^{پەرلەمانتارێکی کورد لە پەرلەمانی عێراق رایدەگەیەنێت، کە پرۆسەی رزگارکردنەوەی موسڵ کەمتر لە دوو مانگی دیکە دەستپێدەکات و یەکەم هەنگاویش ئاشکرادەکات.}

^{شاخەوان عەبدوڵڵا، ئەندامی لیژنەی ئاسایش و بەرگریی لە پەرلەمانی عێراق  بە باسنیوزی راگەیاند، کە فەرماندەی پرۆسەی رزگارکردنەوەی موسڵ لەگەڵ هێزەکانی هاوپەیمانان بڕیاریان داوە، کە یەکەم هەنگاوی ئازادکردنەوەی موسـل، کۆکردنەوەی ئەو پۆلیسی ناو شار، پۆلیسی سنوور و ئەو ئەندامانەی هێزە ئەمنییەکانە، کە ئێستا لە سنووری  پارێزگای ئەنبارن.}

^{شاخەوان عەبدوڵڵا ئاماژەی بەوەشکرد، کە لیژنەکەیان بانگهێشتی فەرماندەی پرۆسەی ئازادکردنەوەی موسڵیان کردووە، کە بارەگاکەی لە شاری هەولێرە و پرسیاریان لە بارەی پرۆسەکەوە لێکردووە.}

^{بەپێی گوتەکانی ئەو پەرلەمانتارە، سەرکەوتنی هێزەکانی عێراق لە ئازادکردنەوەی موسڵ، بەندە بە سەرکەوتنی سوپای عێراقی لە رزگارکردنەوەی ئەنبار و پرۆسەکە لە ماوەی مانگێک تاوەکو دوو مانگی دیکە دەستپێدەکات.}

^{شاخەوان عەبدوڵڵا لەبارەی بەشداریی پێشمەرگە لە شەڕی رزگارکردنەوەی موسڵ، رایگەیاند، کە ”بێگومان“ هێزەکانی پێشمەرگەی کوردستان بەشداریی دەکات.}

^{ئەو ئەندامەی لیژنەی ئاسایش و بەرگریی پەرلەمانی عێراق هەروەها ئاماژەی بەوەشکرد، کە لە ئەگەری رزگارنەکردنەوەی ئەو شارە لەلایەن هێزەکانی عێراقییەوە، ئەوا شارۆچکەی حەمدانییە و ناوچە مەسیحینشینەکان رزگاردەکرێنەوە، چونکە هێزەکانی هاوپەیمانان جەخت لە رزگارکردنەوەی ئەو ناوچانە دەکەنەوە، بۆ دوورخستنەوەی مەترسییەکانی داعش لە هێزەکانی پێشمەرگە.}

^{رۆژی 10ـی حوزەیرانی 2014، رێکخراوی دەوڵەتی ئیسلامی (داعش)، هێرشی کردە سەر شاری موسڵ و بەشێک لە شار و شارۆچکەکانی پارێزگای نەینەوا و پارێزگا سوننەنشینەکانی عێراقی کۆنترۆڵی کرد.}

^12/9/2015

^{سەرچاوەیەک تایبەت ئاماژە بەوە دەکات: داعش بەشێک لە هێزەکەی کشاندوەتەوە بۆ سوریا و لە سنووری پێشمەگەش پاشەکشەی کردووە. 
سەرچاوەیەک تایبەت بە (باسنیوز)ی راگەیاند: داعش زیاد لە 50 ئۆتۆمبێلی جۆری “موهافی” لەموسڵەوە کشاندوەتەوە بۆ سوریا و تەواوی چەکدارە عەرەبییەکانی وڵاتانی عەرەبی لەشارەکەوە هێناوەتە دەرەوە و هیچ زانیاریەکیش لەسەر هۆکاری کشانەوەیان نییە. 
هاوکات ترسێکی زۆر لەناو داعش دروست بووە، بەتایبەتی دوای شکستیان لە باشووری کەرکووک و شکستیان لەهێرشکردنە سەر شنگال و شکانیان لە بێجی. 
ئەو سەرچاوە ئەوەشی خستەروو: زیاد لە ٥٠ پارچە چەکی قورسی داعش بەتایبەتی ئۆتۆمبیلی درع لە موسڵەوە براون بۆ ڕەقە.}

