به‌ڕێزان ( عوسمان عه‌به پێنجوێنی یان عوسمان قه‌ڵادزه‌یی) و( جه‌واد حه‌یده‌ری) به‌داخه‌وه وتیان به‌ڵێ ڕاسته و كۆچی دوایی كردووه؟
هونه‌رمه‌ند و پێشمه‌رگه ، سروودبێژ و گۆرانیبێژ...
کۆڕەوو شەنگال وتووەو دەیڵێت و بەشداریی کاریگەری لەئاهەنگەکانی سەرفیرازیدا بووەو دەبێت.
مستەفا داداری موکریانی مەهابادی خۆی بەخوێندکاری (مام هێمنی شاعیر ١٩٢١-١٩٨٦) دەزانێ و کاتێک قسە دەکا...
باسمان بۆ بکەن، ئەو ئۆرکێسترەی ئێوە چەنساڵێک ژەنیاری بوون؟ئەو ئۆرکێسترە بە ئۆرکێستری رادیۆ کرماشان ناسراو بوو و لە سەرەتاشەوە سەرپەرەشتییەکەی بەدەستی بەڕێز عەبدولسەمەدیان بوو کە...
بەر دەکەوێت بەڵام لەو لایشەوە هەر بە پاڵپشتی ئەو سامانە دەوڵەمەندە،خۆی دوو هێندە لە نێو ڕووبەری فەرهەنگیی کورددا دەردەخات. هێشتاکەیش کتێبخانەکەی پڕیەتی لە دەیان بەرهەمی...
بەرەو نەورۆز
بەرەو نەورۆز دەچین ، بەرەو بوژانەوەی سوروشت و ژین .
لە ئاسۆی ڕونی هەوڵەکانی مرۆڤایەتی دا بۆ دابین کردنی دێمۆکراسی و ئاواتەکانی نەتەوەکان ، بۆبەشداری یەکسان و مافی ژیان ، خونچەکانی هیوا دەپوشکون .
زستان دوایی هات ، گەرچی هێشتا زستانی گرژی و ئینکار و پاوانخوازی لە زۆربەی ناوچەکان دا دوایی پێ نەهاتوە و هێشتا شەختە و توڕەیی ، لەشی گەرم و پڕ لە ژیانی دارەکانی هیوا سارد دەکاتەوە و هەوڵ دەدات پێشێ بوژانەوە بگرێ .
بەڵام ئاسۆی ڕونی بەهار ، بە ئاشکرایی دیارەو موژدەی ژیانێکی نوێ بە گۆێ ی هەمو لایەنگرانی ئاشتەوایی و شادی دا دەچرپێنێ .
"بەرەی یەکگرتوی کورد" هیوادارە بانگەوازی ئاشتەوایی و بەرانبەری کە لە ڕۆژی نەورۆزی ئیمساڵ دا دەدرێ ، بەڵێنەکانی پێکەوەژیانی هێمنانە لە وڵاتانی دراوسێ دا پتەو تر بکات و گیانێکی تازە بە ڕەوتی ئاشتی و هێمنایەتی ببەخشێ و هەنگاوێکی بەرز بێ بۆ هەڵکردنی شنەبای بەشداری و وەبەر هێنان ، بۆ بەرهەم هاتنی خەباتی درێژ خایەنی کوڕان و کچانی نەتەوەکەمان کە بۆ سەلماندنی کێیەتی و ناسنامەی خەڵکەکەیان خەباتیان کروە .
ئێمە هاوکات لەگەڵ دەربڕینی بەئاشکرای شادی و ڕەزامەندی خۆمان لە پێشکەوتەکانی بەشێک لەم نەتەوە گەورە ، هیوادارین ئەم ڕەوتە پیرۆزە لە بەشەکانی تریش دا تەشەنە بکات و بە دوایی هاتنی گرژی و لێک تێ نەگەیشتن ، بەربەستەکانی سەر ڕێگای پێکەوە ژیان بتوێنەوە و ڕێ بۆ هاو بەشی و بەشداری لە تێ کۆشان ، بۆ ئاوەدانی و خۆشی کۆنە وڵات خۆش بێت .
بە بڕوای ئێمە ، بەربەستی هاتنەدی ئەم ئاواتانە ، تەنیا لایەنەکانی بە ناو دژ بەر نین .
لایەنێکی سەرەکی ئەم ڕەوتە ، گۆڕینی چەشنە ڕوانین و هێنانە ئارای خەباتی نوێ ، ڕێ خۆش کردن بۆ پێشکەوتی زانستی، کۆمەڵایەتی و ئابوری ، هاودەنگی و هەرەوەزی نەتەوایەتی وە پەرە پێ دان بە گوتاری ئاشتی خوازانە بەتایبەت لە ناوخۆ دایە .
بە ئاواتی وەدی هاتنی بەهارێکی نوێ وە بوژانەوەی شادی و سەربەستی بۆ هەمو نەتەوەکان .
بەرەی یەکگرتوی کورد نەورۆزی 1392 ی هەتاوی
چه‌ند به‌رپرسێکى باڵاى بزوتنه‌وه‌ى دیموکراتى تورکمانى ده‌ستله‌کارده‌کشێننه‌وه به‌هۆى «ناعه‌داله‌تیه‌وه«و سه‌رۆکه‌که‌یان به‌بردنى زیاتر له‌دوو ملیار دینارى بودجه‌ى حیزبه‌که تۆمه‌تبارده‌که‌ن، هه‌رچه‌نده وته‌بێژه‌که‌یان ره‌تیده‌کاته‌وه، وه‌زاره‌تى ناوخۆى هه‌رێمیش له‌کێشه‌که‌یان ده‌کۆڵێته‌وه.
بزوتنه‌وه‌ى دیموکراتى تورکمان که باره‌گاى سه‌ره‌کى له‌شارى هه‌ولێره‌‌و مۆڵه‌تى حکومى هه‌یه، به‌هۆى کێشه ناوخۆییه‌کانیه‌وه روبه‌روى ئینشقاق ده‌بێته‌وه‌‌و سکرتێر‌و دوو ئه‌ندامى مه‌کته‌بى سیاسییان له‌مساڵدا ده‌ستله‌کارده‌کێشنه‌وه.
کێشه‌کانى ئه‌و حیزبه دواى کۆنگره‌ی سێیه‌میان چڕتربووه‌ته‌وه، که به‌وته‌ى به‌رپرسه ده‌ستله‌رکارکێشاوه‌کان له‌شوباتى ئه‌مساڵ‌و دوور له‌چاوى کامێراکان به‌رێوه‌چووه.
هه‌رچه‌نده سکرتێرى مه‌کته‌بى سیاسى پێش کۆنگره کشاوه‌ته‌وه، به‌ڵام دوو ئه‌ندامه‌که‌ى مه‌کته‌بى سیاسى دواى ئاشکرابوونى ئه‌نجامه‌کانى ئه‌و کۆنگره‌یه هه‌ڵوێستیان وه‌رگرتووه‌‌و ده‌ستیانله‌کارکێشاوه‌ته‌وه.
دواى ئه‌وه‌ى له کۆنگره ده‌نگى پێویست ناهێنن، هه‌ریه‌ک له نوره‌دین حه‌سه‌ن، به‌رپرسى پێشووى دارایى‌و ئه‌ندامى مه‌کته‌بى سیاسى بزوتنه‌وه‌که‌و ئازاد قاهوه‌چى، ئه‌ندامى مه‌کته‌بى سیاسى، ده‌ستله‌کارده‌کێشنه‌وه‌و به‌یاننامه ده‌رده‌که‌ن، هاوکات موئه‌ید ئیلخانلى، سکرتێرى ئه‌و حزبه به‌ر له کۆنگره ده‌ستیله‌کارکێشاوه‌ته‌وه.
