بەرپرسێكی باڵای نەتەوەیەكگرتووەكان رایدەگەیەنێت دابینكردن و گەیاندنی هاوكاری بە ئاوارەكانی هەرێمی كوردستان كارێكی ئەستەمە، بەهۆی زۆری ژمارەكەیان كە ئێستا گەیشتووەتە 850 هەزار ئاوارە. 

رێكخراوی نەتەوەیەكگرتووەكان و حكومەتی هەرێمی كوردستان دوا ئاماری پەنابەرانیان ئاشكراكرد و بەگوێری راگەیاندراوە هاوبەشەكەیان، زیاتر لە 850 هەزار ئاوارەی عێراق روویانكردووەتە كوردستان و بەسەر هەزار شوێنی جیا جیای هەرسێ پاریزگاكانی هەرێمی كوردستان دهۆك، هەولێر و سلێمانی دابەشبوون.

كفین كینیدی، جێگری بەرپرسی هەماهەنگی كاروباری مرۆیی رێكخراوی نەتەوەیەكگرتووەكان لە عێراق دەڵێت: "سەرەڕای دابینكردنی هەزاران تۆن هاریكاری، بەڵام گەیاندنی كۆمەكەكان لەبەر زۆری ژمارەیان كارێكی قورسە".  بەگوێری ئەو ئامارە هاوبەشەی نەتەوەیەكگرتووەكان و حكومەتی كوردستان، "65%ی ئەو ئاوارانە روویانكردووەتە پارێزگای دهۆك و 7 قەزای سەر بەو پارێزگایە.

هەر بەگوێرەی ئامارەكە، ژمارەی ئاوارەكانی عێراق پێشتر لە هەرێمی كوردستان 80 هەزار ئاوارە بووە، بەڵام دواتر ژمارەكە لە مانگی ئابدا، بەهۆی تێكچوونی بارودۆخ و هێرشەكانی داعش بەرزبووەتەوە. ئەمە جگە لەبوونی 226 هەزار ئاوارەی دیكەی سووریا، كە لەلایەن رێكخراوی پەنابەرانی سەر بە نەتەوەیەكگرتووەكان پێشتر تۆماركراون، پێش ساڵی 2014 روویان كردووەتە باشووری كوردستان.

31/08/2014

سەدان كچ و ژنی ئێزدی، كە لەلایەن چەكدارانی دەوڵەتی ئیسلامی ناسراو بە داعش رفێندرابوون پێشكەشی ئەندامانی رێكخراوی داعش كراون یان پێیان فرۆشراون، ئەمەش بەپێی زانیارییەكانی رێكخراوێكی تایبەت بە چاودێریكردنی قەیرانەكان.

روانگەی سووری بۆ مافی مرۆڤ، كە بنكەكەی لە بەریتانیایە رایگەیاند، لەماوەی چەند هەفتەی رابردوودا ئەندامانی رێكخراوی داعش نزیكەی 300 كچی ئێزدییان فرۆشتووە یان بە دیاری پێشكەشی ئەندامەكانی دیكەی رێكخراوەكەیان كردووە.

روانگەی سووری هەروەها رایدەگەیەنێت "لە روانگەی داعشەوە ئەو كچە ئێزدیانە بەدەستهاتووەكانی جەنگن لەگەڵ كافرەكان، بۆیە هەریەكێكیان بە بڕی 1000 دۆلار فرۆشراونەتە ئەندامانی داعش لە حەلەب، رەقە و حەسەكە لە سووریا".

31/08/2014

فرۆکە جەنگییەکانی ئەمریکا هێرشیان بۆ سەر ئامرلی دەستپێکرد بۆ شکاندنی ئەو گەمارۆیەی چەکدارانی داعش کە چەند هەفتەیەکە سەپاندوویانە و مەترسی کۆمەڵکوژی دەکرێ.

