^{لێپرسراوانی وەزارەتی دەرەوەی ئەمەریکا ڕیدەگەیەنن کە بەرپرسانی ئەو وڵاتە نەیانتوانیوە لەبارەی ئاگربەستی کاتی لە سووریا لەگەڵ ڕووسیا بگەنە ڕێککەوتنێک.}

^{جۆن کێری، وەزیری دەرەوەی ئەمەریکا لە پەراوێزی دانیشتنی گرووپی 20 لە چین لەگەڵ سێرگێئی لاڤرۆف، هاوتا ڕووسییەکی دیدار و چاوپێکەوتنی ئەنجام دا و خوازیاری ئاگربەستی کاتی لە سووریا بووە، هەتا هێزە مرۆیی و فریاگوزارییەکان بتوانن یارمەتییە مرۆیییەکان بگەیەنن ناوچە کۆنترۆڵکراوەکان.}

^{لەم بارەوە تۆڕی میدیایی بی بی سی بڵاوی کردووەتەوە، لە کاتێکدا ئەمەریکا و ڕووسیا پێداگرن لەسەر ئاگربەستی کاتی، بەڵام لە دوێنێوە هێزەکانی سوپای سووریا هێرشەکانیان بۆ کۆنترۆڵکردنەوەی چەند ناوچەیەک لەدەستی هێزەکانی ئۆپۆزسیۆن لە حەلەب چڕتر کردووەتەوە.}

^{شرۆڤەکارانی سیاسی لەو باوەڕە دان لە حاڵێکدا وا دیارە سوپای سووریا بتوانێت لەو هێرشانەدا سەرکەوتن بەدەست بێنێت، بەڵام ئەگەری کەمی هەیە کە ڕووسیا قەبووڵ بکات لە وەها دۆخێکدا ڕێککەوتن و ئاگربەستی کاتی ڕابگەنەرێت.}

^{لە بەرانبەردا لە دوێنیوە ئێران و ڕووسیا پشتیوانیە سەربازییەکانی خۆیان بۆ سوپای سووریا درێژە پێداوە و چەکوچۆڵ و هێزی زیاتریان ناردووەتە سووریا.}

^{بڕیارە ئەمڕۆ دووشەممە باراک ئۆباما و ڤێلادیمیر پۆتین هەر دوو سەرکۆماری ئەمەریکا و ڕووسیا پێکەوە کۆ ببنەوە و لەبارەی ئاگربەستی کاتی لە سووریا پێکەوە گفتوگۆ بکەن و بەڕای کارناسان، پێشهات و ڕووداوەکان وا دەردەخەن زۆر دوورە ئەم دوو کەسە بتوانن بگەنە ڕێککەوتنێک.}

^5/9/2016

^{سەرۆک کۆماری رووسیا ساردەمەنییەکی تایبەتی وڵاتەکەی پێشکەشی سەرۆک کۆماری چینی میللی دەکات.}

^{لە پەراوێژی کۆنگرەی G20، ڤلادیمێر پوتین، سەرۆکی رووسیا و شی جین پینگ، سەرۆکی چین کۆ بوونەوە و سەرەڕای گەرمیی پەیوەندییەکانیان، پوتین هەوڵی دا گفتوگۆکانی سارد بکاتەوە.}

^{شی جین پینگ هەر کاتێک سەردانی روسیا بکات، ساردەمەنی رووسی (ئایس کرێمی رووسی) دەخوات. ڤلادیمێر پوتینیش پێی راگەیاندووە، کە وەک چۆن بەڵێنی پێداوە، ”کارتۆنێکی تەواو ساردەمەنییەکەم بۆ هێنای“.}

^{سەرۆکی چین رایگەیاندووە، کە ساردەمەنیی رووسی ”زۆر بە تامە“ و زۆریش حەز بە خواردنی دەکات و سوپاسی ”بەخشندەیی“ پوتینیشی کردووە.}

^{جۆرێکی ساردەمەنیی رووسی}

^5/9/2016

^{بەپێی هەواڵی سایت و ماڵپەڕە ئێرانییەکان شەوێ ڕابردوو چەند تەقینەوەی بەهێز لە ڕۆژئاوای تاران ڕوویان داوە.}

