ئاكۆ محەممەد، بەڕێوەبەری گشتیی تۆڕی میدیایی رووداو، لەكاتی پێشكەشكردنی بەرهەمەكانی سه‌مفۆنی و كۆراڵی پێشمه‌رگه و شنگال كە لە هۆڵی سەعد عەبدوڵڵای شاری هەولێر نمایشكران، گوتارێكی پێشكەشكرد و گوتی " بینەر و بیسەر و خوێنەری كورد لەدوای رووداوەوە مایك و كامێرایەكی چالاكی هەیە و پرسیارەكانی خەڵكی كوردستان دەگەیێنێتە كاریگەرترین ناوەندە بڕیار بەدەستەكانی جیهان و ، دیمەنی رووداوەكانی هەموو جیهانیش بە كوردی پیشانی هەموو كورد دەدات".
رووداو پرسیارەكانی خەڵكی كوردستان دەگەیێنێتە كاریگەرترین نێوەندەكانی بڕیار
له یه‌كه‌مین ساڵیادی شه‌ڕی داعش و كۆمه‌ڵكوژی كوردانی ئێزدی لە ده‌ڤه‌ری شنگال، تۆڕی میدیایی رووداو دوو به‌رهه‌می سه‌مفۆنی و كۆراڵی پێشمه‌رگه و شنگالی هونهرمهندی نێوداری كورد دڵشاد محه‌مه‌د سه‌عید لە شارەكانی سلێمانی، هەولێر و دهۆك نمایشده‌كات، كه ئۆركێسترای نیشتیمانی چیك و ژماره‌یه‌ك هونهرمهندی گۆرانیبێژی كورد تێیدا به‌شدارن.
وێڕای سوپاسكردنی هونەرمەندان و بەشداربووان و بەڕێوەبەرایەتیی هۆتێل دیڤان كە میوانداری هونەرمەندان و بەشێك لە خەرجییەكانی لەئەستۆگرتووە، ئاكۆ محەممەد سوپاسی هونەرمەند دڵشاد سه‌عیدی كرد بۆ ئەم بەرهەمانەو پێشنیازكردنی ئەنجامدانی كارێكی لەمشێوەیە بۆ پێشمەرگە و شنگال، بەڕێوەبەری گشتیی رووداو گوتی " ئەمڕۆ تۆڕی میدیایی رووداو ، وەك بەرهەمی هەمان ئەو روانگە فراوانە دوو بەرهەمی ناوازەی سیمفۆنی پێشكەشی ئێوەی بەڕێز دەكات ، كە ئەوانیش بەرهەمی ( پێشمەرگە) و ( شنگال) ن. ئەو دوو بەرهەمە ئەنجامی دووساڵ كار و ماندووبوونی هونەرمەندی نێوداری كورد دڵشاد سەعیدن . پێشمەرگە و شنگال ئەمڕۆ لە جیهاندا دوو ناوی ناسراون ، بەو دوو بەرهەمە ئەو دوو ناوە دەچنە لای ئەو كەس و ماڵانەی لەجیهاندا بەدوای بەرهەمی ناوازەی هونەریی گەلاندا دەگەڕێن . لە دڵەوە دەستخۆشیت لێدەكەین مامۆستا دڵشاد سەعید ، رووداو شانازی دەكات كە هاوكاری ئەو دوو بەرهەمی كرد".
رووداو شانازی دەكات بە هاوكاریكردنی بەرهەمەكانی (پێشمەرگە و شنگال)
هەروەها سوپاسی ئەدیب چەلكی-شی كرد كە شیعری بۆ دوو بەرهەمەكە (پێشمەرگە و شنگال ) نووسیوە و گوتی " زۆر سوپاسی شاعیری ئەو دوو بەرهەمە بەڕێز ئەدیب چەلكی دەكەم ، كە خۆی پێشمەرگەی شاخ بووەو بۆ پێشمەرگە و شنگالی نووسیووە . هەروەها زۆر سوپاسی ئەو هونەرمەندە بەڕێزانە دەكەم كە لە چوار پارچەی كوردستانەوە بێ بەرامبەر بەشدارییان لەو دوو بەرهەمەدا كردووە. دڵنیام هونەری كوردی و هونەرمەندانی كورد هەمیشە و هەتا هەتایە شانازی بەو دوو بەرهەمەی مامۆستا دڵشاد سەعیدەوە دەكەن".