^12/9/2015

^{شاندێکی پەرلەمانی یەکێتیی ئەوروپا سەردانی هەرێمی کوردستان دەکەن و لەسەر چەند پرسێکی هاوبەش و ئەوروپی، راوێژ بە بارزانی دەکات.}

^{ئەمڕۆ شەممە 12ـی ئەیلول، شاندێکی پەرلەمانی یەکێتیی ئەوروپا بە سەرۆکایەتیی چارڵز تەنۆک، پەرلەمانتاری فراکسیۆنی پارێزگاران و ریفۆرمخوازانی فراکسیۆنە گەورەکانی پەرلەمانی یەکێتیی ئەوروپا، سەردانی کوردستانیان کرد و لە دیدارێکدا لەگەڵ مەسعود بارزانی، سەرۆکی هەرێمی کوردستان، پشتگیریی تەواوی خۆیان بۆ هەرێمی کوردستان دەربڕیوە.}

^{شاندەکەی پەرلەمانی یەکێتیی ئەوروپا، داوای لە مەسعود بارزانی کردووە، راوبۆچوونی خۆی لەبارەی کێشەی پەنابەران، شەڕی رێکخراوی دەوڵەتی ئیسلامی (داعش) و قەیرانەکانی عێراق، بۆ شاندەکە و پەرلەمانی ئەوروپا بخاتەڕوو.}

^{دەقی راگەیەندراوی سەرۆکایەتیی هەرێمی کوردستان:}

ڕۆژی شەممە ١٢ـی ٩ـی ٢٠١٥ لە سەلاحەدین بەڕێز مەسعود بارزانی سەرۆکی ھەرێمی کوردستان پێشوازی لە شاندێکی پەرلەمانی ئەوروپا بە سەرۆکایەتی چارڵز تەنۆک ئەندام پارلەمانی فراکسیۆنی پارێزگاران و ڕیفۆرمخۆازان کرد کە لە نوێنەرانی فڕاکسیۆنە گەورەکانی نێو پەرلەمانی ئەوروپا پێکھاتبوو.

لە دیدارەکەدا شاندی میوان پشتگیریی تەواوی خۆیان بۆ ھەرێمی کوردستان و پڕۆسەی سیاسی و بووژانەوە و ئەو کرانەوە و پێشڤەچوونە نیشان دا کە لە ھەرێمی کوردستان لە ئارا دایە. ھەروەھا پیرۆزبایی سەرکەوتنەکانی پێشمەرگە و ستاییشی ڕۆڵی سەرۆک بارزانی و گیانفیدایی و قارەمانێتیی ھێزی پێشمەرگەی کوردستانیان کرد لە شەڕی دژی تیرۆریستان و سەرەخۆشییان لە سەرۆک بارزانی و کەسوکاری ئەو پێشمەرگانە کرد کە لەشەڕی تیرۆردا گیانی خۆیان فیدا کردووە و شەھید بوونە. ھەروەھا وێڕای ئاماژەدان بە ھاتنی لێشاوی پەنابەران بەرەو ئەوروپا سوپاسی خەڵک و حکوومەتی ھەرێمی کوردستانیان کرد کە سەدانھەزار ئاوارەیان حەواندووەتەوە و بوونەتە پەناگەی خەڵکی لێقەوماو و پەنابەر. شاندی میوان پشتیوانی خۆیان بۆ پێشکەشکردنی ھاوکاریی سەربازی و مرۆیی بۆ ھەرێمی کوردستان دووپات کردەوە لەشەڕی دژی تیرۆریستان.

ھەر لەم دیدارەدا شاندی پارلەمانی ئەوروپا داوایان لە سەرۆک بارزانی کرد کە ڕێنوێنی و بۆچوونی خۆی لەبارەی چارەکردنی کێشەی پەنابەران و شەڕی تیرۆریستان و چارەسەری گرفت و قەیرانە قووڵەکانی عێراق و ناوچەکە بخاتەڕوو.

