^{فەرماندەی هێزەکانی سوریای دیموکراتیک، مەزڵوم عەبدی ڕایدەگەیەنێت پێشوازی لە پەیامە مێژووییەکەی ڕێبەری پەکەکە عەبدوڵا ئۆجەلان دەکەن.}

^{عەبدی ڕۆژی پێنجشەممە لە پەیامێکیدا ڕایگەیاند " پێشوازی لە ڕاگەیاندنە مێژووییەکەی سەرۆک عەبدوڵا ئۆجەلان دەکەین کە داوای کۆتایی هاتنی شەڕ لە تورکیا و کردنەوەی دەرگای پرۆسەی سیاسی ئاشتی دەکات."}

^{عەبدی دەشڵێت " ئەم ڕاگەیاندنە مێژووییە دەرفەتێکە بۆ بونیاتنانی ئاشتی و کلیلی کردنەوەی دەرگای پەیوەندی ڕاست لە ناوچەکە."
هەر ئەمڕۆ مەزڵوم عەبدی لە میانەی کۆنفرانسێکی ڕۆژنامەوانی ئۆنلایندا لە واشنتن ڕایگەیاند "سەرۆکی پەکەکە پەیامێکی ناردووە و بۆچوونەکانی خۆی ڕوونکردەوە، ئێمە بە ئەرێنی سەیری دەکەین".}

^{لە کۆنگرەکەی ناشناڵ پرێس کڵەب عەبدی لە وەڵامی پرسیارێکی دەنگی ئەمەریکا سەبارەت بە کاریگەریی ئەو پەیامە لەسەر هێزەکانی سوریای دیموکراتیک گوتی پەیامەکەی ئۆجەلان شتێکی باشە " بەڵام هیچ پەیوەندییەکی بە ئێمەوە وەکو هەسەدە ( هێزەکانی سوریای دیموکراتیک)نییە" بەڵام نکوڵی لەوە نەکرد کە کاریگەریی بەسەر ناوچەکەی ئەوانیشەوە دەبێت "بڕوام وایە ئاگربەستی نێوان پەکەکە و تورکیا و دەستەبەرکردنی ئاشتی کاریگەری لەسەر ناوچەکەمان دەبێت".}

^{ڕێبەری پارتی کرێکارانی کوردستان عەبدوڵا ئۆجەلان ڕۆژی پێنجشەممە پەیامە چاوەڕوانکراوەکەی بڵاو کردەوە و تیایدا داوای لە پەکەکە کرد خۆی هەڵبوەشێنێتەوە لە چوارچێوەی هەوڵێکی نوێ بۆ کۆتاییهێنان بە ململانێیەکی درێژخایەن کە بووەتە هۆی گیانلەدەستدانی دەیان هەزار کەس لە ماوەی نزیکەی 40 ساڵی ڕابردوودا.}

^{ئۆجەلان ڕۆژی پێنجشەممە لە پەیامێکدا لە زیندانی دوورگەی ئیمرالی گوتی پێویستە پارتی کرێکارانی کوردستان یان پەکەکە کۆنگرە ببەستێت و بڕیاری هەڵوەشاندنەوە بدات.}

^{ئۆجەلان لە پەیامەکەیدا کە لەلایەن شاندی دەم پارت بڵاو کرایەوە بە پەکەکەی ڕاگەیاند "کۆنگرەی خۆتان بکەن و بڕیار بدەن، دەبێت هەموو گروپەکان چەک دابنێن و پەکەکە خۆی هەڵبوەشێنێتەوە".}

^{گوتیشی " ئەو چارەسەرانەی لەسەر بنەمای نەتەوەپەرستیی توندڕەو بنیاتنراون، وەک دامەزراندنی دەوڵەتێکی نەتەوەیی جیاواز، یان فیدراڵی، یان ئۆتۆنۆمی، یان چارەسەری کولتووری، پێداویستییەکانی مافە کۆمەڵایەتییە مێژووییەکانی کۆمەڵگە دابین ناکەن.}

٢٨/٢/٢٠٢٥