^{موحسین رەفیقدوست یەکێ لە فەرماندەکانی پێشووی سوپای پاسدارانی ئێران رایگەیاند كە لەسەر داوای حکوومەتی عێراق، دەتوانێ ھاوکار بێت بۆ پێکھێنانی سوپای پاسدارانی عێراق.}

^{رەفیقدوست لە لێدوانێکیدا بۆ ماڵپەڕی 'یانەی رۆژنامەنووسانی گەنج' کە سەر بە کەناڵی دەوڵەتی ئێرانە گوتی "ئەگەر سوپای پاسدارانی عێراقی پێک بھێنرێ، ئەوا ئێمە بە گشت توانا و ئەزموونمانەوە ئامادەین ھاوکاری بکەین".}

^{رەفیقدوست راشیگەیاند کە سوپای پاسدارانی ئێران لەنێو کۆمەڵگەی نێودەوڵەتی مۆدێلێکی سەرکەوتووە و دەبێتە مۆدێلێکی باش بۆ وڵاتانی ناوچەکەش.}

^{سوپای پاسدارانی ئێران یەکێکە لە ھێزە سەربازییە گرنگەکانی ئێران و رۆڵی بەرچاوی ھەیە لە بواری ئابووری ئەو وڵاتەش. سوپای پاسداران راستەوخۆ سەر بە رێبەری ئاینی ئێرانە.}

^{لە لایەکی دیکەش ئەو سوپایە بەئەنجامدانی کاری تیرۆریستی و تێکدەری لە دەرەوەی وڵات تۆمەتبار دەکرێت.}

^9/6/2016

^{سه‌رۆكوه‌زیرانی توركیا رایگه‌یاند، كه‌سانی نزیك له‌ گرووپه‌ جوداخوازه‌كان هه‌واڵمان پێده‌گه‌یه‌نن كه‌ سه‌رانی په‌كه‌كه‌ داوامان لێده‌كه‌ن دانووستانیان له‌گه‌ڵ ساز بكه‌ین.}

^{بیناڵی یڵدرم، سه‌رۆكوه‌زیرانی توركیا له‌ ئێواره‌ خوانێكی له‌گه‌ڵ په‌رله‌مانتاری فراكسیۆنی ئاكپارتی رایگه‌یاند، له‌ كه‌سه‌ نزیكه‌كانی گرووپه‌ جوداخوازه‌كاندا هه‌واڵمان پێده‌گات، به‌وه‌ی سه‌رانی په‌كه‌كه‌ داوای دانووستانمان لێده‌كه‌ن و له‌ به‌رامبه‌ردا ده‌ستبه‌رداری چه‌كه‌كانیان ده‌بن، ئێمه‌ش به‌هیچ شێوه‌یه‌ك دانووستانیان له‌گه‌ڵ ساز ناكه‌ین.}

^{یڵدرم له‌ به‌شێكی وتاره‌كه‌یدا داوای له‌لایه‌نه‌كانی ئۆپۆزیسیۆن كرد پشتیوانی ئاكپارتی بن بۆ سه‌رله‌نوێ داڕشتنه‌وه‌ی ده‌ستوور و په‌سندكردنی سیسته‌می سه‌رۆكایه‌تی بۆ ئه‌وه‌ی توركیا زیاتر گه‌شه‌بكات و هاوكات بێت له‌گه‌ڵ دوایین پێشهاته‌كانی جیهان.}

^{له‌باره‌ی ته‌قینه‌وه‌كانی ئیسته‌نبوڵ و میدیات، سه‌رۆكوه‌زیرانی توركیا گوتی "په‌كه‌كه‌ به‌رپرسیاری یه‌كه‌مه‌ له‌ هه‌ردوو ته‌قینه‌وه‌كه‌دا. كاره‌ له‌ پێشینه‌كانی 65مین حكومه‌تی توركیا، دژایه‌تیكردنی په‌كه‌كه‌و سه‌رجه‌م گرووپه‌ تیرۆریسته‌كانه‌ به‌تووندترین شێوه‌".}