لەبەرانبەردا سەرۆک بارزانی سوپاسی ھەڵوێستی شاندی میوان و دۆستان و ھاوپەیمانانی گەلی کوردستان کرد و لە گوتەیەکدا باسی لە ھەڕەشەی تیرۆریستان بۆسەر ئاساییشی ناوچەکە و جیھان کرد و باسی لە قارەمانێتی پێشمەرگە کرد لە شکاندنی ئەفسانەی داعش و پاراستنی پێکھاتە نەتەوەیی و ئایینییەکانی عێراق لە دەستی تیرۆریستان و ئەوەی دووپات کردەوە کە ڕووبەڕووبوونەوەی تیرۆر پێویستی بە ھەوڵی عەمەلی و جددی ھەموو لایەکە و بە پێویستیشی زانی کە نابێ تەنا مامەڵە لەگەڵ دەرئەنجامەکانی ئەم قەیرانە قووڵانە بکرێت کە بەرۆکی ناوچەکە و جیھانی گرتووەتەوە بەڵکو پێویستە ھۆکارەکانی ئەو قەیرانانە بنبڕ بکرێن. جەختیشی لەوە کردەوە کە شەڕی تیرۆریستان تەنیا نابێ لایەنی سەربازی بگرێتەوە بەڵکو دەبێ لەڕووی فکری و ئابووری و کۆمەڵایەتیش شەڕی تیرۆر و توندڕۆیی بکرێت. سەبارەت بە ھاتنی لێشاوی پەنابەران بەرەو ئەوروپا سەرۆک بارزانی ئاماژەی بەوەدا کە چارەسەر نەکردنی کێشەکان و بارودۆخی سەختی ژیان و ھەڕەشە بەردەوامەکان ھانی خەڵکی ئاوارەی داوە ڕوو لە ئەوروپا بکەن. بە باشیشی زانی کە کۆمەڵگەی نێودەوڵەتی یارمەتیی ئەو ئاوارانە بدات کە لە وڵاتانی لوبنان و ئۆردۆن و تورکیا و کوردستان لە نێو کەمپەکاندا دەژیین و لەھەمانکاتیشدا شەڕی تیرۆر و قەیرانی سووریا بە خێرایی یەکلایی ببێتەوە بۆ ئەوەی ئومێد بۆ خەڵک بگەڕێتەوە و ڕێگەی کۆچ نەگرنە بەر. ئەوەیشی خستەڕوو کە ھەرێمی کوردستان دەرگەی بۆ ئاوارە و لێقەوماوان کراوەیە بەڵام ژمارەی ئاوارەکان ئەوەندە زۆرە کە لە توانای کوردستان چووەتە دەر.

لەبارەی ھەڵگیرسانەوەی شەڕی نێوان سوپای تورکیا و پارتی کرێکارانی کوردستان سەرۆک بارزانی ئاماژەی بەوەدا کە پێشتر ھەنگاوی باش بۆ پڕۆسەی ئاشتی نرابوو و جێگەی داخە شەڕ دەستی پێکردووە کە زیان لە پڕۆسەکە دەدات و ھەرێمی کوردستانیش بەردەوام دەبێت لە ھەوڵەکانی بۆ ڕاوەستانی شەڕ و گەڕانەوەی لایەنەکان بۆ مێزی گفتوگۆ.

^{سەرۆكی هەرێمی كوردستان لە دیدارێکی لەگەڵ کۆنسووڵی نوێی ئەڵمانیا لە هەرێمی کوردستان بارودۆخی هەرێمی کوردستان و پەیوەندیی نێوان هەردوو لایەنیان تاوتوێ کورد.}

^{ئەمڕۆ شەممە 12 – 9 – 2015 لە سەڵاحەدین مەسعوود بارزانی سەرۆكی هەرێمی كوردستان پێشوازی لە “مارک ئایشهۆڕن” كۆنسووڵی گشتیی نوێی ئەڵمانیا لە شاری هەولێر كرد.}

^{لە دیدارەكەدا كۆنسوڵی نوێی ئەڵمانیا خۆشحاڵیی خۆی دەربڕی و زۆر سوپاسی سەرۆک بارزانی کرد بۆ ڕەخساندنی دەرفەتی دیدارەکە و بە شانازییەکی گەورەی وەسف کرد.}

 ^{هەروەها خۆشحاڵیی خۆی بۆ وەرگرتنی ئەرکی نوێی وەک کونسووڵی گشتیی ئەڵمانیا لە کوردستان ڕاگەیاند و ئامادەیی خۆی و وڵاتەکەیشی پێشان دا کە لە هەموو بوارەکاندا پەیوەندییەکانیان لەگەڵ هەرێمی کوردستان پەرە پێبدەن.}

