^{بەرەبەیانی ئەمڕۆ لە زیندانی ناوەندیی سنە لەلایەن دامودەزگەی دادوەری و بەرپرسانی زیندانەوە بەندكراوێكی دیكەی كورد لەسێدارە درا.}

^{بەپێی هەواڵی ناوەندی بەرگری لە مافی مرۆڤی كوردستان، بەرەبەیانی ئەمڕۆ سێشەممە 1 – 9 – 2015 سزای سێدارەی “سەید زاهید حوسێنی” بەندكراوی كوردی خەڵكی شاری سەقز لە زیندانی ناوەندیی سنە بەڕێوە چووە.}

^{ئەو سەرچاوەیە ئاماژەی بەوەش داوە ئەو بەندكراوە كوردە بە تۆمەتی كوشتنی كەسێك سزای سێدارەدانی بۆ بڕاوەتەوە و ماوەی 13 ساڵیش زیندانی كراوە.}

^{سەرچاوەكانی مافی مرۆڤ بڵاویان كردووەتەوە كەلە رۆژانی رابردوودا بەندكراوێكی دیكەی كوردی خەڵكی شاری شنۆ لە زیندانی خوڕەم ئاوا لە پارێزگای لوڕستان لەسێدارە دراوە و پێنجشەممەی هەفتەی بەرێش بەندكراوێكی دیكەی كورد بەناوی “جەمال جەعفەری” لە زیندانی سنە لەسێدارە درا.}

^{لە ماوەی كەمتر لە یەك حەفتەدا سێ‌ بەندكراوی كورد لەلایەن ناوەندە دادوەرییەكانی ئێرانەوە لەسێدارە دراون.}

^{١/٩/٢٠١٥}

<sup>رۆبه‌رت فۆرد، تاوەکو ساڵ و نیوێك پێش ئێستا پیاوی ئه‌مریكا بوو له‌ دیمه‌شق. فۆرد له‌ سووریا بوو كاتێك سوورییه‌كان دژی حكومه‌ته‌كه‌یان راپه‌ڕینیان ده‌ستپێكرد، به‌ڵام ئەو له‌باره‌ی سووریاوە نائومێدده‌بێت له‌ ستراتیژی سه‌رۆكه‌كه‌ی کە باراك ئۆبامایە و ده‌ست له‌كارده‌كێشێته‌وه‌.

كه‌مێك دوای رۆیشتنی فۆرد له‌ پۆسته‌كه‌یدا، ئامانجی ئه‌مریكا 180 پله‌ گۆڕا و له‌ رووخانی ئه‌سه‌ده‌وه‌، ئامانج بووه‌ لێدان له‌ دووژمنێكی ئه‌سه‌د، كه‌ ئه‌ویش رێکخراوی ده‌وڵه‌تی ئیسلامی (داعش)ه، گرووپێكی تووندڕه‌وی ئیسلامی، كه‌ بووەته‌ دووژمنی ئه‌مریكا به‌تایبه‌تی دوای بڵاوكردنه‌وه‌ی ڤیدیۆی كوشتنی دڕندانه‌ی چه‌ند هاووڵاتییه‌كی ئه‌مریكی و رۆژئاوایی له‌لایه‌ن ئه‌م گرووپه‌وه‌. 
 
له‌ دیدارێكی تایبه‌تی رووداودا له‌واشنتنی پایته‌ختی ئەمریکاوە. بۆیه‌كه‌مجار به‌ زۆرترین ورده‌كارییه‌وه‌، فۆرد، هۆكاری ده‌ستله‌كاركێشانه‌وه‌ی له‌ ئیداره‌ی ئۆباما ده‌خاته‌ڕوو. 

قه‌یرانی سووریا بووه‌ته‌ گه‌وره‌ترین قه‌یرانی مرۆیی له‌ جیهاندا كه‌ تاوەکو ئێستا 250 هه‌زار كه‌سی تێدا كوژراوه‌ و ملیۆنه‌هاش ئاوه‌ره‌و بێ ماڵ و حاڵ بوون. رۆبه‌رت فۆرد ده‌ڵێت "ره‌نگه‌ رووخاندنی ئه‌سه‌د هیچی دیکە بیرۆكه‌یه‌کی باش نه‌بێت". 

