^{راگەیاندراوێک لەبارەی سەردانەکەی بارزانی بۆ ئەڵمانیا
بارزانی وتارێک پێشکەش دەکات}

^{ماڵپەڕی فەرمیی سەرۆکایەتیی هەرێمی کوردستان، لەبارەی سەردانەکەی مەسعود بارزانی بۆ ئەڵمانیا، راگەیاندراوێکی بڵاوکردەوە.}

^{لە راگەیاندراوەکەی سەرۆکایەتیی هەرێمی کوردستاندا هاتووە، مەسعود بارزانی، سەرۆكی هەرێمی كوردستان، بە یاوەریی شاندێكی هەرێمی كوردستان، بە مەبەستی بەشداری‌كردن لە كۆنفڕانسی ئاسایشی جیهانی، لە شاری میونیخ لەڕێگەی فڕۆكەخانەی نێودەوڵەتیی هەولێر بەرەو وڵاتی ئەڵمانیا بەڕێ كەوت.}

^{لەبارەی بەشداری لە کۆنفرانسەکە، لە راگەیاندراوەکەدا هاتووە، بڕیاریش وایە سەرۆك بارزانی لە كۆنفڕانسەكەدا وتارێك پێشكەش بكات و ژمارەیەك دیدار و چاوپێكەوتن و كۆبوونەوەی لەگەڵ بەرپرسانی وڵاتانی بەشداربووی كۆنفڕانسەكە هەبێت.}

^{دەقی راگەیاندراوەکەی سەرۆکایەتیی هەرێمی کوردستان}

^{سەرۆك بارزانی بە یاوەریی شاندێكی هەرێمی كوردستان بەشداریی كۆنفڕانسی ئاسایشی جیهانیی لە میونیخ دەكات.}

^{ئەمڕۆ پێنجشەممە 5ـی 2ـی 2015 بەڕێز مەسعود بارزانی، سەرۆكی هەرێمی كوردستان، بە یاوەریی شاندێكی هەرێمی كوردستان بە مەبەستی بەشداری‌كردن لە كۆنفڕانسی ئاسایشی جیهانی، لە شاری میونیخ لەڕێگەی فڕۆكەخانەی نێودەوڵەتیی هەولێر بەرەو وڵاتی ئەڵمانیا بەڕێ كەوت.}

^{شایانی گوتنە، سەرۆكی هەرێمی كوردستان، بە فەرمی بانگهێشتی ئەم كۆنفڕانسە كراوە. لەو كۆنفڕانسەدا كە چەند ڕۆژێك دەخایەنێت، ژمارەیەكی زۆری سەرۆكی وڵاتان و سەرۆك وەزیران و پسپۆڕانی نێودەوڵەتی بەشدار دەبن. بڕیاریش وایە سەرۆك بارزانی لە كۆنفڕانسەكەدا وتارێك پێشكەش بكات و ژمارەیەك دیدار و چاوپێكەوتن و كۆبوونەوەی لەگەڵ بەرسانی وڵاتانی بەشداربووی كۆنفڕانسەكە هەبێت.}

^5/2/2015

<sup>فەرماندەی گشتیی هێزە چەکدارەکانی ئوردن رایدەگەیێنێت، بە سەدان سەربازییان بەرەو سنووری عێراق رەوانەکردوون و وەزیرێکی عێراقیش ئاشکرای دەکات، كە رەزامەندییان لەسەر داوایەکی وڵاتی ئوردن نیشان داوە، بۆ ئەوەی بێتە ناو خاکی عێراق و لە رێگەی فڕۆکە جەنگییەکانییەوە بنکەو بارەگاکانی رێکخراوی داعش لە ئەنبار، نەینەوا، رۆژئاواو باکووری وڵات بۆردوومان بکات.

