<sup>لە ساڵی ڕابردووی زایینیدا لانیکەم 109 هاووڵاتیی کورد لە گرتووخانەکانی ئێران لەسێدارە دراون و بە شێوەیەکی نێونجی مانگانە سزای سێدارەی 10 هاووڵاتیی کورد بەڕێوە چووە.

بەپشت بەستن بە ئاماری تۆمارکراو لە ناوەندی ئاماری ماڵپەڕی مافی مرۆڤیی )هەنگاو( لە ماوەی ساڵی 2016 ی زایینی 109 هاووڵاتیی کورد لە 20 گرتووخانەی ئێران لەسێدارە دراون.

ئەو کەسانەی تۆمەتیان دراوەتە پاڵ:
بەپێی ئەم ڕاپۆرتە، لە ساڵی ڕابردوودا یەک بەندکراوی سیاسی و 22 بەندکراوی مەزهەبیی کورد لە گرتووخانەکانی ورمێ و ڕەجایی شاری کەرەج لەسێدارە دراون.

زیاتری ڕێژەی ئەو کەسانەی کە لەسێدارە دراون بە هۆی "تاوانەکانی پەیوەندیدار بە ماددە سڕکەرەکان" بووە کە 66 حاڵەت تۆمار کراوە. 14 حاڵەت بە تۆمەتی "قەتڵ" ٣ حاڵەت بە تۆمەتی "دەستدرێژیی سێکسی" و دوو حاڵەتیش بە تۆمەتی محاربە" یان دژایەتی خودا سزای سێدارەیان بەسەردا سەپێندراوە و سزاکەیان جێبەجێ کراوە.

لە هەندێ حاڵەتێکیشدا تۆمەتی وەپاڵدراوی ئەو کەسەی کە لەسێدارە دراوە ڕوون نەبووەتەوە.

لەسێدارە دانی هاووڵاتیانی کورد بەپێی پارێزگاکان:
بە پشتبەستن بەو ئامارانەی کە تۆمار کراون، 64 هاووڵاتی لە پارێزگای ورمێ، 31 کەس لە پارێزگای سنە، 8 کەس لە پارێزگای کرماشان، دوو کەس لە کوردەکانی خۆراسان و 1 کەسیش لە کوردەکانی قەزوێن لەسێدارە دراون.

زیاترین ئاماری لەسێدارەدانی هاووڵاتیانی کورد لە شاری ورمێ تۆمار کراوە کە 41 حاڵەت بووە، شاری سنە بە 24 حاڵەت، سەردەشت بە 7 حاڵەت، سەقز بە 6 حاڵەت و سەڵماس بە 5 حاڵەت دوای ئورمیە زیاترین ڕێژەی لەسێدارەدانی هاووڵاتیانیان تێدا تۆمار کراوە.

لەسێدارەدانی هاووڵاتیانی کورد لە پێش چاوی خەڵک:
بە پشتبەستن بەم ڕاپۆرتە، لە ماوەی ساڵی ڕابردوودا سزای سێدارەی 5 هاووڵاتیی کورد لە شارەکانی، ڕوانسەر، کرماشان، مەشهەد، سونقوڕ و ئیلام لەپێش چاوی خەڵک بەڕێوە چووە و 104 حاڵەتیش لە 20 گرتووخانەی ئێران تۆمار کراوە.

گرتووخانەکانی ورمێ و کەرەج زیاترین بەندکراوی کوردیان تێدا لەسێدارە دراوە:

ئەو ئامارانەی کە لە ماڵپەڕی “هەنگاو” تۆمار کراون دەرخەری ئەوەن کە 43 حاڵەتی لەسێدارەدانی هاووڵاتیانی کورد لە گرتووخانەی ناوەندیی شاری ورمێ بەرێوە چووە، دوای گرتووخانەی ئورمیە گرتووخانەی کەرەج بە 25 حاڵەت و گرتووخانەی سەڵماس بە 7 حاڵەت زیاترین رێژەی لەسێدارەدانی هاووڵاتیانی کوردیان تێدا تۆمار کراوە.

