كۆمەڵناسی ناسراوی تورك ئیسماعیل بێشكچی لە هەڤپەیڤینێكی رۆژنامەڤانیدا دەڵێت كورد دەبێ داوای ئەوە بكات كە تاوەكو ئێستا نەیبووە، مەبەستی بێشكچی سەربەخۆییە كە وەك ئەو دەڵێت كورد گەورەترین میللەتی سەر رووی زەوین تاوەكو ئێستا دەوڵەتیان نییە.
رۆژی 17ی شوبات رۆژنامەی "Die Presse"ی نەمسایی هەڤپەیڤینێكی لەگەڵ ئیسماعیل بێشكچی، كۆمەڵناسی ناوداری تورك بڵاوكردەوە. بێشكچی لەو هەڤپەیڤینەدا ئاماژە بە دەسەڵاتی باشووری كوردستان دەدات و دەڵێت، دەكرێ ببێتە نموونە بۆ باكووری كوردستانیش. ئەو گوتی "چارەسەری كێشەی كورد لە باكووری كوردستان لە سیستمێكی فیدراڵیدایە. دەوڵەتیش مافێكی رەوای كوردە."
ئیسماعیل بێشكچی، زانستكار و كۆمەڵناسی نێوداری تورك بەهۆی دەربڕینی بۆچوونی لەمجۆرە لەبارەی كێشەی كورد و پشتیوانیكردنی لە سەربەخۆیی كوردستان، ماوەی 17 ساڵی تەمەنی لە زیندانەكانی توركیادا بەسەربردووە.
بێشكچی لە وەڵامی پرسیاری ئەوەی كە "ئایا كورد لەسەر رێگەی پێشڤەچوونە؟"، دەڵێ "كوردستانی گەورە لە ساڵی 1920 دابەشكرا. وەكو هەیكەلی مرۆڤێك پارچە پارچە كرا. هەڵبەت نزیكەی 40 دەوڵەتی دونیا هەن كە ژمارەی دانیشتووانیان لە یەك ملیۆن كەمترە. ئەوە لە كاتێكدایە كە ژمارەی كورد نزیكەی 40 ملیۆنە و هێشتا دەوڵەتیان نییە".
بێشكچی درێژە بە قسەكانی دەدات و دەڵێت "لەسەر ئاستی كۆمەڵگەی نێودەوڵەتی دیارە هیچ گۆڕانكارییەك بەسەر هەڵوێستی ئەنتی- كورددا نەهاتووە. دەوڵەتە زلهێزەكانی ناوچەكە نێوانی لایەنە كوردییەكانیان تێكداوە، كوردیان دابەشكردووە و بۆ مەبەستی خراپ بەكاریاندەهێنن. ئامانجی ئێران، توركیا، سووریا و عێراقی سەردەمی سەدام نەسەلماندنی مافی كورد بووە. نوێنەرانی كورد دەبێ ئەمەیان لەبیربێت بۆ بەهێزكردنی یەكێتی نێوخۆییان."
بێشكچی هەروەها دەڵێت "ئەگەر بەشێكی كوردستان رێككەوتنێك لەگەڵ دەوڵەتێك بكات، دەبێ كاربەدەستانی كورد ئاگایان لەوە هەبێت كە ئەو رێككەوتنە زیانی بۆ بەشەكانی دیكە نەبێت، یانیش كەمترین زیانی هەبێت. كورد دەبێ هەوڵی گۆڕینی دۆخی خۆیان بدەن، داوای قەوارەیەكی وەكو ئەوەی باشووری كوردستان بكەن كە حكومەتێكی ئۆتۆنۆمی هەیە. هەروەها وەكو رۆژئاوای كوردستان كە ئەویش لەسەر رێچكەی باشوور دەڕوات. من لە توركیا داوای فیدراسیۆنێك دەكەم بۆ كوردستانێكی فیدراڵ. كوردستان وڵاتێكی زۆر گەورەیە، بۆچی ئەمڕۆ دەوڵەتیان نەبێت."
بێشكچی لە وەڵامی ئەوەی كە "توركیا هەرگیز قبووڵ ناكات خاكەكەی دابەش بكرێت، ئایا لەسەر ئەرزی واقیع ئەوە چۆن دێتەدی؟" دەڵێت "كورد دەبێ داوای ئەوە بكات كە تاوەكو ئێستا نەیبووە".
بێشكچی پێشتر لە هەڤپەیڤینێكدا لەگەڵ (رووداو) گوتبووی "سەدەی 21 سەدەی كوردە". بێشكچی پێیوایە زۆر گرنگە كورد یەكێتی نێوخۆییان بەهێز بكەن و لەسەر ئاستی نێودەوڵەتیش ئەو پرسیارە بورووژێنن كە: "بۆچی لوكسمبۆرگ، بە ژمارەی دانیشتووانی كەمتر لە یەك ملیۆن كەسەوە خاوەنی دەوڵەتە، بەڵام 40 ملیۆن كورد ناتوانن ببنە خاوەنی دەوڵەت؟"
د. ئیسماعیل بێشكچی، لەبارەی ئەوەی كە ئایا ئەم سەدەیە دەبێتە سەدەی كورد؟ دەڵێ "بەڵێ، من وای دەبینم كە ئەم سەدەیە سەدەی كوردە"، بەڵام لە هەمانكاتیشدا دەڵێ ئێستا چانسی دروستكردنی دەوڵەتی كوردی نییە و ئەو دەرفەتە لە سەدەی رابردوودا لەدەست كورد چوو.
02/03/2014
