^{ئازا حەسیب قەرەداخی}

^{هێشتا، كە شەڕی جیهانی ئازاد بەگشتی و هەرێمی كوردستان بەتایبەتی، لەگەڵ داعش بەردەوامە، ئەم پرسیارە ئیلحاحمان لێ دەكات: ئایا پاش تێكشكاندنی داعش لە عێراق و شام، ئەگەری سەرهەڵدانەوەی گرووپی تیرۆریست و توندڕۆی هاوشێوەی داعش چەندە و چۆنە؟!
(مەسرور بارزانی) راوێژكاری ئەنجوومەنی ئاسایشی هەرێمی كوردستان لە دیدارێكیدا لەگەڵ تەلەفزیۆنی Viceی ئەمەریكیدا دەڵێ: ئەگەر كێشەكانی ناوچەكە لە رەگوڕیشەوە چارەسەر نەكرێن، لەوانەیە لە ئایندەدا گرووپی هاوشێوەی داعش‌ دەربكەوێتەوە.ئەم پێشبینییە، لەسەر بناغەی تێڕوانین و حیسابكردن بۆ هۆكارەكانی سەرهەڵدانی كولتوور و رەفتاری توندوتیژی لەم ناوچەیەدا دامەزراوە. هۆكارەكانیش كۆمەڵایەتی و ئابووری و سیاسی و ئایینی- مەزهەبین.لە عێراقدا دوای رووخاندنی رژێمی بەعس، سوننەكان خۆیان خستە پەراوێزی پرۆسەی سیاسییەوە و لاتەریك وەستان و نیازیان بوو بە بەرخودانی میللی "حكوومەت و دەسەڵاتی داگیركاریی ئەمریكا و هاوپەیمانەكانی"!! بڕووخێنن و جارێكی دیكە هەژموونی سیاسی سوننە بونیات بنێنەوە. ئەم شەڕە بووە زەمینەی لەبار بۆ هاتنی رێكخراوی ئەلقاعیدە و تەحویل بوونی ناوچە سوننەنشینەكان بۆ موڵگەی تیرۆریستان كە دواجار ئەوەندەی لە سوننەكانیان كوشت زۆر زیاتر بوو لەوانەی لە شیعەیان كوشت. بۆیە عەشایەری سوننە لەگەڵ ئەمریكییەكان و حكوومەتی عێراق هێزی سەحوەیان پێكهێنا و قاعیدەیان لەناوبرد.
بەڵام چەوسانەوەی شیعە بۆ سوننە و پەراویزخستن و غەدری زۆر لێیان لەلایەن حكوومەتەكەی مالیكییەوە وای كرد رێكخراوی داعش لەناویاندا پەیدا بێت. كەواتە تا حكوومەتێك لە بەغدا بێت "شەراكەت" قبووڵ نەكات و پێی وابێ مادەم شیعە زۆرینەیە و دەبێ حوكمڕان بێ و بەشی ئەوانی دیكە بدات وەكو "بەشدار"، هۆكار و زەمینەی دروستبوونەوەی توندوتیژی و تیرۆر هەردەمێنێ.
تا حكوومەتێك لە بەغدادا بێت لە بری لەشكرێكی نیشتمانی،حەشدی شەعبی لەو ناوچانەی لەدەست داعش ئازاد دەكرێن، باڵادەست بكات و ئەوانیش خەڵكەكەی لەسەر ناسنامە و نەتەوە بكوژن و بچەوسێننەوە و راگوێزن، ئەوا هۆكار و بیانووی سەرهەڵدانەوەی داعشێك و قاعیدەیەكی دیكە هەردەمێنێ.
كە بە پێی داتاكانی وەزارەتی پلاندانانی عێراق، رێژەی هەژاریی لە عێراقدا " بە بێ هەرێمی كوردستان" تا كۆتایی ساڵی پار 30%ی تێپەڕاندبێ.
كە رێژەی بێكاریی"بە بێ هەرێمی كوردستان" تا كۆتایی پار، 25%ی تێپەڕاندبێ. كە لە وڵاتانی عەرەبیدا 33 ملیۆن كەس لە خوارووی هێڵی هەژارییەوە بن.
كە كوشتن و سەربڕین و راگواستن لەسەر ناسنامە و ناو و مەزهەب پەیڕەوێكی رۆژانە بێ. واتە لە عێراق و ناوچەكەماندا كەرەستەی خاوی كاركردنی كارگەی بەرهەمهێنانی تیرۆر و توندوتیژی هەر دەمێنێ.
لە هەرێمی كوردستانیشدا، سەرەڕای ئەوەی كە بەڵگەكان دەیسەلمێنن تیرۆر بەرهەمێكی كوردستانی نییە و لە دەرەوە بەگشتی و بە تایبەتیش لەو وڵاتانەوە بۆمان رەوانە دەكرێن كە نیشتمانی كوردستانیان داگیركردووە، بەڵام بە شێوەیەكی رێژەیی كۆمەڵگای ئێمەش بێ بەش نییە لە بەگەڕخستنی ئەو كارگە مەترسیدارە.