ناسنامە و هەروەها رێکەوتی لەسێدارەدانی 108 هاووڵاتی کورد لە ناوەندی ئاماری (هەنگاو) هەیە و تەنیا ناوی یەک کەس کە لە دوایین ڕۆژەکانی ساڵی 2016 و لەپێش چاوی خەڵکی ئیلام لەسیدارە درا، بۆ "هەنگاو" و سەرچاوەکانی دیکەی هەواڵ ڕوون نەبووەتەوە.</sup>

^11/1/2017

<sup>ئەمڕۆ چوارشەممە لە سەلاحەدین مەسعود بارزانی سەرۆكی هەرێمی كوردستان، پێشوازی لە کێنتارۆ سونۆرا، وەزیری دەوڵەت بۆ کاروباری دەرەوەی ژاپۆن و شاندێکی یاوەری کرد.

لە دیدارەکەی ئەمڕۆ چوارشەممە 2017 -1- 11لە نێوان سەرۆکی هەرێم و وەزیری دەوڵەتی ژاپۆن، هاوکات فۆمیۆ ئاوا، باڵیۆزی ژاپۆن لە عێراق و کاتسۆمی مۆریاسۆ، کونسوڵی ژاپۆن لە هەرێمی کوردستان ئامادە بوون.

لەدیدارەكەدا وەزیری دەوڵەت بۆ کاروباری دەرەوەی ژاپۆن، خۆشحاڵیی خۆی بە دیدارەکە ڕاگەیاند و سوپاسی سەرۆک بارزانی کرد بۆ ڕۆڵ و خەباتیان لە چەسپاندنی ئاشتی و بەرەوڕوو بوونەوەی تیرۆر. هەروەها سوپاسگوزاریی خۆی بۆ پێشمەرگەی کوردستان ڕاگەیاند کە توانیویانە تیرۆریستان تێک بشکێنن.

وەزیری دەوڵەت بۆ کاروباری دەرەوەی ژاپۆن ڕاشیگەیاند "کە وڵاتەکەی دەیەوەێ پەیوەندییەکانی لەگەڵ هەرێمی کوردستان پەرە پێ بدات و بۆ ئەو مەبەستەش ئەمڕۆ کونسووڵخانەی وڵاتەکەی لە هەولێر دەکرێتەوە و کاتسۆمی مۆریاسۆی وەک کونسووڵی وڵاتەکەی لە هەرێمی کوردستان بە سەرۆک بارزانی ناساند.

لە بەشێکی دیکەی دیدارەکەدا وەزیری دەوڵەت بۆ کاروباری دەرەوەی ژاپۆن ئامادەیی وڵاتەکەی بۆ هاوکارییکردنی هەرێمی کوردستان لە هەموو بوارەکاندا ڕاگەیاند، بە تایبەتیش لە پووچەڵکردنەوەی تەقەمەنییەکانی پاشماوەی شەڕ و پەرەپێدانی ئابووری و پیشەسازی و تەندروستی.

دواتریش وەزیری دەوڵەت بۆ کاروباری دەرەوەی ژاپۆن داوای لە سەرۆکی هەرێمی کوردستان کرد سەرنج و تێڕوانینی خۆی سەبارەت بە داهاتووی تیرۆریستان بخاتەڕوو تا بەرچاوڕوونیی زیاتریان هەبێت.

لە بەرانبەردا بارزانی وێڕای بەخێرهێنانی شاندی میوان، دەستخۆشی و پیرۆزبایی کردنەوەی کونسووڵخانەی ژاپۆنی لە هەولێر ئاراستەی وەزیری دەوڵەت بۆ کاروباری دەرەوەی ژاپۆن و شاندی یاوەری کرد و سوپاسی حكوومەت و گەلی ژاپۆنی كرد و كردنەوەی كونسووڵخانەی ژاپۆن لە هەولێر بە هەنگاوێكی باش بۆ فراوانكردنی پەیوەندییەكانی هەردوولا وەسف كرد و ئامادەیی هەرێمی كوردستانی بۆ فراوانتركردنی پەیوەندییەكان لەگەڵ وڵاتی ژاپۆن ڕاگەیاند.