^{کونسووڵی نوێی ئەڵمانیا ڕایگەیاند کە ئەوان دەخوازن نەک هەر لە بواری هاوکاریی سەربازی، بەڵکوو لە هەموو بوارەکانی دیکەدا و بەتایبەتییش پەرەپێدانی ئابووری، هاوکاریی هەرێمی کوردستان بکەن. ئەوەیشی ڕاگەیاند کە ئەڵمانیا دەزانێت کە باری هەرە قورسی شەڕی داعش لەسەر شانی پێشمەرگەیە، بۆیە زۆر مەبەستیانە زیاتر هاوکاریی پێشمەرگە بکەن.}

 ^{پیرۆزباییشی لە سەرۆک بارزانی و پێشمەرگەی کوردستان کرد بۆ ئەو سەرکەوتنەی ڕۆژی هەینی ڕابردوو لە میحوەری باشووری کەرکووک وەدەستیان هێناوە.}

^{کونسووڵی ئەڵمانیا ڕاشیگەیاند کە سوپاسی پێشمەرگەی کوردستان دەکەین کە توانیویانە مەترسیی داعش کەم بکەنەوە و بیوەستێنن، لەمەودواش لەگەڵ دۆستانی دیکەمان لە ئەورووپا ئەرکێکی دیکەمان دەبێت کە هەوڵەکانمان یەک بخەین و هاوکار بین بۆ گەشەی ئابووری لە هەرێمی کوردستان، بۆ ئەوەی هەرێمی کوردستان، کە لەم ناوچەیەدا نموونەیەکی گەشی سەقامگیرییە، هەروا سەقامگیر بێت و ئاسۆیەکی ڕوون و گەش لە پێشکەوتن و سەقامگیریی زیاتری ئابوورییش بەخۆیەوە ببینێت.}

^{جەختیشی کردەوە کە گەل و حکوومەتی ئەڵمانیا ئێستە و داهاتووش هەر پشتیوانی گەلی کوردستان دەبن و هیوای داهاتوویەکی گەش بۆ کوردستان دەخوازن.}

^{لە بەرانبەردا سەرۆك بارزانی وێڕای بەخێرهێنانی کونسووڵی نوێی ئەڵمانیا، پیرۆزبایی وەرگرتنی ئەو ئەرکە نوێیەی لە مارک ئایشهۆڕن کرد و هیوای سەرکەوتنی بۆ خواست.}

^{سەرۆک بارزانی پەیوەندییەكانی نێوان گەلی كوردستان و گەلی ئەڵمانیای بە دۆستانە و نموونەیی وەسف كرد و ئامادەیی هەرێمی کوردستانیشی بۆ پەرەپێدانی زیاتری پەیوەندییەکان لەگەڵ ئەڵمانیا پێشان دا.}

 ^{هەروەها سوپاسی گەل و حكوومەتی ئەڵمانیاشی كرد كە لە شەڕی دژی تیرۆریستاندا هاوكاریی كاریگەریان پێشكەشی هێزی پێشمەرگەی كوردستان كردووە. داوایشی كرد پەیوەندییەكانی نێوان هەردوولا فراوانتر بكرێت و دەستخۆشیی لەو هەوڵانە کرد کە بەمەبەستی پەرەپێدانی ئابووریی خستوویانەتە بەرنامەی کاری خۆیان.}

^12/9/2015

^{جێگری ئەمیری قەتەر، پەیامێک بۆ کیم جۆنگ ئون، سەرۆکی کۆریایباکوور دەنێرێت و تێیدا پیرۆزبایی لێدەکات.}

^{شێخ عەبدوڵڵا بن حەمەد ئال سانی، جێگری تەمیم بن حەمەد ئال سانی، ئەمیری قەتەر، پیرۆزبایی رۆژی سەربەخۆیی کۆریای باکوور لە کیم جۆنگ ئون دەکات.}

^{کۆریای باکوور بە سەرۆکایەتیی کیم ئیل سونگ، باپیرەی سەرۆکی ئێستا، لە بەرواری 9ـی ئەیلولی 1948، سەربەخۆیی خۆی لە داگیرکاریی ژاپۆن وەرگرت و ئەو رۆژە کرایە رۆژی نیشتیمانیی ئەو وڵاتە.}

