<sup>پیشە دەستییەکانی رۆژهەڵاتی کوردستان لە مێژوو و رابردووی کۆنی کۆمەڵگەی کوردستانەوە هەڵقوڵاون، بەڵام هێشتاش بۆ بەشێک لە خەڵک سەرچاوەی داهات و دابینکردنی بژێوی ژیانن.

پیشە دەستییەکان لە زۆربەی ناوچەکانی رۆژهەڵاتی کوردستان رمێنی زۆریان هەیە، بەڵام کرماشان لە هەموو ناوچەکان زیاتر بەو پیشەیە ناوی دەرکردووە. 

ئێرە ناوەندێکی فرۆشتنی پیشە دەستییەکانە لە شاری کرماشان، کە تێیدا دەیان بەرهەمی دەستی خراوەتەڕوو. لە چەشەنە جیاوازەکانی رایەخەوە وەکو فەرش و بەڕەوە بگرە تاوەکو تابلۆ فەرش، کەوشی کڵاش، ئامێری مۆسیقی و کەلوپەلی جوانکاری.

بەپێی ئامارە فەرمییەکان لە شەش مانگی یەکەمی ئەمساڵدا، بە بڕی زیاتر لە 2 ملیۆن و 40 هەزار دۆلار، کەلوپەلی دەستساز لە پارێزگای کرماشان هەناردە کراوە، بەڵام جێگری بەڕێوەبەری فەرمانگەی پیشەدەستییەکانی ئەو پارێزگایە دەڵێت، سێ هێندە زیاتری ئەو بڕە پارەیە کەلوپەلی دەستساز هەناردەکراوە. 

زیاترین رێژەی هەناردەکردنیش، جگە لەنێوخۆی رۆژهەڵاتی کوردستان و ئێران بۆ پارچەکانی دیکەی کوردستان و هەروەها وڵاتانی عەرەبی دەورووبەری کەنداو و وڵاتانی ئەوروپایە و لە زۆربەی بازاڕەکانی ئەو وڵاتانەدا پیشە دەستییەکانی پارێزگای کرماشان دەفرۆشرێن.

بەگوتەی بەرپرسانی حکومی لە کرماشان، کەرتی پیشەسازی دەستی لەو پارێزگایە سامانێکی گەورەیە کە دەبێ پەرەی پێبدرێ، بەڵام بەگوتەی ئەو کەسانەی کە ژیانیان لەسەر پیشەی دەستەکانیانە، لایەنە حکومییەکان زۆر هاوکاریان نین بۆ پەرەپێدانی کارەکەیان.</sup>

^29/12/2014

<sup>ساڵی 2014، ساڵە زێڕینەکەی کوردە لە رووی دیپلۆماسیەوە، جیاواز لە ساڵانی رابردوو ٢٠١٤ چەندینجار فەرشی سوور لە فڕۆکەخانەکانی کوردستان بۆ دیپلۆماتکارانی دونیا راخرا، لەم ساڵدا سەردانی سەرۆک و سەرۆکوەزیر و وەزیرانی دەرەوە و بەرگری وڵاتانی دنیا بۆ باشووری کوردستان ریکۆردێکی نوێی تۆمارکرد و شەڕی داعش و سیاسەتی نەوتی حکومەتی هەرێمی کوردستان پێگەی هەولێری بە‌هێزکرد.

ئێستا هاوپەیمانیەتییەکی نێودەوڵەتی بۆ شەڕی داعش لە جیهان دروستبووە، کوردیش بە پێگە سیاسی و سەربازییەکەی خۆی کە هێ‌زی پیشمەرگە وەک تاکە هێزی جیهان لەسەر زەوی لە رووبەڕووبونەوەدایە لەگەڵ داعش، کارەکتەرێکی سەرەکی ئەو هاوپەیمانیەتییەیە.

