ئه‌ندامی کۆمیسیۆنی ئاوه‌دانی مه‌جلیسی شۆرای ئیسلامی ئێران ڕایگه‌یاند که زیاتر له 1500 پڕۆژه‌ی ته‌واو نه‌بوو له پارێزگای کوردستاندا هه‌یه و ڕێژه‌ی بێکاری له‌م پارێزگایه‌شدا دوو ئه‌وه‌نده‌ی ڕێژه‌ی مامناوه‌ندییه له ئاستی وڵاتدا.
به‌پێی هه‌واڵی کوردپرێس، حامد قادرمه‌رزی، نوێنه‌ری شاره‌کانی قوروه و دێولان له مه‌جلیسی شۆرای ئیسلامی ئێران له لێدوانێکدا بۆ ماڵپه‌ڕی مه‌جلیس (خانه‌ی میلله‌ت) ڕایگه‌یاند که ڕێژه‌ی بێکاری له پارێزگای کوردستاندا دوو ئه‌وه‌نده‌ی ڕێژه‌ی مامناوه‌ندییه له ئاستی وڵاتدا.
ناوبراو هۆکاری پێشنه‌که‌وتن له پارێزگای کوردستان له چاو دیکه‌ی ناوچه‌کانی ئێرانی بۆ له‌بار چوونی ده‌رفه‌رتی سه‌رمایه‌دانه‌ری له ده ساڵه‌ی یه‌که‌می شۆڕشی ئیسلامی له‌به‌ر شه‌ڕی سپێندراو به سه‌ر ئێراندا و هه‌روه‌ها دابه‌ش نه‌بوونی دادپه‌روه‌رانه‌ی بودجه له نێوان پارێزگاکان بۆ ئاوه‌دان کردنه‌وه له قۆناغی پاش شه‌ڕی هه‌شت ساڵه ڕاگه‌یاند.
دوکتۆر قادرمه‌رزی به ئاماژه به‌وه‌ی که پێشتر له پارێزگای کوردستاندا زیاتر له 850 یه‌که‌ی وه‌به‌رهێنان و پیشه‌یی چالاکیان ده‌کرد ڕایگه‌یاند له ماوه‌ی ساڵانی دواییدا زیاتر له 350 یه‌که له‌به‌ر داڕمانی ئابووری؛ یان داخراون یان به نیوه‌داخراوی چالاکی ده‌که‌ن.
ئه‌و نوێنه‌ره کورده‌ی مه‌جلیسی شۆرای ئیسلامی ئێران کارگه‌ی فوولادی زاگرۆس غه‌ربی به یه‌کێک له‌و کارگه‌یانه ناوبرد و ڕایگه‌یاند که پێش ساڵی 1384 و له‌و کاته‌ی که هێشتاکه ده‌وڵه‌تی نۆهه‌م (ده‌وڵه‌تی ئه‌حمه‌دی نه‌ژاد) نه‌هاتبووه سه‌ر کار، له یه‌که نموونه‌یه‌کانی وڵات بووه، به‌ڵام پاش هاتنه سه‌رکاری ده‌وڵه‌تی نۆهه‌م به‌ڕێوه‌به‌رانی پسپۆڕ له‌و کارگه‌یه له سه‌رکار لابراون و ئه‌وانه‌ی که شاره‌زاییه‌کی ئه‌وتۆیان له‌و کاره‌دا نه‌بووه له به‌ر نێزیک بوونه‌وه‌یان به جێگری یه‌که‌می ئه‌و کاته‌ی سه‌رۆک کۆمار، به‌ڕێوه‌به‌رێتی کارگه‌که‌یان پێسپێردرا که بووه‌هۆی داخرانی کارگاکه و خه‌سارگه‌یشتن به بواری کار و ڕه‌خساندنی هه‌لی کار له پارێزگای کوردستاندا.
ڕاشیگه‌یاند که ئه‌و ئیمکاناته‌ی له کارگه‌ی فوولادی زاگرۆسی غه‌ربدایه به‌هاکه‌‌ی زیاتر له 100 میلیارد تمه‌نه و ده‌وڵه‌ت ده‌توانێت سه‌رمایه‌کانی که‌رتی تایبه‌ت له‌و کارگه‌یه‌دا بخاته گه‌ڕ بۆ چالاک کردنه‌وه.
دوکتۆر قادرمه‌رزی له به‌شێکی دیکه‌ی لێدوانه‌که‌یدا به ئاماژه به‌وه‌ی که زیاتر له 1500 پڕۆژه‌ی ناته‌واو له پارێزگای کوردستاندا هه‌یه، ڕایگه‌یاند: ژماره‌یه‌ک له‌و پڕۆژانه به‌ره‌وپێش چوونی که‌متر له 50 له سه‌دیان هه‌یه بۆ ته‌واوبوون و هه‌ندێکیشیان 80 له سه‌د به‌ره‌و‌پێشچوونیان بووه و بۆ ته‌واو کردنی ئه‌و پڕۆژانه گوژمه‌یه‌کی 700 میلیارد تمه‌نی پێویسته.
ڕاشیگه‌یاند که له سه‌فه‌ری ئه‌م دواییه‌ی ئه‌ندامانی کۆمیسیۆنی ئاوه‌دانی مه‌جلیسی شۆرای ئیسلامی و ژماره‌یه‌ک له جێگرانی وه‌زیرانی ده‌وڵه‌ت بۆ پارێزگای کوردستان بڕیاری باش بۆ ته‌رخاندانی بودجه به مه‌به‌ستی ته‌واوکردنی ئه‌و پڕۆژانه ده‌رکراوه که کۆمه‌ڵه‌ی نوێنه‌رانی پارێزگای کوردستان له مه‌جلیس به جیددییه‌ته‌وه به‌دواداچوون بۆ ئه‌و بڕیارانه ده‌که‌ن تا کاتی جێبه‌جێ بوونیان.
27/4/2014
