<sup>بڕیارە ئەمڕۆ شاندی دانوستاندنكاری كورد لە بەغدا لەگەڵ شاندی دانوستاندنكاری هاوپەیمانی نیشتمانی كۆببێتەوە و لەسەر چەند پرسێك و خاڵێك گفتوگۆ بكەن.
 
شاندی كوردی كە پێكهاتووە لە هۆشیار زێباری، فریاد رەواندوزی، جەلال جەوهەر، نەجیب باڵەتەیی ‌و زانا رۆستایی هەینی رابردوو یەكەم كۆبوونەوەیان لەگەڵ شاندی دانوستاندنكاری هاوپەیمانی نێشتمانی ئەنجامدا و دوێنێش لەگەڵ حەیدەر عەببادی كاندیدی راسپێردراو بۆ پێكهێنانی حكومەت كۆبوونەوە.
 
نەجیب عەبدوڵڵا باڵەتەیی ئەندامی شاندەكە لە یەكگرتووی ئیسلامی بەر لە كۆبوونەوەیان لەگەڵ هاوپەیمانی نیشتمانیی بە تۆڕِی میدیایی رووداوی راگەیاند "پاش كەمێكی دیكە لەگەڵ شاندی دانوستاندنكاری هاوپەیمانی نیشتمانی كۆدەبینەوە و بڕیارە لەو كۆبوونەوەیەدا باسی پرسی ماددەی 140 و بودجە و نەوت و غاز بكرێت".

باڵەتەیی گوتیشی: "هەر لەو كۆبو‌ونەوەیەدا باس لە رێگری دەسەڵاتدارانی فڕۆكەوانی مەدەنی دەكرێت لە نیشتنەوەی فڕۆكە لە فڕۆكەخانەی نێودەوڵەتی هەولێر".
 
شاندی دانوستاندنكاری هاوپەیمانی نیشتمانی، كە پارتە شیعەكان لەخۆدەگرێت پێكهاتووە لە خالید عەتییە، عەممار توعمە، وەلید كرێماوی، عەبدولكەریم ئەنساری، عەلی عەللاق، محەممەد هاشمی.</sup>

^24/8/2014

<sup>ئەمڕۆ شەممە سەرچاوەیەکی دیپلۆماسی لەسەر ئاستێکی باڵا رایگەیاند سبەی یەکشەممە وەزیری دەرەوەی ئێران سەردانی بەغدا بکات بۆ ئەوەی لەگەڵ بەرپرسە باڵاکانی ئەو وڵاتە کۆببێتەوە.

سەرچاوەکە رایگەیاند بڕیاروایە سبەی یەکشەممە محەممەد جەواد زەریف، وەزیری دەرەوەی ئێران سەردانی بەغدا بکات و لەو سەردانەیدا چاوی بە حەیدەر ئەلعبادی سەرۆک وەزیرانی راسپێردراوی عێراق دەکەوێت و گفتوگۆ لەبارەی پەیوەندییەکانی نێوانیان و گرنگترین رووداوە هەرێمی و نێودەوڵەتییەکان دەکەن.

دواین سەردانی زەریف لە 8ی ئەیلوولی ساڵی رابردوو بوو کە چاوی بە چەند بەرپرسێکی باڵای ئێرانی کەوت و باسی پەیوەندییەکان و ئەو دۆخە هاوبەشەی لەگەڵ کردوون کە لەنێوان هەردوو وڵاتدا هەیەو هەروەها تاوتوێی دۆخی سووریایان کردبوو.</sup>

^24/8/2014

<sup>وەزیری دەرەوەی هۆڵەندا رایگەیاند وەشاندنی گورزی سەربازی دژی چەكدارانی دەوڵەتی ئیسلامی ناسراو بە (داعش) لە نێو خاكی عێراق سوودی نابێت، ئەگەر لە سووریاش بنكەو بارەگاكانی نەكرێنە ئامانج.

