<sup>باڵیۆزی ئەمریکا لە عێراق رایگەیاند ئەو پڕۆژە بڕیارەی کۆنگرێسی ئەمریکا لەبارەی پڕچەککردنی کورد و سوننە بەشێکی عێراقییەکانی نیگەرانکردووە و هاوکات ئاماژە بەوەشدەکات ئەمریکا شانازیدەکات بە پەیوەندییەکانی لەگەڵ کورد و هەرێمی کوردستان.

دوێنێ پێنجشەممە ٣٠-٤-٢٠١٥، ستیوارت جۆنز، باڵیۆزی ئەمریکا لە عێراق رایگەیاند:"ئەو پڕۆژەیەی ئێستا لە کۆنگرێس بەنیازە بخرێتە دانگدانەوە لەبارەی پێدانی چەک وهاوکاری سەربازی و دارایی بۆ کوردو سوننە، لە قۆناغی سەرەتاییدایەو لەوەناچێت دەنگی لەسەربدرێت، هاوکات ئەوەش دەزانین ئەو پڕۆژەیە لەلای بەشێک لە هاونیشتیمانیانی عێراق نیگەرانی درووستکردووە".

باڵیۆزی ئەمریکا لە عێراق ئاماژەی بەوەشکردووە:" ئێمە لە باڵیۆزخانە ناتوانین هیچ لەسەر ئەو پڕۆژەیە بڵێین لەبەرئەوەی ئەو بڕیارەی کۆنگرێس پەیوەندی بە سیاسەتی ئەمریکا و سیاسەتەکانی سەرۆک ئۆباماوە هەیەو ئەوان دەزانن چیبکەن و چ بڕیارێک بدەن لەبارەی ئەو پڕۆژەیەوە" .

باڵێۆزی ئەمریکا دەشڵێت:" ئەمریکا شانازی بە پەیوەندییەکانی دەکات لەگەڵ کورد و هەرێمی کوردستان، بە کۆبوونەوەکانی داهاتووی نێوان مەسعوود بارزانی سەرۆکی هەرێمی کوردستان و سەرۆک باراک ئۆباماش بەباشی و گەشبینی دەبینم کە بڕیارە بەمنزیکانە لە واشنتن ئەنجامبدرێت".</sup>

^1/5/2015

<sup>سەرچاوەیەک لە شاری موسڵ رایگەیاند، لە بەرەکانی شەڕ 18 چەکداری داعش هەڵاتوون، دواتر 16 چەكدارییان دەستگیرکراونەتەوە و گوللەبارانکراون، دوو کەسەکەی دیکە لە رێگای سووریاوە خۆیان دەربازكردووە.

سەرچاوەكە بە تۆڕی میدیایی رووداوی راگەیاند" ئەو چەکدارانە بە رەگەز پاکستانی بوون، کاتێک بەیعەتیان بە داعش داوە هێنراونەتە بەرەی شەڕی دژ بە کورد و وایان تێگەیاندوون کە کورد کافرن و سەر بە ئیسرائیلن، لە کاتێکدا لە میحوەرەکانی سنووری کەرکووک لە گوندە کوردنشینەکان مزگەوتیان بینیوە و پێشمەرگە دیلەکانیان بینیوە نوێژدەکەن،  لەکاتی شەهیدکردنیشیاندا شەهادەدەهێنن، بۆیە بڕیاردەدەن بگەڕێنەوە وڵاتی خۆیان و چیدی شەڕ بۆ داعش نەکەن".

سەرچاوەکە کە نەیویست ناوی ئاشکرابکرێت گوتیشی" لە کاتی هەڵاتنیان لە سنووری پارێزگای موسڵ لە نزیک سنووری سووریا، 16 کەسیان دەستگیركراون و ئەمڕۆ چوارشەممە 29/4/2015  لە موسڵ گوللەبارانکران، بەڵام دوو چەکدارەکەی دیکە چوونەتە ناو خاکی سووریاوە و تا ئێستا چارەنووسیان نەزانراوە".

