^{لە کۆتایی ساڵی رابردوەوە هاوئاهەنگی نێوان رووسیا و تورکیا و ئێران بۆ قەیرانی سووریا دەستیپێکردووە. تاوەکو ئێستا ئەم سێ وڵاتە پێنج کۆبوونەوەی ئاستانەیان رێکخستووە و لە چوارەمین کۆبوونەوەیشدا چوار ناوچەی ئارامیان لە سووریادا راگەیاند.}

^{ئەم هەنگاوە یارمەتیدەرێک بوو بۆ ئەوەی سوپای سووریا بە پاڵپشتی هێزی ئاسمانیی رووسیا و هێزە یارمەتیدەرەکانی دیکەی ، ناوچەیەکی بەرفراوان کۆنترۆڵ بکاتەوە؛ کارێک کە بە دڵی رووسیا و ئێران بووە.}

^{سێرگی شۆیگو، وەزیری بەرگریی رووسیا رایگەیاند: "لە ماوەی دوو مانگی رابردوودا، ناوچەیەکی بەرفراوانتر کۆنترۆڵکراوەتەوە. ئێمە توانیومانە رووبەرێک کۆنترۆڵ بکەینەوە کە دوو هێندە و نیوی ئەو رووبەرە زیاترە کە پێش چوونمان بۆ سووریا لە ژێر دەسەڵاتی حکومەتدا بوو".}

^{بەڵام پێدەچێت کاتی ئەوە هاتبێت تاران و مۆسکۆش هەندێک کار لە سووریادا بکەن کە ئەنقەرە داوایان دەکات. چارەنووسی عەفرین و ئیدلیب بۆ تورکیا گرنگە؛ عەفرین جگە لەوەی ناوچەیەکی ستراتیژییە، ئەنقەرە نایەوێت هەر سێ کانتۆنەکەی رۆژئاواش پێکەوە گرێبدرێن.}

^{بەڵام تورکیا بە تەنیا ناتوانێت کارێکی وا بکات و پێویستی بە دوو وڵاتەکەی دیکە هەیە کە لە سووریادا رۆڵی گەورە دەگێڕن. ئیدلیبیش بۆ تورکیا گرنگی زۆری هەیە، چونکە پارێزگاکە راستەوخۆ دەکەوێتە ئەودیو سنووری تورکیا.}

^{ئیدلیب سەنتەری هێزە ئۆپۆزیسیۆنەکانی سووریایە، بەڵام کاریگەرترین هێز تێیدا دەستەی تەحریری شامە، کە لقی سووریای رێکخراوی ئەلقاعیدە پێکهێنەری سەرەکیەتی.}

^{بەهێزبوونی ئەلقاعیدە نیگەرانی لای بەرپرسانی ئەمریکا دروستکردووە و هەربۆیە ئەنقەرە ترسی هەیە دوای رەققە واشنتن داوا لە هەسەدە بکات روو لە ئیدلیب بکات.}

^{کارێکی لەو جۆرە بە دڵی تورکیا و رووسیا و ئێران نابێت، چونکە ئەگەر بۆ تورکیا واتای بەهێزبوونی زیاتری هەسەدە بێت ئەوا بۆ رووسیا و ئێران واتای بەهێزبوونی ئەمریکا دەبێت.}

^{هەربۆیە هەردوو سەرۆک ئەرکانی رووسیا و ئێران لە تورکیا لەگەڵ هاوشانە تورکییەکەیان دەربارەی عەفرین و ئیدلیبیش گفتوگۆ دەکەن بۆ ئەوەی بگەنە رێککەوتنێک.}

^{نێردەی تایبەتی رێکخراوی نەتەوەیەکگرتووەکانیش دەڵێت، ئەوەی ئێستا لە رەققە و لە داهاتوویشدا لە ئیدلیب روودەدات کاریگەری گەورەی دەبێت.}

^{ستافان دیمستۆرا، نێردەی UN بۆ کاروباری سووریا دەڵێت: "کەواتە تشرینی یەکەم گرنگ دەبێت و سەرەتای تشرینی دووەمیش بە هەمان شێوە. دەکرێت گۆڕانکاری نوێ لە رەققە و دەورووبەری و دێرەزوور بێتە ئاراوە و دواتریش بابەتە گرنگەکە دەربارەی داهاتووی ئیدلیب دەبێت".}