هه‌ركاتێک‌ قه‌یرانی سووریا قوڵتر ده‌بێته‌وه‌، كورد زیاتر ده‌ستكه‌وت به‌ده‌ستده‌هێنن. فۆرد پێشبینی دروستبوونی كیانێكی كوردی ده‌كات له‌و وڵاتەدا‌.

فۆرد ئێستا گه‌ڕاوه‌ته‌وه‌ ئه‌مریكا تاوەکو له‌ یه‌كێك له‌ باشترین زانكۆكانی ئه‌م وڵاته‌، زانكۆی یه‌ڵ، وانه‌یه‌ك بڵێته‌وه‌ به‌ناوی "ده‌وڵه‌ته‌ شكستخواردووه‌كان".

ئه‌زموونی سووریا بێگومان یه‌كێك ده‌بێت له‌و وڵاتانه‌ی كه‌ بۆ خوێندكاره‌كانی باسده‌كات. ئه‌گه‌ر ئه‌م شه‌ڕه‌ ته‌واوبوو، فۆرد ده‌ڵێت "باشترین پلان بۆ سووریا بریتییه‌ له‌ ده‌وڵه‌تێكی نامه‌ركه‌زی تاوەکو گرووپ و نه‌ته‌وه‌ جیاوازه‌كانی وه‌كو كورد خۆیان حوكمڕانی خۆیان بكه‌ن". 

رۆبەرت فۆرد، دیپلۆماتکارێکی ناسراوی ئەمریکایە، لەنێوان ساڵانی 2008 بۆ 2010 جێگری باڵیۆزی ئەمریکا بووە لە عێراق. لە ساڵانی2006 بۆ 2008 باڵیۆزی ئەمریکا بووە لە جەزائیر و لە 2011 شدا وەک باڵیۆزی ئەمریکا لە سووریا دیاریکرا. 

فۆرد، لەکاتی سەرهەڵدانی راپەڕینی سووریا لەو وڵاتە بوو. لە ساڵی2014، بەهۆی ناڕەزایەتی لە سیاسەتی ئەمریکا لە سووریا، دەستی لە پۆستەکەی کێشایەوە.

 رووداو لەسەر چەندین بابەتی دیکەی وەکو قەرانی سەرۆکایەتی هەرێمی کوردستان و پەیوەندیی نێوان پەیەدە و ئەمریکا هەڤپەیڤینێكی لەگەڵ رۆبەرت فۆرد ئەنجامداوە و لە هەڤپەیڤینەكەدا فۆرد لەمەڕ تورکیا و ئێران هەڵوێستی خۆی دەخاتەڕوو.

هەڤپەیڤینەکە شەوی چوارشەممە،2-9-2015 کاژێر 23:30 خولەک لە تەلەڤزیۆنی رووداو پەخشدەکرێت.</sup>

^1/9/2015

<sup>یونوس کۆجا، سەرۆکی پێشووی لقی گەنجانی پارتی دادو گەشەپێدان AKP لە ئامەد، لە هێرشێکی چەکداریدا كوژرا. هێرشەکە رۆژی دووشەممە 31 -8- 2015 لەلایەن چەند چەکدارێکی نەناسراوەوە ئەنجامدرا. 

کۆجای 31 ساڵ لە ئامەد خاوەنی دەرمانخانە بوو و کاژێر 02:30 ی خولەکی پاشنیوەڕۆ، چەکدارەکان لەنێو دەرمانخانەكەی کوشتوویانە.

کۆجا ساڵی رابردوو وازی لە پۆستی بەرپرسی گەنجانی AKP لە ئامەدی باکووری کوردستان هێنا، لە هەڵبژاردنی 7 ی حوزەیرانی رابردوودا هەوڵیدابوو ببێتە کاندیدی AKP، بەڵام نێوی نەچووە نێو  لیستی کاندیدانی حیزبەكە. 

سەڵاحەدین دەمیرتاش، سەرۆکی پارتی دیموکراتی گەلان HDP، بەتووندی ئیدانەی کوشتنی بەرپرسە گەنجەکەی AKP ی کرد و لە نووسینێکدا لە پەڕەی تایبەتی لە تویتەر، نووسیویەتی “کوشتنی یونوس کۆجا بە نەفرین دەکەم. داوادەکەم خوا لێی خۆشبێت و سەبووری کەسوکارەکەشی بدات”.

