<sup>ئەیاد عەللاوی، جێگری سەرۆككۆماری عێراق رۆژی دووشەممە 10ی ئاب رایگەیاند كە ئەو خۆی دەیەوێت دەستبەرداری پۆستەكەی بێت، نەوەكو كەسێكی دیكە جێگاكەی پێچۆڵبكات و لەهەمان کاتدا داوای هەڵبژاردنی پێشوەختی کرد.

 عەللاوی لە كۆنگرەیەكی رۆژنامەڤانیدا كە لەگەڵ بەرپرسانی كوتلەكەی بەستبووی گوتی :" ئێمە لەگەڵ سەرۆكوەزیرانین و ئامادەین دەستبەرداری هەموو پۆستێكبین، تەنانەت پۆستەکانمان لە پەرلەمانیشدا لەپێناو بەدیهاتنی ویستی گەلانی عێراق".
 
 حەیدەر عەبادی، سەرۆکوەزیرانی عێراق رۆژی یەكشەممە 9ی ئاب بڕیاریدا پۆستەكانی جێگری سەرۆككۆمار نەهیڵێت و لەو بارەشەوە عەللاوی رایگەیاند " من خۆم دەمەوێت لەم پۆستەدا نەمێنم كەس پێی نەگوتوم ئەو پۆستە جێبهێڵم "، گوتیشی " ئێمە لەپێناو عێراق تێکۆشانمان کردووە، بەبێ پۆستیش هەر ئامادەین لەپێناو عێراقدا تێبكۆشین".

راشیگەیاند " بەهۆی دابەشبوونی تائیفییەوە لە وڵات گەندەڵی بڵاوبووەتەوە" لە هەمان كاتدا گوتی " هەڵبژاردنی پێشوەخت باشترین چارەسەرە بۆ ئێستا".
 
ئەیاد عەللاوی هەروەها داوای كرد " ناوچەی سەوز نەهیڵرێت و لێكۆڵینەوە لەگەڵ گەندەڵكاران بكرێت " ئاماژەی بۆ ئەوەشكرد " كاتێك سەرۆكی وەزیران بووم لە دژی گەندەڵی دەجەنگام و دیوانی چاودێری داراییم پێكهێنا و پشتیوانیم لێی كرد و، ئێمە تاكە لایەن بووین كە بودجەی كۆتاییمان پێشكەشكرد".</sup>

^10/8/2015

<sup>جەمیل بایک، هاوسەرۆکی کۆما جڤاکێن کوردستان (KCK)، لە هەڤپەیڤینێکیدا لەگەڵ تۆڕی هەواڵی بی بی سی، تورکیای بەوە تۆمەتبار کرد کە هەوڵدەدات بە هێرشکردنە سەر گەریلاکانی پەکەکە و هێزی کورد لە سووریا، پارێزگاری لە چەکدارانی دەوڵەتی ئیسلامی داعش بکات. 

بایک دەڵێت:" من باوەڕم وایە رەجەب تەیب ئەردۆغان، سەرۆکی تورکیا پێشتر ویستویەتی داعش لە هێرشەکانیدا سەربکەوێت بۆ ئەوەی رێگە لە دەستکەوتەکانی کورد بگرێت".

هەروەها ئاماژەی بەوە کرد" گەریلاکانی پەکەکە لە سووریا و عیراقیشدا جەنگی دژ بە داعشیان کردووە، بەڵام تورکیا دەیەوێت کاریگەرییەکانی پەکەکە لەناوببات و رێگە نەدات جەنگی دژ بە داعش بکەن، هەموو ئەمانەش بە ئاراستەی پارێزگاریکردنن لە داعش". 

سەبارەت بەوە تورکیا رایگەیاندووە ئەوان ئامانجیان لێدانە لە داعش و دەیانەوێت هەڕەشەکانی داعش بۆ سەر تورکیا نەمێنن و لە سنووری تورکیا دووربخرێنەوە، بایک گوتی" راستە تورکەکان دەڵێن ئەوان جەنگی دژ بە داعش دەکەن، بەڵام لە راستیدا ئەوان تەنیا شەڕی دژی پەکەکە دەکەن".