خەڵکی ئامرلی تورکمانی شیعەن و لە ژێری گەمارۆیی تووندی چەکدارانی داعشن. نوێنەری نەتەوەیەکگرتووەکان لە عێراق داوای هاوکاری بەپەلەی کرد بۆ ئەو شارۆچکەیە.

گوتەبێژی پەنتاگۆن رایگەیاند کە فرۆکەکانیان رۆژی شەممە چەند هێرشێکیان کردووەتە سەر بنکەکانی داعش لە ئامرلی و توانیویشیان لەگەڵ فرۆکە فەرەنسی و بەریتانییەکان هاوکاری مرۆی بگەیەننە ئامرلی کە نزیکەی ١٢ هەزار کەس لە ژێر گەمارۆدان.

31/08/2014

بنكه‌ی لێكۆڵینه‌وه‌ی ستراتیژی پرۆگرامی ناوه‌كی ئێران ره‌تیده‌كاته‌وه‌، كه‌ دۆسیه‌ی عیراق له‌ قاسم سلێمانی فه‌رمانده‌ی هێزی قودسی سوپای پاسدارانی ئێران سه‌ندرابێته‌وه‌ و راشیده‌گه‌یه‌نێت، قاسم سلێمانی بوو كوردی هێنایه‌ شه‌ڕ له‌گه‌ڵ داعش.  له‌ هه‌واڵی سایته‌كه‌دا هاتووه‌: "پسپۆڕان له‌ تاران ئه‌و هه‌واڵانه‌ به‌ گاڵته‌ئامێز ناو ده‌به‌ن و پێیانوایه‌ كه‌ دۆسیه‌ی ناوچه‌كه‌ به‌ ته‌واوی له‌ كۆنتڕۆڵی قاسم سلێمانی-دایه‌ و له‌ عیراق قسه‌ی كۆتایی و هه‌ڵوێستی فه‌رمی كۆماری ئیسلامی له‌ لایه‌ن ئه‌وه‌وه‌ ده‌كرێت".  كارناسێك به‌ بنكه‌ی ناوه‌كی ئێرانی راگه‌یاندوه‌: ئه‌مریكا، ئیسرائیل و سعودیه‌، ئاواته‌كانی خۆیان له‌ چوارچێوه‌ی هه‌واڵدا بڵاوده‌كه‌نه‌وه‌ و ئه‌و قسانه‌ ده‌بێت به‌ شكسته‌ یه‌ك له‌ دوای یه‌كه‌كانی ئه‌وان دابنێن له‌ به‌رامبه‌ر سه‌ردار سلێمانی و به‌رنامه‌ ناوچه‌ییه‌كانی سوپای قودسه‌وه‌.  به‌ وته‌ی پسپۆڕێكی دیكه‌ كه‌ نه‌یویستو‌وه‌ ناوه‌كه‌ی بڵاو بكرێته‌وه‌ وتوویه‌تی: "ئه‌و سه‌ركه‌وتنانه‌ی سلێمانی كه‌ بووه‌ته‌ هۆی نیگه‌رانی و توڕه‌یی ئه‌مریكا، ئیسرائیل و سعودیه‌" ئه‌و خاڵانه‌ی خواره‌وه‌ن:  1.كۆنتڕۆڵكردنی قه‌یرانی سیاسی له‌ عیراق، هێشتنه‌وه‌ی هاوپه‌یمانی شیعه‌ و په‌یوه‌ندییان له‌گه‌ڵ مه‌رجه‌عه‌ باڵاكان و هێنانه‌ سه‌ر كاری حه‌یده‌ر عه‌بادی. 2. پێكهێنانی فراكسیۆنێكی نوێ له‌ ئه‌نجومه‌نی نوێنه‌رانی عیراق له‌ لایه‌ن ئیبراهیم جه‌عفه‌ریه‌وه‌. 3. تێوه‌گلاندنی كورده‌كان له‌ شه‌ڕكردن له‌گه‌ڵ چه‌كدارانی داعش. 4. باشتركردنی په‌یوه‌ندی كورده‌كان له‌گه‌ڵ حكه‌مه‌تی ناوه‌ندی شیعه‌ی عیراق. 5. هێشتنه‌وه‌ی نووری مالیكی وه‌ك سه‌رمایه‌یه‌كی سیاسی له‌ عیراقدا.  ماوه‌یه‌كه‌ ئاژانسه‌ هه‌واڵییه‌كان باس له‌وه‌ ده‌كه‌ن كه‌ رێبه‌ری كۆماری ئیسلامی ئێران له‌ ئه‌دای قاسم سلێمانی له‌ عیراق رازی نییه‌ و ئه‌و به‌ هۆكاری سه‌رهه‌ڵدانی قه‌یرانه‌كانی عیراق و سیاسه‌ته‌ هه‌ڵه‌كانی نوری مالیكی ده‌زانێت، بۆیه‌ بڕیاری داوه‌ بیگۆڕێت و دۆسیه‌ی عیراق بخاته‌ ژێر ده‌ستی عه‌لی شه‌مخانی، سكرتێری ئه‌نجومه‌نی باڵای ئاسایشی نه‌ته‌وه‌یی ئێران.