^{بەپێی ڕاپۆرتی ماڵپەڕی ئیرنا، شەوی 4 لەسەر 2016 -9 -5 لە ڕۆژئاوای تاران تەقینەوەیەکی بەهێز ڕووی داوە کە بووەتە هۆی ترس و دڵەڕاوکێ خەڵک.}

^{ماڵپەڕی ئیرنا لەم بارەوە لەزاری بەرپرسانی بەڕێوەبەرایەتیی کارەباوە بڵاوی کردووەتەوە، کە تەقینەوەکە سەعات 11ی شەوی ڕابردوو و لە وێستگەی دابەشکردنی کارەبای ناوچەی "تەرەشت"ی ڕۆژئاوای تاران ڕووی داوە.}

^{بەپێی هەمان سەرچاوە هۆکاری ئەو تەقینەوەیە زەختی زۆر بووە لەسەر تەزووی کارەبا کە هاوکات لەگەڵ تەقینەوەکە بەشێکی زۆر کێبڵەکانی کارەباش سووتاون و ئاگرێکی زۆر ناوچەکەی گرتووەتەوە.}

^{هەرچەند هەندێ لە تۆڕە کۆمەڵایەتییەکان بڵاویان کردووەتەوە کە تەقینەوەکە لە چەشنی تەقینەوەی بۆمب بووە، بەڵام پۆلیس و ناوەند فەرمییەکان ئەمەیان ڕەت کردووەتەوە.}

^{لە ماوەی یەک مانگی ڕابردوودا ئەمە چەندەمین حاڵەتی تەقینەوەی بەهیزی، غاز، کارەبا و ناوەندی بەرهەمهێنانە کەلە تاران ڕووی داوە.}

^5/9/2016

^{رەجەب تەیب ئەردۆغان و جۆ بایدن}

^{رۆژی 24ی ئاب، چەند كاژێرێك بەر لەوەی جۆ بایدن، جێگری سەرۆكی ئەمریكا بگاتە ئەنقەرە، تانك و زرێپۆشەكانی توركیا و 500 چەكداری هێزەكانی سووریای ئازاد، سنووری سووریایان بەزاند و شارۆچكەی جەرابلوسیان كۆنترۆڵ كرد.}

^{سەردانەكەی بایدن لە چەند روویەكەوە گرنگ بوو، یەكەم: لەدوای كودەتاكەی 15 تەمموزەوە ئەوە یەكەمجار بوو بەرپرسێكی باڵای ئەمریكی سەردانی توركیا بكات. دووەم: ناردنی بایدن لەلایەن ئۆباماوە دەیسەلمێنێت كە ئەمریكا بەنیازی ئاساییكردنەوەی پەیوەندییەكانیەتی لەگەڵ توركیا، بەبێ ئەوەی ئۆباما خۆی ناچار بێت لەسەر شاشەكان لەگەڵ ئەردۆغان دەربكەوێت.}

^{ستیڤ كلێمنز كە ماوەی چەندین ساڵە لە گەشتە سیاسییەكانی دەرەوەیدا هاوڕێی بایدن بووە، دەڵێت یەكێك لە تایبەتمەندییەكانی جێگرەكەی ئۆباما دروستكردن و پاراستنی پەیوەندییە لەگەڵ سەركردە سەرسەختەكان، واتە ئەوانەی ئۆباما كەیفی پێیان نایەت. سەیر نییە سەختترین وڵات و سەركردەكان خراونەتە ئەستۆی بایدن، لەوانەش عێراق، ئۆكراینا، كێشەكانی نێوان ژاپۆن و كۆریا، ئەمریكای ناوەڕاست، كۆڵۆمبیا و ئیسرائیل و نەتانیاهو. ئێستا ئەم لیستە توركیا و ئەردۆغانیشی هاتووەتە سەر.}

^{جۆزێف بایدن لە هەڤپەیڤینێكدا باسی بنەمای سەرەكی كاری سیاسی خۆی دەكات و دەڵێت "باوكم زۆربەی جاران پێیدەگوتم، ئەگەر هەموو شتێكت وەك یەك پێ گرنگ بێت، ئەمە واتە تۆ هیچت پێ گرنگ نییە. بۆیەش لە ماوەی 44 ساڵی رابردووی كاری سیاسیمدا سەختترین بەش ئەوە بووە دیاریی بكەم كام هەڕەشە و نیگەرانی دەبێت لە ئەولەویەتدا بێت، بۆ ئەوەی بەپێی بایەخەكەیان توانا و سەرچاوەیان بۆ تەرخان بكەین".}

