^{له‌میانه‌ی دانیشتنێكیدا له‌گه‌ڵ “مه‌سعود بارزانی ” سه‌رۆكی هه‌رێمی كوردستان،نوێنه‌ری سكرتێری گشتی نه‌ته‌وه‌ یه‌كگرتووه‌كان له‌ عێراق نیگه‌رانی خۆی له‌به‌رانبه‌ر گرژییه‌كانی هه‌رێمی كورستان ڕاده‌گه‌یه‌نێت و ئاماژه‌ش بۆ ئه‌وه‌ده‌كات كه‌ هێرشكردنە سەر بارەگای لایەنەكان ئاكامی خراپی دەبێت و چارەسەری كێشەكان ناكات.}

^{به‌پێی هه‌واڵێكی ماڵپه‌ری فه‌رمی سه‌رۆكایه‌تی هه‌رێمی كوردستان،ڕۆژی چوارشەممە 14ـی 10ـی 2015 لە شاری هەولێر مەسعود بارزانی، سەرۆكی هەرێمی كوردستان پێشوازی لە جۆن كۆبینز نوێنەری تایبەتی سكرتێری گشتیی نەتەوە یەكگرتووەكان لە عێراق كرد.}

^{لەم كۆبوونەوەیەدا نوێنەری تایبەتی سكرتێری گشتیی نەتەوە یەكگرتووەكان لە عێراق ڕاوبۆچوونی خۆی لەبارەی بارودۆخی ناوخۆی هەرێم و گرژییەكانی حەفتەی ڕابردوو بۆ سەرۆك بارزانی باس كرد و نیگەرانیی خۆی لەبەرانبەر گرژییەكان نیشاندا بە تایبەت كە توندوتیژی و هێرشكردنە سەر بارەگای لایەنەكان ئاكامی خراپی دەبێت و چارەسەری كێشەكان ناكات. هەروەها ئەوەیشی خستەڕوو كە سەقامگیریی هەرێمی كوردستان زۆر گرنگە بە تایبەت كە تەحەدیاتی ئابووری و شەڕی داعش ڕووبەڕووی هەرێمی كوردستان بووەتەوە.
له‌به‌شێكی هه‌واڵه‌كه‌ی ماڵپه‌ری سه‌رۆكایه‌تی هه‌رێمی كوردستاندا هاتووه‌”نوێنەری تایبەتی سكرتێری گشتیی نەتەوە یەكگرتووەكان لە عێراق ستاییشی بانگەوازی هێزی پێشمەرگەی كوردستانی كرد كە لە سەنگەری شەڕی داعش ئاراستەی لایەنە سیاسییەكان كرا بوو. ئامادەیی ڕێكخراوی نەتەوە یەكگرتووەكانیشی ڕاگەیاند كە هاوكاری لایەنە سیاسییەكان بێت بۆ چارەسەركردنی كێشەكان و داوای دانوساندن و لێكنزیكبوونەوەی لایەنەكانی كرد”.}

^{هەڕەشەی تیرۆریستان و بارودۆخی سیاسیی ناوچەكە و دوا گۆڕانكارییە سیاسی و ئەمنییەكان تەوەرێكی دیكەی كۆبوونەوەكە بوو.
15/10/2015}

^{سكرتێری ڕۆژنامەوانیی سەرۆكوەزیرانی هەرێمی كوردستان ڕایگەیاند، بە مەبەستی بەشداری كردن لە كۆنفرانسێك، “نێچیرڤان بارزانی” سەردانی پایتەختی ئێران دەكات.}

^{ماڵپەڕی فەرمیی حكوومەتی هەرێمی كوردستان، لە زاری “سامی ئەرگۆشی”، سكرتێری ڕۆژنامەوانیی “نێچیرڤان بارزانی”، سەرۆكوەزیرانی هەرێمی كوردستانەوە بڵاوی كردەوە: “بۆ بەشداری كردن لە كۆنفرانسی ئاسایشیی (میونیخ) كە لە شاری تارانی پایتەختی كۆماری ئیسلامیی ئێران دەبەسترێت، نێچیرڤان بارزانی، ڕۆژی 17ی ئەم مانگە، بە داوەتێكی فەرمی سەردانی ئێران دەكات”. ئەوەشی ڕوون كردەوە كە كۆنفرانسەكە بە هەماهەنگی لەگەڵ ئەنیستیتیوتی نێودەوڵەتیی لێكۆڵینەوەی سیاسی لە پایتەختی ئێران ساز دەكرێت و هەر یەكە لە وەزیرانی دەرەوەی (ئەڵمانیا، ئێران، ژمارەیەك لە پەرلەمانتاران، بەرپرسانی حكوومی، ئەكادیمسیەن، لێكۆڵەرەوەی نێودەوڵەتی و ئێرانی) بەشداری تێدا دەكەن و زیاتر پەیوەستە بە دوایین ڕێككەوتنی نێوان كۆماری ئیسلامیی ئێران و وڵاتانی ڕۆژاوا و چەندین بابەت و باس و تەوەری پەیوەست بەم پرسەی تێدا تاوتوێ دەكرێت.}

