^{ڕۆژنامەی ڕوسیا ئەمڕۆ ١٩ی ئازاری ٢٠١٧ بڵاویکردەوە، سوپای ڕوسیا ئەرکی چاودێریکردنی گروپە شیعە چەکدارەکانی لە ئەستۆ گرتووە لە ناوخۆی سوریا، لە پێش هەموویانەوە چەکدارانی حزبوڵای لوبنان، کە شان بە شانی سوپای سوریا لە دژی هێزەکانی ئۆپۆزسیۆن دەجەنگن.}

 ^{ڕۆژنامەی ئیزڤیستیای ڕوسیا بڵاویکردەوە، سەنتەرە سەربازییە ڕووسییەکان بە درێژایی هێڵەکانی پێشەوەی شەڕ چاودێری ئاگربەستی ناوخۆی سوریا دەکەن، لە ناویشیاندا چاودێری چالاکی و جموجوڵەکانی چەکدارەکانی حزبوڵای لوبنانیش دەکەن.}

^{ڕۆژنامەکە ئاماژەی بەوەکردووە، بەشداربوانی گفتوگۆکانی ئەستانەی پایتەختی ئۆزبەگستان ، چەندین نەخشەی سەربازییان ئاڵوگۆرکردووە، کە تایبەت بووە بە دیاریکردنی بنکە و شوێنی کۆبوونەوەی گروپە چەکدارە جیاجیاکانی ناوخۆی سوریا.}

^{ئەوە لەکاتێکدایە بنیامین نەتەنیاهۆ سەرۆک وەزیرانی ئیسرائیل ڕۆژی هەینی ڕابردوو ١٧ ئازاری ٢٠١٧ ڕایگەیاند،  فڕۆکە جەنگییەکانی ئیسرائیل بۆمبارانی چەندین چەک و جبەخانەیان کردووە، کە بە وتەی سەرۆک وەزیرانی ئیسرائیل چەکەکان بۆ حزبوڵای لوبنان چووە.}

^20/3/2017

^{رۆژی دووشەممە 20-3-2017، تۆمارکردنی ناوی بەربژێرەکان بۆ بەشداریی لە پێنجەمین خولی هەڵبژاردنەکانی ئەنجوومەنی شار و گوندەکانی ئێران و رۆژهەڵاتی کوردستان  دەستپێدەکات و بڕیارە تاوەکو هەفتەیەک بەردەوام دەبێت.}

^{ئەنجوومەنەکان ئێستا ناویان زیاتر لەگەڵ گەندەڵییەکان تێکەڵاو بووە، بەشداریی ژنان لەواندا زۆر نزمە، ناکۆکی لەنێو ئەندامانی ئەنجوومەندا زۆرجار کۆسپی بەردەم بەرەوپێش چوونی کارەکان بووە. هەروەها لە زۆر شوێن زیاتر لە پێکهاتەیەکی رواڵەتی دەچن و رۆڵیان لە هیچدا نییە. بۆیە لە زۆر شوێن کەس ئامادە نییە خۆی بۆ ئەندامەتی لە ئەنجوومەنەکانی شار و گوندەکاندا کاندید بکات.}

^{لەبەر ئەمەش لە بەشێکی زۆری گوندەکاندا بەرپرسانی شارەکان گوند بە گوند دەگەڕێن و هەوڵ دەدەن خەڵک رازی بکەن تا ناوی خۆیان بۆ بەشداری لە هەڵبژاردنی ئەنجوومەنەکاندا تۆماربکەن.}

^{ئەنجومەنی شار و گوندەکان رۆڵی پەرلەمانە خۆجێیەکان دەگێڕن، گرنگترین کاریان هەڵبژاردنی سەرۆکی شارەوانییە.}

^{ئەم خولەی هەڵبژاردنی ئەنجوومەنی شار و گوندەکان پێنجەمین خولی هەڵبژاردن دەبێت، یەکەم خولی هەڵبژاردنی ئەنجوومەنی شار و گوندەکان ساڵی 1998 بەڕێوەچوو.}