^11/9/2015

^{نوسینگه‌ی لێكۆڵینه‌وه‌ی فیدراڵی ئاشكرای كرد كه‌له‌یادی ڕووداوه‌كه‌ی 11/سێپته‌مبه‌ردا، گومانلێكراوێك ده‌ستگیركرا كه‌له‌ڕێی ئینته‌رنێته‌وه‌ ئامۆژگاری بڵاوكردۆته‌وه‌ سه‌باره‌ت به‌دروستكردنی بۆمب بۆ هێرشكردنه‌ سه‌ر مه‌راسیمێكی یاده‌وه‌ری كه‌بڕیاروایه‌ له‌ كنساس لهڕۆژی 13ی ئه‌م مانگه‌دا به‌ڕێوه‌بچێت.}

^{به‌گوته‌ی نوسینگه‌ی لێكۆڵینه‌وه‌ی فیدراڵی، گومانلێكراوه‌كه‌ ناوی”جۆشوا ڕاین گۆڵدبێرگ”ه‌ و، ته‌مه‌نی 20 ساڵه‌ و له‌شاری فلۆریدا ده‌ژی. له‌ژێر ناوی” بینه‌رێكی ئوسترالی”دا پۆستی كردووه‌. له‌به‌شێك له‌پۆسته‌كانیدا خۆی به‌موسوڵمانێك ناساندووه‌ كه‌له‌ ئوستورالیا ده‌ژی و بانگه‌شه‌ی بۆ جیهاد كردووه‌.}

^{نوسینگه‌ی لێكۆڵینه‌وه‌ی فیدراڵی جه‌خت له‌وه‌ ده‌كاته‌وه‌ كه‌ یه‌كێك له‌سیخوڕه‌كانی له‌ڕێی نامه‌ی ڕاسته‌وخۆوه‌ په‌یوه‌ندی به‌و گومانلێكراوه‌وه‌ كردووه‌و، پێكه‌وه‌ قسه‌یان كردووه‌ له‌سه‌ر چونێتی دروستكردنی بۆمب له‌ناو مه‌نجه‌ڵی سه‌ر قه‌پاتدا. بڕیاریانداوه‌ ئه‌و بۆمبه‌ له‌ناو مه‌راسیمه‌كه‌ی كنساسدا بته‌قێننه‌وه‌.}

^{داواكاری گشتی ئه‌مریكا ڕایگه‌یاند: ” گۆڵدبێرگ به‌تۆمه‌تی بڵاوكردنه‌وه‌ی زانیاری سه‌باره‌ت به‌ چۆنێتی دروستكردنی ته‌قینه‌وه‌ ده‌ستگیركراوه‌. هاوكات زانیاری بڵاوكردۆته‌وه‌ سه‌باره‌ت به‌چۆنێتی دروستكردنی چه‌كی كۆمه‌ڵكوژ”.}

^11/9/2015

^{هەوڵنێرە جیهانییەکان بڵاویان کردووەتەوە، ئێران و یۆنان رێگە بە رووسیا دەدەن یارمەتیی سووریا بكات.}

^{ئاژانسی ھەواڵنێری “ئیتارتاس”ی سەر بە رووسیا نووسیویەتی: مۆڵەت بە روویا دراوە لە ئێرانەوە هاوکاری سووریا بکات و ئەو مۆڵەتەش كۆتاییەكانی مانگی رابردوو بە رووسیا دراوە و بۆ 3 ھەفتە كاری پێدەكرێ.}

^{ھەواڵنێری ئینتەر فاكسی رووسیش لەزاری دیپلۆماتێكی ئەو وڵاتەوە لە تاران نووسیویەتی: ” ئێران لەگەڵ ھەموو داواكانی مۆسكۆ سەبارەت بە گەیاندنی یارمەتیی مرۆڤدۆستانە بۆ سووریا رێككەوتووە.”}

^{ھاوكات پلەبەرزێكی سوپای سووریاش ئەو ھەواڵەی پشتڕاست كردووەتەوە كە رووسیا لە رێگەی ئاسمانیی ئەو دوو وڵاتی ئێران و یۆنانەوە ھاوكاریی سووریا دەكات.}

^{پێشتر ئەمەریكا نیگەرانیی خۆی لە بوونی سەربازانی رووسی لە سووریا دەربڕیبوو و داوای لە یۆنان و بولگاریا كردبوو رێگە بە فڕۆكەكانی رووسیا لە ئاسمانی وڵاتەكەیان نەدەن.}