30/08/2014

هێزەكانی پێشمەرگەی كوردستان، لەئێستادا چونەتە ناو ناحیەی زومار لەپارێزگای موسڵ‌و شەڕێكی توند دژی داعش دەكەن.    كامەران محەمەد، هەولێر: سەرچاوەیەك لەهێزەكانی پێشمەرگەوە بەئاوێنەنیوزی راگەیاند، لەئێستادا پێشمەرگە چۆتە ناو ناحیەكەوە.  وتیشی "لەئێستادا پێشمەرگە دژی داعش شەڕی كۆڵان بەكۆڵان‌و سەربان بەسەربان دەكات".  بەیانی ئەمڕۆ هێزەكانی پێشمەرگەی كوردستان، هێرشیان كردە سەر ناحیەی زومارو لەئێستادا دەیانەوێت كۆنتڕۆڵی بكەن.

30/08/2014

بەپێی ئەو زانیاریانەی دەست تۆڕی میدیایی رووداو كەوتوون ، شاندێكی كوردانی ئێزدی رۆژی 1ی مانگی داهاتوو ، واتە رۆژی دووشەممە ، لە بارەگای نەتەوە یەكگرتووەكان لە جنێڤ بەشداری لە كۆبوونەوەیەكدا دەكات و ، وتارێك پێشكەشدەكات .

جاری یەكەمە شاندێكی كوردانی ئێزدی بەشداری كۆبوونەوەیەكی نەتەوەیەكگرتووەكان بكات . ئەو دەرفەتدانەش بە كوردانی ئێزدی بەهۆی كۆمەڵكوژییەكانی دەوڵەتی ئیسلامیی لە عێراق و شام (داعش)ە دێت ، دژی كوردانی ئێزدی لە دەڤەری شنگال ، دوای گرتنی ئەو دەڤەرە لەلایەن داعشەوە لە 3ی ئەو مانگەوە .

نەتەوە یەكگرتووەكان بانگهێشتنامەیەكی ئاراستەی میر تەحسین بەگ ، میری ئێزدیان كردووە بۆ بەشداریكردن لەو كۆبوونەوەیەدا ، بەڵام بەهۆی نەخۆشبوونییەوە ، میر تەحسین بەگ لەجیاتی خۆی شاندێكی پێكهێناوە بۆ بەشداریكردن لەو كۆبوونەوەیەدا .

