مەسعود بارزانی سەرۆكی هەرێمی كوردستان، به پێویستی ده‌زانێت لە عێراقدا كورد شەریك بێت و كەس وا بیر نەكاتەوە كه خەڵكی دی گوێڕایەڵ و هاوڵاتی پلە دوو بێت، شه‌راكه‌تی راسته‌قینه‌ش به مه‌رجی به‌شداربوونی هه‌رێمی كوردستان ده‌زانێت له‌حكومه‌تی داهاتووی عێراق دا.
ئه‌مڕۆ پێنجشه‌ممه ( 8 ئایار 2014) مه‌سعود بارزانی سه‌رۆكی هه‌رێمی كوردستان له‌گه‌ڵ یانا هایبەسكۆڤا نێردەی یەكێتیی ئەوروپا بۆ عێراق، كۆبۆوه‌وهایبەسكۆڤا ڕایگەیاند،" ئەم دیدارە جەختكردنەوەیە لە پەیوەندیی ستراتیژیی ئەوروپا لەگەڵ عێراق و هەرێمی كوردستان".
نێردەی یەكێتیی ئەورووپا، ئەزموونی دیموكراتیانەی هەرێمی كوردستانی بە نموونەیەكی زۆر باش وەسفكرد بۆ ناوچەی ڕۆژهەڵاتی ناوەڕاست، ئەوەشی له‌كۆبوونه‌وه‌كه‌دا خستەڕوو كە، نوێنەر و شارەزا و باڵیۆزەكانی یەكێتی ئەوروپا لە كاتی هەڵبژاردن سەردانی زۆر شوێنی كوردستانیان كردووە و ئەو جۆش و خرۆش و كێبڕكێیەی لە پڕۆسەكەدا هەبوو جێگەی بایەخ بوو".
هه‌ر له‌كۆبوونه‌وه‌كه‌دا مه‌سعود بارزانی رایگه‌یاند،" نوێنەر و باڵیۆزەكانی ئەوروپا لەبارەی سەركەوتوویی هەڵبژاردن هێزی زیاتر بە گەلی كوردستان دەبەخشێت"، وتیشی: لە ساڵی 1991 لە دیدارێكی جەماوەریی لەگەڵ خەڵكی شاری كۆیە ڕامگەیاند كە هەرێمی كوردستان لە ڕێی هەڵبژاردن لە شەرعیەتی شۆڕشگێڕی بەرەو شەرعیەتی دەستوری هەنگاو دەنێت و ئێستایش سەرباری هەموو كەموكورتیەكان كوردستان ڕێی شەرعیەتی دەستوری هەڵبژاردووە و لە دیموكراسیدا بەرەو پێش دەچێت.
لەو كۆبوونەوەیەدا كە تایبەت بوو بە قسەكردن لەسەر بارودۆخی سیاسیی عێراق، مه‌سعود بارزانی ڕۆڵی كوردی لە ئایندەی عێراق و مەسەلەی هاوبه‌شی نیشتیمانی خسته‌ڕوو، له‌وباره‌یه‌وه هێمای بەوەدا كە بۆ تێگەیشتن لە گرفتەكان پێویستە پرسیار لە ماهیەتی عێراق بكەین.
مه‌سعود بارزانی وتی: لەدوای شەڕی یەكەمی جیهان، عێراق لەسەر بنەمای شەراكەتی نێوان دوو نەتەوەی سەرەكی كورد و عەرەب دامەزرا، بەڵام ئەم شەراكەتە جێبەجێ نەكرا و هەمیشە شەڕ و ناخۆشی هەبووە، ئه‌وه‌شی خسته‌ڕوو كه،"لەدوای ڕووخانی ڕژێم كورد بڕیاریدا لەگەڵ عێراقدا بمێنێتەوە و دەستورێك پەسەند كرا بەو ئومێدەی هەموو لایەك ئەركومافەكانیان بزانن و لەسەر بنەمای شەراكەت پێكەوە بژین، بەڵام جێی داخە كە ئیلتزام بەو دەستورەش نەكرا.
مه‌سعود بارزانی جەختی لەوە كردەوە كە پێویستە لە عێراقدا كورد شەریك بێت و كەس وا بیر نەكاتەوە كە حاكم بێت و خەڵكی دی گوێڕایەڵ و هاوڵاتی پلە دوو بێت یان بە مەنتقی زۆرینە و كەمینە حوكم بكات.
بارزانی ئاماژەی بە هەڵبژاردنی 30ـی نیسان كرد و بە دوا دەرفەتی زانی بۆ عێراق ئەگەر بەشێوەیەكی كردەیی پڕەنسیپی شەراكەت جێبەجێ بكرێت وه‌ك ئومێدێك بۆ پێكەوە مانه‌وه.
لەباره‌ی مه‌رجه‌كانی هه‌رێمی كوردستان بۆ بەشداریكردن لە حكومەتی داهاتووی عێراق، مه‌سعودی بارزانی ئاماژەی بەوەدا كە پێویستە شەراكەتی راسته‌قینه بە كردەوە بچەسپێت.
سەبارەت بە مه‌سه‌له‌ی پۆستی سەرۆك كۆمار و داواكاریی كورد بۆ وەرگرتنی ئەم پۆستە، بارزانی ئاماژەیدا بە تەشریفاتیبوونی پۆستی سەرۆك كۆمار و ڕایگەیاند كە،" پاش ڕاگەیاندنی فەرمی ئەنجامی هه‌ڵبژاردنه‌كان و دوای ئەوەی كورد لەوە دڵنیا بێت كە عێراق بەرەو دۆخی پێشوو ناگەڕێتەوە، ئەو كات كورد پێداگریی لەسەر وەرگرتنی پۆستی سەرۆك كۆمار دەكات و" بە ئیستحقاقێكی نەتەوەیی هەرێمی كوردستانی دەزانین".
ئێوارەی ئەمڕۆش لە هەولێری پایتەخت مەسعود بارزانی سەرۆكی هەرێمی كوردستان بەشداریی مەراسیمی یادی دامەزراندنی یەکێتیی ئەوروپای کرد.
لەو مەراسیمەدا یانا هایبەسكۆڤا نێردەی یەكێتیی ئەوروپا بۆ عێراق و فەلاح مستەفا بەرپرسی فەرمانگەی پەیوەندیەکانی دەرەوەی حکومەتی هەرێمی کوردستان و نیكولای ماڵدینۆڤ نوێنەری تایبەتی سكرتێری گشتیی نەتەوە یەكگرتووەكان لە عێراق وتاریان پێشکەش کرد.
ژمارەیەکی زۆر لە کونسوڵ و نوێنەری وڵاتان لە هەرێمی کوردستان له‌گه‌ڵ نێردەی یەكێتیی ئەورووپا بۆ عێراق و باڵیۆزانی وڵاتانی یەكێتی ئەوروپا ئامادەی مه‌راسیمه‌كه بوون.
09/05/2014
