پێ به‌پێی به‌دامه‌زراوه‌یی بوونی داموده‌زگاكانی هه‌رێمی كوردستان له‌سه‌ر ئاستی ناوخۆدا، له‌سه‌ر ئاستی په‌یوه‌ندییه ده‌ره‌كییه‌كانیش گه‌شه‌سه‌ندنی به‌رچاو هاتۆته ئاراوه‌‌و په‌یوه‌ندییه حزبییه‌كان گۆڕانكارییان به‌سه‌ردا هاتووه‌‌و چوونه‌ته قاڵبی دیپلۆماسییه‌وه، وه‌ك چۆن زۆرێك له‌وڵاتانی ده‌وروبه‌رو جیهان كونسوڵگه‌ریی خۆیان له‌هه‌ولێر كردۆته‌وه، له‌هه‌ندێك له‌وڵاتانیش نوێنه‌رایه‌تیی حكومه‌تی هه‌رێم كراوه‌ته‌وه‌‌و بۆته پردی په‌یوه‌ندیی له‌نێوان هه‌رێم‌و ئه‌و وڵاتانه‌دا به‌مه‌به‌ستی گه‌شه‌پێدانی ئه‌و په‌یوه‌ندییانه له‌سه‌ر ئاستی سیاسی‌و ئابووریی‌و كه‌لتووری، به‌م دواییانه‌ش حكومه‌تی هه‌رێم نوێنه‌رایه‌تیی خۆی له ئیسپانیا كرده‌وه‌‌و دابان شه‌ده‌ڵه-ی وه‌ك لێپرسراوی نوێنه‌رایه‌تییه‌كه ده‌ستنیشان كرد، به‌مه‌به‌ستی له‌نزیكه‌وه ئاگاداربوون له‌ئاستی په‌یوه‌ندییه‌كانی هه‌ولێر‌و مه‌درید‌و له‌ڕووی سیاسی‌و ئابووری‌و كه‌لتووریی‌و ئاگایی ئیسپانییه‌كان له‌كورد‌و دۆخی ئێستای هه‌رێم، به‌پێویستمانزانی ئه‌م دیداره له‌گه‌ڵ لێپرسراوی نوێنه‌رایه‌تییه‌كه بكه‌ین.
*ئیسپانییه‌كان تاچه‌ند ئاشنان به كه‌لتووری كوردو هه‌رێمی كوردستان؟
-هیچ شتێك ده‌رباره‌ی هه‌رێمی كوردستان نازانن. ئه‌وانه‌ی له‌هه‌رێمی كوردستانه‌وه ده‌هاتن، پێشتر به خه‌ڵكی كازاخیستان و توركمه‌نستان تێده‌گه‌یشتن، به‌ڵام كه‌سانی دیپلۆماتكار یان شاره‌زا له بواری جوگرافیا ده‌یانزانی هه‌رێمی كوردستان كه‌وتۆته چ شوێنێكه‌وه، به‌ڵام بۆ ئێمه سه‌ره‌تایه‌كی زۆر سه‌خت بوو، ئیسپانیا خۆی سیستمێكی هه‌رێمایه‌تیه‌و دوو هه‌رێمی هه‌یه ململانێیه‌كی زۆر سه‌ختیان هه‌یه له‌گه‌ڵ حكومه‌تی ناوه‌ند، تاڕاده‌ی خوێنڕژان و لێكتر كوشتن. بۆ نمونه هه‌رێمی باسكه‌كان، هه‌رێمێك بوو كه ساڵه‌های ساڵ له‌لایه‌ن وڵاتانی ئه‌وروپاو ئیسپانیاوه به تیرۆریست ده‌ناسرا، بۆ سه‌ربه‌خۆیی خۆیان به‌رده‌وام له شه‌ڕدا بوون له‌گه‌ڵ حكومه‌تی ئیسپانیا، هه‌رێمی كه‌ته‌لۆنیاش هه‌یه كه شه‌ش- حه‌وت مانگ ده‌بێ هه‌ڵبژاردنێكیان كردووه، له‌ژێر دروشمی «كه‌ته‌لۆنیا به‌ره‌و سه‌ربه‌خۆبوون»، به‌ڵام ئه‌و پڕۆسه‌یه هه‌تا ئێستا سه‌ری نه‌گرتووه.
