یه‌ک شه‌ڕکه‌رى یه‌په‌ژه‌یان به‌دیلگرتووه‌‌و یه‌کێکیان رۆزنبێرگ بووه‌.

ئیمانول نه‌حشۆن، گوته‌بێژى وه‌زاره‌تى ده‌ره‌وه‌ى ئیسرائیل ئاشکرایکرد، حکومه‌تى وڵاته‌که‌ى لێکۆڵینه‌وه‌ له‌و زانیارییانه‌ ده‌کات که‌ باس له‌وه‌ده‌که‌ن جیل رۆزنبێرگ له‌لایه‌ن داعشه‌وه‌ به‌دیلگیراوه‌.

ئه‌و هه‌وڵه‌ى حکومه‌تى ته‌لئه‌بیب هاوکات بوو له‌گه‌ڵ هه‌وڵێکى هاوشێوه‌ى حکومه‌تى که‌نه‌دا بۆ زانینى چاره‌نووسى رۆزنبێرگ.

به گوته‌ى به‌رپرسانى سه‌ربازى (یه‌په‌گه‌) بۆ میدیا کوردییەکان، سێ مانگ له‌مه‌وبه‌ر جیل رۆزنبێرگ له‌شارى کۆبانێ په‌یوه‌ندى پێوه‌کردوون و پێشتریش جارێک برینداربووه‌ له‌شه‌ڕه‌کانى دژ به‌داعشدا له‌کۆبانێ، به‌ڵام تیمارکراوه‌.

جه‌ختیش دەکەنەوە کە‌  ئەوان هه‌موو هه‌وڵێک ده‌ده‌ن بۆ ئه‌وه‌ی رۆزنبێرگ سه‌لامه‌ت بێت، ئه‌گه‌ر دیلیش بێت لاى داعش ئاماده‌ن بۆ پاراستنی ژیانی چه‌ند دیلێکیان پێبده‌ن بۆ ئه‌وه‌ی ئازادی بکه‌ن.

بەڵام رۆزنیبرگ کۆتایی بەو دەنگۆیانە هێناو لە سەرەتای ئەم مانگە له‌ پۆستێكیدا لە فەیسبووک نوسیوویه‌تی: "هاوڕێیانم، من له‌ شوێنێكی پارێزراو و ئارامدام، هێڵی ئه‌نته‌رنێت و هیچ ئامرازێكی په‌یوه‌ندیم لا نییه‌، ئه‌وه‌ش له‌به‌ر پاراستنم."

راشیگه‌یاندووه:‌ "به‌ڵام به‌ رێكه‌وت چاوم به‌ ئاژانسه‌كانی هه‌واڵ كه‌وت كه‌ باس له‌ چیرۆكی ناڕاستی ده‌ستگیركردنم ده‌كات، راپۆرته‌كان وه‌لا بنێن و من ده‌ستگیر نه‌كراوم".</sup> 

^5/12/2014

<sup>حەسەن نەسروڵڵا ، ئەمینداری حیزبوڵڵای لوبنانی ، باسی هەڵوێستی كورد دەكات بەرامبەر داعش ، دوای گرتنی موسڵ و دەڵێت " بۆ نموونە لێكدانەوەكانی كورد هەڵەبوو، دوای ئەوەی روویدا لە موسڵ ، كورد چوونە ئەو ناوچانەی كە لەنێو عێراقییەكاندا ناكۆكیان لەسەرەو، وایاندانا كە چوونە ناوچەكانی دیكە پەیوەندی بەوانەوە نییە ، بەڵكو ئەو بەرپرسیارێتی عێراقییەكانی دیكەیە ، لە شیعە و سوننە و ئێزدی و مەسیحییەكان ، دەبێ ئەوان چارەسەری حاڵی خۆیان بكەن" .

هەروەها دەڵێ " سەركردایەتی كورد لەو بڕوایەدابوو كە داعش لەو شوێنە دەوەستێ كە لێی وەستاوە و، هیچ شتێك هەڕەشە لە كوردستان ناكات . لەوانەیە سەرچاوەی ئەوە شرۆڤەیەك بووبێت یان بەڵێنێك بووبێت یان هەندێك گرەنتی بووبن كە داعش و هاوكارە هەرێمایەتییەكانی دایانبێت ".