بەرپرسی پەیوەندییەکانی دەرەوەی پارتی دەڵێت، ئێستا هەولێر پایتەختێکە لەسەر نەخشەی جیهان پەنجەی بۆ رادەکێشرێت، رووبەڕووبونەوەکانی پێشمەرگەش لەگەڵ داعش پێگەی هەولێری بەهێزتر کردووە.

شارەزایەکی دیپلۆماسیەتی نێودەوڵەتی رۆڵی ئەمریکا لە بە‌هێزبوونی پێگەی هەولێر گەورە دەبینێت، وەک ئەو دەڵێت ئەمریکا سیاسەتی دەرەوەی خۆی لەسەر سێ خاڵ داڕشتووە، یەکەم بەرقەراری دیموکراسی لە جیهان، دووەم بنبڕکردنی تیرۆر و سێیەمیش کۆنترٶڵکردنی بیرە نەوتییەکانی جیهان بۆ بەرژەوەندی خۆی.

ئێستا نزیکەی 30 وڵات لە هەولێر کونسوڵ و نوێنەرایەتیان هەیە، ئەم نوێنەرایەتیانە کە لەناوجەرگەی رووداوەکاندان، زۆرجار رٶڵیان هەبووە لە پتەوکردنی پەیوەندییەکانی هەولێرو پایتەختی وڵاتەکانیان.</sup>

^{رووداو - پیرمام}

^29/12/2014

<sup>دوو پەرلەمانتاری پارێزگای ئەنبار لە رۆژئاوای عێراق رایدەگەیێنن، لە ٩٠%ی رووبەری ئەنبار لەژێر دەسەڵاتی داعشدایە و چەکدارانی ئەو رێکخراوە پێشڕەوی زیاتریش دەکەن.

نەهلە فەهداوی و فارس تەها، دوو پەرلەمانتاری پارێزگای ئەنبار رایانگەیاند "لە مانگی رابردوو سوپای عێراق لە ١٠% ناوچەکانی ژێر دەسەڵاتی لە ئەنبار کشایەوە و داعش ئەو ناوچانەی کۆنترۆڵکردووەتەوە، بۆیە ئێستا لە ٩٠% رووبەری ئەنبار لە ژێر دەسەڵاتی داعشدایە".

هاوکات عەبدولحەکیم جغێفی، قایمقامی شارۆچکەی حەدیسە لە رۆژئاوای پارێزگای ئەنبار رایگەیاند: "هێزە ئەمنییەکانی عێراق بە هاوکاری فڕۆکە جەنگییەکانی هاوپەیمانان توانییان ئەمڕۆ شکست بە هێرشێکی چەکدارانی داعش بۆ سەر حەدیسە بێنن و دەیان چەکداری داعش بکوژن و بریندار بکەن".

تاکە ناوچەی دەسەڵاتی سوپای عێراق لە ئەنبار، کە لەلایەن داعشەوە گەمارۆنەدراون تەنها لە شاری رومادی و شارەدێی عامرییەی فەللوجەیە، لەودەمەی داعش دەستی بەسەر زۆربەی ناوچەکانی ئەنباردا گرتووە و شارەکانی حەدیسە و بەغدادی و گەرمە و سەربازگەی عەین ئەسەدی گەمارۆداوە.</sup>

^28/12/2014

<sup>ساڵح موسلیم، هاوسەرۆكی پارتی یەكێتی دیموكرات (پەیەدە) رایدەگەیێنێت ئەولەویەتی كارەكانیان لە ساڵی داهاتوو ، دەرهێنانی هەموو ناوچەكانی كۆبانێیە لە دەستی داعش.

موسیلم لە دیمانەیەكدا لەگەڵ ئاژانسێكی  رووسی رایگەیاندووە: "لەساڵی داهاتوو هەوڵی رزگاركردنی تەواوی كۆبانێ دەدەین و خۆشمان لە رۆژئاوا رێكدەخەینەوە و هەموومان یەكدەگرین".

موسیلم هەروەها رایگەیاندووە: "رەوشی نێو كۆبانێ قورسە، چونكە داعش خۆیان لە شوێنەكانیان تووند كردووە و دەبێت شەڕڤانان و پێشمەرگە یەكە بە یەكەی خانووەكان لە داعش پاكبكەنەوە".