^{ئەنقەرە و تاران و مۆسکۆش دەیانەوێت تاوەکو ئەو کاتەی دیمستۆرا باسی دەکات بناغەی پاراستنی بەرژەوەندییەکانیان لە سووریادا دابنێن.}

^18/8/2017

^{گوتەبێژی وەزارەتی پێشمەرگەی حكومەتی هەرێمی كوردستان وەڵامی لێدوانێکی سەرۆكی ئەركانی هێزە چەكدارەكانی ئێران دەداتەوە و رایدەگەیێنێت: " قسەكردن لەبارەی مافەكانی خەڵكی كوردستان كاری ئەو بەڕێزە نییە و ئەوە بە دەستێوەردانێكی ئاشكرا لە كاروباری ناوخۆی كوردستان هەژمار دەكرێت".}

^{دەقی لێدوانەکەی گوتەبێژی وەزارەتی پێشمەرگە}

^{بەپێی هەواڵێكی ئاژانسی هەواڵنێریی تەسنیمی ئێرانی سەرلەشكەر باقری سەرۆكی ئەركانی هێزە چەكدارەكانی ئێران لێدوانێكی لەبارەی ریفراندۆمی بیست و پێنجی ئەیلوولی 2017 ـی هەرێمی كوردستان داوە و گوتویەتی ئەم ڕیفراندۆمە موستەحیلە و نابێ بكرێت.}

^{لێرەدا بە گشت لایەكی ڕادەگەیێنین كە قسەكردن لەبارەی مافەكانی خەڵكی كوردستان كاری ئەو بەڕێزە نییە و ئەوە بە دەستێوەردانێكی ئاشكرا لە كاروباری ناوخۆی كوردستان هەژمار دەكرێت.}

^{ئەنجامدانی ڕیفراندۆم مافێكی ڕەوا و سروشتیی گەلی كوردستانە و جگە لە خەڵكی كوردستان هیچ كەسی تر مافی ئەوەی نییە قسەی لەسەر بكات.}

^{گوتەبێژی وەزارەتی پێشمەرگەی حكومەتی هەرێمی كوردستان}

^{18ـی 8ـی 2017}

^{ئه‌مڕۆ هه‌ینی، سه‌رۆكایه‌تیی هه‌رێمی كوردستان، راگه‌یه‌ندراوێكی سه‌باره‌ت به‌ هێرشه‌ تیرۆریستییه‌كه‌ی شاری به‌رشه‌لۆنه‌ی ئیسپانیا بڵاو كرده‌وه‌.}

^{فەرموون دەگەل ده‌قی راگه‌یه‌ندراوه‌كه‌:}

^{ئێواره‌ی ڕۆژی پێنجشه‌ممه‌ 17ـی 8ـی 2017 له‌ ئه‌نجامی هێرشێكی تیرۆریستی له‌ شاری به‌رشه‌لۆنه‌ی ئیسپانیا 13 هاووڵاتیی گیانی له‌ده‌ستدا و 100 كه‌سی دیكه‌یش بریندار بوون.}

^{وێڕای ئه‌وه‌ی زۆر به‌ توندی ئیدانه‌ی ئه‌و كاره‌ تیرۆریستییه‌ ده‌كه‌ین، سه‌ره‌خۆشی له‌ كه‌سوكاری قوربانیانی ئه‌و كرده‌وه‌ دڕندانه‌یه‌ ده‌كه‌ین و هیوای چاكبوونه‌وه‌ی خێرایش بۆ برینداران ده‌خوازین.}

^{گه‌لی كوردستان، كه‌ خۆی قوربانیی ده‌ستی تیرۆره‌ و له‌ سه‌نگه‌ری پێشه‌وه‌ی شه‌ڕی تیرۆره‌ خۆی به‌ هاوخه‌می شاری به‌رشه‌لۆنه‌ ده‌زانێت.}