سەبارەت بە ئایندەی تیرۆریستان بارزانی ڕایگەیاند: "پێشمەرگە توانی مەترسیدارترین و دڕندەترین ڕێکخراوی تیرۆریستی و دوژمنی مرۆڤایەتی تێک بشکێنێت کە هەڕەشەیە بۆ سەر هەموو جیهان. ئێستا ئەگەرچی داعش لە داڕووخان و شکستی گەورە دایە، بەڵام ئەوە مانای وا نییە کە تێکشکانی ڕێکخراوی تیرۆریستیی داعش لەڕووی سەربازییەوە دەبێتە کوتاییهاتنی تیرۆر و توندڕۆیی، چونکە ڕەنگە بەناوی جیا و شێوازی جیاواز دەربکەونەوە. بۆیە پێویستە هەماهەنگی و هاوکارییەکی هەمەلایەنە هەبێت بۆ لەناوبردنی تیرۆر و توندڕۆیی، نەک هەر تەنیا لە ڕووی سەربەزی بەڵکوو لە هەموو ئاستەکاندا.

باسکردنی ڕەوشی سیاسی و سەربازیی ناوچەکە بەشێکی دیکەی دیدارەکە بو</sup>

^11/1/2017

^{پەردەیەک کە ریخۆڵەکان بە دیواری سکەوە دەبەستێتەوە، لەلایەن پزیشکانی هۆڵەنداوە سەلمێندرا کە ئەندامێکی سەربەخۆی جەستەیە و تایبەتمەندیی خۆی هەیە. نێوەندە زانستییەکانیش پێیانوایە لێکۆڵینەوەی زیاتر لەو ئەندامە نوێیە سەردەکات بۆ چارەسەرکردنی چەندین حاڵەتی سکئێشە و تەنانەت تێگەیشتنی زیاتر لە شێرپەنجەی کۆلۆن.}

^{سەدان ساڵە ئەم پەردەیە ناسراوە، بەڵام وەک پێیوست لێکۆڵینەوەی لەبارەوە نەکراوە و وەک بەشێک لە ریخۆڵەکان دادەنرا کە تەنیا کاری ئەوەبێ بیانبەستێ بە دیواری سکەوە، بەڵام توێژینەوە نوێیەکە‌ کە لە جۆرناڵی زانستیی لانسێت بڵاوکراوەتەوە، دەڵێ ئەو پەردەیە تەواو سەربەخۆیە و پێکهاتەیەکی تەواو سەربەخۆ و جیاوازی لە ریخۆڵە و ئەندامانی دیکەی جەستە هەیە.}

^{توێژەرانی هۆڵەندی دەڵێن لەگەڵ ئەوەی ئێستا ئاشناترن بە پێکهاتەی ئەو پەردەیە، بەڵام هێشتا بە وردی نازانن کاری چییە. پێشبینیش دەکەن توێژینەوەکانی داهاتوو دەرگای زۆرتر واڵا بکەن لە بەردەم دۆزینەوەی چارەسەری زۆرتری نەخۆشییەکانی هەرس و سکئێشە و رووبەڕووبوونەوەی سکئێشەی کۆلۆن.}

^{پرۆفیسۆر کاڵڤن کوڤی لە زانکۆی (لمیرک)ی ئێرلەنداوە کە سەرپەرشتی توێژینەوە و دۆزینەوە نوێیەکەی کردووە، پێشنیاز دەکات بەشێکی زانستیی سەربەخۆ بونیات بنرێ کە کاری ئەوە بێ بە وردی لە کارەکانی ئەو پەردەیە بکۆڵێتەوە.}

^11/1/2017

^{جارێکی دیکە دۆناڵد ترەمپ جەختی لە سەر ئاساییکردنەوەی پەیوەندییەکانی نێوان واشنتۆن و مۆسکۆ کردەوە و، دەڵێ دەتوانین لەگەڵ رووسیا کێشەکانی جیهان چارەسەربکەین.}

^{دۆناڵد ترەمپ، سەرۆکی هەڵبژێردراوی ئەمریکا لە توویتێکدا نووسیویەتی "هەبوونی پەیوەندییەکی باش لەگەڵ رووسیا، شتێکی باشە، نەوەک خراپ. تەنیا کەسانی گێل پێیان وایە ئەوە کارێکی خراپە".}

^{سەرۆکی هەڵبژێردراوی ئەمریکا دەڵێ، چەندین کێشەی گەورە لە جیهاندا هەن، بۆیە پێویست ناکات کێشەی دیکە زیاتر بکرێن. راشیدەگەیێنێت، پێدەچێت هەردوو وڵات بەیەکەوە کاربکەن بۆ مەبەستی چارەسەرکردنی ژمارەیەکی زۆر لە کێشە گەورەکانی جیهان.}