فرانس تیمرمانز، وەزیری دەرەوەی هۆڵەندا لە لێدوانێكی رۆژنامەوانیدا لە شاری لاهای گوتی: "هەر دەوڵەتێك داوای گرتنەبەری هەڵوێستی تو‌وند دەكات دژی داعش لە عێراق، پێویستە بزانێ كاتێك سەركەوتو‌و دەبێت ئەگەر ئامادە بێت لە سووریاش رووبەڕووی ئەو رێكخراوە بێتەوە".

گوتیشی: "ئەگەر لە سووریاش رووبەڕووی رێكخراوی داعش نەبینەوە، وەشاندنی گورزی سەربازی لە عێراق بۆ سەر بنكەو بارەگاكانی هیچ سو‌ودی نابێت، چونكە زۆر بەئاسانی دەگەڕێتەوە سووریا، لەبەر ئەوە چارەسەرەكان لە عێراق درێژەیان نابێت ئەگەر لە سووریا چارەسەری بۆ نەدۆزینەوە".

هەروەها تیمرمانز، داوایكرد هاوكاریی سەربازی زیاتر پێشكەشی هێزی پێشمەرگە و گرووپە چەكدارە میانڕەوەكانی سووریا بكرێت ئەوانەی دژی رژێمی ئەسەد دەجەنگن.

وڵاتانی ئەڵمانیا، ئیتاڵیا و بەریتانیا و چەندین وڵاتی دیكە ئامادەییان دەربڕی بۆ پێشكەشكردنی چەك و تەقەمەنی و پێداویستی سەربازی بۆ پێشمەرگە لەپێناو رووبەڕووبوونەوەی چەكدارانی داعش.</sup>

^24/8/2014

ئەنجوومەنی ئاسایشی ویلایەتە یەکگرتووەکان رایگەیاند، کە داعش "یەکەم هێرشی تیرۆریستی" بۆ سەر ئەمریکا ئەنجامداوە و ئەگەر بەردەوام بن، ئەوا هیچ سنوورێك ناناسن و لە هەرشوێنێك بن بۆلەناوبردنیان رووبەڕوودەبنەوە. 

ئەنجوومەنی ئاسایشی ئەمریکا کوشتنی جەیمس فۆلێی، رۆژنامەنووسی ئەمریکی بە "یەکەم هێرشی تیرۆریستی داعش" بۆ سەر ئەمریکا لەقەڵەمدا.
  
بن رودس، جێگری راوێژکاری ئەنجوومەنی ئاسایش لە کۆنگرەیەکی رۆژنامەنووسیدا رایگەیاند "تیرۆرکردنی جەیمس فۆلێی رۆژنامەنووسی ئەمریکی یەکەم هێرشی داعشە بۆ سەر ئەمریکا".

هەر لەو کۆنگرە رۆژنامەوانییەدا رودس راشیگەیاند، کە ئەگەر بزانن داعش پلانێکی نهێنی هەیە بۆ تیرۆرکردن و هێرشکردنە سەر کەسانی ئەمریکا، ئەوا بەرپەرچی راستەوخۆیان دەبێ و شوێنی داعش دەکەون لە هەرشوێنێك بێت.