^{لە دوایین مانگەكانی بەرپرسیارێتی خۆی لە كۆشكی سپی، بایدن جارێكی دیكە و لە رۆژهەڵاتی ناوەڕاست رووبەڕووی ئەم پرسیارە بووەتەوە، ئەمجارەیان ئەمریكا دەبێت لە نێوان توركیا و كوردی رۆژئاوا ئەولەویەتی خۆی دیاری بكات.}

^{جێگری سەرۆكی ئەمریكا لەكاتێكدا سەردانی توركیای دەكرد كە دوو كەیسی هەستیار لەسەر مێز بوون: یەكەمیان پەیوەندی بە رادەستكردنەوەی فەتحوڵڵا گولەن، رابەری بزووتنەوەی خزمەتەوە هەبوو كە توركیا بە پلاندانەری كودەتاكەی 15ی تەمموزی دەزانێت و داوای رادەستكردنەوەی لە ئەمریكا دەكات. كەیسی دووەم پەیوەندی بە پێشڕەوییەكانی هێزەكانی سووریای دیموكراتەوە هەبوو بەرەو ناوچەكانی ئەلباب و جەرابلوس.}

^{لە كەیسی رادەستكردنەوەی گولەندا بایدن توركیای دڵنیا كردەوە كە ئەم پرسە لە دەستی ئۆبامادا نییە و دەبێ سیستەمی دادوەریی ئەمریكا بڕیاری لەسەر بدات، بۆ ئەم مەبەستەش توركیا دەبێ بەڵگەی تەواو رادەستی وەزارەتی دادی ئەمریكا بكات، ئەمەش ئەو شتەیە كە توركیا هەتا ئێستا نەیتوانیوە بیكات.}

^{محەممەد ئەیوب، توێژەر لە ناوەندی سیاسەتی جیهانی دەڵێت "بەكارهێنانی كارتی گولەن هێندەی بۆ جووڵاندنی رای گشتیی نێوخۆییە، هێندە بۆ دروستكردنی گوشار لەسەر ئەمریكا نییە". لەبەر ئەوەی "مانەوەی گولەن لە ئەمریكا ئامرازێكە بۆ ئەوەی هەست و سۆزی نێوخۆیی پێ بجووڵێنن و لەم رێگەیەشەوە بیانوو بۆ ئەجێندا نێوخۆییەكانی خۆیان بهێننەوە، لەوانەش زەروورەتی گۆڕینی سیستەمی سیاسیی توركیا لە پەرلەمانییەوە بۆ سەرۆكایەتی".}

^{جگە لەمە توركەكان دەزانن، ئەگەر گولەن لە داهاتوویەكی نزیكدا رادەست بكرێتەوە، ئەوە وەكوو دیارییەكی ژەهراوی لە دەستی توركەكاندا دەمێنێتەوە، لە كاتێكدا دوای رادەستكردنەوەی گولەن دەبێ دۆخی نائاسایی توركیا نەرمتر بكرێت و ئەردۆغان بیانووەكەی ئێستای بۆ بەرگری لە سیستەمی سەرۆكایەتی نامێنێت، بەدەر لە هەموو ئەمانەش دەستگیركردنی گولەن دەرفەتێك بۆ رۆژئاوا دەكاتەوە كە چاودێریی توند بخاتە سەر سیستەمی دادوەریی توركیا و جۆری مامەڵەكردنیان لەگەڵ گولەن.}

^{بەڵام كەیسی دووەم، واتە ئاسایشی سنوورەكانی باشووری توركیا، ئەو كەیسەیە كە ئەمریكا دەشێت ئامادە بێت دانوستاندن و سازشی لەسەر بكات. بایدن لە كۆنفرانسە رۆژنامەڤانییەكەیدا رایگەیاند ئەمریكا بڕوای تەواوی بەوە هەیە كە سنوورەكانی توركیا دەبێت لەلایەن توركیا خۆیەوە پارێزگارییان لێ بكرێت، جەختی لەسەر ئەوە كردەوە كە نابێت سووریا پارچە پارچە بێت. بەڵام روونی نەكردەوە مەبەستی لە پارچە پارچەبوون دامەزراندنی سیستەمی فیدراڵیشە یان نا، پەیەدەش داوای سەربەخۆیی لە سووریا ناكات، بەڵام لێدوانەكەی بایدن دەرگای هەردوو ئەگەرەكەی لە كوردی رۆژئاوا داخستووە: واتە دروستكردنی دەوڵەت یان هەرێمی یەكپارچەی رۆژئاوای كوردستان.}