^{سه‌رۆكایه‌تیی هه‌رێمی كوردستان}

^18/8/2017

^{ئەندامێکی ئەنجومەنی ناوەندی یەکێتیی نیشتمانیی کوردستان، ئاماژە بەوە دەدات کە لە نێوان پارت و لایەنە سیاسییەکان، دوور لە چاوی میدیاکان کۆبوونەوەی جدی بۆ کاراکردنەوەی پەرلەمانی کوردستان کراوە.}

^{پشتیوان گوڵپی، ئەندامی ئەنجومەنی ناوەندی یەکێتیی نیشتمانی کوردستان، بە (باسنیوز)ی راگەیاند: "پارتی، گۆڕان و یەکێتی، دوور لە چاوی میدیاکان کۆبوونەوەیان کردووە، بۆئەوەی بەزووی پەرلەمانی کوردستان کارا بکرێتەوە، بێگومان ھەوڵەکان دەرەنجامێکی باش دەبێ و لە ئایندەیەکی نزیکدا پەرلەمان کارا دەکرێتەوە".}

^{ئەو بەرپرسەی یەکێتی، ئەوەشی خستە روو: "کاراکردنەوەی پەرلەمانی کوردستان، کلیلی چارەسەرکردنی کێشەکانە، بەکاراکردنەوەشی چیتر ئەو قسەیە نامێنێ کە دەگوترێت، پەرلەمانی کوردستان دوو ساڵە پەکی کەوتووە، بەڵام لە ھەموو حاڵەتێکدا پەرلەمان بەکارەکانی خۆی ھەڵدەستێت، بەجۆرێک لە جۆرەکان کار بۆ ئەوە دەکرێ لە ڕێگەی پەرلەمانەوە کێشەکان چارەسەر بکرێت، بێگومان دوور لە چاوی میدیاکان کۆبوونەوەی جدی بۆ کاراکردنەوەی پەرلەمانی کوردستان کراوە".}

^{ئاشکراشی کرد: "ھەر کەسێک لەناو یەکێتی دژایەتی ڕیفراندۆم بکات، ڕاستەوخۆ سزادەدرێ تا ئاستی دەرکردنی لەناو ڕیزەکانی یەکێتیی نیشتمانیی کوردستان، چونکە مەکتەبی سیاسی، سەرکردایەتی و ئەنجومەنی ناوەند یەکێتی، ھەمیشە پشتگیری لە ڕیفراندۆم کردووە، بۆیە ڕێگە نادات ھیچ کەس بچێتە ناو جولانەوەی (نەخێر)، بێگومان ناکرێ لەناو یەکیتی کە ئێمە پشتگیری لە پرسێکی نیشتمانی بکەین، ئەندامەکانمان ھەڵوێستی جیاوازیان ھەبێت".}

^18/8/2017

^{دوای راپۆرتێکی تۆڕی میدیایی رووداو لەبارەی شوێنێکی مێژوویی شۆڕشی ئەیلوول لە حاجی ئۆمەران، ئەو شوێنە کە ناوی بەردی "تەشیڕێسە" نۆژەنکرایەوە.}

^{هونەر کاک ئەحمەد، سەرۆکی گروپی نەوەکانی ئەیلوول دەڵێت "خۆشبەختانە دوای ئەوەی رووداو کاری لەسەر ئەم شوێنە کرد، نۆژەنکردنەوەی بۆ دەرچوو. دوای نۆژەنکردنەوەکە ژمارەی گەشتیاران بۆ 10 بەرامبەر بەرزبووەتەوە".}

^{ئەو شوێنە مێژووییە پێکهاتووە لە خانوویێک و لە ژێرەوەشی ئەشکەوتێکی سێ دەرچەیی بە درێژای 200 مەتر هەیە، کە ئێستا بۆ سەردانی گەشتیاران رووناک کراوەتەوە.}

^{پوورە فەوزیە 26 ساڵە پارێزگاری لەو خانووە دەکات و رۆژانەش دەستە دەستە پێشوازی لە گەشتیاران دەکات و چای گەرمیان پێدەدات.}

^{فەوزیە مەحموود دەڵێت "ئێمە لەدوای راپەڕینەوە هاتووینەتە نێو ئەم خانووە، هەر چۆنێک بێت چاکمان کردووە و وای لێهاتووە تێیدا بژین. رۆژانە خەڵکێکی زۆر بۆ بینینی دێتە دیار ئەم خانووە و ئێمەش خزمەتیان دەکەین".}