23/08/2014

ئەندامێكی كۆنسەی بەڕێوەبەریی كۆما جڤاكێن كوردستان (کەجەکە) رایدەگەیەنێت، كە دانانی پەیكەری مەعسوم كۆركماز لەسەر بڕیاری ئەوان نەبووە و بێئاگایی كەجەكەی لە دانانی پەیكەرەكە خستەڕوو.  سەبری ئۆك، ئەندامی كۆنسەی بەڕێوەبەری كۆما جڤاكێن كوردستان KCK رایگەیاند، "نازانین پەیكەری هاوڕێمان مەعسوم كۆركماز بە بڕیای كێ و لەلایەن كێوە دانراوە، ئەمە بڕیاری جوڵانەوەكەی ئێمە نەبووە".  لەگەڵ ئەوەشدا ئۆك رەخنەی لە رووخاندنی پەیكەرەكە و شێوازی رووخاندنەكە گرت و گوتی، "دانانی پێی سەربازێكی تورك لەسەر سەری پەیكەرەكە ساڵانی دەیەی نەوەدەكانم دێنێتەوە بیر، بەڵام ئێمە رێز لە بەها مێژووییەكانی تورك و نەتەوەكانی دیكە دەگرین".  ئەم گوتانەی سەبری ئۆك لەكاتێكدایە، كە لە دوای رووداوەكەوە چەند هەڵمەتێكی پارتیزانی بۆسەر بارەگا و بنكەكانی هێزە ئەمنییەكانی توركیا لەلایەن پارتی كرێكارانی كوردستانەوە دەستی پێكردووە.  سەرلەبەیانی رۆژی 19/08/2014 هێزە ئەمنییەكانی توركیا لە گوندی سیسێ-ی سەر بە لیجەی شاری ئامەد لە باكووری كوردستان، ئۆپەراسیۆنێكیان بۆ تێكشكاندنی پەیكەری مەعسوم كۆركماز، یەكەم فەرماندەی پارتیزانی پارتی كرێكارانی كوردستان رێكخست و گرژی لەنێوان خەڵك و هێزە ئەمنییەكان كەوتەوە، كەسێك كوژراو و دوو كەسی دیكەش برینداربوون.  دوای رووخاندنی پەیكەرەكە، وێنەی سەربازە توركە بەشداربووەکان لە ئۆپەراسیۆنەكە لە تۆڕە كۆمەڵایەتییەكان بڵاوكرایەوە، كە قاچیان خستووەتە سەر دەموچاوی پەیكەرەكە.  ماڵباتی كۆركماز ئەم رەفتارەی سەربازانی توركیایان وەك سوكایەتیكردن دانا و لە دادگای  ئامەد داوای یاساییان تۆماركرد.

  23/08/2014

سەرۆكی كۆنسەی سەرۆكایەتی کۆما جڤاکێن کوردستان ئامادەیی خۆیانی بۆ هەر گفتوگۆیەكی راستەوخۆ لەگەڵ توركیا دەربڕی.

جەمیك بایك، سەرۆكی كۆنسەی سەرۆكایەتی کۆما جڤاکێن کوردستان لە هەڤپەیڤینێكی لەگەڵ رۆژنامەی وەتەنی توركی، وەڵامی لێدوانەكەی بەشیر ئاتاڵای، جێگری سەرۆك وەزیرانی توركیا دەداتەوە، كە گوتبوی، ئەگەری گفتوگۆی راستەوخۆ لەگەڵ قەندیل هەیە.

جەمیل بایك رایدەگەیەنێت، کە "هەمیشە دەرگامان كراوەیە بۆ هەموو شاندێك جا ئەو شاندە رۆژنامەنووس بن یان  شاندی دەوڵەت”.

بایك هەروەها لەسەر ئەنجامی هەڵبژاردنی سەرۆكایەتی كۆمار لە توركیا قسە دەكات و دەڵێ،  دەنگەكانی دەمیرتاش پۆزەتیڤ بوون.

هەروەها بایك دەخوازێت هادەپە ببێتە پارتێكی ئۆپۆزیسیۆن بۆ هەموو توركیا و بتوانێ دەنگەكانی لە ٪١٠ زیاتر بكات.

چاوەڕوان دەكرێ لە قۆناخی داهاتووی پرۆسەی چارەسەری پرسی كورد لە توركیا، گفتوگۆی راستەوخۆ لە نێوان ئەنكەرە و قەندیل دەستپێبكات.

