^{بەڕێوەبەرایەتی گشتی ئاسایشی هەولێر لە روونکردنەوەیەکدا کە بەرەبەیانی رۆژی هەینی 1-7-2016 بڵاویکردەوە رایدەگەیێنێت: "دوابەدوای ئەوەی چەند کەسێک لە پەیوەندی بە هێرشەکەی سەر کەناڵی رووداوەوە دەستگیر کران، هەندێ لایەن هەوڵی بە سیاسی کردنی ئەم کەیسە دەدەن".}

^{ئاسایشی هەولێر هوشداریی تووند دەدات و رایدەگەیێنێت: "لێرەدا بۆ گشت لایەک دووبارەی دەکەینەوە کە دەزگای ئاسایش وەک دەزگایەکی نیشتمانی، سەر و ماڵی گشت هاووڵاتیان بە بێ هیچ جیاوازییەک دەپارێزێت و لە هەمان کاتیشدا هەر کەسێک یان لایەنێک ببێت بە هۆکاری هەڕەشە بۆ سەر ئاسایشی هاووڵاتیان پارێزبەندیی نییە و لە چوارچێوەیەکی یاساییدا رێکاری پێویستی بەرامبەر دەگیرێتە بەر".}

^{لە روونکردنەوەکەی ئاسایشی هەولێردا هەروەها هاتووە: "بە ئاگاداری هەموو لایەنە پەیوەندیدارەکان کارکردن لە سەر ئەم دۆسیەیە بەردەوامە و لە ماوەیەکی نزیکدا ئەنجامەکان بۆ هاووڵاتیانی خۆشەویستمان بڵاو دەکەینەوە".}

^1/7/2016

^{مەسعود بارزانی، سەرۆکی هەرێمی کوردستان بەبۆنەی سی و پێنجەمین خولی دەرچوونی قوتابیانی زانكۆی سەلاحەدین، پیرۆزبایی لە دەرچووان دەکات و رایدەگەیێنێت: "قوتابی و گەنجەكانمان ئومێدی ئەو میللەتەن و خۆشحاڵم بە سەركەوتن و دەرچوونتان و هیوای بەختەوەری و سەربەرزیتان بۆ دەخوازم".}

^{لە پەیامەکەیدا سەرۆکی هەرێمی کوردستان دەڵێت "جێگەی شانازییە ئەمڕۆ ژمارەیەك لە قوتابیانی خۆشەویستی زانكۆی سەلاحەدین بڕوانامەی دەرچوونیان بە سەركەوتوویی وەرگرتووە و خۆیان بۆ قۆناغی هەوڵدان و خزمەتكردنی وڵاتەكەیان ئامادە كردووە. بەم بۆنەیەوە گەرمترین پیرۆزبایی خۆم ئاراستەی قوتابیانی دەرچووی ئەم خولە دەكەم و هیوای سەركەوتنیان بۆ دەخوازم".}

^{لە بەشێکی دیکەی پەیامەکەیدا کە لە ماڵپەڕی سەرۆکایەتی هەرێمی کوردستان بڵاوبووەتەوە ، دەستخۆشی لە مامۆستاو سەرۆكایەتی زانكۆ و كۆلیژ و بەشەكانی زانكۆی سەلاحەدین دەكات و رایدەگەیێنێت "دەستخۆشی لە سەرجەم مامۆستا بەڕێزەكان دەكەم كە ئەركی پیرۆزی پێگەیاندنی قوتابیانی خۆشەویستیان لەسەر شانە و پێزانینم بۆ ڕۆڵ و ماندووبونیان هەیە. سوپاسی سەرۆكایەتی زانكۆ و كولیژ و بەشەكانی زانكۆی سەلاحەدین دەكەم كە سەرپەرشتیی پڕۆسەی خوێندن و پێگەیاندنی قوتابیانی ئەم خولەیان بە سەركەوتوویی ئەنجام داوە".}