^{لە ماوەی 20 رۆژی رابردوودا، چەندینجار ڤلادیمێر پوتن، سەرۆککۆماری رووسیا، پێشوازیی لە لێدوانەکانی سەرۆکی هەڵبژێردراوی ئەمریکا بۆ ئاساییکردنەوەی پەیوەندییەکانی نێوان مۆسکۆ و واشنتۆن کردووە.}

^{پوتن، دەڵێ "بەڕێز ترەمپ، لە کاتی بانگەشەی هەڵبژاردنەکاندا رایگەیاند: گرنگە پەیوەندییەکانی نێوان رووسیا و ئەمریکا ئاسایی بکرێنەوە. گوتیشی ناکرێت ئەم پەیوەندیانە گرژتر بکرێن. منیش هاوڕام لەگەڵیدا، بۆیە پێکەوە بیر لەوە دەکەینەوە چۆن بتوانین ئەم پەیوەندییانە ئاسایی بکەینەوە".}

^{توویتەکانی ترەمپ لە کاتێکدان، دەزگا هەواڵگریی ئەمریکا، لە رێی بڵاوکردنەوەی راپۆرتێکەوە، ئاشکرایکردووە، رووسیا هەوڵیداوە زیان بە بانگەشەی هەڵبژاردنەکانی هیلاری کلینتن، کاندیدی پارتی دیموکراتەکان بگەیێنێت و، کاریگەری لەسەر هەڵبژاردنی سەرۆکایەتی مانگی نۆڤەمبەری رابردووی ئەمریکا لە بەرژەوەندی دۆناڵد ترەمپ هەبێت.}

^{هەروەها لە ماوەی چەند مانگی رابردوودا، ئەمریکا دەیان سەربازی هێزە تایبەتییەکانی بۆ پۆڵەندا، لاتیڤیا، لیتوانیا و ئەستۆنیا گواستووەتەوە، ئەوەش وەک پیشاندانی پاڵپشتییەک بۆ سوپای ئەو وڵاتانە لە بەرامبەر سیاسەتەکانی رووسیا.}

^{رۆژی هەینی رابردوو 6-10-2017 دەیان تانک و ئۆتۆمبێلی دیکەی سەربازیی ئەمریکا گەیشتنە باکووری ئەڵمانیا، بۆ ئەوەی لەوێوە بۆ وڵاتانی ئەستۆنیا، پۆڵەندا، لاتیڤیا و لیتوانیا بگوازرێنەوە، بڕیاریشە لە چەند رۆژی داهاتوودا نزیکەی 3500 سەربازی دیکەی ئەمریکی لە ویلایەتی کۆلۆرادۆوە بگەنە ئەو وڵاتانە.}

^{بەرپرسانی سەربازیی ئەمریکا دەڵێن ئامانج لە گواستنەوەی ئەو سەرباز و چەکە پێشکەوتووانە، یارمەتیدان و پاڵپشتیکردنە لە وڵاتانی هاوپەیمانیان لە رۆژهەڵاتی ئەوروپا.}

^{20-1-2017 دۆناڵد ترەمپ، وەکو 45ـەمین سەرۆکی ئەمریکا دەستبەکاردەبێت، بەڵام روون نییە ترەمپ و پوتین کۆتایی بە گرژییەکانی نێوان واشنتۆن و مۆسکۆ، هەروەها رەوشی نیگەرانکەرانەی رۆژهەڵاتی ئەوروپا دەهێنن، یان نا.}

^10/1/2017

<sup>ئەمڕۆ سێشەممە پەرلەمانی توركیا دەنگ بۆ گۆڕینی چەند مادەیەكی دەستووری توركیا دەدات، بەڵام هەدەپە ڕای گەیاندووە ئەوان وەكوو هەدەپە بە هیچ شێوەیەك بەشداریی ئەو دەنگدانە ناكەن، چونكە هەردوو هاوسەرۆكانی هەدەپە لە زیندانن و ڕێگەیان لێ گیراوە دەنگ بدەن.

فیلیز كەرەستەجی ئۆغلوو، ئەندام پەرلەمانی هەدەپە لە كۆنگرەیەكی ڕۆژنامەنووسیدا ڕایگەیاند، "ئەمڕۆ سێشەممە 2017 -1- 10 لەناو پەرلەمانی توركیا دەنگ بۆ چەند مادەیەكی سیستەمی سەرۆكایەتی دەدرێت، كە هیچ پەیوەندییەكی بە ژیانی خەڵكەوە نییە و تەنیا بۆ بەرژەوەندیی یەك كەس نووسراوەتەوە، بۆیە هەدەپە بە هیچ شێوەیەك لەو تاوانەدا نابێتە شەریك."