^20/3/2017

^{لە ڕۆژانی ڕابردوودا لە پەرلەمانی بەریتانیا و بە ئامادەبوونی ژمارەیەك ئەندام پەرلەمانی بەریتانیا و ئەندامانی حزبی ئازادی و بەرپرسی فەرمانگەی پەیوەندییەكانی دەرەوەی حکومەتی هەرێمی کوردستان، ڕێوڕەسمێک بۆ رێزلێنان لەو کەسانەی لە بوارە جیاجیاکاندا سەرکەوتوو بوون، ساز کرا.}

^{بۆ ئەمساڵ خاتوو زەینەب عەلی كەمال توانی خەڵاتی سەرکەوتووترین گەنجی بەدەستهێنا كە توانیویانە هەر لە منداڵییەوە خۆیان درووست دەكەن و پێدەگەیەنن لەبری ئەو سەركەوتنەی كە لە بواری بیزنسدا لە ماوەی رابردوودا بەدەستی هێناوە و بەشدارییەكی كارای هەبووە لە كاری خێرخوازیدا.}

^{لەم بارەیەوە زەینەب عەلی كەمال لە لێدوانێكدا رایگەیاندووە: "ساڵانە لەسەر ئاستی پەرلەمانی بەریتانیا ئەو خەڵاتە لە چواردە بوار و تەمەنی جیاجیا پێشكەش دەكرێتک منیش ئەمساڵ خەڵاتی سەرکەوتووترین گەنجم بەدەستهێنا كە توانیویانە لە بواری خۆیاندا خۆیان پێ بگەیەنن و لە كارەكانیاندا سەركەوتوو بن لە هەمانکاتدا وێڕای کارەکانیان سوودیان بۆ كۆمەڵگە دەبێت و لە بواری خێرخوازیشدا بەشدارییەكی كارایان هەیە، ئەم خەڵاتەش وەک هاندانێکە بۆ ئەوەی پەرە بە کار و تواناکانیان بکەن."}

^{زەینەب عەلی هەروەها دەڵێت "من وەكوو كچێكی كورد ئەم خەڵاتە پێشكەش بە گیانی بەرزە فڕی ئەو شەهیدانەی كوردستان دەكەم كە توانیان بە قوربانیدان و گیانبەخشین سنوورەكانی وڵات بپارێزن و رێگایان نەدا دوژمنان نزیكی خاكی كوردستان بكەون، هەروەها پێشكەشی دەكەم بە پێشمەرگە پێشمەرگە قارەمانەكانی كوردستان و خوشك و دایك و هاوسەر و رۆڵەكانیان كە لە سەنگەرەكانی بەرگری دان بەرانبەر بە دوژمنانی مرۆڤایەتی، بەتایبەتی ئەو پێشمەرگە ئافرەتانەی كە شانبەشانی براكانیان لە سەنگەرەكانی سەرفرازی دان."}

^{لە كۆتاییدا خاتوو زەینەب وتی: "بە پێویستی دەزانم سوپاسی هەموو ئەو كەسانە بكەم كە هاوكار و یارمەتیدەرم بوون لە كارەكەمدا بەتایبەتی خانەوادەكەم كە ئەگەر پشتگیری و پاڵپشتی ئەوان نەبوایە من نەمدەتوانی ئەو سەركەوتنە لە كارەكەمدا بەدەست بهێنم."}

^19/3/2017

^{نەورۆز وردە وردە هاتەوە، کاتێک بۆ گەشتوگوزار. بەهۆی کەشوهەوای گونجاو، پشووی زۆر و دەرفەتێک بۆ دەرکردنی ماندوویەتی ساڵێک کە رابرد. ئەو چالاکڤانانەی خەڵکی مەریوان لەم کلیپەدا دەڵێن: بۆ ئەم مەبەستە کوێ باشتر لە مەریوان.}

^{چالاکڤانانی مەریوان ئەمساڵ کەمپەینێکیان بۆ راکێشانی گەشتیار بۆ مەریوان داناوە. بۆ یەکێک لە ناوەندە گەشتیارییەکانی رۆژهەڵاتی کوردستان. کەمپەینێک بەناوی "مەریوان شاری سەیران و بازرگانی".}

^{زرێباری مەریوان ناوازەیە، گەورەترین دەریاچەی ئاوی شیرینی جیهانە. جگەلە زرێبار لە کلیپێکدا زۆر شوێنی گەشتیاری دیکەش بە گەشتیاران پێشنیاز کراوە.}