23/08/2014

^{دەقی راگەیەنراوەكە:}

^{راگەیاندراوی كۆبوونەوەی هاوبەشی}

<sup>دەزگای رۆشنبیری و راگەیاندنی پارتی دیموكراتی كوردستان و مەكتەبی راگەیاندنی یەكێتی نیشتمانی كوردستان

بۆ تاوتۆكردنی پرسی راگەیاندن لەم قۆناغەدا، كە وەرچەرخانێكی هەستیارە لە مێژووی بزاڤی رزگاریخوازی گەلی كوردستان و، ئەزموونی دیموكراسی و مەدەنیەت و پرەنسیپەكانی پێكەوەژیان و گەشەكردنی كۆمەڵایەتی و ئابوری كەوتوونەتە بەر هەڕەشەی تیرۆرستانی داعش، مەكتەبی راگەیاندنی یەكێتی نیشتمانی كوردستان و دەزگای رۆشنبیری و راگەیاندنی پارتی دیموكراتی كوردستان، بە سەرپەرشتی هەڤاڵان (ئەرسەلان بایز و مەحمود محەمەد) كۆبوونەوە و گفتوگۆیان لەبارەی ئەو تەوەرانەوەكرد كە دەشێ‌ بابەت بن بۆ بارگرژی راگەیاندن، كە دەرەنجامەكەی زیانگەیاندنە بە هاو وتاری و یەكڕیزی گەلەكەمان لە پشتەوەی سەنگەرەكانی پێشمەرگە قارەمانەكانی كوردستان، كە داكۆكی دلێرانە لە گەلەكەمان و بەها و دەستكەوتەكانی و هەموو نەتەوە و پێكهاتە ئایینیەكان و ژمارەیەكی زۆر لە ئاوارە و هەموو ئەوانە دەكات كە لەدەستی دڕندەیی داعش رایانكردووە و هانایان بۆ هەرێمی كوردستان هێناوە و، هاوكات پێشمەرگە دلێرەكانی كوردستان لە پێشڕەویدان بۆ تێكشكاندنی هێزی شەمشەمە كوێرەكانی جەهالەت.
دەزگای رۆشنبیری و راگەیاندنی پارتی دیموكراتی كوردستان و مەكتەبی راگەیاندنی یەكێتی نیشتمانی كوردستان پابەندی خۆیان بە پرەنسیپە نیشتمانیەكان و بەها مەدەنی و بنەماكانی پێكەوەژیان و پێشكەوتنی كوردستان دووپات كردەوە و هەر چ گوتارێكیش كە زیان بەو بنەمایانە دەگەیەنێت رەتی دەكەنەوە و رێگە نادەن ببێتە بابەتی بڵاوكردنەوە و بەدواداچوونی میدیایی.
هەردوولا ئەم قۆناغە بە هەستیاری خۆیەوە درك دەكەن و دەیكەنە بنەما بۆ كارەكانی راگەیاندن كە كەمترین دیاری و پشتیوانیە بۆ گەلەكەمان و پێشمەرگە نەبەردەكانی كوردستان و گۆرزێكیشە لە داعش و نەیارانی گەلەكەمان دەسرەوێنرێ‌. هەروەها كۆبوونەوە بڕیاریدا لیژنەیەكی هاوبەش پێكبهێنرێت بۆ داڕشتنی پلانەكانی كاری هاوبەش و پێكەوەیی لەهەموو بوارەكاندا كە وەكوو پڕۆژەیەكی میدیایی دەخرێتە بەردەستی پارتی و یەكێتی بۆ پەسەند كردنی.</sup>

^{دەزگای رۆشنبیری و راگەیاندنی مەكتەبی راگەیاندنی
پارتی دیموكراتی كوردستان یەكێتی نیشتمانی كوردستان}

^{22ی ئابی 2014}

ژمارەیەكی زۆر لە كوردی نیشتەجێی رووسیا كە زۆربەیان ئێزدی بوون، رژانە سەر شەقامەكانی شاری مۆسكۆ بۆ پرۆتستۆكردنی هێرشەكانی داعش بۆ سەر كوردی ئێزدی لە باشووری كوردستان، بەڵام گردبوونەوەكەیان بە ئاقارێكی دیكەدا رۆیشت، چونكە لایەنگرانی پارتی كرێكارانی كوردستان نەیانهێشت ئاڵای كوردستان بەرزبكرێتەوە.