حەسەن نەسروڵڵا ، ئەمینداری حیزبوڵڵای لوبنانی لە هەڤپەیڤینێكدا لەگەڵ رۆژنامەی (الاخبار)ی لوبنانیدا، باسی داعش و هێرشی بۆ سەر وڵاتانی ناوچەكە دەكات .

حەسەن نەسروڵڵا دەڵێ شەڕی ئەوان لەگەڵ داعش لەسەر خاكی سووریا بۆ پاراستنی خەڵكی لوبنانە ، چونكە پێش ئەوەی هێزەكانی ئەوانیش بچنە سووریا ، چەكدارانی داعش هاتبوونە سەر سنووری لوبنان و دەڵێ لەسەرەتای رووداوەكانی سووریادا ، ناوچەكانی جرود عرسال و جرود بقاعیە " لەلایەن گرووپە چەكدارە سوورییەكانەوە داگیركراون، هەروەها ئەوانە سەربازگەی مەشقكردن و ژووری ئۆپەراسیۆن و نەخۆشخانەی مەیدانی و گردبوونەوەیان لەنێو خاكی لوبناندا دروستكردبوون".

ئینجا بەو شێوەیە دەڕوانێتە كردەوەكانی داعش و دەڵێت " ئاسان نییە كەس بگاتە رادەی رقهەڵگری و سكڕەشیی و ئامادەیی دەروونیی ئەوان بۆ خوێنڕێژی بەوشێوەیە . لەكوێی مێژوودا شتێكی لەو شێوەیە هەیە؟ ئۆباڵ بە ئەستۆی نەتەوەیەكگرتووەكان ، داعش ژن و منداڵی ئێزدییان زیندەبەچاڵكردوون . دەبینین داهێنان دەكەن لەسەربڕیندا". هەروەها دەڵێ " چ لۆژیكێك لە جیهاندا هەیە رێگەبدات هەزاران كەس دەربەدەری چیا بكرێن و، ئابلۆقە بدرێن بۆ ئەوەی لەپێش چاوی جیهاندا لە تینووان و برسان بمرن ".

حەسەن نەسروڵڵا دەڵێ داعش مەترسییەكی زۆر گەورەیە و وەحشێكە بەرەڵڵای ناوچەكە بووە. هەروەها دەڵێ " لایەنگرانی فیكری وەهابی دەیان ساڵ كاریان لەسەركراوە و، ملیارەها دۆلاریان لێ خەرجكراوە . ئەوانە لە هەموو جیهاندا ئاواتی خۆیان لە داعشدا دەبیننەوە". بۆیەش پێیوایە زەمینەیەكی باشی داعش هەیە لە سعودیە و وڵاتانی عەرەبیدا لە كەنداو.

رۆژنامەكە لە حەسەن نەسروڵڵا دەپرسێت ، كە ئەو پێش ئەوەی داعش هێرشبكاتە سەر كوردستان ، لەگەڵ چەند كەسایەتییەكدا پێشبینی ئەوەیكردبوو كە داعش هێرشبكاتە سەر كوردستان و، ئێستاش پێشبینی ئەوەدەكات كە هێرشبكاتە سەر سعودیە و ئوردن و توركیاش . حەسەن نەسروڵڵا دەڵێ توركیا هاوكاری داعشی كرد ، بەڵام نابێ هیچ دەوڵەتێك و لایەنێك خۆی هەڵبخەلەتێنێ كە دەتوانێ ئیدارەی ئەو یاریە بكات .

سەبارەت بە دەركەوتنی ئەبوبەكری بەغدادی ئەمیری داعش ، حەسەن نەسروڵڵا دەڵێ سیاسەتی ئەبوبەكری بەغدای ئەوە نییە لە میدیادا دەربكەوێت " بەڵام دوای ئەوەی داعش خەلافەتەكەی راگەیاند ، گفتوگۆیەك لە جیهانی ئیسلامیدا هاتە كایەوە لەنێوان زانایانی سوننەدا ، ئەویش ئەوەبوو چۆن دەبێت بەیعەت بدەینە كەسێك ناوی نەزانین ، كەسایەتییەكەی نەناسین ، هیچ زانیاریمان لەبارەیەوە نەبێت ، چونكە نابێت بەیعەت بدەینە كەسێكی نادیار".</sup>

rudaw

^5/12/2014

<sup>ئازادکردنی دوو کورد کە ئەندامی گرووپێکی چوار کەسی بوون لە ئەمریکا، کۆمیتەی ئاسایشی نێوخۆیی لە پەرلەمانی ئەمریکا هێناوەتە دەنگ.

