^{نرخی دراوەکان بۆ ئەمڕۆ یەکشەممە8/21/ 2016 بەمشێوەیەیە:}

^{100 دۆلاری ئەمریکی = 128.850 دینار}

^{100 یۆرۆ = 146.500 دینار}

^{100 پاوەند = 167.250 دینار}

^{100 ھەزار تومەن = 36.750 دینار}

^{100 لیرەی تورکی = 44.000 دینار}

^21/8/2016

<sup>سەرۆکی پەرلەمانی عێراق بە سەردانێکی فەرمی گەیشتە شاری تارانی پایتەختی کۆماری ئیسلامیی ئێران.

سەلیم جبووری، سەرۆکی پەرلەمانی عێراق سەرلەبەیانیی رۆژی شەممە 20ـی ئابی 2016 بۆ تاوتوێ کردنی پرسە هاوبەشەکان، بە تایبەت شەڕی دژی رێکخراوی توندڕەوی داعش، لەگەڵ بەرپرسانی ئێرانی کۆ دەبێتەوە.

بڕیارە سەلیم جبووری لەگەڵ عەلی لاریجانی، سەرۆکی پەرلەمانی ئێران و محەمەدجەواد زەریف، وەزیری دەرەوەی ئەو وڵاتە، کۆ ببێتەوە.

دوای رووخاندنی رژێمی بەعس لە عێراق لە ساڵی 2003، حوکمڕانیی عێراق کەوتە دەست شیعەکانی ئەو وڵاتە، کە پەیوەندییەکی باشیان لەگەڵ کۆماری ئیسلامیی ئێران هەیە.</sup>

^20/8/2016

<sup>سوپای سووریا پاساو بۆ بۆردومانکردنی شاری حەسەکە لە کوردستانی رۆژئاوا لەلایەن فڕۆکە جەنگییەکان و چەکدارانی سەر بە رژێمەکەی، دەهێنێتەوە.

فەرماندەیی گشتیی سوپای رژێمی سووریا لە بەیاننامەیەکدا، رۆژی هەینی 19ـی ئابی 2016 رایگەیاندووە، کە هێزەکانی ئاسایشی کوردستانی رۆژئاوا ”دەستدرێژییان دەکردە سەر دامودەزگاکانی دەوڵەت، رێیان لە بەڕێوەچوونی تاقیکردنەوەی قوتابییان دەگرت و هاووڵاتییانیان دەڕفاند“.

سوپای سووریا ئاماژەی بەوە کردووە، کە هێزەکانی ئاسایشی کوردستانی رۆژئاوا ”باڵی سەربازیی پارتی کرێکارانی کوردستان (پەکەکە)ن“ و مەترسییان لەسەر رژێمی سووریا لە شاری حەسەکە دروست کردووە.

لە کۆتایی هەفتەی رابردوودا، فڕۆکە جەنگییەکانی سووریا بارەگاکانی یەکینەکانی پاراستنی گەل (یەپەگە)یان لە شاری حەسەکە لە کوردستانی رۆژئاوا بۆردومان کرد.

شار حەسەکە لە کوردستانی رۆژئاوا، لەژێر دەسەڵاتی پارتی یەکێتی دیموکراتی (پەیەدە)یە، کە باڵی پەکەکەیە لە کوردستانی رۆژئاوا و دەکەوێتە سنووری کانتۆنی جزیرێ.</sup>

^20/8/2016

^{نەتەوەیەکگرتووەکان داوا دەکات هەماهەنگی لەنێوان هێزە شەڕکەرەکانی دژی داعش هەبێت بۆ کۆنترۆڵکردنەوەی موسڵ. هەروەها جێگری سکرتێری گشتی نەتەوەیەکگرتووەکان بۆ کاروباری مرۆیی، سەبارەت بە یارمەتییە داراییەکان بۆ عێراق و چۆنیەتی خەرجکردنی دەڵێت: "چۆن ئەو پارەیە خەرجدەکرێت هێشتا لە ژێر گفتوگۆدایە".}