هاوسەرۆكی پەیەدە هەروەها دەڵێ: "هێزەكانمان پێشڕەوی باشیان لەنێو كۆبانێ كردووە و هیوامان هەیە لەماوەیەكی نزیكی داهاتوودا تەواوی ناوچەكان لە دەستی داعش دەربێنین".</sup>

^28/12/2014

<sup>جۆن مەکین سیناتۆری کۆمارییەکانی ئەمریکا دوای کۆبوونەوەی لەگەڵ مەسعود بارزانی سەرۆکی هەرێمی کوردستان، لەگەڵ نێچیرڤان بارزانی سەرۆکی حکومەتی هەرێمی کوردستانیش کۆبووەوە. نێچیرڤان بارزانی لەو کۆبوونەوەیەدا رایگەیاندووە هەرێمی کوردستان لەرووی سەربازی و مرۆییەوە پێویستی بەهاوکاریی زیاترە.

ئێواره‌ى ئه‌مڕۆ (شه‌ممه‌ 27ى دیسه‌مبه‌رى 2014)، نێچیرڤان بارزانى سه‌رۆكی حکومەتی هه‌رێمى كوردستان، پێشوازى سیناتۆر جۆن مه‌كین و شاندێكى یاوه‌رى كرد، كه‌ له‌ چه‌ند راوێژكارێك و ژماره‌یه‌ك له‌ پله‌دارانى سه‌ربازى و هه‌ڵسووڕێنه‌رى كاروبارى باڵیۆزخانه‌ى ئه‌مریكا له‌ عێراق و كونسوڵى گشتیى ئه‌مریكا له‌ هه‌رێمى كوردستان پێكهاتبوو.

بەپێی ماڵپەری فەرمی ئەنجوومەنی وەزیرانی هەرێمی کوردستان، مەکین ده‌ستخۆشى له‌ سه‌ركردایه‌تیى سیاسى و له‌ ‌حكومه‌تى هه‌رێمی کوردستان و له‌ خه‌ڵكى كوردستان كردووە كه‌ به‌رامبه‌ر هێرشه‌كانى داعش خۆڕاگر بوون. راشیگەیاندووە "هه‌رێمى كوردستان جێگه‌ و پێگه‌ى خۆى له‌ڕووى پاراستنى به‌ها و بنه‌ما مرۆییه‌كانه‌وه‌ هه‌یه‌ و خه‌ڵكى ئه‌مریكا و دنیاى ئازاد رێز و پێزانینیان بۆ ئه‌و به‌رگرییه‌ هه‌یه"‌.

بەپێی ئەو راگەیێندراوە مەکین گوتوویەتی "بۆ ئه‌وه‌ هاتووین تا له‌ نزیكه‌وه‌ بارودۆخه‌كه‌ ببینین و له‌ ڕووى سه‌ربازییه‌وه‌ له‌گه‌ڵ سه‌ركردایه‌تیى سه‌ربازى چاوپێكه‌وتنمان هه‌بووه‌ و خه‌ڵكى ئازا و لێهاتوو سه‌ركردایه‌تیى شه‌ڕه‌كان ده‌كه‌ن، كه‌ جێگه‌ى متمانه‌ و باوه‌ڕى هه‌موو لایه‌كمانن". ئاماژە بەوەشدراوە له‌ڕووى مرۆییشه‌وه‌ سوپاسى حكومه‌تى هه‌رێمى كوردستان و خه‌ڵكى كوردستانى كرد، كه‌ توانیویانه‌ به‌ تواناى سنوورداره‌وه‌ پێشوازى له پێكهاته‌ جیاكانى ناوچه‌كه‌، به‌ تایبه‌تى مه‌سیحى و ئێزدییه‌كان بكه‌ن.