لە 24 ی حوزەیرانی 2015 ەوە شەڕ و پێکدادان لەنێوان پارتی كرێكارانی كوردستان PKK و تورکیا دەستیان پێکردووەتەوە، هەردوولاش یەکدی بە کوشتنی کەسانی سڤیل تۆمەتباردەکەن.</sup>

^1/9/2015

<sup>پزیشکی دادوەری ئێران بڵاویکردەوە، کە لە ماوەی سێ مانگی بەهار و یەکەم مانگی هاوینی ئەمساڵدا، 939 کەس لەو وڵاتەدا بەهۆی خراپ بەکارهێنانی ماددە سڕکەرەکانەوە گیانیان لەدەستداوە.

بەپێی ئامارێک کە پزیشکی دادوەری ئێران بڵاویکردووەتەوە، 838 کەس لەوان پیاو و 101 کەسیشیان ژن بوون. ئەم ئامارە بەپێی کاتی هاوشێوەی خۆی لە ساڵی رابردووی هەتاویدا بەرزبوونەوەیەكی كەم نیشاندەدات. لە چوار مانگی یەکەمی ساڵی 1393ی هەتاویدا 937 کەس گیانیان لەدەستدابوو.

لە چوار مانگی یەکەمی ئەمساڵدا پارێزگای تاران بە 240 کەس، پارێزگای خوراسانی رەزەوی بە 122 و ئیسفەهان بە 62 کەس بەرزترین پلەکانی گیانلەدەستدانی تووشبووانی ماددە سڕکەرەکانیان لە ئێراندا هەیە.

هەروەها پارێزگای ورمێ لە رۆژهەڵاتی کوردستان لەو پارێزگایانەیە کە کەمترین رێژەی گیانلەدەستدانی تووشبووان بە ماددە سڕکەرەکانی لە ئێراندا هەیە. لە ماوەی چوار مانگدا لە پارێزگای ورمێ 4 تووشبوو بە ماددەی سڕکەر گیانیان لەدەستداوە.</sup>

^1/9/2015

<sup>مەسعود بارزانی، سەرۆکی هەرێمی کوردستان لەگەڵ ئەو لایەنانە کۆدەبێتەوە، کە بەشداری دوایین کۆبوونەوەی لایەنەکانیان نەکرد.

ئایدن مەعرووف، سەرۆكی فراكسیۆنی بەرەی توركمانی لە پەرلەمانی كوردستان بە تۆڕی میدیایی رووداوی راگەیاند " بارزانی سەبارەت بە چارەسەری پرسی سەرۆکایەتی هەرێمی کوردستان ئەمڕۆ لەگەڵ چەند لایەنێک کۆدەبێتەوە". 

بە گوتەی سەرۆكی فراكسیۆنی بەرەی توركمانی " لەگەڵ ئەو لایەنانە کۆدەبێتەوە، کە بەشداری دوایین کۆبوونەوەی لایەنەکانیان نەکرد".

لەپێنجەمین کۆبوونەوەی پێنجقۆڵی، سەبارەت بە پرسی سەرۆکایەتی هەرێمی کوردستان، داوا لەلایەنەکانی دیکەی ناو حکومەت و پەرلەمان کرا بەشداری شەشەمین کۆبوونەوەی پێنج قۆڵی (پارتی، یەکێتی، گۆڕان، یەکگرتوو و کۆمەڵ) بکەن، بەڵام شیوعی، سۆسیالیست، بزووتنەوەی ئیسلامی و پێکهاتەکانی مەسیحی و تورکمان رەتیانکردەوە بەشداری کۆبوونەوەکە بکەن.</sup> 

^1/9/2015

<sup>بەڕێوەبەرایەتیی گشتیی كۆنترۆڵی كارەبای ھەرێمی كوردستان رایدەگەیێنێ، كە لە نێوەڕاستی ئەم مانگەوە 24 كاژێر كارەبا بەبەردەوامی دەدرێتە هاونیشتمانیان.

