<sup>رۆژنامه‌ی هائارێستی ئیسرائیلی له‌ زاری چه‌ند سه‌رچاوه‌یه‌كی هه‌واڵگریی وڵاته‌كه‌ی گواستووه‌ته‌وه،‌ كه‌ "ته‌لئه‌بیب هاوكاریی سه‌ربازیی به‌ره‌ی نوسره‌ی سه‌ر به‌ قاعیده‌ له‌ ناوچه‌ی جۆلانی سوریا ده‌كات و له‌به‌رامبه‌ریشدا به‌ره‌ی نوسره‌ زانیاریی هه‌واڵگریی ده‌داته‌ ئیسرائیل".

تسفی برئیل، شرۆڤه‌كاری سه‌ربازیی رۆژنامه‌كه‌ رایگه‌یاندووه‌، "به‌پێی راپۆرته‌ هه‌واڵگرییه‌كان ئیسرائیل هاوكاریی ئۆپۆزیسیۆنی سووریا له ‌ناوچه‌ی جۆلان و ئه‌ندامانی به‌ره‌ی نوسره‌ ده‌كات و له‌به‌رامبه‌ریشدا ئه‌وان زانیاریی هه‌واڵگرییان پێده‌ده‌ن".

ئه‌و شرۆڤه‌كاره‌ سه‌ربازییه‌ی ئیسرائیل دان به‌وه‌دا ده‌نێت، كه‌ وڵاته‌كه‌ی "له ‌ناوچه‌كانی باشووری سووریا مه‌شق و راهێنان به‌و چه‌كدارانه‌ ده‌كات و هاوكاریی سه‌ربازییان ده‌كات".</sup>

رووداو- هائارێتس

^25/1/2015

<sup>وزیری دەرەوەی ئێران هۆشداری دەدات لە شكستهێنانی دانوستاندنە ئەتۆمییەكانی ئەو وڵاتە لەگەڵ وڵاتە زلهێزە رۆژئاواییەكان و دەڵێت، "ئەگەر كۆنگرێسی ئەمەریكا ئابڵۆقەی نوێ لە دژی ئێران پەسەند بكات، دانوستاندنە ناوەكییەكانی ئێستا شكست دێنێت".

محەممەد جەواد زەریف، وەزیری دەرەوەی ئێران كە بۆ بەشداریكردن لە كۆڕبەندی ئابووریی داڤۆس لە سویسرایە، دەڵێت، "هەر گۆڕانكارییەك لە دۆخی ئێستا دەبێتە هۆی كۆتاییهێنان بەو رێككەوتنە سەرەتاییەی، كە زیاتر لە ساڵێكە لە ژنێڤ بەدەستهاتووە." 

محەممەد جەواد زەریف جەختیشیكردەوە لەوەی، كە" پەسەندكردنی ئابڵۆقەی نوێ لەسەر ئێران، دەكرێت لەلایەن پەرلەمانی ئێرانەوە پەرچەكرداری لێبكەوێتەوە".

ژمارەیەك لە ئەندامانی كۆنگرێسی ئەمریكا رایانگەیاندووە، كە سەرقاڵی تاوتوێكردنی ئابڵۆقەدانی زیاتری ئێرانن، هەرچەندە ئەو هەنگاوەی ئەوان لەلایەن حكومەتی ئەمریكاوە رەتكرایەوە و باراك ئۆباما، سەرۆكی ئەمریكا رایگەیاند، كە پەسەندكردنی هەر پڕۆژەیاسایەكی نوێ لەلایەن كۆنگرێسی ئەمریكاوە لەسەر ئەو پرسە، ڤیتۆ دەكات.

وەزیری دەرەوەی ئێران هەروەها پێیوایە، کە "هەر كەس یان گرووپێك بیەوێت ئەو رێككەوتنانەی، كە تاوەكو ئێستا بەدەستهاتووە، شكست پێبهێنێت، دەبێت لەلایەن كۆمەڵگەی نێودەوڵەتی پەراوێز بخرێت جا ئەوە كۆنگرێسی ئەمریكا بێت یان هەر كەسێكی دیكە".