^{زۆرترین به‌رنامه‌ی بیناڵی یڵدرم سه‌رۆكوه‌زیرانی توركیا له‌ مانگی ره‌مه‌زاندا، له‌ باكووری كوردستان ده‌بێت و چالاكییه‌كانی له‌ شار و شارۆچكه‌كانی كوردستان ده‌بێت و به‌شداری له‌ ئێواره‌ خوانه‌كانی ره‌مه‌زان ده‌كات.}

^9/6/2016

^{بەگوتەی بەرپرسانی پارێزگای سنە، لە گەڕەکە کۆنەکاندا نەخۆشییەکان چوار هێندە زیاتر لە گەڕەکە یاساییەکانی شارەکان بڵاودەبنەوە. هەر لەم گەڕەکانەدا دابەزینی ئاستی خوێندنیش لەواندا دوو قات لە گەڕەکە سەرەکییەکانی شارەکان زیاترە.}

^{بەپێی ئامارەکانی وەزارەتی رێگاوبانی ئێران نزیک بە 15%ی رووبەری ئێران لە گەڕەکە نافەرمییەکان و خانووە کۆنەکان پێکهاتووە. ئەم رووبەرە 130 هەزار هێکتار لە رووبەری هەمووی ئێران لەخۆی دەگرێت.}

^{لەو رووبەرەدا 18 ملیۆن کەس دەژین. واتە شتێک نزیک بە یەک لەسەر چواری سەرجەم دانیشتوانی ئێران. بەگوتەی بەرپرسان ئاماری گەڕەکە کۆنەکان و دانیشتووانەکانیان لە پارێزگای سنە، زیاتر لە ئاستی سەرتاسەری ئێرانە.}

^{گەڕەکە کۆنەکان و گەڕەکەکانی قەراخ شارەکان بوونەتە هۆکاری کێشەیەکی کۆمەڵایەتی و حکومەت سەرەڕای هەوڵەکانی هێشتا نەیتوانیوە ئەم کێشەیە چارەسەر بکات.}

^{بەپێی بڕیارێکی حکومەت ساڵی 2011 چەندین گوندی گەورەی نزیک شارەکان بە سنووری ئیداری شارەکانەوە زیاد کران، کە بەگوتەی شارەزایان، ئەم کارە بەبێ لێکۆڵینەوە ئەنجام درا و ئەم گەڕەکە نوێیانە دەرەنجامی خراپی لێ کەوتووە. بۆ نموونە دیاردەی گەڕەکەکانی قەراخ شارەکان پەرەیان سەند و خەڵکێکی زۆر روویان لە قەراخ شارەکان کرد، کە پێداویستییەکیان تێدا نییە.}

^{پارێزگاری سنە، نەبوونی پلان و گەڕەکەکانی قەراخ شارەکان وەک دوو کێشەی سەرەکی بواری ئاوەدانکردنەوەی شارەکان لە قەڵەمدەدات.}

^{رەوشی ئەمجۆرە گەڕەکانە بە رادەیەک خراپە کە جێگری پارێزگاری سنە بۆ بواری ئاوەدانکردنەوە، بە قەیراناوی لە قەڵەمی دان. ئەمیر قادری دەڵێت "پارێزگای سنە بە گەڕەکە نایاساییەکان گەمارۆ دراوە و لە ئاکامدا دەتوانێت زەرەر و زیانی قەرەبوو نەکراوی لێبکەوێتەوە".}

^{بەگوتەی بەرپرسان، نێونجی خزمەتگوزارییەکان لە گەڕەکە نایاسایی و کۆنەکاندا زۆر کەمتر لە نێونجی خزمەتگوزاری لە گەڕەکە سەرەکییەکانی شارەکاندایە و خزمەتگوزارییەکان بەشێوەی یەکسان دابەشنەکراون.}

^9/6/2016

^{كه‌مال كلیچدارئۆغلو سه‌رۆكی پارتی گه‌لی كۆماری جه‌هه‌په‌، له‌ دیمانه‌یه‌كی تایبه‌تدا ره‌خنه‌ی له‌ حكوومه‌تی توركیا گرت به‌وه‌ی له‌ كاتی دروستبوونی گروپی تیرۆریستی داعشدا رووبه‌رووی ئه‌و گروپه‌ تیرۆریستیه‌ نه‌بووه‌ته‌وه‌.}