دوای كۆبوونەوەی نێوان بەڕێوەبەرایەتیی كۆنترۆڵی كارەبای پارێزگاكان و بەڕێوەبەرایەتیی گشتیی كۆنترۆڵی كارەبای ھەرێمی كوردستان، بەڕێوەبەرایەتیی گشتی كۆنترۆڵی كارەبا خشتەیەكی نوێی دابەشكردنی كارەبای بۆ مانگی ئەیلوول راگەیاند و بەپێی خشتەكە، لە نێوەڕاستی ئەم مانگەوە 24  كاژێر كارەبا بە بەردەوامی بە هاونیشتمانیان دەدرێت. 

بەگوێرەی لێدوانی بەرپرسانی وەزارەتی كارەبا بۆ رووداو، ئێستا بەهۆی مامناوەندی پلەكانی گەرما، بەكارهێنانی كارەبا كەمتربووەتەوە، لەبەرئەوە دەتوانن كاژێری زیاتری كارەبا بۆ هاونیشتمانیان دابین بكەن.

سەبارەت بە نیوەی یەكەمی مانگی ئەیلوولیش " حكومەت 21 كاژێر كارەبا دابیندەكات و تەنیا 3 كاژێر كارەبا لەلایەن موەلیدەكانەوە دابیندەكرێت، كە نرخی هەر ئەمپێرێكیشی لەلایەن پارێزگاكان دیاریدەكرێت".</sup>

^1/8/2015

^{عەلی ئەكبەر وەلایەتی راوێژكاری خامنەیی بۆ كاروباری نێودەوڵەتی لە دیدارێكی لەگەڵ نوێ،ەری پارتەكانی لوبنان ئاشكرای كرد: “ئێران یارمەتیكردنی سووریا و لوبنان بە ئەركی سەرشانی خۆی دەزانێ‌.”}

^{وەلایەتی كە هاوكات سەرۆكی ناوەندی توێژینەوی ستراتیژیكی ئێرانیشە لە دیدارێ:ی لەگەڵ نوێنەری پارتەكانی لوبنان و بەرپرسان و مامۆستایانی زانكۆكانی لوبنان جەختی لە پشتیوانیەكانی ئێران بۆ گرووپ و لایەنەكانی لوبنان و سووریا كردەوە و گوتی: “ئێران هەتا دوایین چركە پاڵپشتیی سووریا دەكات و یارمەتییەكانیشمان بۆ لوبنان ئەركی سەرشانن.”}

^{راوێژكاری خامنەیی ئاماژەی بەوەش داوە “وڵاتانی رۆژئاوایی بە یارمەتیكردنی وڵانی ناوچە بوونە هۆی سەرهەڵدانی گرووپە تیرۆریستی و توندڕەوەكان.”
وەلایەتی ئەوەشی خستووەتەڕوو: “ئێمە دەبێ‌ ئەوەش بزانین كاتێك هەموو دوژمنان دەستیان داوەتە دەستی یەك هەتا بەشار ئەسەد وەلا بنێن و حكوومەتێكی نوێ‌ بینات بنێن، بە پلەی یەكەم دەبێ‌ دژایەتییان بكەین و پاشان بە وردی لە هۆكارەكانی بكۆڵینەوە. كاتێك دوژمنان پێدارگی دەكەن كە دەبێ‌ بەشار ئەسەد لە دەسەڵاتدا نەمێنێ‌، بێگومان زیانێكی بۆیان هەبووە و لە بەرانبەردا بۆ دۆست و هاوپەیمانەكانی ئێمە سوودی هەبووە.”}

^{وەلایەتی لە لێدوانەكانیدا چەند جار جەتی لەسەر پاڵپشتیی ئێران لە سووریا و لوبنان كردەوە و رایگەیاند: “ئێران هەتا كۆتایی پشتیوانی لە حكوومەتی سووریا و بەشار ئەسەد دەكات و هەرچەشنە دەستێوەردانێك لە كاروباری ناوخۆیی ئەو وڵاتە ئیدانە دەكات و گوتیشی یارمەتیییەكانی ئێران بۆ سووریا و لوبنان ئەركی دینی و مرۆیی حكوومەتی ئێرانن.”}