هەروەها رۆژی رابردوو وەزیرانی دەرەوەی ئێران و ئەمریكا لە زوریخی سویسرا كۆبوونەوە و زەریف لەوبارەوە گوتی، "لە كۆبوونەوەكەی رۆژی هەینی لەگەڵ جۆن كێری، سەبارەت بە بەهێزكردن و بەپەلەبوون لە دانوستاندنەكان بە مەبەستی رێگریكردن لەو ئاستەنگانەی دێنە پێش، قسەكرا".</sup>

^24/1/2015

<sup>مەسعود بارزانی، سەرۆكی هەرێمی كوردستان بەبۆنەی كۆچی دوایی ژنێكی بنەماڵەی قازی لە مهاباد، پەیامێك ئاڕاستەی ئەو بنەماڵەیە دەكات و سەرەخۆشییان لێدەكات.

دەقی پەیامەكەی سەرۆكی هەرێمی كوردستان:

برای بەڕێز كاك مستەفای قازی و بنەماڵەی بەڕێزی قازی لە مەهاباد

بەداخەوە هەواڵی كۆچی دوایی كوبرا خانمی قازی، هاوسەری كاك مستەفای قازی و دایكی شەهید عەلی قازی - مان پێگەیشت.

لەم بۆنە خەمناكەدا پرسە و سەرەخۆشیی خۆم بە ئێوەی بەڕێز و خانەوادە تێكۆشەرەكەتان و سەرجەم خزم و كەسوكار و خەڵكی نیشتیمانپەروەری شاری مەهاباد رادەگەیەنم و بەشداری خەمتانم.

لە خودای گەورە داواكارم خوالێخۆشبوو بباتە بەر دلۆڤانیی خۆی و دڵنەوایی و ئارامییش بە گشت لایەك ببەخشێت.

انا لله و انا الیه راجعون

مەسعود بارزانی
سەرۆکی هەرێمی کوردستان</sup>

^24/1/2015

<sup>ڤیدیۆیەکی ماوە کورتی یەک خولەکی چەند رۆژێکە لە ئەڵمانیا بووەتە رۆژەڤ، لە ڤیدیۆکەدا کە لەچیای شنگال تۆمارکراوە سیاسەتڤانێکی ئەڵمانی دەردەکەوێت، کە لە رێگەی مووشەکەوە پرسیاری خۆی بۆ داعش دەنێرێت و لەماوەی دوو رۆژدا ڤیدیۆکە لە ئەڵمانیا زیاتر لە ٣٠٠ هەزار بینەری هەبووە.

تۆبیاس هووخ ئەو سیاسەتمەدارە ئەڵمانیەیە کە بۆ چاوپێکەوتن لەگەڵ داعش رێگەیەکی نوێی دۆزیووەتەوە و ئەو هەڵوێستەی خۆی وەک وەڵامێک بۆ رۆژنامەنووسی بەناوبانگی ئەڵمانی یورگن تودن هوفەر نیشاندەداو رەخنە لەو رۆژنامەنووسە دەگرێت، کە پلاتفۆرمێکی داوەتە داعش بۆئەوەی بانگەشە بۆ خۆی بکات.

یورگن تودن هوفەر لەسەر داوای داعش لە کۆتایی ساڵی رابردوو بۆماوەی زیاتر لە هەفتەیەک لە ناوچەکانی ژێر دەسەڵاتی داعش گەڕاوە و لە موسڵ دیدارێکی تایبەتی لەگەڵ ئەندامێکی داعش بە رەچەڵەک ئەڵمانی ئەنجامدابوو، کە لە ئەڵمانیا دەنگۆی زۆری لەسەر هەبوو.

لە ڤیدیۆکەدا توبیوس هووخ شێوازی دیدارەکەی یورگن تودن هوفەر کە لەگەڵ داعشێک ئەنجامیداوە دەخاتە بەر رەخنە و لە روانگەی خۆیەوە شیدەکاتەوە، کە پێویستە چۆن پرسیار ئاراستەی داعش بکرێت. لە ڤیدیۆکەدا کە توبیاس هووخ بە جلی سەربازییەوە لەسەر چیای شنگالە، دەڵێت: "ئێستا من نیشانی ئێوەی دەدەم کە دەبێت چۆن دیدارێکی بە کەڵک لەگەڵ داعش ئەنجام بدەی و لە داعش بپرسین کە ئایا ئەو کردەوانەی ئەوان دەیکەن بە بڕوای ئەوان ئەوە کردەوەی ئیسلامیەتە؟". دواتر تۆبیاس هووخ بە پێنووسەکەی پرسیارەکەی خۆی لەسەر مووشەکێک دەنووسێت و دەڵێت"لە رۆژانی داهاتوودا ئەو پرسیارە دەگەیێنین بە ئەوان و بزانین وەڵامی ئەوان چی دەبێت".
 