مەکین جه‌ختیكردو‌وەتەوە‌، كه‌ ئه‌وه‌ى له‌ توانادا بێت ئه‌مریكا له‌ پێشكه‌شكردنى هاوكاریى مرۆیى و سه‌ربازى بۆ هه‌رێمى كوردستان، به‌رده‌وام ده‌بێت.

لەو دیدارەدا نێچیرڤان بارزانى باسى له‌ رۆڵى دیارى پێشمه‌رگه‌ له‌ تێكشاندنى داعشدا كردووە و "سوپاسى ئه‌مریكاى كرد كه‌ له‌ رۆژى یه‌كه‌مه‌وه‌، له‌گه‌ڵ خه‌ڵكى كوردستان بووه‌ و ئه‌و هێرشه‌ ئاسمانیانه‌ى ئه‌نجامیداون، كاریگه‌رییه‌كى زۆرى له‌سه‌ر گۆڕینى هاوكێشه‌ى سه‌ربازى له‌ به‌رژه‌وه‌ندیى پێشمەر‌گه‌دا بۆ‌ شكاندنى داعش و به‌رزركردنه‌وه‌ى مۆراڵى خه‌ڵك هه‌بووه"‌.

سەرۆکی حکومەتی هەرێمی کوردستان جەختیکردووەتەوە، کە‌ حكومه‌تى هه‌رێمى كوردستان له‌ پاراستنى ئه‌و كه‌مه‌ نه‌ته‌وه‌یى و ئایینییانه‌ى روویان له‌ هه‌رێمى كوردستان كردووه‌ به‌رده‌وام ده‌بێت و هه‌رچى له‌ توانادا بێت پێشكه‌شیان ده‌كات. راشیگەیاندووە: "به‌ڵام بێگومان هه‌رێمى كوردستان چ له‌ رووى سه‌ربازییه‌وه‌، چ له‌ رووى مرۆییه‌وه،‌ پێویستى به‌ هاوكاریى زیاترى نێوده‌وڵه‌تى هه‌یه‌ و چاوه‌ڕێ ده‌كه‌ین ئه‌مه‌ریكا له‌مباره‌یه‌وه‌ رۆڵى دیارى خۆى بگێڕێت".

وەک لە راگەیێندراوەکەدا هاتووە: له‌ ته‌وه‌رێكى دیكه‌ى دیداره‌كه‌‌دا كه‌ قوباد تاڵه‌بانى جێگرى سه‌رۆكوه‌زیران و ژماره‌یه‌ك له‌ وه‌زیرانى حكومه‌تى هه‌رێمى كوردستان ئاماده‌ى بوون، هه‌ردوولا په‌یوه‌ندییه‌كانى هه‌ولێر و به‌غدا و دوایین رێككه‌وتنى هه‌ردوو حكومه‌تى هه‌رێمى كوردستان و حكوومه‌تى عێراقیان تاوتوێ كردووە.</sup> 

^28/12/2014

<sup>نوێنەری لایەنە سیاسییەكانی هەر چوار پارچەی كوردستان، لە هەولێر كۆنگرەیەكی رۆژنامەوانییان دەربارەی رەوشی ئێستای كوردستان رێكخست و رایانگەیاند، لێدوانەکانی جەمیل بایک و سەڵاحەدین دەمیرتاش نیگەرانیان دەکات.

ئەو لایەنانە نوێنەرایەتی 60 لایەنی سیاسی لە هەر چوار پارچەی كوردستان، ئەوان كۆمیتەیەكی 16 كەسیان پێكهێناوەو هەر جارەو لەسەر پرسێكی رۆژەڤی كوردستان كۆدەبنەوە.

كۆبوونەوەی ئەمڕۆیان لە بارەگای پارتی دیموكراتی كوردستان رێكخست و دوای تەواوبوونی كۆبوونەوەكەیان، كۆنگرەیەكی رۆژنامەوانییان رێكخست و رایانگەیاند، ''دەستخۆشی لە سەركەوتنەكانی پێشمەرگە دەكەین، سەركەوتنی پێشمەرگە لە شنگال شانازییە بۆ هەموو خەڵكی كوردستان، هەروەها دەبێتە هەوێنی سەركەوتن لە بەرەكانی دیكە لە شەڕی داعش، سوپاسی هەڵوێستی بارزانی دەكەین، كە بە درێژایی ماوەكانی رابردوو سەرپەرشتی بەرەكانی شەڕی كردووەو ناوچەیەكی فراوانی لە دەستی چەكدارانی داعش دەرهێناوە''.