فەریقی یەکەم رووکن مشعەل محەممەد ئەلزەبن، فەرماندەی گشتیی هێزە چەکدارەکانی ئوردن رایدەگەیێنێت، فڕۆکەکانی هێزی ئاسمانی مەلەکی ئوردنی ئەمڕۆ پێنجشەممە 5ی شوباتی 2015 ، چەند گورزێكی ئاسمانیان ئاراستەی رێکخراوی دەوڵەتی ئیسلامی (ناسراو بە داعش) كردوون لە شاری رەقەی سووریا كە بنکەی سەرەکی رێکخراوەکەیە.

فەرماندەی گشتی هێزە چەکدارەکانی ئوردن لەسەر ماڵپەڕی سەرەکی فەرماندەکەیان ئاماژە بەوەش دەدات، بە سەدان سەربازیان لەسەر سنووری عێراق جێگیرکردوون. باس لەوەش دەكات فڕۆکەکانیان دوای ئەنجامدانی ئەرکەکانیان بە سەرکەوتوویی، بە سەلامەتی گەیشتوونەتەوە ئوردن، بەبێ ئەوەی هیچ زیانێکیان بەربکەوێت لە کاتی ئەنجامدانی هێرشەکان بۆ سەر رێکخراوی داعش.

هاوكات سەرچاوەیەک لە پۆلیسی سنوور لە پارێزگای ئەنبار رایگەیاند،" کەرتە سەربازییەکانی وڵاتی ئوردن بە ئاراستەی سنووری عێراق جوڵەیان کردووە لە ناوچەی (روەیشد) و لەبەرامبەر شارۆچکەی (تریبیل)ی عێراق جێگیردەکرێن".

سەرچاوەیەکی باڵای عێراقیش ئاشکرای دەکات، وڵاتەکەی رێگە بە ئوردن دەدات هێرشە ئاسمانییەکانی بە هەماهەنگی لە عێراق ئەنجام بدات و بنکەو بارەگاکانی رێکخراوی داعش لە پارێزگاکانی ئەنبار و نەینەوا بۆردوومان بکات.

وەزیرێکیش لە حکومەتی عێراق لە لێداوانێکدا بۆ ئاژانسەکان گوتوویەتی،" ئەنجوومەنی وەزیران لەم کۆتاییانە رەزامەندی لەسەر داوایەکی ئوردن نیشاندا بۆ بۆردوومانکردنی بنکەو بارەگاکانی رێکخراوی داعش لە ئەنبارو نەینەواو رۆژئاواو باکووری وڵات". ئەو وەزیرە ئاشکراشی دەکات "پێشتر لەلایەنی عێراقییەوە رێگە بە فڕۆکە جەنگییەکانی ئوردن نەدەدرا سنووری ئاسمانی عێراق ببەزێنن".</sup>

^5/2/2015

^{راپۆرته‌ هه‌واڵێكی شیكاری گه‌یشتووه‌ته‌ ئه‌و ده‌رئه‌نجامه‌ی كه‌ ئێستا كورد له‌ هه‌موو كات زیاتر له‌ سه‌ربه‌خۆیی نزیكه‌.}

^{له‌و راپۆرته‌دا كه‌ ئاژانسی رۆیته‌رز بڵاویكردووه‌ته‌وه‌، باس له‌وه‌ده‌كرێت كه‌ هێزی پێشمه‌رگه‌ی كوردستان خه‌نده‌قی به‌رگرییان له‌ (وادی غربان) لێداوه‌ كه‌ ته‌نها دوو كیلۆمه‌تر له‌ گوندی (سوڵتان عه‌بدوڵا)ه‌وه‌ دووره‌ كه‌ تیایدا پێكدادانی نێوان پێشمه‌رگه‌ و داعش ده‌گوزه‌رێت.}

^{له‌ راپۆرته‌كه‌دا هاتووه‌ كه‌ كورد له‌دوای جه‌نگی كه‌نداوی دووه‌م له‌ ساڵی 1991، نیمچه‌ سه‌ربه‌خۆییه‌كیان هه‌یه‌ و ئێستاش له‌هه‌موو كات نزیكترن له‌وه‌ی به‌ خه‌ونی سه‌ربه‌خۆیی ته‌واو بگه‌ن.}