^{ئەرگوشی ئاماژەشی بەوە كرد كە چاوەڕوان دەكرێت لەم سەردانەی بۆ تاران، نێچیرڤان بارزانی چاوی بە ژمارەیەك لە بەرپرسانی كۆماری ئیسلامیی ئێرانیش بكەوێت.
15/10/2015}

^{گوتە بێژی كۆشكی سپیی ئەمەریكا ئاشكرای كرد كۆماری ئیسلامیی ئێران بە تاقیكردنەوەی مووشەكی عیماد، جارێكی دیكە بڕیارنەی ئەنجومەنی ئاسایشی پێشێل كردووە.}

^{“جاش ئەرنێست” گوتەبێژی كۆشكی سپی لە كۆنگەرەیكی رۆژنامەنووسیدا گوتی: “چەندین نیشانەی بەهێز هەن كە كە تاقیكردنەوەی ئەمدواییانەی مووشەكی دوورهاوێژی ئێران، پێشێلكاری حاشاهەڵنەگری بڕیارنامەی ئەنجومەنی ئاسایشی سەر بە نەتەوە یەكگرتووەكانە.”}

^{“حوسێن دێهقان” وەزیری بەرگریی حكوومەتی ئێران لە رۆژانی رابردوودا رایگەیاند: “كە تاقیكردنەوەی مووشەكی دوورهاوێژی زەمین بە زەمینی عیماد بە سەركەوتووییەوە ئەنجام دراوە.”}

^{بە گوتەی ئەو بەرپرسە سەربازییەی ئێران كە هەموو قۆناغەكانی دیزاین و دروستكردنی لەلایەن پسپۆڕانی پیشەسازیی ئاسمانی و بەگریی ئێرانەوە جێبەجێ‌ كراوە، یەكەم مووشەكی دوورهاوێژی كۆماری ئیسلامیی ئێرانە كە توانایی كۆنترۆلكردنی هەیە هەتا ئامانجەكەی دەپێكێ‌.}

^{ئەنجومەنی ئاسایشی سەر بە نەتەوە یەكگرتووەكان ئێرانی لە چالاكیی مووشەكی و تاقیكردنەوی مووشەكی بالستیك كە توانایی هەڵگرتنی كڵاوەی ناوكیی هەیە، قەدەغە كردووە.}

^{لێپرسراوانی ئێران ئاشكرایان كردووە بۆ گەشە و پەرەپێدان بە چالاكیی مووشەكی و كاری سەربازی ئیزن لە كەس وەرناگرن.}

^{“عەباس عێراقچی” ئەندامی تیمی دانوستانكاری ناوكیی ئێران بە ئاماژە تاقیكردنەوەی مووشەكی زەمین بە زەمینی عیماد، بە ئاژانسی ئیرنای راگەیاندووە: “هاویشتن و تاقیكردنەوەی مووشەك وەك پێشێلكردنی بڕیارنامەی ئەنجومەنی ئاسایش و رێككەوتنی ناوكی نایەتە ئەژمار.”}

^{دوای هێرشی ئاسمانیی رووسیا بۆ ناو خاكی سووریا، ئێرانیش لە بواری سەربازییەوە كەوتووەتە جموجۆڵ و بڕیارە لە چەند رۆژی داهاتوودا گەوەرترین مانۆڕ و ئۆپەراسیۆنی سوپا (ئەرتش)ی ئێران لەسنوورەكانی پارێزگای كرماشان لە رۆژهەڵاتی كوردستان بەڕێوە بچێت.
14/10/2015}

^{چه‌ند سه‌رچاوه‌یه‌كی ئێرانی هه‌واڵی كوژرانی دوو فه‌رمانده‌ی باڵای سوپای پاسدارانیان له‌ شه‌ڕه‌كانی سوریادا ڕاگه‌یاند.}