^{دەقی پەیامی سەرۆکی هەرێمی کوردستان بۆ قوتابیانی دەرچووی زانکۆی سەلاحەدین}

^{بەناوی خودای بەخشندە و میهرەبان}

^{مامۆستایانی بەڕێز}

^{قوتابیانی خۆشەویست}

^{جێگەی شانازییە ئەمڕۆ ژمارەیەك لە قوتابیانی خۆشەویستی زانكۆی سەلاحەدین بڕوانامەی دەرچوونیان بە سەركەوتوویی وەرگرتووە و خۆیان بۆ قۆناغی هەوڵدان و خزمەتكردنی وڵاتەكەیان ئامادە كردووە. بەم بۆنەیەوە گەرمترین پیرۆزبایی خۆم ئاراستەی قوتابیانی دەرچووی ئەم خولە دەكەم و هیوای سەركەوتنیان بۆ دەخوازم. دەستخۆشی لە سەرجەم مامۆستا بەڕێزەكان دەكەم كە ئەركی پیرۆزی پێگەیاندنی قوتابیانی خۆشەویستیان لەسەر شانە و پێزانینم بۆ ڕۆڵ و ماندووبونیان هەیە. سوپاسی سەرۆكایەتی زانكۆ و كولیژ و بەشەكانی زانكۆی سەلاحەدین دەكەم كە سەرپەرشتیی پڕۆسەی خوێندن و پێگەیاندنی قوتابیانی ئەم خولەیان بە سەركەوتوویی ئەنجام داوە.}

^{گەلی كوردستان بەهەموو پێكهاتەكانیەوە سەرباری بوونی كۆسپ و تەحەددیات توانیویەتی خۆڕاگر بێت و قۆناغی سەخت تێبپەڕێنێت و لە سایەی قوربانیداندا دەستكەوتی گەورە مسۆگەر بكات. گەلی كوردستان قارەمانانە لەبەرانبەر پەلاماری تیرۆریستان و ئابلۆقە و گوشاری جۆراوجۆردا وەستاوە و پێشمەرگە بە خوێنی خۆی ئەفسانەی تیرۆریستانی شكاند و جیهانی سەرسام كرد. كچان و كوڕانی كوردستان لە شەڕی تیرۆریستاندا نموونەی باڵایان لە گیانفیدایی و ئازایەتی تۆمار كرد كە لە جیهاندا كەموێنەیە و تاهەتایە جێگەی شانازیین.}

^{ئێستا كوردستان بەرگری لە بەها بەرزەكانی مرۆڤایەتی دەكات و ئەوە پێگەی گەلەكەمانی لە ئاستی جیهان بەرز كردووەتەوە. گەلی كوردستان دۆست و هاوپەیمانی لە هەموو شوێنێكی جیهان هەیە كە پشتیوانی مافە ڕەواكانی گەلەكەمانن.}

^{كاتی ئەوەیە گەلی كوردستان وەك میللەتانی تری جیهان خاوەنی سەروەری و كیانی خۆی بێت، بۆ ئەوەی بتوانێ لەسەر پێی خۆی ڕاوەستی و بەرەو پێشەوە بچێت. هەر بۆیەش پێویستە ڕۆڵەكانی گەلەكەمان لەسەر بەها بەرزەكانی مرۆڤدۆستی و نیشتیمانپەروەری و خزمەتكردنی وڵات و بڕوابەخۆبوون گۆش بكرێن. بۆ ئەوەی بتوانین ببینە نموونەی پاراستنی كەرامەتی مرۆڤ و پێشكەوتن لە ناوچەكە و جیهاندا. بۆ ئەوە مەبەستە ڕۆڵی مامۆستا و قوتابیانی خۆشەویست و ئەهلی زانست یەكلاییكەرەوە و كاریگەر دەبێت.}

^{لێرەدا پاڵپشتیی تەواوی خۆم بۆ زانكۆ و قوتابیانی كوردستان ڕادەگەیێنم. پێویستە بە هەوڵی هەموو لایەك ئاستی زانستیی زانكۆكانمان بگاتە ستانداردە جیهانییەكان. هەروەها كەرتە حكوومی و ئەهلییەكان هەلی كار و پێشكەوتن بۆ قوتابیانی دەرچوو بڕەخسێنن بۆ ئەوەی پسپۆڕی و تواناكانیان بۆ خزمەتكردنی وڵات بەكار بهێنن.}