^{ئەم گوتانەی وەلایەتی لە كاتێك دان كە بەشێك لە وڵاتانی رۆژئاوایی و بەتایبەت ئەمەریكا ئێران بە دەستێوەردان لە كاروباری ناوخۆی سووریا تۆمەتبار دەكەن و لە ماوەی زیاتر لە چوار ساڵ شەڕی ناوخۆیی سووریا نزیكەی 200 ئەندامی سوپای پاسداران لەو وڵاتە كوژراون.}

^{بە گوتەی بەرپرسانی خودی ئێران هەتا ئێستە نزیكەی 10 ملیار یارمەتییان بە سووریا كردووە.}

^31/8/2015

<sup>ستیڤ مان كە بازرگانێكی جوولەكەی كەنەدییە، پڕۆژەیەكی دەستپێكردووە بۆ رزگاركردنی ژیانی ئەو منداڵە مەسیحی و ئێزیدیانەی لەلایەن (داعش)ەوە دەستگیركراون. بۆ ئەو بازرگانە ئەوەی گرنگە رزگاركردنی ژیانی ئەو كەسانەیە.

پڕۆژەكەی ستیڤ مان لەژێر ناوی ''ئازادكردنی منداڵانی مەسیحی و ئێزدیی عێراق''ە، تاوەكو ئێستا توانیویەتی 128 منداڵ كە وەك كۆیلەی سێكس لەلایەن داعشەوە بازرگانییان پێوەكراوە، رزگار بكات.

ستیڤ مان دەڵێ لەبەرامبەر ئازادكردنی ئەو منداڵانە بڕێك پارە دەدات. ستیڤ لە بایەخی ئەو نیگەرانیانەی كەمكردەوە ‌كە گوایە دانی پارە لەبەرامبەر ئازادكردنی ئەو منداڵانە هاوكاریی بەهێزكردنی رێكخراوێكی تیرۆریستی دەكات. ئەو بازرگانە كە دانیشتووی شاری مۆنتریالی كەنەدایە، بە رادیۆی cbcی گوت ''تەركیزی من لەسەر رزگاركردنی ژیانی ئەو كەسانەیە".

ستیڤ مان گوتی ''من تەركیز ناخەمە سەر پارەدان و لایەنی لۆجیستی و شتەكانی دیكە، چونكە ئەو پارەیەی دەیدەم ئەوەندە زۆر نییە بۆ رێكخراوێك كە خاوەنی 4 ملیار دۆلارە". ئەو گوتیشی "ئایا لەو بڕوایەدای ئەو بڕە پارە كەمەی من كە 2- 3 هەزار دۆلارە بۆ منداڵێك، بەهیچ شێوەیەك هاوكاریی زیادكردنی ئەو هێز و دەسەڵاتە زۆرەی داعش دەكات. ئێمە لەگەڵ نێوەندگیر كاردەكەین، رەنگە و رەنگیش نییە ئەم پارەیە خۆی بخزێنێتە نێو ئەو 4 ملیار دۆلارەی داعش و بیكات بە 4 ملیار و 2000 دۆلار. ئەمە كەی جێگەی بایەخە؟".

پڕۆژەكەی ستیڤ مان لەگەڵ تیمێكی متمانەپێكراو لە عێراق كاردەكات بۆ كڕینەوەی ئازادی و ژیانی ژنان و منداڵان. ئەو گوتی ''پارە كۆدەكەینەوە، تیمێكی متمانەپێكراومان هەیە. ئەم كەسانە ئەو بودجەیەیان پێدەگات كە بۆیان دەنێرین. ئەم كەسانە لە 15 ساڵی رابردوودا پەیوەندییەكی باشیان لە ناوچەكەدا دروستكردووە.'' گوتیشی "لەناو مووسڵ خەڵك هەیە هاوكاریی ئەم تیمە دەكات".

ئەم بازرگانە كەنەدیە ناسناوی ''جوولەكە شندڵەرەكە''ی لێنراوە. ئەم ناسناوە لە ناوی ئەو بازرگانە ئەڵمانییەوە هاتووە كە لە كاتی جەنگی دووەمی جیهانیدا ژیانی زیاتر لە 1200 جولەكەی لە هۆڵۆكۆست رزگاركرد لەڕێی داڵدەدانیان لەناو كارگەكەی و بەكارخستنیان.