^{وەك لە لێدوانەكەی جێگری سەرۆكی ئەمریكادا دەردەكەوێت، ئۆپەراسیۆنی سوپای توركیا لەناو خاكی سووریا (واتە ئۆپەراسیۆنی قەڵغانی فورات) سنووردارە بە پاراستنی سنوورەكانی توركیا، نەك بەشدارییەكی كارا لە یەكلاكردنەوەی قەیرانی سووریا كە پێناچێت توركیا لەم قۆناغەدا خۆی لە كێشەیەكی ئاوها ئاڵۆز لەگەڵ رووسیا و ئێران وەربدات.}

^{یەكینەكانی پاراستنی گەل (یەپەگە) وەكوو بەهێزترین هاوپەیمانی ناحكومیی ئەمریكا بۆ جەنگی دژی داعش لە سووریا لەقەڵەم دەدرێ، لە كاتێكدا توركیا هەر لە سەرەتاوە جۆرێك لە كەمتەرخەمی لە بەرامبەر داعش نواندووە و گەورەترین بەشداریی توركیا لە جەنگی دژی داعش پێدانی بنكەی ئاسمانیی ئەنجەرلیك بووە. هەر بۆیە هەست دەكرێت ئەمریكا لەڕووی ئەخلاقییەوە بەرپرسیارە لە پاراستنی كۆمەڵێك بەرژەوەندی بۆ كورد.}

^{بۆ تێگەیشتن لەم هەڵوێستەی ئەمریكا لە نێوان توركیا و كوردی رۆژئاوا، دەبێت جارێكی دیكە سەیری ئەولەوییەتە گشتییەكانی ئەمریكا بكەین. بایدن لە دیمانەیەك لەگەڵ كلێمنزدا دەڵێت "تیرۆریزم مەترسییەكی راستەقینەیە، بەڵام هەڕەشەی مان و نەمان لە ئەمریكا ناكات". ئیدارەی كۆشكی سپی لە ماوەی نزیك هەشت ساڵی رابردوودا "هەڕەشەی ئەتۆمی" لەلایەن رووسیا، چین، كۆریای باكوور و پاكستان، وەكوو هەڕەشەی سەرەكی بۆ سەر ئەمریكا بینیوە، نەك تیرۆریزم. تەنانەت هەڕەشەی رووسیا لەسەر سنوورەكانی رۆژهەڵاتی ئەوروپا و ناوچەی باڵتیك لە پێش تیرۆریزمن.}

^{توركیا خاوەن پێگەیەكی جیۆپۆلیتیكی گرنگە بۆ بەرەنگاربوونەوەی هەڕەشەكانی رووسیا، بە تایبەتیش لە دەریای رەش و باشووری قەوقاز، هەر بۆیە نزیكبوونەوەی توركیا و رووسیا نیگەرانییەكی زۆر بۆ ئەوروپا و رۆژئاوا دروست دەكات. رووسیا لە رێگەی دەستتێوەردان لە قەیرانی نێوخۆیی سووریا تەركیزی رۆژئاوای لەسەر هێرشەكانی سەر كریمیا و رۆژهەڵاتی ئۆكراینا هەڵگرت، ئێستاش ئەمریكا دەیەوێت هەر لە سووریا و بە پێدانی كۆمەڵێك گەرەنتی و پاراستنی كۆمەڵێك بەرژەوەندی، توركیا لە رووسیا دووربخاتەوە.}

^4/9/2016

<sup>دەوڵەتی پاکستان و رێکخراوی توندڕەوی قاعیدە چوار دیل دەگۆڕنەوە، کە دووانیان کچی سەرۆکی رێکخراوەن.

بەپێی زانیاریی میدیاکانی پاکستان، حکوومەتی پاکستان فاتیمە و ئومەیمی کچانی ئەریمەن زەواهیری، سەرۆکی رێکخراوی توندڕەوی قاعیدە و کچێکی دیکەی سەرکردەیەکی قاعیدەی بە ناوی سومەییە مەرجان سالم ئازاد کردووە.