ئەو ڤیدیۆ ماوە کورتە لەناو میدیای ئەڵمانیدا دەنگیداوەتەوە و تەنانەت حیزبی (FDP) ئەڵمانیش، کە حیزبەکەی تۆبیاس هووخە ناچار بە روونکردنەوە کرد.

لە روونکردنەوەی حیزبەکەی تۆبیاس هووخدا هاتووە، کە ئەوان وەکو حیزب لەگەڵ ئەو ڤیدیۆیەدا نین، بەڵام رێزیش لە بۆچوونی ئەندامەکانی خۆیان دەگرن.

تۆبیاس هووخ لە ئەکاونتی تایبەتی خۆیشی لە فەیسبووک بڵاویکردووەتەوە، کە لەسەر ڤیدیۆکە زۆر نامەی بۆ هاتووە و لەسەدا ٩٥یان زیاتر پشتگیری ئەو هەڵوێستەی ئەویان کردووە.
 
سیاسەتڤانی ئەڵمانی تۆبیاس هووخ و رۆژنامەنووسی ئەڵمانی ئیننو لینزە بۆ ئاگادار بوون لە رەوشی ناوچەکە هاتبوونە باشووری کوردستان و بەتایبەتیش سەردانی شنگالیان کردبوو، ئێستا ئەوان سەرقاڵی ئامادەکردنی راپۆرتێکن لەسەر سەردانەکەیان بۆ باشووری کوردستان.

هەروەها ئەوان لەرێگەی بڵاوکردنەوەی چەند ڤیدیۆ و وێنەیەکەوە هەوڵیاندابوو راپۆرتێکی بەرنامەی مۆنیتۆری تەلەڤزیۆنی (ARD) ی ئەڵمانی بە درۆبخەنەوە، کە رایانگەیاندبوو شوێنی بەکارهێنانی ئەو چەکانە دیار نییە کە ئەڵمانیا بە پێشمەرگەی داون. تۆبیاس هووخ و ئیننو لینزە دوای هاتنیان بۆ باشووری کوردستان بەرنامەی مۆنیتۆریان بەوە تۆمەتبارکرد کە بەباشی بەداوی بابەتەکاندا ناچن.

تۆبیاس هووخ و ئیننو لینزە دوو گەنجی چالاکڤانی ئەڵمانین کە بەردەوام پشتگیری دۆزی کورد دەکەن ،هەروەها ماوەکیشە تۆبیاس هووخ لەگەڵ گوینتەر فۆلکەر کە خاوەنی چێشتخانەیەکی ئەڵمانیە لە هەولێر کەمپەینێکیان لەژێر ناوی (ئاو بۆ پەنابەرانی کوردستان) راگەیاندووە بۆ کۆکردنەوەی هاوکاری بەتایبەتی ئاو بۆ ئەو پەنابەرانەی لە باشووری کوردستانن و تا ئێستاش زیاتر لە یەک ملیۆن بوتڵ ئاویان بۆ پەنابەران کۆکردووتەوە.</sup> 

^24/1/2015

<sup>گوتەبێژی وەزارەتی دەرەوەی ئەمریکا دەڵێ "عەبادی نوێنەری هەموو عێراقە". ئەم لێدوانە وەڵامێک بوو بۆ پەیامنێری تۆڕی میدیایی رووداو لە پرێس کۆنفرانسێکدا، کاتێک پرسیاری بانگهێشتنەکردنی  هەرێمی کوردستانی لێکرد بۆ کۆبوونەوەکەی لەندەن.

رۆژی پێنجشەممە 22/1/2015 ، لە شاری لەندەنی پایتەختی بەریتانیا کۆنگرەی وڵاتانی هاوپەیمانی دژی داعش بەڕێوەچوو. هەرێمی کوردستان بانگهێشتی ئەو کۆبوونەوەیە نەکرا، بۆیە هەمان رۆژ مەسعود بارزانی سەرۆکی هەرێمی کوردستان پەیامێكی ناڕەزایی بڵاوکردەوە.