^{یەکێتیی ئەورووپا و ئەمەریکاش بە توندی رەخنەیان لە جموجٶلی سەربازیی رووسیا لەناو خاکی سووریا گرتووە.}

^11/9/2015

^{به‌ هۆى گه‌نده‌ڵى ودزێتی سه‌روه‌ت وسامانى گشتییه‌وه‌ كوڕه‌كه‌ى ماليكى وژماره‌یه‌ك وه‌زیرى پێشووى عێراق ڕووبه‌ڕووى دادگا ده‌كرێنه‌وه‌. 
له‌مباره‌یه‌وه‌ “ئه‌حمه‌د چه‌له‌بى” ئه‌ندامى هاوپه‌یمانى نیشتیمانى وسه‌رۆكى لێژنه‌ى دارایى له‌ په‌رله‌مانى عێراق، له‌ په‌یجه‌كه‌ى خۆى له‌ فیسبووك ڕاگه‌یاندووه‌ كه‌ به‌ هۆى دزێتى وگه‌نده‌ڵییه‌وه‌ ژماره‌یه‌ك به‌رپرس ڕووبه‌ڕووى دادگا ده‌كرێنه‌وه‌ له‌وانه‌ “ئه‌حمه‌دى كوڕى نورى ماليكى” ویاریده‌ده‌ره‌كه‌ى له‌گه‌ڵ “به‌ها ئه‌عره‌جى” و”عه‌بدولقادر عوبه‌یدى” وه‌زیرى پێشووى به‌رگرى عێراق و”محه‌ممه‌د ته‌میم” وه‌زیرى پێشووى په‌روه‌رده‌و “عادل موحسین” پشكێنه‌رى گشتى پێشووى وه‌زاره‌تى ته‌ندروستى و300 كه‌سى دیكه‌ كه‌ ئه‌مانه‌ هه‌موویان دۆسییه‌كانیان ڕه‌وانه‌ى دادگا كراون. 
چه‌له‌بى له‌ ئاكاونتى په‌یجه‌كه‌یدا ئاماژه‌ى به‌ ئه‌نجامدانى كۆمه‌ڵێك گه‌نده‌ڵیداوه‌ كه‌ له‌ لایه‌ن مالكى وئه‌حمه‌دى كورى ئه‌نجامدراوه‌ كه‌ له‌و گه‌نده‌ڵیانه‌ ژماره‌یه‌ك ئه‌فسه‌ر تێوه‌گلاون ئێستا ئه‌فسه‌رن له‌ نووسینگه‌ى حه‌یده‌ر عه‌بادى سه‌رۆك وه‌زیرانى عێراق.}

^11/9/2015

^{دامه‌زراوه‌ی ئه‌زهه‌ر كه‌ دیارترین دامه‌زراوه‌ی سوننه‌كانی جیهانه‌، سه‌باره‌ت به‌سوتاندی مزگه‌وتی گه‌وره‌ی”ئه‌لموسه‌ننا” له‌ گه‌ڕه‌كی قاهیره‌ی شاری به‌غدا، هاته‌ ده‌نگ و به‌توندی ئه‌و كاره‌ی شه‌رمه‌زاركرد. ئه‌وه‌ له‌كاتێكدایه‌ كه‌ڕاپۆرته‌ میدیاییه‌كان له‌به‌غداوه‌ باس له‌وه‌ ده‌كه‌ن كه‌ چه‌كداره‌ شیعییه‌كان چوونه‌ته‌ ناو مزگه‌وته‌كه‌وه‌و، بڵندگۆی مزگه‌وته‌كه‌یان به‌كارهێناوه‌ بۆ جنێودان به‌ هاوه‌ڵانی پێغه‌مبه‌ری ئیسلام و دواتریش مزگه‌وته‌كه‌یان سوتاندووه‌.}

^{پێشتر “ده‌سته‌ی زانایانی موسوڵمان” په‌خشنامه‌یه‌كی ده‌ركرد و تیایدا ئه‌وه‌ی ئه‌و ناو ناون”میلیشیای تایفی” تۆمه‌تباركردووه‌ به‌وه‌ی هه‌ڵیان كوتاوه‌ته‌ سه‌ر ئه‌و مزگه‌وته‌و، له‌پاش جنێودان به‌ هاوه‌ڵانی پێغه‌مبه‌ر له‌ بڵندگۆی مزگه‌وته‌كه‌وه‌، ئاگریان تێبه‌رداوه‌. له‌بڵاوكراوه‌كه‌دا هاتووه‌: ” ئه‌و كاره‌ له‌به‌رچاوی هێزه‌ ئه‌منییه‌كانی به‌غدادا كراوه‌”.}