^{فەرهان هەق، جێگری گوتەبێژی فەرمی نەتەوەیەکگرتووەکان رایگەیاند: "ئەوەی ئێمە دەمانەوێت ئەوەیە کە هەموو ئەو هێزانەی کە شەڕ لە دژی داعش دەکەن پێکەوە کار و هەماهەنگی بکەن. و هەروەها داوا لە هەموو ئەو لایەنانە دەکەین لەکاتی شەڕەکاندا رێز لە مافەکانی مرۆڤ بگرن".}

^{هەڵوێستی بێ لایەنی هاوشێوەی نەتەوەیەکگرتووەکان چاوەڕوانکراوە. بەڵام بەهیچ شێوەیەک مانای ئەوە ناگەیێنێت کە نەتەوەیەکگرتووەکان لە عێراق بێ هێزە. بەپێچەوانەوە دەسەڵاتی نەتەوەیەکگرتووەکان لە عێراق زیادی کردووە و زیاتریش دەبێت.}

^{هەر مانگی رابردوو کاتێک ئەمریکا و کۆمەڵێک وڵاتی هاوپەیمانی پەیمانیان دا کە 2 ملیار و 200 ملیۆن دۆلار ببەخشنە عێراق، ئەو وڵاتانە بە کۆی دەنگ رێککەوتن کە تەواوی دەسەڵاتی دابەشکردنی ئەو پارە زۆرە بدەنە دەست نەتەوەیەکگرتووەکان. بەگوێرەی زانیاریەکانی رووداو تەنیا 500 ملیۆن دۆلار لەو پارەیە تەرخان دەکرێت بۆ کۆمەکی ئاوارەکان و باقی پارەکە لە ژێر ناوی دووبارە بنیاتنانەوەی عێراق خەرج دەکرێت.}

^{ئەوەی کە دەمێنێتەوە یەک ملیار و 500 ملیۆن دۆلارە و دیار نیە کە راستەوخۆ پارەکە دەدرێتە حکومەتەکانی هەولێر و بەغدا یان نا. وەڵامی ئەم پرسیارە لای جێگری سکرتێری گشتی نەتەوەیەکگرتووەکانە بۆ کاروباری مرۆیی، کە بەرزترین بەرپرسی نێودەوڵەتییە لە بواری دابەشکردنی یارمەتییە مرۆییەکان.}

^{ستیڤن ئۆبرایەن، جێگری سکرتێری گشتی نەتەوەیەکگرتووەکان بۆ کاروباری مرۆیی دەڵێت: "چۆن ئەو پارەیە خەرجدەکرێت هێشتا لە ژێر گفتوگۆدایە. وڵاتانی کۆمەک بەخش دەسەڵاتی چۆنیەتی خەرجکردنی ئەو پارەیەیان داوەتە نەتەوەیەکگرتووەکان، بۆ دڵنیابوون لە بێ لایەنی لە چۆنیەتی خەرجکردنی پارەکە".}

^{بەڵام لەو هەڤپەیڤینە تایبەتەی لەگەڵ رووداو، ئۆبرایەن ئەوەشی راگەیاند کە ئەوان ناتوانن نوێنەرانی کورد بانگهێشتی کۆبوونەوە ئاست بەرزەکانی نەتەوەیەکگرتووکان بکەن بۆ بڕیاردان دەربارەی بەرنامە مرۆییەکان لە عێراق.}

^{ستیڤن ئۆبرایەن، جێگری سکرتێری گشتی نەتەوەیەکگرتووەکان بۆ کاروباری مرۆیی دەڵێت: "سیستەمی نەتەوەیەکگرتووەکان لەسەر بنەمای تەنیا ئەندامبوونی دەوڵەتەکان دامەزراوە. بە دڵنیاییەوە ئەو خەڵکەی دەیەوێت سنوورەکان بگۆڕن رەخنە لەوە دەگرن، ئەوە بابەتێک کە نەتەوەیەکگرتووەکان ناتوانێت پێشڕەوی بکات و دەبێت بێ لایەن بێت بەتایبەتی بۆ بەشی بەرنامە مرۆییەکان".}