ئەو كوردانە رۆژی 11/8/2014 لە بەردەم باڵیۆزخانەی ئەمریكا لە مۆسكۆ كۆبوونەوە، بۆ پرۆتستۆكردنی هێرشی چەكدارانی داعش بۆ سەر قەزای شنگال و كۆمەڵگەكانی دەوروبەری. 
بەشداربووانی گردبوونەوەكە چەند پلانكارتێكیان بەرز كردبووەوە كە گوزارشت بوون لە پرۆتستۆكردنی تاوانەكانی داعش دژی كوردی ئێزدی، هەروەها وێنەی عەبدوڵڵا ئۆجەلان و ئاڵای كوردستانیش بەدەستی خۆپیشاندەرەكانەوە بوو.

بەڵام ناكۆكیی سیاسی هەرزوو لەسەر گردبوونەوەكە رەنگیدایەوە، كاتێك لایەنگرانی PKK داوایان كرد ئاڵای كوردستان بەرزنەكرێتەوە و دروشم و قسەی نەشیاویان دژی بەرپرسانی باشووری كوردستان گوتەوە.

لە گردبوونەوەكەدا، بەرپرسی ماڵی كورد لە مۆسكۆ هێرشی كردە سەر بەرپرسانی باشووری كوردستان و هێزەكانی پێشمەرگە و  بە "خیانەتكار" ناوی بردن.

 هەڤاڵ مەهدی، خەڵكی شاری دهۆك كە قوتابی ماستەرە لە زانستە سیاسییەكان، لەبەرئەوەی وەڵامی تۆمەت و قسەكانی ئەو بەرپرسەی دابووەوە، كەوتە بەر مەترسیی هێرش، پاشانیش بە ژمارە تەلەفۆنی نەناسراو هەڕەشەی لێكراوە.

هەڤاڵ كە بەشداری لە گردبوونەوەكەدا كردبوو بە (رووداو)ی گوت "لە كاتی بەشداریكردنم لە گردبوونەوەكە كە بۆ بە جینۆسایدناسینی دۆسیەی شنگال بوو، بینیم ئەوان هیچ ئاڵایەكی كوردستانیان هەڵنەگرتووە جگە لە وێنەی ئۆجەلان و ئاڵای PKK، ئەوان هیچ باسی داعشیان نەدەكرد".

وەك هەڤاڵ گوتی، سەرەتا بەرپرسی ماڵی كورد لە مۆسكۆ هێرشی كردە سەر پێشمەرگە و بە "خیانەتكار" ناوی بردن. ئەویش دوای ئەوەی وەڵامی دەداتەوە و لەگەڵی دەكەوێتە مشتومڕ، بەرپرسی ماڵی كورد دەستی لێ بەرزكردووەتەوە و چەند كەسێكی دیكەش هاواریان بەسەردا كردووە و پێیانگوتووە دەمت دابخە. 

هەڤاڵ دەڵێت "من رێزی ئەوانم گرت، بەڵام ئەوان هەر بەردەوام بوون لەسەر هاواركردن". بۆیە هەڤاڵ ئاڵای كوردستان بەرز دەكاتەوە "بەڵام ئەوان پێیانگوتم ئەم ئاڵایە بەرزمەكەوە، پاشان هەوڵیاندا لێم بدەن و ئاڵاكەم لێ بستێنن. دواتر شەوی 12ی مانگ بە ژمارەیەكی تایبەت تەلەفۆنیان بۆ كردم و داوایان لێكردم كە بچم بۆ ناوچەی ئێمكاد لە مۆسكۆ و چاوم پێیان بكەوێت، بەڵام من نەچووم، هەر ئەو كاتیش پەیوەندیم بە بەڕێز نوێنەری حكومەتی هەرێمی كوردستانەوە لە رووسیا كرد و ئاگادارم كردەوە، ئەویش گوتی: لە ماڵەكەی خۆت دەرنەچیت، ئێمە لێرەین هیچ خەمت نەبێت".