^{كلیچدارئۆغلو له‌ دیمانه‌یه‌كی تایبه‌تدا له‌گه‌ڵ كه‌ناڵی سی ئێن ئێنی توركی، ئاماژه‌ی دا كه‌ له‌ كاتی دروستبوونی داعشدا ئه‌وان به‌ حكوومه‌تیان گوتووه‌ كه‌ ئۆپه‌راسیۆنی سه‌ربازی دژی داعش ئه‌نجام بده‌ن و بڕۆنه‌ ناو خاكی سووریاوه‌، به‌ڵام حكوومه‌ت گوێ لێ نه‌گرتوون.}

^{باسی له‌وه‌ش كرد كه‌ ئێستە یه‌كێتی ئه‌وروپا و چه‌ندین وڵاتی دیكه‌، توركیا تۆمه‌تبار ده‌كه‌ن به‌وه‌ی هاوكاری داعشه‌، چونكه‌ به‌ هیچ شێوه‌یه‌ك توركیا دژی داعش هه‌نگاوی نه‌ناوه‌.}

^{ئه‌و له‌ به‌شێكی دیكه‌ی قسه‌كانیدا ئاماژه‌ی دا ئه‌گه‌ر ئۆپه‌راسیۆن دژی داعش ئه‌نجام بدرابوایه‌، ئه‌وكات ره‌نگه‌ برا كورده‌كانمان له‌ كۆبانێ نه‌كه‌وتبانه‌ ده‌ستی داعش و نه‌ده‌كوژران.}

^{له‌ باره‌ی ئه‌وه‌ی ئه‌حمه‌د داودئۆغلو له‌ پۆسته‌كه‌ی دوور خرایه‌وه‌ و له‌ جێگه‌ی ئه‌و بیناڵی یڵدرم بووه‌ سه‌رۆك وه‌زیران، كلیچدارئۆغلو پێیوابوو كه‌ كوده‌تایه‌ك بوو ئه‌ردۆگان به‌سه‌ر داودئۆغلوی كرد، چونكه‌ ئه‌و به‌ ده‌نگی خه‌ڵك بووبووه‌ سه‌رۆك وه‌زیران. هه‌روه‌ها داودئۆغلو له‌ رووی ئیكۆنۆمییه‌وه‌ رابردوویه‌كی پاكی هه‌یه‌، وه‌لێ بیناڵی یڵدرم چه‌ندین گه‌نده‌ڵی ئه‌نجام داوه‌ و له‌ رووی ئیكۆنۆمییه‌وه‌ رابردووی پیسه‌.}

^8/6/2016

<sup>ئەنجومەنی جیهانیی قەڵەم بە بڵاوکردنەوەی بەیاننامەیەک، نیگەرانیی زۆریان لەبارەی بارودۆخی محەمەدسدیق كەبوودوەند ڕۆژنامەنووسی كورد هەیە و داواكارن بە زووترین كات خزمەتگوزاری پزیشكی پێ بگات.

ئەو ئەنجومەنە ئەوەشی ئاشکرا کردووە كە كەبوودوەند تووشی چەندین نەخۆشیی وەك دڵ و گورچیلە و پرۆستات بووە و بەهۆی مانگرتنەكەی بارودۆخی خراپتر بووە.

لە بەیاننامەکەی ئەنجومەنی جیهانیی قەڵەمدا هاتووە "كەبوودوەند بەهۆی ڕادەربڕینەوە زیندانی كراوە و بەپێی مادەی 19 جاڕنامەی نێودەوڵەتی مافی مەدەنی و سیاسی داوای ئازادكردنی بێ‌ مەرجیان كردووە كە ئێرانیش لەو پەیماننامەیە ئەندامە."

لە ڕاگەیەندراوی ئەو ئەنجومەنەدا باس لەوە دەكرێت كە كەبوودوەند ئەندامی فەخریی ئەنجومەنی قەڵەمی نەمسا، ئەنجومەنی قەڵەمی سوید، ئەنجوومەنی قەڵەمی ماتالا و ئەنجوومەنی قەڵەمی سیدنی و هەروەها رۆژنامەنووسی ساڵی بەریتانیا لە ساڵی 2009 و براوەی خەڵاتی "هلمت همت" لە ساڵی 2008 ە.