^{سایتی” باسیج پرێس” كه‌له‌ هێزه‌كانی “به‌سیج”ی سه‌ربه‌ سوپای پاسدارانه‌وه‌ نزیكه‌، له‌ په‌ڕه‌ی خۆی له‌ “ئینستاگرام” هه‌واڵی كوژرانی” فه‌رشاد حه‌سونی زاده‌”ی فه‌رمانده‌ی فه‌یله‌قی”سابرین”ی سوپای پاسدارانی ڕاگه‌یاند.}

^{فه‌یله‌قی “سابرین” سه‌ربه‌ هێزه‌كانی وشكانی سوپای پاسدارانه‌، له‌سه‌ره‌تای ساڵانی دوو هه‌زاردا دروستكراوه‌، به‌ئامانجی له‌ناوبردنی هێزه كوردییه‌كانی ڕۆژهه‌ڵاتی كوردستان. به‌ڵام دواجار ئه‌ركی كرده‌یی به‌و فه‌یله‌قه‌ سپێردرا له‌ ناوچه‌كانی باشوری ڕۆژهه‌ڵاتی ئێران كه‌ هاوسێی پاكستانه‌.چونكه‌ له‌و ناوچانه‌شدا بلوچه‌كان چه‌ند جموجوڵێك چه‌كدارییان هه‌یه‌.}

^{له‌دوای ئه‌وه‌ی داعش ناوچه‌یه‌كی فراوانی عێراقی داگیركرد، فه‌یله‌قی “سابرین” هاته‌ عێراق و له‌ژێر فه‌رمانده‌یی”قاسم سلێمانی” كاری ده‌كرد.}

^{به‌گوێره‌ی زانیارییه‌كان، ئێران به‌م دواییانه‌ به‌شێك له‌و هێزانه‌ی فه‌یله‌قی “سابرین”ی نارد بۆ سوریا.}

^{ئه‌ركی سه‌ره‌كی ئه‌و فه‌یله‌قه‌ ئه‌وه‌یه‌ له‌ناوچه‌ هه‌ڵدێره‌كان و شاخه‌ سه‌خته‌كاندا شه‌ڕ بكات، به‌یه‌كێك له‌گرووپی ده‌سته‌بژێره‌كانی سوپای پاسداران داده‌نرێت.}

^{هه‌ر ئه‌مڕۆ سایتی كه‌ناڵی” خه‌به‌ر”ی ئێرانی، كوژرانی یه‌كێكی تر له‌سه‌ركرده‌كانی سوپای پاسدارانی ڕاگه‌یاند كه‌بریتی بوو له‌” حه‌مید موختار به‌ند” ناسراو به‌” ئه‌بو زه‌هرا”. ئه‌میش فه‌رمانده‌یه‌كی تری سوپای پاسدارانه‌وه‌، خه‌ڵكی ناوچه‌ی “ئه‌هواز”ی عه‌ره‌ب نشینی ئێرانه. یه‌كێكه‌ له‌ جه‌نگاوه‌ره‌كانی شه‌ڕی عێراق- ئێران.}

^{سه‌رچاوه‌ ئێرانییه‌كان به‌وردی ئه‌و شوێنه‌یان ده‌ست نیشان نه‌كردووه‌ كه‌ ئه‌و دوو فه‌رمانده‌یه‌ تیایدا كوژراون.به‌ڵام ئه‌وه‌ی ڕاگه‌یاندووه‌ كه‌ دووشه‌ممه‌ 12/10/2015 كوژراون.}

^{ئه‌م هه‌واڵانه‌ ته‌نها چه‌ند ڕۆژێك له‌دوای كوژرانی “حسێن هه‌مه‌دانی” گه‌وره‌ فه‌رمانده‌ی سوپای پاسداران دێن، ئه‌و فه‌رمانده‌یه‌ی كه‌به‌كه‌سێكی نزیك له‌ “حه‌سه‌ن ڕۆحانی” سه‌رۆككۆماری ئێران ده‌ژمێردراو، تاكو ئێستاش هۆكاری كوژرانه‌كه‌ی ڕانه‌گه‌یه‌نراوه‌.}

^{ئاشكرایه‌ ده‌یان كه‌س له‌چه‌كدارو جه‌نگاوه‌ره‌كانی به‌سیج و پاسداران له‌سه‌ره‌تای قه‌یرانی سوریاوه‌ تاكو ئێستا كوژراون. به‌ڵام ماوه‌یه‌كه‌ كوژرانی فه‌رمانده‌ باڵاكانی پاسداران له‌سوریادا زۆر به‌ڕوونی زیادی كردووه‌.}