سەبارەت بە لێدوانەكانی سەڵاحەددین دەمیرتاش و جەمیل بایك، نوێنەرانی لایەنە سیاسییەكان رایانگەیاند، کە ئەوان لەگەڵ هیچ جۆرە لێدوانێكدا نین، كە بە قازانجی ئەو قۆناخەی كورد نەبێت، چونكە "زیان بە یەكڕیزی گەلی كورد دەگەیەنێت و هەر جۆرە لێدوانێكی لەو جۆرە نیگەرانمان دەكات و لە گەڵیدا نین''.

لە بەشێكی دیكەی كۆنگرەكەدا، غەفوور مەخمووری، ئەندامی كۆمیتەی لایەنە سیاسییەكان و سکرتێری یەکێتی نەتەوەیی کوردستان رایگەیاند، ''ئێمە نوێنەرایەتی حیزبەكانمان ناكەین، بەڵكو نوێنەرایەتی لێكدانەوەو بۆچوونی هەموو لایەنە سیاسییەكان دەكەین، ئەگەر نوێنەری چەند لایەنێك لێرە ئامادە نەبێت، مانای ئەوە نییە ئەوان لەگەڵ راگەیەندراوی كۆبوونەوەكانی كۆمیتەی لایەنە سیاسییەكان نین''.

كۆمیتەی لایەنە سیاسییەكان داوای قەرەبووكردنەوەی خەڵكی شنگالیان و هەوڵدان بۆ هەرچی زوو رزگاركردنی ناوچەكانیان کرد و پیرۆزباییان لە خەڵكی ئەو دەڤەرە كرد، بەهۆی رزگاركردنی بەشێك لەو ناوچانەی پێشتر داعش دەستیبەسەردا گرتبوو.

پێشتر جەمیل بایک، هاوسەرۆکی کۆما جڤاکێن کوردستان (کەجەکە) لە لێدوانێکدا بۆ گاردیانی بەریتانی، رایگەیاندبوو، کە ئەوان لەگەڵ یەکپارچەیی و یەکگرتوویی خاکی عێراقن.

هەروەها سەڵاحەدین دەمیرتاش، هاوسەرۆکی کۆنگرەی دیموکراسی گەلان (HDP)، بە ماڵپەڕێکی نزیک لە پەکەکەی راگەیاندبوو، کە شنگال بەشێکە لە عێراق و دەبێ سیستەمی خۆبەڕێوەبەریی سەربەخۆی تێدا جێگیر بکرێت.</sup>

^rudaw

^27/12/2014

<sup>لە رۆژی سێیەمی مانۆڕی سەربازی بەناوی "محەممەد رەسولەڵڵا"، كە لە باشووری رۆژهەڵاتی ئێران و لەلایەن سوپای كۆماری ئیسلامی ئێرانەوە بەڕێوەدەچێت، مووشەكێكی نوێ بە ناوی شەلەمچە تاقیكرایەوە، كە بە گوتەی فەرماندە سەربازییەكانی ئێران، تاقیكردنەوەكە بە سەركەوتوویی ئەنجامدراوە.

ئەو مووشەكە، كە بۆ لێدانی فڕۆكە و فڕۆكەی بێ فڕۆكەكان دروستكراوە، لە تاقیكردنەوەكەیدا توانی سێ فڕۆكەی بێ فڕۆكەوان، كە دۆزینەوەیان كارێكی ئاسان نییە، بدۆزێتەوە و بیانكاتە ئامانج.