ستیڤ مان گوتی "ئەوەی گرنگە رزگاركردنی ژیانی ئەو كەسانەیە، هەروەك چۆن شندڵەر ژیانی چەندین جولەكەی رزگار كرد لەبەرامبەر پێدانی پارە بە نازییە ئەڵمانییەكان بەشێوەیەكی نایاسایی".

ستیڤ مان گوتی هۆكاری دەستپێكردنی ئەم پڕۆژەیەی ئەوە بوو كە پاش چەند مانگێك لە دەستگیركردنی ئەو مەسیحی و ئێزدییانە لەلایەن داعش و چەوساندنەوەیان، هیچ كەسێكی نەبینی كار بۆ رزگاركردنیان بكات.

ئەو گوتی، بۆ ژنان و كچانی هەرزەكار هەمیشە پرسیارەكە ئەوەیە چەندجار دەستدرێژییان كراوەتە سەر "چەندین جار فرۆشراون، بیستوومانە كە لێیان دەدرێت و لە خواردن بێبەش دەكرێن و لە قەفەسدا بەند دەكرێن. هەڕەشەی سووتاندنیان لێدەكرێت ئەگەر سێكسیان لەگەڵ نەكەن".

ستیڤ مان گوتی، باكگراوندی ئەو وەك جوولەكەیەك وای لێكردووە‌ ئەو هەنگاوە بنێت بۆ رزگاركردنی ژیانی ئەو كەسانە "ئەوەی هانیداوم بۆ ئەم كارە زۆر سادەیە، جوولەكە بیت و بەشێك بیت لە خەڵكێك كە بە هۆڵۆكۆستدا تێپەڕیون. ئێمە بۆ ماوەی شەش ساڵ چاوەڕێمان كرد، تاوەكو خەڵك وەڵاممان بدەنەوە و بێن بە هانامانەوە".</sup>

^31/8/2015

<sup>رۆژی یەكشەممە 30-8-2015، بەهۆی ئاگرکەوتنەوە لە باڵەخانەیەکی تایبەت بە کرێکارانی کۆمپانیایەکی نەوت، 11 کەس گیانیان لەدەستداو 219 کەسی دیکەش برینداربوون.

بەهۆی ئاگرەکەوە ژێرزەمینی باڵەخانەی کۆمپانیای ئارامکۆ، کە کۆمپانیایەکی زلهێزی نەوتی سعودییە، گڕی گرتووە و دواتر ئاگرەکە تەشەنەی کردووە.

بەپێی راگەیێندراوێكی فەرمانگەی بەرگریی شارستانی سعودیە، بەشێك لە قوربانیانی رووداوەكە هەڵگری رەگەزنامەی جیاوازن.

هەر بەهۆی ئاگرەکەوە ژمارەیەک خەڵک لەنێو باڵەخانەکەدا گیریان خواردبوو، بۆ رزگاركردنیشیان وەزارەتی نێوخۆیی سعودیە چەندین هەلی کۆپتەری هەڵفڕاندن.</sup>

^31/8/2015

<sup>رۆژی یەکشەممە 30-8-2015 لایەنە سیاسییەکانی بەشدار لە حکومەت و پەرلەمان لەهەولێر کۆدەبنەوە بۆ گفتوگۆکردن لەسەر پرسی سەرۆکایەتی هەرێمی کوردستان.

لە کۆبوونەوەی ئەمڕۆی لایەنەکان، کە چاوەڕواندەکرێت فراوانتربێت لە کۆبوونەوەی پێنج قۆڵی، باس لە دەسەڵاتەکانی سەرۆکی هەرێمی کوردستان دەکرێت، بەتایبەتی ئەو شەش دەسەڵاتەی، کە تاوەکو ئێستا قسەیان لێوەنەکراوە و ناکۆکی زیاتری لایەنەکانی لەسەرە.

هەرچەند لەپێنجەمین کۆبوونەوەی پێنجقۆڵی، کە رۆژی چوارشەممە 26-8-2015 ئەنجامدرا، بڕیاردرا لایەنەکانی دیکەش بەشداریی کۆبوونەوەکەیان پێبکرێت، بەڵام حیزبی شیوعی و بزووتنەوەی ئیسلامی و چەند لایەنێکی دیکە رەتیانکردەوە بەشداریی کۆبوونەوەکە بکەن.

