دوو مامۆستای دانیشتووی هەرێمی كوردستان ناوەڕاستی مانگی ئابی ئەمساڵ زێدی خۆیان جێهێشت و بەرەو ئەوروپا بەڕێكەوتن، بەڵام دەڵێن تاوەكو گەیشتنە شوێنی مەبەست، چەندین جار لە مەرگ نزیك بوونەتەوە، هەمووشی بەهۆی قاچاخچییەكانەوە بووە، بە تایبەتی قاچاخچییە كوردەكانی یۆنان.
مەنگوڕ رەسوڵ و گیابەند ئیبراهیم كە ژن و مێردن، هەردووكیان مامۆستا بوون لە كوردستان، ئەو مووچەیەی لە كوردستان وەریاندەگرت، بەشی بژێویی ئەوانی نەدەكرد، بۆیە بڕیار دەدەن كۆچ بكەن.
ئەوان دەیانزانی لە رێگەی كۆچ رووبەڕووی زەحمەتیی زۆر دەبنەوە، بە تایبەتی كە منداڵەكانیان بچووكن، بەڵام دەڵێن نەیاندەتوانی چاوەڕێی چارەسەربوونی قەیرانی دارایی هەرێمی كوردستان بكەن.
مەنگوڕ رەسوڵ، كە خەڵكی ناحیەی حاجیاوای سەر بە ئیدارەی راپەڕینە، بە (رووداو)ی گوت "ئێمە رۆژی 15/8/2016 رێگەی كۆچمان گرتەبەر، هەرچەندە دایك و باوكم لەگەڵ ئەوەدا نەبوون كۆچ بكەین، لەبەرئەوەی منداڵەكانم بچووكن و گوتیان بەرگەی ئەو رێگەیە ناگرن، بەڵام تازە بڕیاری خۆمان دابوو، لەگەڵ هاوژینەكەم و دوو كوڕەكەم لە كوردستانەوە بەرەو توركیا بەڕێكەوتین".
مامۆستا مەنگوڕ و هاوژینەكەی بۆ ماوەی 15 رۆژ لە توركیا دەمێننەوە و سەرەتای مانگی ئەیلول دەگەنە یۆنان، بەڵام لەوێ بۆ ماوەیەكی زۆر دەمێننەوە. مامۆستا مەنگوڕ دەڵێت "بەهۆی درۆی قاچاخچیی كورد و بێ ویژدانییان زیاتر لە 70 رۆژ لە یۆنان ماینەوە، چونكە هەر رۆژە و قسەیەك و هەر رۆژە و بەڵێن و پەیمانێكیان پێدەداین، بەڵام هیچی راست نەبوو".
ئەو كۆچبەرە كوردە باسی ژیانی خۆیانی لە یۆنان بۆ (رووداو) كرد و گوتی "ژیانمان لە یۆنان زۆر زەحمەت بوو، هەر جارە و لە هۆتێلێك دەماینەوە. لەوێ خواردن و خواردنەوە و مانەوە لە هۆتێل بۆئێمە زۆر گران دەوەستا، لەبەر بێ پارەیی كوردستانمان جێهێشت، كەچی لەوێ پارەیەكی زۆرمان خەرج كرد".
ئەو كۆچبەرە كوردە، زۆر داخ لەدڵ بوو بەرامبەر قاچاخچییە كوردەكانی سنووری یۆنان - مەكەدۆنیا و مەكەدۆنیا - سربیا، بەگوتەی ئەو "قاچاخچییەكان نرخ لەسەر كۆچبەرانی كورد بۆ رێگەی ئاوی و وشكانی زیاد دەكەن، ئەوە جگە لەوەی ئێمە چوار جار بە پاسپۆرتی ساختەوە دەستگیركراین و هاتینەوە یۆنان".