لە پەیامەكەیدا بارزانی دەڵێ: " ئێمە چاوەڕێی ئەوەمان دەكرد هەموو لایەك رێز لە قوربانیدانی گەلی كوردستان و قارەمانێتیی پێشمەرگە بگرن و داوای بەشداربوونی نوێنەری كوردستان لەم كۆنگرەیە و كۆنگرە هاوشێوەكان بكەن. هیچ گومانێك لەوەدا نییە كە ئێستا كاریگەرترین هێز كە بەشێوەیەكی راستەوخۆ و كردەیی رووبەڕووی تیرۆریزمی جیهانی بووەتەوە هێزی پێشمەرگەی كوردستانە".

نامۆ عەبدوڵڵا، پەیامنێری تۆڕی میدیایی رووداو ئەمڕۆ ئەو ناڕەزاییەی بارزانی کردە پرسیار و لە پرێسکۆنفرانسی وەزارەتی دەرەوەی ئەمریکادا ئاراستەی جێن ساکی گوتەبێژی ئەو وەزارەتەی کرد، بەڵام ئەو سەرەتا ئامادە نەبوو وەڵامبداتەوە. سووربوونی پەیامنێرەکەی رووداو لەسەر پرسیارەکەی بۆ وەرگرتنی وەڵام، وایکرد جێن ساکی بە گرژییەوە بڵێ: "بەڵێ، حەیدەر عەبادی نوێنەری هەموو خەڵکی عێراقە".

پەیامنێری رووداو : نامۆ عەبدوڵڵا</sup>

^24/1/2015

<sup>بەرپرسێكی پارتی رایدەگەیێنێت، بەهۆی شکستهێنانیان لە شەڕی وانکێی نزیک شاری موسڵ بەرامبەر پێشمەرگە، شەڕی نێوخۆیی لەنێوان چەكدارانی داعش دروستبووە و 25 چەكداریان لەیەك كوشتوون.

سەعید مەموزینی، بەرپرسی راگەیاندنی لقی 14 ی پارتی دیموکراتی کوردستان لە موسڵ بە تۆڕی میدیایی رووداوی راگەیاند، لە شەڕی کۆنترۆڵکردنەوەی سنووری وانکێ تا ئێستا 121 چەکداری داعش کوژراون کە 11 یان بیانین و خەڵکی شیشان، ئەفغانستان، پاکستان و سعودیەن، بەشێك لەو تەرمانەش كەوتوونەتە دەست پێشمەرگە.

بە گوتەی مەموزینی، ئەو شکستەی داعش بووەتە هۆی دروستبوونی شەڕێکی ناوخۆیی لەناو داعش بە تایبەت لەناو گرووپی نەقشبەندی. دەشڵێت "لەو شەڕەدا 23 چەکداریان لە یەکدی کوشتوون".

مەموزینی زیاتر دەڵێت رێكخراوی داعش ئێستا لەناو موسڵ دەستی بە تەقاندنەوەی باڵەخانەکان کردووە و خەڵکێکی زۆریشیان دەستگیرکردووە بە بیانوی ئەوەی بە شکستی داعش دڵخۆشییان دەربڕیوە.

بەرپرسی راگەیاندنی لقی 14 ی پارتی ئاماژە بۆ ئەوە دەكات رەوشی ئابووری شاری موسڵ لە قەیرانێکی گەورەدایە و بژێوی لە ئاستێکی زۆر نزمدایە، ئەمە لە کاتێکدا چەکدارانی داعش ستەمێکی زۆر لە خەڵکی ناوچەکە دەکەن و تەنانەت لەسەر سەیرکردنی یاری تۆپی پێش سزا بەسەر منداڵان دەسەپێنن.</sup>

^23/1/2015

<sup>بەپێی راگەیێندراوێک کە لە سەرۆکایەتی کۆماری تورکیاوە بڵاوکراوەتەوە، رەجەب تەییب ئەردۆغان، سەرۆککۆماری تورکیا لە ئەسیوپیاوە دەچێتە ریاز و بەشداری رێوڕەسمی بەخاکسپاردنی شا عەبدوڵڵا بن عەبدولعەزیز دەکات.