بە گوێرەی گوتەكانی ئەو وەكوو هەڵوێستێك بەوەی ڕێگەیان نەداوە هاوسەرۆكانی هەدەپە كە ئێستا لە زیندانن دەنگ بدەن، هەروەها چەند ئەندام پەرلەمانێكی دیكەی هەدەپەش كە لە زیندانن مافی دەنگدانیان لێ وەرگیراوەتەوە، بۆیە تەواوی ئەندام پەرلەمانانی هەدەپە بایكۆتی دەنگدان دەكەن."

هاوکات ئەیهان بەلگین گوتەبێژی هەدەپە لە پێگەی خۆی لە تویتەر پشتگیری لەو گوتانەی فیلیز كرد و، ئاماژەی دا ئەوەی ئەو گوتوویەتی بۆچوونی هەموو ئەندام پەرلەمانێكی هەدەپەیە.</sup>

^10/1/2017

<sup>نوێنەرانی پەرلەمانی ئیران دوێنێ دووشەممە پڕۆژە بڕیاری زیادکردنی بوودجەی سەربازیی ئەو وڵاتەیان پەسەند کرد کە بڕیارە ساڵی 1396ی هەتاوی زیاد بکرێت.

بەپێی هەواڵی میدیا فەرمییەکانی ئێران ئەو پڕۆژە بڕیارە لە چوارچێوەی پلانی شەشەمی گەشەدا گونجێنراوە و بڕیارە 5%ی بەوودجەی گشتیی ئێران بۆ کاروباری سەربازی تەرخان بکرێت.

بەرپرسانی سوپای پاسدارانی ئێران بەم بڕیارە خۆشحاڵ بوون، چونکە بەپێی زانیارییەکانی ئێران، پێشتر ساڵانە 2%ی بوودجە بۆ پرسی سەربازی تەرخان دەکرا.

بەڕای کارناسانی سەربازی و شرۆڤەکارانی پرسی ئێران و ناوچە، زیادکردنی بوودجەی سەربازی لەلایەن ئێرانەوە لەوانەیە ببێتە گرژی وئاڵۆزی لە نێوان کۆماری ئیسلامی و ڕۆژئاوا و وڵاتانی ناوچەکە کە تاقیکردنەوەی مووشەکیی ئەم دوایانەی ئێران بە پێشێلکاری بڕیارنامە نێودەولەتییەکان هاتووەتە ئەژمار.

ماڵپەڕی (تەسنیم)ی سەر بە سوپای پاسداران لەم بارەوە نووسیویە لە دانیشتنی دوێنێدا 173 پەرلەمانتاری ئێران دەنگی ئەرێنییان بەو پڕۆژە بڕیارە داوە و لە بەرانبەردا 10 نوێنەر دژی بوون، ئەم پڕۆژە بڕیارە ئەو ئەرکە دەخاتە سەر ئێران کە بۆ بەربڵاوترکردنی توانایی سەربازی و بەرگری و گەرەنتیکردنی بەرژەوەندی و ئاسایشی ئەو وڵاتە، هەموو هەوڵێکی خۆی بخاتە گەڕ.</sup>

^10/1/2017

^{پەرلەمانتارێک: هەر كەسێك رەگەزنامەی بیانی هەبێت سزادەدرێت}

^{ئەندامێکی لیژنەی ئاسایشی نیشتمانی و سیاسەتی دەرەوەی پەرلەمانی ئێران، لەبارەی بوونی رەگەزنامەی بیانی هۆشداری دەدا و دەڵێت، هەبوونی رەگەزنامەی بیانی بۆ هاووڵاتیانی ئێران تاوانە و ئەو کەسانەش کە رەگەزنامەی وڵاتێکی دیکەیان وەرگرتووە، رەگەزنامەی ئێرانییان لێ وەردەگیرێتەوە و لە مافی هاوڵاتیبوون بێبەش دەکرێن.}

^{دەزگای دادی ئێران رایگەیاندووە ئێران مافی هاووڵاتیبوونی ئەو کەسانە هەڵدەوەشێنێتەوە، کە خاوەن رەگەزنامەی وڵاتێکی دیکەش بن.}