ئەو ئەنجومەنە داوای لە خۆێنەرانی ئەو ڕاگەیەندراوە كردووە كە بە نووسینی نامە بۆ عەلی خامنەیی ڕێبەری کۆماری ئیسلامی، سادق لاریجانی سەرۆكی دەزگای دادوەری و محەمەدجەواد لاریجانی بەرپرسی ناوەندی مافی مرۆڤی ئێران، هەروەها بڵاوكردنەوەی لە تۆڕە كۆمەڵایەتییەكانی وەك فەیسبوك و تویتەر ئەو داواكارییانە بگەیەنن:

- دەربڕینی نیگەرانی لەسەر تەندروستیی محەمەدسەدیق كەبوودەوەند ڕۆژنامەنووس و نووسەر، و دواوای گەیاندنی خزمەتگوزاریی تەندروستیی بەپەلە.

- لە بەرپرسانی ئێران داوای لادانی هەر تۆمەتێكی نوێ‌ لەسەر كەبوودوەند بكرێت.

- داوا لە ئێران بكرێت كە پابەند بێت بە مادەی 19ی جاڕنامەی نێودەوڵەتی مافی مەدەنی و سیاسی كە ئێران خۆی لەو هاوپەیمانەتییە ئەندامە.

محەمەدسدیق كەبوودوەند، سەرۆكی ڕێکخراوی بەرگری لە مافی مرۆڤی كوردستان ماوەی 9 ساڵە بە تۆمەتی دامەزراندنی ڕێكخراوی بەرگری لە مافی مرۆڤی كوردستان، لە بەندیخانەیە و ئێستاش بەرپرسانی دادوەری ئێران دۆسیەیەكی دیكەیان لە دژی كردۆتە و بەو هۆیەوەماوەی 32 رۆژە مانی لە خواردن گرتووە.</sup>

^8/6/2016

<sup>نرخی دراوەکان بۆ ئەمڕۆ چوارشەممە 8ـی حوزەیرانی 2016 بەمشێوەیەیە:

100 دۆلاری ئەمریکی = 128.300 دینار

100 یۆرۆ = 145.250 دینار

100 پاوەند = 185.250 دینار

100 ھەزار تومەن = 37 ھەزار دینار

100 لیرەی تورکی = 43.750 ھەزار دینار</sup>

^8/6/2016

<sup>رۆژهەڵاتی کوردستان جەمسەرێکی سەرەکی بەرهەمهێنانی کشتوکاڵی ناوچەكەیە. پێشبینیدەکرێت ئەمساڵ زیاتر لە 16 ملیۆن و 300 هەزار تۆن بەرهەمی کشتوکاڵی و ئاژەڵداری لە رۆژهەڵاتی کوردستان بەرهەمبێت. 

بەشێک لەو بەرهەمانە لەناوخۆی رۆژهەڵاتی کوردستان و ئێران بەکاردێت و بەشی زۆریشی بەناوی بەرهەمی ئێران هەناردەی وڵاتانی دیکە دەکرێت. 

لە رۆژهەڵاتی کوردستان زیاتر لە 4 ملیۆن و 300 هەزار هێکتار زەوی کشتوکاڵی هەیە، کە زیاتر لە 70%ی دێم و نزیک بە 30%یشی زەوی بەراوە.

بوونی چەند ملیۆن هێکتار زەوی کشتوکاڵی کوردستانی کردووە بە جەمسەری سەرەکی بەرهەمهێنانی کشتووکاڵی لە ئێران و رۆژهەڵاتی ناوەڕاست. 

