^{ئاڵای کوردستان و ئەرمەنستان}

^{سەرۆکی ئەرمەنستان مەرسوومێکی کۆماری بۆ کردنەوەی کونسوڵخانەی ئەرمەنستان لە هەرێمی کوردستان دەردەکات.}

^{بەپێی هەواڵێکی ماڵپەڕی (خەبەر ئەرمەن)، کونسوڵخانەکە گشتیی دەبێت و لە شاری هەولێر دەبێت، کاروباری پێدانی ڤیزا بە هاووڵاتییانی پارێزگاکانی هەرێمی کوردستان و پەیوەندییەکانی هەولێر و یەریڤان رێک دەخات.}

^{سێرج سارکیسیان، سەرۆک کۆماری ئەرمەنستان مەرسوومێکی سەرۆکایەتیی بۆ کردنەوەکە دەرکردووە و حکوومەتی ئەرمەنستانیش کردنەوەی کونسوڵخانەکەی بۆ باشتربوونی پەیوەندییەکانی ئەرمەنستان و هەرێمی کوردستان و بوونی جالیەی ئەرمەنی لە هەرێمی کوردستان گێڕاوەتەوە.}

^{بەهۆی سەرکەوتنی هەوڵە دیپلۆماسییەکانی هەرێمی کوردستان، ئێستا 20 کونسوڵخانە، هەشت نووسینگەی بارزگانی و ئابووریی، شەش کونسوڵگەریی فەخریی وڵاتانی عەرەبی و جیهانی و چوار نووسینگەی هاوکاری و رێکخراوە نێودەوڵەتییەکان، لە هەرێمی کوردستاندا هەن.}

^15/3/2017

^{ئەنگێلا مێرکڵی ڕاوێژکاری ئەڵمانیا وەڵامى ڕەجەب تەیب ئەردۆغانى دایەوە و ڕایگەیاند، تۆمەتەکانى ئەردۆغان بێبنەمان.}

 ^{ئەوەش لەکاتێکدایە کەشەوى ١٣ى ئازارى ٢٠١٧ ڕەجەب تەیب ئەردۆغان، سەرۆک کۆمارى تورکیا لە چاوپێکەوتنێکى تەلەفزیۆنیدا  ئەنگێلا مێرکڵی ڕاوێژکاری ئەڵمانی تۆمەتبار کرد بە " هاوکاریکردنی تیرۆریستان" و مێرکڵیش لە وەڵامدا وتی "تۆمەتەکانی ئەردۆغان بێ مانان".}

^{لەنوێترین پێشهاتدا لە کێشەکانی نێوان ئەنقەرە و زۆرێک لە وڵاتە ئەوروپییەکان، ئەردۆغان وتی "خاتوو مێرکڵ، بۆچی تیرۆریستان لە وڵاتەکەتدا دەشاریتەوە بۆچی ناجوڵێیت؟" بەرلینی تۆمەتبارکرد بەوەی وەڵامی چوار هەزار و ٥٠٠ دۆسییەی نەداتەوەکە گومانیان لێکراوە تیرۆریست بن و دۆسییەکان لە تورکیاوە نێردراون بۆ ئەڵمانیا.}

^{هەروەها وتیشى "خاتوو مێرکڵ تۆ پشتیوانی لە تیرۆریستان دەکەیت و ئەڵمانیا یەکێکە لەو وڵاتە ئەورپیانەى کە حەز بەپێشکەوتنى تورکیا ناکات".}

^{لەلایەن خۆشیەوە، ستێڤان زایبەرتی وتەبێژی مێرکڵ، وەڵامی تۆمەتەکانی ئەردۆغانی داوەتەوە و بە بێ مانا ناوزەدى کردوون.}

^{لە ئێستادا پەیوەندییەکانى تورکیا و وڵاتانى ئەوروپى بە دۆخێکى قەیراناویدا تێدەپەڕێت و ئەوروپییەکان هۆکارەکانى بۆ ئەوە دەگەڕێنەوە، کە تورکیا بەرە و دیکتاتۆرى دەڕوات و بەرپرسانى تورکیاش هۆکارەکەى بۆ ئەوە دەگەڕێننەوە، کە وڵاتانى ڕۆژئاوا چاویان بە پێشکەوتنەکانى تورکیا هەڵنایەت.}