^{ئەوان قامکیان لەسەر شتێکی جێی سەرنجی دیکەی مەریوان داناوە. بازاڕی هەرزانی مەریوان. بازاڕێک کە کاڵا و کەلوپەلی بیانی هەرزانتری لێ دەست دەکەوێ. ئەمان بە گەشتیاران دەڵێن: بە تیرێک دوو ئامانج بپێکە.}

^{ساڵانی رابردوو بازاڕییەکانی مەریوان زۆر لە بازاڕ رازی نەبوون. دەیانگوت کڕیاریان کەمبووەتەوە. داخستنی سنوورەکان کاڵا و کەلوپەلی لە شارە سنوورییەکاندا لە چاو ساڵانی پێشوو گرانتر کردووە. بۆیە لە ژمارەی گەشتیارەکانیش کەمتر بووەتەوە.}

^{مەریوان لە بواری گەشتیاریدا کێشەی دیکەشی هەیە. یەکیک لەوان رێگاوبانەکانە. ئەمە یەکێک لە بنەما سەرەکییەکان بۆ هەر شوێن و ناوچەیەکی گەشتیارییە.}

^{رۆژهەڵاتی کوردستان شوێنی گەشتیاری زۆر هەیە. هاوکات لەگەڵ سنوورداریەتی تایبەت بە خۆیان. شوێنە گەشتیارییەکانی رۆژهەڵاتی کوردستان کەمتر پەرەیان پێدراوە. گەشتیاری وەک دەرفەتێک بۆ رەخساندنی دەرفەتی کار و پەرەپێدانی رۆژهەڵاتی کوردستان دێتە ئەژمار. ئەمە پێویستیی بە سەرمایەگوزاری و پەرەپێدانی ژێرخانەکان هەیە. لەوانە هۆتێلەکان، رێگای رێکوپێک، رێکخستنی سەیرانگا و شوێنە گەشتیارییەکان.}

^{بەڵام لەگەڵ ئەوەشدا نەورۆزان خەڵکێکی زۆر روو لە شارەکانی رۆژهەڵاتی کوردستان دەکەن. گەرچی زۆر کەس دەڵێن: بەشێکی زۆری شار و ناوچەکانی رۆژهەڵاتی کوردستان لەسەرڕێی هاتووچۆی گەشتیاران هەڵکەوتوون. واتە شوێنی مەبەستی گەشتیار نین. لەگەڵ هەموو ئەوانەشدا ئەم چالاکانە دەیانەوێ یەکێک لە سنووریترین شارەکانی رۆژهەڵاتی کوردستان ناوەندێکی گەورەی گەشتیاری بێت.}

^19/3/2017

^{هەوڵی ئێران بۆ گۆڕینی رێڕەوی ئاوی رووباری سیروان و مەترسی وشکبوونی، ترسی لای دانیشتووانی ناوچەکە دروستکردووە و خەڵکی ئەو ناوچانە داوای چارەسەر دەکەن. به‌ڕێوه‌به‌ری به‌نداوی ده‌ربه‌ندیخانیش دەڵێت، بەهۆی دروستکردنی بەنداو و گۆڕینی رێڕەوی ئاوەکە مەترسی هەیە ملیۆنێک و 500 هەزار دۆنم زەوی بێ ئاو ببن.}

^{به‌پێی ئاماری وه‌زاره‌تی كشتوكاڵ و سه‌رچاوه‌ ئاوییه‌كانی هه‌رێمی كوردستان، 42 چۆم و رووبار سنووری ئێران ده‌بڕن و ده‌گه‌نه‌ باشووری كوردستان، بەڵام بەهۆی زۆری پرۆژەکان لە ئێران، مەترسی وشکبوونی رووباری سیروان دەکرێت.}

^{غه‌ریب پێنجوێنی، ئه‌ندامی په‌رله‌مانی كوردستان دەڵێت "رووبارەکانی كه‌رخه،‌ كارون، ئه‌ڵوه‌ن، زێی بچووك و سیروان لە رۆژهەڵاتی كوردستانەوە سەرچاوە دەگرن. بەتەنیاسیروان 75%ی ئاوی بەنداوی ده‌ربه‌ندیخان دابیندەکات".}