پێشبینیدەکرێت ئەمساڵ لە رۆژهەڵاتی کوردستان زیاتر لە 16 ملیۆن و 300 هەزار تەن بەرهەمی کشتوکاڵی و ئاژەڵداری بەرهەم بێ، بەشێکی زۆری ئەو بەرهەمەش هەناردەی وڵاتانی دەرەوە و ناوچەکانی دیکەی ئێران دەکرێت.</sup>

^8/6/2016

^{ئەو ‌هاوڵاتیایە سویسرانەی کە بەشداری ریفراندۆمیان کرد، بۆ وەرگرتنی مووچەیەکی مانگانەی 2500 فرانکی بەبێ کارکردن، ئەو ئیمتیازەیان رەتکردەوە.}

^{بەپێی ئەنجامەكانی ریفراندۆمەكە، زۆرینەی بەشداربووان دەنگیان بە نەخێر داوە و نایانەوێت ئەو بڕە پارەیە بەبێ کارکردن لە حکومەت وەربگرن.}

^{دانیشتووانی سویسرا لەڕێگەی بەشداریکردنیان لە ریفراندۆمێک پێشنیارێکیان رەتکردەوە کە تایبەت بوو بە پێدانی مانگانەیەک بۆ هەر دانیشتوویەکی وڵات لە لایەن حکومەتەوە.}

^{پێشنیارەکە لە لایەن کۆمەڵیک چالاکوانی چەپەوە خرایەڕوو، ئەوەش پاش ئەوەی توانیان واژۆی 100 هەزار کەس کۆبکەنەوە کە پێویست بوو بۆئەوەی پێشنیارەکەیشیان بخەنە ریفراندۆمەوە.}

^{ئەو چالاکوانانە پێشنیاری ئەوەیان کردبوو "مانگانە حکومەت بڕی 2 هەزار و پێنج سەد فرانک، کە دەکاتە 2560 دۆلار بداتە هەر دانیشتوویەکی وڵات، بەڵام دەنگدەران پشتگیرییان لە پێشنیارەکە نەکرد.}

^{دانیشتوویەکی سویسرا دەڵێت، پێویستە خەڵک فێری ئیشکردن بێت و ئەم پێشنیارە وادەکات ئیدی کەس ئیش نەکات.}

^{تەنیا چالاکوانە چەپەکان نەبوون پشتگیرییان لەم پێشنیارە کرد، بەڵکو ژمارەیەک لە پسپۆڕانی بواری ئابووریش پێیان وابوو جێبەجێکردنی باشە، چونکە هەمان دەرفەتی ژیان دەداتە هەموو کەس.}

^{8 ملیۆن و 211 هەزار کەس لە سویسرا دەژین و دەرئەنجامەکانیش دەریدەخەن کە 78%ی دەنگدەران بە "نەخێر" دەنگیانداوە و 22%ەکەی دیکەیشیان بە "بەڵێ"، واتە خەڵک رەتیکردەوە بێبەرامبەر پارە لە حکومەت وەربگرێت.}

^7/6/2016

<sup>به‌پێى فه‌رمانێكى كارگێڕى حكومه‌تى هه‌رێمى كوردستان كه‌ رۆژى 1/5/2016 ده‌رچووه‌ و ئیمزاى نێچیرڤان بارزانى سه‌رۆكى حكومه‌تى له‌سه‌ره‌، بڕیار دراوه‌ به‌هه‌ڵوه‌شاندنه‌وه‌ى بڕیارى لامه‌ركه‌زیه‌تى پارێزگاكان.


له‌و فه‌رمانه‌دا كه‌ وێنه‌یه‌كى ده‌ست (باسنیوز) كه‌وتووه‌، هاتووه‌ "دوابه‌دواى فه‌رمانى سه‌رۆكایه‌تى ئه‌نجومه‌نى وه‌زیران ژماره‌ 1700 له‌ 17/4/2016 دواى كارا بوونى یاساى پارێزگاكانى هه‌رێمى كوردستان ژماره‌ 3 ى ساڵى 2009 و به‌ڕه‌چاوكردنى بارودۆخى دارایی هه‌رێم‌ و به‌له‌به‌رچاوگرتنى بڕیار و رێكاره‌كانى ئه‌نجومه‌نى وه‌زیرانى هه‌رێمى كوردستان‌ و لیژنه‌ى باڵاى قه‌یرانى دارایی، بڕیارمان دا به‌هه‌ڵوه‌شاندنه‌وه‌ى بڕیاره‌كانى ئه‌نجومه‌نى وه‌زیران ژماره‌ 40 له‌ 16/1/2013 و 44 و 45 له‌ 19/6/2013 تایبه‌ت به‌دابه‌زاندنى ده‌سه‌ڵاتى گواستنه‌وه‌ى فه‌رمانبه‌ران‌ و ده‌سه‌ڵاته‌ كارگێڕى‌ و داراییه‌كان بۆ پارێزگا و یه‌كه‌ ئیدارییه‌ سه‌ربه‌خۆكان‌ و به‌ڕێوه‌به‌ره‌ گشتییه‌كانى سنوورى پارێزگاكان‌ و یه‌كه‌ ئیدارییه‌كان‌ و ئه‌و به‌ڕێوه‌به‌رایه‌تییانه‌ى له‌ دیوانى وه‌زاره‌ته‌كان به‌ڕێوه‌به‌رایه‌تى گشتییان هه‌یه‌".