كاتێك حزب و كەسانی ئیسلامەوی دەست لەگەڵ ئەجندای گوماناوی دژی كوردستانیی تێكەڵ دەكەن، واتە دەبنە داینەمۆی جموجوڵی توندڕۆیی دژی میللەتەكەمان.
كاتێك بانگخوازێك دەڵێ وەرگرتنی ئیقامە لە ئەوروپا و وڵاتانی كافر حەرام و كوفرە. لەسەر ئەو بنەمایەی كە گوایە پێغەمبەر (د.خ) فەرموویەتی: نابێ موسڵمان دراوسێی نەسارە و یەهود، واتە كافران بێ و دەبێ ماڵی موسڵمان ئەوەندە دوور بێ لەوانەوە كە رووناكی ئاگریان نەبینێ، ئەوە ئەم بانگخوازە كولتوور و هوشیاری دژی هەموو غەیرە موسڵمانان بڵاودەكاتەوە و دەبێتە هەڕەشە لەسەر بنەماكانی پێكەوه‌ژیانی ئاشتەوایی كە كۆمەڵگای كوردستانی پێناسراوە و بۆتە شانازی بۆی لە ناوچەكە و جیهاندا.
كاتێك "مەلا كرێكار" هاوار دەكات؛ پێویست ناكات هەموو جارێ بۆ كوشتنی پارتییەك یان یەكێتییەك بگەڕێنەوە بۆ من فەتواتان بدەمێ، بیانكوژن و ئەجرەكەی مسۆگەر بكەن، كەواتە فەتوای كوشتن كراوەیە. خۆ ئەگەر مەلا كرێكار بڵێ ئەوە چەند ساڵ پێشتر وتوومە، دەبێ وەڵام بدرێتەوە كە ئیبن تەیمیە و سەید قوتب و ئەوانی دیكەیش بە هەزار ساڵ و چەندین ساڵ پێشتر فەتوایان داوە یان لێكدانەوەیان كردووە، بەڵام ئێستا دەقاودەق بەكاردەهێنرێنەوە بۆ شەرعییەت دان بە كوشتن و سەربڕین.
كاتێك نەورۆز بە جەژنی كافران دادەنرێ و هاوار بۆ موسڵمانان دەكرێ بەشداری لە ئاهەنگەكانی نەورۆزدا نەكەن، كەواتە مافی ئەوەیشیان دەدرێتێ كە تێكی بدەن و ئەوانەی بەشداری تێدا دەكەن تەكفیر بكەن.
كاتێك مەلایەك بڵێ لەبەركردنی پانتۆڵ لەلایەن ئافرەتەوە كوفر و حەرامە، واتە هانی كولتوور و رەفتاری توندوتیژ دەدات بەرامبەر ژنان.
كاتێك مەلایەك زانكۆكانی كوردستان بە " رووتكۆ" وەسف دەكات واتە هانی كولتووری نەخوێندنی ئافرەتان و داخستنی زانكۆكان بە رووی ئافرەتاندا دەدات و لەناو زانكۆشدا كوڕان بە گژ كچاندا دەكات چونكە ئەوە كچەكانن رووت بوونەتەوە.
تا ئەم هۆكارانە و سەدانی تریش لە ئارادابن، واتە كارگەی دروستكردنی فیكر و رەفتاری توندوتیژی و تیرۆر هەر دەمێنێ. شەڕكردن لەگەڵ تیرۆر و توندڕۆیی تەنیا سەربازی و ئەمنی نییە. بەڵكو شەڕێكی كولتووری و ئابووری و سیاسی و كۆمەڵایەتی و پەروەردەییشە. جا كە ئێمە خەریكی بیناكردنی كوردستانێكی سەربەخۆین، كەواتە دەبێ سیاسەت و بەرنامەی شەڕی توندڕۆییمان لەو هەموو بوارانەدا هەبێ.
واتە لە ریشەوە هۆكارەكانی دروست بوونی تیرۆر هەڵكێشن. لە سەرچاوەكانیانەوە فیكری توندڕۆیی لەناوببەین. پێكەوەژیان بە گیان بپارێزین. ژنانمان بكەینە بەشێكی راستەقینە و كاریگەر لە مەنزومەی حوكمڕانی و یاسادانان و پێشمەرگە و بەرگری و چەندین هەنگاوی دیكە بۆ بنەبڕكردنی سەرچاوەكانی گەندەڵی ئیداری و ئابووری بنێین. سیاسەتێكی روونمان هەبێ بۆ گەشەكردنی هەمەلایەنە و پێشكەشكردنی خزمەتگوزاری و بەرەنگاربوونەوەی ئەگەرەكانی زیاتر بوونی رێژەی هەژاری و بیكاری و بەلاڕێدا بردنی پرۆسەی خوێندن و پەروەردە.
13/4/2016
سەرچاوە: KDP.info}