^{جێگری سکرتێری گشتی نەتەوەیەکگرتووەکان لەو هەڤپەیڤینەی لەگەڵ رووداو، زانیاری و وردەکاری زۆری ئاشکراکرد لەبارەی ئامادەکارییە نێودەوڵەتییەکان بۆ ئۆپەراسیۆنە چاوەڕوانکراوەکەی موسڵ.}

^20/8/2016

^{کەمپێکی ئاوارەکان}

^{زۆربەی ئەو ئاوارانەی سووریا كە روویان لە توركیا كردووە، لە شارەكانی باكووری كوردستان نیشتەجێ كراون. چاودێران دەڵێن جگە لە گۆڕینی دیمۆگرافیای باكووری كوردستان، ئەو ئاوارانە دەبنە هۆكارێكیش بۆ تێكدانی شیرازەی كۆمەڵگە و بێكاری و هەژاریی زۆرتر دەكەن.}

^{شارێك لە توركیا نەماوە ئاوارەی سووری رووی تێنەكردبێ، بەڵام زۆرترین ژمارەی ئەو ئاوارانە لە شاری روها نیشتەجێ كراون كە بە گوێرەی ئامارە فەرمییەكانی توركیا ژمارەیان 410 هەزار كەسە، كەچی شارێكی گەورەی وەكو ئیستانبوڵ 394 هەزار ئاوارەی تێدایە.}

^{بەگوێرەی دەزگای ئاماری توركیا، دوو ملیۆن و 739 هەزار ئاوارەی سووری لە توركیان، لەو ژمارەیەش ملیۆنێك و 41 هەزاریان لە شارەكانی باكووری كوردستان (غازی عەنتاب، ئامەد، روها، باتمان، ئادیەمان، سێرت، ماردین، شڕناخ و كلیس) نیشتەجێن. واتە 38%ی ئاوارەكانی سووریا لە باكووری كوردستانن.}

^{هەندێك لە چاودێران هۆكاری چوونی ئەو ژمارە زۆرەی ئاوارە بۆ شارە كوردییەكان و بەتایبەتی بۆ روها، بۆ هۆكاری خزمایەتی دەگەڕێننەوە، بەڵام بەشێكیان پێیانوایە مەبەستی سیاسی لەپشت جێگیركردنی ئاوارەكانە لە باكووری كوردستان.}

^{سەرەتای مانگی تەمموزی رابردوو، زانكۆی بیلگی لە پانێلێكدا گفتوگۆی لەسەر هۆكاری گیرسانەوەی ئاوارەكان لە باكووری كوردستان كرد، لەوێ‌ ئەو پرسیارە ورووژێنرا كە ئایا هۆكاری سیاسی لە پشت نیشتەجێكردنی ئاوارەكانە لە باكووری كوردستان؟}

^{ئایهان كایا مامۆستای زانكۆی بیلگی لە پانێلەكەدا گوتی: نیشتەجێكردنی ئاوارەی سووری لە باشووری رۆژهەڵات بۆ هاوسەنگكردنی ژمارەی دانیشتووان و ئاستەنگكردنی بەهێزبوونی نەتەوەپەرستیی كوردە. ئەم هەوڵانەشی بە "ئەندازیاریی كۆمەڵایەتی" ناوبرد.}

^{هەر لەوبارەوە پڕۆفیسۆر ئیلتەر توران گوتی، هاتنی سوورییەكان بۆ توركیا راستەوخۆ پەیوەندی بە كوردەوە نییە، بەڵام لەبەر ئەوەی زۆربەی ئاوارەكان بە رەچەڵەك عەرەبن، پێكهاتەی ئەتنیكی لە باشووری رۆژهەڵات دەگۆڕن.}