هاوکات بەپێی سەرچاوەکان لە سەرۆکایەتی کۆماری تورکیاوە، رەجەب تەییب ئەردۆغان، سەرۆککۆماری تورکیا کە ئێستا لە ئەسیوپیایە، بڕیاربوو ئەمڕۆ لەوێوە بچێتە سۆماڵ، بەڵام بەهۆی هەواڵی کۆچی دواییکردنی شای سعودیە لە ئەسیوپیاوە دەچێتە ریاز، بۆ بەشداریکردن لە مەراسیمی بەخاکسپاردنی شا عەبدوڵلا بن عەبدولعەزیز.

دوای ئەوەی ئەردۆغان دەچێتە سعودیە و لە ریاز بەشداری رێورەسمی بەخاکسپاردنی شای ئەو وڵاتە دەکات، دووبارە دەگەڕێتەوە ئەفریقا و سەردانی کۆماری جیبۆتی دەکات.

بڕیاربوو ئەمڕۆ دوای کۆتاییهاتنی سەردانەکەی بۆ ئەسیوپیا، رەجەب تەییب ئەردۆغان سەردانی سۆماڵ بکات، بەڵام مردنی شای سعودیە ئەوی لە ئەفریقاوە هێنایەوە سعودیە. بڕیاربوو ئەردۆغان دوای سەردانەكەی بۆ جیبۆتی، سبەی هەینی 23/01/2015 سەردانی سۆماڵ بكات، بەر لە چوونی خۆیشی شاندێكی رەوانەی مەقادیشۆ كردبوو.

بەڵام لە مەقادیشۆی پایتەختی سۆماڵ، ئۆتۆمبێلێكی بۆمبڕێژكراو بەو شاندەدا تەقییەوە. بەپێی زانیارییەكان 5 كەس لە ئەنجامی روودانی تەقینەوەكە كوژراون و ژمارەیەكیش برینداربوون.</sup>

rudaw

^23/1/2015

<sup>مەسعود بارزانی، سەرۆكی هەرێمی كوردستان پەیامێكی ناڕەزایی لەبەرامبەر بانگهێشت نەكردنی كوردستان بۆ كۆنگرەی لەندەن كە تایبەتە بەو وڵاتانەی لەگەڵ رێكخراوی داعش لەشەڕدان بڵاودەكاتەوە و دەڵێت جێگەی دڵگرانیی ئێمەیە كە شەهیدبوون و قوربانیدان بەشی خەڵكی كوردستان بێت و ئیعتبارەكەش بۆ خەڵكی دی هەژماربكرێت.

لە پەیامەكەیدا بارزانی رایدەگەیێنێ،" ئێمە چاوەڕێی ئەوەمان دەكرد هەموو لایەك رێز لە قوربانیدانی گەلی كوردستان و قارەمانێتیی پێشمەرگە بگرن و داوای بەشداربوونی نوێنەری كوردستان لەم كۆنگرەیە و كۆنگرە هاوشێوەكان بكەن. هیچ گومانێك لەوەدا نییە كە ئێستا كاریگەرترین هێز كە بەشێوەیەكی راستەوخۆ و كردەیی رووبەڕووی تیرۆریزمی جیهانی بووەتەوە هێزی پێشمەرگەی كوردستانە".

سەرۆكی هەرێمی كوردستان ناڕەزایەتی خۆیی و خەڵكی كوردستان ئاراستەی رێكخەرانی ئەم كۆنگرەیە دەكات و دەڵێت،"خەڵكی كوردستان شایانی ئەوەیە لەمجۆرە دانیشتنە نێودەوڵەتیانەدا نوێنەری خۆی هەبێت كە گوزارشت لە واقع و بیروبۆچوونەكانی گەلی كوردستان و پێشمەرگە قارەمانەكان بكات. قورسایی ئەم بارودۆخە لەسەر شانی گەلی كوردستانە و هیچ كەس و لایەنێك ناتوانێ نوێنەرایەتیی خەڵكی كوردستان بكات و دەنگی راستەقینەی خەڵكی كوردستان لە كۆڕ و كۆبوونەوە نێودەوڵەتییەكان بگەیێنێت".

رۆژی پێندجشەممە 22/1/2015 ، لە شاری لەندەنی پایتەختی بەریتانیا کۆنگرەی وڵاتانی هاوپەیمان دژی داعش بەڕێوەچوو و دواتر حەیدەر عەبادی، سەرۆکوەزیرانی عێراق لەگەل هەردوو وەزیرانی دەرەوەی ئەمریکا و بەریتانیا کۆنگرەیەکی رۆژنامەوانی ئەنجامدا.

