<sup>لە کۆبوونەوەی رۆژی دووشەممەی نێوان سەرۆکی هەرێمی کوردستان و لایەنە سیاسییەکان، باسی ریفراندۆم کراوەو جەختکراوەتەوە کە دەبێ هەنگاوی بۆ بنرێ.

مەسعود بارزانی، سەرۆکی هەرێمی کوردستان رۆژی دووشەممە 18-5-2015 لەگەڵ سەرکردەو نوێنەری لایەنە سیاسییەکانی هەرێمی کوردستان کۆبووەوە. لەو کۆبوونەوەیەدا یوسف محەممەد سەرۆکی پەرلەمانی کوردستان و قوباد تاڵەبانی ، جێگری سەرۆکی حکومەتی هەرێمی کوردستانیش بەشداربوون. بەپێی زانیارییەکانی رووداو لەو کۆبوونەوەیەدا باسی سەربەخۆیی ئابووری کراوەو هەمووانیش لەسەر ئەوە کۆک بوون، کە کورد دەبێ لە قۆناخی یەکەمدا هەوڵی سەربەخۆیی ئابووری بدات، پاشان ریفراندۆمێک لەسەر سەربەخۆیی بکات.

عیرفان عەلی عەبدولعەزیز ، رابەری گشتیی بزووتنەوەی ئیسلامی کوردستان لەبارەی ریفراندۆمەوە بۆ رووداو گوتی "باسمان لەوەکرد کە دەبێ هەنگاو بەرەو ریفراندۆم بنرێ و ئامادەکاریی پێویستی بۆ بکرێ بۆئەوەی سەرکەوتوو بێت".

سەبارەت بە سەربەخۆیی کوردستانیش، رابەری گشتیی بزووتنەوەی ئیسلامی گوتی "کۆبوونەوەکەمان ئومێدبەخش بوو، باسی زۆر شت کرا، ئێستا لە دەزگا ئەکادیمییەکانی ئەمریکا و ئەوروپا تێگەیشتنی باشتر هەیە بۆ کێشەی کورد".

ئێستا کە لەهەموو کات زیاتر کورد باسی سەربەخۆیی دەکات، وەک لە کۆبوونەوەکەدا باسکراوە، هۆکارەکەی ئەوەیە عێراق لەرووی کردەییەوە یەکپارچە نەماوەتەوە، هەروەها بەغدا پابەند نییە بەو رێکەوتنەی لەگەڵ هەولێر هەیەتی. کورد داوادەکات حکومەتی عێراق و دەوڵەتمەداری حکومەتەکە، چیتر دەستی بە دەستی بە مافی سامان و داهات و بودجە و مووچەی بڕیارلێدراوی هاوبەشی حکومەتی عێراق و کوردستان نەکات، بەڵکو بە زووترین کات ئەم کێشەیە چارەسەری یاسایی بۆ بکرێت.</sup>

^19/5/2015

<sup>لە كۆبوونەوەی نێوان مەسعود بارزانی، سەرۆكی هەرێمی كوردستان و لایەنە كوردستانییەكان بڕیاری پێكهێنانی ژوورێكی عەمەلیات دراوە.

عیرفان عەلی عەبدولعەزیز، رابەری گشتیی بزووتنەوەی ئیسلامی كوردستان لەكاتی بەشداریكردنی لە بەرنامەی (رووداوی ئەمڕۆی) رادیۆ و تەلەفزیۆنی رووداو، ئاشكرایكرد كە لە كۆبوونەوەی رۆژی دووشەممە 18ی ئایاری 2015 ی نێوان سەرۆكی هەرێمی كوردستان و لایەنە كوردستانییەكان، بڕیاری پێكهێنانی ژوورێكی عەمەلیات بۆ پرسە چارەنووساز و ستراتیژییەكان دراوە.

عیرفان عەلی عەبدولعەزیز هەروەها گوتی:" ئەو ژوورە عەمەلیاتە بۆ پتەوكردنی دامەزراوەكانی هەرێمی كوردستان و نەهێشتنی كەموكوڕییەكانە".