نوره‌دین حه‌سه‌ن، ئه‌ندامى مه‌کته‌بی سیاسى ده‌ستله‌کارکێشاوه‌ى ئه‌و حیزبه، به‌هاوڵاتى وت «له‌کۆنگره‌دا که‌رخى ئالتى به‌رماخ سه‌رۆکى حیزب، لیستى خۆى ده‌رچوواندو وایکرد ئێمه ده‌نگنه‌هێنین».
هاوکات ئازاد قه‌هوه‌چى، ئه‌ندامى مه‌کته‌بى سیاسی بزوتنه‌وه‌ى دیموکراتى تورکمان، له‌باره‌ى هۆکارى ده‌ستله‌کارکێشانه‌وه‌ى ده‌ڵێت «ناعه‌داله‌تى له‌ده‌نگدانى کۆنگره‌دا هه‌بوو، سه‌رۆکى حیزب 100 که‌سى خۆى هێنابوو، له‌کۆى حه‌وت ئه‌ندامى مه‌کته‌بى سیاسیش که ده‌رچوون پێنجیان که‌سوکارى خۆیه‌تى».
هاوکات، موید ئیلخانلی سکرتێرى ده‌ستله‌کارکێشانه‌وه‌ى مه‌کته‌بى سیاسى ئه‌و حیزبه، بۆ هاوڵاتى رونکرده‌وه که به‌بێ کێشه‌یه‌ک وازى هێناوه‌‌و به‌شدارى کۆنگره‌شى نه‌کردووه.
به‌ڵام، گه‌یلان ئالتى به‌رماخ، به‌رپرسى راگه‌یاندنى مه‌کته‌بى سیاسى بزوتنه‌وه‌ى دیموکراتى تورکمان، ئاماژه‌ى به‌وه‌دا سکرتێر پێشتر وازى هێناوه‌‌و دوو به‌رپرسه‌که‌ى تریش به‌هۆى ده‌رنه‌چوونیانه‌وه بووه.
به‌رماخ ره‌تیکرده‌وه حزبه‌که‌یان بنه‌ماڵه‌یی بێت‌و ده‌ڵێت ئه‌وانه‌ى پۆستیان وه‌رگرتووه پێشتر خه‌باتیان کردووه.
به‌وته‌ى نوره‌دین حه‌سه‌ن که پێشتر به‌رپرسى دارایى حیزبه‌که‌ى بووه، تاوه‌کو کۆنگره نه‌یزانیووه مانگانه بودجه‌ى 50 ملیۆن دینار له‌حکومه‌تى هه‌رێم وه‌رده‌گرن، «چونکه ته‌نیا نزیکه‌ى 22 ملیۆنى پێدراوه بۆ خه‌رجکردن».
وتیشى «به‌ڵام ئاشکرابووه که له‌ماوه‌ى شه‌ش ساڵى رابردوودا، سه‌رۆکى حیزب مانگانه 33 ملیۆن دیناری بۆ خۆى بردووه که زیاتر له‌دووملیاردینار ده‌کات».
وته‌بێژى مه‌کته‌بى سیاسى حیزبه‌که‌ش، ده‌رپرسێت بۆچى به‌رپرسى پێشووى دارایى ئه‌و دۆخه‌ى قبوڵکردووه‌‌و واژۆى وه‌رگرتنى ئه‌و بریه پاره‌یه‌ى کردووه ئه‌گه‌ر تۆمه‌ته‌کان راستن.
ده‌باره‌ى کێشه‌کانى ئه‌و حیزبه، حاکم تاریق، به‌رێوه‌به‌رى گشتى دیوانى وه‌زاره‌تى ناوخۆى هه‌رێم، به‌هاوڵاتى وت «ئه‌ندامێکى مه‌کته‌بى سیاسیان به‌ته‌له‌فۆن وه‌زعیانى بۆ باسکردم‌و کاتێکمان دیاریکردووه بیانبینن، حه‌تمه‌ن به‌داواچوون ده‌که‌ین».
به‌پێویستیشى زانى له‌رێگه‌ى چاودێرى دارایى‌و پارێزگاى هه‌ولێره‌وه لیژنه‌یه‌ک بۆ به‌دواداچوونى کێشه داراییه‌کانیان پێکبهێنرێت.
عیسا عه‌بدولقه‌هار
hawlati
19/03/2013
ئه‌مڕۆ له هه‌ولێر، به ئاماده‌بوونی مه‌سعود بارزانی سه‌رۆكی هه‌رێمی كوردستان، كۆنگره‌ی یه‌كێتی زانكۆكانی عه‌ره‌ب ده‌ستی به‌كاره‌كانی كرد، له وته‌یه‌كیدا سه‌رۆكی هه‌رێم راگه‌یاند، ئێمه ده‌زانین زمانی چه‌ك هۆیه‌كه زاڵم و سته‌مكاران به‌كاری دێنن، هۆشداریش ده‌ده‌ینه هه‌موو دڵسۆزێك له‌به‌كارهێنانی چه‌ك ئه‌گه‌ر بۆ هێماش بێت، به‌ڵام هیچ گومانی تێدا نییه ئێمه سوورین به‌رگری له مافه ره‌واكانمان بكه‌ین
سه‌رۆكی هه‌رێم له‌وته‌یه‌كه‌یدا باسی له‌وه‌كرد كه دوای روخانی ده‌سه‌ڵاتی پێشو كورد هاوبه‌شی سه‌ره‌كی ئه‌و ده‌ستكاوتانه‌ی به‌ده‌ستهاتوون، بووه، سه‌ركردایه‌تی كوردیش به‌شداری له بنیاتنانی عێراقی نوێ كردوه، هه‌ر له داڕشتنی ده‌ستور و بڕیاردان له‌سه‌ری و چه‌سپاندنی بنه‌ماكانی هاوپه‌یمانی و هاوبه‌شی و سازانی نیشتمانی وه‌كو بناغه‌یه‌كبێت بۆ خه‌باتی جه‌ماوه‌ر، له بارودۆخی ئیستادا و له‌ژێر سایه‌ی نكوڵیكردن له به‌ڵێنه‌كان و هه‌وڵی لابردن و په‌راوێزخستنی كه‌سانی دیكه، هێشتا په‌نا بۆ عه‌قل و لۆژیك و ده‌ستور و سازان و داخوازیه‌كانی هاوبه‌شی راسته‌قینه ده‌به‌ین له‌پێناو رزگاركردنی وڵات، بێئه‌وه‌ی پرۆسه‌ی سیاسی و دیموكراتی بكه‌وێته مه‌ترسیه‌وه، رێگه‌ش بۆ گه‌یشتن به‌چاره‌سه‌ر، گفتوگۆیه، بێئه‌وه‌ی زیاده‌ڕۆیی بكرێته سه‌ر ده‌ستور و رێكه‌وتنه‌كان و هاوسه‌نگییه‌كان، ئه‌مه‌ش له چوارچێوه‌ی ره‌گداكوتانی داموده‌زگا دیموكراتیه‌كانی وڵات بۆ بیناكردنی ده‌وڵه‌تی فیدرال و جیاكردنه‌وه‌ی ده‌سه‌ڵاته‌كان و پارێزگاری لێكردنیان.