^{به‌م دواییانه‌ش سه‌دان چه‌كداری پاسداران بۆ به‌شداری كردن له‌ هێرشی فراوان بۆسه‌ر ئۆپۆزسیۆنی سوریا گه‌یشتنه‌ ئه‌و وڵاته‌.}

^{به‌گوته‌ی سه‌رچاوه‌یه‌كی ئاگادار: ” به‌كرده‌وه‌ هێزه‌كانی ئێران گه‌یشتوونه‌ته‌ سوریا. پێكهاتوون له‌سه‌رباز و ئه‌فسه‌ر و فه‌رمانده‌، ته‌نها ڕاوێژكارنین. به‌چه‌ك و تفاقی ته‌واوه‌وه‌ هاتوون و، هێزی تریش به‌م زوانه‌ ده‌گه‌نه‌ ئه‌و وڵاته‌”.
14/10/2015}

^{کەسوکاری پێشمەرگە بەدیلگیراوەکانی دەستی داعش، لەگردبوونەوەیەکدا ناڕەزایی بەرانبەرڕەوشی کوردستان دەردەبڕن و پێیان وایە دەبێت سەرۆک بارزانی لەگەڵ لایەنەکان بێتە سەرخەت.}

^{لەگردبوونەوەیەکدا لەکەرکووک ئەمرۆ (13102015)، بنەماڵەی پێشمەرگە بەدیلگیراوەکانی لای داعش داوادەکەن، ئارامی کوردستان بپارێزرێت، بۆ ئەوەی هەرێمی کوردستان تووشی قەیرانێکی دیکە نەبێت و داوادەکەن لایەنەکان بگەنە ئەنجامی کۆتایی هاوکات، دەشلێن: “داوا لە سەرۆک بارزانی دەکەن کە هەوڵ بدات ئەو دۆخەی هەیە لەگەڵ لایەنەکان چارەسەری بکات، چونکە بارزانی سەرۆکمانە دەبێت بە خەممانەوە بێت”.
داواش دەکەن ئەو گرفتانەی لە شارەکانی دیکەوە هەیە نەهێنرێتە کەرکووک و باری دەروونی خەڵک تێک نەدرێت.
بەهۆی دواکەوتنی مووچەکانیانەوە ماوەی چەند ڕۆژیکە شەپۆلێکی نارەزای دروست بووە دواجار نارەزاییەکان گرژی لێکەوتەوە و بارەگاکانی پارتی لە سلێمانی کرانە ئامانج.
13/10/2015}

^{بارزانی دووپات كردەوە كە ئەگەر هەماهەنگی و كاری هاوبەشی ڕووسیا و وڵاتانی هاوپەیمان لە لێدانی تیرۆریستانی داعش هەبێت و لە هەمانكاتیشدا چارەسەری سیاسی بۆ ئاییندەی سووریا لەبەرچاو بگیرێت ئەوە ئەنجامی باشتری لێدەكەوێتەوە. باڵیۆزی نوێی سوید لەبارەی بارودۆخی ناوخۆی هەرێمی كوردستان و گرژییەكانی ئەم دواییەی پارێزگای سلێمانی داوای كرد، گرژییەكان گەشە نەكات بۆ ئەوەی كاریگەری لەسەر شەڕی دژی تیرۆریستانی داعش نەبێت.}

^{بەپێی راگەیاندراوێکی سەرۆکایەتی هەرێمی کوردستان، ڕۆژی سێشەممە 13ـی 10ـی 2015 لە سەلاحەدین مەسعود بارزانی سەرۆكی هەرێمی كوردستان پێشوازی لە خاتوو ئانیكا مولین لە عێراقی فیدڕاڵ كرد.}