رابەری گشتیی بزووتنەوەی ئیسلامی كوردستان ئاماژەی بەوەشدا، تاوەكو ئێستا بڕیار لەسەر شێوازی دروستكردنی ژووری عەمەلیاتەكەو ، چۆنیەتی دروستكردن و ئەندامانی نەدراوە، بەڵام وەك ئەو گوتی:" ئەو ژوورە عەمەلیاتە نابێتە دژایەتی لەگەڵ دامەزراوە یاسیایی و دەستوورییەكان".</sup>

^19/5/2015

<sup>عەبادی لەگەڵ حوسێن دەهقان، وەزیری بەرگریی ئێران كۆدەبێتەوە و داوای هاوكاریی سەربازی لێدەكات.

رۆژی دووشەممە 18ی ئایاری 2015 ، حەیدەر عەبادی، سەرۆكوەزیرانی عێراق بە ئامادەبوونی خالید عوبەیدی، وەزیری بەرگری لەگەڵ حوسێن دەهقان، وەزیری بەرگریی كۆماری ئیسلامیی ئێران كۆبووەوە.

بەپێی راگەیێندراوێكی نووسینگەی راگەیاندنی سەرۆكوەزیرانی عێراق، عەبادی جەختی لەسەر هاوكاریكردنی عێراق لە لایەن سەرجەم وڵاتان كردووەتەوە، بە تایبەت ئاماژەی بە هاوكاری وڵاتانی دراوسێ كردووە لە شەڕی دژی داعش.

عەبادی داعشی بە مەترسی بۆ سەرجەم وڵاتان داناوە و ستایشی هاوكارییە سەربازییەكانی ئێرانیشی لەو شەڕە كردووە.

بەیانی رۆژی دووشەممە 18ی ئایاری 2015 حوسێن دەهقان، وەزیری بەرگریی ئێران بە سەردانێكی سێ رۆژە گەیشتە بەغدای پایتەختی عێراق.

دێهقان بە گەیشتنی بۆ بەغدا كۆنگرەیەكی رۆژنامەوانی ئەنجامدا، لە وەڵامی پرسیاری پەیامنێری تۆڕی میدیایی رووداویش سەبارەت بە ئەگەری سەردانكردنی هەولێر، وەزیری بەرگریی ئێران گوتی: "ئەگەر پێویست بكات ئامادەم سەردانی هەولێر بكەم".

لە لایەكی دیكەوە عەبادی لەگەڵ سەرجەم فەرماندەكانی حەشدی شەعبی كۆبووەتەوە و ئاماژەی بە پلانە سەربازییەكان بۆ شەڕی روومادی و نەخشەیەكی تۆكمە كردووە، بۆ كۆنترۆڵكردنەوەی سەرجەم ناوچەكانی ژێر دەسەڵاتی داعش.</sup>

^19/5/2015

<sup>لە هەردوو شاری ئەدەنە و مێرسین لەنێو بارەگای پارتی دیموکراتی گەلان HDP تەقینەوە روویداو سێ برینداریان لێکەوتەوە. سەرچاوەکان دەڵێن تەقینەوەکەی ئەدەنە بۆمبی چێنراو بووەو بەڕێوەبەری پۆلیسی مێرسین-یش دەڵێ تەقینەوەکەی مێرسین بوتڵی غاز بووە.

ئەمڕۆ کاژێر 10:00 ی سەرلەبەیانی لە ئەدەنە تەقینەوەیەک لە بارەگای HDP روویدا، تەقینەوەکە لە کاتی کۆبوونەوەی رۆژانەی دەستەی هەڵبژاردنی HDP بووە و بەپێی زانیارییە سەرەتاییەکان کەسێک لەو تەقینەوەیەدا بریندار بووە.