بەرپرسانی ئەمریکا دەڵێن ئەو چوار کسە ویستوویانە لە سنووری مەکسیکەوە بە شێوەیەکی نایاسایی رووبکەنە ویلایەتە یەکگرتووەکانی ئەمریکا و ئەندامی پارتی کرێکارانی کوردستان PKKن، دوای ئەوەی لەلایەن دادوەری کۆچبەرییەوە بڕیاری ئازادکردنی دوو کەسیان دەدرێت، روو دەکەنە کەنەدا و لەوێ داوای مافی پەنابەری دەكەن.

جێهـ جۆن، وەزیری ئاسایشی نێوخۆیی ئەمریکا لەوبارەیەوە رایگەیاند: "ئەگەرچی بە خواستی منیش نەبووبێت، دادوەر دوو لەو چوار کەسەی ئازادکردوون و بەرەو کەنەدا رۆیشتوون و دەیانەوێ لەوێ مافی پەنابەری وەربگرن".

ئەم قسانە ، وەزیری ئاسایشی نێوخۆیی ئەمریکایان لە رەخنەی ئەندامانی کۆمیتەی ئاساییش نەپاراست، جاسۆن چاڤێز، ئەندام پەرلەمانی سەر بە کۆمارییەکان قسەی وەزیری ئاسایشی نێوخۆیی ئەمریکای بیرهێنایەوە کە لە دانیشتنی پێشوو گوتبووی ئەو چوار کەسە سنوورداش کراونەتەوە. چاڤێز گوتی: "گوتتان ئەو چوار کەسەی کە ئەندامی رێکخراوێكی تیرۆریستین سنوورداش کراونەتەوە، بەڵام دەبینین ئەمە رووینەداوە و دوو لەو چوار کەسە ئازادکراون".

جێهـ جۆن خۆی لە بەکارهێنانی دەستەواژەی "گرووپی تیرۆرۆیستی" بۆ ناونانی پارتی کرێکارانی کوردستان پاراست و گوتی: "هێشتا روون نەبووەتەوە ئەو چوار کەسە پەیوەندییان پێوە هەبووە یاخود نا".

وێڕای ئەوەی جاسۆن چاڤێز، ئەندام پەرلەمانی سەر بە کۆمارییەکان چەند جارێک پرسیاری ئەوەی لێکرد کە "ئەو رێکخراوە لەلایەن وەزارەتی دەرەوەی ئەمریکاوە وەک رێخکراوێکی تیرۆریستی ناسێندراوە؟" لە وڵامدا وەزیری ئاسایشی نێوخۆیی ئەمریکا گوتی: "من ئێوە ئاراستەی وەزارەتی دەرەوە دەکەم بۆ وڵامی ئەو پرسیارە".

تورکیاش داوای زانیاری لە کەنەدا کردووە، لەمبارەیەوە سەلچوک ئونال، کونسوڵی تورکیا لە ئۆتاوا دەڵێت،" ئەمڕۆ وڵاممان دراوەتەوە و گوتوویانە کە بەدواداچوونی بۆ دەکەن، ئێمەش لای خۆمانەوە لە نزیکەوە چاودێری دەکەین".</sup>

^5/12/2014

<sup>بەیانی ئەمڕۆ هەینی 5/12/2014، شەڕ و پێکدادان لە کۆبانێ لە  نێوان هێزە کوردییەکان و چەکدارانی داعش لە سێ قۆڵەوە روویداوە و فڕۆکەکانی هاوپەیمانانیش بە خەستی بنکە و سەنگەرەکانی داعشیان بۆردومان كردوون. 

نەقیب شێروان محەممەد كە فەرماندەیەکی پێشمەرگەیە لە کۆبانێ،  بە تۆڕی میدیایی رووداوی راگەیاند کە چەکدارانی داعش بەیانی ئەمڕۆ لە سێ قۆڵەقەوە هێرشیان كردووەتە سەر هێزە كوردییەكان و ، پێشمەرگە و شەڕڤانانیش بە تووندی وەڵامیان داونەتەوە.