^{ئاتیلا یازار، سەرۆكی رێكخراوی مافی مرۆڤ (İHD)لە روها دەڵێت حكومەتی توركیا هەوڵ دەدات بەهۆی ئاوارەكانی سووریا دیمۆگرافیای روها بگۆڕێ‌. یازار بە (رووداو)ی گوت "جیا لە هۆكاری خزمایەتی، 60%ی روها كوردن، ئەوەی دیكە عەرەب و توركە. دەخوازن بەڕێگای ئاوارەی سووری، ژمارەی كورد لەگەڵ نەتەوەكانی دیكە هاوسەنگ بكەن. والی قەیسەری، قۆنیا و ئەنتالیا ئاوارەی سووری رەوانەی روها دەكەن".}

^{ئەرسۆی دیبە، گۆشەنووسی رۆژنامەی ستار كە رۆژنامەیەكی نزیك لە حكومەتە، رۆژی شەشی ئەم مانگە بابەتێكی بەناونیشانی "سوورییەكان لە ئامەد نیشتەجێ بكەین" بڵاوكردەوە كە تێیدا پشتگیری لە سیاسەتی نیشتەجێكردنی ئاوارەكانی سووریا لە باكووری كوردستان دەكات و دەڵێت "پێویستە مافی هاووڵاتیبوون بدەینە ئەو كەسانە، هەروەها پێویستە ئەو كەسانە لە رۆژهەڵات و باشووری رۆژهەڵات، لەو شارانە نیشتەجێ بكەین كە ئاوەدان دەكرێنەوە. دەبێت هاوكارییان بكەین تاوەكو لە جۆلەمێرگ، ماردین، ئامەد و شڕناخ نیشتەجێ‌ بكرێن".}

^{ژمارەی دانیشتووانی نۆ شارەكەی باكووری كوردستان 8 ملیۆن و 385 هەزار كەسە. ژمارەی ئاوارە سوورییەكانیش لە ملیۆنێك زیاترە، واتە ئێستا ئاوارەكانی سووریا 12.5%ی دانیشتووانی باكووری كوردستان پێكدێنن.}

^{چاودێران دەڵێن ئاسان نییە بتوانی بەبێ كێشە ئەو ئاوارانە لەگەڵ شێوازی ژیان، نەریت و بیركردنەوەی خەڵكەكە بگونجێنی. پێدانی مافی هاووڵاتیبوون بە ئاوارە سوورییەكان كێشەی كۆمەڵایەتی و رێژەی تاوان زیاتر دەكات و لەڕووی ئابووریشەوە كاریگەریی خراپ لەسەر خەڵكی ناوچەكە بەجێدێڵێت كە لە بنەڕەتدا داهاتیان كەمە و بەدەستی بێكارییەوە دەناڵێنن. رەنگە كێشەیەكی بچووك گەورە ببێت و بگاتە ئاستی تەقینەوەی كۆمەڵایەتی، رووداوەكانی ئەم دواییەش بەتایبەتی لە روها ئەمە دەسەلمێنن.}

^{رۆژی 11ی مانگی رابردوو گەنجێكی خەڵكی روها بەنێوی سەدات ئایدن كە لە كاركردن دەگەڕایەوە، لەلایەن چەند كەسێكی ئاوارەوە درایە بەر چەقۆ و مۆبایلەكەیان برد، شەوی رووداوەكە هاوشاریانی ئایدن لە پاركێك كۆبوونەوە و دروشمان دژی ئاوارەكان گوتەوە.}

^{مستەفا ساركنجی موختاری گەڕەكەكەی ئایدن بە رۆژنامەیەكی لۆكاڵی روهای راگەیاند " گیان و ماڵمان لەژێر مەترسیدایە. پێویستە بە زووترین كات رێگا لە دەستدرێژی و دزیكردنی ئەو كەسانە بۆ سەر خەڵكی ناوچەكە بگیرێ".}