بایک دەڵێت:" ئەردۆغان لە پێش هەڵبژاردندا دەیویست سیستەمی سیاسی تورکیا بگۆڕێت، بەڵام بەهۆی ئەوەی هێندە دەنگی نەهێنا توانای ئەوکارەی هەبێت و لە بەرامبەردا پارتی دیموکراتی گەلان هەدەپە سەرکەوتنێکی تۆمار کرد، بۆیە ئەردۆغان دەستی بەم شەڕەکرد لە دژی گەریلاکانی پەکەکە و هێرشکردنە سەر سیاسەتوانانی هەدەپە لە تورکیا".

پێشیوایە:" ئەردۆغان دەیەوێت گوشارێکی دیکە بۆسەر کورد لە رۆژئاوای کوردستان دروست بکات، لەکاتێکدا ئەوان دژ بە داعش شەڕ دەکەن. بۆیە ئامانجی ئەردۆغان  وەستاندنی پیشڕەوییەکانی کوردە لە رۆژئاوا لەبەرامبەر داعشدا. 

هاوسەرۆکی کۆما جڤاکێن کوردستان بەئاماژەدان بەوەی، بەهیچ جۆرێک شەڕ ناتوانێت چارەسەری کێشەی کورد بکات لە باکووری کوردستان، رایگەیاند:" باشترین رێگە چارە دەسپێکردنەوەی گفتوگۆکانی سەر مێزی دانوستانە، پەکەکەش ئامادەیە جەنگ بووەستێنێت ئەگەر تورکیا واز لە هێرشەکانی بهێنێت".

گوتیشی:" کۆمەڵگای نێودەوڵەتی دەبێت ئەوە بە تورکیا بڵێت کە جەنگ ناتوانێت ئەو کێشەیە چارەسەر بکات، چونکە شەڕی چەندین ساڵەی رابردوو هیچ دەرەنجامێکی ئەوتۆی نەبووە".

سەبارەت بە تەقاندنەوەی بۆری نەوتی هەرێمی کوردستان، بایک رایگەیاند:" چەکدارە نێوخۆییەکان سەربەخۆ ئەو کارەیان کردووە، ئێمەش لە راگەیێندراوێکدا ئەوەمان دووپاتکردەوە کە بەهیچ جۆرێک دژ بە بەرژەوندییەکانی حکومەتی هەرێمی کوردستان نین لە باشووری کوردستان".


فڕۆکە جەنگییەکانی تورکیا لە شەوی هەینی 25-7-2015 بۆ یەکەمجار لەدوای پرۆسەی ئاشتی هێرشیانکردە سەر بنکە و بارەگاکانی پارتی کرێکارانی کوردستان لە چەند ناوچەیەکی باشووری کوردستان کە کاردانەوەی ناوخۆیی و دەرەکی زۆری لێکەوتەوەو تاوەکو ئیستایش بۆردوومانەکان بەشێوەی ناوە ناوە بەردەوامە.</sup>

^10/8/2015

<sup>سەرۆکی ئەرکانی گشتیی هێزە چەکدارەکانی ئێران داوا لە گەلی عێراق دەکات هۆشیاربن لە هەندێک گرووپی ناموسڵمان کە داوای خۆپیشاندانەکان دەکەن، جەختیشدەکاتەوە حکومەتی عێراق زۆر بەباشی ئەرکەکانی خۆی بەڕێوەدەبات.

رۆژی یەکشەممە 9-ی ئابی 2015 ، ئاژانسی هەواڵی فارس لە زاری حەسەن فەیرۆز ئابادی، سەرۆکی ئەرکانی گشتیی هێزە چەکدارەکانی ئێران بڵاویکردەوە، پێویستە  لەسەر گەلی عێراق، بە سوننە و شیعەوە هۆشیاربن، لەهەندێک کەموکوڕی دروستکرا و بانگەوازی خۆپێشاندان، لە لایەن هەندیک لایەنی تایبەت و ناموسڵمان، هەروەها بە هەندێک کەس بە تەقاندنەوەی هێڵی گواستنەوەی کارەبای ئێران بۆ عێراق و چەند کردەیەکی ئاژاوەگێری مەبەستیانە بڵێن حکومەتی عێراق وەکو پێویست لێهاتووی نییە.

ئابادی گوتیشی" حکومەتی عێراق بەشێوەیەکی زۆر باش کارەکانی بەرامبەر بە دوژمنانی گەلی عێراق بەڕێوەدەبات، ئەمەش لە ئەنجامی پاراستنی یەکڕیزی خاکی عێراق و سەربەخۆی خۆی"، سەرۆکی ئەرکانی گشتیی هێزە چەکدارەکانی ئێران، جەختیکردەوە، رێکخراوی داعش و هاوپەیمانەکانی بەرەو لەناوچوون دەچن.