ئێمه‌ش سه‌ره‌تا وه‌كو نوێنه‌رایه‌تی حكومه‌تی هه‌رێمی كوردستان ده‌ستبه‌كار بووین، له‌وێ هه‌موو ده‌رگاكان به‌ڕووی ئێمه‌دا واڵا نه‌كراو پێشوازییه‌كی گه‌رم و گوڕمان لێنه‌كرا، چونكه وا هه‌ست ده‌كرا ئێمه هاتووین پڕوپاگه‌نده بۆ سه‌ربه‌خۆیی هه‌رێمه‌كه‌مان بكه‌ین. كاتی ویست تاتوانیمان به‌رچاو روونی بده‌ینه لایه‌نی په‌یوه‌ندیدار (وه‌زاره‌تی ده‌ره‌وه) له‌ئیسپانیا كه هاتووین وه‌ك نوێنه‌رایه‌تی حكومه‌تی هه‌رێم، هاوشانی نوێنه‌رایه‌تییه‌كانی ترمان له ئه‌وروپاو ئیسپانیاو ئه‌مریكاو ئێران، ئێمه ده‌مانه‌وێت په‌یوه‌ندی ئابووری، سیاسی، دیپلۆماسی و كلتوری دروست بكه‌ین، هه‌روه‌ها ئێمه نوێنه‌رایه‌تیی به‌رژه‌وه‌ندیی هه‌رێمێك ده‌كه‌ین كه ناوی هه‌رێمی كوردستانه، دڵنیاشتان ده‌كه‌ینه‌وه نامانه‌وێت ده‌ست وه‌ربده‌ینه كێشه ناوخۆییه‌كانتان، بوونی ئێمه له مه‌درید ئه‌و دڵنیاییه‌ی پێدان كه ده‌مانه‌وێت به پله‌ی یه‌كه‌م په‌یوه‌ندیمان له‌گه‌ڵ حكومه‌تی ناوه‌ند باش بێت و بتوانین ئه‌و پردی په‌یوه‌ندییانه دروست بكه‌ین له‌گه‌ڵ وڵاتی ئیسپانیا.
*ئێوه وه‌كو نوێنه‌رایه‌تی حكومه‌تی هه‌رێم له‌ئیسپانیا، وابزانم له‌چه‌ند وڵاتێكی تری ئیسكاندیناڤیاش نوێنه‌رایه‌تیمان هه‌یه، ئه‌مانه ره‌زامه‌ندی وه‌زاره‌تی ده‌ره‌وه‌ی عیراقیان له‌سه‌ره بۆ ئه‌وه‌ی ئاسته‌نگتان بۆ دروست نه‌كه‌ن؟
-په‌یوه‌ندییه‌كانی حكومه‌تی هه‌رێم زیاتر له ده‌ره‌وه‌ی باڵیۆزخانه‌ی عیراقن، بڕگه‌یه‌كیش هه‌یه له ده‌ستووری عیراقدا ده‌بێ ئه‌و نوێنه‌رایه‌تیانه هه‌ڵگری شوناسی دیپلۆماسی بن، به‌ڵام تائێستا ئه‌و پرسه له‌گه‌ڵ حكومه‌تی ناوه‌ند یه‌كلا نه‌بۆته‌وه. بۆ پرسی په‌یوه‌ندی نێوان نوێنه‌رایه‌تی حكومه‌ت و باڵیۆزخانه‌كان، بێگومان باڵیۆزخانه‌كان به‌م كردنه‌وه‌ی نوێنه‌رایه‌تیانه رازی نین، به‌ڵام دیسان ده‌كه‌وێته سه‌ر ئه‌و باڵیۆزه‌ی كه له‌و وڵاته هه‌یه، ده‌توانێ په‌یوه‌ندییه‌كی باش و پته‌و دروست بكات، چونكه