^{لە دیدارەكەدا باڵیۆزی نوێی سوید لە عێراق خۆشحاڵیی خۆی نیشاندا بۆ ئەو پەیوەندی و دیالۆگە نموونەییەی كە لەنێوان وڵاتەكەی و هەرێمی كوردستاندا هەیە و تۆڕێكی مێژوویی و مرۆڤی بەیەكەوەیان دەبەستێتەوە. وێڕای ئاماژەدان بە هاوكارییە سەربازییەكانی سوید بۆ هێزی پێشمەرگە جەختی لەوە كردەوە كە سوید بە بایەخەوە سەیری خۆڕاگری و قوربانیدانی پێشمەرگە لە بەرانبەر تیرۆریستان دەكات و لە ساتەوەختە مێژووییەكاندا لەگەڵ گەلی كوردستان دەبێت. باڵیۆزی سوید لە عێراق باسی شەڕی تیرۆریستان و هەڕەشەكانی تیرۆریستان بۆ سەر ئاساییشی ناوچەكەی كرد و بۆچوونی وڵاتەكەی لەبارەی دوا گۆڕانكارییە سیاسییەكانی ناوچەكە بە تایبەتی دەستێوەردانی سەربازی ڕووسیا لە سووریا خستەڕوو و هیوایشی خواست وڵاتەكەی بتوانێ ڕۆڵی هەبێ لە چارەكردنی كێشەكانی پێكهاتەكانی عێراق لە دوای شكستدانی تیرۆریستان.}

^{لەبەرانبەردا سەرۆك بارزانی سوپاسی باڵیۆزی تازەی سویدی كرد و هیوای سەركەوتنی لە ئەرك و كارەكانی بۆ خواست و وێڕای ئاماژەدان بە پەیوەندیی مێژوویی نێوان گەلی كوردستان و گەلی سوید پێزانینیشی بۆ گەل و حكوومەتی سوید هەبوو كە لە ڕۆژانی تەنگانەدا پاڵپشتی كوردستانی كردووە و هەزاران هاووڵاتیی كوردی وەخۆ گرتووە. هەروەها سوپاسی هاوكارییە سەربازییەكانی سویدی كرد كە پێشكەشی هێزی پێشمەرگە كراوە.}

^{لە درێژەی قسەكانیدا سەرۆك بارزانی باسی لە هۆكارەكانی سەرهەڵدان و گەشەی تیرۆر كرد لە ناوچەكە و باسی لە بارودۆخی مەیدانیی بەرەكانی شەڕ و هەروەها قۆناغی دوای ئازادكردنی موسڵ كرد و ئاماژەی بە باری دیموگرافی و فرەیی پارێزگای نەینەوا دا و جەختی لەوە كردەوە كە پێویستە گەرەنتی و ڕێوشوێنی ئیداری و سیاسی وا بگیرێتە بەر كە دڵنیایی تەواو بدرێتە پێكهاتەكان كە كارەساتەكان دووبارە نەبنەوە. سەرۆك بارزانی هێمای بە دۆخی ئاڵۆزی سووریایش دا و ئەوەی دووپات كردەوە كە ئەگەر هەماهەنگی و كاری هاوبەشی ڕووسیا و وڵاتانی هاوپەیمان لە لێدانی تیرۆریستانی داعش هەبێت و لە هەمانكاتیشدا چارەسەری سیاسی بۆ ئاییندەی سووریا لەبەرچاو بگیرێت ئەوە ئەنجامی باشتری لێدەكەوێتەوە.}

^{بارودۆخی ناوخۆی هەرێمی كوردستان و گرژییەكانی ئەم دواییەی پارێزگای سلێمانی تەوەرێكی دیكەی كۆبوونەوەكە بوو. پەیوەست بەم بابەتەوە باڵیۆزی نوێی سوید داوای كرد گرژییەكان گەشە نەكات بۆ ئەوەی كاریگەری لەسەر شەڕی دژی تیرۆریستانی داعش نەبێت.
13/10/2015}

^{پەسەندكردنی پرۆژەی جێبەجێكردنی رێككەوتنی ئەتۆمیی ئێران (بەرجام) لە حاڵێكدا رووی دا كە لیژنەی سەرۆكایەتی پەرلەمانی ئێران رایانگەیاندبوو زیاتر لە 200 پێشنیاری گۆڕانكاریی ئەو پڕۆیەیە خراوەتەڕوو.}

^{بەپێی هەواڵی ئاژانسە فەرمییەكانی ئێران ئەمڕۆ سێشەممە 13 ـ 10 ـ 2012 لە كاتی پەسەندكردنی گەڵاڵەی جێبەجێكردنی رێككەوتنی ئەتۆمی لە پەرلەمانی ئێران كاتێك عەلی لاریجانی پێداگریی دەكرد كە وردەكارییەكانی ئەم پرشۆژەیە خێرا بخرێتە دەنگدانەوە، دەنگ ناڕەزایی چەند پەرلەمانتارێكی دژبەری ئەم پڕۆیە بەرز بووەوە كە بۆ هێندە پەلەتانە، ئەگەر شتێك لە گۆڕێ‌ دایە بیڵێن.}