دەشڵێت "ئێمە زۆر هەوڵمان دا لەو ناخۆشییە دەربازمان بێت، دوای گۆڕینی چەند قاچاخچییەك ئینجا بڕیارمان دا رێگەی ئاوی بگرینەبەر و لە دوورگەكانی یۆنانەوە بەرەو ئیتاڵیا بەڕێكەوتین".
مامۆستا مەنگوڕ و خێزانەكەی رۆژی 15/11/2016 لەگەڵ 33 كۆچبەری كوردی باشووری كوردستان كە زۆربەیان خێزاندار بوون و منداڵیان لەگەڵ بووە، لەڕێگەی ئاوییەوە لە یۆنانەوە بەرەو ئیتاڵیا بەڕێدەكەون.
مامۆستا مەنگوڕ دەڵێت "33 كەسیان ئاخنییە نێو یەختێكی بچووك و بەرەو ئیتاڵیا بەڕێكەوتین، سێ شەو و دوو رۆژ لە نێو ئاودا ماینەوە. شەوی یەكەم ئاسایی بوو، بەڵام دواتر چەند جارێك بەهۆی جوڵەی بەلەمەكە و شەپۆلەكانەوە تەواوی كۆچبەرەكان رشانەوە، هەتا گەیشتینە سنووری ئیتاڵیا هەر رشاینەوە".
بەپێی زانیاریی فیدراسیۆنی سەرانسەریی پەنابەرانی عێراق، لە ماوەی ساڵێك و شەش مانگدا 142 كۆچبەری خەڵكی باشووری كوردستان لە رێگەی گەیشتن بە وڵاتانی ئەوروپا خنكاون یان لە رێگادا مردوون و 54 كەسیش بێ سەروشوێنن.
هیچ هۆكارێك نەبووە قەناعەت بە مامۆستا گیابەند بهێنێ لە كوردستان بمێنێتەوە، بۆیە كاتێك مێردەكەی پێشنیاز دەكات كۆچ بكەن، بەبێ دوودڵی رازی دەبێت.
مامۆستا گیابەند لە رێگادا تەنیا نیگەرانی منداڵەكانی بووە. ئەو دەڵێت "لەبەر منداڵەكان زۆر دەترسام، هەمیشە خەمی ئەوەم بوو كە ئایا بە سەلامەتی دەگەنە جێ یان نا".
ئەو ژن و مێردە دوای دەردەسەری و ناخۆشییەكی زۆری رێگا، رۆژی 25/11/2016 گەیشتوونەتە فەرەنسا و لە كەمپی دانكیخ نیشتەجێ بوون. ئەوان بڕیاریان داوە خۆیان تەسلیمی حكومەتی فەرەنسا بكەن.
مامۆستا مەنگوڕ و گیابەند مۆڵەتی بێ مووچەیان بۆ ماوەی ساڵێك وەرگرتووە، چونكە ترسیان هەبوو نەگەنە فەرەنسا، یان سنوورداش بكرێنەوە.
300 مامۆستا مۆڵەتی بێ مووچەیان وەرگرتووە
شۆڕش غەفووری، گوتەبێژی وەزارەتی پەروەردە لەبارەی ئەو مامۆستایانەی كە مۆڵەتیان وەرگرتووە و ئەوانەی كە كوردستانیان جێهێشتووە بە (رووداو)ی گوت " لەماوەی 11 مانگی رابردوودا، نزیكەی 900 مامۆستا مۆڵەتی گشتییان وەرگرتووە، واتە ئەو مامۆستایانەی كە بەهۆی نەخۆشی و خوێندن و مۆڵەتی دایكایەتییەوە مۆڵەتی بە مووچەیان پێدراوە".
لە بارەی ئەو مامۆستایانەشی كە مۆڵەتی بێ مووچەیان وەرگرتووە، گوتەبێژی وەزارەتی پەروەردە گوتی "كەمتر لە 300 مامۆستا لە ماوەی 11 مانگی رابردوودا مۆڵەتی بێ مووچەیان وەرگرتووە".
6/12/2016