ئەو فەرماندەیەی پێشمەرگە هەروەها گوتی،" سەرەتا چەكدارانی داعش بۆردوومانی ناوچەكانی ژێر دەستی هێزە كوردییەكانیان كرد، دواتر هێرشی زەمینیان دەستپێكرد".  ئاماژەی بۆ ئەوەش كرد كە پێشمەرگە و شەڕڤانان بە چەكی قورس وەڵامی هێرشەکانی داعشیان داوەتەوە و تا ئێستاش تەرمی 7 چەکداری داعشیان کەوتووەتە دەست. 

وەك ئەو فەرماندەیەی پێشمەرگە باسیدەكات، هاوكات لەگەڵ وەڵامدانەوەی پێشمەرگە و شەڕڤانان فڕۆكە جەنگییەكانی هاوپەیمانان بە سەرۆكایەتی ئەمریكا بنكە و سەنگەرەكانی داعشیان بۆردومان كردوون.</sup>

rudaw

^5/12/2014

http://rudaw.net/sorani/world/041220146

<sup>سەبارەت بە ئەنجامی سەردانەکەی ڤلادیمیر پوتین بۆ توركیا و دانوستاندن و کۆبوونەوەکانی لەگەڵ بەرپرسانی باڵای ئەو وڵاتە و شیکردنەوەی پەیوەندییەکانی رووسیاو تورکیا، لە دوێنێ و ئەمڕۆ و سبەینێدا، لە مۆسکۆ پرێسکۆنفرانسێک بۆ ژمارەیەک سیاسەتمەدار و شرۆڤەکاری سیاسی رووسیا سازدەكرێت.

رووسەکان بەشێوەیەک باسیان لە پەیوەندییەکانی تورکیاو رووسیا دەکرد کە دوو هاوپەیمانی ستراتیژین و گەشبینبوون بەوەی پەیوەندی ئەو دوو وڵاتە دەگاتە ئاستی زۆر باڵاتر.

تورکیا هاوپەیمانێکی  گرنگی ئەمریکایە، بەڵام رووسەکان بۆچوونییان وایە ئێستا تورکیا لەگەڵ ئەمریکا ئەو هاوپەیمانێتییە گەرموگوڕەی جارانی نەماوە، بۆیە ئەوە ئومێدێکی گەورەی بە رووسیا بەخشیوە.</sup>

^5/12/2014

<sup>سەرۆكی ئەمریكا رایگەیاند، ناوچەی رۆژهەڵاتی نێوەڕاست بە بارودۆخێكی راگوزەر "ئینتیقالی"دا دەڕوات و ململانێكە درێژ دەخایەنێت و پێشیوایە ململانێی سوننە و شیعەکان لە ململانێی عەرەب و ئیسرائیل خراپترە.

باراك ئۆباما، سەرۆكی ویڵاتە یەكگرتووەكانی ئەمریكا، لە پەراوێزی گفتوگۆكانی دیدارێكیدا لەگەڵ بزنسمانان، گوتی، "كێشە و ململانێ مەزهەبییەكان لە نێوان ئەو وڵاتانەی، كە بە وەكالەت كەوتوونەتە نێو ئەو ململانێیانە، هێند ترسناك و خوێناوین، وەك ئەوەی نێوان عەرەب و جولەكە، ئەوەش ئێستا بە چاوی خۆتان لە عێراق و سووریا دەیبینن".

 ئۆباما لە قسەكانیدا باسی لە سەركەوتنی مسۆگەری ئەمریكا و هاوپەیمانەكانی كرد لە شەڕی دژی تیرۆر لە عێراق، بەڵام گوتی، "بارودۆخی سووریا و سەركەوتن بەسەر داعش، كێشەیە و چارەسەرەكە بەجۆرێكی دیكە دەبێت". 

ئۆباما ئاشكرایكرد، كە "سەرکەوتن بەسەر داعش لە سووریا، زەحمەتترە، یەكێك لە هۆكارەكانیش شەڕی ناوخۆییە، كە بارودۆخەكەی ئاڵۆز كردووە و بەرژەوەندی وڵاتانی دەرەوەش یەكانگیر نییە و دژیەكە، كە ئەوش كاتێكی زیاتری دەوێت بۆ ئەوەی ململانێكە لەو وڵاتە خاوبێتەوە".</sup>

^4/12/2014

<sup>سەرۆکی فەرەنسا رایدەگەیێنێت پاڵپشتی تەواوی عێراق دەکەن لەڕووی سیاسی و سەربازییەوە بۆ رووبەڕووبوونەوەی رێکخراوی داعش.