^{قوتابی و گەنجەكانمان ئومێدی ئەو میللەتەن. خۆشحاڵم بە سەركەوتن و دەرچوونتان و هیوای بەختەوەری و سەربەرزیتان بۆ دەخوازم.}

^{مسعود بارزانی}

^{30ـی 6ـی 2016}

<sup>کۆماری ئیسلامیی ئێران، وەک کاردانەوەیەک لە بەرامبەر جموجۆڵەکانی پێشمەرگەکانی حزبی دیموکراتی کوردستانیی ئێران لە ڕۆژهەڵات، ئامادەکاری بۆ هێرشکردنە سەر بنکە و بارەگاکانی دیموکرات لە کۆیە دەکات.

سەرچاوەیەکی بەرپرس لە حزبی دیموکراتیی کوردستان کە نەیویست ناوەکەی ئاشکرا بکرێت، بە (باسنیوز)ی ڕاگەیاند، بەپێی ئەو زانیارییانەی دەستیان کەوتووە، ئێران چەکی قورسی بۆ هێرشکردنە سەر کۆیە ئامادە کردووە و ئامادەکاریی سەربازیی تەواو بۆ لێدانی بارەگاکانی حزبی دیموکراتیی کوردستانیی ئێران کراوە کە باڵەکەی دیکەی حزبەکەی ئەو بەرپرسەیە.

ئەوەشی بۆ (باسنیوز) ئاشکرا کرد: ”لە هەرێمی کوردستانیش ئاگاداریی تەواو هەیە، یەکێتیی نیشتمانیی کوردستان ئەوەی باش ئاگا لێیە و هەر یەکێتی نەخۆشخانەکانی کۆیەی ئاگادار کردووەتەوە کە ئەگەری هێرش بۆ سەر کۆیە هەیە و ئامادەکاری بکەن“. جەختیشی لەوە کردەوە کە تەنانەت ئامادەکاری بۆ ڕاگواستنی خەڵکی کوردستانی ڕۆژهەڵات لە کۆیەوە بۆ شوێنێکی سەلامەتتر لە حاڵەتی هێرشەکەدا، کراوە.

ئەو بەرپرسەی حزبی دیموکراتیی کوردستان لە لێدوانەکەیدا بۆ (باسنیوز) ئاماژەی بەوە کرد کە ئەوان شەوان دەبینن، گڵۆپەکانی کێڵگەی نەوتیی (شیواشۆک) دەکوژێندرێنەوە، تاوەکوو: ”ئێمە نەبینین کە چۆن ئامێر و کەرەستە گرانبەهاکانی شیواشۆک لە ترسی ئەو هێرشە لە ناوچەکە دوور دەخرێتەوە“.

هەر لەمبارەیەوە، عەمید محەمەد سەعید، بەڕێوەبەری پۆلیسی کۆیە، بە (باسنیوز)ی ڕاگەیاند: ”ئێمە لە سەرووی خۆمان بە فەرمی هیچ فەرمان و ئاگادار نەکراوینەتەوە“. ڕوونیشی کردەوە، لە ناو خەڵکیدا قسە دەکرێت، بەڵام: ”قسەی خەڵک بۆ ئێمە فەرمی نییە“.

لە باشووری ڕۆژئاوای شاری کۆیە، بنکە و بارەگاکانی هەردوو باڵەکەی حزبی دیموکرات و هەزاران ماڵی کوردانی ڕۆژهەڵاتی تێدایە کە لە سێ کەمپی (زەوییە سپی، ئەمیرییە و ئازادی) دابەش کراون و هەزاران ژن و منداڵیان تێدایە.</sup>

^30/6/2016

^{باڵیۆزی بەریتانیا لە عێراق رایدەگەیەنێت، کە خۆشحاڵە بە ئامادەکارییەکانی هەرێمی کوردستان بۆ ئۆپەراسیۆنی رزگار کردنەوەی شاری مووسڵ.}

^{فرانک بەیکەر، باڵیۆزی بەریتانیا لە عێراق لە لاپەڕەی تایبەتیی خۆی لە تۆڕی کۆمەڵایەتیی تویتەر خۆشحاڵیی خۆی بە دروستکردنی پێنج کەمپی دیکە بۆ ئاوارەکانی شاری مووسڵ، دەردەبڕێت.}