^{هەوێی سووری تەڵاقی زیاد كردووە}

^{پشێویی كۆمەڵایەتی كە لە ئەنجامی هاتنی ئاوارە سوورییەكان بۆ روها دروست بووە، تەنیا پەیوەست نییە بە شەڕی پیاوان و گەنجان، بەڵكو پەلی بۆ كێشەی خێزانیش هاویشتووە.}

^{بە گوێرەی ئاماری ژووری پارێزەرانی روها، تەنیا بەهۆی "هەوێی سووری"، جیابوونەوەی ژن و مێرد لە روها بەراورد لەگەڵ ساڵانی پێش هاتنی ئاوارەكان 20% زیادی كردووە. سەڤدا چەڤیك ئۆزبینگۆل سەرۆكی باڵی ژنان لە ژووری پارێزەرانی روها بە (رووداو)ی گوت "ئەو ئاوارانە كاریگەریی زۆر خراپیان لەسەر ژیانی كۆمەڵایەتی داناوە، بە شوودانی كچانی سەر بەهەوێ بەرامبەر بە پارە، دروستكردنی ئاڵۆزی لە شوێنە گشتییەكان، لەشفرۆشی هەموو ئەم كردەوانە لە روها زیادیان كردووە. هەموو ئەوانە دیاردەی تەڵاق و تێكچوونی شیرازەی خێزانیان گەورەتر كردووە.}

^{ئەم هەموو رووداو و پشێویە كۆمەڵایەتیانە لەكاتێكدا روودەدەن كە دەزگاكانی دەوڵەت خەریكن مافی هاووڵاتیبوون دەدەنە ئەو ئاوارە سووریانە. لە شارەكانی وەكو ماردین و روها كە رێژەیەكی بەرچاوی هاووڵاتی بە رەچەڵەك عەرەب و توركیان تێدایە، كاریگەری لەسەر هاوسەنگیە سیاسیەكان دەكات، لە تەواوی ناوچەكە لێكترازانی كۆمەڵایەتی زیاتر دەكات و لێكەوتەی ئابووریی خراپی دەبێت.}

^{خەڵكی ناوچەكە كە بەدەست بێكارییەوە دەناڵێنن، پێیانوایە بەدیهاتنی دواڕۆژێكی گەش بەهاتنی ئاوارەی سووری زۆر زەحمەت دەبێت. بەتایبەتی كاتێك رێژەی بێكاری لە باكووری كوردستان لەبەرچاو بگیرێ‌ كە لە كۆتایی ساڵی رابردوودا گەیشتبووە 24.8%.}

^{قادر ئۆزەدمیر، توێژەری كۆمەڵایەتی و ئابووری كە خەڵكی روهایە و لە ئیستانبوڵ دادەنیشێ، بە (رووداو)ی گوت "باكووری كوردستان زەرەرمەندترین ناوچەیە لە هاتنی ئاوارەی سووری. هەرزانیی دەستی كاری سوورییەكان رێژەی بێكاری لە ناوچەكە زیاتر دەكات. ئەگەر چارەسەر نەكرێ‌، رەنگدانەوەی كۆمەڵایەتیی ترسناكی دەبێت".}

^20/8/2016

^{ئەمڕۆ نوێنەری حکومەتی هەرێمی کوردستان لە یەکێتی ئەوروپا پێشوازی لە کلاریسە پاستۆر نوێنەری نوێی یەکێتی ئەوروپا لە هەرێمی کوردستان كرد، لە كۆبوونەوەیەكدا باس لە فرەوانكردنی نوێنەرایەتییەكەی ئەوروپا لە هەرێمی كوردستان كرا.}