^{له‌ خوار به‌نداوه‌كه‌وه هه‌زار دۆنم زه‌وی كشتوكاڵی پشت به‌ ئاوی سیروان ده‌به‌ستن. جگه‌ له‌ به‌رهه‌مهێنانی كاره‌با، رووباری سیروان سەرچاوەی ئاوی خواردنەوەی دوو قه‌زا و چوار ناحیه‌ی باشووری كوردستان و ته‌واوی پارێزگای دیالەیە.}

^19/3/2017

^{مەسعود بارزانی، سەرۆکی ھەرێمی کوردستان، بە بۆنەی کۆچی دواییکردنی ھاوسەری نەوشیروان مستەفا، ڕێکخەری گشتیی بزووتنەوەی گۆڕان، پەیامی سەرەخۆشی ئاڕاستەی نەوشیروان مستەفا و خانەوادەکەی کرد.}

^{ئەمڕۆ ھەینی 17/3/2017، بارزانی بە بۆنەی کۆچی دواییکردنی شوعلە عەلی سدیق، ھاوسەری نەوشیروان مستەفا، پەیامی سەرەخۆشی ئاڕاستەی نەوشیروان مستەفا و خانەوادە و کەسوکارەکەی کرد، لە پەیامەکەشدا، سەرۆکی ھەرێمی کوردستان دەڵێت: "لە خودای گەورە داواکارم جێگەی خوالێخۆشبوو بەھەشتی بەرین بێت".}

^{ئەمەش دەقی پەیامەکەی مەسعود بارزانی، سەرۆکی ھەرێمی کوردستانە:}

^{بە ناوی خوای بەخشندەی میھرەبان}

^{بۆ بەڕێز نەوشیروان مستەفا}

^{بە داخێکی زۆرەوە ھەواڵی کۆچی دوایی خوالێخۆشبوو خاتوو شوعلە عەلی سەعید ھاوژینی بەڕێزتانمان بیست. بەم بۆنەوە پرسە و سەرەخۆشیی خۆمان ئاراستەی ئێوە و خانەوادە و کەسوکارتان دەکەم. لە خودای گەورە داواکارم جێگەی خوالێخۆشبوو بەھەشتی بەرین بێت.}

^{انا للە وانا الیە راجعون}

^{مسعود بارزانی
١٧/٣/٢٠١٧}

https://youtu.be/CoM5Mk604EA

^{محەمەد عەلی، کوڕە کوردێکی ناوچەی جزیرێی کوردستانی باکوورە، لە ڕێگای پڕۆگرامێکی مۆبایلەوە، دوێتێکی گۆرانی لەگەڵ خانمە گۆرانیبێژێکی بەریتانی ڕێک خستووە، کە گۆرانییەک بە زمانی کوردی و بە شێوەی دوێت لەگەڵ ئانێ ماری، خانمە گۆرانیبێژی بەریتانی، دەڵێتەوە، دوای بڵاوبوونەوەی گرتە ڤیدیۆکەش، لە ڕۆژھەڵاتی ناوەڕاست و چەند وڵاتێکی ئەورووپیدا دەنگی دایەوە و چەندین لایک و کۆمێنتی جیاوازی بەدوای خۆیدا ھێنا.}

^{ئەم کوڕە کوردە، گۆرانییەکە بە زمانی کوردی لەسەر ئاوازی گۆرانیی (ڕۆکەبای) ئەو خانمە گۆرانیبێژە دەڵێتەوە، خانمە گۆرانیبێژەکەش، گۆرانییەکە بە شێوەی ئاسایی خۆی دەڵێتەوە.}

^{ئانێ لە ھەژماری تایبەتی خۆی، لە تۆڕی کۆمەلایەتیی (تویتەر)دا گرتە ڤیدیۆکەی بڵاو کردووەتەوە و نووسیویەتی: "ئەم شتەم خۆش دەوێت".}

^{ئانێ ماری نیکۆڵسۆن، خانمە گۆرانیبێژی بەریتانی، تەمەنی 25 ساڵە و تا ئێستا خاوەنی چەندین ئەلبووم و ڤیدیۆ کلیپی گۆرانییە.}