^{دوێنێش فێدێریکا مۆگرینی، نوێنەری باڵای سیاسەتی ئاسایشی و پەیوەندییەکانی دەرەوەی یەکێتی ئەورووپا و یوهانس هان، ئەندامی بەرپرسی دانوستانکاری فراوانکردنی ئەندامان لە کۆمیسیۆنی یەکێتیی ئەورووپا، لە راگەیەندراوێکی هاوبەشدا لەبارەی گرژی و ئاڵۆزییەکانی چەند ڕۆژی دوایی تورکیا و هەندێک لە وڵاتانی ئەورووپاوە، داوا دەکەن کە هەوڵی ئاسایی کردنەوەی دۆخەکە بدرێت.}

^{لە ڕاگەیەندراوەکەدا هاتووە، یەکێتی ئەورووپا بانگهێشتی تورکیا دەکات کە خۆی بەدوور بگرێت لە هەر وتار و کردارێکی تووند کە مەترسی خراپتر کردنی دۆخەکەی لێدەکرێت.}

^{هەروەها دەشڵێن،  ئەو پرسانەی کێشەیان لەسەرە تەنیا لەڕێی کردنەوەی کەناڵی ڕاستەوخۆی پەیوەندی و دیالۆگەوە چارەسەر دەکرێت و بەردەوام دەبین لە یارمەتییەکانمان بۆ بەرژوەندی پەیوەندییەکانی یەکێتی ئەورووپا و تورکیا.}

^15/3/2017

^{لە پەیوەندییەکی تەلەفۆنیدا، سەرۆکوەزیرانی عێراق بە سەرۆكوەزیرانی توركیای راگەیاندووە "هێزە ناوەندییە عێراقییەكان بە هاوكاری پێشمەرگە ئیدارەی دۆخی ئەمنی شنگال دەكەن و، حكومەتی عێراق رێگا بە هیچ دەستێوەردانێك لەو بوارە نادات".}

^{رۆژی سێشەممە 14-3-2017 حەیدەر عەبادی و بینالی یڵدرم چەند پرسێکی نێوان هەردوو وڵات لە پەیوەندییەکی تەلەفۆنیدا باسدەکەن، کە گرنگترینیان پرسی پەکەکە لە خاکی عێراق و کەمپی باشیک بووە، کە هێزی سەربازی تورکیای لێ جێگیرکراوە.
بەپێی راگەیێندراوێكی نووسینگەی سەرۆكوەزیرانی عێراق، عەبادی باسی ئۆپەراسیۆنی سەربازی لە موسڵ كردووە و ئەوەی روونكردنەوەتەوە "سەرەڕای زۆری ژامرەی ئاوارەكان، ئۆپەراسیۆنەكە زۆر بە باشی بەڕێوەدەچێت و حكومەتی عێراقیش پێداویستییەكانی بۆ ئاوارەكان دابینكردووە".}

^{لەبارەی دۆخی شنگال، عەبادی ئەوەشی بە سەرۆكوەزیرانی توركیا راگەیاندووە "هێزە ناوەندییە عێراقییەكان بە هاوكاری پێشمەرگە ئیدارەی دۆخی ئەمنی شنگال دەكەن و حكومەتی عێراق رێگا بە هیچ دەستێوەردرانێك لەو بوارە ناكات".}

^{لە بەشێكی دیكەی بەیاننامەكەدا ئاماژە بەوەكراوە، عەبادی داوای لە یڵدرم كردووە "پێویستە سەرجەم هێزەكانی لە خاكی عێراق بكشێنتەوە، چونكە ئەو پرسە پەیوەندی بە سەروەری عێراقەوە هەیە".}

^{سەرۆکوزیرانی عێراق بە هاوتا تورکییەکەی گوتوە "عێراق سوورە لەسەر پەرەپێدانی پەیوەندییەكانی لەگەڵ توركیا تاوەکو ئاستێكی بەرز".}

^{بینالی یڵدرم عەبادی بانگهێشتی توركیا كردووە، بە مەبەستی بەهێزكردنی پەیوەندییە دوو قۆڵییەكانی نێوان هەر دوو وڵات.}

^15/3/2017

^{یەكێتیی نیشتمانیی كوردستان بە نیازە ڕێکكەوتنێكی نوێ لەگەڵ پارتی دیموكراتی كوردستان واژۆ بكات، سەركردەیەكی باڵای ئەو حیزبە ڕایدەگەیەنێت: "مەكتەبی سیاسی یەكێتی بڕیار لەسەر ڕێكکەوتنی نێوان یەكێتی و پارتی دەدات.}