^{هاوكات گوتەبێژی ئەنجوومەنی ئاسایشی نیشتمانیی پەرلەمانی ئێران، هەڵگرتنی رەگەزنامەی وڵاتێکی دیکە بۆ ئێرانییەکان بە تاوان وەسف دەکات و دەڵێت "وەرگرتنی مافی هاووڵاتیبوونی وڵاتێکی دیکە، کارێکی قبووڵ نەکراوە لە ناوخۆی وڵاتان و سزای ئەو کەسانەش بێبەشبوونە لە مافی هاووڵاتیبوونی ئێرانی و مافی خاوەنداریی ماڵ و موڵک و هەبوونی پیشەی حکومی."}

^{بەگوتەی حوسێن نەقەوی حوسێنی، بەپێی یاسای شارستانیەت، مافی هاووڵاتیبوون لەو کەسانە دەسەندرێتەوە. حوسێنی داڕشتنی یاسایەکی گشتگیر سەبارەت بە رەگەزنامە و مافی هاووڵاتیبوون بەپێویست دەزانێت و دەڵێت "بۆشایی یاسایی لەمبارەوە بووەتە رێگر لەوەی بەپێی پێویست دژی خاوەن دوو رەگەزنامەکان مامەڵە بکرێت."}

^{لەنێو دامودەزگا ئاسایشییەکانی ئێراندا هەستیارییەکی زۆر هەیە بەرامبەر ئێرانیانی دانیشتووی وڵاتانی دیکە و ئەوانەی هەڵگری دوو رەگەزنامەن.}

^{تووندڕەوەکان زۆرجار سەبارەت بە ئەگەری سیخوڕبوونی ئەو کەسانە هۆشدارییان داوە، تەنانەت نموونەی ئەو ئێرانیانەی خاوەن دوو رەگەزنامەن زۆرە، کاتێک بە سەردان گەڕاونەتەوە بۆ ئێران، بەتۆمەتی سیخوڕیکردن دەستگیر و زیندانیکراون.}

^{ئەمە لەکاتێکدایە ماوەیەک پێش ئێستا تەنانەت وەزیری ئیتڵاعاتی حکومەتی حەسەن رۆحانی کە خۆیشی لە بناژۆخوازەکانە، رەخنەی لەو بۆچوونە گرت و گوتی ناکرێت تۆمەتی سیخوڕیکردن بدرێتە پاڵ هەرکەسێک، کە بەپێی بۆچوونی کارناسانە کاری سیخوڕیی نەکردبێت.}

^{مەحموود عەلەوی گوتی "بەجۆرێک باسی خاوەن دوو رەگەزنامەکان دەکرێت، وەک ئەوەی هەرکەس رەگەزنامەی وڵاتێکی دیکەی هەبێت، گەندەڵ، بێگانە، وڵاتفرۆش و سیخوڕە. "}

^{بەپێی ماددەی 41ی دەستووری ئێران، مافی هاووڵاتیبوونی ئێران، مافی رەوای هەموو ئێرانییەکە و حکومەت ناتوانێت ئەو مافە لە هیچ ئێرانییەک زەوت بکات، مەگەر کاتێک خۆی داوای کردبێت، یان کاتێک مافی هاووڵاتیبوونی وڵاتێکی دیکەی وەگرتبێت.}

^{سەرەڕای ئەوەی کۆماری ئیسلامیی ئێران گەلێک جار رایگەیاندووە دوو رەگەزنامەیی بەفەرمی ناناسێت، بەڵام لە یاساکانی ئێراندا دوو رەگەزنامەیی بە تاوان هەژمار نەکراوە.}

^9/1/2017

<sup>بە گوتەی گوتەبێژی پۆلیسی سۆران، ئێوارەی دوێنێ تەرمی کوڕە گەنجێکی کوردستانی ڕۆژهەڵات لە دەشتی "دێلزیان"ی سەر بە سۆران دۆزراوەتەوە.

لەم بارەوە نەقیب هاوار، گوتەبێژی بەڕێوەبەرایەتیی پۆلسی سۆران ئەمڕۆ دووشەممە 2017 -1- 9 بە ئاژانسی (باسنیوز)ی ڕاگەیاند "دوێنێ ئێوارە لەلایەن هاووڵاتییانەوە ئاگادار کراینەوە لە دەشتی دێلزیان بە بوونی تەرمی هاووڵاتییەک بەناوی "پ.ع.ح" کە بە ئەسڵ خەڵکی کوردستانی ڕۆژهەڵاتە و دانیشتووی گەڕەکی ئازادی و تەمەنی بیست و 25 ساڵە."