بڕیاربوو ئەمڕۆ سەڵاحەدین دەمیرتاش، هاوسەرۆکی پارتی دیموکراتی گەلان HDP کاژێر 17:00 بە کاتی ئەنقەرە کۆبوونەوە جەماوەرییەکەی خۆی لە مێرسین ئەنجامبدات. تاوەکو ئێستا زانیاریی لەبارەی گۆڕین و نەگۆڕینی بەرنامەی کۆبوونەوەی دەمیرتاش ئاشکرا نەکراوە.

تەقینەوەی مێرسینیش هاوکات لەگەڵ تەقینەوەکەی ئەدەنە روویداوەو دوو کەس برینداربوون. 
 
یاریدەدەری هاوسەرۆکایەتی پارتی دیموکراتی گەلان مەراڵ دانیش، رایگەیاندووە کە سێ کەس بریندارن،  کە یەکێکیان سەرۆکی لقی HDPی مێرسینە بەناوی حوسێن بەیاز، ئەوەی دیکە ئیبراهیم یاقوت و کەسێکی دیکە بە ناوی سەباحەددین.

رەحمی باشتوغ، بەڕێوەبەری پۆلیسی مێرسین گوتوویەتی کە رووداوەکە لە چێشتخانەی بیناکە روویداوە و لە ئەنجامی تەقینەوەی بوتڵی غاز بووە. ئەمە لە کاتێکدا کە تەقینەوەکە هاوکات بووە لەگەڵ تەقینەوەی ئەدەنە.</sup>

^18/5/2015

<sup>بنێشتی کوردی ، ئەو بنێشتە تایبەتە کوردییەی کە جگە لە کورد، داواکاریی زۆربەی عەرەب و فارسەکانیشە، کە لەدوای کۆتاییهاتنی وەرزی بارانبارین و دەستپێکردنی وەرزی گەرما بنێشتە تاڵی دارەبەنەکان لەلایەن جووتیارانەوە کۆدەکرێنەوە و بەو کەسانە دەفرۆشرێت کەبنێشی کوردی لێ دروستدەکەن.

شێوازی دروستکردنی بنێشتەکە جیاوازە، زۆرجار دەگوترێت جگە لە ئاو چەندین مادەی جۆراوجۆری  تێکەڵ دەکرێت، بەجۆرێک رێژەی ئاو و مادەکانی دیکە لە گیراوەی بنێشتەکەدا زۆرترن لە بنێشتە تاڵەکە، بەمجۆرەش بە تێچوویەکی کەمتری ئاسانتر بنێشتەکە دروستدەکرێت.

خاوەن کۆمپانیایەکی دروستکردنی بنێشتی کوردی، کە تاڵە بنێشتەکەی لە گوندەکانی دەوروبەری سلێمانییەوە دەهێنێت، ساڵانە لە ٢٠/٦ تا ٢٠/٨ بنێشتی کوردی دروستدەکات، دەشڵی جگە لە ئاو هیچ مادەیەک تێکەڵی بنێشەتە تاڵەکە ناکات ، چونکە زۆرترین داواکاری لەسەر ئەو جۆرە بنێشتەیە.

هەر لە کۆنەوە بنێشتی کوردی  وەک دەرمان ناسێنراوە، بەڵام بەقسەی زۆربەی لە هاونیشتمانیان بێت ئەو بنێشتانەی ئێستا لە بازاڕەکاندان لەبری دەرمان خواردنی هەندێک جۆری دەبێت هۆکاری نەخۆشی.</sup>

^18/5/2015

<sup>سەرۆکی پارتی گەلی کۆماری CHP رایدەگەیێنێت، بەپێی ئەو راپرسییانەی بەوان گەیشتوون ، پارتی دیموکراتی گەلان HDP دەتوانێ بەندی سەدا 10 تێپەڕێنێ.