لە کۆنگرەیەکی هاوبەشی رۆژنامەوانیدا، کە رۆژی چوار شەممە 3ی دیسەمبەری 2014 فرانسوا ئۆلان، سەرۆکی فەرەنساو حەیدەر عەبادی، سەرۆکوەزیرانی عێراق  لە پاریسی پایتەختی فەرەنسا سازیانكرد، ئۆلاند رایگەیاند:" پاڵپشتی تەواوی عێراق دەکەین لەرووی سیاسی و سەربازییەوە بۆ رووبەڕووبوونەوەی رێکخراوی داعش".

ئۆلاند راشیگەیاند کە "فڕۆکەی جەنگیمان لە ئوردن هەیە، لەرێگەی هێرشە ئاسمانییەکانەوە کاردەکەین لە دژی چەکدارانی رێکخراوی دەوڵەتی ئیسلامی لە عێراق"، ئاماژەی بۆ ئەوەشکرد کە فەرەنسا چەندان ملیۆن یۆرۆی وەک هاوکاری پێشکەش بە خانەوادە ئاوەرەبووەکانی عێراق کردووە.

ئۆلاند ئەوەشی گوت کە پێشنیازێکی داوەتە حیدەر عەبادی بۆ "دروستکردنی سندوقێکی نێودەوڵەتی بۆ دووبارە بنیتنانەوەی ئەو ناوچانەی كۆنترۆڵكراونەتەوە".

ئۆلاند روونیشیکردەوە کە وڵاتەکەی خوازیاری ئەوەیە بۆ ماوەیەکی دوورودرێژ هەماهەنگی لەگەڵ عێراقدا بکات، هەروەها دەیەوێت بەشداربێت لە زۆربەی سیاسەتەکانی کە پەیوەندی بە وزەو گواستنەوەو لایەنەکانی دیکەوە هەیە، بێجگە لەمانەش پاڵپشتی لە حکومەتەکەی عەبادی دەکەن لەرووی سیاسی و سەربازییەوە بۆ رووبەڕووبوونەوەی تیرۆر، هێمای بۆ ئەوەشکرد کە عەبادی پاڵپشتی یەکێتی ئەوروپای بەدەستهێناوە.

لە بەرامبەردا حەیدەر عەبادی سوپاسی ئەم داوەتنامەیەی سەرۆکی فەرەنسای کردو دووپاتی کردەوە کە فەرەنسا رۆڵێکی ئەکتیڤ و گرنگی لە ناوچەکە هەیە.

عەبادی راشیگەیاند کە "بەغدا لە رووی سەربازییەوە تەواو پارێزراوە، بەرەو باکوور جوڵەدەکەین و رێگای سەرەکی نێوان بەغداو کەرکووکمان کردووەتەوە، ئێستا هەماهەنگییەکی هاوبەشمان لەگەڵ عەشایرەکانی ئەنبار و نەینەوادا هەیە، سەرکرادیەتی پرۆسەی نەینەوامان بە بەشداری ئەفسەرانی پارێزگاکە دروستکردووە و پرۆسەی گرتنەوەی موسڵیش زۆر ناخایەنێت".

عەبادی ئەوەشی روونکردەوە کە "بنیاتنانەوەی ئەو ناوچانەی داعش وێرانیکردوون، بابەتێکی گرنگە، ئێمە لەهەوڵی ئەوەداین دەستەبەری بنیاتنانەوەیان بۆ بکەین، بەڵام بوودجەی عێراق رووبەڕووی کورتهێنان بووەتەوە بەهۆی دابەزینی نرخی نەوت و کۆنترۆڵکردنی ناوچەکانی باکوور لەلایەن داعشەوە".

ئاماژەی بۆ ئەوەشکرد کە لە قۆناغی داهاتوودا داوای توانای زیاتر دەکەین لە زۆربەی بوارەکان، بە تایبەت لە بواری سەربازی و ئابووری و مرۆیی، ئاماژەی بۆ ئەوەشکرد کە "پاڵپشتی چەندین وڵاتمان بەدەستهێناوە لەبارەی پێشکەشکردنی یارمەتییەکانیان بۆ عێراق".