ئاكۆ محەممەد لە وتارەكەیدا باسی شێوازی كاركردنی رووداوی كرد و گوتی " رووداو بە رووانگەیەكی زۆر فراوانەوە دەستیپێكرد، بۆیە كارەكانمان زۆر فراوانبوون، كاركردنیشمان زۆر گەورەبوو، ئێمە رووداوەكانی هەموو بەشەكانی كوردستانمان كردن بە هەواڵی رۆژانە بۆ بینەر و بیسەر و خوێنەرانمان، ئەوەی لە هەموو پارچەكانی كوردستاندا رێگریمان لێكرابێت بە وێنە بیگەیێنین، بە دەنگ و گەیاندوومانەتە بیسەران و خوێنەرانمان".
بینەر و بیسەر و خوێنەری كورد دوای دامەزراندنی رووداو مایك و كامێرایەكی چالاكی هەیە
بەڕێوەبەری رووداو هەروەها گوتی " ئێمە لەناو هەموو رووداوە گەرمەكانی جیهاندابووین و هەین ، لە كینیاوە بگرە تاوەكو دەگاتە غەزە ، لە تەلئەبیبەوە بگرە تاوەكو واشنتن. بینەر و بیسەر و خوێنەری كورد لەدوای رووداوەوە مایك و كامێرایەكی چالاكی هەیە و پرسیارەكانی خەڵكی كوردستان دەگەیێنێتە كاریگەرترین ناوەندە بڕیار بەدەستەكانی جیهان و ، دیمەنی رووداوەكانی هەموو جیهانیش بە كوردی پیشانی هەموو كورد دەدات".
رووداو ئێستا هاوكار و ئەندامی كاریگەرترین یانەی تەلەڤزیۆنەكانی جیهان، ئینێكسە. لەمڕوەوە ئاكۆ محەممەد گوتی " رووداو سەربڵندە بەوەی كە نەك تەنیا دیمەن و هەواڵی شەڕی بەرگریی پێشمەرگەی گەیاندووە ، بەڵكو ڤیدیۆی و راپۆرتی تەلەڤزیۆنیی لەبارەی چالاكییە كولتوورییەكانی كوردستانیشی گەیاندووەتە سەر شاشەی گەورترین تەلەڤزیۆنەكانی جیهان . ئەو پەیامنێرانەی لە رووداودا كاردەكەن بەرهەمیان لەسەر گەورەترین شاشەكانی جیهاندا بە لۆگۆی رووداوەوە دووبارە دەبێتەوە".
رووداو دیمەنی رووداوەكانی هەموو جیهان پیشانی كورد دەدات
رۆژی شەممە 1ی ئابی 2015 بەرهەمەكانی (پێشمەرگە و شنگال) لە هۆڵی ئینستیوتی کەلەپووری کورد لە شاری سلێمانی و ئەمڕۆ یەكشەممەش لە هۆڵی سەعد عەبدوڵای شاری هەولێر نمایشكران، سبەی دووشەممەش لە هۆڵی كۆنگرەكانی شاری دهۆك بە سپۆنسەری رووداو نمایشدەكرێن.
130 هونەرمەندی کۆرال لەو سیمفۆنیایە بەشدارن کە 13 هونەرمەندی ناسراوی بەشەكانی کوردستانیان تێدایە لەوانە نارین فە‌قێ، عەمار کوفی، هانی، خێرۆ عەباس، جەمشید، شڤان پەروەر، حەسەن شەریف، محەممەد تەها ئاکرەیی، ئەیوب عەلی و ژمارەیەك گۆرانیبێژێکی ناسراوی دیکە.
3/8/2015