ئەمیر فەرزاد ئیسماعیلی، فەرماندەی هێزی ئاسمانی "خاتەمول ئەنبیا" سەبارەت بەو مووشەكە رایگەیاندووە، "مووشەكی شەلەمچە ئەگەرچی هاوشێوەی مووشەكی هاوكە، بەڵام تایبەتمەندیی خۆی هەیە و لە تاقیكردنەوكەدا توانی ئامانجەكانی خۆی لە مەودای 18-26 و 32 كیلۆمەتری بپێكێت".

ئێران لە چەند ساڵی رابردوو بەرهەمهێنانی مووشەكی دەستپێكردووە و حسین دەهقان، وەزیری بەرگری ئەو وڵاتە مانگی رابردوو رایگەیاند، كە "ئێران لەدوای وڵاتانی ئەمریكا، رووسیا و چین، چوارەم هێزی مووشەكی جیهانی هەیە".</sup>

^27/12/2014

<sup>سەڵاحەدین دەمیرتاش، هاوسەرۆکی پارتی دیموکراتی گەلان (هەدەپە) رەتیدەکاتەوە گوتبێتی نابێت شنگال بخرێتە سەر کوردستان و دەڵێ ئەو لێدوانە بەهەڵە لێکدراوەتەوە.

شاندێکی هەدەپە بە سەرۆکایەتی سەڵاحەدین دەمیرتاش ماوەی پێنج رۆژە سەردانی رووسیایان کردووە و چەند کۆبوونەوەو سەردان و چاوپێکەوتنیان ئەنجامداوە. ئەمڕۆش دەمیرتاش کۆنفرانسێکی رۆژنامەوانی سازکرد.

پەیامنێری تۆڕی میدیایی رووداو لەو کۆنفرانسەدا ئامادەبوو و چەند پرسیارێکی ئاراستەی دەمیرتاش کرد. سەبارەت بەمەبەستی سەردانەکەیان بۆ رووسیا، دەمیرتاش بۆ گوتی: "مەبەستمان بوو پەیوەندی رووسیا لەگەڵ کورد بەهێزبکەین، دەمانەوێ رووسیا پشتگیری لە دۆزی کوردو کێشەی کوردبکات".

سەبارەت بەو لێدوانەی ئەو لەسەر شنگال، کە لە راگەیاندنەکان بڵاوبووەوەو وا راگەیێندرا کە گوتوویەتی "پێویستە شنگال بکرێتە هەرێمێکی سەربەخۆ" ، کە ئەوەش نیگەرانی لە باشووری کوردستان لێکەوتەوە. دەمیرتاش بۆ رووداو گوتی: "شنگال نەک کوردستانە، بەڵکو دڵی کورستانە". نیگەرانیی خۆیشی دەربڕی کە لێدوانەکەی ئەو بەشێوەیەکی دیکە لێکدانەوەی بۆ کراوەو روونیکردەوە "مەبەستی من لەو قسەیە ئەوە نەبووە کە شنگال نابێ بخرێتە سەر هەرێمی کوردستان، بەڵکو مەبەستم ئەوە بوو نابێ شنگال بەجێبهێڵرێت بۆ بەغدا".

دەمیرتاش پێیوایە "ئەگەر شنگال نەتوانرا بخرێتە سەر کوردستان، ئەوە پێویستە رێگە نەدرێت بخرێتە سەر بەغداو بکرێتە هەرێمێکی سەربەخۆ".

لەبارەی نیگەرانییەکانی خەڵکی باشووری کوردستانیشەوە، سەڵاحەدین دەمیرتاش گوتی: "دۆستەکانی من لە باشووری کوردستان باش دەزانن هەڵوێست و بۆچوونی من چۆنە لەسەر شنگال".</sup>

^26/12/2014

http://rudaw.net/sorani/kurdistan/2612201416

<sup>هاونیشتمانییەکی خەڵکی شاری پیرانشاری رۆژهەڵاتی کوردستان رۆبۆتێکی تایبەتی دروستکردووە کە بە رۆبۆتی پاسەوان دەیناسێنێت. بەگوتەی خاوەنەکەی، رۆبۆتی پاسەوان دەتوانێ لە مەودای ٥٠ مەترەوە پەرچەکردار بە هەر چەشنەی جووڵە و دەنگێک پێشانبدا و دەنگ و وێنەی ئەو کەسانەش لێکبکاتەوە کە لێی نزیکدەبنەوە. 