^{له‌ به‌شێكی دیكه‌ی راپۆرته‌كه‌دا باس له‌وه‌ كراوه‌ كه‌ كورد به‌ره‌نگاری داعش ده‌بێته‌وه‌ و به‌سه‌ریاندا سه‌رده‌كه‌ون و پێشڕه‌وی ده‌كه‌ن.}

^{له‌لایه‌كی دیكه‌شه‌وه‌ باسی له‌و سه‌ربه‌خۆییه‌ سیاسی و پێشكه‌وتنه‌ ئابوورییه‌ كردووه‌ كه‌ له‌ هه‌رێمی كوردستاندا هه‌یه‌ و وه‌ك نموونه‌ ئاماژه‌ی به‌ بوونی ده‌یان هۆتێل و پرۆژه‌ی بنیاسازی كردووه‌ كه‌ له‌ هه‌رێمدا جێبه‌جێ ده‌كرێت.}

xendan

^5/2/2015

<sup>سەرۆكی لیژنەی پێشمەرگە و شەهیدان لە پەرلەمانی كوردستان، پێیوایە كاتی ئەوە هاتووە لە باشووری كوردستان، "مۆنۆمێنتێكی شایستە بۆ سەربازی ون دروستبكرێت".

ئاری هەرسین، سەرۆكی لیژنەی پێشمەرگە و شەهیدان لە پەرلەمانی كوردستان باسی ژمارەی زۆری قوربانیدانی پێشمەرگە دەكات و شەڕی پێشمەرگە لەگەڵ چەكدارانی داعش بە "داستان و رووبەڕووبوونەوەی سەرسوڕهێنەرانە" ناودەبات و داوا لە ئەنجوومەنی وەزیران و وەزارەتی رۆشنبیری دەكات، لە شوێنێكی شایستەدا مۆنۆمێنتێك بەناوی "سەربازی ون، یان مۆنۆمێنتی شەهید"دابنرێت و هەروەها دەڵێ‌ "ئەو قوربانی و گیانفیداییەی پێشمەرگە پێشكەشی كردووە، كەم وێنەیە".

بەپێی راگەیێندراوێكی وەزارەتی پێشمەرگە، كە جەبار یاوەر، ئەمنیداری گشتی وەزارەتەكە لە پرێس كۆنفرانسێكی رۆژنامەوانیدا رایگەیاند، لەوەتەی شەڕی چەكدارانی داعش لەگەڵ كورد دەستیپێكردووە لە باشووری كوردستان، پێشمەرگە 999 شەهید و زیاتر لە 4 هەزار و 500 برینداری داوە.</sup>

^rudaw

^5/2/2015

 ^{گۆران عیززەدین، ئەو دیمەنانە دەگێڕێتەوە كە فیلمسازەكانی هۆلیۆد بەخەیاڵ دروستی دەكەن. 14 كاژێر لەناوچەی نەهرەوان لەناو ئاودا ماوەتەوە تاوەكو ئامۆزاكەی رزگار بكات و بە زیندوێتی نەكەوێتە دەست چەكدارانی داعش.}

^{لەشەوێكی تەمومژاویدا، چەكدارانی داعش لە میحوەری كەركووك  هێرشیانكردە سەرپێشمەرگە. گۆران یەكێك بوو لەو پێشمەرگانەی برینداركرا و دواتر كەس نەیبینییەوە، لەو شەڕەدا كە 5 ئاموزای خۆی لەگەڵدا بووە 3 لەوان شەهید دەبن، بەڵام گۆران دەڵێ‌ بەردەوام بیرم لەوە دەكردەوە زیاتر بەرەنگاریان ببمەوە.}

^{گۆران یەكێك بوو لەوانەی دەنگوباسی مردنی گەڕابوویەوە بۆ گووندەكەی خۆی، گوندی بنە لەناوچەی شوان، هەربۆیە ئەم گۆڕەی بۆ ئامادەكرابوو.}