سه‌رۆك بارزانی وتی: ئێمه ده‌زانین زمانی چه‌ك هۆیه‌كه زاڵم و سته‌مكاران به‌كاری دێنن، هۆشداری ده‌ده‌ینه هه‌موو دڵسۆزێك له‌به‌كارهێنانی ئه‌گه‌ر بۆ هێماش بێت، به‌ڵام هیچ گومانی تێدا نییه سوورین به‌رگری له مافه ره‌واكانمان بكه‌ین، مێژوو باشترین شایه‌تحاڵه كه دیكتاتۆره یه‌ك له‌دوای یه‌كه‌كان به چه‌كه‌كانیانه‌وه نه‌یانتوانیه‌وه كار له ئیراده‌ی گه‌له‌كه‌مان بكه‌ن، له‌وانه‌یه هه‌ندێكتان سه‌ردانی هه‌ڵه‌بجه بكه‌ن له‌وێ تاوانكاریه‌كی ئاشكرا دژی مرۆڤایه‌تی به‌دیده‌كرێت به‌ڵام له‌هه‌مانكانتدا ئاماژه‌یه‌كه بۆ قاره‌مانیه‌تی گه‌له‌كه‌مان.
ئاماژه‌ی به‌وه‌دا: ده‌مه‌وێ ئاماژه به‌وه بده‌م كه مانگی ئازار مانگی قه‌ده‌ری كورده، له‌و مانگه‌دا هه‌موو كاره‌سات و سه‌ركه‌وتنه‌كانمان روویداوه، به‌رله دوو هه‌زار و 700 ساڵ خه‌ڵكی كوردستان دژی سته‌مكاران راپه‌ڕین و به‌سه‌ریدا سه‌ركه‌وتن، له‌و كاته‌وه ئێمه وه‌كو كورد و كوردستانی به‌زه‌ییمان به ستمه‌كاراندا نه‌یه‌ته‌وه.
سه‌رۆكی بارزانی وتیشی: ئێمه باوه‌ڕ به‌هێزی زانست و زانیاری و لێبورده‌یی و یه‌كترقه‌بولكردن ده‌كه‌ین هه‌ر له سه‌ر ئه‌و باوه‌ڕه‌وه كارله‌سه‌ر پیشخستنی گه‌له‌كه‌مان ده‌كه‌ین.
حه‌مید زێباری / س . س
pna
20/03/2013
رێبه‌ری باڵای شۆڕشی كۆماری ئیسلامیی ئێران، ره‌زامه‌ندیی نواندووه له‌سه‌ر لێبوردن و سوككردنه‌وه‌ی سزای زیاتر له هه‌زار زیندانیی، به‌بۆنه‌ی جه‌ژنی نه‌ورۆزه‌وه.
ئه‌مڕۆ(دووشه‌ممه 18ی ئازار) ئاژانسی هه‌واڵی كۆماری ئیسلامیی"ئێرنا" بڵاویكردووه‌ته‌وه، عه‌لی خامه‌نه‌یی، رێبه‌ری باڵای شۆڕشی كۆماری ئیسلامیی ئێران، ره‌زامه‌ندنی نواندووه له‌سه‌ر جێبه‌جێكردنی ئازاد كردن و سوككردنه‌وه‌ی سزای 1059 زیندانیی، زۆربه‌ی ئه‌و زیندانییانه‌ش هاوڵاتیی سڤیلن‌و له‌لایه‌ن دادگا گشتییه‌كانی سه‌ربازی و شۆڕش و دامه‌زراوه دادوه‌رییه‌كانه‌وه ره‌زامه‌ندیی ئازادكردنیان ده‌ركراوه.
به‌پێی ئاژانسه‌كه، ره‌زامه‌ندیی نواندنی خامنه‌یی له كاتێكدا بووه، سادق ئه‌ملی لاریجانی، سه‌رۆكی ده‌سه‌ڵاتی دادوه‌ریی ئێران، نامه‌یه‌كی ئاراسته كردووه‌‌و تێیدا داوای ئه‌وه‌ی لێكردووه به‌بۆنه‌ی هاتنی جه‌ژنی نه‌ورۆز و ساڵیادی دامه‌زراندنی كۆماری ئیسلامیی ئێرانه‌وه، لێبوردن‌و سوككردنه‌وه‌ی سزای ئه‌و ژماره زیندانییه ده‌ربكات.
به پێی هه‌واڵی ئاژانسه‌كه، بڕیاری لێبوردن و سوككردنه‌وه‌ی سزای ئه‌و زیندانیانه پاش لێكۆڵینه‌وه‌یه‌ك له لایه‌ن لیژنه‌ی لێبوردنه‌وه ده‌ركراوه.
xendan
سەلاحەدین دەمیرتاش هاوسەرۆكی بەدەپە رایگەیاند لەدیدارەكەی ئەمرۆیاندا لەگەڵیدا، ئۆجەلان وتی “كار لەسەر دەقێكی چارەسەری دەكەم كە لە ڕۆژی 21 ئاداردا بخوێنرێتەوە و بانگەوازییەكی گرنگ رادەگەیەنم”.
لە چوارچیوەی پرۆسەی دیدارەكانی بەدەپە لە ئیمرالی و دانوسان لەگەڵ عەبدوڵا ئۆجالان، ئەمرۆ شاندی سێیەمین ڕوویان لە ئیمرالی كرد و دیداریان لەگەڵ ئۆجالان ئەنجامدا.
هاوسەرۆكی گشتی بەدەپە سەلاحەدین دەمیرتاش، پەرلەمانتارانی بەدەپە پەروین بولدان و سرری سورەیا ئۆندەر لە نێو شاندەكەدا بوون. دوای دیدارەكە هاسەرۆكی بەدەپە سەلاحەدین دەمیرتاش لێدوانێكیدا رایگەیاند لەسەر دیداركەیان لەگەڵ ئۆجالان دەكرێ ئەم زانیاریانە بڵاوبكەنەوە، لە زاری ئۆجالانەوە وتی “پرۆسەی چارەسەری بە شێوەیەكی ئەرێنی بەردەوامە، ئامانجمان خزمەت كردنی دیموكراتیزەكردنی توركیایە، هەموو هەوڵەكانمان بۆ ئەوەیە بۆ ئەوەی خزمەت بەوە بكات كار لەسەر دەقێكی چارەسەری دەكەم كە لە ڕۆژی 21 ئاداردا بخوێنرێتەوە و بانگەوازییەكی گرنگ رادەگەیەنم”.
ئۆجالان لەسەر مەسەلەی كشانەوەش وتی “لە پەیامەكەمدا بۆ نەورۆز دەربارەی لایەنی سەربازی و سیاسیدا چارەسەری تێدایە، دەمەوێ پرسی چەكیش بێ ئەوەی كە خوێنی تەنانەت یەك كەسیش برژێ چارەسەر بكەن”. ئۆجالان لە كۆتاییدا وتویەتی “كاتێ پرۆسەكە بەرەو پێشەوە بچێ رای گشتی ئاگادار دەكاتەوە”.
ئەو لێدوان‌و سەردانەی بەدەپە بۆ ئیمرالی لەكاتێكدایە كە رای گشتی چاوەڕوانی پرۆژەی چارەسەری ئۆجەلانن كە بڕیارە لەنەورۆزی ئەمساڵ رای بگەیەنێت.
ئۆجەلان لە دوو دیداری ڕابردووی دا لەگەڵ شاندی یەكەم و دووەم دا رایگەیاندبوو كە لەنەورۆزی 2013 پرۆژەی چارەسەری خۆی ئاشكرا دەكات.
hawlati
19/03/2013
كۆمه‌ڵه‌ی قوربانیانی چه‌كی كیمیاوی سه‌رده‌شتی رۆژهه‌ڵاتی كوردستان داوا له حكوومه‌تی هه‌رێمی كوردستان ده‌كه‌ن، پاڵپشتی كۆمه‌ڵه‌كه‌یان بكات تاوه‌كوو دادگای باڵای تاوانه‌كانی عێراق كه‌یسی قوربانیانی كیمیابارانكردنی شارۆچكه‌ی سه‌رده‌شت وه‌ربگرێت.