^18/3/2017

^{سەرۆک کۆماری تورکیا داوای لە تورکەکانی دانیشتووی ئەوروپاکرد لە جێگای سێ منداڵ پێنج منداڵ بخەنەوە، چونکە بە وتەی ئەو ئەوان ئایندەی ئەوروپان.}

^{ڕەجەب تەیب ئەردۆغان، دوێنێ هەینی ١٧ی ئازار ڕایگەیاند "لێرەوە بە هاوڵاتیان و برا و خوشکەکانم دەڵێم منداڵەکانتان بنێرنە باشترین خوێندنگە، خێزانەکانتان لە باشترین شوێندا نیشتەجێبکەن، باشترین ئۆتۆمبیل بکڕن، پێنج منداڵ بخەنەوە نەک سێ دانە".}

^{ئەوە لە کاتێکدایە کە پێشتر ئەردۆغان لە تورکەکانی ئەوروپای خواستبوو کە لانی کەم سێ منداڵیان هەبێت.}

^{سەرۆک کۆماری تورکیا ڕاشیگەیاندووە "ئەگەر ژمارەتان زۆربێت ئەوە باشترین وەڵام دەبێت بۆ بێ ئەدەبی و دوژمنایەتیکردنمان".}

^{رەجەب تەیب ئەردۆغان لە ماوەی هەفتەی ڕابردوودا چەندینجار ڕەخنەی توندی ئاڕاستەی دەسەڵاتدارانی ئەوروپا کردووە.}

^{دەسەڵاتدارانی پارتی داد و گەشە پێدانی تورکیا دەیانویست لە وڵاتانی ئەوروپا کەمپینی بانگەشە بۆ بەلێ بۆ دەستورە نوێیەکەی تورکیا درووستبکەن، بەڵام ڕووبەڕووی سانسۆری وڵاتانی ئەوروپا بوونەوە.}

^{نزیکەی سێ ملیۆن تورک دانیشتووی وڵاتانی ئەوروپان و دەتوانن لە ڕیفراندۆمی مانگی نیسانی ئەمساڵ بەشداری بکەن.}

^18/3/2017

^{بەپێی ڕاگەیەندراوێکی وەزارەتی حەج و عومرەی سعودی، ئەو وڵاتە و ئێران ڕێککەوتن لەسەر چۆنیەتی ناردنی حاجیانی ئێرانی بۆ سعودییە بە مەبەستی بەجێگەیاندنی فەریزەی حەج.}

^{محەمەد بەنتن، وەزیری حەج و عەمرەی سعودی لەگەڵ حەمید محەمەدی، سەرۆکی دامەزراوەی حەج و زیارەت کۆبوونەتەوە و ڕێککەوتن لەسەر هەندێک خاڵ بەبێ ئەوەی جیاوازی لە پێشوازی حاجیانی ئێرانی و وڵاتانی دیکەدا درووست ببێت.}

^{سەرەتای ساڵی ڕابردوو چەند گروپێک لە شاری مەشهەد و تاران پەلاماری چەند دیبلۆماتکارێکی سعودییەیاندا و ئەو وڵاتەش پەیوەندییەکانی لەگەڵ ئێران بڕی.}

^{دوای ئەوە ئێرانیش بە هۆکاری ئەوەی کە گیانی حاجیان دەکەوێتە مەترسییەوە ڕێگای لەو کەسانەگرت کە دەیانویست فەریزەی حەج بەجێبگەیەنن.}

^18/3/2017

^{بەپێی هەواڵێکی ئاژانسی (رۆیتەرز)، رۆژی هەینی 17.3.2017، سوپای ئیسرائیل زەنگی ئاگادار کردنەوەی لە کۆمەڵگە جولەکەنشینەکاندا لە ناوچەی غۆری ئوردن لێداوە.}

^{دوو شاهێدحاڵ بە ئاژانسەکەیان راگەیاندووە، دوای زەنگەکە، دەنگی تەقینەوەیەک لە ناوچەی غۆری ئوردن بیستراوە.}

^{سوپای ئیسرائیل لەبارەی سەرچاوەی مووشەکەکانەوە رایگەیاندووە، لە سووریاوە مووشەکەکان ئاراستەی "ئەو هێزانەمان کراون، کە لە سووریا کار دەکەن".}

^17/3/2017