هاوکات سەعید مەموزینی، بەرپرسی راگەیاندنی لقی 14 ی موسڵی پارتی دیموکراتی کوردستان لە بە رووداوی گوت" دوای نیوەڕۆی ئەمڕۆ چەکدارانی داعش مامۆستایەکی کۆلێژی شەریعەی موسڵیان دەستگیرکردووە".

مەموزینی گوتیشی" لەبەرئەوەی داعش کاتی نوێژەکانی گۆڕیوە و ئەو مامۆستایە کە ناوی (مونعیم ساڵح)ە، پابەندنەبووە بەو کاتەی داعش بۆ نوێژەکان دایناوە، دەستگیرکراوە و بەرەو شوێنێکی نادیار بردراوە".</sup>

^30/4/2015

<sup>سەڵاحەدین دەمیرتاش، هاوسەرۆکی پارتی دیموکراتی گەلان HDP بە تووندی وەڵامی رەجەب تەییب ئەردۆغان، سەرۆککۆماری تورکیای دایەوە کە گوتبووی "کێشەیەک نییە بەناوی کێشەی کورد".

دەمیرتاش رۆژی 29-4-2015، لە چوارچێوەی کۆبوونەوەیەکیدا لەگەڵ زانایانی ئایینی لە شاری ئیستەنبوڵ گوتی: "کاتێک ئەردۆغان دەڵێت هیچ كێشەیەك بەناوی کێشەی کورد نییە، کێشەکە کۆتایی پێنایەت. ئەگەر بە دڵی ئەردۆغان بێت، کوردیش نییە، بەڵام ناوێرێت ئەو قسەیە بکات".

هاوکات دەمیرتاش گوتی: "کەس نییە لەم وڵاتە کێشەی نەبێت، بەڵام کورد لەهەموویان زیاترە. دەبێت ئەردۆغان واز لە رەنجاندنی دڵی گەلێک بهێنێت، بۆ بەدەستهێنانی دەنگ بۆ ئەو پارتەی خۆی مەبەستییەتی".

هاوسەرۆکی HDP ئەوەشی خستەڕوو کە پارتەکەی لەگەڵ ئەوەیە کێشەکان لە رێگەی دیالۆگەوە چارەسەربکرێن و بەردەوام دەبن لەسەر ئەو هەڵوێستەیان.</sup>

^30/4/2015

<sup>هەفتەی داهاتوو مەسعود بارزانی، سەرۆکی هەرێمی کوردستان سەردانی ئەمریکا دەکات و چەندین پرس لەگەڵ بەرپرسانی ئەمریکا تاوتوێ دەکات. یەکێک لەو پرسانە بە گوتەی سەرۆکی دیوانی سەرۆکایەتی هەرێمی کوردستان، دەوڵەتی کوردییە.

شەڕی کورد لەگەڵ داعش، شەڕی کۆنتڕۆڵکردنەوەی موسڵ و چەسپاندنی سنووری کوردستان لەنێو دەوڵەتی عێراقدا، پەیوەندی نێوان هەولێر و بەغدا مژاری سەردانی مەسعود بارزانی، سەرۆکی هەرێمی کوردستانە بۆ ئەمریکا، کە بڕیارە لە هەفتەی داهاتوو سەردانەکە ئەنجامبدرێ. بەڵام گەورەتر لەو مەلەفانە، مەلەفی دەوڵەتی کوردییە.

فوئاد حوسێن، سەرۆکی دیوانی سەرۆکایەتی هەرێمی کوردستان دەڵێ بارزانی ئەمجارە بە روون و ئاشکرا ئەو مەلەفە لەگەڵ خۆی دەباتە کۆشکی سپی و دەیخاتە بەردەم باراک ئۆباما، سەرۆکی ئەمریکا.

بەر لە سەردانەکەی، ئیدارەی ئەمریکا لەسەر داوای بارزانی، ناوی پارتی و یەکێتی لە لیستی رەشدا دەرهێناون، ئەمە مەرجی سەرۆکی هەرێمی کوردستان بووە لە سەفەرەکەیدا بۆ واشنتن.