^{ئەو ناوچەیە کە هاوسنوورە لەگەڵ رۆژهەڵاتی کوردستان، سرووشتە ناوازەکەی و بوونی دەیان ناچەی شوێنەواری گرنگیش هۆکار بووە کە گوند و کۆمەڵگەی گەشتیاری لێ دروست بکرێن.}

^17/8/2017

^{ئێران نەیتوانی قەناعەت بە توركیا بهێنێت كە بە یەكەوە بۆ ڕای گشتیی وڵاتەكەیانی ئاشكرا بكەن، بەوەی دژایەتیی ڕیفراندۆم بۆ سەربەخۆیی هەرێمی كوردستان ئەركی هەردوو لایە.}

^{بەپێی زانیاریی میدیاکانی تورکیا دوای 37 ساڵ بۆ یەكەمجار سوپاسالاری توركیا بە داوەتێكی فەرمی محەممەدحوسێن باقری سوپاسالاری ئێرانی بانگهێشتی توركیا كرد و دوای چەندین كۆبوونەوە لەگەڵ هاكان فیدان راوێژكاری دەزگای میتی توركیا، سولێمان سۆیلوو وەزیری ناوخۆی توركیا، باقری نەیتوانیوە قەناعەت بە توركیا بهێنێت كە بە یەكەوە ڕاستەوخۆ دژایەتیی ریفراندۆم بۆ سەربەخۆیی هەرێمی كوردستان بكەن.}

^{سایتی (تی 24) بڵاوی كردوەتەوە، كە سوپاسالای ئێران داوای لە خلووسی ئاكار سوپاسالاری توركیا، هەروەها هاكان فیدان راوێژكاری دەزگای میتی توركیا كردووە، كە بە یەكەوە راگەیاندراوێك بڵاو بكەنەوە و لەو راگەیاندراوەدا دژایەتیی ریفراندۆم بۆ سەربەخۆیی هەرێمی كوردستان بكەن، هەروەها گوتوویەتی لە راگەیاندراوەكەدا باسی بەكارهێنانی هێزیش بكەن، بەڵام توركیا رەتی كردوەتەوە.}

^{هەمان سەرچاوە پشتی بە سەرچاوەی هەواڵێكی رۆژنامەی (جومهوریەت)ـی توركی بەستووە كە لەو بارەیەوە زانیاری ئاشكرا كردووە.}

^{رۆژنامەی (جومهوریەت) ئاشكرای كردووە: "كە حکوومەتی ئەنقەرە بە سوپاسالاری ئێرانی گوتووە، ئەگەر ئەوان لەبەردەم ڕای گشتیی توركیا دژایەتیی ڕیفراندۆم بۆ سەربەخۆیی بكەن و لەگەڵ ئێران بە یەكەوە ڕاگەیاندراوێك لەو ڕووەوە بڵاو بكەنەوە، ئەوكات ڕەنگە بارودۆخەكە بە تەواوی پێچەوانە ببێتەوە و لە بەرژەوەندی حكوومەتی هەرێمی كوردستاندا كۆتایی پێ بێت".}

^{هەمان ڕۆژنامە باسی لەوەش كردووە: "كە رای گشتیی توركیا بە هیچ شێوەیەك لەگەڵ ئەوەدا نییە بەو شێوە توندە دژی ریفراندۆم بوەستینەوە، ئەگەر شتێكی وا بكرێت، رەنگە حكوومەتی هەرێمی كوردستان زیاتر داكۆكی بكات لەوەی لەكاتی خۆیدا ریفراندۆم بكات، هەروەها ئەو دژایەتییەش كە لەگەڵ ئێران بە یەكەوە هەنگاوی بۆ بنرێت، رای گشتیی توركیا لە حكوومەت تووڕە دەكات".}

^17/8/2017

^{ئەندامێکی شاندی ئەنجومەنی باڵای ڕیفراندۆمی سەربەخۆیی کوردستان وردەکارییەکانی کۆبوونەوەی شاندەکە و سەرۆکی ئیئتیلافی دەوڵەتی یاسا، ئاشکرا دەکات.}