ئێمه وه‌ك نوێنه‌رایه‌تی حكومه‌تی هه‌رێم هێشتا به‌شێكین له عیراق. له زۆر په‌یوه‌ندی ره‌سمیدا پێویستمان به‌هاوكاری باڵیۆزی عیراق ده‌بێت، چونكه ئه‌و نوێنه‌ری هه‌موو عیراقه‌و له هه‌مان كاتیشدا ئه‌و خاوه‌نی پاسپۆرتی دیپلۆماسییه كه‌ئێمه وه‌كو نوێنه‌رایه‌تییه‌كان تائێستا دامه‌زراوه‌یه‌كی دیپلۆماسی نین. خۆشبه‌ختانه له ئیسپانیا، له‌وه‌تی من له‌وێم دوو باڵیۆز هاتوون هه‌ردووكیان كه‌سایه‌تی گونجاون و خۆیان هه‌رێمی كوردستان باش ده‌ناسن و ئه‌و پێشكه‌وتنه‌ی هه‌رێمی كوردستان بۆ داهاتووی عیراق له قه‌ڵه‌م ده‌ده‌ن و پێیان باشه له‌گه‌ڵ ئێمه‌دا حه‌ساسیه‌ت و گرفت دروست نه‌كه‌ن. ئێمه‌ش دڵنیایان ده‌كه‌ینه‌وه وه‌كو به‌شێك له نوێنه‌رایه‌تی حكومه‌تی هه‌رێم، نوێنه‌رایه‌تی به‌شێك له عیراق ده‌كه‌ین و هه‌میشه ده‌مانه‌وێت له چوارچێوه‌ی عیراقدا كار بكه‌ین و جه‌نابی مام جه‌لال سه‌رۆك كۆماری عیراقه‌و وه‌زیری ده‌ره‌وه‌ی عیراق كورده، به‌ڵام وڵاتیش هه‌یه نه‌گونجان هه‌یه‌و كێشه هه‌یه.
*تاچه‌ند توانیوتانه ئه‌و باڵانسه راگرن كه هه‌م تایبه‌تمه‌ندیی هه‌رێمی كوردستان له‌به‌رچاو بگرن، هه‌م باڵیۆز له‌وه دڵنیا بكه‌نه‌وه له‌وه‌ی كه ئه‌ركی ئێوه خزمه‌تكردنه به‌كۆی پرۆسه‌ی سیاسیی عیراق؟
-شتێك هه‌یه لێره‌دا پێویسته بیزانین. باڵیۆزخانه‌كان زۆربه‌یان له قه‌یراندان. كه‌سی شاره‌زاو پسپۆڕ له‌باڵیۆزخانه‌كاندا كار ناكه‌ن. زۆرجار له‌لایه‌ن حزب و گروپه جیاوازه‌كانه‌وه دیپلۆماتكار ده‌ستنیشان ده‌كرێت ئه‌گه‌ر گونجاویش نه‌بن. زۆر جار شت هه‌بووه په‌یوه‌ندی به ئێمه‌شه‌وه نه‌بووه، زیاتر په‌یوه‌ندی به باڵیۆزخانه‌ی عیراقه‌وه هه‌بووه، به‌ڵام به‌هۆی ئێمه‌وه جێبه‌جێ كراوه، چونكه ئێمه توانیومانه زیاتر ئه‌و كارانه رایی بكه‌ین، به‌ڵام له‌لایه‌ن باڵیۆزخانه‌ی عیراقیه‌وه كێشه‌ی بۆ دروست ده‌كرێت، ئه‌و كێشانه‌ی له عیراق هه‌یه، له‌وێ ره‌نگدانه‌وه‌یه‌كی زۆر خراپی هه‌بووه.