 (رووداو) پەیوەندی كرد بە د.ئاسۆ جەنگی تاڵەبانی، نوێنەری حكومەتی هەرێمی كوردستان لە رووسیا. د.ئاسۆ گوتی "راستە هەڤاڵ پەیوەندی پێوەكردم لەسەر ئەو بابەتە، بەڵام لەبەر ناسكیی بارودۆخەكە پێم باش نییە ئەم بابەتە زەقبكرێتەوە". 

22/08/2014

بە گەیشتنی چەكە ئەمریكییەكان بۆ كوردستان، چەكفرۆشانی شارەكانی باشووری كوردستان بازاڕە گەرم و پڕ كڕیارەكەیان لەدەستچوو، لەم بازاڕەدا هاوكێشەیەكی سەیر هەیە، تاوەكو فرۆشیارەكان دڵتەنگتر بن، پێشمەرگەكانی بەرەی شەڕ گەشبینتر دەبن. چونكە خەونە لە مێژینەكەی پێشمەرگە وەدیهات و چەكی پێشكەوتوو گەیشتە كوردستان.

دواجار شەڕی چەكدارانی دەوڵەتی ئیسلامی لە عێراق و شام رووی بەرەو كوردستان وەرگێڕا، ئیدی پێشمەرگە لە سەنگەرە ساردەكاندا نەمانەوە و ناچاربوون رووبەڕوویان ببنەوە، بەڵام خرۆشان و بەدەنگەوەهاتنی هەزاران هاووڵاتی وەك خۆبەخش، بازاڕەكانی جلوبەرگ و كەرەستەی سەربازی گەرمكرد و خەڵك خۆیان بۆ شەڕ پڕچەك كرد. ئەمەش بووە هۆی ئەوەی چەكفرۆشان زیاتر لە هەموو كاتێك هەست بە بازاڕگەرمی بكەن. 

هێشتا بازاڕەكە بە تەواوی لەدەستنەچووە "دەتوانم بڵێم تاكە كاسبكار ئێمەین كە بازاڕمان بەگەرمی ماوەتەوە". سەروەر ئەحمەد، یەكێك لە چەكفرۆشانی سلێمانی وا دەڵێت.
ناوبراو، لەگەڵ دەربڕینی دڵخۆشیدا بەو بازاڕەی هەیانە، دەڵێ ئێستا زۆربەی خەڵك پرسیاری چەكی ئەمریكی دەكەن و پشتیان كردووەتە چەكی رووسی "خەڵك و پێشمەرگەش هەر داوای چەكی ئەمریكی دەكەن". سەروەر دەڵێت كڕیارەكانیان زیاتر خەڵكی مەدەنین "كەم ماڵ هەیە باری دارایی باش بێت و چەكی ئەمریكی نەبێت".

بەپێی ئەو زانیاریانەی (تۆڕی میدیای رووداو) لە بازاڕی چەكفرۆشانەوە دەستیكەوتووە، بازاڕی هەموو جۆرە چەكێك گەرمە، بەتایبەتی چەكی ئەمریكی. ئەم چەكانەش، هەمان ئەو چەكانەن كە لەلای سەربازانی سوپای عێراق بوون و دوای گرتنی موسڵ بەشێكیان كەوتنە دەست چەكدارانی داعش. وەك چەكفرۆشان باسیدەكەن "زۆربەی ئەو چەكانە لای خەڵك بوون، ئێستا زۆربەیان دەیخەنە بازاڕەوە".