رووداو زانیویەتی لە کۆبوونەوەی هەفتەی رابردوویدا لەگەڵ حیزبەکانی باشووری کوردستان، مەسعود بارزانی رایگەیاندووە، ئێستا ئەمریکا سیاسەتی سەبارەت بە دامەزراندنی دەوڵەتێک بۆ کورد گۆڕاوە، بەتایبەت دوای شەڕی داعش. گوتووشیەتی، کە ئەمریکا لاریی نییە و ئەگەر دەوڵەتی کوردی لەسەر سێ مەتریش بێ هەر رایدەگەیێنین.

بارزانی ئەمە چوار جارە لەلایەن کۆشکی سپییەوە پێشوازی لێدەکرێ. بەڵام فوئاد حوسێن دەڵێ "سەردانی ئەمجارە جیاوازەو شەڕی داعش زۆر شتی گۆڕی".

مەحموود عوسمان، سیاسەتمەداری کورد داوادەکات کورد خۆی رێکبخات و پشتگیری سەردانی بارزانی بکەن بۆ ئەمریکا، بەڵام بەبڕوای ئەو، پشتگیری دەوڵەتی کوردی لەلایەن واشنتنەوە ئاسان نییە.</sup>

^29/4/2015

هێزی پێشمەرگەی کوردستان ئەمڕۆ بە یەکجاری لە کۆبانێ گەڕایەوە باشووری کوردستان و سوپاسالاری هێزی پێشمەرگەی کوردستان دەڵێت "لەسەر داوا و رەزامەندی ypg و بەهۆی ئەوەی ئامانجەکەمان هاتە دی لە کۆبانێ کشاینەوە".

<sup>لیوا سالار جەباری سوپاسالاری هێزی پێشمەرگە بۆ تۆڕی میدیایی رووداو رایگەیاند، سەبارەت بە هۆکاری گەڕانەوەی هێزی پێشمەرگە لە کاتێکدا بە گوتەی پێشمەرگەکان و فەرمەندەکەیان پێویست بوو پێشمەرگە لەوێ بمێنێتەوە گوتی "ئەوە لەسەر داوای ئەو هێزانە بووە لە کۆبانێ، کە کاتێ ئامانجەکانیان بەدیهات هێزەکەی ئێمە لەوێ بکشێتەوە".

سەبارەت بەوەی فەرماندەی هێزی پێشمەرگە لە کۆبانێ دەڵێت پێویست بوو پێشمەرگە بمێنێتەوە، لیوا سالار جەباری گوتی:" ئەو خۆشەویستییە کە لە نێوان پێشمەرگە و خەڵکی کۆبانێ و ئەو هێزانەی لەوێن دروست بووە، ئەگەری هەیە ئەوان پێیانخۆشبێت تاوەکو دەساڵی دیکە لەوێ بمێنینەوە، بەڵام دۆخی پێشمەرگە و پرسی سیاسی وا ناڵێت و رای خۆیان وەرگیراوە، ئەوکاتە ئێمە کشاوینەتەوە و ypg رەزامەند بووە کە هێزی پێشمەرگە بکشێتەوە".

سەبارەت بەوەی ئەگەر لەلایەن هێزەکانی رۆژئاوای کوردستان داوا لە پێشمەرگە بکرێت بڕۆنە ئەو بەشەی کوردستان لیوا سالار جەباری گوتی:" ئەگەر پێویست بکات ئەگەری هەیە ئەوکارە بکرێت و دڵنیام سەرکردایەتی کورد و وەزارەتی پێشمەرگە ئەگەر پێویست بکات رەزامەندی دەردەبڕن بۆ چوونی هێزی پێشمەرگە بۆ رۆژئاوای کوردستان".