کەمال کڵچدارئۆغڵو، سەرۆکی پارتی گەلی کۆماری CHP رەخنەی لە پڕۆسەی ئاشتی گرت و گوتی: "ئەو پڕۆسەیە لەسەر بێمتمانەیی بونیادنراوە، پێویستە قسەی هادەپەییەکان وەک تەمەننایەک وەربگرین، چونکە کاراکتەری سەرەکی ئۆجەلانە".

بە بۆچوونی کڵچدارئۆغڵو، گەورەترین کارەسات کە رووبەڕووی تورکیا ببێتەوە ئەوەیە کە پارتی داد و گەشەپێدان AKP بە تەنیا دەسەڵات بگرێتەوە دەست، ئەو دەڵێت: "ئەگەر دەتانەوێ تورکیا بخەنە نێو کارەساتێکەوە، ئەوا AKP با بەتەنیا دەسەڵات بگرێتەوە دەست".

کڵچدارئۆغڵو دەڵێ کە داوای کردووە بەندی سەدا 10 لاببرێ، بەڵام دەسەڵات رازینەبوو، "عەیبێکی دیموکراسییە ئەو پارتە سیاسییەی کە سەدا 9 ی دەنگەکان بەدەستبهێنێ نەتوانێ بێتە پەرلەمان، هەر حیزبێک سەدا 1 ی دەنگەکان بەدەستبهێنێ، هەر هیچ نەبێ پێویستە سکرتێرە گشتییەکەی بچێتە پەرلەمان".

هەروەها رەخنە لە پارتی دیموکراتی گەلان HDP دەگرێت و دەڵێ: "ئەگەر هادەپە روون و راشکاوتر بوایە، لەچوارچێوەی چارەسەرکردنی پرسی کورد بەندی سەدا 10 ی دەخستە یەکەم ماددەی چارەسەری".</sup>

^18/5/2015

<sup>دەزگای دادوەریی ئێران رەتیدەکاتەوە، هیچ کەسێک لەو وڵاتە بە هۆکاری سیاسی لەسێدارەدرابێت. داواش لە ناوەندە نێودەوڵەتی و ریپۆرتێرانی نەتەوە یەکگرتووەکان دەکات، "چیدیکە بەرگی سیاسیبوون بەبەر ئەو کەسانەدا نەکەن ، کە بەهۆی ئەنجامدانی چالاکی چەکدارییەوە سزادەدرێن".

دوای بێدەنگییەکی چەندین ساڵە، بەرپرسانی ئێران بە ئاشکرا لە بارەی رەخنە نێودەوڵەتییەکان لە دۆخی مافی مرۆڤ لەو وڵاتە بەدەنگ هاتن. لیژنەی مافی مرۆڤی سەر بە دەزگای دادوەریی ئێران لە بەیاننامەیەکدا وەڵامی بەیاننامەی هاوبەشی ریپۆرتێرانی نەتەوە یەکگرتووەکان لەبارەی دۆخی مافی مرۆڤ لەو وڵاتە و هەروەها رێژەی زۆری سزای لەسێدارەدانەکان لە ئێران، دەداتەوە.

لیژنەی مافی مرۆڤی ئێران، ئاماری نەتەوە یەکگرتووەکان لەبارەی رێژەی لەسێدارەدراوان لەو وڵاتە لەساڵی 2015 رەتدەکاتەوە و دەڵێت ئەوە راست نییە کە لەماوەی پێنج مانگ و نیوی رابردوودا 340 کەس لە ئێران لەسێدارەدرابن. داواش دەکات ناوەندە نێودەوڵەتییەکان ئەگەر بەڵگەیان لەو بارەوە هەیە بیخەنەڕوو. 

لیژنەی مافی مرۆڤی ئێران لەو بەیاننامەیەدا زۆربەی حاڵەتەکانی لەسێدارەدان بە بازرگانی ماددەی هۆشبەر دەبەستێتەوە و دەڵێت "ئێران لە دراوسێیەتی گەورەترین بەرهەمهێنەری ماددەی هۆشبەری نەریتی جیهاندایە و ساڵانە لەو وڵاتەدا زۆرترین رێژەی ماددە هۆشبەرەکان دەستیان بەسەردا دەگیرێت".