ئەو شاندە كە بە سەرۆكایەتی (سڤۆ قەوال سلێمان)ە، لەو كەسانە پێكدێت :

1-د. سه‌عید پیر موراد

2-هۆشه‌نگ برۆكا

3-د.عه‌لی حوسێن

4-شڤان شێخ عه‌لۆ

5-بیر دیما

6-د.نارین به‌دیع

7-خانی ئاكار

8-د.میرزا دنایی

وتاری ئەو شاندە لەلایەن میرزا دنایی دەخوێندرێتەوە لە جنێڤ ، ماوەی وتارەكە سێ خوڵەك دەبێت و ئەو خاڵانەی تێدا دەبن :

1-ئەنجامدانی لێكۆڵینەوەیەكی نێودەوڵەتی لەسەر كۆمەڵكوژی ئێزدیان و دانپێدانانی نێودەوڵەتی و ناساندنی كەیسی شنگال لەسەر ئاستی نێودەوڵەتی و كۆمەڵگەی نێودەوڵەتی بەرپرسیارێتییە یاساییەكانی بەرامبەر ئەو كەیسە جێبەجێبكات.

2-ئاسانكاریكردن بۆ كۆچبەری بەكۆمەڵی ئێزدیان ، بەپێی خواستی هەركەسێك و بەتایبەت ئەو خێزانانەی دەستدرێژیان كراوەتە سەر.

3-پێدانی ئۆتۆنۆمی بە دەڤەری شنگال و دابینكردنی پاراستنی نێودەوڵەتی بۆ ئەو ناوچەیە ، هەروەها دروستكردنی هەرێمێكی ئارام لە (دەشتی نەینەوا) بۆ ئێزدی، كریستیان و شەبەك .

4-هاوكاری بەپەلە بۆ رزگاركردنی ئەو كەسانەی رفێندراون .

5-دابینكردنی پێداویستییە بەپەلەكان بۆ ئاوارەكان و پاراستنیان لە ونبوون .

30/08/2014

هاوپەیمانیی نیشتمانیی شیعەکان لەسەر بەرنامەی حکومەتی نوێی عێراق رێککەوتن بۆئەوەی بەرنامەکە بخەنە بەردەستی لایەنەکانی دیکە.
 
نووسینگەی ئیبراهیم جەعفەری سەرۆکی هاوپەیمانی نیشتمانی ئاشکرایکرد، هاوپەیمانێتییەکەیان لەناوخۆیدا لەسەر بەرنامەی حکومەتی نوێ گەیشتووەتە رێککەوتن و بەرنامەکە بۆ لایەنە سیاسییەکانی دیکە دەخەنەڕوو". داواشی لە کوتلە سیاسییەکان کرد "پەلە بکەن لە پێشکەشکردنی پاڵێوراوانیان بۆ وەرگرتنی پۆستە وەزارییەکان".

نووسینگەی سەرۆکی هاوپەیمانی نیشتمانی، لە راگەیێندراوێکدا ئاماژەی بۆ ئەوە کردووە، "سەرۆکی هاوپەیمانی نیشتمانی لەگەڵ شاندی دانوستاندنی هاوپەیمانی نیشتمانی بۆ پێکهێنانی حکومەت کۆبووەتەوە و ئەنجامی دانوستاندنیان لەگەڵ کوتلەکان گفتوگۆ کردووە". هەروەک ئاشکراکراوە "هاوپەیمانی نیشتمانی، لەناوخۆیدا لەسەر بەرنامەی حکومەتی نوێی عێراق گەیشتووەتە رێککەوتن بۆ ئەوەی بەرنامەکە بخەنە بەردەستی لایەنەکانی دیکە، تاوەکو لەوادەی یاسایی دیاریکراوی خۆیدا بتوانن حکومەت پێکبهێنن، داواش لە کوتلە سیاسییەکان دەکەین پەلە بکەن لە پێشکەشکردنی پاڵێوراوانیان بۆ وەرگرتنی پۆستە وەزارییەکان ".
 