ئەو رۆبۆتە دەنگ و وێنەی ئەو کەسە تۆمار دەکات کە لێی نزیکدەبێتەوە و هاوکات لەرێگەی ئینتەرنێتەوە پەیوەندی بە مۆبایلی خاوەنەکەی دەکات و راستەوخۆ وێنە و دەنگی ئەو شوێنەی بۆ دەگوازێتەوە.

رۆبۆتی پاسەوان لە ئێران بە داهێنانێکی تایبەت تۆمارکراوە و خاوەنی ئەو رۆبۆتە دەڵێت هەفتەی رابردوو لە پێشانگایەکی تایبەت بە لێکۆڵینەوە لە تارانی پایتەختی ئێران، پلەی یەکەمی بەدەستهێناوە.

عەبدوڵڵا حەسەنزادە دەڵێت چوارساڵ کات و 8 ملیۆن تمەنی بۆ دروستکردنی رۆبۆتەکەی تەرخانکردووە، بەڵام بەرپرسان تەنیا لەوحێکی رێزلێنانیان پێداوە و پشتیوانی مادییان لێنەکردووە. تەنانەت بانکەکانیش ئامادەنین بۆ پەرەپێدانی کارەکەی بە قەرزیش، هاوکاری بکەن بۆ ئەوەی کە بەرهەمەکەی بگەیەنێتە ئاستێکی جیهانی.</sup>

^rudaw

^26/12/2014

<sup>بڕیارە لە چوارچێوەی سەردانەكەیدا بۆ هەرێمی كوردستان، عەلی لاریجانی لە هەولێر لەگەڵ سەرۆكی هەرێمی كوردستان كۆببێتەوە.

عەلی دهنەوی، بەرپرسی بەشی سیاسی كونسوڵی كۆماری ئیسلامیی ئێران لە سلێمانی، بە تۆڕی میدیایی رووداوی گوت، بڕیارە لە سەردانەكەیدا عەلی لاریجانی، سەرۆكی ئەنجوومەنی شوورای ئێران لە هەولێر سەردانی مەسعود بارزانی، سەرۆكی هەرێمی كوردستان بكات.

نیوەڕۆی ئەمڕۆ هەینی 26/12/2014، لاریجانی لە شاری بەغداوە گەیشتە سلێمانی و لەلایەن بەرهەم ساڵح و ژمارەیەك بەرپرسی ئیداری و حیزبی پێشوازی لێكرا.  لەو سەردانەیدا لاریجانی چاوی بە جەلال تاڵەبانی، سکرتێری گشتیی یەکێتیی نیشتمانیی کوردستان و سەرۆككۆماری پێشووی عێراق دەکەوێت. لەگەڵ ژمارەیەك ئەندامی مەكتەبی سیاسی یەكێتیش كۆدەبێتەوە.

هەروەها هەر ئەمڕۆ سەرۆكی ئەنجوومەنی شوورای ئێران كاژێر 02:30  سەردانی شاری هەولێر دەکات و لەگەڵ د. یوسف محەممەد، سەرۆکی پەرلەمانی کوردستان کۆدەبێتەوە. تارق جەوهەر، راوێژكاری راگەیاندنی پەرلەمانی كوردستان پێشتر بە تۆڕی میدیایی رووداوی گوتبوو، كە لاریجانی لەلایەن یوسف محەممەد لە فڕۆكەخانەی نێودەوڵەتی هەولێر پێشوازی لێدەكرێت و دواتر لە تەلاری پەرلەمان كۆبوونەوەیەك ئەنجامدەدەن.</sup>

^rudaw 

^26/12/2014