^{ڕۆمیۆ ھەکاری، ئەندامی ئەنجومەنی باڵای ریفراندۆم و ئەندامی شاندی ئەنجومەنەکە بۆ بەغدا، بە (باسنیوز)ی راگەیاند، ئەوە لە دڵی خەڵکی کوردستانە بەرامبەر نوری مالیکی، سەرۆکی ئیئتیلافی دەوڵەتی یاسا، ”پێمان گوت“.}

^{رۆمیۆ هەکاری، کە هاوکات سکرتێری گشتی پارتی دیموکراتی بێت نەهرێنە، هەروەها رایگەیاند، کە شاندەکەی ئەنجومەنی ریفراندۆمی سەربەخۆیی کوردستان بە نوری مالیکی راگەیاند، کە حکوومەتی عێراق پابەندی زیاتر لە 50 بڕگەی دەستووری عێراق لەبارەی مافەکانی گەلی کوردستان نەبووە و ”بودجە و قوتی خەڵکی کوردستانتان بڕی“.}

^{سکرتێری گشتی پارتی دیموکراتی بێت نەهرێن ئاماژەی بە وەڵامی سەرۆکی ئیئتیلافی دەوڵەتی یاسا دا و رایگەیاند، مالیکی گوتی، ئەگەر بارودۆخەکە بەمشێوەیەی ئێستا بڕوا، ئەوا ”پێویستە پێداچوونەوە بە دەستوور بکرێت“، بەڵام ”ئێمە پێمان گوتن، کە گەلی کوردستان بڕیاری خۆی داوە و ریفراندۆمی سەربەخۆیی ئەنجام دەدات“.}

^{رۆمیۆ هەکاری هەروەها رایگەیاند، کە نوری مالیکی ”زۆر زۆر بە پەرۆش“ بوو کۆبوونەوە و دەستپێکردنەوەی گفتوگۆ لەگەڵ بەرپرسانی باڵای هەرێمی کوردستان.}

^{ئێوارەی رۆژی دووشەممە 14\8\2017، شاندێکی ئەنجومەنی باڵای ریفراندۆمی سەربەخۆیی سەردانی بەغدای کرد، بۆ گفتوگۆکردن سەبارەت بە ریفراندۆم و سەربەخۆیی کوردستان لەگەڵ بەرپرسانی باڵای عێراق.}

^{پێشتر سەرچاوەیەک بە رۆژنامەی (شەرقولئەوسەت)ی راگەیاندبوو، کە نوری مالیکی “پەرۆشی”ی خۆی بۆ کۆبوونەوە لەگەڵ شاندی ریفراندۆم نیشان داوە و چەندین جار داوای لە شاندەکە کردووە لەگەڵی کۆ ببێتەوە.}

^17/8/2017

^{نووسه‌رێكى نزیك له‌ سه‌رۆكى حكوومه‌تى ئیسرائیل، داوا ده‌كات، په‌یوه‌ندییه‌كانى نێوان وڵاته‌كه‌ى و كوردستان پته‌و بكرێت، جه‌ختیكرده‌وه‌، كه‌ له‌ ئاینده‌دا په‌یوه‌ندی نێوان هه‌ردوو ده‌وڵه‌تى كوردستان و ئیسرائیل، گرنگییه‌كى زۆرى ده‌بێت و ده‌بنه‌ هاوپه‌یمانێكى به‌هێز.}

^{ئارئێل پۆلشتاین، نووسه‌ر له‌ ڕۆژنامه‌ى (ئیسرائیلی ئه‌مڕۆ) كه‌ نزیكه‌ له‌ بینیامین نه‌تانیاهۆ، سه‌رۆكى حكوومه‌تى ئیسرائیل، ڕای گه‌یاند: "هه‌ركاتێك ده‌وڵه‌تى كوردستان ڕاگه‌یاندرا، له‌گه‌ڵ ده‌وڵه‌تى ئیسرائیلدا ده‌بێته‌ هاوپه‌یمانێكى به‌هێز".}