^{لەوانەیە ئێستا گۆران خەمی ئەو بخوات كە نووسەرێكی بلیمەت نییە، چوونكە ئەو دیمەنانەی لەو 14 كاژێرەدا بینیویەتی بۆ ئەوە دەستدەدەن كتێبی وردە چیرۆكەكانی بەرەی جەنگی پێ بنووسرێتەوە. ئەو جەنگەی بەقسەی هەموو شارەزایان، جیهان بەشێوەیەكی دیكە دەگۆڕێ‌.}

^5/2/2015

<sup>لەگەڵ بڵاوبوونەوەی ئەو راپۆرتانەی، كە باس لە پلانێكی چەند هێزێكی كورد دەكەن بۆ فراوانكردنی كانتۆنی كۆبانێ، بۆ ئەوەی ببێتە ناوچەیەكی ئۆتۆنۆمی. وەزارەتی دەرەوەی ئەمریكا رایگەیاند، كە دژی ئەو هەنگاوەیە و لەم كاتەدا دان بەهیچ ناوچەیەكی ئۆتۆنۆمیدا نانێت لە سووریا و ئەمریكا سوورە لەسەر یەك پارچەیی خاكی ئەو وڵاتە.

جین ساكی، گوتەبێژی وەزارەتی دەرەوەی ئەمریكا رایگەیاند، دان بە هیچ ناوچەیەكی ئۆتۆنۆمیدا نانێین لە سووریا، دەمێكە ئەوە سیاسەتی ئێمەیە و لەسەری بەردەوامین.

ئەو قسەیەی ساكی وەك وەڵامێك بوو بۆ لێدوانێكی رەجەب تەییب ئەردۆغان، سەرۆککۆماری تورکیا، كە رایگەیاند: پلانگەلی كوردی هەن بۆ دابەشكردنی سووریا.

ئەردۆغان رەخنەی لە ویلایەتە یەكگرتووەكانی ئەمریكا گرت، بەوەی كە بە بیانووی گەڕاندنەوەی كۆبانێ، چەك بۆ هێزە كوردییەكان دەنێرێت و گوتی: ئەمریكا چەكی قوڕس بۆ كوردەكانی سووریا دەنێرێت، كە دوور نییە سبەی لەلایەن كوردەكانی توركیا ئەو چەكانە دژی تورکیا بەكاربهێندرێن.

لە وەڵامی ئەو رەخنانەی ئەرۆغاندا، جین ساكی گوتی: بۆ كۆتاییهێنان بە قەسابخانە و هەڕەشەكانی داعش، ئێمە لە سیاسەتی هاوكاری و پشتیوانیكردنی ئەوانە بەردەوام دەبین، كە دژی رێكخراوی داعش شەڕ دەكەن.</sup>

^4/2/2015

<sup>میدیاكانی یەكێتیی نیشتمانیی كوردستان بۆ یەكەمجار دوای نەخۆشكەوتنی تاڵەبانی و هاتنەوەی بۆ باشووری كوردستان لەئەڵمانیاوە، وێنەیەكی ئەویان بڵاوكردووەتەوە، كە لە پشت مێزی كارەكەی پێشوازی كردووە لە ماسیمۆ مارۆتینی، باڵیۆزی ئیتاڵیا لە عێراق و كارمیلۆ فیكارا، كونسولێ ئیتاڵیا لە هەولێر.

بە پێی هەواڵی میدیاكانی یەكێتی، لە دیدارەكەدا، باسی بارودۆخی سیاسی عێراق و ناوچەکە كراوە.

لە دیدارەكەدا كە رۆژی سێشەممە 3-2-2015 ئەنجامدراوە، شاندنی میوان هەواڵی تەندروستی جەلال تاڵەبانی، سكرتێری گشتی یەكێتیی نیشتمانیی كوردستانیان پرسیوە و خۆشحاڵی خۆیان نیشانداوە بە دووبارە بینینەوەی.