سوپاسالاری هێزی پێشمەرگە لە وەڵامی ئەوەی نەدەکرا ئەو چەکانەی پێشمەرگە بردویەتی لە کۆبانێ بمێنێتەوە، گوتی:" ئێمە پێش ئەوەی بڕۆینە کۆبانێ رێککەوتین لەگەڵ تورکیا کە ئەو چەکانەی رەوانەی ئەوێی دەکەین، هەمان جۆری چەک دەبێت بگەڕێتەوە بۆ هەرێمی کوردستان، پرسی چەک رێککەوتنی نێودەوڵەتی تێدایە و ناتوانین چەک لە وڵاتێکەوە بۆ وڵاتێکی دیکە بنێرین ئەگەر رێککەوتنی نێودەوڵەتی تێدا نەبێت".

بەڵام عەمید تەلعەت زراری فەرماندەی هێزی پێشمەرگە لە کۆبانێ لە کاتی گەییشتنی بۆ فڕۆکەخانەی نێودەوڵەتی هەولێر لە لێدوانێکدا بۆ تۆڕی میدیایی رووداو گوتی:" هێزەکانی ypg پێیانخۆش بوو ئێمە بمێنینەوە، بەتایبەتی لەبەر گرێ سپی کە رێگای قامیشلۆ سەرێ کانییە، ئەگەر ئەو رێگایە ببێتەوە رێگای رۆژئاوا بۆ باشووری کوردستان دەکرێتەوە، لەبەر ئەوە پێیانخۆش بوو ئێمە بمێنینەوە و پێویستیش بوو کە بمێنینەوە، بەڵام بڕیار لەدەستی ئێمە نییە بۆ مانەوە و بڕیار لەلای وەزارەتی پێشمەرگەوە دەرکراوە".</sup>

^29/4/2015

<sup>کۆمپانیای "ئیران خۆدرۆ" گەورەترین کۆمپانیای بەرهەمهێنەری ئۆتۆمبیلە لە ئێران. پێشەسازی بەرهەمهێنانی ئۆتۆمبیل و بە گشتی ئابووری ئێران لە چەند ساڵی رابردوودا بەهۆی گەمارۆ نێودەوڵەتییەکان زیانی گەورەی بەرکەوتووە.

لە ساڵی 2002 وە کە ئێران بەرنامە ئەتۆمییەکەی بەجدیی درێژە پێدا، گەمارۆ بانکی و بازرگانییەکان لەسەر ئەو وڵاتە بەردەوامە. بەڵام هیوایەکی زۆر هەیە پاش رێککەوتنی کۆتایی لەنێوان ئەو وڵاتەو وڵاتە رۆژئاواییەکان، ئەو گەمارۆیانە کۆتاییان پێبێت.

تا کۆتایی مانگی شەش دەرفەت ماوە بۆ ئەوەی ئەو رێککەوتنە بەدیبێت. بەڵام کۆمپانیاکان و کارگەکان خۆیان بۆ سەردەمی پاش لادانی گەمارۆکان ئامادەدەکەن.

فەربۆد زاوە، شرۆڤەکارێکی بازاڕی ئۆتۆمبێلەو دەڵێت گەمارۆکانی سەر ئێران پیشەسازی بەرهەمهێنانی ئۆتۆمبێلی بە تەواوەتی داڕماند.

بەپێی ئامارەکانی وەزارەتی پیشەسازی ئێران، بەرهەمهێنانی ئۆتۆمبیل لەو وڵاتە لە ساڵی 2014 گەشەی کردووەو بەگشتی لە بواری بەرهەمهێناندا 19ەمین وڵاتە لەسەر ئاستی جیهان.

پێشبینیدەکرێت بە لادانی گەمارۆکانی سەر ئێران، پیشەسازی ئۆتۆمبیل لەو وڵاتە گەشە بکات.

جگە لە بواری ئۆتۆمبیل، پیشەسازییەکانی دیکەش بەهەمان شێواز خۆیان بۆ قۆناغی پاش لادانی گەمارۆکان ئامادەدەکەن.