لە یاسای ئێراندا زیندانی سیاسی پێناسە نەکراوە و گیراوە سیاسییەکان بە زیندانیانی ئەمنییەتی ناو دەبرێن. لە بەیاننامەکەی لیژنەی مافی مرۆڤی ئێرانیشدا هاتووە، "بانگەشەی لەسێدارەدانی زیندانیانی سیاسی بەتەواوی درۆیە" و داوا دەکات چیدیکە ئەو کەسانەی بەهۆی چالاکی چەکدارییەوە سزا دەدرێن نەخرێنە ژێر ئاڵای زیندانی سیاسی. ئاماژە بەوەشکراوە کە لە رەوتی دادوەریدا، رەگەز، مەزهەب و حاڵەتی نەتەوەیی تاوانباران لەبەرچاو ناگیرێت. واتا هەموو لەبەرامبەر یاسادا بەرابەرن. بەڵام لە بەرامبەردا، حکومەتی ئێران بەوە تۆمەتبارە کە تۆمەتی ئەمنی بۆ چالاکڤانانی سیاسی و مەدەنی دادەتاشێت و زۆرجار هەر ئەو تۆمەتەیان لێدەکرێتە بیانوو بۆ ئەوەی کە قورسترین سزا، واتا لەسێدارەدانیان بەسەردا بسەپێت.

رێکخراوە نێودەوڵەتییەکانی پارێزەری مافی مرۆڤیش رەخنە لە یاسا، سیستەمی دادوەری و شێوازی هەڵسوکەتی دامودەزگا ئەمنییەکان لەگەڵ دەستگیرکراوان دەگرن. بەپێی ئاماری ناوەندە جیهانییەکانیش، ئێران لەرووی رێژەی زۆری لەسێدارەدانەوە، لە پلەی دووەمی جیهاندایە و لە ریزی پێشەوەی ئەو وڵاتانەدایە کە زۆرترین رێژەی رۆژنامەوانیان تێدا بەنکراوە.</sup> 

rudaw

^18/5/2015

<sup>دوای ئەوەی دادگای میسر بڕیاری لە سێدارەدانی بۆ محەممەد مورسی، سەرۆکی لەکارلادراوی میسر دەرکرد، وەزارەتی دەرەوەی ئەمریکا ئەو بڕیارەی بە ناکۆک لەگەڵ یاسا وەسفکرد و سکرتێری گشتی نەتەوەیەکگرتووەکانیش نیگەرانی خۆی لەو بڕیارە نەشاردەوە.

وەزارەتی دەرەوەی ئەمریکا رایگەیاند، بڕیاری لەسێدارەدانی محەممەد مورسی، لەگەڵ سەروەری یاسا ناکۆکە.

هاوکات گوتەبێژی سکرتێری گشتیی نەتەوەیەکگرتووەکان بان کی مۆن، نیگەرانی خۆی لە  رەوانەکردنی فەرمانی لەسێدارەدانی مورسی بۆلای موفتی میسر بەمەبەستی دەربڕینی بۆچوونی خۆی سەبارەت بە بڕیارەکەی دادگا دەربڕی.

دادگای تاوانەکانی میسر رۆژی شەممە16 ی ئایار بڕیاری سزای مەرگی بەسەر محەممەد مورسی سەرۆکی پێشووی میسر و یەکەمین سەرۆکی هەڵبژێردراوی دوای بەهاری عەرەبی میسردا سەپاند و دۆسیەکەی رەوانەی موفتی گەورەی میسر کرد.