جگه له كاروباری سیاسی، تاچه‌ند هه‌وڵتانداوه كۆمپانیاو لایه‌نه وه‌به‌رهێنه‌كانی ئه‌و وڵاته به هه‌رێمی كوردستان و بازاڕی كوردستان ئاشنا بكه‌ن؟
-چالاكییه‌كانی ئێمه له‌سێ بواری سه‌ره‌كیدا خۆی ده‌بینێته‌وه، به پله‌یه یه‌كه‌م: په‌یوه‌ندییه گشتییه‌كان و میدیایه. به پله‌ی دووه‌م: په‌یوه‌ندیی ئابووری، دوای ئه‌وه‌ش په‌یوه‌ندیی كلتووری كه له‌ناو په‌یوه‌ندیی كلتووریدا به‌رنامه‌ی خوێندن و تواناسازی و خوێندنی باڵاش له‌خۆده‌گرێت. ئه‌و په‌یوه‌ندییانه‌ی سه‌ره‌تا باسمان كرد، زیاتر په‌یوه‌ندیی سیاسین و له‌سه‌ر ئاستی وه‌زاره‌تی ده‌ره‌وه‌و هه‌رێمه‌كان و له‌گه‌ڵ ئه‌نجومه‌نی پارێزگا، به‌رده‌وامن و قۆناغێكی باشیشی بڕیوه. سه‌باره‌ت به په‌یوه‌ندیی ئابووری، ئیسپانیا به‌قه‌یرانێكی ئابووریی زۆر قورسدا تێده‌په‌ڕێت. ئه‌وان پێویستیان به‌وه‌یه بچنه ده‌ره‌وه‌ی وڵات و هه‌وڵبده‌ن بازاڕی نوێ بۆخۆیان بدۆزنه‌وه. ئێمه په‌یوه‌ندیمان به زۆر سه‌نته‌ری ئابووری گه‌وره‌وه كردووه، وه‌ك وه‌زاره‌تی بازرگانیی ئیسپانیا، ژووره بازرگانییه‌كانیان، چه‌ند سه‌نته‌رێكی گرنگی ئیسپانی كه لێكۆڵێنه‌وه بۆ كاروباری ئابووری ده‌كه‌ن. سه‌رنجمان راكێشاون بۆ هه‌رێمی كوردستان ده‌توانین به دوورگه‌یه‌كی ئاشتی ناوی به‌رین له ناوچه‌كه‌دا، سوریا تووشی ئه‌م هه‌موو كێشه‌و قه‌یرانه بووه، گه‌مارۆی ئابووری قورس خراوه‌ته سه‌ر ئێران، باری ئه‌منی له باشووری عیراق زۆر خراپه. هاوكات چه‌ند چالاكییه‌كی ئابووریشمان ئه‌نجامداوه، ئه‌نجامه‌كه‌شی ئێستا ئه‌وه‌یه كه كۆمپانیای نه‌وت و گازی «ریپسۆل» هاتۆته كوردستان و به‌دوای نه‌وتدا ده‌گه‌ڕێن. 12 تا 13 كۆمپانیای دیكه هه‌ن له ئیسپانیا كه هاتوون بۆ ئێره‌و به‌شداری ده‌كه‌ن له پڕۆسه‌ی ئاوه‌دانكردنه‌وه‌ی كوردستاندا. ئه‌گه‌ر له من بپرسی، من ده‌ڵێم ئه‌وه له ئاستی تموحی ئێمه‌دا نییه، به‌ڵام مێژووی كاركردنی ئێمه‌ش ده‌گه‌ڕێته‌وه بۆ دوو ساڵ. ئێمه ساڵ و نیوێك خه‌ریك بووین تاكو سه‌ره‌تا ئاشنایان بكه‌ین به‌م هه‌رێمه. ئیسپانیا له‌ڕووی ئابوورییه‌وه پێویستی به‌هه‌رێمی كوردستانه، ئه‌م چه‌ند ساڵه زۆربه‌ی كۆمپانیاكانیان له ئه‌مریكای لاتین ده‌ستبه‌كار بوون، چونكه له رووی زمان و مێژوو و كه‌لتوور زۆر لێك نزیكن. ئێستا له‌وێش كاره‌كانیان ته‌واو بووهو به‌دوای بازاڕی تازه‌دا ده‌گه‌ڕێن كه هه‌رێمی كوردستان ده‌توانێت ئه‌م رۆڵه ببینێت، ئه‌مه‌ش بێگومان كاری زیاتری پێویسته. كێشه‌یه‌كی تریش هه‌یه، ئه‌ویش كۆمپانیا توركییه‌كانه، به‌حوكمی ئه‌وه‌ی كه‌توركیا لێره‌وه نزیكتره، نرخی كاڵاكانیان و گواستنه‌وه هه‌رزانتره، به‌ڵام ئیسپانیا كه وڵاتێكی دووره ناتوانن كێبركێ بكه‌ن له‌گه‌ڵ كاڵاو به‌رهه‌می توركیدا.