بەرهەمەکانی کارگەی ئاسنی ئێران لە رێی لایەنێکی سێیەم هەناردەی وڵاتانی ئەورووپی دەکرێت. سەرەرای گەمارۆی تووندی سەر ئێران کارگەی ئاسنی ئێران توانیویەتی گەشە بکات.

لە پەراوێزی کۆنفرانسێکی نێودەوڵەتی ، وەزیری دەرەوەی ئێران و ویلایەتە یەکگرتووەکانی ئەمریکا لە نیویۆرک کۆبوونەتەوە و تاکۆتایی مانگی شەش دەرفەت لەبەردەم ئێران ماوە بۆ ئەوەی لەگەڵ وڵاتە رۆژئاواییەکان بگاتە رێککەوتنێکی کۆتایی.

شارەزایانی ئابووری پێشبینی دەکەن ئابووری ئێران بەلادانی گەمارۆکان پێ بنێتە قۆناغێکی نوێیەوە.</sup>

^29/4/2015

<sup>گرووپی شانۆی كانی، لە بۆكانی رۆژهەڵاتی كوردستانەوە هاتوونەتە باشووری كوردستان و دەیانەوێت لە نێو شانۆیەكی كراوەدا، شانۆیی ئەنتیگۆنە پێشكەش بە ئازارەكانی شنگال و كۆبانێ بكەن. ئەم گرووپە لەلایەن بەڕێوەبەرایەتی شانۆی سلێمانییەوە بانگهێشتكراون.

شانۆییەكە سێ‌ كارەكتەر رۆڵی تێدا دەبینن. ماوەی سێ‌ ساڵە ئەم گرووپە لە نمایشكردن بەردەوامن و پێشتریش لە فێستیڤاڵی فەجر لە تاران و فێستیڤاڵی شانۆی سەرشەقام لە مەریوان نمایشكراوە.

شانۆیی ئەنتیگۆنە لە نووسینی سۆفۆكلیسەو لە دەرهێنانی رەحیم عەبدولرەحیم زادەیە. شانۆكە بەشێوەیەكی گشتی باس لە داگیركاریی دەسەڵات دەكات.

گرووپی شانۆی كانی لەساڵی 1997 دامەزراوە و چەندین نمایشی شانۆییان لە رۆژهەڵاتی كوردستان و ئێران پێشكەشكردووە.</sup>

^29/4/2015

<sup>فڕۆکەكانی سعودیە و هاوپەیمانانی عەرەبی هێرشەکانیان بۆ سەر چەکدارانی حوسی و هێزە یاخییەکانی سەر بە سەرۆکی پێشووی یەمەن زیاددەكەن و  لەبەرامبەریشدا چەکدارانی حوسی لە عەدەن ئەو ناوچەیە کۆنترۆڵدەکەن کە ماڵی سەرۆکی ئێستای یەمەن و هەریەک لە کونسوڵخانەکانی رووسیا و ئەڵمانیای لێیە.

ئەمڕۆ دووشەممە ٢٧-٤-٢٠١٥، فڕۆکەکانی هاوپەیمانان بە چڕی بنکەکانی چەکدارانی حوسی و هێزەکانی سەر بە عەلی عەبدوڵڵا ساڵحی سەرۆکی پێشووی یەمەنیان  بۆردوومانکرد، چەندین هاووڵاتی یەمەنیش لەو بۆردوومانەدا بەهەڵە کرانە ئامانج.

چەکدارانی حوسی و هێزەکانی یاخی سەر بە سەرۆکی پێشووی یەمەن، لە کاتی بۆردوومانەکەدا چەندین هاووڵاتی یەمەنییان کوشت و هێڵی کارەبای دانیشتووانی ناوچەی تەعزیان پچڕاند، لە هەمانکاتیشدا چەکدارانی حوسی بە دەیان کوژراو وبریندارییان هەبووە، بەتایبەت  لە پارێزگای بەیزای ناوەڕاستی یەمەن 11 چەکداری حوسی لە بۆسەیەکدا لەناوچەی ئەب غەنیم کوژراون.