جەلال تاڵەبانی لە 18ـی كانوونی یەكەمی 2012، بە هۆی جەڵتەی مێشك گەیەندرایە نەخۆشخانەی بەغدا و دواتر گواسترایەوە بۆ نەخۆشخانەیەك لە بەرلینی پایتەختی ئەڵمانیا.

تاڵەبانی لە رۆژی 19-ی تەمموزی 2014 دوای 19 مانگ لە نەخۆشی، لە ئەڵمانیاوە گەڕایەوە سلێمانی و لە ماڵەكەی خۆی لە دەباشان پێشوازی لە چەندین شاندی سیاسی و حیزبی كرد، كە بەمەبەستی بینینی و ئاگادرابوون لە رەوشی تەندروستی سەردانیان دەكرد.</sup>

رووداو- سلێمانی

^4/2/2015

<sup>دوای نیشاندانی گرتە ڤیدیۆیی سووتاندنی )مەعاز کەساسیبە(ی فڕۆکەوانی ئەردەنی، نیگەرانی زۆرێک لە وڵاتانی عەرەبی و نێودەوڵەتی لێکەوتەوە.

کۆشکی سپی سەرکۆنەی سووتاندنی مەعاز کەساسیبەی کرد لە لایەن چەکدارنی داعش، باراک ئۆبامای سەرۆکی ویلایەتە یەکگرتووەکانی ئەمریکاش رایگەیاند، سووتاندنی فڕۆکەوانە ئوردەنییەکە لە لایەن داعش، ئەوەی سەلماند کە چەکدارانی داعش کەسانێکی دڕندەن.

ئۆباما گوتیشی،" نیشاندانی ڤیدیۆی کەساسیبە، وادەکات هێزەکانی هاوپەیمانان بە شێوەیەکی تووندتر بۆردوومانی چەکدارانی داعش بکەن".

سەرۆکوەزیرانی بەریتانیا، کە وڵاتەکەی یەکێکە لە ئەندامانی هاوپەیمانی نێودەوڵەتی بۆ بەرەنگاربوونەوەی داعش، نیگەرانی خۆی بەرامبەر کارە دڕندانەیەکەی داعش دەربڕی.

دەیڤید کامیرۆن سەرۆکوەزیرانی بەریتانیا سەرکۆنەی کوشتنی کەساسیبەی کرد و گوتی:" کوشتنی کەساسیبە بە هێزترمان دەکات بۆ رووبەڕووبوونەوەی داعش، بەناوی گەلی بەریتانیاشەوە سەرەخۆشیی لە خانەوادەی کەساسیبە کرد".

مەسعود بارزانی، سەرۆكی هەرێمی كوردستان بە تووندی ئیدانەی سووتاندنی فڕۆكەوانە ئوردنییەكەی كرد و لە پەیامێك گوتی،" مه‌عاز قاره‌مانانه‌ شه‌هید بوو، خوێنی بەفیڕناێت".

بارزانی لە پەیامەكەیدا كە بۆ شا عه‌بدوڵڵای دووه‌م، شای ئوردنی ناردووە، دەڵێت،" به‌ داخێكی زۆره‌وه‌ هه‌واڵی شه‌هیدبوونی مه‌عاز ئه‌لكه‌ساسبه‌ی فڕۆكه‌وانمان بیست، كه‌ به‌ شێوه‌یه‌كی دڕندانه‌ له‌ لایه‌ن تیرۆریستانی داعش شه‌هیدكرا. زۆر به‌ تووندی ئیدانه‌ی ئه‌و كرده‌وه‌ نا مرۆڤانه‌ی تیرۆریستانی داعش ده‌كه‌م. به‌ ناوی خۆم و گه‌لی كوردستانه‌وه‌ سه‌ره‌خۆشی له‌ جه‌نابتان و گه‌لی ئوردن و خانه‌واده‌ی شه‌هید ده‌كه‌م و هیوای سه‌بر و ئارامیتان بۆ ده‌خوازم".