سه‌رۆك و ئه‌ندامانی كۆمه‌ڵه‌ی به‌ركه‌وتووانی كیمیابارانی سه‌رده‌شت به مه‌به‌ستی به‌شداریكردن له 25 ساڵه‌ی یادی كیمیابارانكردنی هه‌ڵه‌بجه له هه‌رێمی كوردستانن، ئه‌مڕۆ دووشه‌ممه چاویانكه‌وت به جێگری سه‌رۆكی ئه‌نجوومه‌نی وه‌زیرانی هه‌رێم، عیماد ئه‌حمه‌د.
به‌پێی راگه‌یه‌ندراوی حكوومه‌تی هه‌رێم كه كۆپیه‌كی بۆ ئاژانسی هه‌واڵی په‌یامنێر نیردراوه، كۆمه‌ڵه‌ی به‌ركه‌وتووانی كیمیابارانی سه‌رده‌شت ئاماژه‌یانداوه به‌وه‌ی له سه‌ر ئاستی ناوخۆیی ئێران و ده‌ره‌وه‌یدا كاری زۆریان كردوه تا تاوانی كیمیابارانكردنی هاوڵاتیانی كوردی مه‌ده‌نی سه‌رده‌شت وه‌ك تاوانی جینۆساید بناسرێندرێت و ئه‌نجامده‌رانیشی روبه‌رووی سزا بكرێنه‌وه.
له‌گه‌ڵ ئه‌وه‌شدا داوایان كرد كه حكوومه‌تی هه‌رێمی كوردستان پشتیوانیان بكات تاوه‌كو دادگای باڵای تاوانه‌كانی عێراق كه‌یسی قوربانی و به‌ركه‌وتووانی كیمیابارانی سه‌رده‌شت وه‌ربگرێت.
به‌پێی وته‌ی كۆمه‌ڵه‌ی به‌ركه‌وتووانی كیمیابارانی سه‌رده‌شت، له سه‌ر ئاستی ناوخۆیی ئێران و له‌گه‌ڵ دادگای باڵای تاوانه‌كانی عێراقیش كاریان كردووه تاوه‌كوو كه‌یسه‌كه‌یان وه‌ربگیرێت، به‌ڵام تا ئێستا هیچ وه‌ڵامێكی ئه‌وتۆیان به ده‌ست نه‌گه‌یشتۆته‌وه.
شاری سه‌رده‌شت ده‌كه‌وێته رۆژهه‌ڵاتی كوردستان و نزیك سنووری هه‌رێمی كوردستان، له هێرشێكی ئاسمانی فڕۆكه شه‌ركه‌ره‌كانی عێراق له 1987 دا كه‌وته به‌ر بۆردومانی كیمیاوی.
pna
كۆبوونه‌وه‌ی سه‌رۆكی هه‌رێم و وه‌زیرو په‌رله‌مانتاره كورده‌كانی به‌غدا كۆتاییپێهات و دوا بڕیاری كۆبوونه‌وه‌كه‌ش بریتتیه له‌وه‌ی تا مانگی نیسانی ئه‌مساڵ وه‌زیر و په‌رله‌مانتاره كورده‌كان نه‌چنه‌وه بۆ به‌غدا.
به‌كر حه‌مه‌سدیق، سه‌رۆكی فراكسیۆنی یه‌كگرتوو له ئه‌نجومه‌نی نوێنه‌ران، به وه‌كاله‌ت به (خه‌ندان)ی راگه‌یاند: كۆبوونه‌وه‌كه‌ی ئه‌مڕۆ دووشه‌ممه (18ی ئازاری 2013) هه‌ر درێژكراوه‌ی كۆبوونه‌وه‌كه‌ی رابردو‌و بوو، به‌ڵام بڕیاردرا بایكۆتكردنی دانیشتنه‌كانی ئه‌نجومه‌نی وه‌زیره‌كان له‌لایه‌ن وه‌زیره كورده‌كانه‌وه بۆ مانگی نیسانی ئه‌مساڵ درێژبكرێته‌وه.
وتیشی: "په‌رله‌مانتاره كورده‌كانیش تا مانگی نیسان به‌شداریی دانیشتنه‌كانی ئه‌نجومه‌نی نوێنه‌ران ناكه‌نه‌وه‌و له هه‌رێمی كوردستان ده‌مێننه‌وه".
دوای ئه‌وه‌ی ئه‌نجومه‌نی نوێنه‌رانی عیراق به زۆرینه‌ی ده‌نگ و به‌بێ ئاماده‌بوونی لایه‌نی كوردی بودجه‌ی 2013ی عیراقی په‌سه‌ند كرد، سه‌رجه‌م په‌رله‌مانتار و وه‌زیره كورده‌كان گه‌ڕانه‌وه بۆ هه‌رێمی كوردستان و بڕیاریاندا نه‌چنه‌وه بۆ به‌غدا تا له لایه‌ن سه‌ركردایه‌تی سیاسی كورده‌وه بڕیارێك ده‌درێت.
به‌كر حه‌مه سدیق وتیشی: "كۆبوونه‌وه‌و راوێژكردن له‌نێوان لایه‌نه‌كاندا به‌رده‌وامیی ده‌بێت تا ئه‌و كاته‌ی ده‌گه‌نه هه‌ڵوێستێكی یه‌كگرتوو له‌سه‌ر مانه‌وه یان كشانه‌وه‌ی كورد له به‌غدا".
خه‌ندان ـ هه‌ستیار
18/03/2013
سێیه‌مین شاندی پارتی ئاشتی و دیموكراتی (به‌ده‌په) به مه‌به‌ستی دیدار و گفتوگۆ له‌گه‌ڵ عه‌بدوڵا ئۆجه‌لان، به‌ره‌و گرتووخانه‌ی ئیمراڵی به‌ڕێكه‌وتن و چاوه‌ڕوان ده‌كرێت له میانه‌ی دیداره‌كه‌دا، ئۆجه‌لان دوا هه‌ڵوێستی خۆی له باره‌ی پرسی ئاشتی یان درێژه‌دان به شه‌ڕ را بگه‌یه‌نێت.
به‌پێی سه‌رچاوه‌كانی هه‌واڵ، ئه‌مڕۆ دووشه‌ممه، سێیه‌مین شاندی به‌ده‌په كه پێكهاتووه له هه‌ر یه‌ك له هاوسه‌رۆكی به‌ده‌په، سه‌لاحه‌دین ده‌میرتاش و په‌رله‌مانتارانی به‌ده‌په، په‌روین بۆڵدان و سری سوریا ئۆنده‌ر بۆ دیدار له‌گه‌ڵ عه‌بدوڵا ئۆجه‌لان به‌ره‌و ئیمراڵی به‌ڕێكه‌وتوون.
پێشووتر دوو شاندی دیكه له پارتی ئاشتی و دیموكراتی و كۆنگره‌ی جڤاكی دیموكراتیك دیدار و گفتوگۆیان له‌گه‌ڵ عه‌بدوڵا ئۆجه‌لان سازكردوه، دیدار و گفتوگۆكانی نێوان شانده‌كانی به‌ده‌په و ئۆجه‌لان دوای ئاراسته كردنی سێ نامه‌كه‌ی ئۆجه‌لان دێت بۆ هه‌ر یه‌ك له سه‌ركردایه‌تی پارتی كرێكارانی كوردستان (په‌كه‌كه) له ئه‌وروپا، پارتی ئاشتی و دیموكراتی و سه‌ركردایه‌تی یه‌كه‌كه له قه‌ندیل، به مه‌به‌ستی دۆزینه‌وه‌ی رێگه‌چاره‌یه‌ك له باره‌ی كۆتایی هێنان به‌شه‌ڕ له نێوان په‌كه‌كه و حكوومه‌تی توركیا و به‌ده‌ستهێنانی مافی گه‌لی كورد له باكووری كوردستان.