ئاماژەی بەوەشدا، پێویستە لەسەر گەلی عێراق پابەندبن بە پاڵپشتیکردنی حکومەتی عێراق لە رێگەی پێشکەوتن و لەناوبردنی دوژمنان.

رۆژی یەكشەممە 9/8/2015 حەیدەر عەبادی سەرۆكوەزیرانی عێراق لە چوارچێوەی چاكسازی سیاسی كۆمەڵێك بڕیاری گرنگی دەركرد، لەوانەش هەڵوەشاندنەوەی پۆستەكانی جێگرانی سەرۆككۆمارو سەرۆكوەزیران، كەمكردنەوەی ژمارەی پاسەوانانی بەرپرسان و دەرماڵەی تایبەتی هەرسێ سەرۆكایەتییەكەو دەستە و دەزگاكانی دەوڵەت.</sup>

^10/8/2015

<sup>سەلاحەددین دەمیرتاش ، هاوسەرۆکی پارتی دیموکراتی گەلان هەدەپە، بەشداریی پرسەی سەربازێکی تورکیا دەکات کە لە هێرشێکی چەکداری پەکەکەدا گیانی لەدەستدابوو. 

سەربازەکە ناوی عبدولخالق ئارازە و سێ رۆژ لەمەوبەر لە میانەی هێرشی پەکەکە بۆ سەر قەرەقۆڵێک لە شارۆچکەی سلۆپی سەر بە پاریزگای شرناخ ، کوژرا بوو. 

دەمیرتاش لە میانەی گووتەیەکیدا رایگەیاند کە:" بۆ ئەوان خوێنی تورک و کورد ، سەرباز و گەریلا جیاوازی نیە و گووتیشی کە هەموو خەڵکی تورکیا ئاشتییان دەوێت بەڵام هەندێک لەپێناوی مانەوە لە دەسەڵاتدا شەڕ هەڵدەبژێرن".

دوای زیاتر لە دوو ساڵ ئاگربەست، ماوەی سێ هەفتەیە گرژییەکانی نێوان سوپای تورکیا و پەکەکە دەستیپێکردوەتەوە و بەو هۆیەوە دەیان سەربازی تورک و گەریلای پەکەکە گیانیان لەدەستداوە.</sup>

^9/8/2015

<sup>96 سزادراوی هاووڵاتی ئێرانی كە لە چاكسازییەكانی هەرێمی كوردستان زیندانین، رەوانەی وڵاتەكەی خۆیان دەكرێنەوە، تا لەوێ‌ ماوەی سزاكانیان تەواو بكەن.

بەپێی راگەیێندراوێكی وەزارەتی كار و كاروباری كۆمەڵایەتی هەرێمی كوردستان سبەی یەكشەممە 9ی ئاب، لە سنووری حاجی ئۆمەرانەوە 96 سزادراوی وڵاتی ئێران كە لە چاكسازییەكانی هەرێمی كوردستان زیندانی بوون، لەمەراسیمێكدا رەوانەی وڵاتی ئێران دەكرێنەوە، ئەمەش دوای رێکكەوتنی نێوان عێراق ‌و ئێران دێت بۆ ئاڵوگۆڕی سزادراوەكانیان.

ئەحمەد نەجمەدین بەڕێوەبەری گشتی چاكسازییەكانی هەرێمی كوردستان لە لێدوانێكدا بۆ (تۆڕی میدیایی رووداو) ئاماژەی بەوەدا كە:" تاوەکو ئێستا روون نییە كە سبەی 9ی ئاب سزادراوانی خەڵکی هەرێمی كوردستان کە لە ئێران زیندانیکراون دەگەڕێنەوە هەرێمی كوردستان یان نا".

عێراق و ئێران رێککەوتوون لە سەر ئاڵوگۆڕی ئەو بە رەچەڵەک ئێرانیانەی کە لە عێراق زیندانین و بە پێچەوانەشەوە. 