^{لە سەرەتای دانیشتنەکەدا پەیوەندی نێوان هەرێمی کوردستان و یەکێتی ئەوروپا باسیان لێوە کرا و تیشک خرایە سەر گرنگی کردنەوەی نوێنەرایەتی یەکێتی ئەوروپا لە هەرێمی کوردستان کە ساڵێک لەمەوبەر لە هەولێری پایتەخت کرایەوە، بەتایبەتی رۆڵی یەکێتی ئەوروپا لە هاوکاریکردنی هەرێمی کوردستان لە شەڕی دژی داعش و چۆنیەتی سوودوەرگرتن لەو هاوکارییانەی کە یەکێتی ئەوروپا تەرخانی کردوون و دامەزراوە جیاجیاکانی هەرێمی کوردستان دەتوانن لە یەکێتی ئەوروپا وەرگرن.}

^{پەرەپێدان و فراوانکردنی نوێنەرایەتی یەکێتی ئەوروپا لە هەرێمی کوردستان لە ئایندەیەکی نزیک و چۆنیەتی هەماهەنگی لە نێوان نوێنەرایەتی حکومەتی هەرێمی کوردستان لە یەکێتی ئەوروپا و ئۆفیسی نوێنەرایەتی یەکێتی ئەوروپا لە هەرێمی کوردستان تەوەرێکی تری دیدارەکە بوو کە هەردوولا بە گرنگیان زانی.}

^{یەکێتی ئەوروپا لە دوو ساڵی رابردوودا پەیوەندییەکانی لەگەڵ هەرێمی کوردستان پتەوتر کردووە و ئەو پەیوەندییانە گەیشتوونەتە ئاستێکی باش بەتایبەتی کە یەکێتی ئەوروپا نوێنەرایەتی دیپلۆماسی خۆی و هەروەها ئۆفیسی هاوکاری مرۆڤی لە هەرێمی کوردستان کردەوە و چەند بڕیارێکی سیاسی و مێژوویی دا بۆ هاوکاریکردن و پشتگیریکردنی هەرێمی کوردستان لە شەری دژی داعش.}

^19/8/2016

^{مەولود چاوشئۆغڵو، وەزیری دەرەوەی تورکی}

^{وەزیری دەرەوەی تورکیا جەخت لەسەر ئەوە دەکاتەوە کە قەیرانی سووریا بە بێ رووسیا چارەسەر ناکرێت و رایگەیاند، لەگەڵ رووسیا و ئێران لە نزیکەوە کاردەکەن بۆ گەیشتن بە چارەسەری قەیرانی سووریا.}

^{لە لێدوانێکیدا بۆ ئاژانسی ھەواڵی سپۆتنیکی رووسی، مەولود چاوشئۆغڵو، وەزیری دەرەوەی تورکیا لەبارەی ئاساییبوونەوەی پەیوەندی نێوان وڵاتەکەی و رووسیا رایگەیاند، "تورکیا بۆ رووسیا لە ناوچەکە وڵاتێکی دۆستە و مۆسکۆ دۆستێکی متمانەپێکراوتر لە تورکیا نادۆزێتەوە."}

^{لەبارەی میکانیزمی هاوبەشی نێوان تورکیا و رووسیا بۆ چارەسەرکردنی قەیرانی سووریا، چاوشئۆغڵو گوتی: "بارودۆخی سووریا رۆژ لە دوای رۆژ خراپتر دەبێت. بۆیە لە پێناو چارەسەری سیاسی و ئاگربەست، پێویستە ئێمە بەیەکەوە کار بکەین".}

^{وەزیری دەرەوەی تورکیا روونیشی کردەوە کە لەبارەی سنوور و یەکپارچەیی خاکی سووریا، رووسیا و ئێران و تورکیا وەک یەک بیردەکەنەوە و گوتیشی: "بە بێ رووسیا، چارەسەری یەکجارەکی لە سووریا ئەستەمە. بە بێ ئێرانیش. هەربۆیە لەگەڵ ئێران لە پەیوەندیداین و پێویستە ھەماھەنگی نێوانمان بەھێز بکەین".}