لە پەیوەندیەکی تەلەفۆنی نێوان سەلیم جبووری، سەرۆکی پەرلەمانی عێراق و عاتف تەراونە، هاوتا ئوردەنییەکەی، جبووری سەرەخۆشی لە گەلی ئوردن و خانەوادەی کەساسیبە کرد، راشیگەیاند" عێراق و ئوردن لە نێو یەک چاڵدان بۆ بەرەنگاربوونەوەی داعش".
 
وەزارەتی دەرەوەی میسریش پێیوایە ئەوەی داعش دەیکات لە بنەمای هیچ ئاینێکی ئاسمانیدا نییە، لە بەیاننامەیەکیشدا رایگەیاند" بە تووندی سەرکۆنەی تاوانی کوشتنی کەساسیبە دەکەین کە لە لایەن چەکدارانی داعش شەهیدکرا".

لوبنانیش ئامادەی خۆی دەربڕی بۆ پاڵپشتیکردنی حکومەت و گەلی ئوردن، وەزارەتی دەرەوەی لوبنان لە بەیاننامەیەکدا لەبەرامبەر کوشتنی فڕۆکەوانە ئوردنییەکە دەڵێت" ئیدانەی کوشتنی کەساسیبە دەکەین و بە هەموو شێوەیەک پاڵپشتی لە حکومەتی ئوردن و گەلی ئوردن دەکەین".

لای خۆشیانەوە هەریەک لە وڵاتی ئیمارات و بەحرەین سەرکۆنەی کوشتنی کەساسبەیان کرد و ئامادەی خۆشیان نیشندا بۆ هاوکاریکردنی ئەو وڵاتە.</sup>

rudaw /کارزان رەسوڵ 

^4/2/2015

^{دوای سووتاندنی فڕۆكەوانە ئوردنییەكە بە شێوەیەكی دڕندانە، كاردانەوەیەكی توند لە سەر ئاستی جیهان، لە دژی ئەم كارەی ڕێكخراوی توندڕەوی داعش دروست بووە و چاوەڕوانی گرتنەبەری ڕێوشوێنی توند دەكرێت.}

^{ئێوارەی رۆژی سێشەممە، داعش فڕۆكەوانە بارمتە وردنییەكەی سووتاند و گرتەیەكی ڤیدیۆییشی لێ‌ بڵاو كردەوە، بەو هۆیەوە كاردانەوەی توند لە ئاستی ئوردن و ناوچەكە و جیهانیش دروست بوو و شای ئوردنیش سەردانەكەی بۆ واشنتۆن دواخست و ڕایگەیاند: “لە یەك ڕیزی تونددا لە دژی داعش دەوەستینەوە”.}

^{هاوكات لە بەیاننامەیەكدا، عەقید “مەمدووح ئەلعامری”، گوتەبێژی هێزە چەكدارەكانی ئوردن ڕایگەیاند: “خوێنی مەعاز كەساسیبەی فڕۆكەوانی ئوردنیی بە فیڕۆ ناڕوات و تۆڵەی دەكەینەوە”.}

^{لە لایەن خۆشیەوە، “باراك ئۆباما”ی سەرۆكی ئەمریكا ڕایگەیاند، بڵاو كردنەوەی ڤیدیۆكە و شێوازی كوشتنی فڕۆكەوانەكە، دڕندەییی داعش زیاتر دەردەخات. دووپاتیشی كردەوە، ڤیدیۆكە ئەمریكا و وڵاتانی ئەندام لە هاوپەیمانیی نێودەوڵەتی جددیتر دەكات، لە ڕووبەڕووبوونەوەی داعش.}

^{دوای ڕووداوەكە، كاردانەوەیەكی زۆر لە سەر ئاستی جیهان ڕوویدا. لە هەرێمی كوردستانیشدا، “مەسعود بارزانی”، سەرۆكی هەرێمی كوردستان پەیامێكی ئاراستەی شا “عەبدوڵڵای دووەم”، پادشای شانشینی ئوردن كرد و تێیدا زۆر بە تووندی ئیدانەی ئەو كردەوە نا مرۆڤانەیەی شەرمەزار كرد. دووپاتیشی كردەوە، خوێنی شەهید مەعاز و هەموو ئەو شەهیدە قارەمانانەی لە ڕێی بەرگری‌ كردن لە بەهاكان و پێكەوەژیان و ئاسایشی خەڵك و شەڕی دژی دوژمنانی مرۆڤایەتی گیانی خۆیان بەخت كردووە، بە فیڕۆ ناچێ و تیرۆریستان باجی هەموو تاوانەكانیان دەدەن و سەرئەنجامیان لەناوچوون و شكستە.}