ئەو رێککەوتنە لەژێر رۆشنایی بەندی یەکەم لە ماددەی 61 و بەندی سێیەم لە ماددەی 73-ی دەستووری عێراق واژۆ کراوەو هەرێمی کوردستانیش دەگرێتەوە، بەڵام ئەوانەی بە تۆمەتی تیرۆر دەستگیرکراون بەدەرن لەو رێککەوتنە. 

بەهۆی نەبوونی ژمارەیەکی درووست لە زیندانییانی عێراق لە وڵاتی ئێران، نوێنەرایەتی حکومەتی هەرێمی کوردستان لە ئێران داوا لە سەرجەم هاونیشتمانیان دەکات ئەوانەی کەسوکاریان زیندانییە و دیارنین دەتوانن سەردانی نوێنەرایەتی حکومەت بکەن بۆ ئەوەی بەدواداچوون بکەن. 

بەپێی ئامارەکانی بەڕێوەبەرایەتی گشتی چاکسازی کۆمەڵایەتی لە هەرێمی کوردستان، 173 زیندانی ئێرانی هەن ، کە 67 لەو زیندانییانە لە هەولێر و 3 لە دهۆک و 103یان لە سلێمانین ، کە بەشی هەرە زۆری ئەم زیندانییانە بە تۆمەتی بازرگانیکردن بە مادەی هۆشبەر دەستگیرکراون</sup>

^9/8/2015

<sup>بە دەستپێشخەری فاتێح بادپەروا و هاوکاریی کۆمەڵێک لە رێکخراوە مەدەنیەکانی ئەو شارە لە یەکێک لە ژوورەکانی سینەما کوردستانی شاری مەریوان، کافە کتێبێک دامەزراوە. 

هاونیشتمانیانی ئەمشارە پێکهاتوو لە چین و توێژەکان بە تایبەت هۆگرانی کتێب لێرەدا لەگەڵ خواردنی کافەیەک، کتێب دەخوێننەوە.

کافە کتێبی سینەما کوردستان، ماوەی سێ مانگە دامەزراوە و بوەتە ناوەندێک بۆ نووسەران شاعیران و هونەرمەندان.

لە هەفتەدا شەوانی پێنج شەم چەندین چالاکی کەلتووری و ئەدەبی تێیدا بەڕێوە دەچێت. بە گوتەی بەڕێوەبەرانی ئەم کافە کتێبە، گەنجانی ئەمشارە پێشوازی گەرمیان لە هەنگاوی ئەوان کردووە.

ژووری تایبەت بە کافە کتێبی سینەما کوردستان، بە وێنەی شاعیران و نووسەران و بەرهەمی هۆنەرمەندان رازێندراوەتەوە و شەوانی پێنجشەممە دوو شاعیری کورد بەرهەمە شیعریەکانیان بۆ بەشداربوانی کۆڕەکە دەهۆننەوە.

یەکێ لە شاعیرانی لاوی مەریوانی پێیوایە دانیشتن و کۆڕی لەم چەشنە کاریگەری فرە رەهەندی لە سەر ئەقڵیەتی شارستانیی بۆ هاونیشتمانیانی شاری مەریوان دەبێت.

ئەگەرچی ژووری کۆبوونەوەی شاعیران، نووسەران و هۆگرانی زمان و ئەدەبی کوردی، بچووکترە لە ناوەڕۆکی بەرنامە و پرۆگرامەکانی ئەم کافە کتێبە، بەڵام دەرفەتێكی کەم وێنەیە بۆ تێگەییشتن لە زمان و بەرهەمی شاعیران و رەوتی شارستانیەت لە کەشی ژیانی هاونیشتمانیان لە شاری مەریواندا.</sup>

^9/8/2015

<sup>سەرلەبەیانی رۆژی شەممە کاژێر12:20 خولەک بە کاتی باشووری کوردستان رەزا کەعبی، جێگری سکرتێری کۆمەڵەی زەحمەتکێشانی کوردستان لە بنکەی (بانەگەورە) کە کەوتووەتە نێوان گوندی زەڕگوێز و قەرەداخ لە پارێزگای سلێمانی  لە هەوڵێکی کوشتن رزگاری بوو.

رەزا کەعبی، جێگری سکرتێری کۆمەڵەی زەحمەتکێشانی کوردستان بە( تۆڕی میدیایی رووداو)ی راگەیاند:" لە لایەن پێشمەرگەیەکەوە بەناوی فەرید ئەحمەدی هەوڵی تیرۆرکردنم درا، بەڵام خۆشبەختانە هەوڵەکەی سەری نەگرت".