عەبادی ستایشی ئەو رێککەوتنەی کرد کە لەگەڵ هەرێمی کوردستان بەدەستیانهێناوە و جەختی لەسەر ئەوە کردەوە کە ئەم رێککەوتنە "عێراق لە ناوخۆدا بنیاتدەنێتەوە"، ئاماژەی بۆ ئەوەشکرد کە ئەم رێککەوتنە پشکداری دەکات لە یەکخستنی عێراق و دەتوانێت بەسەر تیرۆر سەربکەوێت، ئێستا حکومەتی عێراق بە شێوەیەکی راست رێدەکات.</sup> 

rudaw

^4/12/2014

ژنێکی چینی کە ناوی ( شیاو ) ە، لە ناوچەی ( شنتشن ) لە وڵاتی چیندا دەژێت، قژە درێژەکەی، کە درێژییەکەی دەگاتە ( دوو مەتر ) .. بە هەڕاجکردنێکی ئاشکرا لە سەر تۆڕی ئینتەرنێت، بۆ فرۆشتن راگەیاند  .. ئەم ژنە، پانگزە ساڵە قژی نەبڕیوە و درێژی دەکات، هۆی فرۆشتنی قژەکەشی، ئەوەیە، بۆ ئەوەی ئەو پارەیەی لە هەڕاجکردنی قژەکەی دەستی دەکەوێت، دەیبەخشێت بە منداڵە هەژارەکانی، قوتابخانەیەکی ناوەندی لە ( نینغشیا ).

( شیاو ) بە رۆژنامەنووسەکانی گوت : " کاتێ کە زانیم، قوتابییە هەژارەکانی قوتابخانەی ( نینغشیا )لە دۆخێکی خراپدان، بڕیارم دا، کە قژ درێژەکەم، بۆ فرۆشت بخەمە سەر ئینتەرنێت ..ئەو پارەی لە فرۆشتنی قژەکەم دەستم دەکەوێت، دەیبەخشم بە قوتابییە هەژارەکانی قوتابخانەی ناوبراو .. لە قژە درێژەکەم بەولاوە، چیتر شک نابەم بیفروشم بۆ یارمەتیدانی ئەو منداڵانە "

زیاترین نرخی قژە درێژەکەی ( شیاو )، گەیشتە ( ١٠) هەزا دۆلاری ئەمریکی . 

3/12/2014

ژنێکی چینی کە ناوی ( شیاو ) ە، لە ناوچەی ( شنتشن ) لە وڵاتی چیندا دەژێت، قژە درێژەکەی، کە درێژییەکەی دەگاتە ( دوو مەتر ) .. بە هەڕاجکردنێکی ئاشکرا لە سەر تۆڕی ئینتەرنێت، بۆ فرۆشتن راگەیاند  .. ئەم ژنە، پانگزە ساڵە قژی نەبڕیوە و درێژی دەکات، هۆی فرۆشتنی قژەکەشی، ئەوەیە، بۆ ئەوەی ئەو پارەیەی لە هەڕاجکردنی قژەکەی دەستی دەکەوێت، دەیبەخشێت بە منداڵە هەژارەکانی، قوتابخانەیەکی ناوەندی لە ( نینغشیا ).

( شیاو ) بە رۆژنامەنووسەکانی گوت : " کاتێ کە زانیم، قوتابییە هەژارەکانی قوتابخانەی ( نینغشیا )لە دۆخێکی خراپدان، بڕیارم دا، کە قژ درێژەکەم، بۆ فرۆشت بخەمە سەر ئینتەرنێت ..ئەو پارەی لە فرۆشتنی قژەکەم دەستم دەکەوێت، دەیبەخشم بە قوتابییە هەژارەکانی قوتابخانەی ناوبراو .. لە قژە درێژەکەم بەولاوە، چیتر شک نابەم بیفروشم بۆ یارمەتیدانی ئەو منداڵانە "

زیاترین نرخی قژە درێژەکەی ( شیاو )، گەیشتە ( ١٠) هەزا دۆلاری ئەمریکی . 

3/12/2014