مەرجەعی باڵای ئایینی، رۆژی هەینی 29ی ئابی 2014 داوایکرد، پەلەبکرێت لە پێکهێنانی حکومەت و خستنە دەنگدانییەوە لەلایەن پەرلەمانەوە، هاوکات جەختی لەوەکردەوە لایەنەکان لە دیاریکردنی پاڵێوراوەکان بۆ وەرگرتنی پۆستە وەزارییەکان وردبن و کەسانی گونجاو دەستنیشان بکەن.
  
رۆژی 25ی ئەم مانگە حەیدەر عەبادی، دانوستاندنەکانی پێکهێنانی حکومەتی بە ئیجابی باس لێوەکرد و ئاشکراشیکرد، کە پەرۆشی پێکهێنانی حکومەتێکە، کە هەموو لایەنەکان لەخۆ بگرێت.

30/08/2014

رێكخراوی نەتەوەیەكگرتوەكان رایگەیاند ژمارەی ئەو پەنابەرە سووریانەی بەهۆی پێكدادانەكانی نێوان هێزەكانی ئۆپۆزسیۆنی سووریا و رژێمی بەشار ئەسەد هەڵاتوون گەیشتە سێ ملیۆن كەس، دەشڵێت نیوەی دانیشتوانی سووریا ئاوارەن.

ئەنتۆنیۆ گوتێرس، كۆمسیاری باڵای نەتەوەیەكگرتوەكان لە بەیاننامەیەكدا رایگەیاند: "ژمارەی ئەو پەنابەرە سووریانەی بەهۆی پێكدادانەكانی نێوان هێزەكانی ئۆپۆزسیۆن و سوپای سووریا هەڵاتوون و روویان لە وڵاتانی دەوروبەری سووریا كردووە، ئەمڕۆ هەینی 29/8/2014  گەیشتە سێ ملیۆن پەنابەر".

گوتیشی: "بەبەراورد لەگەڵ ساڵی رابردوو ژمارەی پەنابەرەكان یەك ملیۆن زیادیكردوە، سەرەڕای ئاوارەبوونی 6.5 ملیۆن كەس لەنێوخۆی سووریا، هاوكات نیوەی دانیشتوانی ئەو وڵاتە ناچاركراون لە پێناو رزگاركردنی گیانی خۆیان شوێنەكانیان جێبێڵن".

ئەنتۆنیۆ گوتێرس ئاماژەی بەوەشدا كە تەنگژەی سووریا بووەتە گەورەترین حاڵەتی فریاكەوتنی مرۆیی رێكخراوی نەتەوەیەكگرتوەكان، سەرەڕای شكستهێنانی جیهان لە رووی دابینكردنی پێداویستی بۆ پەنابەران و ئەو وڵاتانەی روویان تێكردوە".

دوای تێكچوونی رەوشی ئەمنی و بەرزبوونەوەی ئاستی پێكدادانەكانی نێوان هێزەكانی ئۆپۆزسیۆن و سوپای سووریا، لە مانگی ئازاری ساڵی 2011 دانیشتوانی زۆربەی شارەكانی سووریا هەڵاتن و رووویان لە وڵاتانی  دەورروبەركرد، تاوەكو ئێستاش شەپۆلی ئاوارەبوونی دانیشتوانی ئەم وڵاتە بەردەوامە.  بەهۆی شەڕی سێ ساڵەی ئەو وڵاتەش تاوەكو ئێستا زیاتر لە 190 هەزار سووری كوژراون، كە هۆكاری هەڵگیرسانەكەی سەركوتكردنی ناڕەزاییەكانی هاووڵاتیان بوو لەلایەن رژێمی بەشار ئەسەد.

29/08/2014

<sup>دەزگایەكی تەندروستی چینی دەڵێت 70%ی ئەوانەی ئاڵوودە بوون بە یارییە ئەلیكترۆنییەكانەوە، نیشانەكانیان هاوشێوەن لەگەڵ نیشانەكانی لەناوچوونی هەندێك خانەی مێشك كە پەیوەندییان بە هەڵسوكەوتەوە هەیە.