محەممەد مورسی سەرکردەی ئیخوان یەکەمین سەرۆکی هەڵبژێردراوی میسر بوو، لە دوای شۆڕشی ٢٥ی یەنایەری 2012، بەڵام لە مانگی حوزەیرانی 2013 بە کودەتایەکی سەربازی لەلایەن عەبدولفەتاح سیسی وەزیری بەرگری ئەوکاتەی میسر و سەرۆکی ئێستای میسر لەسەر کار لادرا، لەوکاتەشەوە بزووتنەوەی ئیخوان وەک رێکخراوێکی نایاسایی لە میسردا قەدەغەکراوە.</sup>

^17/5/2015

<sup>ساڵانە سوێد چەک بە ٧٥ وڵات دەفرۆشێت، کە لەنێویاندا ٢٦ وڵاتیان حوکمی دیکتاتۆرین و  مافەکانی مرۆڤ تێیاندا پیشێل دەکرێت یانیش ئازادی تێیاندا سنووردارە.

رۆژنامەی SVD ی سوێد لە راپۆرتێکدا ناوی ئەو وڵاتانە ئاشکرادەکات کە سوێد ساڵانە چەکیان پێدەفرۆشێت. 

پەیماننامەی فرۆشتنی چەک بە سعودییە بوو بە باس و خواسێکی گەرمی سیاسی لە کۆتایی زستانی ئەمساڵدا، کە دواتر حکومەتی سوێد ناچاربوو، پەیماننامەکەی هەڵوەشێنێتەوە.

بەگوێرەی قسەی نوێنەرانی رێکخراوی فریدۆم هاوس، تەنیا لە نێوان ساڵانی ٢٠١١ تا ٢٠١٣ بایی یەک ملیار دۆلار، چەک بە تایلاند فرۆشراوە. 

لە ١٠ وڵات لەو ٢٦ وڵاتەی کە سوێد چەکی پێ فرۆشتوون، تاوانی گەورە دژی مافەکانی مرۆڤ ئەنجامدراون، کە ئەمانەن: تایلاند، پاکستان، ئیمارات، بەحرەین، کوەیت، عومان، میسر، بروونی و جەزائیر و سعودییە. هەروەها چەکی سوێدی بە وڵاتانی دیکە کە کێشەی دیموکراتی یان پێشێلکردنی مافی مرۆڤیان تێدایە وەکو تورکیا، مالایسیا، رووسیا، مەکسیک، بەنگلادش و کازاخستان.

قسەکەری لێبوردنی نێودەوڵەتی (ئەمنستی ئینتەرناشناڵ)  لقی سوێد، ئیلیسابێس لۆفگرێن، داوا دەکات کە دەبێت فرۆشتنی چەک و هەناردەکردنی بۆ ئەو وڵاتانەی تاوانی دژەمرۆڤایەتیان تێدا ئەنجام دەدرێت هەرچی زووترە رابگیرێت.
 
سیمۆن ویزمان، لێکۆڵەر لە ئینیستوتی  SIPRI (ئینیستوتی ئاشتی نێونەتەوەیی لە سوێد)، پێیوایە هەناردەکردنی چەک لە لایەن سوێدەوە نیشانەی پرسیاری لەسەرە بەتایبەتی فرۆشتنی فڕۆکە بە تایلاند و ئیمارات، هەروەها سیستمی چاودێری بە پاکستان. ئیمارات کەڵک لە چەکی سوێدی وەردەگرێت لە شەڕی یەمەن و هەروەها پاکستان لە دژی تاڵیبان بەکاریدەهێنێت.

لە لایەکی دیکەوە چەکی سوێدی دەستاودەستی پێدەکرێت و دەفرۆشرێنەوە، بۆ نموونە بە وڵاتانی وەکو سووریا (١٩٩٤)، سعودیە (٢٠٠٥)، عێراق (٢٠١٤).  ویزمان، پێیوایە زۆر زەحمەتە بتوانرێت رێگری لە فرۆشتنی چەکی سوێدی بە دەستی دوو بگیرێت.