^19/8/2016

^{لیوا محەممە‌د باقری، سه‌رۆکی ئه‌رکانی گشتی هێزه‌ چەکدارەکانی ئێران}

^{سه‌رۆکی ئه‌رکانی گشتی هێزه‌ سەربازییەكانی ئێران رایگه‌یاند‌: "زلهێزه‌کان لە هەوڵدان بۆ تێکدانی ئاسایشی وڵاتانی ئیسلامی ناوچەکە بۆیە دروستکردنی لیژنه‌ی هاوبه‌شی سنووری له‌ نێوان ئێران و عێراق پێویسته‌".}

^{لیوا محەممە‌د باقری، سه‌رۆکی ئه‌رکانی گشتی هێزه‌ چەکدارەکانی ئێران و فالح فه‌یاز، راوێژکاری ئه‌نجوومه‌نی ئاسایشی نه‌ته‌وه‌یی عێراق، لە کۆبوونەوەیەکدا لە بارەگای ئەرکانی هێزە چەکدارەکانی ئێران لە تاران، دۆخی ناوچه‌که‌ و په‌یوه‌ندییه‌کانی نێوان ئێران و عێراق-یان تاوتوێ کرد.}

^{محه‌ممه‌د باقری، سه‌رۆکی ئه‌رکانی گشتی هێزه‌ چەکدارەکانی ئێران بە ئاماژەدان بەوەی یەکپارچەیی عێراق و بەرەنگاربوونەوە لەگەڵ هەرچەشنە بیرۆکەیەکی دابەشکارانە خواستی کۆماری ئیسلامی ئێرانە ، رایگەیاند: "بۆ دابینکردنی ئاسایش و سه‌قامگیری زیاتری سنووره‌کان، لیژنه‌ی هاوبه‌شی سنووری له‌ نێوان ئێران و عێراق پێویستە."}

^{سه‌رۆکی ئه‌رکانی گشتی هێزه‌ چەکدارەکانی ئێران گوتی: "زلهێزه‌کان و هەندێک له‌ وڵاتانی ناوچه‌که‌ له‌ هەوڵدان بۆ تێکدانی ئاسایشی وڵاتانی ئیسلامی ناوچەکە بەتایبەت عێراق و ئێران و هیوادارم به‌ دروستکردنی لیژنه‌ی هاوبه‌شی سنووریی له‌ نێوان هه‌ر دوو وڵات بتوانین به‌ر به‌ هاتووچۆی تیرۆریسته‌کان بگرین."}

^{محەممەد باقری لە بەشێکی قسەکانیدا کە لەمیدیاکانی ئێرانی بڵاوکراوەتەوە تیشکی خستە سەر شەڕی موسڵ و گوتی: "هیوادارین سوپای عێراق هەرچی زووترە بتوانێت بە دەرکردنی تیرۆریستان لە موسڵ و ناوچەکانی دیکە، هەیمەنەی خۆی بەسەر هەموو خاکی عێراقدا بسەپێنێت".}

^{فالح فه‌یاز، راوێژکاری ئه‌نجوومه‌نی ئاسایشی نه‌ته‌وه‌یی عێراق لە بەرامبەردا گوتی:" ئێمه‌ جه‌خت له‌ په‌یوه‌ندییه‌ باشه‌کانی نێوان هه‌ردوولا ده‌که‌ین. عێراق سوپاسی هاوکارییه‌کانی چەند ساڵی رابردووی ئێران ده‌کات."}

^19/8/2016

^{یاسای قەیوم تایبەتە بە دەستگیرکردنی سەرۆک شارەوانییەکان یان دورخستنەوەیان و دانانی کەسانی دیکە لە شوێنەکانیان، بەپێی یاساکە، کە لە ناوەڕاستی ئەم مانگەدا دەرچووە "هەموو ئەو سەرۆک شارەوانیانە لەکار دووردەخرێنەوە، کە پشتگیریان لە رێکخستنە تیرۆریستیەکان کردبێت".}

