ئه‌و مۆسیقایه‌ی له‌سه‌ر مه‌یدان و كۆڵانی شاره گه‌وره‌كان ده‌كه‌وێته به‌ر گوێی مرۆڤ، جارجار له هه‌نبه‌ر دژواری ژیان وه‌ك دروشمی سه‌رهه‌ڵدانیك دێته به‌رچاو.
ئه‌و هه‌موو مۆسیقایه كه له‌لای ره‌شیك و هیپییه‌كانی بانلیۆنی ئه‌وروپا و ئه‌مه‌ریكا خوڵقاوه، ئه‌و میلۆدییانه ئێسته له هه‌موو كۆڵانی باژێڕه‌كانی جیهان به‌ڕێوه ده‌برێت. یه‌كێك له‌و شوێنانه‌یش كۆڵانی ئیستقلالی ئیسته‌مبۆڵه.
له‌و شه‌قامه جار جار ده‌نگی كه‌مانێك، یان سۆزی ده‌نگی گۆرانییه‌ك، جارجاریش نه‌وایه‌كی ئه‌فریقی سه‌رنجتان ڕاده‌كێشی.
له‌ناو ئه‌و فره‌كولتووری و فره‌ده‌نگییه‌ی ئیستقلالدا، كۆڕی سێ برایه. ئه‌و سێ برا كورده به‌ده‌نگی زیز و خۆشی كوردی، شه‌فامی ئیستقلال ده‌هاژێنن. به گیتاره‌كه‌ی ده‌ستیان و گۆرانیی كوردی رێبوارانی ئیستقلال په‌لكێش ده‌كه‌ن. ئه‌و سێ بڕایه كۆكی كوردستانیان له‌گه‌ڵ خۆیاندا هێناوه‌ته گه‌وره شاری ئیسته‌مبۆڵ.
گه‌لێ جار گه‌شتیاران به‌شداریی هه‌ڵپه‌ڕكی و ئاهه‌نگه‌كانیان ده‌بن، ئه‌وانیش حه‌ز ده‌كه‌ن و خۆشحاڵی له‌ناو چاویاندا ده‌بینرێت. ئه‌و لاوه كوردانه كه بۆ كار هاتوونه‌ته ئیسته‌مبۆڵ، بڕیاریان داوه مۆسیقای خۆیان له كۆڵانه‌كان بژه‌نن.
ئه‌گه‌ر ده‌رگای ئه‌و كونسێرته بچووكه بكه‌یته‌وه، وشه‌گه‌لی وه‌ك شوڕش و غه‌ریبی ده‌بینی، به‌گشتی مۆسیقای ئه‌وان سه‌رنجی كوردان راده‌كێشێ. نه ته‌نها له ئیستقلال له باغچه‌لار و شیرین ئێڤلار دێنه سه‌ر كۆڵانان.
بارش ئادال و ئیمان ئادال بران، به ناسینی ئه‌ركان به‌نلی بڕیاریان دا ناوی كۆڕه‌كه‌یان بنێنه (سێ برا) . فه‌یسبووك و تویته‌ریش له‌سه‌ر ناوبانگی ئه‌وان كاریگه‌ر بووه.
شوانی گیتاریست
بارش و ئه‌رداڵ برای یه‌كن و له ناوچه‌یه‌كی شاری ماردین به‌ناوی دێرك له دایك بوون. بۆ كاری خۆیان ئیسته‌مبۆڵیان هه‌ڵبژاردووه، له سه‌ره‌تای وتوێژه‌كه‌ماندا بارش باسی ڕابردووی خۆی ده‌كات و ده‌ڵێ: له شاری دێرك هه‌تا پۆلی پێنجه‌مم خوێند، له‌به‌رئه‌وه‌ی په‌روه‌رده به زمانی توركی بوو، ده‌ستم له خوێندن به‌ردا. هه‌رچه‌ند ناوی ئه‌و كۆمه سێ برایه، به‌ڵام هاوڕێیه‌كه‌یان له ئه‌وان دابڕاوه و هه‌ر به‌و ناوه‌وه كاره‌كه‌یان به‌رده‌وام ده‌كه‌ن.
بارش درێژه ده‌دا: له ته‌مه‌نی 12 ساڵیدا كه شوان بووم، باوكم گیتارێكی بۆ كڕیم و ده‌ستم به مۆسیقا كرد. بۆ درێژه‌دان به مۆسیقا هاتمه ئیسته‌مبۆڵ و ماوه‌یه‌ك وه‌ك كاسبكار له ماركێتێكدا كارم كرد. ئێمه ویستمان ئامانجی خۆمان بۆ گه‌له‌كه‌مان به‌جێ بێنین كه بتوانین بڵێین كورد هه‌یه و مۆسیقای كوردیش هه‌یه، بارشیش حه‌ز له شوان په‌روه‌ر، جوان حاجۆ ده‌كات.
هه‌ڕه‌شه‌ی پۆلیس و نه‌ژادپه‌رستان
ئه‌و گرووپه به‌گشتی له ئیستقلال مۆسیقا ده‌چڕن، له عه‌سره‌وه تا سه‌عات 8ی شه‌و به‌بێ پشوو له شه‌قامه‌كه‌دان. گورانییه‌كانی وه‌ك ئه‌حمه‌د كایا ئولماز، ئوزكورلوك چیچه‌غیمسین، ئامه‌د زیندانله‌ریندا، هه‌والێ ره‌مزی، سه‌رهه‌ڵدان ژیانه، چه‌رخی شۆڕش، كه‌مال پیر یولداش بۆ ده‌وروبه‌ره‌كانی خۆیان ده‌چڕن.
بارش درێژه به قسه‌كانی ده‌دات و ده‌ڵێ: جارجار كه‌سانێك دێنه لای ئێمه و هه‌ڕه‌شه‌مان لێ ده‌كه‌ن و ده‌ڵێن ئاگه‌داری خۆتان بن و به كوردی گۆرانی مه‌ڵێن. ئێمه له‌وان ناترسین، ئه‌وانیش تێگه‌یشتوون كه ئیتر ناتوانن به‌ره‌نگاری ئێمه ببنه‌وه، ئه‌مڕۆ زۆر كه‌س ده‌توانن بێ مه‌ترسی له ئیستقلال گۆرانییه‌كانی خۆیان پێشكه‌ش بكه‌ن، به‌ڵام ئێمه بووینه پێشه‌نگ.
مۆسیقای شۆڕشگێڕی
بارش ده‌ڵێ: دڵخۆشیی گه‌وره‌ی ئێمه كاتێكه كه بیسته‌رانمان گوهداریمان ده‌كه‌ن و ده‌كه‌وینه به‌ر سه‌رنجیان. جارجار گه‌لێك توریست كه له زمانی ئێمه تێناگه‌ن، به‌ڵام گوهداری گورانییه‌كانمان ده‌بن و له ئاهه‌نگه‌كانماندا به‌شداری ده‌كه‌ن و هه‌ڵده‌په‌ڕن، بۆیه ئێمه نامانه‌وێ ئیستیقلال به‌جێ بێڵین، ده‌مانه‌وێ لێره بمێنینه‌وه و ده‌نگی دڵسۆزی و كوردپه‌روه‌ری بگه‌یه‌نینه ئه‌م شه‌قامه.
06/06/2014