لە بەرامبەر ئەو دەستپێشخەرییەی حکوومەتی پاکستان، رێکخراوی قاعیدە کوڕی ئەشفەق کەیانی، سوپاسالاری پێشووی پاکستانی ئازاد کردووە.

سوپای پاکستان لە بەیاننامەیەکدا رەتی کردووەتەوە، کە ئەو سێ دیلەی قاعیدەی ئازاد کردبێت.</sup>

^4/9/2016

<sup>سوپای تورکیا بە تانک و زرێپۆشەوە لە ناوچەیەکی کوردستان سنوور دەبەزێنێت و رایدەگەیەنێت، لە چوارچێوەی شەڕی دژی رێکخراوی توندڕەوی داعشە.

ئێوارەی رۆژی شەممە 3ـی ئەیلوولی 2016، سوپای تورکیا بە دەیان تانک و زرێپۆشەوە لە میانەی ئۆپەراسیۆنی قەڵغانی فورات، لە شاری کیلیس لە کوردستانی باکوورەوە چووە ناو خاکی کوردستانی رۆژئاوا.

هەروەک سوپای تورکیا رایگەیاندووە، پەڕینەوەی هێزەکە لە سنوورەوە بە مەبەستی ”پاک کردنەوەی ناوچە سنوورییەکانی باکووری سووریایە لە شەڕڤانانی یەکینەکانی پاراستنی گەل (یەپەگە) و داعش“.

پێشتریش لە رۆژی چوارشەممە 24ـی ئاب، سوپای تورکیا رایگەیاند، کە ئۆپەراسیۆنێکی سەربازییان بە ناوی قەڵغانی فورات بۆ “پاککردنەوەی باکووری سووریا لە هێزە کوردییەکان و رێکخراوی توندڕەوی داعش" دەست پێکرد.

ئۆپەراسیۆنەکە لە رۆژی سێشەممە 23ـی ئاب بە بۆردومان کردنی بنکە و بارەگاکانی داعش لە شاری جەڕابلوس لە باکووری سووریا، لەلایەن سوپا و فڕۆکە جەنگییەکانی تورکیا دەستی پێکرد.

لە میانەی ئۆپەراسیۆنەکەدا، سەدان سەربازی سوپای تورکیا بە یاوەریی 20 تانکی سەربازی، چوونەتە ناو خاکی سووریا و گەیشتوونەتە سنووری جەڕابلوس و پێکدادانی چەکداریی لە نیوان هێزەکانی سووریای دیموکراتی و سوپای ئازاد رووی دا.

هێزەکانی سووریای دیموکراتی بە پشتگیریی ئەمریکا و بۆ رزگار کردنەوەی شارەکانی رەققە، منبج و جەڕابلوس پێکهێنراوە، کە داعش داگیری کردوون.</sup>

^4/9/2016

^{بەپیی هەواڵی سەرچاوە خۆجێیەکانی کوردستانی ڕۆژهەڵات، لە یەکێک لە گوندەکانی ناوچەی "سەرشیو"ی سەر بە شاری سەقز، ژنێک کۆتایی بە ژیانی خۆی هێناوە.}

^{بەپێ سەرچاوەکان ئەو ژنانە ناوی "م.م" ە و خەڵکی گوندی "بۆخڵو" سەر بە ناوچەی "سەرشیو"ی سەقزە و دوو ڕۆژە لەمەوبەر بە هۆکارێکی نادیار خۆی کوشتووە.}

^{هەر لەم پەیوەندییەدا، چەند ڕۆژ پێش ئێستا، لە شارەدێی ساحێب، کچێکی تەمەن 19 ساڵ خۆی سووتاندووە و کۆتایی بە ژیانی خۆی هێناوە.}

^{جەستەی ئەم کچە 90% سووتاوە و دوای ئەم ڕووداوە بۆ چارەسەریی دەرمانی بۆ  شاری سنە بەڕێ کراوە و دواتر لە شاری سنەشەوە بۆ شاری تەورێز گوازراوەتەوە، بەڵام بەهۆی خراپیی بارودۆخی جەستەیی گیانی لەدەست داوە.}