کەعبی گوتیشی: " فەرید دەمانچەیەکی دەرهێناو ویستی تەقەم لێبکات، بەڵام بە هۆی ئەوە لێی نیزیک بووم، دەستیم گرت لەو کاتەشدا3 فیشەک لە دەمانچەکە تەقین، بەڵام هیچکام لە فیشەکەکانم بەرنەکەوت و دوای پێکدادان و بەگژیەکداچوون، ئەحمەدی رایکردو بنکەی بانەگەورەی بەجێهێشت".

کەریم کەریمی، ئەندامی کۆمیتەی ناوەندی کۆمەڵەی زەحمەتکێشانی کوردستان لە بارەی ناسنامەی تۆمەتبارەکە بە(تۆڕی میدیایی رووداو)ی راگەیاند:" فەرید ئەحمەدی پێشمەرگەیەکی 6 مانگە بووە و هیچ کام لە ئۆرگانەکانی کۆمەڵە ئەو دەمانچەیەیان پێ نەداوە".

کەریمی گوتیشی:" ئەو کەسە لە لایەن حکومەتی ئێرانەوە بە مەبەستی تێرۆرکردنی رەزا کەعبی نێردراوە، بەڵام لە ئەنجامی کارەکەی سەرکەوتوو نەبووە و رایکردووە،ئاسایشی حکومەتی هەرێمیشمان لەو رووداوە ئاگادار کردووەتەوە، بەڵام تا ئێستا ئەو کەسە لە هیچ شوێنێک نەدۆزراوەتەوە".</sup>

^9/8/2015

<sup>لیژنەی  یاسایی پەرلەمانی کوردستان جارێکی دیکە نەیتوانی واژۆ لەسەر راپۆرتەکەیان بکەن، کە لەسەر پرۆژە یاساکانی هەمواری یاسای سەرۆکایەتی ئامادەیان کردووە، چونکە ئەندامەکەی یەکگرتوی ئیسلامی لە لیژنەکە، رێگری کرد لە تەواوبوونی رێژەی یاسایی و واژۆی لەسەر راپۆرتەکە نەکرد، بە یەکێتی و گۆڕانی گوتووە، تا یەکشەمە دەرفەت دەدەینەوە بە لایەنە سیاسییەکان.

لە ٢٩ ی مانگی رابردووەوە کە لیژنەی یاسایی راپۆرتیان نوسیووە. یەکێتی و گۆڕان دەیانەوێ ریژەی یاسایی بۆ واژۆکردنی کۆبکەنەوە، تەنانەت سەرۆکی پەرلەمانیش چەند جارێک هەوڵی بۆ ئەوە داوە، بەڵام هەوڵەکانیان بێ سوود بووە، چونکە ئەندامەکەی یەکگرتوویان بۆ واژۆپێکردنی رازی نەکراوە، ئەندامێکی فراکسیۆنی گۆران لە لیژنەی یاسایی دەڵی، کە ئەگەر بەدەست ئەوان بوایە، یەک خولەکیش دوایان نەدەخست.

بەپێی زانیاریەکانی رووداو، پارتی لەلایەک و یەکێتی و گۆڕان لە لایەکی دیکەوە، بیر لەو دانیشتنە نائاساییە دەکەنەوە کە رەنگە بۆ هەمواری یاسای سەرۆکایەتی هەرێمی کوردستان ئەنجام بدرێ، هەردوولا دەیانەوێ زۆرینەی پەرلەمان بە قازانجی خۆیان تەواوبکەن و هەوڵەکانیشیان لە ئێستاوە دەستی پێکردووە.</sup>

^8/8/2015

<sup>دوای بڵاوبوونەوەی هەواڵی مردنی مەلاعومەر و ناشتنی تەرمەکەی لە خاکی پاکستان، وەزیری بەرگری ئەو وڵاتە هەموو ئەو دەنگۆیانەی رەتکردەوە، کە باس لە ناشتنی تەرمی نێوبراو لە خاکی پاکستان دەکەن.