^{پۆلشتاین، كه‌ هاوكات پارێزه‌ره‌ و له‌ بنه‌ڕه‌تیشدا له‌ جووه‌كانى ڕووسیایه‌، ڕوونیكرده‌وه‌، كه‌ په‌یوه‌ندی نێوان ده‌وڵه‌تى كوردستان و ده‌وڵه‌تى ئیسرائیل له‌ ئاینده‌دا زۆر گرنگ ده‌بێت، جه‌ختیشی كرده‌وه‌، كه‌ ئیسرائیل دروستبوونى ده‌وڵه‌تى كوردستان به‌ پێویست ده‌زانێت.}

^{ئه‌و نووسه‌ره‌، كه‌ دامه‌زرێنه‌رى بزووتنه‌وه‌ى “ڕووخسارى ئیسرائیل”ـه‌، گوتیشی: "بێبه‌شكردنى كورد له‌ ده‌وڵه‌تى سه‌ربه‌خۆى خۆى، زوڵمێكى گه‌وره‌یه‌، چونگه‌ گه‌لى كورد نه‌هامه‌تى زۆرى به‌ده‌ست ڕژێمه‌ یه‌ك له‌ دواى یه‌كه‌كانى ناوچه‌كه‌ بینیوه‌، به‌ڵام هه‌وڵدانى له‌ناوبردنى كورد، سه‌ركه‌وتوو نه‌بوو".}

^{پێشیوایه‌، ده‌وڵه‌تى داهاتووى كوردستان، رۆِڵێكى گرنگى له‌ گۆڕه‌پانى خۆرهه‌ڵاتى ناوه‌ڕاستدا ده‌بێت، ئه‌مه‌ش له‌ به‌رژه‌وه‌ندى ئیسرائیلدایه‌، بۆیه‌ ده‌بێت (ته‌ل ئه‌بیب) هه‌لى پته‌وكردنى په‌یوه‌ندییه‌كانى له‌گوڵ هه‌ولێر، له‌ده‌ست نه‌دات.}

^17/8/2017

^{لە کۆبوونەوەی سوپاسالار و شاندە باڵا سەربازییەکانی تورکیا و ئێران لە ئەنقەرە "سەقامگیریی و ئاسایشی ناوچەکە و رووبەڕووبوونەوەی گرووپە تیرۆریستییەکان" تاوتوێکراون.}

^{شاندێکی باڵا و فراوانی سەربازیی ئێران لە ئەنقەرەیە و لەگەڵ سوپاسالار و هاوتاکانیان لە تورکیا کۆبوونەوە. دوای کۆبوونەوەکانیشیان راگەیێندراوێکی سێ خاڵی هاوبەشیان بڵاوکردەوە.}

^{دەقی سێ خاڵی راگەیێندراوەکەی سوپاسالاری تورکیا و ئێران}

^{لە کۆبوونەوەی شاندی هەردوو وڵاتدا ئەم پرسانە باسکران:}

<sup>- رووبەڕووبوونەوەی گشت ئەو گرووپە تیرۆریستییانەی دەبنە هۆی ناسەقامگیری ناوچەکە
- سەقامگیری و ئاسایشی سنوورەکان
- هەروەها بیروڕا لەبارەی ئاسایش و سەقامگیری ناوچەکە ئاڵوگۆڕ کرا</sup>

^{بڕیاروایە شاندە باڵای سەربازییەکەی ئێران تاوەکو رۆژی هەینی 18-8-2017 لە ئەنقەرە بمێنێتەوە. ژەنەراڵ محەممەد حوسێن باقری، سەرۆک ئەرکانی سوپای ئێران و شاندە یاوەرەکەی بە کۆمەڵێک دۆسێی گرنگەوە چوونەتە تورکیا.}

^{بەپێی میدیا تورکییەکان، سەردانی شاندە باڵاکەی ئێران وەرچەرخانێکە لە پەیوەندییەکانی هەردوولادا و نیشانەی ئەوەیە کە تاران و ئەنقەرە دەیانەوێ پێکەوە کار لەسەر رەواندنەوەی مەترسی و نیگەرانییەکانیان بکەن.}

^{هاوکات لەگەڵ سەردانی شاندە باڵا سەربازییەکەی ئێران بۆ ئەنقەرە، شاندێکی دیپلۆماسیی تورکیش، کە ئومێد یاڵچن، یاریدەدەری وەزیری دەرەوەی تورکیا سەرۆکایەتیی دەکات، لە تارانە و لەگەڵ بەرپرسانی وەزارەتی دەرەوەی ئێران کۆبووەتەوە.}