^{ڕەهبەری سەید براهیم، ئەندامی سەركردایەتیی یەكێتیی نیشتمانی، لە لێدوانێكدا بۆ (باسنوز) ڕایگەیاند: "نەخشە ڕێگاكەی یەكێتیی نیشتمانی یەكلا كرایەوە و بەكۆی دەنگی 47 ئەندامی سەركردایەتی و مەكتەبی سیاسی پڕۆژەی نەخشەڕێگا هەشت خاڵەكەی یەكێتی پەسەند كرا، بێگومان ئەو نەخشەڕێگایە كارێكی باشە بۆ ڕێكخستنەوەی نێوماڵی یەكێتی."}

^{گوتیشی: "ئەندامانی سەركردایەتی و مەكتەبی سیاسی لاریان نەبووە لە جێبەجێكردنی تەواوی خاڵەكانی ناو نەخشە ڕێگاكە بەتایبەتی ئەو خاڵەی كە باس لە سەربەخۆیی هەرێمی كوردستان دەكات، ئێمە هەموومان كۆك بووین لەسەر پرسی سەربەخۆیی كوردستان، بێگومان یەكێتیی بە هەموو شێوەیەك پشتگیری لە دامەزراندنی دەوڵەتی كوردی دەكات.}

^{دەربارەی ئەوەی لە كۆبوونەوەكەی ئەنجومەنی سەركردایەتیی یەكێتی باس لە ڕێككەوتنی پارتی و یەكێتی كراوە، ڕەهبەری سەید براهیم، ئاماژەی بەوەش دا كرد: "پرسی ڕێككەوتنی یەكێتی و پارتی ئاڕاستەی مەكتەبی سیاسی یەكێتی كراوە، بێگومان مەكتەبی سیاسی هەموو دەسەڵاتێكی هەیە و دەتوانێت، بڕیارە بدات لەسەر ڕێككەوتنێكی نوێ لەگەڵ پارتی."}

^14/3/2017

^{ئۆپۆزیسیۆنی سووریا لەبارەی بەشداریکردن لە دانوستاندنی ئەستانە 3 بڕیاری کۆتایی دەدات.}

^{رۆژی سێشەممە 14.3.2017، لە شاری ئەستانەی پایتەختی کازاخستان، کۆبوونەوەکانی ئەستانە بە سەرپەرشتیی رووسیا و تورکیا دەست پێدەکەن و ماوەی دوو رۆژ بەردەوام دەبن.}

^{ئوسامە ئەبو زەید، گوتەبێژی شاندی ئۆپۆزیسیۆنی سووریا بە کەناڵی (جەزیرە)ی راگەیاندووە، ئۆپۆزیسیۆن بەشداریی لە کۆبوونەوەکان ناکات.}

^{لە کۆبوونەوەکەدا، کە نوێنەری ئێرانیش بەشداریی دەکات، وڵاتانی رووسیا و تورکیا و رژێمی سووریا هەوڵ دەەدەن چارەسەرێک بۆ شەڕی ناوخۆیی سووریا بدۆزنەوە، کە ماوەی شەش ساڵە بەردەوامە.}

^{ئوسامە ئەبو زەید هۆکاری بەشدارینەکردنی ئۆپۆزیسیۆنی بۆ رەتکردنەوەی داوای محەمەد عەلوش، سەرۆکی شاندی دانوستاندنکاری ئۆپۆزیسیۆن لەلایەن رووسیاوە گەڕاندەوە.}

^{تاوەکو ئێستا هەردوو لایەنی شەڕی ناوخۆیی سووریا دوو جاری دیکە لە ئەستانە بە سەرپەرشتیی رووسیا و تورکیا کۆ بوونەتەوە، بۆ دۆزینەوەی چارەسەرێک بۆ شەڕی ناوخۆیی سووریا، کە لە دوا کۆبوونەوەدا، هەردوو لایەن رێککەوتن لەسەر ئاگربەست.}

^{شەڕی ناوخۆیی سووریا لە مانگی ئاداری 2011ـەوە لە نێوان گرووپە چەکدارییەکانی ئۆپۆزیسیۆنی سووریا و رژێمی ئەو وڵاتە دروست بووە و بووەتە هۆی کوژرانی لانی کەم 400 هەزار هاووڵاتیی و ئاوارەبوونی زیاتر لە پێنج ملیۆن کەسی دیکە.}