هێڤیدار ئەحمەد پەیامنێری رووداو لەشوێنی کۆبوونەوەکە، رایگەیاند " ئەگەر لایەنەکان لەسەر ئەو شەش دەسەڵاتەی سەرۆکی هەرێمی کوردستانیش بگەنە رێککەوتن، ئەوا پرسی شێوازی هەڵبژاردنی سەرۆکی هەرێمی کوردستان دەمێنێتەوە بۆ کۆبوونەوەکانی داهاتوو، کە ئاخۆ لەناو خەڵک هەڵبژێردرێت، یان لەپەرلەمان".

بەگوێرەی زانیارییەکانی پەیامنێری رووداو، کە لەبەرپرسانی لایەنەکان دەستیکەوتوون" لە کۆبوونەوەکەی ئەمڕۆ، ئەو شەش دەسەڵاتەی سەرۆکی هەرێمی کوردستان، کە جێگای ناکۆکی لایەنەکانن تاوتوێدەکرێن، لەوانە دیارترینیان" فەرماندەیی گشتی هێزە چەکدارەکان، کە پارتی پێداگری لەوە دەکات سەرۆکی هەرێمی کوردستان فەرماندەی گشتی هێزە چەکدارەکان بێت، بەڵام لایەنەکانی دیکە داوادەکەن، سەرۆکوەزیران فەرماندەی گشتی هێزە چەکدارەکان بێت".

پارتیش پێشنیازێکی دیکەی هەیە بۆ ئەو پرسە ئەویش ئەوەیە کە، ئەگەر سەرۆکی هەرێمی کوردستان بەتەنیاش فەرماندەی گشتی هێزە چەکدارەکان نەبێت، ئەنجوومەنێکی بەرەڤانی دروستبکرێت و سەرۆکی هەرێمی کوردستان ، سەرۆکی حکومەت ، جێگرەکەی ، وەزیرانی پێشمەرگە و ناوخۆ و دارایی تێیدا ئەندامبن".

پرسێکی دیکەی نێوان لایەنەکان وەک پەیامنێر رووداو باسی لێوەکرد " دەسەڵاتی دامەزراندنی دادوەرەکانە، کە لایەنەکان داوا دەکەن، بە حوکمی ئەوەی دەسەڵاتی دادوەری، دەسەڵاتێکی سەربەخۆیە، بەگوێرەی جیاکردنەوەی سێ دەسەڵاتەکان، دامەزراندنی دادوەرەکان هەر لەدەسەڵاتی خۆیان بێت، نەک سەرۆکی هەرێمی کوردستان دایانبمەزرێنێت". 

بابەتێکی دیکەی جێگای ناکۆکیش " پەیوەندییەکانی دەرەوەی هەرێمی کوردستانە، کە لایەنەکان رەتیدەکەنەوە، سەرۆکی هەرێمی کوردستان بەتەنیا بڕیار لەپەیوەندییەکان لەگەڵ وڵاتانی دەرەوە و پێکهێنانی شاند بدات بۆ ئەو پەیوەندییانە".

لەپێنجەمین کۆبوونەوەی پێنجقۆڵی، کە رۆژی چوارشەممە 26-8-2015 ئەنجامدرا، باس لە سێزدە دەسەڵاتەکەی سەرۆکی هەرێمی کوردستان کرا، کە لایەنەکان هیچ ناکۆکیێکیان لەسەر نەبوو و لەسەری گەیشتنە رێککەوتن.

لەماوەی دوو مانگی رابردوودا پرسی هەموارکردنەوەی یاسای سەرۆکایەتیی هەرێمی کوردستان ناکۆکی قوڵی لەنێو لایەنە سیاسییەکانی باشووری كوردستان دروستکردووە و تاوەکو ئێستا جگە لە كۆبوونەوە پێنج قۆڵییەكان زیاتر لە 50 كۆبوونەوە لەسەر ئەو پرسە كراون. هەروەها چەند وڵاتێكی بیانیش بۆ چارەسەركردنی پرسەكە هاتوونەتە سەر خەت وەك، ئەمریكا، بەریتانیا، نەتەوە یەكگرتووەكان، توركیا و ئێران.</sup>

^30/8/2015