گوتەبێژی سەرۆککۆماری رووسیا رایگەیاند، مۆسکۆ ئومێدەوارە ئیدارەی داهاتووی واشنتن سیاسەتێکی نوێ و ئەرێنی لە بەرامبەر رووسیا پەیڕەو بکات، بەڵام پێشبینی ئەوە ناكەن.
دیمیتری پێسکۆڤ، گوتەبێژی ڤلادیمیر پوتین، سەرۆكی رووسیا رایگەیاند، ئومێد و گەشبینییەکەی بەرپرسانی رووسیا لەکاتێکدایە، دەشزانن هەموو سەرۆکێکی ئەمریکا مەبەستییەتی بەرژەوەندییەکانی وڵاتەکەی لە جیهاندا بپارێزێت.
گوتەبێژەکەی پوتین بەدووریشی زانی دۆناڵد ترەمپ، سەرۆكی هەڵبژێردراوی ئەمریكا ئامادەبێت دەستبەرداری ژمارەیەک لە سیاسەتەکانی وڵاتەکەی بێت، بە تایبەتی ئەو سیاسەتانەی پەیوەندییان بە رۆڵی ناتۆوە هەیە.
پێسکۆڤ گوتیشی "پێشبینی ئەوە ناکەین بتوانین تەواوی کێشەکان چارەسەر بکەین. پێشبینی ناکەین ئەمریکا واز لە سیاسەتی بەرفراوانکردنی سنووری ناتۆ و نزیکبوونەوەی لە سنوورەکانمان بهێنێت. پێشبینی ناکەین لە پڕێکدا گەمارۆکانی سەر رووسیا هەڵبگیرێن و ناشمانەوێت باسی ئەم بابەتە بکەین. چەندینجار سەرۆک پوتین رایگەیاندووە، ئەم پرسە لە ئەجێندای باسکردنماندا نییە".
مۆسكۆ وەڵامی بۆ سزا نوێکانی واشنتن دەبێت
دوای ئەوەی واشنتن چەند سزایەکی نوێی بەسەر مۆسکۆدا سەپاند، گوتەبێژی کۆشکی کریملین رایگەیاند، مۆسکۆ وەڵامی بۆ ئەو هەنگاوەی ئەمریکا دەبێت و رێکاری پێویست دەگرێتەبەر.
هاوكات دیمیتری پیسکۆڤ، گوتەبێژی سەرۆکایەتی رووسیا لە کۆنگرەیەکی رۆژنامەڤانیدا رایگەیاند، لەبەرامبەر ئەو سزا نوێیانەی ئەمریکا لە دژی رووسیا، مۆسکۆ وەڵامی دەبێت.
پیسکۆڤ بەبێ ئەوەی ئاماژە بەوەبکات کە رووسیا چ رێکارێک بەرامبەر بە ئەمریکا دەگرێتەبەر، رایگەیاند، لەبەرامبەر ئەو سزا نوێیانەی ئەمریکا بۆ سەر رووسیا، رێکاری پێویست و ورد دەگرینەبەر.
گوتەکانی گوتەبێژی کۆشکی کرێملن لە کاتێکدایە، کە کە وەزارەتی گەنجینەی ئەمریکا بەهۆی دەستوەردانەکانی رووسیا لە ئۆکراینا لە ساڵی 2014 و لکاندنی هەرێمی کریمیا بە وڵاتەكەی، خۆی سزای نوێی بەسەر چەند کۆمپانیا و کەسایەتییەکی رووسیادا سەپاند.
22/12/2016