دەقی پەیامەكەی بارزانی:


بەناوی خودای مەزن و دلۆڤان

كۆنگرەی لەندەن كە تایبەتە بەو وڵاتانەی لەگەڵ ڕێكخراوی تیرۆریستیی داعش لەشەڕدان، لەكاتێكدا دەبەسترێت كە كوردستان لەشەڕێكی ڕاستەوخۆ و توند دایە بەرانبەر تیرۆریستانی داعش و ڕۆژانە بە خوێنی گەشی پێشمەرگە قارەمانەكان، شكستی گەورە تووشی تیرۆریستانی داعش دەبێت.

لەدوای پەلاماری تیرۆریستانی داعش، پێشمەرگە بەخوێنی خۆی سەدانهەزار ئاوارە و پێكهاتە نەتەوەیی و ئایینییەكانی پاراستووە و چەندین ناوچەی بەرفراوانی بە بێ ڕەچاوكردنی پێكهاتەی دانیشتوانی ئەم ناوچانە لەدەست تیرۆریستان ڕزگار كردووە.

ئێمە چاوەڕێی ئەوەمان دەكرد هەموو لایەك ڕێز لە قوربانیدانی گەلی كوردستان و قارەمانێتیی پێشمەرگە بگرن و داوای بەشداربوونی نوێنەری كوردستان لەم كۆنگرەیە و كۆنگرە هاوشێوەكان بكەن. هیچ گومانێك لەوەدا نییە كە ئێستا كاریگەرترین هێز كە بەشێوەیەكی ڕاستەوخۆ و كردەیی ڕووبەڕووی تیرۆریزمی جیهانی بووەتەوە هێزی پێشمەرگەی كوردستانە.

لێرەدا ناڕەزایەتی خۆمان و خەڵكی كوردستان ئاراستەی ڕێكخەرانی ئەم كۆنگرەیە دەكەین و جێگەی دڵگرانیی ئێمەیە كە شەهیدبوون و قوربانیدان بەشی خەڵكی كوردستان بێت و ئیعتبارەكەش بۆ خەڵكی تر هەژمار بكرێت. خەڵكی كوردستان شایانی ئەوەیە كە لەمجۆرە دانیشتنە نێودەوڵەتیانەدا نوێنەری خۆی هەبێت كە گوزارشت لە واقع و بیروبۆچوونەكانی گەلی كوردستان و پێشمەرگە قارەمانەكان بكات. قورسایی ئەم بارودۆخە لەسەر شانی گەلی كوردستانە و هیچ كەس و لایەنێك ناتوانێ نوێنەرایەتیی خەڵكی كوردستان بكات و دەنگی ڕاستەقینەی خەڵكی كوردستان لە كۆڕ و كۆبوونەوە نێودەوڵەتییەكان بگەیێنێت.

مسعود بارزانی
سەرۆكی هەرێمی كوردستان
22/ـی 1ـی 2015</sup>

<sup>راوێژكاری ئەنجوومەنی ئاسایشی هەرێمی كوردستان لە وەڵامی سەرۆكی سووریادا دەڵێت هیچ دژایەتییەك لە نێوان پارتی و PKK دا نییە. سەبارەت بە جیابوونەوەی كوردیش لە عێراق رایدەگەیێنێت، ئەمە بە قسەی بەرپرسێك و دوو بەرپرس نابێت و هیچ حیزبێكیش ناتوانێت لەجیاتی هەموو كورد بڕیار بدات.


دوێنێ ئێوارە 21-1-2015، مەسروور بارزانی، راوێژكاری ئەنجوومەنی ئاسایشی هەرێمی كوردستان لە میحوەری دیجلە كۆنگرەیەكی رۆژنامەڤانی لەبارەی ئۆپەراسیۆنە فراوانەكەی هێزی پێشمەرگە لەو میحوەرە ئەنجامدا. لە وەڵامی پەیامنێری تۆڕی میدیایی رووداودا بارزانی وەڵامی لێدوانەكانی هەریەك لە بەشار ئەسەدی سەرۆكی سووریا و حەیدەر عەبادی سەرۆكوەزیرانی عێراقی دایەوە.