سه‌ردانی ئه‌مرۆی شاندی به‌ده‌په بۆ ئیمرالی په‌یوه‌سته به گه‌یاندنی وه‌ڵامدانه‌وه‌ی هه‌ر سێ نامه‌كه به عه‌بدوڵا ئۆجه‌لان و گفتوگۆ له باره‌ی ناوه‌ڕۆكی وه‌ڵامه‌كان و تاوتوێكردنی دوا قۆناغی چۆنیه‌تی چاره‌سه‌ركردنی پرسی كورد له توركیادا.
به‌پێی وته‌ی چاودێرانی سیاسی چاوه‌ڕوان ده‌كرێت له دیدار و گفتوگۆكانی ئه‌مڕۆی نێوان عه‌بدوڵا ئۆجه‌لان و شاندی به‌ده‌په، ئۆجه‌لان دوا هه‌ڵوێستی خۆی له باره‌ی پرۆسه‌ی ئاشتی نێوان حكوومه‌تی توركیا و كورده‌كانی باكوور را بگه‌یه‌نێت.
peyamner
18/03/2013
له شارەکانی ئادانا، مەرسین، ئیستانبووڵ، وان، ئیزمیر، عەنتەپ، وێرانشار، ئەسکەندەرون، ئانتالیا، مانیسا، موغڵا و دەیان شاری تری باکووری کوردستان و تورکیا، ئاگری نەورۆز داگیرسا و بە سەدان هەزار کورد بە هەڵپەڕکێ و بەدەم گوتنەوەی دروشم و بەرزکردنەوەی لافیتە و دانی پەیامی سیاسی، نەورۆزیان پیرۆز کرد.
ئەمڕۆ یەکشەممە، [١٧ی مارس، ٢٧ی رەشەممە] ئاگری نەورۆزی پێشوەخت، هاوکات لە چەندین شار و شارۆچکەی باکووری کوردستان و تورکیا داگیرسا.
رێووڕەسمی نەورۆزی شارەکانی وان و ئیستانبووڵ و ئیزمیز، به تایبەت بە هۆی لە رۆژەڤدابوونی وتووێژی دوو لایەنی کورد و تورک، سەرنجی زیاتری مێدیاکانی بە لای خۆی راکێشا.
زۆربەی رێووڕەسمەکان، لە رێگەی چەند کاناڵی تێلێڤیزیۆنی خۆجێیی کوردی و کەناڵی ئای ئێم سی بە شێوەی راستەوخۆ بڵاودەکرانەوە. کاناڵی گەلی کوردستان، نووچە تیڤی، ستێرک و نەورۆزیش، لە رێگەی کاناڵەکانی ناوخۆوە، دیمەنی بەشێک لە رێووڕەسمەکانیان، بە شێوەی زیندوو بڵاوکردەوە.
لە شاری وان، دەیان هەزار کورد لە داوێنی قەڵای مێژووی شارەکە کۆبوونەوە و وێڕای هەڵپەڕکێ و گوێگرتن لە هونەرمەندانی ناسراوی کورد وەک "جوان حاجۆ" و "ئاینوور دۆغان"، لە ژێر باران، نەورۆزیان گرت.
"ئایسەل توغڵوک"، پارلەمانتارانی بەدەپە و هاوسەرۆکی کۆنگرەی جڤاکی دێمۆکراتیک لە لێدوانێکدا بۆ بەشدارانی نەورۆزی وان، کۆمەڵکوژی گەنجانی کورد لە رۆبۆسکی و ئۆپێراسیۆنە سەربازییەکانی ئەرتەشی تورکیای وەبیرهێنایەوە و هیوای خواست کە هەرچی زووتر، گفتگۆیی راستەقینە بۆ چارەسەری کێشەی کورد دەستپێبکا. ناوبراو وتیشی کە "بەرێز ئۆجالان، لە نەورۆزی ئامەد، پەیامێکی گرینگ دەدات و هەنگاوێکی مەزن داوێژێ".
"سەلاحەدین دەمیرتاش"، هاوسەرۆکی پارتی ئاشتی و دێمۆکراسیش کە بەشداری نەورۆزی ئیستانبووڵ بوو، لە لێدوانەکانیدا، رەخنەی توندی لەو حیزب و لایەنانە گرت کە دەیانهەوێ ئاستەنگ بۆ قۆناخی ئاشتی دروست بکەن.
ناوبراو لە وەڵامی "دەوڵەت باخچەلی"، سەرۆکی "پارتی بزاڤی نەتەوەپەرست"ی تورکیا کە وتبووی "ئەگەر بەدەستی من بێ، ئیمراڵی دەڕووخێنم و قەندیل تەخت دەکەم" وتی: "بۆ چما تۆ سیاسەتمەداری یا شۆفیر بۆڵدزرێر؟"! دەمیرتاش وتی کە "خۆهەڵموساندن و خۆبادان لە ئانکارا هاسانە"، ئەوانەی کە پێداگری لە سەر درێژەی سیاسەتی شەڕ و نکۆڵیکردن لە کورد و مافەکانی دەکەن، با "ژێ سێ لەشان بکەن و شەوێک لە داوێنی چیای گابار، نیگابانی بدەن" ئەو کات بێن و ئەو قسانە بکەن.
به گوتەی دەمیرتاش "مناڵانی کورد و تورک چیتر نایانەوێ بمرن، بکوژن و بکوژرێن". ناوبراو وتیشی کە "درانی مافی کوردان بەو مانایە نییە کە ماف، لە گیرفانی کەسێک دەردەهێندرێ و بدرێتە کوردان، بە پێچەوانەوە ئەوە مافی زەوتکراوی خۆی کوردانە کە دەبێ رادەستیان بکرێتەوە".
هاوسەرۆکی بەدەپە وتی کە "ئاشتی تەسلیمبوون نییە بەڵکوو گەیشتن بە مافەکانە و هەر بۆیەش ئەمە سەبر و خەبات و کارکردنێکی زۆری دەوێ" و وتیشی که بەدەپە نەک بڵەی بە گوتاری ئاکەپە کەوتبێتە جۆش بەڵکوو، وەک هەمیشە، به پێداگرییەوە باس لە دیالۆگ و ئاشتەوایی دەکات و پشتبەستوو به رێکخستن و بوێریی گەلی خۆی" درێژە بە خەباتی دەدات.
دەمیرتاش وەبیری هێنایەوە کە کورد، سەت ساڵە لە ئاناتۆلی و مێزۆپۆتامیا بۆ دەستبەرکردنی مافەکانی خەبات دەکا و لەوەش گرینگتر، بەرخۆدانی کوردان لۆکۆمۆتیڤی دێمۆکراتیزاسیۆنی تورکیا بووە و گەنجان و خەباتکارانی کورد بەردەوام لە ریزی پێشەوە بوونە و گەلی کورد پاش ٢٩ شۆڕش و دانی سەدان هەزار قوربانی، ئێستا داوای مافە زەوتکراوەکانی دەکات".
ناوبراو سەرنجی بۆ بارودۆخی رۆژئاوای کوردستانیش راکێشا و وتی کە "کورد لەو پارچە، هێدی هێدی بە رێکخستنی گەل، داهاتووی خۆیان دەهۆننەوە".
دەمیرتاش هیوای خواست کە گیراوانی سیاسی کورد، کە وەک "بارمتە"ی دەستی دەوڵەت پێناسەی کردن، بە زوویی ئازاد بکرێن و پێکەوە لە مەیدانی سیاسیدا خەباتەکەیان بەرەوپێش ببەن.