^{تەرمی ئەم کچە تەمەن 19 ساڵە لە گوندی "کاکەسیاو" نێژراوە.}

^{ماوەیەکە ئاستی خۆکوژی لە شار و شارۆچکەکانی کوردستانی ڕۆژهەڵات بەتایبەت لە شاری سەقز ڕووی لە بەرزبوونەوە کردووە و ئەمش دەتوانێت بۆ بارودۆخی خراپی ئابووری و کێشەی کۆمەڵایەتیی و کوڵتووری پەیوەندیی هەبێت.}

^4/9/2016

^{بۆ یەکەمجار لە سەرەتای دەست پێکردنی شەڕەکانیدا، ئۆپۆزیسیۆنی سووریا سەربازانی رژێم لەرێگای فڕۆکەوە بۆردومان دەکات.}

^{گرووپەکانی ئۆپۆزیسیۆن و چالاکوانانی سووری گرتەیەکی ڤیدیۆییان لە تۆڕە کۆمەڵایەتییەکان بڵاو کردووەتەوە، کە تێیدا دەردەکەوێ، فڕۆکەیەکی بێ فڕۆکەوانی جۆری (درۆنز)، ژمارەیەک سەرباز بۆردومان دەکات.}

^{هەروەک چالاکوانە ئۆپۆزیسیۆنەکان بڵاویان کردووەتەوە، ئەو فڕۆکە بێ فڕۆکەوانە هی ئۆپۆزیسیۆنە و یەکەمجارە لە شەڕەکانیان لە دژی سوپا و میلیشیاکانی نزیک لە رژێمی سووریا بەکاری بهێنن.}

^{لە شەڕی ناوخۆیی سووریادا، کە لە مانگی ئاداری 2011ـەوە لە نێوان گرووپە چەکدارییەکانی ئۆپۆزیسیۆن و رژێمی سووریادا دروست بووە، سوپای سەر بە رژێم بە هەموو جۆرە چەکێکی قەدەغەکراو بۆردومانی بارەگاکانی ئۆپۆزیسیۆن و هاووڵاتییان دەکات، کە بوونەتە هۆی کوژرانی زیاتر لە 300 هەزار کەس و ئاوارەبوونی زیاتر لە پێنج ملیۆنی دیکە.}

https://youtu.be/7CS4L44--os

^3/9/2016

<sup>هاوسه‌رۆكی پارتی دیموكراتی گەلان (هەدەپە) رایدەگه‌یەنێت، کە تاوەکو ئێستا نازانن رێبەری زیندانیکراوی پارتی کرێکارانی کوردستان (پەکەکە) زیندووە یان مردووە.

سه‌ڵاحه‌دین ده‌میرتاش، هاوسەرۆکی هەدەپە و پەرلەمانتاری تورکیا له‌ گوته‌یه‌كدا له‌ شاری وان لە کوردستانی باکوور رایگه‌یاند، کە شەوی کودەتاکەی سوپا، هەلیکۆپتەرێک چووەتە دوورگەی ئیمڕالی و شەڕ و پێکدادان رووی داوە، بەڵام "هێشتا نازانین ئه‌نجامی شه‌ڕ و پێكدادانەکە چی بووە".

سەڵاحەدین ده‌میرتاش ئاماژەی بە مانگرتن تا زانینی هەواڵێک لەبارەی رەوشی تەندروستیی عەبدوڵڵا ئۆجەلان، رێبەری پەکەکە کردووە و رایگەیاند، کە لە رۆژی 5ـی ئەیلوول، مانگرتنێکی کراوە ئەنجام دەدەن.

هاوسەرۆکی هەدەپە گومانی هەیە لەوەی ئەو ژەنەڕالنی بە هەلیکۆپتەرێکەوە پەنایان بردە بەر یۆنان، هەمان ئەو کەسانە بن کە شەوی کودەتاکە چووبنە دوورگەی ئیمڕالی و هەوڵی کوشتنی عەبدوڵڵا ئۆجەلانیان دابێت.

سەڵاحەدین دەمیرتاش پێیوایەم رێبەری پەکەکە زیندانییەکی ئاسایی نییە و ئەگەر دەسەڵاتی تورکیا رێگا بە خێزان و پارێزەرەکانی نەدا سەردانی بکەن، ئەوا مانگرتنەکە بەردەوام دەبێت.