^{لە رۆژانی رابردوودا كە ئەم پڕۆیەیە بۆ پەسەندكردن هێنرایە پەرلەمانی ئێرانەوە قسەی لەبارەوە كرا، بە ئامادەبوونی “محەمەد جەواد زەریف” وەزیری دەرەوەی ئێران، گرژی و ئاڵۆزی كەوتە ناو پەرلەمان و نزیكەی 100 پەرلەمانتار دەنگی نایان پێدا و هەندێ‌ پەرلەمانتاری دژبەر تەنانەت هەڕەشی توندیان لە وەزیری دەرەوە كرد.}

^{دەقی پڕۆژەی جێبەجێكردنی رێككەوتنی ئەتۆمی (بەرجام) لە نۆ خاڵ پێكهاتووە كە تێیدا باسی چۆنیەتیی جێبەجێ‌ كردنی ئەم پڕۆە و ئامانجەكانی ئێران دەكات.
لە خاڵی یەكەمدا دەڵێ‌: “بەپێی فەتوای رێبەری كۆماری ئیسلامی هیچ حكوومەتێك لە ئێران مافی بەرهەم و بەكارهێنانی چەكی ئەتۆمیی نییە و حكوومەت ئەركی سەرشانیەتی سیاسەتی چەك داماڵینی چەكی ئەتۆمیی جیهانی بە جیدی رەچاو بكات.”}

^{بڕیارە پێنجی رۆژی دیكەش لە كۆنگرێسی ئەمەریكا پرسی رێككەوتنی ئەتۆمیی ئێران و وڵاتانی پێنج كۆ یەك بخرێتە بەرباس و بۆ پەسەند كردن قسە و باسی لەسەر بكرێت.}

^{رێككەوتنی ئەتۆمیی كۆماری ئیسلامیی ئێران و كۆمەڵەی وڵاتانی پێنج كۆ یەك پاش نزیكەی 12 ساڵ مشتومڕ رێكەوتی 13ی مانگی ئاب لە جنیڤ پەسەند كرا.}

^{حەسەن رۆحانی سەرکۆماری ئێرانیش دوێنێ لە پاریزگای مازندەران هێرشی کردە سەر دژبەرانی رێککەوتنی ئەتۆمی و گوتی تکایە لە گیرفانی خەڵکەوە دروشم مەدەن، چونکە بە هەڵوەشانەوەی گەمارۆکان دووکانەکانیان داناخرێت.
13/10/2015}

^{ئەمرۆ سێشەممە(13/10/2015) هەر یەک لە یەکێتیی و یەکگرتوو و کۆمەڵ لە شاری هەولێر کۆدەبنەوە.}

^{بەپێ ئەو زانیاریەکانی (باسنیوز) کەوتووە پێشت نیوەرۆی ئەمرۆ کەسی یەکەمی ئەو سێ حزبە لە شاری هەولێر کۆدەبنەوە مەبەست لە کۆبوونەوەکەش بۆ تاوتوتوێکردنی بارودۆخی سیاسی هەرێمی کوردستانە.}

^{بەپێ زانیارییەکانی باسنیوز ئەو سێ حزبە هەموو ئەگەرەکان تاوتوێی دەکەن کە یەکێک لە ئەگەرەکان پێکهێنانی حکوومەتی نوێی هەرێمی کوردستانە.}

^{بەهۆی کێشەکانی نێوان پارتی و گۆڕان رۆژی دووشەممە (12/2/2015) نێچیرڤان بارزانی سەرۆکی حکوومەت پێنج وەزیرەکەی گۆڕانی ناردەوە ماڵەوە و بۆ شوێنگرتنەوەشیان وەزیرەکانی حکوومەت وەزیری شوێنیان دەگرێتەوە.
13/10/2015}

^{کەناڵی ئاسمانیی (پەیام)ی سەر بە کۆمەڵی ئیسلامیی کوردستان، گۆڕانکاریی بەسەردا دێت و بە قسەی سەرچاوەیەکی نێَو ئەو حزبە، کۆماری ئیسلامیی ئێران، ھاوکاریی کۆمەڵی ئیسلامی دەکات، بۆ گۆڕانکاری و باشترکردنی ئەو دەزگا ئیعلامییەی کۆمەڵی ئیسلامی، کە پێش سەردانەکەی عەلی باپیر بۆ تاران، کۆمەڵی ئیسلامی بانگەشەی بۆ داخستنی ئەو دەزگایە دەکرد، پێشتریش داوای لە خێرخوازان دەکرد ھاوکاریی (پەیام) بکەن، بۆ ئەوەی پەیام پەخشی رانەگرێت، بەڵام بەڕێوەبەری کەناڵەکە سەرلەبەری ئەو قسانە رەت دەکاتەوە.}