کەناڵی جیۆی هەواڵی پاکستانی ، رۆژی هەینی 7 ی ئابی 2015 لە زاری خواجە ئاسف، وەزیری بەرگری پاکستان رایگەیاند" مەلا عومەر، رێبەری پێشووی بزووتنەوەی تاڵیبان نە لەخاکی پاکستان مردووە، نە تەرمەکەی لە خاکی پاکستانیش نێژراوە، کاتی مردنی مەلاعومەر تاوەکو ئێستاش جێگەی قسە لەسەرکردنە، هەروەها ئێمە نامانەوێت ببین بەبەشێک لەو لایەنە".

ئاسف گوتیشی" ئەو مڵملانێیەی نێوان دەسەڵاتدارانی تاڵیبان کێشەیەکی نێوخۆی ئەو بزووتنەوەیەو پەیوەندی بە پاکستانەوە نییە".

وەزیری بەرگری پاکستان جەختیشیکردەوە" پێشڤەچوونی پەیوەندییەکانی نێوان حکومەتی ئەفغانستان و تاڵیبان، سەرکەوتنێکی گەورەیە بۆ حکومەتی پاکستان".

ئاسف، ئاماژەی بەوەشدا" پاکستان لە کۆششەکانی بۆ لێکنزیککردنەوەی تاڵیبان و حکومەتی ئەفغانستان بەردەوامدەبێت، چونکە پاکستان خوازیاری ئاشتییە لە ناوچەکەدا".

دوای راگەیاندنی مردنی مەلاعومەر، دەنگۆی ئەوە بڵاوبووە، کە نێوبراو لە پاکستان مردووە و  تەرمەکەشی لە خاکی ئەو وڵاتە نێژراوە.

دوای دەستنیشانکردنی مەلا مەنسووریش وەکو رێبەری نوێی بزووتنەوەکە، ناکۆکییەکی گەورە لە نێوان باڵەکانی بزووتنەوەی تاڵیبان سەریهەڵداوە.</sup>

^8/8/2015

<sup>سەرچاوەکان لە دەزگای هەواڵگری ئەمریکا(CIA) ئاشکرایان کرد، قاسم سولەیمانی، فەرماندەی سوپای قودسی ئێران سەردانی رووسیای کردووە، لە کاتێکدا ناوی لە ناو لیستی ئەو کەسانە دایە کە مافی سەفەرکردن بۆ وڵاتانی دەرەوەیان نییە.

بە پێی بڕیاری ئەنجوومەنی ئاسایش، فەرماندەکانی سوپای قودس مافی ئەوەیان نییە سەفەری نێودەوڵەتی بکەن، هەموو داراییەکانیشیان لە بانکە نێودەوڵەتییەکان سڕ دەکرێت. 

بە گوێرەی کەناڵی فۆکس نیوزی ئەمریکی، قاسم سولەیمانی رۆژی 24ی تەمموز بە گەشتێکی 3 رۆژی گەیشتووەتە مۆسکۆ و لەوێ لەگەڵ ڤلادیمیر پوتین، سەرۆکی رووسیا و سێرگەی شویگۆ، وەزیری بەرگری ئەم وڵاتە کۆبووەتەوە. 

گوتەبێژی کریملەن هەواڵی سەردانی سولەیمانی رەتکردەوە، بەڵام بەرپرسەکەی دەزگای هەواڵگری ئەمریکا راستی و دروستی هەواڵەکە پشتڕاست دەکاتەوە، بەڵام ئاماژە بەوە دەدات دیار نییە لە کۆبوونەوەکاندا باسی چی کراوە.

سوپای قودس لقی چالاکییەکانی دەرەوەی سوپای پاسدارانی ئێرانە، ئەم سوپایە لە ساڵی 2007ەوە لە لایەن کۆشکی سپی خراوەتە ناو لیستی تیرۆر. یەکێتی ئەوروپا لە ساڵی 2011 هەمان هەڵوێستی وەرگرت. 

وڵاتانی رۆژئاوا و ئیسرائیل سوپای قودس بە پشتگیری کردنی رێکخراوە توندڕەوە ئیسلامییەکانی ناوچەی رۆژهەڵاتی ناوەڕاست تۆمەتبار دەکەن. بەرپرسانی کۆشکی سپی جەخت لەسەر ئەوە دەکەنەوە، سەرەڕای رێککەوتنە ئەتۆمییەکەی 14ی تەمموز لە نێوان ئێران و گرووپی وڵاتانی 5+1 سزاکانی سەر سوپای قودس و فەرماندەکانی ئەم سوپایە گۆڕانیان بەسەردا نەهاتووە.</sup>

^8/8/2015