له‌ به‌شێكى دیكه‌ى فه‌رمانه‌كه‌دا ئاماژه‌ به‌وه‌ دراوه‌ "وه‌زاره‌ت‌ و پارێزگا و یه‌كه‌ ئیدارییه‌ سه‌ربه‌خۆكان به‌ڕه‌چاوكردنى بارودۆخى دارایی هه‌رێم‌ و بڕیار و رێنماییه‌كانى كۆبوونه‌وه‌كانى ئه‌نجومه‌نى وه‌زیران‌ و به‌پێى ده‌سه‌ڵاتى خۆیان‌ و پێویستى‌ و تایبه‌تمه‌ندى هه‌ر به‌ڕێوه‌به‌رایه‌تییه‌كى گشتى یان یه‌كه‌یه‌كى ئیدارى له‌ چوارچێوه‌ى یاسا و رێنماییه‌كان ده‌توانن ده‌سه‌ڵاته‌كانیان بۆ خوار خۆیان دابه‌زێنن، به‌ئامانجى به‌رجه‌سته‌كردنى پره‌نسیپی دابه‌زاندنى ده‌سه‌ڵاته‌كان‌ و پیاده‌كردنى لامه‌ركه‌زى ئیدارى‌ و كه‌مكردنه‌وه‌ى رۆتین بۆ سوود و به‌رژه‌وه‌ندى گشتى".


به‌پێى فه‌رمانه‌كه‌ سه‌رجه‌م وه‌زاره‌ت‌ و دام‌وده‌زگاكانى نه‌به‌ستراو به‌وه‌زاره‌ته‌كان‌ و لایه‌نه‌ په‌یوه‌ندیداره‌كانى تر ئه‌م فه‌رمانه‌ جێبه‌جێ ده‌كه‌ن له‌ ڕێكه‌وتنى ده‌رچوونیه‌وه‌.</sup>

^7/6/2016

^{تەقینەوەیەك له‌ گه‌ڕه‌كی ڤه‌زنه‌جیله‌ر، ناوچه‌ی به‌یازید-ی شاری ئیستەنبوڵی‌ توركیا روویدا و بەپێی زانیارییە سەرەتاییەکانیش تەقینەوەکە پاسێکی پۆلیسی کردووەتە ئامانج .}

^{رەسەن رەمزی، پەیامنێری رووداو لە نزیک شوێنی تەقینەوەکە رایگەیاند " نزیکەی سێ خوولەک بەر لە ئێستا ( کاژێر 08:40) تەقینەوەیەک لە ئیستەنبوڵ روویدا".}

^{پەیامنێری رووداو گوتیشی " ئەو شوێنەی تەقینەوەکە تێیدا روویداوە مزگەوت و میترۆی لێیە و خەڵکی زۆر سەردانی ئەو شوێنە دەکەن".}

^{بەپێی زانیارییەکان "هێرش كراوه‌ته‌ سه‌ر پاسێكی پۆلیسهه‌ڵگر و به‌هۆیه‌وه‌ بریندار هەن، ئێستاش پۆلیسی شاره‌كه‌ ناوچه‌كه‌یان به‌ته‌واوه‌تی گه‌مارۆداوه".}

^7/6/2016