نەورۆزی کوردان لە شاری ئیزمیر، لە رۆژئاوای تورکیاش، بە بەشداری دەیان هەزار کەس بەڕێوەچوو. لە رۆژانی رابردوودا، چەند رێکخراوی توندڕۆی تورک، هەڕەشەیان کردبوو کە نەورۆزی کوردان لەم شارە دەشێوێنن بەڵام دەگووترێ کە رێووشوێنی توندی ئاسایشی پۆلیس، رێی بەو کارە گرتووە.
"ستاتوو بۆ کوردستان، ئازادی بۆ ئۆجالان"، دروشمی سەرەکی رێووڕەسمەکانی نەورۆزی ئەوساڵی باکووری کوردستان و تورکیا بوو. هاوڵاتیان لە سەرجەم رێووڕەسمەکاندا، به پشتیوانی لە پارتی کرێکارانی کوردستان، "عەبدوڵا ئۆجالان" و بەدەپە، دروشمیان دا و پشتیوانی خۆیان بۆ چارەسەری ئاشتیانەی کێشەی کورد دووپات کردەوە.
بڕیارە، وەک هەموو ساڵێ، مەزنترین رێووڕەسمی نەورۆز، لە رۆژی ٢١ی مارس، لە شاری ئامەد بەرێوەبچێ و تێیدا، "عەبدوڵا ئۆجالان"، پەیامێکی گرینگ بدات کە دەگووترێ نەخشەڕێی کوردانی باکوور بۆ درێژەی قۆناخی چارەسەری لەخۆ دەگرێ.
17/03/2013
ئه‌و گه‌نجانه‌ی له‌گه‌ڵ عیماد ئه‌حمه‌د كۆبونه‌وه‌ته‌وه، رایده‌گه‌یه‌نن كه له‌كۆبوونه‌وه‌كه‌دا جێگری سه‌رۆكی حكومه‌ت به‌ڵێنی ئه‌وه‌ی پێداون تا یه‌ك ساڵی تر نه‌خایه‌نێت هه‌ڵه‌بجه بكرێت پارێزگا.
له‌چوارچێوه‌ی یادكردنه‌وه‌ی كاره‌ساتی هه‌ڵه‌بجه، ژماره‌یه‌ك له‌گه‌نجانی ئه‌و شاره له‌گه‌ڵ عیماد ئه‌حمه‌د جێگری سه‌رۆكی حكمه‌تی هه‌رێم كۆبوونه‌وه‌و چه‌ند داواكاریه‌كیان پێشكه‌شكرد.
ره‌نجده‌ر شێخ خالید یه‌كێك له‌ئه‌ندامی گروپی گه‌نجانی هه‌ڵه‌بجه كه له‌كۆبوونه‌وه‌كه‌دا به‌شداربووه، به‌سایتی هاوڵاتی وت “له‌و كۆبوونه‌وه‌یه‌دا عیماد ئه‌حمه‌د به‌ڵینی پێداین تا ساڵێكی ترو له‌یادی هه‌ڵه‌بجه‌دائه‌و قه‌زایه كرابێته پارێزگا”.
ناوبراو ئاماژه‌ی به‌وه‌شدا كه جێگری سه‌رۆكی حكومه‌ت داوایكردوه به‌هاوكاری قائیمقامیه‌ت‌و نوێنه‌ری فه‌رمانگه حكومیه‌كانی شاره‌كه‌و نوێنه‌رانی هاوڵاتیان لیژنه‌یه‌ك دروستبكرێت‌و به‌زوترین كات سه‌ردانی ئه‌نجومه‌نی وه‌زیران بكه‌ن، بۆ به‌دواداچوونی زیاتری ئه‌و داواكارییه.
له‌میانه‌ی وتارێكیدا به‌بۆنه‌ی ساڵیادی كیمیابارانكردنی ئه‌و شاره‌وه، نیچیرڤان بارزانی سه‌رۆكی حكومه‌تی هه‌رێم سه‌باره‌ت به مه‌سه‌له‌ی به‌پارێزگاكردنی هه‌ڵه‌بجه وتی “ئه‌وه مه‌سه‌له‌یه‌كی یاساییه، به‌ڵام هه‌وڵده‌ده‌ین كار له‌سه‌ر ئه‌و داواكارییه بكه‌ین‌و پاش چاره‌سه‌ری ئه‌و مه‌سه‌له یاساییه هه‌ڵه‌بجه بكه‌ینه پارێزگا”.
جیهاد جه‌لال hawlati
به ئاماده‌بوونی ژماره‌یه‌کی به‌رچاو له میوانانی ده‌ره‌وه و ناوخۆیی و زیاتر له 400کونسوڵ و نوێنه‌ری وڵاتانی جیهان، رێوڕه‌سمی یادی 25ساڵه‌ی کیمیابارنکردنی هه‌ڵه‌بجه به‌ڕێوه‌چوو.
له رێوڕه‌سمه‌که‌دا "گۆران ئه‌دهه‌م" قایمقامی هه‌ڵه‌بجه گوته‌ی به‌خێرهێنانی پێشکه‌ش کرد و تیشکی خسته‌ر سه‌ر ئه‌و تاوانه‌ی ده‌رهه‌ق به خه‌ڵکی شاره‌که کرا و داوای کرد حکومه‌تی عێراق سه‌رجه‌م زیانلێکه‌وتووانی کاره‌ساته‌که قه‌ره‌بوو بکاته‌وه.
دواتر "نێچیرڤان بارزانی" سه‌رۆکی حکومه‌تی هه‌رێمی کوردستان له گوته‌یه‌کدا رایگەیاند: ئه‌رکی ئێمه‌یه هه‌ڵه‌بجه بکه‌ینه‌وه به مه‌ڵبه‌ندێکی رۆشنبیری و زانستی و ده‌مانه‌وێ هه‌ڵه‌بجه به‌باشترین شێوه ئاوه‌دان بکه‌ینه‌وه. هه‌موو قوربانیه‌کی هه‌ڵه‌بجه ده‌بێته خاوه‌نی خانووی خۆی.
سه‌رۆکی حکومه‌تی هه‌رێمی کوردستان راشیگه‌یاند که هه‌ڵه‌بجه ده‌که‌ینه پارێزگا و ته‌نها رێکاره یاساییه‌کان ماوه.
هه‌ر له‌و رێوڕه‌سمه‌که‌دا "ئارام ئه‌حمه‌د" وه‌زیری کاروباری شه‌هید و ئه‌نفالکراوانی هه‌رێمی کوردستان گوته‌یه‌کی پێشکه‌شکرد و تێیدا تیشکی خسته‌سه‌ر گه‌وره‌یی تاوانی کیمیابارانی شاری هه‌ڵه‌بجه و به‌رنامه‌ی یادی 25ساڵه‌ی کیمیابارانی هه‌ڵه‌بجه که چه‌ندین دروشم و په‌یامی له‌خۆ گرتبوو وه‌ک له فرمێسکه‌وه بۆ هیوا و یادی شه‌هیدان بکرێته پرسێکی نیشتیمانی و یاده‌کان هیوا به‌خش بن.
دواتر وتاری "محه‌مه‌د شه‌یاع سودانی" وه‌زیری مافی مرۆڤی عێراق پێشکه‌ش کرا و ئاماژه‌ی به‌وه‌کرد: ئێستا له شوێنێک وه‌ستاوین که گه‌وره‌ترین تاوانی ده‌رهه‌ق ئه‌نجامدراوه که کۆمه‌ڵگەی نێوده‌وڵه‌تی بێده‌نگیی له به‌رامبه‌ر هه‌ڵبژارد. هاوکات سودانی ئه‌وه‌شی گوت: چ ویژدانێک ئه‌وه قبووڵ ده‌کات پێنج هه‌زار که‌س له چه‌ند خوله‌کێک بکوژرێت که پێشێلکاریی مافه‌کانی مرۆڤ و یاسا نێودوڵه‌تیه‌کانه.