خالید ئیبراهیم، بەرپرسی سەنتەری جەزیرەی مافی مرۆڤ، داوا دەکات سوێد بیر لەوە بکاتەوە کە مرۆڤ چۆن لەو وڵاتانەی چەکی پێ دەفرۆشێت مامەڵەی لەگەڵ دەکرێت. "تەنیا نووسینێکی کورت لە تویتەر بەسە کە مرۆڤ بخرێتە زیندانەوە. چالاکوانان بێسەروشوێن دەکرێن وەکو تاونبار سەیریان دەکرێت و ئەشکەنجە دەدرێن. ئیدی چۆن دەبێت وڵاتێکی دیموکراتی وەکو سوێد، چەک بە دیکتاتۆرەکان بفرۆشێت. تکایە ئەوەی لەگەڵ سعودییە کردتان لەگەڵ وڵاتانی دیکەیش هەمان هەڵویستان هەبێت. دەبێت وڵاتێک دەستپێشخەر بێت، تا وڵاتانی دیکەیش چاوی لێ بکەن"، ئەوە قسەی خالید ئیبراهیمە بۆ رۆژنامەی سڤێنسکا داگبلادت.
 
حکومەتی سوێدی نایەوێت هیچ لەو بارەیەوە بڵێت و تەنانەت پارتەکانی ناو پەرلەمانیش بێدەنگییان هەڵبژاردووە، بەقسەی خۆیان چاوەڕێی ئەو لێکۆڵینەوە دەکەن کە بڕیارە پەرلەمان لەو بارەیەوە ئەنجامیبدات.</sup> 

^17/5/2015

<sup>جەنان حەرب، ئەو ژنەی کە هەڵگری رەگەزنامەی بەریتانی و بەڕەگەز فەڵەستینییە،  نهێنییەکی بنەماڵەی شای سعودیە دەدرکێنێ و ئاماژە بەوەدەکات ، کە لەساڵی ١٩٦٨ کە تەمەنی ١٩ ساڵ بووە، بە نهێنی شووی بە مەلیک فەهد بن عەبدولعەزیز کردووە، کە ئەوکات فەهد بن عەبدولعەزیز لەیەککاتدا مەلیک و وەزیری ناوخۆی عەرەبستانی سعودیە بووە و لە کۆشکی شەرقیە لە خۆرئاوای لەندەن ئاهەنگەکەیان ئەنجامداوە.

جەنان حەرب لە هەڤپەیڤینێکدا نهێنی ژیانی خۆی لەگەڵ مەلیکی کۆچکردووی سعودیە ئاشکرادەکات ودەڵێ: "ئێمە لە بەریتانیا یەکدیمان ناسی و عاشقم بوو، دواتر داوای لێکردم هاوسەرگیریی لەگەڵ بکەم، بەڵام ئەو هاوسەرگیرییە بە نهێنی بێت و کەس پێی نەزانێت ، منیش رەزامەندیم پیشاندا و هاوسەرگیرییەکەمان ئەنجامدا".

ئەو هاوژینەی مەلیک فەهد ئەوەی ئاشکراکردووە، کە گرێبەستی مارەییەکەی ١٢ ملیۆن جونەی ئیستەرلینی بووە، کە بەرامبەرە بە ١٦ ملیۆن یۆرۆ، بەڵام تائێستا ئەو پارەیەی وەرنەگرتووە و لە یەکێک لە دادگاکانی بەریتانیا سکاڵای لەسەر بنەماڵەی مەلیک فەهد تۆمارکردووە و داوای ئەو بڕە پارەیە دەکات، کە وەک مارەیی هاوسەرگیرییەکەی بۆی دیاریکراوە.

 جەنان ئاماژە بەوەدەکات ساڵی ٢٠٠٣ دووساڵ بەر لە کۆچکردنی مەلیک فەهد، لە هۆتێل دورچسەر لە لەندەن لەگەڵ مەلیک عەبدولعەزیز کۆبووەتەوە و بەڵێنی پێداوە کە بڕی ١٢ ملیۆن یۆرۆی بۆ خەرج بکات، بەڵام تائێستا وەرینەگرتووە.</sup> 

^17/5/2015