^14/3/2017

^{نوێنەری تایبەتیی سکرتێری گشتیی نەتەوە یەکگرتووەکان پیرۆزبایی جەژنی نەورۆز و سەرکەوتنەکانی هێزەکانی پێشمەرگەی کوردستان لە گەلی کوردستان و سەرۆکی هەرێمی کوردستان دەکات.}

^{بەپێی راگەیەندراوێکی سەرۆکایەتیی هەرێمی کوردستان، کە وێنەیەکی بۆ (باسنیوز) نێردراوە، رۆژی دووشەممە 13.3.2017، مەسعود بارزانی، سەرۆکی هەرێمی کوردستان لەگەڵ یان کۆبیش، نوێنەری تایبەتیی سکرتێری گشتیی نەتەوە یەکگرتووەکان لە عێراق، کۆ بووەتەوە.}

^{یان کۆبیش وێڕای سوپاسکردنی مەسعود بارزانی بۆ رەخساندنی دیدارەکە، پیرۆزبایی سەرکەوتنەکانی پێشمەرگە و جەژنی نەورۆزی لە سەرۆکی هەرێمی کوردستان و گەلی کوردستان کردووە.}

^{هەروەک لە راگەیەندراوەکەدا هاتووە، سەرۆکی هەرێمی کوردستان و نوێنەری تایبەتیی سکرتێری گشتیی نەتەوە یەکگرتووەکان لە عێراق، باسی دوایین پێشهاتەکانی شەڕی دژی رێکخراوی توندڕەوی داعش و قۆناغەکانی رزگارکردنەوەی شاری مووسڵ‌یان کردووە.}

^{مەسعود بارزانی و یان کۆبیش تیشکیان خستووەتە سەر رۆڵی پێکهاتەکانی پارێزگای نەینەوا و رێککەوتنی هەولێر و بەغدا بۆ دابینکردنی ئاسایش بۆ شاری مووسڵی دوای داعش و چۆنێتیی بەڕێوەبردنی پارێزگاکە و کۆبیش ” ئامادەیی نەتەوە یەکگرتووەکانی بۆ پێشکەشکردنی ھاوکاری لەو بارەیەوە“ راگەیاندووە.}

^{هەر لە کۆبوونەوەکەدا، سەرۆکی هەرێمی کوردستان و نوێنەری تایبەتیی سکرتێری گشتیی نەتەوە یەکگرتووەکان لە عێراق هەماهەنگیی هێزەکانی پێشمەرگەی کوردستان و سوپای عێراق‌یان بە ”هۆکاری سەرەکی“ی سەرکەوتنی ئۆپەراسیۆنەکانی رزگارکردنەوەی نەینەوا لە قەڵەم داوە، جگە لە باسکردنی رەوشی پەیوەندییەکانی هەولێر و بەغدا و بارودۆخی سیاسیی ناوچەکە بە گشتی.}

^{سەرلەبەیانیی رۆژی یەکشەممە 19.2.2017، حەیدەر عەبادی، سەرۆک وەزیران و فەرماندەی گشتیی هێزە چەکدارەکانی عێراق دەست پێکردنی ئۆپەراسیۆنی رزگارکردنەوەی بەری رۆژئاوای مووسڵی راگەیاند.}

^{رۆژی 17ـی تشرینی یەکەمی 2016ـەوە ئۆپەراسیۆنی هاوبەشی هێزەکانی پێشمەرگە و هێزە عێراقییەکان بۆ رزگار کردنەوەی مووسڵ دەستی پێکردووە.}

^{هێزەکانی پێشمەرگەی کوردستان لە چەند رۆژی یەکەمی ئۆپەراسیۆنەکەدا، هەموو ناوچە کوردستانییەکانی سنووری پارێزگای نەینەوایان رزگار کردەوە و رۆژی سێشەممە 24/1/2017یش هێزە عێراقییەکان رزگارکردنەوەی تەواوەتیی بەری رۆژهەڵاتی مووسڵ‌یان راگەیاند.}

^{لە مانگی حوزەیرانی 2014 و لە سەردەمی سەرۆک وەزیرانیی نوری مالیکی، دوای هەرەس هێنان و شکستی سوپای عێراق، شارۆچکەی حەویجە لە پارێزگای کەرکووک و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار لەلایەن چەکدارانی رێکخراوی توندڕەوی داعش داگیر کران.}

