د.محه‌ممه‌د خدر مه‌ولوود
به ئاوڕدانه‌وه‌یه‌كى خێرا له مێژووى ناوچه‌كه و گه‌ڕانه‌وه بۆ رێككه‌وتنى (تالوك) كه به هێڵى تالوك ناو ده‌بردرێت، بۆمان ده‌رده‌كه‌وێت كه هۆكارى هه‌ره‌سه‌ره‌كیى نسكۆى شۆڕشى ئه‌یلوول له 6-3-1975 بۆ رێككه‌وتنى جه‌زائیر ده‌گه‌رێته‌وه، نه‌ك ته‌نیا بوونى كه‌موكوڕى ناوخۆیى نێو شۆڕشى كوردستان. ئه‌یلوول، ئه‌و شۆڕشه‌ى به ماناى وشه‌كه بۆ كورد مه‌زن بوو؛ بێگومان له كاتى سه‌ركه‌وتنىدا هه‌مووان خۆیان لێ ده‌كرد به خاوه‌ن و قاره‌مانى و له شكستیشدا هه‌مووان په‌نجه‌ى كه‌موكوڕییان بۆ مسته‌فا بارزانى ڕابه‌ره‌كه‌ى درێژ ده‌كرد، تا حاڵ به‌وه بگات خودى كور دخۆى، تا ئه‌وێ رۆژێ شكست یا نسكۆى شۆڕش به چه‌ندین ناو و ناتۆره ناوزه‌د بكه‌ن و نه‌ك ڕه‌خنه، به‌ڵكو قسه‌ى نه‌شیاویش بهۆننه‌وه.ئه‌مڕۆ كه41 ساڵ به‌سه‌ر ئه‌و رێككه‌وتنه شومه‌ى جه‌زائیردا تێده‌په‌ڕێت، ناوچه‌كه به گشتى و نێوانى هه‌رسێ نه‌ته‌وه‌ى باڵاده‌ستى (تورك، فارس و عه‌ره‌ب) له‌لایه‌ك و كورد له‌نێوان خۆى له باشوورى كوردستاندا له‌نێو كیانى سیاسیى هه‌رێمى خۆیدا، تاڵاوى 6ى ئازار ده‌نۆشن كه ده‌رئه‌نجامى چاره‌سه‌رنه‌كردنى گرفتێكى دێرینى نێوان هه‌ردوو ده‌وڵه‌تى عوسمانلى و ئێرانى له دواى رێككه‌وتنى ئه‌رزه‌رۆم له ساڵى 1847ى زاینى به سه‌رپه‌رشتى رووسیاى قه‌یسه‌رى