*باسی فه‌رمانگه‌ی په‌یوه‌ندییه‌كانی ده‌ره‌وه‌ت كرد، ئه‌وان تاچه‌ند توانیویانه ببنه چه‌ترێك بۆ كۆكردنه‌وه‌ی هه‌موو نوێنه‌رایه‌تییه‌كان و ئاگاداركردنه‌وه‌تان له هه‌موو گۆڕانكارییه‌كانی ناوخۆ؟
-فه‌رمانگه‌ی په‌یوه‌ندییه‌كان، فه‌رمانگه‌یه‌كه له‌ناو ئه‌نجومه‌نی وه‌زیرانی حكومه‌تی هه‌رێمی كوردستان و زۆر نزیكه له‌سه‌نته‌ری بڕیار، زۆربه‌ی كاتیش ئه‌و زانیارییانه‌ی پێویسته بڵاوی بكه‌ینه‌وه بێگومان ده‌گاته ده‌ستیان. وا پێویسته وه‌زاره‌ت و داموده‌زگاكانیش له‌ڕێی فه‌رمانگه‌ی په‌یوه‌ندییه‌كانه‌وه په‌یوه‌ندییان له‌گه‌ڵ وڵاتانی ده‌ره‌وه هه‌بێت. فه‌رمانگه‌ی په‌یوه‌ندییه‌كان ده‌بێ هاوشێوه‌ی هه‌موو وڵات بكرێته فه‌رمانگه‌یه‌كی راسته‌قینه. فه‌رمانگه‌ی په‌یوه‌ندییه‌كان درێغی نه‌كردووه له‌ناردنی هه‌ر زانیارییه‌ك كه‌ئێمه پێویستمان بووبێت، به‌ڵام بێگومان گرفتیش هه‌یه، ئێمه له‌سه‌ره‌تای دروستكردنی په‌یوه‌ندییه‌كی پته‌وی دیپلۆماسیداین. ئه‌مه‌ش به‌بێ گیروگرفت نابێت، چونكه تائێستا له هه‌رێمی كوردستان زۆر خه‌ڵك هه‌یه له‌گرنگی ئه‌م په‌یوه‌ندییانه تێنه‌گه‌یشتووه‌و پێیانوایه ئێمه‌ی نوێنه‌رایه‌تییه‌كان لێره سه‌رقاڵی كاروباری بازرگانین، بۆیه ده‌توانم بڵێم روونكردنه‌وه‌ی زیاتری پێویسته، بۆئه‌وه‌ی په‌یوه‌ندیی نێوان فه‌رمانگه‌ی په‌یوه‌ندییه‌كان و داموده‌زگاكانی حكومه‌تی هه‌رێم پته‌وتر بێت.
*به‌پێی ئه‌و ته‌نگژه ئابوورییه‌ی ئیسپانیای گرتۆته‌وه، ئێمه وه‌ك هه‌رێمی كوردستان تاچه‌ند ده‌توانین وابكه‌ین كۆمپانیا وه‌به‌رهێنه‌كانی ئه‌و وڵاته روو بكه‌نه هه‌رێمه‌كه‌مان؟
-رێژه‌ی بێكاری له‌ئیسپانیا له‌نێوان 28% بۆ 30% دایه، 50%ی گه‌نجه‌كانی بێكارن. ئێستا حكومه‌ته‌كه‌یان هه‌وڵده‌دات زۆربه‌ی مووچه خۆران بخاته سه‌ر كه‌رتی گشتی ئه‌مه كارێكی زۆر زه‌حمه‌ته. كۆمپانیا بچوكه‌كان شانسی تێپه‌ڕاندنی ئه‌م دۆخه‌یان زۆر كه‌مه، هه‌موو ساڵێك 2000 كه‌س له ئیسپانیا كاره‌كانیان له‌ده‌ست ده‌ده‌ن. ئێمه هه‌وڵمانداوه هه‌رێمی كوردستان به بازرگان و كۆمپانیاكان بناسێنین، به‌ڵام له‌ڕووی مێژووییه‌وه ئه‌م په‌یوه‌ندییه، په‌یوه‌ندییه‌كی زۆر سست بووه، به حوكمی ئه‌وه‌ی ئێمه‌و ئیسپانیا زۆر لێك دوورین. به‌رده‌وام كۆمپانیا ئیسپانییه‌كان روو له‌ئێمه ده‌كه‌ن و زانیارییان پێ ده‌ده‌ین، ئه‌و پڕۆژه‌و ته‌نده‌رانه‌ی له‌لایه‌ن حكومه‌تی هه‌رێمی كوردستانه‌وه ده‌رده‌چن، پێیان ده‌ده‌ین و هه‌وڵ ده‌ده‌ین بێن سه‌ردانی هه‌رێم بكه‌ن، له‌گه‌ڵ لایه‌نی په‌یوه‌ندیدار له حكومه‌تی