^13/3/2017

^{یاریدەدەرێکى  فەرماندەى گشتى سوپاى پاسداران ڕایگەیاندووە، ئێران کارگەى چەک و موشەک دروستکردنى بۆ حزبوڵا لە لوبنان دامەزراندووە، وتووشیەتى ، بۆ پارێزگاریکردنی کارگەکە لە بۆردومانى فڕۆکە  لە قوڵایی ٥٠ مەتر لە ژێر زەوى دروستکراوە.}

^{ماڵپەڕى سکاى نیوز بڵاویکردەوە، یاریدەدەرێکى محەمەد عەلى جەعفەرى فەرماندەى گشتى سوپاى پاسداران  ڕایگەیاندووە، کارگەکە لە توانایدا هەیە چەندین جۆر موشەک دروستبکات کە مەوداى هەندێکیان ٥٠٠ کیلۆمەتر دەبێـت، لە نێویاندا موشەکى زەمین بە زەمین و موشکى ژێر دەریایی و تۆربیدى تایبەت کە دەتوانرێت لە ناو کەشتییەوە بتەقێنرێت.}

^{ئاماژە بەوەشکراوە، کە پارچەى موشەکەکان لە چەند کارگەیەکى جیاواز دروستدەکرێت و دواتر کۆدەکرێنەوە دەبەسترێن.}

^{ماڵپەرەکە ئاماژەى بەوەشکردووە،  کۆلێژێکى جەنگى سەر بە زانکۆى ئیمام حسین لە ئێران کراوەتەوە و تایبەت کراوە بە فێرکردنى خوێندکارانى لوبنانى و سوری.}

^{ئەمەش لە کاتێکدایە لە ئێستادا چەندین میلیشیاى ئێرانى لە سوریا هاوشانى سوپاى سوریا شەڕ دەکەن و حزبوڵاى لوبنانیش یەکێکە لەو هێزانەى لە شەڕەکەدا هاوپەیمانى ئێران و سوریایە.}

^13/03/2017

^{وەزارەتی ناوخۆی تورکیا ڕایگەیاندووە، لەماوەی هەفتەی ڕابردوودا پاسەوانانی کەناراوەکانی تورکیا ٢٨٩ کۆچبەریان لە کەناراوەکانی دەریای ئیجە و دەریای ناوەڕاست ڕزگارکردووە.}

^{بەگوێرەی ڕاگەیەندراوێکی وەزارەتی ناوخۆی تورکیا، لە حەوت ڕووداوی جیاوازدا پاسەوانانی کەناراوەکان توانیویانە حەوت قاچاخچی کۆچکردن لەنێوان ٣-١٠ی ئازار دەستگیربکەن.}

^{هەر بەگوێرەی ڕاگەیەندراوەکە، جیا لەوەش ١٧٨ کۆچبەری تر لە چوار حاڵەتی تر لە کەناراوەکانی ئیزمیر و ئایڤالیک ڕزگارکراون.}

^{ئەمەش لە کاتێکدایە ساڵى ڕابردوو حکومەتى تورکیا ڕێککەوتنێکى لەگەڵ وڵاتانى ئەوروپا واژۆکرد کە ڕێگە لە کۆچبەران بگرێت و ڕێگەیان نەدات بپەڕنەوە بۆ  ئەوروپا.}

^{ئەمەش وایکرد ئەو شەپۆلەى زۆرى خەڵکى ڕۆژهەڵات بە گشتى و سوریا و عێراق بە تایبەت کە پێشتر ڕوویان لە ئەوروپا دەکرد کەمبێتەوە.}

^13/3/2017

^{ئاڵۆزبوونی پەیوەندییەکانی تورکیا وڵاتانی دراوسێی تێپەڕاند و گواسترایەوە بۆ وڵاتانی ئەوروپا. لە ٢٤ کاتژمێردا بەرپرسانی تورکیا و هۆڵەندا توندترین لێدوانیان لە دژی یەکدا و ژمارەیەک ڕێ و شوێنی دیبلۆماسییان لە دژی یەک گرتە بەر.}