^{بەپێی ئەو زانیاریانەی لە سەرچاوەیەک لە کۆمەڵی ئیسلامیەوە بە (باس) دراون، ئێران بەڵێنی بە کۆمەڵی ئیسلامی داوە لە رووی دارایی و تەکنیکییەوە، ھاوکاریی کۆمەڵی ئیسلامی بکات، بۆ دامەزراندنەوەی کەناڵی ئاسمانیی (پەیام) بە مەرجێک بەو شێوەیە ئاراستە بکرێت کە لە بەرژەوەندیی سیاسەتەکانی ئێران بێت لە ھەرێمی کوردستان و}

^{دژی ئەو لایەنە ئیسلامییانە بێت، کە لە رووی فکریی ئایینییەوە لە کۆمەڵی ئیسلامی جیاوازن.}

^{بەپێی زانیارییەکانی ئەو سەرچاوەیەی کۆمەڵ، ئەو بەڵێنە بە خودی عەلی باپیر ئەمیری کۆمەڵی ئیسلامی لە شاری تاران دراوە، پردی پەیوەندیی نێوان ئێران و کۆمەڵی ئیسلامی، بەرپرسێکی باڵَای ئەو کەناڵەیە و خودی ئەمیری کۆمەڵی ئیسلامییش لە دەسەڵاتیدا نییە، ئەو بەرپرسە بگۆڕێت.}

^{بەپێی ھەمان ئەو زانیاریانەی سەرچاوەکە، کەناڵی (پەیام) سیاسەتی کارکردنی دەگۆڕێت و زیاتر وەک کەناڵێکی سیاسی کار دەکات، لە بەرژەوەندیی سیاسەتەکانی ئێران، لە رووی ئایینیشەوە بە جۆرێک دەبێت کە کۆمەڵی ئیسلامی وەک داکۆکیکەری سەرەکی لە ئایینی ئیسلام و حزبی ئیسلامیی سەرەکی دەخاتە ڕوو و دژی ئەو لایەنە ئیسلامییانەی دیکە دەبێت، کە لەرووی فکرییەوە لە کۆمەڵی ئیسلامی جیاوازن.}

^{بەپێی ئەو زانیاریانەی لە کەناڵی (پەیام)یشەوە بە (باس) دراون: ”لەو گۆڕانکارییەشدا کەناڵی (پەیام) کۆمەڵێک کارمەند کە بەھۆی حزبەوە لە ماوەی ڕابردوو لەو دەزگایە کاریان کردووە، ڕەوانەی ماڵەوە دەکاتەوە“.}

^{سەرەتای ساڵی ٢٠١٥ کەناڵی (پەیام) بەھۆی قەیرانی داراییەوە، کارمەندەکانی سەرپشک کرد، کە ئایا ئامادەن بە خۆبەخش کار بکەن، یان دەزگاکە بەجی بھێڵن، چونکە توانای پێدانی مووچەی کارمەندەکانیان نییە، دواتریش لە کەناڵی ئاسمانیی پەیام داوا لە خێرخوازان کرا ھاوکاریی کەناڵی پەیام بکەن بۆ ئەوەی پەخشەکەی ڕانەگیرێت، دوای ئەو ڕاگەیەنراوەش، بەشێک لە لایەنگرانی کۆمەڵ بڕێک پارەیان دایە کەناڵی (پەیام).}

^{دوای کەمتر لە ٥ مانگ، ئەو دەزگایە بە مەبەستی گەورەکردن و گۆڕینی ئامێرەکانی کەناڵەکە و باشترکردنی تواناکان و پێشخستنی لەرووی شێوازی کارکردنەوە، بۆ ماوەیەکی کاتی بڕیاری ڕاگرتنی پەخشی کەناڵی (پەیام) درا.}

^{فاروق عەلی بەرێوەبەری گشتیی کەناڵی ئاسمانیی (پەیام) بە (باس)ی ڕاگەیاند: “ئەوانەی باسی وەرگرتنی ھاوکاری لە ئێران دەکەن، کۆمەڵێک کەسی نەخۆشن” لەبارەی گۆرانکاڕیەکانیش گوتی: ”یەکێک لە بریارەکانی کۆنگرەی شەشەمی کۆمەڵ، ھەڵوەشاندنەوەی مەکتەبی ڕاگەیاندن بوو، دواتریش دروستکردنی تۆرێکی میدیای بۆ کۆمەڵی ئیسلامی ئێستە ئەو بڕیارامە جێبەجێ دەکەین”.}