هه‌رێم، ئێمه ئاماده‌ین دانیشتن و دیداریان بۆ رێك بخه‌ین، به‌رنامه‌ی كاریان بۆ دابنێین، رۆژانه سه‌رقاڵی ئه‌م كارانه‌ین، به‌ڵام لێك تێگه‌یشتنی ده‌وێ، ئه‌وان كه‌دێن بۆ ئێره، به‌شێوه‌ی بیركردنه‌وه‌ی ئه‌وروپی دێن، به‌ڵام له‌هه‌رێمی كوردستان شتێكی تر ده‌گوزه‌رێت له‌بواری بازرگانیدا، رووداوه‌كانیش زۆر خێران. هه‌رێمی كوردستان تاڕاده‌یه‌ك بۆته جێی سه‌رنجی كۆمپانیا بیانییه‌كان، له سه‌ردانی عیماد ئه‌حمه‌د جێگری سه‌رۆكی حكومه‌ت بۆ ئیسپانیا، یه‌كێك له پرسه‌كان كه تاوتوێ كرا ئابووری بوو، ئه‌وانیش به‌ڵێنیاندا بێن سه‌ردانی هه‌رێمی كوردستان بكه‌ن، بڕیاره له‌مانگی 9ی ئه‌مساڵدا جێگری وه‌زیری ئابووری ئیسپانیا له‌گه‌ڵ ده‌یان خاوه‌ن كۆمپانیای به‌هێز بێن هه‌م به‌شداری ئه‌و پێشانگا نێوده‌وڵه‌تیانه بكه‌ن له‌هه‌ولێرو سلێمانی، هه‌م سه‌ردانێكی سیاسی بۆلای لایه‌نه سیاسییه‌كانی هه‌رێمی كوردستان بكه‌ن.
*به‌شێك له ئه‌ركه‌كانی ئێوه ئه‌ركی كلتوورییه، ئیسپانیاش لای ئێمه‌ی كورد وه‌ك وڵاتێكی وه‌رزشی ناسراوه كه وه‌رزشیش به‌شێكه له كلتووری ئه‌و وڵاته. ئێوه تاچه‌ند هه‌وڵتانداوه به‌شێك له‌و وه‌رزشكاره دێرینانه هان بده‌ن له كوردستان ناوه‌ندی وه‌رزشی و راهێنان بكه‌نه‌وه؟
-ئێمه له سه‌ره‌تای ده‌ستبه‌كاربوونمانه‌وه به‌شێوه‌یه‌كی ورد لێكۆڵینه‌وه‌مان له كارو چالاكییه‌كانی ئه‌و یانه وه‌رزشییه گه‌ورانه كرد، كه دروست كردنی په‌یوه‌ندیی وه‌رزشی له‌گه‌ڵ ئیسپانیا چۆن ده‌كرێت. دواتر زانیمان ئه‌و یانه گه‌ورانه ئه‌كادیمیای وه‌رزشیان هه‌یه له ده‌ره‌وه‌ی وڵات. له‌ئه‌نجامی چه‌ند په‌یوه‌ندییه‌ك به‌یانه‌ی ریاڵ مه‌دریده‌وه توانیمان بگه‌ینه گرێبه‌ستێك بۆ هه‌رێمی كوردستان چوار ئه‌كادیمیای وه‌رزشی له هه‌رێم بكه‌نه‌وه، له‌مانگی 9ی ئه‌مساڵدا ده‌كرێته‌وه. ئێستا ئێمه له‌گه‌ڵ ئه‌واندا گه‌یشتووینه‌ته ئه‌نجامدانی گرێبه‌ستێك بۆ چوار ئه‌كادیمیا له‌هه‌ولێر، سلێمانی، گه‌رمیان و دهۆك كه له‌قۆناغی جێبه‌جێ كردندان. به‌بۆچوونی من، ئێمه زیاتر له‌و رێگه‌یه‌وه ده‌توانین لێیان سودمه‌ند بین تاكو ئه‌ستێره‌یه‌كی كۆن كه‌ئێستا خانه‌نشین بووه بهێنین سه‌ردانی هه‌رێم بكات. بۆ كردنه‌وه‌ی ئه‌و ئه‌كادیمیانه خۆیان به‌رده‌وام راهێنه‌ر ده‌نێرن، لۆگۆی ئه‌وان به‌كار ده‌هێنین، كراس و تیشێرتی ئه‌وان به‌كار ده‌هێنین. پڕۆژه‌كه‌ش بۆ قۆناغێكی زۆر گه‌نجه، له 7 ساڵ بۆ 9 ساڵ ده‌گرێته‌وه. ئه‌مه قۆناغی یه‌كه‌مه بۆ دۆزینه‌وه‌ی به‌هره‌و توانای منداڵی كورد له بواری وه‌رزشیدا.