گوتەبێژی پۆلیسی سۆران گوتیشی "دوای هێنانی تەرمەکەی بۆ پزیشکی یاسایی سۆران دەرکەوتووە کە هیچ ئاسەوارێکی برین، کوشتن و خنکانی پێوە دیار نییە و دوای ئامادەبوونی دایک و باوکیشی پێیان ڕاگەیاندین کە ڕۆژی شەممە لە ماڵ چووەتە دەرەوە و نەگەڕاوەتەوە."

ئاماژەی بەوەش کرد "بەمەبەستی زانین و هۆکاری سەرەکیی گیان لەدەستدانی ئەو گەنجە ڕەوانەی پزیشکی دادی هەولێر کراوە و لێکۆڵینەوە دەستی پێ کردووە."

هاوکات بەپێی ئەو زانیارییانەی کە بە (باسنیوز) گەیشتوون، ئەو کوڕە گەنجە ناوی "پەیمان مورادی، ئەندامی ڕێکخراوی (یەکیەتیی لاوانی دیموکراتی ڕۆژهەڵاتی کوردستان)ی سەر بە (حدک)ە لە ناوچەی سۆران.</sup>

^9/1/2017

<sup>سەرۆک کۆماری عێراق پەیامێکی سەرەخۆشیی بۆ سەرۆک کۆماری ئیسلامیی ئیران دەنێرێت و تێیدا رایدەگەیەنێت، کە رەفسەنجانی دۆستی وڵاتەکەی بوو.

لە پەیامەکەیدا، فوئاد مەعسوم، سەرۆک کۆماری عێراق وێڕای دەربڕینی ”داخ و پەژارەی زۆر“ بۆ کۆچی دوایی هاشمی رەفسەنجانی، سەرۆکی پێشووتری ئێران، رایگەیاندووە، ”پرسە و ماتەمینیی قوڵ بۆ ئێوە و گەلی ئێرانی دۆست و خانەوادە و كەس و كاری كۆچكردو دەردەبڕین“.

فوئاد مەعسوم هەروەها لە پەیامەکەیدا، کە بۆ ”فەخامەتی“ حەسەن رۆحانی، سەرۆک کۆماری ئیسلامیی ئێرانی ناردووە، رایگەیاندووە، ”وڵاتەکەمان وەک دۆستێک“ هاشمی رەفسەنجانی دەناسێت و ”لە ساتە زۆر دژوارەكاندا“ هاوسۆزی گەلی عێراق بووە.

دەقی پەیامەکەی مەعسوم بۆ رۆحانی:

“فەخامەتی سەرۆكی كۆماری ئیسلامیی ئێران دكتۆر حەسەن رۆحانیی بەڕێز،</sup>

^{بەداخ و پەژارەی زۆرەوە هەواڵی كۆچی دوایی سەرۆكی ئەنجومەنی دیاریكردنی بەرژەوەندییەكانی رەیژێم لە كۆماری ئیسلامیی و سەرۆكی پێشوتر شێخ هاشمیی رەفسنجانیی مان پێگەیشت كەوڵاتەكەمان وەك دۆستێك دەیناسێت لە ساتە زۆر دژوارەكاندا هاوسۆزیی بووە، لە كاتێكدا بۆ ئەم كۆستە قورسە گەرمترین ماتەمینییتان پێشكەش دەكەین، پرسە و ماتەمینیی قوڵ بۆ ئێوە و گەلی ئێرانی دۆست و خانەوادە و كەس و كاری كۆچكردو دەردەبڕین، بەو پەڕی شانازیشەوە یادی پێگەی مەزنی كۆچكردو دەكەینەوە لە هەردو ئاستی ناوچەیی و نێودەوڵەتیی، لە پەروەردگارمان داوایە كۆچكردو بخاتە بەر بەزەیی خۆی و بە بەهەشتیی بەرینی شاد بكات و سەبوریی بە ئێوەش ببەخشێت.}

^{انا لله وانا الیە راجعون}

^{فوئاد مەعسوم
سەرۆك كۆماری عێراق"}