هاوکات سەرچاوەیەک رایگەیاندووە، لە عەدەن حوسییەکان دەوروپشتی ماڵی سەرۆکی ئێستای یەمەن عەبد مەنسوور هادی و هەریەک لە کونسوڵخانەی رووسیا و ئەڵمانیایان  گرتووە، ناوچەکە لەژێر کۆنترۆڵی حوسییەکاندایە.</sup>

<sup>سێیەمین فێستیڤاڵی تەپڵلێدان و سەماو کاری هونەری میللی نێودەوڵەتی لە قەڵای سەڵاحەدینی ئەیوبی لە قاهیرە دەستی بەچالاکییەکانی خۆی کرد.

بە ناونیشانی "تەپڵلێدان لە پێناو ئاشتی"، سێیەمین فێستیڤاڵی نێودەوڵەتی سەماو تەپڵلێدان و هونەری میللی لە میسر بە بەشداری 22 وڵات لە سەرتاسەری جیهان بەڕێوەچوو.

تیپە بەشداربووەکانی ئەم فێستیڤاڵە کولتوور و فەرهەنگ وسەماو شێوازی تەپڵلێدانی میللی خۆیان لە نێو شوێنەواری دێرینی قەڵای سەڵاحەدین پێشکەشکرد، کە هاوکات کاری دەستیی و تابلۆ شێوەکارییە کۆنەكانیانی خۆیان بۆ ئامادەبووان نمایشدەکرد.

ئەم فێستیڤاڵە بە سەرپەرشتی وەزارەتی رۆشنبیری و گەشتوگوزاری میسری بەڕێوەدەچێت، کە مەبەستی سەرەكی ناساندنی کولتوور و هونەری کۆنی نەتەوەکانی جیهانە.

هەروەها ئەم فێستیڤاڵە پەیامێکی دیکەی هەبوو، کە ئاشتکردنەوەی نەتەوەکان و پێکەوەژیانی ئاشتییانەی وڵاتانی رۆژهەڵاتی ناوەڕاستە، دەیانەوێت لە رێگای هونەرەوە خەڵک ئاشتبکەنەوە و خۆشی و خەندە و بزە بخەنەوە سەر لێوی هاووڵاتانی میسر.</sup>

^28/4/2015

<sup>ناوەندی راگەیاندن و چاپەمەنی هێزەکانی پاراستنی گەل HPG، ئەمڕۆ دووشەممە رایگەیاند:" سوپای ئێران رۆژی شەممە 25 ی نیسان بۆ ماوەی 10 کاژێر ناوچە کوێستانییەکانی قەندیلی تۆپبارانکردووە". 

HPG کە باڵی سەربازی پارتی کرێکارانی کوردستان PKK یە رایگەیاندووە:" لە کاژێر 8 بەیانی رۆژی شەممەوە سوپای ئێران چەند ناوچەیەکی کوێستانەکانی قەندیلی لە نێوان باشوور و رۆژهەڵاتی کوردستان تۆپبارانکردووە و تۆپبارانەكەش تاوەکو کاژێر شەشی ئێوارە بەردەوامبووە".

ناوەندی راگەیاندن و چاپەمەنی HPG ئاماژەی بەوەش داوە، کاژێر 8:30ی شەوی رابردووش، چەند فڕۆکەیەكی بێفڕۆکەوان بۆ ماوەی کاژێرێک بەسەر هەندێک ناوچەی قەندیلدا سوڕاونەتەوە.

هێشتا بەرپرسان و میدیاکانی ئێران هیچیان لەبارەی تۆپبارانکردنی کوێستانەکانی قەندیل بڵاونەکردووەتەوە. ئەوەش لەکاتێکدایە کە قاسم رزایی، فەرماندەی هێزی پاسەوانی سنووری ئێران رۆژی شەممە رایگەیاندبوو، لەگەڵ عێراق لەبارەی نەهێشتنی بنکە و بارەگای گرووپە دژبەرەکانی حکومەتی ئێران لەسەر سنوورەکان رێککەوتوون.</sup>

^28/4/2015