^{لە تویتەکەیدا، فرانک بەیکەر هەروەها رایدەگەیەنێت، کە بە هەوڵەکانی هەرێمی کوردستان بۆ ئامادەکاریی بۆ شەڕی رزگارکردنەوەی مووسڵیش ”خۆشحاڵ“ـە.}

^{بۆ پێشوازیکردن لە ئاوارەکانی شاری مووسڵ، کە چاوەڕوان دەکرێت دوای دەستپێکردنی ئۆپەراسیۆنی رزگار کردنەوەی شارەکە روو بکەنە کوردستانی باشوور، حکوومەتی هەرێمی کوردستان پێنج کەمپی گەورەی دیکەی لە پارێزگاکانی دهۆک و هەولێر دروست کردووە.}

^{بەهۆی شەڕی تائیفیی نێوان سوننە و شیعە و رێکخراوی توندڕەوی داعش، زیاتر لە 1.8 ملیۆن هاووڵاتیی باشوور و ناوەڕاستی عێراق ئاوارەی هەرێمی کوردستان و ناوچەکانی ژێر دەسەڵاتی هێزی پێشمەرگەی کوردستان بوون و چاوەڕێی زیادبوونی ئەو ژمارەیەش دەکرێت.}

^{چەکدارانی داعش دوای هەرەسهێنانی سوپای عێراق لە مانگی حوزەیرانی 2014، زۆربەی ناوچەکانی پارێزگاکانی نەینەوا، دیالە، سەڵاحەدین و ئەنباریان داگیر کرد.}

^30/6/2016

<sup>ھاوسەرۆکی گشتیی پارتی دیموکراتیکی گەلان (ھەدەپە) رایدەگەیەنێت، کە حکوومەتی تورکیا 15 هەزار ئەندامی حزبەکەی دەستگیر کردووە.

سەڵاحەدین دەمیرتاش، هاوسەرۆکی هەدەپە لە میانەی خوانێکی بەربانگدا، کە رۆژی چوارشەممە 29ـی حوزەیرانی 2016 حزبەکەی لە ئیستەنبوڵ رێکی خستبوو، ھێرشە تیرۆریستییەکەی سەر فڕۆکەخانەی ئەتاتورکی ئیدانە کرد و رایگەیاند، ”کاتێ ماڵی دراوسێکەت سووتا دووکەڵ، ئاگر و بڵێسەی ئاگرەکە کاریگەریی لەسەر تۆش دەبێت“.

دەمیرتاش حکوومەتی تورکیا بە لایەنگری بۆ رێکخراوی توندڕەو داعش دادەنێت و نموونەش بەوە دەهێنێتەوە، کە ”بەرپرسی سەربازیی داعش لە تورکیا دەستگیر کرا بەڵام تەنانەت کەلەپچەش نەخرایە دەستی و لە یەکەم دانیشتنی دادگادا ئازاد کرا“.

ھاوسەرۆکی ھەدەپە پێیوایە حکوومەتی تورکیا هێندەی دژایەتیی هەدەپە دەکات، هیندە دژایەتیی داعش ناکات و دەڵێت، ”لە 2009ـەوە تا ئێستا 15 ھەزار ئەندامی ھەدەپەیان دەستگیر یان دەستبەسەر کردووە و خراونەتە زیندانەوە“.

سەڵاحەدین دەمیرتاش، ئاماژەی بەوەش کردووە، کە حکوومەت و دەزگا ئەمنییەکانی تورکیا ھیچ رێ و شوێنێکیان بەرامبەر ھێرشەکانی ئەنقەرە، پرسووس و ئامەد نەگرتووەتە بەر و لە بری ئەوە، ”بەرپرسان ھەوڵیان دا خەڵک بە رێکخراوە تیرۆریستییەکان پەروەردە بکەن و رادەستیان بکەن“.