^{بەڕێوەبەری کەناڵی ئاسمانیی (پەیام) جەختیش لەسەر ئەوە دەکاتەوە: ”ئێمە دەمانەوێت (پەیام) لەگەڵ بارودۆخی سیاسی و ئابووریی ئێستە بگونجێنین و بەشێک لە ئامێرەکانیش کە زیاتر لە ٨ ساڵە کاریان پێ دەکرێت، توانای کارکردنیان نەماوە لە کاتی کارکردنیش نەدەکرا نۆژەن بکرێنەوە، بۆیە بۆ ماوەیەک پەخشەکەمان راگرت تا ئەو ئامێرانە نۆژەن بکەینەوە”.}

^{لەبارەی دەرکردنی کارمەندانیش گوتیشی: “ئێمە تا ئێستە ھیچ کارمەندێک سەدا سەد گرەنتیی مانەوە یان دەرکردنیمان پێ نەداوە، تا ئەو کاتەش ھەر کەسێک تۆانای گۆرانکارییەکانی کەناڵەکە نەبێت، یان پێچەوانەوە، بڕیاری لەسەر مانەوە یان ڕەوانەکردنی دەدرێت“.
13/10/2015}

^{“باراك ئۆباما” سه‌رۆكی وڵاته‌ یه‌كگرتووه‌كانی ئه‌مریكا پێداگری له‌وه‌ كرد كه‌ هاوتا ڕووسییه‌كه‌ی له‌سوریادا جه‌نگه‌كه‌ به‌ڕێوه‌ نابات، باسیشی له‌وه‌ كرد كه‌ كاره‌كته‌ره‌كان زۆرن و چاره‌سه‌رێكی ئاسانیش له‌كایه‌كه‌دا نیه‌.}

^{سه‌رۆكی ئه‌مریكا وه‌ڵامی ئه‌و بانگه‌شانه‌ی دایه‌وه‌ كه‌ پێیان وایه‌ ده‌ستوه‌ردانی ڕووسیا له‌سوریا جۆرێكه‌ له‌ ململانێكردنی ڕابه‌رایه‌تی جیهان له‌ ڕۆژهه‌ڵاتی ناوه‌ڕاستدا. له‌وباره‌یه‌وه‌ به‌كه‌ناڵی “سی.بی.ئێس نیوز”ی ڕاگه‌یاند: ” ئه‌گه‌ر لاوه‌نانی ئابووری وژێر پێ خستنی و ناردنی هێز بۆ هاوكاری كردنی هاوپه‌یمانێك ڕابه‌رایه‌تی بێت، ئه‌وا ئێمه‌ پێناسه‌یه‌كی جیاوازمان هه‌یه‌ بۆ ڕابه‌رایه‌تی”.}

^{ئۆباما جگه‌له‌وه‌ش گوتی: ” بارودۆخ له‌سوریا زۆر ئاڵۆزه‌، چونكه‌ كاره‌كته‌ر و یاریكه‌ره‌كان زۆرن، چاره‌سه‌رێكی ئاسانیش نیه‌ له‌ئارادا”.}

^{به‌ڵام ئۆباما دانی به‌وه‌دانا كه‌ به‌رنامه‌ی مه‌شق پێكردنی هێزه‌كانی سوریا شكستی هێناوه‌.}

^{له‌باره‌ی پرسیارێكه‌وه‌ كه‌ ئایا له‌كاتی چاوپێكه‌وتنی پۆتیندا هیچ ئاماژه‌یه‌كت لابوو له‌سه‌ر ئه‌وه‌ی ڕووسیا هێرش ده‌كات له‌سوریادا؟ سه‌رۆككۆماری ئه‌مریكا گوتی: ” زانیاری هه‌واڵگری به‌هێزمان هه‌بوو له‌سه‌ر ئه‌وه‌ی پۆتین پلانی داناوه‌ بۆ ئه‌وه‌ی هاوكاری سه‌ربازی پێشكه‌شی سه‌رۆكی سوریا بكات. چونكه‌ نیگه‌ران بوون له‌ئه‌گه‌ری ڕووخانی ئه‌سه‌د”.
12/10/2015}