وتاری نوێنه‌ری دۆستانی کوردیش له‌لایه‌ن "بێرنارد کۆشنه‌ر" دۆستی گه‌لی کورد پێشکه‌شکرا و گوتی: به‌ڵێنتان پێ ده‌ده‌م، به‌ڵێنێکی گه‌وره، که هه‌روه‌ک په‌رله‌مانه‌کانی دیکه‌ی ئه‌وروپا هانی فه‌ره‌نسیه‌کان بده‌م که هه‌مان کاری ئه‌وان بکه‌ن بۆ به‌ڕه‌سمی ناساندنی جینۆسایدی گه‌لی کوردستان له فه‌ره‌نسا.
له ته‌وه‌رێکی دیکه‌ی وتاره‌که‌دا بێرنارد کۆشنه‌ر گوتی: هه‌ڵه‌بجه بووه به ره‌مزی به‌رگری کردن له ئاشتی له سه‌رتاسه‌ری جیهان.
دواتریش ژماره‌یه‌ک وتار له‌لایه‌ن ئاماده‌بووانی رێوڕه‌سمه‌که پێشکه‌شکران .
نێچیرڤان بارزانی له درێژەی وتەکەیدا ئاماژەی دا: هه‌ڵه‌بجه بۆته ناونیشانی هه‌ره دیار بۆ زوڵمێکی که‌م‌وێنه به‌رامبه به کورد، که به‌داخه‌وه ئه‌و کات جیهانی ئیسلامی و رۆژئاوا له‌وپه‌ڕی بێده‌نگی دابوون. ئه‌مرۆ لێره‌دا که یادی شه‌هیدانی هه‌ڵَه‌بجه ده‌که‌ینه‌وه چاومان له‌وه‌یه کۆمه‌ڵگەی نێوده‌وڵه‌تی چاو له هه‌ڵَه‌بجه بنواڕێ و بیکاته هۆکاری قه‌ده‌غه کردنی چه‌کی کۆمه‌ڵکوژی.
سەرۆکی حکومەت گوتی: "دوو هه‌فته له‌مه‌وبه‌ر 82پرۆژه‌مان به بڕی 183ملیار دینار و پرۆژه‌یه‌کی گه‌وره‌ی ئاومان به‌بری 193میلۆن دۆلار له‌م ناوچه‌یه ده‌ست پێکرد و ئه‌وه ده‌بێته هۆی پێشکه‌وتنی زیاتری هه‌ڵَه‌بجه و شاره‌زوور و هه‌ورامان.
راشیگەیاند: "به‌و پرۆژه‌ی یه‌که‌ی نیشته‌جێبوونانه‌ی بڕیار دراوه به دروست کردنی، خۆشبه‌ختانه ته‌واوی که‌س و کاری شه‌هیدانی هه‌ڵه‌بجه ده‌بنه خاوه‌نی یه‌که‌ی نیشته‌جێبوون.
نێچیرڤان بارزانی روونیشی کردەوه: "ئێمه پرسیارمان ئه‌وه‌یه بۆچی ئه‌م تاوانانه به جینۆساید ناناسێنن؟ ده‌بوایه کورد چی تری لێبکرایه؟ چی له کیمیاباران سه‌ختتره؟ ئه‌گه‌ر ئه‌وکاته‌ی هه‌ڵه‌بجه کیمیاباران کرا کۆمه‌ڵگه‌ی نێوده‌وڵه‌تی هه‌ڵوێستی هه‌بوایه ئه‌نفال و تاوانه‌کانی دیکه‌ی به‌رامبه‌ر کورد درێژه‌یان نه‌ده‌بوو، بۆیه ئه‌رکی ئه‌خلاقیی نه‌ته‌وه یه‌کگرتووه‌کان و کۆمه‌ڵگه‌ی نێوده‌وڵه‌تییه ئه‌و تاوانانه به‌جینۆساید بناسێنێت."
هه‌ر له درێژه‌ی وتاره‌که‌یدا سه‌رۆکی حکومه‌تی هه‌رێم رایگه‌یاند: "ئه‌رکی ئێمه‌یه هه‌ڵه‌بجه بگێڕینه‌وه بۆ پێگه‌ی مێژوویی خۆی و خزمه‌تگوزاریی زیاتری بۆ به‌ئه‌نجام بگه‌یه‌نین. زۆر به وردی له‌سه‌ر داواکانی خه‌ڵکی هه‌ڵه‌بجه ده‌وه‌ستین و ده‌مانه‌وێت ده‌سه‌ڵاتی ئیداریی زیاتر بده‌ین به ناوچه‌که."
هه‌ر له وتاره‌که‌یدا نێچیرڤان بارزانی به‌ڵێنی هه‌وڵدان بۆ پارێزگاکردنی هه‌ڵه‌بجه‌ی دا و رایگه‌یاند: "بەڵێن ده‌ده‌ین هه‌ڵه‌بجه بکه‌ینه پارێزگا و له‌گه‌ڵ جێگری سه‌رۆکی حکومه‌ت قسه‌مان له‌سه‌ر کردووه، ته‌نها له‌سه‌ر رێکاره یاساییه‌کان وه‌ستاوه."
سه‌رۆکی حکومه‌تی هه‌رێمی کوردستان له وتاره‌که‌یدا باسی له کێشه‌کانی نێوان هه‌ولێر و به‌غدا کرد و ئاماژه‌ی به‌وه‌کرد: لێره‌وه ئاماده‌ین بۆ گفتۆگه‌یه‌کی جدی بۆ کۆتاییهێنان به کێشه‌کانی وڵات و مێژووی عێراقیش ده‌ریخستووه، گوێ نه‌گرتن و فه‌رامۆش کردن یه‌ک ئه‌نجامی هه‌یه، ئه‌ویش بریتیه له ماڵوێرانی و رووخانی حکومه‌ته‌کان، هه‌روه‌ک به‌بیری خۆشمانی ده‌هێنینه‌وه، که ئه‌وه‌ی ئه‌مڕۆ له‌ناوماندا نییه، جه‌نابی سه‌رۆک کۆماره که هه‌میشه به ده‌ستپێشخه‌ریی خۆی هه‌موو لایه‌نه‌کانی کۆکردۆته‌وه، هیوادارین به‌زوویی بگه‌ڕێته‌وه بۆ ناومان.
نێچیرڤان بارزانی له‌باره‌ی پرسی به‌پارێزگا بوونی هه‌ڵه‌بجه‌ی شه‌هید، گوتی: وه‌ک حکومه‌تی هه‌رێمی کوردستان هه‌موو لایه‌ک له‌وه دڵنیا ده‌که‌ینه‌وه که دوای چاره‌سه‌رکردنی کێشه یاساییه‌کانی ئه‌و بواره، حکومه‌تی هه‌رێم زۆر به‌جدی ئه‌و بابه‌ته ده‌خاته بواری جێبه‌جێکردنه‌وه و هه‌ڵه‌بجه‌ش ده‌کرێته پارێزگا.