دەمیرتاش داوای لە هەردوو گەلی کورد و تورک کرد، بە یەکەوە داوای ئاشتی بکەین، ”ھێشتا درەنگ نییە، وەرن با کورد و تورک دەست لەناو دەست ھەموو بەیەکەوە ھاوار بۆ ئاشتی بکەین و خۆمان ئاشتی وڵاتی خۆمان بنیات بنێین".</sup>

^30/6/2016

<sup>دوێنێ سێشەممە بە فەرمانی عەلی خامنەیی، ڕێبەری کۆماری ئیسلامی، حەسەن فیرووزئابادی، سەرۆکی ئەرکانی هێزە چەکدارەکانی ئێران لە کارەکەی دوور خرایەوە.

ئاژانس و هەواڵدەرییە فەرمییەکانی ئێران ئەم هەواڵەیان پشتڕاست کردووەتەوە و بڵاویان کردووەتەوە، لیوا محەمەد باقری دەستنیشان کراوە.

محەمەد باقری پێشتر جێگری ئیتلاعات و بەرپرسی ئۆپەراسیۆنی سوپای ئێران بووە.
حەسەن فیرووزئابادی لە ساڵی 1989وە پۆستی سەرۆکی ئەرکانی هیزە چەکدارەکانی ئێرانی پێ سپێرداوە و یەک لەو سەرکردە سەربازییانەی ئێرانە کە دوای مەرگی خومەینی، لە پۆستەکەی ماوەتەوە.

هەندێ ماڵپەڕی ئۆپۆزسیۆنی ئێران لەو باوەڕە دان کەمتەرخەمی و شکستهێنانی یەک لەدوای یەکی هێزە چەکدارەکانی ئێران لە سووریا، عێراق و لاوازبوونی ئاسایشی ناوخۆیی وڵات، هۆکاری لەسەر کار لابردنی حەسەن فیروزئابادییە.

پاش ڕاوەستانی 20 ساڵ خەباتی چەکداری لەلایەن حدکاوە، ماوەی دوو هەفتەیە دیسان شەڕ و تێکهەڵچوون لە نێوان پێشمەرگەکانی ئەو حزبە لە شارەکانی شنۆ، مەهاباد، سەردەشت، مەریوان ڕووی داوە و بەپێی سەرچاوە نافەرمییەکان نزیکەی 150 ئەندامی سوپای پاسداران لەو شەڕانەدا کوژران و بە دەیان کەسی دیکەش بریندار بوون، هەروەها 9 پێشمەرگەی حزبی دیموکراتیش شەهید بوون.</sup>

^29/6/2016

<sup>گوتەبێژی حکوومەتی هەرێمی کوردستان، پشووی جەژنی ڕەمەزانی لە هەرێمی کوردستان ڕاگەیاند.

به‌بۆنه‌ی جه‌ژنی ره‌مه‌زانی پیرۆزه‌وه‌ رایدەگەیەنین، پشووی جەژن لە رۆژی یەك شەمە 7/3 ـەوە دەستپێدەكات، و تا رۆژی 7/9 بەردەوام دەبێت ، و دەوامی ئاسایی لە رۆژی یەك شەمە 7/10 دەست پێدەكاتەوە .
بەم بۆنەیەشەوە گەرمترین پیرۆزبایی ئاراستەی پێشمەرگە قارەمانەكان و خانەوادەكانیان و خانەوادەی شەهیدانی سەربەرزی كوردستان و تێكڕای موسڵمانانی كوردستان و عیراق و جیهان دەكەین، بەو هیوایەی ئەم جەژنە ببێتە مایەی سەقامگیری كوردستان وپتەوبوونی یەكڕیزی گەلەكەمان و دەرچوون لە گرفت و قەیرانەكان.
جەژنی هەموو لایەكتان پیرۆز بێت
سەفین موحسین دزەیی
وتەبێژی فەرمی حكومەتی هەرێمی كوردستان
2016/6/28</sup>

^{شاندە هاوبەشەکەی یەکێتیی نیشتمانی کوردستان و بزووتنەوەی گۆڕان بۆ کۆکردنەوەی پشتگیری لە رێککەوتنەکەی نێوانیان ماوەی سێ رۆژ لە بەغدا مانەوە و لە دەرگای زۆربەی لایەنە عێراقییەکانیاندا، ئەو لایەنانەی دەرگایان کردەوە شاندەکە لەگەڵیان کۆبوویەوە، گەورە فراکسیۆنی شیعەکان دەوڵەتی یاسا کە نووری مالکی سەرۆکایەتی دەکات بڕیاری گشتپرسیی باشووری کوردستان رەتدەکاتەوە.}