^{هەر لەمبارەیەوە حكوومەتی هەرێمی كوردستان لە بەیاننامەیەكدا بە ئەركی كۆمەڵگای نێودەوڵەتی و هێزە ئازادیخواز و مرۆڤدۆستەكانی دونیای زانی، كار بۆ وشك‌كردنی سەرچاوەكانی وزە و هێزی تیرۆریستان و بنەبڕكردنیان بكەن، ئەویش لە پێناو فەراهەم‌كردنی دونیایەكی هێمنتر و پڕ لە ئاشتی و ئارامی بۆ گەلانی جیهان و ئایندەی مرۆڤایەتی.}

^{چاودێران چاوەڕێی ئەوە دەكەن، هەر لەمشەوەوە، كاردانەوەی توندی سەربازیی بەرانبەر بە ڕێكخراوی توندڕەوی داعش بگیرێتە بەر و هێرشی ئاسمانیی بەرفراوان بكرێنە سەر پێگەكانی داعش. دووریش نییە، لە چەند ڕۆژی داهاتوودا، كۆبوونەوەیەكی بە پەلەی هاوپەیمانیی نێودەوڵەتیی لە دژی داعش ئەنجام بدرێت و تێیدا بڕیاری ئۆپەراسیۆنی زەمینیی بەرفراوان بدرێت. تەنانەت بەشێك لە چاودێران پێیانوایە، چیتر داعش وەك پێشوو، ڕێكخراوێكی مەركەزیی نامێنێتەوە و بەشێك لەوانەی، كە هەستی نەتەوەییی عەرەبییان زاڵە، لە بەرانبەر سووتاندنی ئەو فڕۆكەوانەدا، هەڵوێست وەردەگرن و دووبەرەكی و ئینشیقاق لە نێو داعش سەرهەڵدەدات.}

^{سەرەڕای ئەوەی چاوەڕوان دەكرێت شەڕی دژی داعش لە ناوچەكە سەختتر ببێت، بەڵام بە كارابوونی زیاتری وڵاتانی جیهان لە شەڕەكەدا، ئەركی پێشمەرگە و هەرێمی كوردستان هەندێك سووكتر دەبێت.}

باسنيوز  |  دیار عەزیز

^4/2/2015

<sup>لە شاری نیسی فەرەنسا هێرشكرایە سەر ناوەندێكی جوولەكە و بەهۆیەوە سێ سەربازی فەرەنسی برینداربوون.

دوای هێرشەكە پۆلیسی فەرەنسا رایگەیاند كە هێرشەكە بە چەقۆ ئەنجامدراوە و بەهۆیەوە سێ سەربازی سەر بە یەكەی دژە تیرۆر بە سووكی برینداركراون. 

هەر ئەمڕۆ وەزارەتی ناوخۆی فەرەنسا دەستگیركردنی تۆڕێكی 8 كەسی راگەیاند كە كاریان ناردنی گەنجان بووە بۆ سووریا و عێراق بەتایبەت بۆ ناو ریزەکانی چەکدارانی رێكخراوی دەوڵەتی ئیسلامی (ناسراو بە داعش).

دوای هێرشەكانی مانگی رابردوو بۆ سەر گۆڤاری چارلی ئیبدۆ و فرۆشگایەكی جوولەكە، ناوەندەكانی جوولەكەو شوێنە گشتییەكان لەلایەن سەربازانی دژە تیرۆری فەرەنسییەوە دەپارێزرێن.</sup>

^3/2/2015