راپۆرتەكان ئاماژە بەوە دەدەن كە نزیكەی 699 ملیۆن بەكارهێنەری ئینتەرنێت لە چیندا هەن، 100 ملیۆن هاونیشتمانی نیشانەكانی ئاڵوودەبوون بە یارییە ئەلیكترۆنییەكانیان تێدا دەركەوتووە.
باوترین ئەو نیشانانەی لە ئاڵوودەبوواندا دەردەكەوێت، لاوازییانە لە كۆنترۆڵكردنی خۆیان لە هەڵسوكەوتەكانیاندا، بەشێوەیەك یارییە ئەلیكترۆنییەكان هەڵسوكەوتی كۆنترۆڵكردوون.

گەنجانی چین سكاڵای ئەوە دەكەن كە لە ماڵەكانیاندا هەست بە بۆشایی زۆر دەكەن، لەبەر ئەوەی دایك و باوكیان كاتێكی زۆر بە ئیشكردنەوە بەسەردەبەن لە دەرەوە، ئەوەش وایان لێدەكات خوو بە یارییە ئەلیكترۆنییەكانەوە بگرن و روو بكەنە یانەكانی یارییە ئەلیكترۆنییەكان لە ئینتەرنێتدا، ئەو یارییانە زیاتر سەرنجیان رادەكێشێت وەك لە تەماشاكردنی تەلەفزیۆن.

توێژەرانی كۆمەڵایەتی چین هۆشداری دەدەن لە پەرەسەندنی زیاتری ئاڵوودەبوون بە یارییە ئەلیكترۆنییەكان لە جیهاندا، بانگی حكومەتەكانی جیهان دەكەن بۆ هاندانی گەنجان بە خەریكبوونیانەوە بە كاروبارەكانی كۆمەڵگا و پەیوەندییە كۆمەڵایەتی و مرۆییەكان.</sup>

^29/8/2014

<sup>سەرباری هەموو قەیران و كێشەكانی خۆی، حكومەتی باشووری كوردستان رووبەڕووی لێشاوێك لە داواكاریی ئاوارەكان و بیانییەكان بووەتەوە بۆ پەیداكردنی كار. ئێستا جگە لە خەڵكی نێوخۆیی و ئاوارەكان، ژمارەیەكی زۆر لە بەنگلادیشی و ئەسیوپی و نیپالی، داوای كار دەكەن. بەڵام تاوەكو ئێستاش خەڵك خواستی لەسەر كرێكاری بیانییە و نایانەوێت كار بە كرێكاری نێوخۆیی بكەن.

حاجی كەریم، جێگری بەڕێوەبەری كاروكاروباری كۆمەڵایەتی، لیستێكی ناوی داواكاریی ئەو ئاوارە عەرەبانەی لەبەردەم بوو كە ماوەیەكی زۆرە ناویان تۆمار كردووە بۆ كاركردن لە ماڵ و كۆمپانیاكاندا "ئاوارە سوورییەكان زۆریان ناویان لە بەڕێوەبەرایەتیەكەمان تۆمار كردووە، بەڵام تا ئێستا هیچ كەسێك نەهاتووە داوای كاركردن لەو ئاوارانە بكات".

حاجی كەریم پێیوابوو ئاوارەكان پێویستیان بەكاركردنە "بەڵام ئەوەی ئێمە دەیزانین خەڵك حەز ناكات هیچ كام لە ئاوارەكان لە ماڵ یاخود لە كۆمپانیاكانیاندا كار بكەن، هەرچەندە نرخەكەشی كەمتر بێت". حاجی كەریم هەروەها گوتی تاوەكو ئێستا ئاوارەكانی ئێزدی و شەبەك ناوی خۆیان تۆمار نەكردووە.

هەرچەندە كرێكارانی بیانی نرخیان زۆر زیاترە لە كرێكارە نێوخۆییەكان، بەڵام حاجی كەریم دەڵێت "خەڵك گوێ بە نرخ نادەن و بیر لە باشیی ئیشكردن دەكەنەوە".

