رزگارکردنی دەریاچەی ورمێ، چیرۆکی نەبڕاوەی شۆرەکاتبوونی دەریاچەیەکە کە هەنگاوی جدیی بۆ نانرێت، هاوکات بووەتە باسێکی رۆژانەش.
یەکەمین کۆنگرەی نێودەوڵەتی رزگارکردنی دەریاچەی ورمێ رۆژی دووشەممە بە پەیامی مەعسومە ئیبتکار، جێگری سەرۆک کۆمار و سەرۆکی رێکخراوی پاراستنی ژینگەی ئێران لە پەردیسی زانکۆی ورمێ دەستیپێکرد.
لەو پەیامەدا ئاماژە بەوە کراوە، لە 13 ساڵ لەمەوبەرەوە لەبارەی وشکبوونی دەریاچەی ورمێ لایەنە پەیوەندیدارەکان ئاگادارکراونەتەوە، بەڵام پێشی پێ نەگیرا و لەمەودوا بۆ دەربازبوون لە قەیرانی وشکبوونی ئەو دەریاچەیە، دەبێ بەرنامەیەکی ژیرانە، گشتگیر، خێرا و بە بەشداری هەمە لایەنە جێبەجێ بکرێت.
مەعسومە ئیبتکار هەروەها دەڵێت: "رێکخراوی پاراستنی ژینگە بە لەبەرچاوگرتنی ئەرک و بەرپرسیارێتییە نیشتمانی و نێودەوڵەتییەکانی، وێڕای هەماهەنگی لەگەڵ دامودەزگا بەرپرسیارەکان، کارناسانی نێوخۆیی و دەرەکی، هەوڵدەدا ئیمکاناتی هونەری، زانستی، پسپۆری و خەڵکی بۆ رزگارکردنی دەریاچەی ورمێیە".
جێگری سەرۆک کۆماری ئێران گوتیشی "بێ گومان رەوشی دەریاچەی ورمێ ئاگادارکردنەوەیەکی مەترسیدارە بۆ هەموو گۆل و دەشەتە کشتوکاڵییەکانی دیکە و ئەگەر بتوانرێ ئەو گرفتە چارەسەر بکرێ، چارەسەرێکیشە بۆ قەیرانەکانی دیکە".
چالاکوانانی ژینگەپارێز رەخنە لە لایەنە پەیوەندیدارە حکومییەکانی ئێران دەگرن، بەوەی درەنگ بەدەم چارەسەرکردنی گرفتەکانی دەریاچەی ورمێ رۆیشتوون و پرۆژەکانیشی بۆ چارەسەرکردنی ئەو کێشەیە یان هەڵە بوون یانیش بە پێی پێویست نەبوون.
کۆنگرەی نێودەوڵەتی رزگارکردنی دەریاچەی ورمێ بە بەشداری پسپۆرانی ئێران، ئەڵمانیا، ئەمریکا، بەلجیکا و تورکیا رۆژی دووشەممە لە نازلوی زانکۆی ورمێ دەستی بەکارەکانی کرد و دوو رۆژ دەخایەنێت.
لەو کۆنگرەیەدا رێکارەکانی رزگارکردنی دەریاچەی ورمێ و دەرەنجامی لێکۆڵینەوە و بەدواداچوونە نێوخۆیی و نێودەوڵەتییەکانی پەیوەندیدار بە دەریاچەی ورمێ تاوتوێ دەکرێت.
رووداو
19/02/2014