پاڵپشتییە نێودەوڵەتییەكانی پێشمەرگە رۆژ لە دوای رۆژ فراوانتر دەبن و ئێستا جگە لە ئەمریكا، فەرەنسا و بەریتانیا و ئەڵمانیا و چەند وڵاتێكی دیكەش ئامادەیی خۆیان نیشانداوە بۆ ئەوەی پشتیوانیی سەربازی هێزی پێشمەرگە بكەن. بەگەیشتنی ئەو چەكە پێشكەوتووانەی رۆژئاوا، ئیدی خەڵك دەستبەرداری چەكە رووسییەكان دەبن كە دەیان ساڵە چاومان بە بینینیان راهاتووە.

سۆران عەلی، یەكێكی دیكە لە چەكفرۆشانی سلێمانی باس لەوە دەكات كە پڕچەككردنی هێزی پێشمەرگە لەلایەن ئەمریكا و هەندێك وڵاتی ئەوروپاوە، هێشتا كاریگەریی دروستنەكردووە لەسەر بازاڕەكەیان، لەگەڵ ئەوەی ئەو پێیوایە پڕچەككردنی هێزی پێشمەرگە تاوەكو ئێستا هەر دەنگوباسە، بەڵام دەڵێت "ئەگەر چەكی ئەمریكی بگاتە دەست پێشمەرگە، بازاڕی چەكی ئەمریكی بەرز دەبێتەوە، چونكە پارچەی یەدەگ و فیشەكی زۆر دەبێت لەبازاڕدا، ئەمەش دەبێتە هۆكاری داواكاریی زیاتر لەسەری".

M16، جۆری ئەو چەكە ئەمریكییەیە كە زۆرترین داواكاری لەسەرە لەلایەن كڕیارانەوە، نرخەكەشی لە نێوان 2800 تاوەكو 3500 دۆلار دایە. بە گوتەی چەكفرۆشان، رۆژانە لەنێو بازاڕی سلێمانی 300 پارچە چەك دەفرۆشرێت.

محەممەد حەسەن، وەك پێشمەرگەیەكی دێرین لەسەر داوای سەرۆكی هەرێمی كوردستان خۆی ناونووس كردووە بۆ شەڕ، چاوەڕوانە لەقۆناغی دووەمی پێشمەرگە خۆبەخشەكاندا بچێتە بەرەكانی شەڕ، وەك خۆی باسیكرد، ئەو خاوەنی چەكێكی جۆری كڵاشینكۆفە، بەڵام بڕیاریدا بەو كڵاشینكۆفە رووسیەوە نەڕوات و چەكێكی نوێی كڕیوە "زۆربەی هاوڕێكانم چەكی ئەمریكی و قەناسیان پێبوو، منیش حەزمكرد چەكێكی ئەمریكی بكڕم و بەو چەكەوە شەڕی دوژمن بكەم".

سۆران عەلی پێیوایە تاوەكو چەكی ئەمریكی زۆرتربێت داواكاری زیاتری لەسەر دەبێت، چونكە ئەو وای دەبینێت كە ئەوە دەبێتە هۆكاری ئەوەی خەڵك زیاتر ئاشنای بەكارهێنانی ئەو جۆرە چەكە ببن "لەبازاڕەكانی كوردستاندا ئەو جۆرە مامەڵەیە زۆرباوە، هەرشتێك زۆربێت كڕین و فرۆشتنی خێرایە، هەر بۆیە خەڵكی كە چەك دەكڕن حسابی خێرا فرۆشتنەوەشی دەكەن". هەروەها لەبارەی مامەڵەی جۆرەكانی دیكەی چەكەوە گوتی "كلاشینكۆف زۆر بەكەمی دەفرۆشرێت، دەتوانم بڵێم چەكی ئەمریكی جێی بە چەكی رووسی لێژ كرد، یاخود بڵێم چەكی ئەمریكی وەك گورزێكی كوشندە وابوو بەر چەكی رووسی كەوت". 

ئەو چەكەی بازاڕەكەی روو لە كزییە بە قسەی سۆران، دەمانچەیە "خەڵك بەهۆی شەڕەوە حەزیان لە دەمانچە نەماوە".

22/08/2014