^{نووری مالیكی، سەرۆكی ئیئتیلافی دەوڵەتی یاسا لە لێدوانێکی تایبەت دا بۆ رووداو گوتی" ئێستا کاتێکی گونجاو نییە بۆ گشتپرسیی، هیوادارم گەلی کورد بەو ئاڕاستەیەدا نەڕوات".}

^{گوتیشی " من پێم وایە ئەوە بڕیارێکی بە پەلەیە بۆیە هیواخوازم سەرکردەکانی هەرێمی کوردستان بەو ڕێگا دوورەدا نەچن ،چونکە بەرژەوەندی گەلی کورد بۆ ئێمە گرنگە ئەگەر بێت و رای ئێمە راست دەرچوو ئەوا لەبەرژەوەندی گەلی کورد دا نییە بەو ئاڕاستەیە بچن".}

^{سوننەکانیش رای جیاوازیان هەیە سەبارەت بە سەردانی شاندە هاوبەشەکەی یەکێتیی و گۆڕان بەشێکیان پێیان وایە لایەنە کوردستانییەکان لە بەغدا دەبێت لەسەر پرسە چارەنووسسازەکانی گەلی کورد بەکۆدەنگی بەشداری لە پڕۆسەی سیاسیی عێراق بکەن، ئۆسامە نوجەیفی سەرۆکی بەرەی ئیسڵاح دەڵێت ئامادەیین پێشوازی لە شاندی دانسوتانکاری گشتپرسی باشووری کوردستان بکەین.}

^{ئۆسامە نوجەیفی، سەرۆکی بەرەی ئیسڵاح بۆ رووداو دەڵێت "هەر شاندێک لە هەرێمی کوردستانەوە بێت بۆ بەغدا سەبارەت بە گشتپرسیی پێشوازییان لێ دەکەین و گوێیان لێ دەگرین ، ئێمە مامەڵە لەگەڵ بابەتێک دەکەین کە لە چوارچێوەی دەستوردا بێت لە بەرژەوەندی عێراق بێت و دەمانەوێت لە وردەکاری ئەم بابەتە تێبگەین ئەوکات رای خۆمان دەڵێین".}

^{ئەگەر چی بابەتی گشتپرسیی مژارێکی گرنگ نەبوو لە سەردانەکەی شاندە هاوبەشەکە بۆ بەغدا، بەڵام ئەندامێکی ئەو شاندە ورژاندنی بابەتی گشتپرسیی باشووری کوردستان بە موزایدەیی سیاسیی ناودەبات و دەڵێت "ئێمە بڕوامان بە رێفراندووم هەیە بە شێوەیەکی گشتی ، بەڵام پێویستمان بە ڕێکخستنەوەی نێوماڵی خۆمان هەیە".}

^{هۆشیار عەبدوڵڵا ، سەرۆکی فراکسیۆنی گۆڕان لە پەرلەمانی عێراق "بەڕاستی پێمان وایە ئەمە جۆرێک نییە لە بۆچوونێکی جیدی سەبارەت بە ریفراندووم بەقەدەر ئەوەی جۆرێکە لە موتاجەرەکردن و جۆرێکیشە لە بەکارهێنانی بە شێوەیەکی خراپ".}

^{شاندە هاوبەشەکەی یەکێتیی و گۆڕان ئیئتیلافی بوونی خۆیان وەکو فراکسیۆنێکی هاوبەش راگەیاند بڕیاریشە لە کاتی دەستپێکردنەوەی دانیشتنەکانی پەرلەمان پێکەوە کار بکەن، رووداو زانیویەتی ئەو فراکسیۆنە هاوبەشە لەگەڵ چەند لایەنێکی عێراقی گفتوگۆی تایبەتیان لە بارەی ئەنجامدانی رێککەوتنی سیاسیی کردووە.}