له‌گه‌ڵ یانه‌ی ئه‌تلاتیك و مه‌دریدیش له په‌یوه‌ندیداین، به‌ڵام هێشتا له‌گه‌ڵیاندا نه‌گه‌یشتووینه‌ته ئه‌نجامێكی دڵخۆشكه‌ر. یانه‌ی بارسێلۆنا له‌گه‌ڵ حكومه‌تی عیراق گرێبه‌ستیان ئیمزا كردووه. وه‌كو چالاكی كلتووری دیكه‌ش، ئێمه ساڵانه له‌وێ یادی نه‌ورۆز ده‌كه‌ینه‌وه‌و خۆشبه‌ختانه ساڵی یه‌كه‌م نزیكه‌ی 150 كه‌سێك هاتبوون، ساڵی دووه‌م 450 كه‌س، ساڵی سێهه‌م 600 و ئه‌مساڵ 650 كه‌س هاتبوون كه‌هه‌مووی دانیشتووی ئیسپانیا بوون، زۆر كه‌سایه‌تی ئیسپانیش هاتبوون بۆ بینینی كلتووری كوردی و جلوبه‌رگی كوردی. له‌هه‌مانكاتدا ئێمه پیشانگای مانگانه یان وه‌رزی ده‌كه‌ینه‌وه، پیشانگای شێوه‌كاری و فۆتۆگرافیمان هه‌یه، له‌چوارچێوه‌ی به‌رنامه‌ی تواناسازیشدا ئێمه هاوكاری 20 خوێندكار ده‌كه‌ین بێنه ئیسپانیاو له زانكۆكانی ئه‌وێ بخوێنن، به‌ڵام كێشه‌یه‌ك هه‌یه، تائێستا زۆربه‌ی خوێندكاره‌كانی ئێمه له‌بواری تواناسازیدا روو له‌به‌ریتانیا یان ئه‌مریكا ده‌كه‌ن، ئه‌ویش به‌بۆنه‌ی زمانی ئینگلیزیه‌وه، به‌ڵام ده‌كرێ گرنگی زمانی ئیسپانیش بزانین كه له‌سه‌رتاسه‌ری دنیادا 500 ملیۆن كه‌س به‌و زمانه قسه ده‌كات. له‌ئه‌مریكاش پاش زمانی ئینگلیزی، دووه‌م زمانی ره‌سمییه. هه‌رێمی كوردستان له‌بواری تواناسازیدا پێویستی به‌و هه‌مه‌ڕه‌نگییه هه‌یه. ئێمه له‌مانگی چواری ئه‌مساڵدا هه‌موو سه‌رۆكی زانكۆكانی كوردستانمان بانگهێشتی ئیسپانیا كرد بۆئه‌وه‌ی په‌یوه‌ندی زانستی له‌گه‌ڵ زانكۆكانی ئه‌و وڵاته دروست بكه‌ن، خۆشبه‌ختانه ئێستا كارده‌كه‌ین له‌سه‌ر پته‌وكردنی بواری زانستی كه‌ئه‌ویش ده‌كه‌وێته چوارچێوه‌ی كلتووره‌وه. كارو چالاكییه‌كانی تریش له‌سه‌ر ئاستی مۆسیقاو شێوه‌كاری و وه‌رزش به‌رده‌وامه، به‌ڵام ئێمه هێشتا له‌سه‌ره‌تای په‌یوه‌ندیداین. له‌ماوه‌ی ده‌ستبه‌كاربوونی ئێمه‌دا سێ هه‌ڵبژاردنی گشتی كراوه له‌و وڵاته، ئێمه هه‌ر فریا كه‌وتووین خۆمان بناسێنین به‌ستافی نوێی حكومه‌ت، ئه‌و هه‌نگاوانه‌ی ئێمه ناومانه باشن، به‌ڵام ئامانجی ئێمه زۆر گه‌وره‌تره له‌وه‌ی كه وه‌ك نوێنه‌رایه‌تی هه‌رێمی كوردستان لێره كارده‌كه‌ین.