^16/8/2017

^{بەپێی ئاماری ماڵپەڕێکی تایبەت بە مافی مرۆڤ لە ڕۆژهەڵاتی کوردستان، لە ماوەی پێنج مانگی ڕابردوودا 25 چەکداری سوپای پاسداران لە شەڕ و پێکدادانەکاندا کوژراون و 22}

^{کەسی دیکەش بریندار بوون.}

^{بەپێی ڕاپۆرتی ناوەندی ئاماری ڕێکخراوی مافی مرۆڤی (هەنگاو) لە ماوەی پێنج مانگی ڕابردوودا لە انوچە جیاجیاکانی ڕۆژهەڵاتی کوردستان، 16 شەڕ و تێکهەڵچوون لە نێوان حزب و پارتە کوردییەکانی دژبەری ئێران و سوپای پاسداران و هێزە سنوورپارێزەکاندا ڕووین داوە.}

^{لەو شەڕ و پێکدادانانەدا حەوت گریلای پژاک و پارتی کرێکارانی کوردستان، سێ پێشمەرگەی کۆمەڵە و دوو پێشمەرگەی حزبی دیموکراتی کوردستانی ئێران شەهید بوون.}

^{بەپیی هەمان سەرچاوە لەو شەڕ و تێکهەڵچوونانەدا پێشمەرگەیەکی کۆمەڵە و گریلایەکی پژاکیش لەلایەن هێزەکانی سوپای پاسدارانەوە بە دیل گیراون.}

^{ڕێکەوت و وردەکاریی ڕوودانی ئەو شەڕ و تێکهەڵچوونانە لەلایەن ناوەندی ئاماری ڕێکخراوی مافی مرۆڤی هەنگاوەوە بەم شێوەیەی خوارەوە ئامادە کراوە:}

^{١- ڕێکەوتی 2017/4/4 هێرش بۆ سەر یەکێک لە ئەندامانی سوپای پاسداران کە بووە هۆی برینداربوونی، هیچ حزب و ڕێکخراوێک بەرپرسایەتیی ئەو هێرشەی نەگرتە ئەستۆ.}

^{2017/4/15 -2 هێرش کرایە ئۆتۆمبێلی (مەهدی سەڵماسی) فەرماندەی بەرەنگابوونەوەی کاڵای قاچاخی پیرانشار و دەستبەجێ کوژرا، کە سەرەنجام گرووپی هەڵۆکانی زاگرۆسی سەر بە حزبی دیموکراتی کوردستانی ئێران، بەرپرسیارێتیی ئەو هێرشەیان گرتە ئەستۆ.}

^{2017/5/9 -3 هێرش کرایە سەر بنکەیەکی سەربازی لە سنووری بانە لە گوندی (سیرین) کە بووە هۆی کوژرانی فەرماندەیەک بەناوی وەحید مورشدی و لەلایەن هیچ حزب و گرووپێکەوە بەرپرسایەتیی نەگیرایە ئەستۆ.}

^{2017/5/21-4 یەکێک لە گریلاکانی پژاک، لەلایەن هێزە ئەمنییەکانی سوپای پاسدارانەوە دەستگیر کرا.}

^{2017/5/22-5 لە نێوان گریلاکانی پژاک و هێزەکانی سوپای پاسداران لە گوندی (ساوان)ی بانە شەڕ ڕووی دا و لە ئەنجامدا گریلایەکی پژاک شەهید بوو.}

^{2017/5/23-6 لە نێوان گریلاکانی پژاک و هێزەکانی سوپای پاسداران لە سنووری ورمێ شەڕ ڕووی دا کە بووە هۆی کوژرانی دوو چەکداری سوپای پاسداران و حەوت چەکداری دیکەش بریندار بوون.}

^{2017/5/27-7 لە نزیک شاری سنە لە نێوان تیمێکی پێشمەرگەی کۆمەڵەی شۆڕشگێڕی زەحمەتکێشانی کوردستانی ئێران و هێزەکانی سوپای پاسداران هاتە ئاراوە، کە لەو شەڕەدا پێنج چەکداری سوپاسی پاسداران کوژران و پێنج چەکداری دیکەش بریندار بوون، هاوکات سێ پێشمەرگەی کۆمەڵە شەهید و پێشمەرگەیەکی دیکەش بە برینداری لەلایەن سوپاسی پاسدارانەوە دەستگیر کرا.}