^{به‌گوێره‌ی بڵاوكراوه‌كه‌ی “ده‌سته‌ی زانایانی موسوڵمان” ئه‌و كاره‌ هیچ گومانێك ناهێڵێته‌وه‌ بۆ ئه‌وه‌ی میلیشیاكان ده‌ستی باڵایان هه‌یه‌ له‌ناو حكوومه‌تدا و ده‌توانن یاری به‌ موقه‌ده‌راتی هاووڵاتییان و گیانی هاووڵاتییان بكه‌ن”.}

^{له‌م میانه‌یه‌دا دامه‌زراوه‌ی ئه‌زهه‌ریش هاته‌ ده‌نگ و له‌بلاوكراوه‌یه‌كدا ڕایگه‌یاند: ” ئێمه‌ به‌وپه‌ری نیگه‌رانییه‌وه‌ چاودێری ئه‌و هه‌واڵانه‌مان كرد كه‌ میدیاكان گواستیانه‌وه‌ سه‌باره‌ت به‌هه‌ڵكوتانه‌ سه‌رمزگه‌وتی گه‌وره‌ی ئه‌لموسه‌ننا، كه‌له‌پاش دزینی كه‌لوپه‌له‌ به‌نرخه‌كانی، له‌بڵندگۆكانییه‌وه‌ جنێو به‌هاوه‌ڵانی پێغه‌مبه‌ر دراوه‌، دواتریش مزگه‌وته‌كه‌ سوتێنراوه‌. جگه‌له‌وه‌ش، ده‌ستڕێژكراوه‌ به‌ناو ئه‌و ماڵه‌ سوننانه‌دا كه‌له‌و ناوچه‌یه‌دا ماونه‌ته‌وه‌”.}

^{ئه‌زهه‌ر له‌درێژه‌ی بڵاوكراوه‌كه‌یدا ده‌ڵێت: ” ئێمه‌ ئه‌و ده‌ستدرێژییانه‌ی میلیشیا تیرۆریسته‌ تایفییه‌كان ئیدانه‌ ده‌كه‌ین. كه‌ئه‌و كارانه‌ هیچیان له‌كاره‌كانی داعش كه‌متر نیه‌”.} 

^11/9/2015

<sup>بۆیه‌كه‌مجار گروپی دۆستانی كوردستان له‌په‌رله‌مانی ئه‌وروپا سه‌ردانی هه‌رێمی كوردستان ده‌كه‌ن و له‌گه‌ڵ سه‌ركردایه‌تی سیاسی هه‌رێمی كوردستان كۆده‌بنه‌وه‌. 

“دلاوه‌ر ئاژگه‌یی” نوێنه‌ری حكوومه‌تی هه‌رێمی كوردستان له‌یه‌كێتی ئه‌وروپا ڕایگه‌یاند: “بڕیارە شاندێکی پەرلەمانی ئەوروپا کە لە گروپی دۆستانی کوردستان لە پەرلەمانی ئەوروپا (European Friends of Kurdistan) پێکهاتووە رۆژی (11-9-2015) بۆ یەکەم جار سەردانی هەرێمی کوردستان بكه‌ن،بڕیارە شاندەکە لە گەڵ سەرکردایەتی سیاسی هەرێمی کوردستان کۆببنه‌وه‌ و سەردانی چەند شوێنێکی تری هەرێمی کوردستان بکه‌ن”. 
ناوبراو ئاماژه‌شی بۆ ئه‌وه‌ كرد كه‌ گروپی دۆستانی کوردستان لە ئەوروپـا یەکەم لۆبی کوردستانە کە بەشێوەکی راسەوخۆ کار دەکات بۆ بەهێز کردنی پەیوەندی لە نێوان هەرێمی کوردستان و یەکێتی ئەوروپا و بە دەسپێشخەری و هاوکاری نوێنەرایەتی حکومەتی هەرێمی کوردستان لە یەکێتی ئەوروپا دامەزراوە بە مەبەستی بەهێز کردنی پێگەی کوردستان لە ناوەندەکانی یەکێتی ئەوروپا.</sup>

^11/9/2015