^{دوای ئەوەی حکومەتی هۆڵەندا بە بیانوی پاراستنی ئاسایشی گشتی ڕێگەی نەدا فڕۆکەکەی وەزیری دەرەوەی تورکیا لە وڵاتەکەی بنیشێتەوە و ڕێگریکرد لە بە شداریکردنی وەزیری خێزانى تورکیا لە کۆبونەوەیەکی جەماوەری لۆبی تورکی و دیپۆرتی ئەڵمانیای کردەوە، حکومەتی تورکیاش باڵیۆزخانە و کونسوڵی هۆڵەندای لە وڵاتەکەی داخست و ڕایگەیاند باڵیۆزى هۆڵەندا پێویست ناکات لە دواى پشووەکەى بگەڕێتەوە بۆ ئەنقەرە.}

 ^{دوای ئەوە ژمارەیەک هاوڵاتی تورکیا لە بەردەم باڵیۆزخانەی هۆڵەندا لە ئەستەنبوڵ گردبونەوە و ئاڵای ئەو وڵاتەیان هێنایە خوارەوە و بۆ ماوەیەک ئاڵای تورکیایان لە شوێنەکەى بەرزکردەوە.}

^{لە کاردانەوەیەکیشدا وەزارەتی دەرەوەی هۆڵەندا ڕایگەیاند، پاراستنی گیانی دیپلۆماتکارەکانیان لە ئەستۆی حکومەتی تورکیادایە و  لەو بارەیە وە سکاڵایان گەیاندووەتە بەرپرسانی تورکیا.}

^{جیاواز لەو ڕێ و شوێنە دیبلۆماسییە دژ بەیەکانە، بەرپرسانی تورکیا و هۆڵەندا لێدوانی دژی بەیەکیشیاندا.}

^{ڕەجەب تەیب ئەردۆغان سەرۆک کۆماری تورکیا ڕایگەیاند، تەنانەت ئەگەر هۆڵەندا بە فەرمى داواى لێبوردنیش لە تورکیا بکات دەبێت باجی هەڵسوکەوتەکانی بدات، وتیشى فێریان دەکەن دیبلۆماسییەتی نێودەوڵەتی چییە.}

^{ئەردۆغان وتیشى، ئەو پێی وابوو نازییەت لە ئەوروپا کۆتایی هاتووە بەڵام لە ڕاستیدا ئێستا خەبەری بووەتەوە. هاوکات ئەردۆغان داواى لە ڕێکخراوە نێودەوڵەتییەکان کرد لەسەر ئەو هەڵسوکەوتانە سزا بەسەر هۆڵەندادا بسەپێنن.}

^{بینالی یڵدرم سەرۆک وەزیرانی تورکیاش ڕایگەیاند، ئەو هەڵسوکەوتانەی هۆڵەندا قبوڵکراو نییەو بەتوندترین شێوە وەڵامیان دەدەنەوە.}

^{هاوکات مەولود چاوش ئۆغلۆ وەزیری دەرەوەی تورکیا لەبەردەم کۆبونەوەیەکی جەماوەریی هاوڵاتیانی ولاتەکەی لەشاری میسی فەڕەنسا رایگەیاند، هۆڵەندا لە جیاتی ئەوەی پایتەختی دیموکراتی بێت، بووەتە پایتەختی فاشییەت.}

^{چاوش ئۆغلۆ ئاماژەی بەوەشکرد، وڵاتەکەی بەردەوام دەبێت لە ڕێ و شوێنەکانی دژی هۆڵندا تا ئەو وڵاتە پۆزش دەهێنێتەوە، وتیشى تەنانەت پۆزش هێنانەوەش بەس نییە.}

 ^{لەبەرامبەردا مارک ڕۆتە سەرۆک وەزیرانی هۆڵەندا کە وڵاتەکەى لەگەڵ تورکیادا پێکەوە ئەندامى ڕێکخراوى ناتۆن، تێکچوونی پەیوەندییەکانی وڵاتەکەی لەگەڵ تورکیا بە قوڵترین کێشە ناوبرد کە ڕوبەڕوی وڵاتەکەی بوبێتەوە.}

^{ڕۆتە ئاماژەی بەوەکرد، ئەوان دەیانەوێت لەو کێشەیەدا لایەنە ژیرەکە ببن و چیان بۆ بکرێت بۆ ئاسایکردنەوەى دۆخەکە دەیکەن بەڵام هۆڵەندا ڕێگەنادات بێڕێزی پێبکرێت.}