لە وەڵامی پەیامنێری رووداو هێڤیدار ئەحمەد كە لە كۆنگرەكەدا لێی پرسی" بەشار ئەسەدی سەرۆكی سووریا لە كۆبوونەوەیەكدا لەگەڵ كادیرانی پارتەكەی گوتوویەتی پارتی و PKK دژایەتییەكی زۆری یەكدی دەكەن و ناتوانن پێكەوە بژین"، مەسروور بارزانی گوتی:" ئێمە دژی PKK نیین، وە دژی هیچ هێزێكی نیشتمانی كوردستانی نین كە مەبەستیان بێت خەبات بۆ ئامانجە بەرزەكانی گەل و نیشتمان بكەن".

لە وەڵامی ئەو قسەیەی عەبادیشدا كە هێڤیدار ئەحمەد لێی پرسی" عەبادی دەڵێت بە كوردمان گوت ئەگەر دەتانەوێـت لەگەڵ عێراق بژین فەرموون ئەگەر نانێكمان هەبوو كەرتی دەكەین، ئەگەر ناشتانەوێت بە روونی پێمان بڵێن". راوێژكاری ئەنجوومەنی ئاسایشی كوردستان گوتی:" ئەمە بە قسەی بەرپرسێك و دوو بەرپرس نابێت، ئەگەر بەراستی دەیانەوێت بزانن كورد چی دەوێت، با رێگە خۆش بكەن راپرسی بكرێت تاوەكو خەڵكی كوردستان بەتێكڕایی بڕیاری خۆی بدات چی دەوێت". بارزانی هەروەها گوتی:" لە راپرسی مەعلووم دەبێت كورد چی دەوێت، ئەمە بڕیاری هیچ هێزێكی سیاسی نییە بتوانێت لەبری كورد ئەو بڕیارە بدات، با كورد خۆی بڕیار بدات، ئەوكاتیش هیوادارم بەڕێز عەبادی و هەمووان رێز لە ئیرادەی گەلی كورد بگرن".</sup>

^22/1/2015

<sup>چەکدارانی داعش  لە ترسی کۆنترۆڵکردنەوەیان لە لایەن هێزی پێشمەرگەوە، چەندین باڵەخانە لە سەنتەری شارۆچکەی شنگال دەتەقێنێتەوە.

موقەدەم عەزیز ئەحمەد، بەرپرسی ئۆپەراسیۆنەكانی 433ی باڵەك لە شنگال بە تۆڕی میدیایی رووداوی راگەیاند، بەهۆی ئەوەی چەند باڵەخانەیەکی بەرز دەڕواننە سەر رێگای سەرەکی نێوان باشوور و رۆژئاوای کوردستان، هەروەها لە ترسی کۆنترۆڵکردنەوەیان لەلایەن پێشمەرگەوە، رۆژی چوارشەممە 21-1-2015  چەكدارانی داعش ئەو باڵەخانانەیان تەقاندوونەتەوە.

موقەدەم عەزیز زۆرتر گوتی:" داعش لە شنگال لاوازبووە و دەزانێت ئەگەر ئەو بینایانە بکەونە دەست پێشمەرگە، واتای ئەوەیە ئەو رێگا سەرەکییەی لە رۆژئاواوە دێتە ناو شارۆچکەی شنگال کۆنترۆڵکراوە، ئەمەش وادەکات پەیوەندی داعشەکانی نێو شنگال لەگەڵ سووریا بپچڕێت".

ئەو فەرماندەیەی پێشمەرگە ئاماژە بۆ ئەوەش دەكات كە رۆژی چوارشەممە چەكدارانی داعش لە هەرسێ باڵی رۆژئاوا، باشوور و رۆژهەڵات هێرشیان کردووەتە سەر پێشمەرگە، بەڵام تێکشکێنراون.

سەبارەت بە زیانەکانی داعش موقەدەم عەزیز گوتی:" لە رێگای GPS ەوە گوێبیستی گفتوگۆکانی داعش دەبووین و زانیمان کە کوژراو و برینداریان هەیە، ئاماژەی بەوەشدا شەڕی ئەمڕۆی شنگال هیچ زیانێکی گیانی بۆ پێشمەرگە نەبووە".</sup>

رووداو- شنگال

^22/1/2015