^29/6/2016

^{لە کاتی بەڕێوەچوونی بانگەشەکانی تایبەت بە مانەوە، یان چوونە دەرەوەی بەریتانیا لە یەکێتی ئەوروپا بەڵێنی زۆر بە خەڵک دران، بەڵام ئێستا کە گشتپرسییەکە کۆتاییهاتووە، ئیدی بەرپرسانی تیمی بانگەشەی چوونە دەرەوەی بەریتانیا لە بەڵێنەکانیان پەشیمان دەبنەوە.}

^{پشتگیریکارانی چوونە دەرەوەی بەریتانیا لە کاتی بانگەشەکاندا دەیانگوت " ئەگەر بەریتانیا لە یەکێتی ئەوروپا بچێتە دەرەوە، مانگانە 350 ملیۆن پاوەند بۆ وڵات دەگەڕێتەوە و ئەو پارەش لە کەرتی تەندروستیدا خەرج دەکرێت"، بەڵام ئێستا ئەم کەسانە بەجۆرێکی دیکە قسە دەکەن.}

^{نایجڵ فاراج، بەرپرسی پارتی سەربەخۆیی بەریتانیا کە داکۆکیکەرێکی سەرسەختی چوونە دەرەوەش بوو، دەڵێت "یەکێک لەو هەڵانەی تیمی بانگەشەی چوونەدەرەوەی بەریتانیا لە یەکێتی ئەوروپا کردی ئەوەبوو، کە گوتی ئەو پارە زۆرە دەگەڕێتەوە بۆ کەرتی تەندروستی، بەڵام ئەمە راست نییە".}

<sup>بەڵام بانگەشەکە کاریگەریی گەورەی هەبوو، لە سەر ئەو بنچینەیەش دەیان هەزار کەس دەنگیان بە چوونە دەرەوەی وڵاتەکەیان لە یەکێتی ئەوروپا دا.

یەکێکی دیکە لە بانگەشەکان پەیوەندی بە پرسی کۆچبەرانەوە هەبوو. سیاسەتمەدارانی پشتگیریکاری چوونەدەرەوەی بەریتانیا لە یەکێتی ئەوروپا دەیانگوت ئەو چوونەدەرەوەیە کۆتایی بە کۆچی بەلێشاوی کۆچبەران بۆ بەریتانیا دەهێنێت. بەڵام هەر ئەو سیاسەتمەدارانە ئێستا هەڵوێستیان لەم بارەوە گۆڕاوە.</sup>

^{نیگڵ ئیڤانز، پەرلەمانتار و پشتگیریکاری چوونە دەرەوەی بەریتانیا لە یەکێتی ئەوروپا، رایگەیاند "جۆرە تێگەیشتنێکی هەڵە" لەبارەی ئەم بابەتە دروستبووە. ئیڤانز گوتیشی چوونە دەرەوەی بەریتانیا واتای ئەوە ناگەیێنێت کۆچی کۆچبەران بۆ وڵاتەکەی کەم دەبێتەوە.}

^{یەکێکی دیکە لە بانگەشەکان پەیوەندی بە بواری ئابووریەوە هەبوو. حکومەتی بەریتانیا و دامەزراوە گرنگە جیهانییەکانی بواری ئابووری دەیانگوت چوونەدەرەوەی بەریتانیا بۆ بواری ئابووری وڵات خراپ دەبێت، بەڵام سیاسەتمەدارانی پشتگیریکاری بەریتانیا لە یەکێتی ئەوروپا تێڕوانینێکی پێچەوانەیان هەبوو.}

^{کەچی ئێستا هەموو شت روونە. لە رۆژی هەینی رابردووەوە پاوەند رێژەی 12%ی بەهای خۆی لە بەرامبەر دۆلار لەدەستداوە، بۆرسەی بەریتانیا لە دابەزیندایە و وەبەرهێنەران پرۆژەکانیان راگرتوون. توێژەرەوانیش دەڵێن: جیاوازی گەورەی نێوان بەڵێنەکان و دەرئەنجامەکان سەرئێشەی گەورە بۆ سەرۆکوەزیرانی داهاتوو دروست دەکات.}

^28/6/2016