^{2017/5/27-8 هێزەکانی نزیک لە پژاک لە ماکۆ هێرشیان کردە سەر ئەندامێکی سوپاسی پاسداران بەناوی (مستەفا فیردەوسی) و بەو هۆیەوە گیانی لەدەست دا.}

^{2017/6/6-9 بەهۆی شەڕ و پێکدادان لە نیوان چەند چەکدارێکی نەناسراو و هێزە سنوورپاریزەکانی ئێران لە بەرزاییەکانی (کانی خودا) لە پیرانشار و ئەندامێکی هێزە ئەمنییەکانی ئێران کوژرا و سێ کەسی دیکەش بریندار بوون.}

^{2017/6/9-10 ئەندامێکی خۆجێی سوپای پاسداران لە گوندی (دزێ)ی ناوچەی مەرگەوەڕ لەلایەن چەند چەکدارێکەوە هێرشی کرایە سەر و پاشان هەڵۆکانی زاگرۆس بەرپرسایەتیی ئەو هێرشەیان گرتە ئەستۆ.}

^{2017/6/10-11 ئەندامێکی پێشووی ئەنجەمەنی شاری بانە کە بە هاوکاریی سوپای پاسداران تۆمەتبار کراوە، لەلایەن چەند چەکداری نەناسراوەوە هێرشی کرایە سەر و کوژرا و هیچ حزب و گرووپێک بەرپرسایەتیی ئەو هێرشەی نەگرتە ئەستۆ.}

^{2017/6/20-12 لە نێوان گەریلاکانی پارتی کرێکارانی کوردستان (PKK) و هێزەکانی سوپای پاسداران لە سنووری ورمێ ڕووی دا کە بووە هۆی کوژرانی فەرماندەیەکی سوپای پاسداران و کەسێکی دیکەش کوژرا، هەروەها لە شەڕەدا سێ گریلای پەکەکەش شەهید بوون.}

^{2017/7/5- 13 لە ئەنجامی شەڕ و تێکهەڵچوون لە نێوان پێشمەرگەکانی شاری سەر بە حدکا و هێزەکانی سوپای پاسداران لە سنوووری پیرانشار شەش چەکداری سوپای پاسداران کوژران و سێ چەکداری دیکەش بریندار بوون، هەروەها لە شەڕەدا دوو پێشمەرگەی حزبی دیموکرات شەهید بوون.}

^{2017/7/8-14 لە نێوان هێزەکانی سوپای پاسداران و گریلاکانی پژاک لە کوێستانی شاهۆ لە نزیک کامیارانی سەر بە پارێزگای سنە شەڕ هاتە ئاراوە کە بووە هۆی کوژرانی سێ چەکداری سوپای پاسداران.}

^{2017/7/8-15 لەلایەن پێشمەرگەکانی شاری سەر بە حزبی دیموکراتی کوردستانەوە هێرش کرایە سەر بنکەیەکی سەر بە ڕێکخراوی بەسیج لەناو شاری شنۆ. هەتا ئێستا لەبارەی زیانەکانی ئەو هێرشە هیچ زانیارییەک بڵاو نەکراوەتەوە.}

^{2017/7/8-16 لە ئەنجامی هێرشی پێشمەرگەکانی شاری حزبی دیموکراتی کوردستانی ئێران لە ناوچە سنوورییەکانی پیرانشار، دوو چەکداری سوپای پاسداران کوژران.}

^{بەپێی هەمان سەرچاوە لە ماوەی پێنج مانگی ڕابردوودا حەوت جار کویستانەکانی (شاهۆ، قەندیل، سەردەشت و هەڵگورد) لەلایەن تۆپخانەکانی ئێرانەوە تۆپباران کراون کەلە ئەنجامی ئەو تۆپبارانانە پێشمەرگەیەکی کۆمەڵە و چوار هاووڵاتیی مەدەنیش بریندار بوون.}

^16/8/2017