ناسك محەممەد، فەرمانبەرە و ماوەی 4 ساڵە خزمەتكارێكی نیپاڵی لە ماڵەكەیدا كار دەكات، دەڵێت "دەمێكە ئەم كچە لە ماڵەكەم كار دەكات، هیچ كێشەیەكم لەگەڵی نەبووە، ئیشەكانی زۆر بەجوانی دەكات و منداڵەكەشم بۆ بەخێو دەكات، ئەو كارانەی كرێكارێكی بیانی دەیكات كرێكاری خۆماڵی و ئاوارەكان ناتوانن بیكەن".

ناسك گوتیشی "هەرچەندە كرێكاری بیانی خەرجی زیاترە، بەڵام دەتوانی دڵنیا بیت لەوەی ئەوان كارەكانیان بەجێناهێڵن، چونكە بە گرێبەست كاریان لەگەڵ دەكەین" .

حكومەت بۆخۆی بووە بەژێر باری قەرز و گەمارۆی ئابووریی بەغدا و ئەركی قورسی ژیاندنی ئاوارەكانەوە، كەچی هێشتا 24 كۆمپانیای بەڵێندەرایەتی لە سنووری پارێزگای سلێمانی، بە بەردەوامی كرێكاری بیانی لە وڵاتە هەژارەكانەوە دێننە ئەو پارێزگایە بۆ كاری خزمەتگوزاریی نێو ماڵان و كۆمپانیاكان.

بەپێی ئاماری بەڕێوەبەرایەتی كار و بەكارخستی كۆمەڵایەتی لە سلێمانی، لە 7 مانگی رابردووی ئەمساڵدا 652 كرێكاری بیانی هاتوونەتە سلێمانی كە 113یان لە رەگەزی نێرن و 539 یان لە رەگەزی مێن. هەر لەو ساڵەدا هەزار و 32 كەسی بیانی لە سنووری ئەو پارێزگایە ڤیزای هاتنە ناوەوەیان پێدراوە.

جەزا رەشید، نوێنەری كۆمپانیای نیۆركز بۆ هێنانی كرێكاری بیانی، باس لەوە دەكات كە ئێستا كەمتر كرێكارە بیانیەكان دێنە هەرێمی كوردستان و زۆربەیان دەترسن لەو بارودۆخەی كە ناوچەكانی هەرێمی كوردستانی گرتووەتەوە.

وەك ناوبراو باسیدەكات، هەندێك لەو كرێكارانەی لێرە كارەكانیان تەواوبووە، گەڕاونەتەوە وڵاتەكانی خۆیان یاخود ئەوانەی بۆ پشوو گەڕاونەتەوە، دەڵێن لەبەر ئەوەی ئێستا لە وڵاتی ئێوە شەڕە، ناوێرین بگەڕێینەوە بۆ كوردستان.

جەزا باسی لەوە كرد، هەرچەندە فەرمانبەران گلەیی نەبوونی مووچە دەكەن و باری ئابووریی خەڵك باش نییە، بەهۆی خراپی بارودۆخی ئەمنیشەوە بە گشتی ئیش كەمبووە "بەڵام هێشتا خواست لەسەر كرێكاری بیانی هەیە، چینێكی دەوڵەمەند هەیە كە پارەی زۆرە و دەیەوێت خزمەتكاری هەبێت لە ماڵەوە، یان لە كۆمپانیا و كارگە، بەڵام تا ئێستا كەس داوای كرێكاری خۆماڵی نەكردووە، چونكە هەندێك لە خەڵك بەبیانووی ئەوەی كرێكاری بیانی ئیش باشتر دەكەن و كارەكانیان بەجێناهێڵن، دەیانەوێت كرێكارە بیانییەكان كاریان بۆ بكەن".</sup>

^29/8/2014