*هیچ داتایه‌كتان له‌به‌ر ده‌سته سه‌باره‌ت به ژماره‌ی كورده‌كانی ئه‌و وڵاته؟
-ژماره‌ی كورده‌كانی دانیشتووی ئیسپانیا زۆر كه‌مه. ره‌وه‌ندی كوردی له‌ئیسپانیا ناگاته 50 كه‌س. هۆكاره‌كه‌شی ده‌گه‌ڕێته‌وه بۆئه‌وه‌ی كورد له‌هه‌رێمی كوردستانه‌وه زیاتر له 1990وه روویان له ئه‌وروپا كرد سه‌رده‌می گرانی و گه‌مارۆی ئابووری عیراق بوو، زۆربه‌شیان روویان له‌و وڵاتانه كرد كه به‌رنامه‌ی سۆسیالیان هه‌بوو، هه‌م بۆ هاوكاری كردنی كه‌سوكاریان له‌هه‌رێم، هه‌میش خۆیان بتوانن وه‌ك سه‌ره‌تا ژیانی خۆیان له‌وێ ده‌ست پێ بكه‌ن. وڵاتانی ئیسپانیا، ئیتالیا، یۆنان به‌رنامه‌یه‌كی سۆسیالی به‌هێزیان نه‌بووه هاوكاری په‌نابه‌ر بكه‌ن. بۆیه كورده‌كان زۆر به‌كه‌می له‌و وڵاتانه گیرساونه‌ته‌وه.
*جگه له بواری وه‌رزشی كه ئیسپانیای پێ ناسراوه، جگه له‌كۆمپانیاكان كه‌جه‌نابت باسی ده‌كه‌یت، وڵاتێكی گه‌شتیاریشه، هه‌رێمی كوردستان چه‌نده ده‌توانێ سوود له‌و بواره وه‌ربگرێت؟
- ئێمه وه‌ك هه‌رێمی كوردستان تازه ده‌زگایه‌كمان هه‌یه به‌ناوی گه‌شتوگوزار، له‌گه‌ڵیاندا له په‌یوه‌ندیداین، ساڵانه چه‌نده‌ها بۆنه‌و چالاكی گه‌شتیاری هه‌یه، ئه‌مساڵ ئێمه هه‌وڵماندا له‌ڕێی كه‌رتی تایبه‌ته‌وه به‌شداری له‌یه‌كێك له ده پیشانگا نێوده‌وڵه‌تییه گه‌وره‌كانی دنیا بكه‌ین كه له‌شاری مه‌درید به‌ڕێوه ده‌چێت، زۆربه‌ی وڵاتانی دنیا دێن له‌بواری گه‌شتیاریدا له‌وێ پڕوپاگه‌نده بۆخۆیان ده‌كه‌ن. هه‌رێمی كوردستانیش به‌هاوكاری ده‌زگای گه‌شتوگوزار هاتن بۆ ئیسپانیاو ئێمه هاوكاریمان كردن. ساڵی داهاتوو هه‌وڵده‌ده‌ین زیاتر به‌شداری پیشانگاكانی گه‌شتوگوزار بكه‌ین، حكومه‌تی ئیسپانیاش ده‌رگای واڵایه بۆ گه‌شتیاری كورد، به‌ڵام تائێستا وه‌ك نوێنه‌رایه‌تی حكومه‌تی هه‌رێم میكانیزمێكمان نه‌دۆزیوه‌ته‌وه بۆ پێدانی ڤیزای گه‌شتوگوزار به‌هاووڵاتیانی هه‌رێمی كوردستان. به‌ڵام زۆر سه‌خته بۆ ئێمه بتوانین كه‌فیلی ئه‌و خه‌ڵكه بین كه بچێت و بگه‌ڕێته‌وه. هیوادارم له‌دوای ئه‌وه‌ی عیراق له‌ژێر به‌ندی حه‌وت ده‌رچوو هاووڵاتیان بتوانن وه‌ك هه‌ر هاووڵاتی وڵاتێكی تر ڤیزای گه‌شتیاری وه‌ربگرن.
09/06/2014