بڕیارە رۆژی دووشەممە 5ـی ئەیلوولی 2016، 50 چالاکوان و ئەندامی حزب و رێکخراوە کوردییەکانی کوردستانی باکوور مانگرتنێکی کراوە ئەنجام بدەن (مانگرتن لە خواردن) و تاوەکو زانینی چۆنێتیی رەوشی تەندروستیی عەبدوڵڵا ئۆجەلان، مانگرتنەکەیان کۆتایی پێ ناهێنن.

عەبدوڵڵا ئۆجەلان لە رۆژی 15ـی شوباتی 1999، دەزگای هەواڵگریی تورکیا لە وڵاتی کینیاوە عەبدوڵلا ئۆجەلانی دەستگیر کرد، دواتر دادگای تورکیا بڕیاری زیندانیکردنی هەتاهەتایی بەسەردا سەپاند و گوێزرایەوە زیندانێک لە دوورگەی ئیمڕالی.</sup>

^3/9/2016

<sup>پارتی کرێکارانی کوردستان (پەکەکە) لە ڕێگای میدیا فەرمی و نافەرمییەکانیەوە، بە ناوی شرۆڤەکردنی سیاسییەوە، دژایەتیی ناوەندی بڕیاری یەکێتیی نیشتمانیی کوردستان دەکەن.

بە گوێرەی بەدواداچوونێکی (باسنیوز) بۆ میدیا فەرمی و نافەرمییەکانی سەر بە پەکەکە، لەم دوو ڕۆژەدا بە گشتی، میدیاکانی سەر بەو پارتە، لەژێر ناوی شرۆڤەکردنی ڕووداوەکانی نێوخۆی یەکێتی، بە ئاشکرا دژایەتیی ناوەندی بڕیاری یەکێتیی نیشتمانیی کوردستان دەکەن کە لە لایەن هەردوو جێگری سکرتێری گشتی و ژمارەیەکی زۆر لە ئەندامانی مەکتەبی سیاسی و سەرکردایەتیی یەکێتی ڕایانگەیاندووە. تەنانەت میدیاکانی نزیک لە پەکەکە، تۆمەتی جۆراوجۆر ئاراستەی سەرکردەکانی ناوەندی بڕیار دەکەن. لە بەرامبەردا پشتیوانی لە باڵی هێرۆ ئیبراهیم ئەحمەد دەکەن و بە خاوەن شەرعیەتیان دەزانن.

لەمبارەیەوە چاودێرێکی سیاسیی شارەزا لە کاروباری پەکەکە کە نەیویست ناوەکەی ئاشکرا بکرێت، بە (باسنیوز)ی ڕاگەیاند: ”پەیوەندیی نێوان پەکەکە و بنەماڵەی تاڵەبانی، بە تایبەتیش پەیوەندیی خودی جەمیل بایک، هاوسەرۆکی پەکەکە لەگەڵ بنەماڵەی تاڵەبانی، پەیوەندییەکی پتەوە“. هاوکات ئەوەشی ڕوون کردەوە کە لە نێو یەکێتیدا، باڵی هێرۆ ئیبراهیم ئەحمەد زۆرتر لە کۆماری ئیسلامیی ئێرانەوە نزیکە و گوتی: ”پەکەکە و بزووتنەوەی گۆڕان و باڵی هێرۆ ئیبراهیم ئەحمەد، زۆر لە ئێرانەوە نزیکن، لە کاتێکدا سەرکردەکانی ناوەندی بڕیار، سەرەڕای ئەوەی بە پەیوەندییان لەگەڵ ئێران ڕازین، بەڵام لەگەڵ خواستە نەتەوەییەکانی کوردن“.

پەکەکە لە کاتێکدا باڵی هێرۆ ئیبراهیم ئەحمەد بە شەرعی دەزانێت کە پێشتر د. سەروەر عەبدولڕەحمان، پەرلەمانتاری پێشووی یەکێتی بە (باسنیوز)ی ڕاگەیاندووە: ”بەپێی پەیڕەوی ناوخۆی یەکێتی، لە حاڵەتی ئامادەنەبوونی سکرتێری گشتی، ڕاستەوخۆ دەسەڵاتەکانی بۆ جێگرانی دەگوازرێتەوە، بەڵام دەسەڵات بە جێگرانی سکرتێری گشتی نەدراوە و ڕێگرییان لێ کراوە، بۆیە ناوەندی بڕیاریان دامەزراندووە“.</sup>

^3/9/2016