^{هاوکات لەسەر گرژییەکانی نێوان تورکیا و هۆڵەندا، سەرۆک وەزیرانى دانیمارک پێشنیازی کردووە، سەرۆک وەزیرانی تورکیا گەشتەکەی بۆ وڵاتەکەی دوابخات.}

 ^{فەڕەنساش داوای هێوربونەوەی پەیوەندییەکانی نێوان تورکیا و ئەندامانى یەكێتیی ئەوروپاى کرد.}

^{وەزارەتی دەرەوەی فەرەنسا لە ڕاگەیاندراوێکدا ئاماژەی بەوەکردووە، لە حاڵەتی نەبونی هەڕەشەی ڕووندا، پێویست ناکات ڕێگری لە کۆبونەوەی جەماری بکرێت.}

^{وەزارەتی دەرەوەی فەرەنسا داواشی لە تورکیا کردووە واز لە هەڕەشە و پێشلکارییەکان بهێنێت.}

^13/3/2017

<sup>بێکاری کێشەی گەورەی رۆژهەڵاتی کوردستانە، چونکە رەخساندنی ژمارەی هەلەکانی کار و خوازیارانی کار ناهاوسەنگە و حکومەتی حەسەن رۆحانیش توانای چارەسەرکردنی ئەو دۆخەی نەبوو، بەڵام بەگوتەی بەرپرسانی باڵای ئێران، ئەم رەوشە گۆڕانکاری بەسەردا دێت.

عەلی رەبیعی، وەزیری کاری ئێران دەڵێ "ئێستا خەڵکێکی زیاتر دێتە بازاڕی کار. لەساڵی 1395ـی هەتاوی (2017ـی زایینی) یەک ملیۆن و 250 هەزار کەس هاتوونەتە بازاڕی کارەوە. بۆیە 700 هەزار دەرفەتی کاری ئێمە لەئاست رێژەی بێکاریدا بەرچاو نەبووە. ئێمە بۆ ساڵی داهاتوو دەمانەوێ یەک ملیۆن دەرفەتی کارکردن بڕەخسێنین".

وەزیری کاری ئێران ئەم قسانەی لە سەردانێکدا بۆ پارێزگای ورمێ کرد و، گوتیشی "هەلەکانی کار بەسەر پارێزگاکاندا دابەش دەکەین، ئامانجمان ئەوەیە لەساڵی داهاتوودا رێژەی بێکاری لە پارێزگای ورمێ کەم ببێتەوە. حکومەت بۆ یەکەمجار هەزار ملیار تمەنی بۆ رەخسانی دەرفەتی کار لە ساڵی داهاتوودا تەرخان کردووە، هەروەها سندووقی پەرەپێدانی نیشتمانیش یەک ملیار و 500 هەزار دۆلاری بۆ رەخساندنی دەرفەرتی کار تەرخان کردووە. ئامانجی سەرەکی ئێمەش پارێزگا سنوورییەکانە. هیوادارین جموجۆڵێک دروست بکەین".

یەکێک لە دەرکەوتەکانی بێکاری، دیاردەی کۆڵبەرییە لەسەر سنوورەکان. کۆڵبەری رەنگە زیاتر لە هەر شوێنێکی دیکە، لە رۆژهەڵاتی کوردستان برەوی هەبێت. وەزیری کاری ئێرانیش لە سەردانێکدا بۆ سنە، گرێبەستی بیمەی خانەنشینی ئەوانی واژۆ کرد.

بەپێی ئەو گرێبەستە، کۆڵبەرەکان لەکاتی خانەنشینی و مردندا بیمە دەکرێن. بەپێی ئاماری فەرمی، لە پارێزگای سنە 15 هەزار کەس کارتی کۆڵبەرییان هەیە. بەڵام ئامارە نافەرمییەکان دەڵێن"60 هەزار کەس لە پارێزگای سنە کۆڵبەرن".

عەلی رەبیعی، وەزیری کاری ئێران لە سنە گوتیشی "پلانمان هەیە لەساڵی داهاتوودا 2%ـی بێکاریی کەم بکەینەوە". بەگوتەی رەبیعی، پلانی رەخساندنی دەرفەتی کار لە پارێزگای سنە ئامادەیە. ئەمەش لەڕێی دروستکردنی ژێرخانەکان و پیشەسازییە گەورەکانەوە ئەنجامدەدرێت.</sup>

^12/3/2017