^{سەرکان ئینجە، پەیامنێری تۆڕی میدیایی رووداو لە دێرسیم رایگەیاند، نزیکەی 100 سەرۆک شارەوانی شارو شارۆچکە و ناوچەکان لەدەستی پارتی هەرێمی دیموکراتیک (دەبەپە)دایە.}

^{یاسای قەیوم، لە 14-8-2016 لە پەرلەمانی تورکیا دەنگدانی لەسەر درا و لە پرۆژەیاسایەوە بووە یاسا، دوای دەرچوونی ئەو یاسایە، بەپێی یاساکە ئەو سەرۆک شارەوانیانەی پشتگیرییان لە "رێکخستنە تیرۆریستییەکان" کردووە، دەسەڵات بە وەزارەتی ناوخۆ دراوە سەرۆک شارەوانییەکان لەکار دوور بخاتەوە و لە شوێنەکەی ئەو کەسێکی دیکە، کە لەلایەن دەوڵەتەوە دەستنیشانکراوە دادەمەزرێنرێت.}

^{لە شارۆچکە و ناوچەکاندانیش بەپێی یاساکە، پارێزگار دەسەڵاتی ئەوەی هەیە، سەرۆک شارەوانییەک لەکار دوور بخاتەوە و یەکێکی دیکە لە شوێنەکەی دابنێت.}

^{لەلایەکی دیکەوە هەدەپە و دەبەپە پێیانوایە ئەو یاسایە بە تایبەت بۆ ئەوان دەرکراوە، بۆ ئەوەی سەرۆک شارەوانییەکان و جێگرەکانیان و ئەندامانی ئەنجوومەنی شارەوانی لەکار دوور بخرێنەوە.}

^18/8/2016

^{کوڕێکی ئوسامە بن لادن داوا لە خەڵکی سعودیە دەکات لە دژی دەسەڵاتی بنەماڵەی پاشایەتی راپەڕن، داواشدەکات لە یەمەن رووبەڕووی هێزەکانی سعودیە و هاوپەیمانەکانی ببنەوە، کە لەلایەن ئەمریکاوە پاڵپشتی دەکرێن.}

^{لە تۆمارێکی دەنگیدا، کە رۆژی چوارشەممە 17-8-2016 بڵاوکراوەتەوە، حەمزە بن لادن، کوڕی ئوسامە بن لادنی، سەرۆکی پێشووی رێکخراوی قاعیدە، داوا لە خەڵکی سعودیە دەکات پەیوەندی بە جیهادی نێودەوڵەتییەوە بکەن.}

^{حەمزە بن لادن دەشڵێت "سەرەتا بۆ وەرگرتنی ئەزموون رووبکەنە یەمەن و دواتر هەوڵبدەن بۆ کۆتایيهێنان بە دەسەڵاتی بنەماڵەی پاشایەتی لە سعودیە و هەیمەنەی ئەمریکا بەسەر ئەو وڵاتەوە".}

^{ئەو تۆمارە دەنگیە کە لەلایەن میدیاکانی سەر بە بزووتنەوەی ئەلشەبابی سۆماڵی بڵاوکراوەتەوە، تێیدا حەمزە بن لادن داوا لە گەنجانی سعودیە دەکات پەیوەندی بە رێکخراوی قاعیدەوە بکەن لە یەمەن.}

^{ئەوە چوارەمین نامەی دەنگی کوڕەكەی ئوسامە بن لاندنە، کە لە ماوەی یەک ساڵدا بڵاویکردووەتەوە.}

^{شرۆڤەکاران پێیانوایە، کە ئەو تۆمارە دەنگیانەی کوڕی ئوسامە بن لاندن هەوڵێکە بۆ سەرکردایەتیکردنی رێکخراوی قاعیدە کە ئێستا لەلایەن ئەیمەن زەواهیرییەوە لە ساڵی 2011ـوە سەرکردایەتی دەکرێت.}

^18/8/2016