نه‌به‌ز محه‌ممه‌د/X.A
pna
قایمقامی قه‌زای هه‌ڵه‌بجه رایده‌گه‌یه‌نێت، سبه‌ینێ شه‌ممه 16ی ئازار، ساڵیادی كیمیابارنكردنی شاری هه‌ڵه‌بجه به به‌شداری 400 نوێنه‌ری ده‌ره‌وه‌‌و به رێوره‌سمی كه‌رنه‌ڤاڵ و پێشكه‌شكردنی چه‌ندین چالاكی رۆشنبیری و هونه‌ری و وه‌رزشی به‌رێوه ده‌چێت، ناشزانرێت سه‌رۆكی هه‌رێم یان سه‌رۆكی حكومه‌ت به‌شداریی یاده‌كه ده‌كه‌ن یان نا.
گۆران ئه‌دهه‌م، قایمقامی قه‌زای هه‌ڵه‌بجه به (خه‌ندان)ی راگه‌یاند: ئه‌مساڵ مه‌راسیمی یادكردنه‌وه‌ی كیمیابارانی هه‌ڵه‌بجه سه‌عات 9ی به‌یانی به به‌شداریی ژماره‌یه‌كی زۆری هاوڵاتییان به كه‌رنه‌ڤاڵێك له نێو شاری هه‌ڵه‌بجه بۆ مۆنۆمێنتی شه‌هیدان ده‌ستپێده‌كات. راشیگه‌یاند: پاشان سه‌عات 11:30، مه‌راسیمه‌كه له‌نێو هۆڵێكی ئاماده‌كراوی تایبه‌ت به‌رێوه‌ده‌چێت.
قایمقامی قه‌زای هه‌ڵه‌بجه ئاماژه‌ی به‌وه‌ش دا، له مه‌راسیمه‌كه‌دا 400 كونسوڵ و نوێنه‌ری وڵاتان، له‌گه‌ڵ ژماره‌یه‌كی زۆری میوانانی چوار پارچه‌ی كوردستان و كۆنگره‌ی جینۆسایدی گه‌لی كورد و كۆنفرانسی پزیشكانی تایبه‌ت به چه‌كی كۆمه‌ڵكوژ ئاماده ده‌بن.
وتیشی: " كۆمه‌ڵێك چالاكی هونه‌ری و كردنه‌وه‌ی پێشانگا و چالاكیی وه‌رزشی، له‌وانه هاتنی یانه‌ی زه‌ورا و یاریكردنی له‌گه‌ڵ هه‌ڵه‌بجه، یانه‌یه‌كی ئێرانی له‌گه‌ڵ یانه‌ی كوردستان به‌رێوه‌ده‌چن.
باسی له‌وه‌شكرد "كۆمه‌ڵێك له به‌رپرسه باڵاكانی هه‌رێمی كوردستان به‌شداریی ده‌كه‌ن، به‌ڵام تا ئێستا دڵنیانین سه‌رۆكی هه‌رێم یان سه‌رۆكی حكومه‌ت ئاماده ده‌بن".
پێشتریش ئارام ئه‌حمه‌د، وه‌زیری كاروباری شه‌هیدان و ئه‌نفالكراوه‌كانی حكومه‌تی هه‌رێم، به (خه‌ندان)ی راگه‌یاندبوو: بۆ ئه‌وه‌ی یاده‌كان ره‌نگدانه‌وه‌ی نێونه‌ته‌وه‌یی هه‌بێت، ئه‌مساڵ هه‌وڵ ئه‌ده‌ن میوانێكی زۆر له ده‌ره‌وه بانگ بكه‌ن به‌مه‌به‌ستی دروستكردنی په‌یوه‌ندی و ئاشنابوونیان به كوردستان و مێژووی كۆمه‌ڵكوژی.
خه‌ندان: ده‌رباز ساڵح
16/03/2013
كاربه‌ده‌ستانی پارتی كرێكارانی كوردستان له قه‌ندیل وه‌ڵامی ئه‌و نامه‌یه‌یان دایه‌وه كه ماوه‌یه‌ك له‌مه‌وبه‌ر عه‌بدوڵا ئۆجه‌لان سه‌رۆكی زیندانیكراوی (په‌كه‌كه)له گرتوخانه‌ی ئیمڕالییه‌وه ناردبووی، بڕیاره ئه‌مڕۆ وه‌ڵامی نامه‌كه ڕه‌وانه‌ی گرتوخانه‌ی ئیمڕالی بكرێت.
ئه‌مڕۆ هه‌یه‌نی(١٥ی ئازار) ماڵپه‌ڕی میللیه‌تی توریا بڵاوی كرده‌وه، ڕێكخراوی پارتی كرێكارانی كوردستان "په‌كه‌كه" وه‌ڵامی ئه‌و نامه‌یه‌یان دایه‌وه كه عه‌بدوڵا ئۆجه‌لان سه‌رۆكی زیندانیكراوی په‌كه‌كه بۆ ده‌سه‌ڵاتدارانی قه‌ندیلی ناردبوو، پێده‌چێت نامه‌كه هه‌ر ئه‌مڕۆ ڕه‌وانه‌ی ئۆجه‌لان له گرتوخانه‌ی ئیمڕالی بكرێت.
له هه‌واڵه‌كه‌دا هاتووه، سه‌رۆكی به‌ڕێوبه‌رایه‌تی كۆما جڤاكێن كوردستان "كه‌جه‌كه" موڕاد قه‌ره‌یلان به‌شێوه‌یه‌كی ئه‌رێیانه ستراتیژییه‌كانی ئۆجه‌لانی بۆ پڕۆسه‌ی چاره‌سه‌ر په‌سه‌ند كردووه و له‌و باره‌یه‌شه‌وه لێدوانێكی بڵاوكردۆته‌وه و تێیدا نامه‌كه‌ی هه‌ڵسه‌نگاندووه.
له لێدوانه‌كه‌یدا قه‌ره‌یلان ده‌ڵێت: "كۆمه‌ڵێك خه‌م و مه‌ترسی له‌ئارادان كه پێویسته چاره‌سه‌ر بكرێن، له ته‌واوی ئه‌و چاوپێكه‌وتنانه‌ی تا ئێستا ئه‌نجام دراون سه‌رۆكمان كۆمه‌ڵێك پرنسیپی ڕاستی ئاماده‌كردووه و بڕیاری كۆتاییمان داوه تا به‌شداری تێدا بكه‌ین، ته‌نها ئه‌وه نه‌بێ له وه‌ڵامی نامه‌كه‌دا كۆمه‌ڵێك بیروڕا و پێشنیارمان ئاماده كردووه و خستومانه‌ته‌ڕوو".
هاوكات ماڵپه‌ڕی ئێن سۆن هه‌به‌ری توركیا ڕایگه‌یاند، سه‌عدوڵا ئێرگین وه‌زیری دادی توركیا له به‌رنامه‌یه‌كی كه‌ناڵی (تێ رێ تێ-TRT)ی توركیا ئاماژه‌ی به‌وه‌دا كه هه‌فته‌ی داهاتوو وه‌فدی سێهه‌می ئیمڕاڵی ئاماده ده‌كرێن، وتیشی پێده‌چێت ناوی ئه‌ندامانی وه‌فده‌كه بگۆڕێت، به‌پێی هه‌واڵه‌كه‌ش پێده‌چێت سه‌ڵاحه‌دین ده‌میرتاش هاوسه‌رۆكی گشتی پارتی ئاشتی و دیموكراتی له‌گه‌ڵ وه‌فدی سێهه‌مدا بچێته ئیمڕاڵی.
له توركیه‌وه: هاوڕێ فه‌ریق
xendan
16/03/2013
پارتی یه‌كێتیی دیموكراتی كورد له سووریا (په‌یه‌ده) له هه‌وڵدایه له‌گه‌ڵ رژێمی به‌شار ئه‌سه‌د بگاته رێككه‌وتن بۆ راگه‌یاندنی هه‌رێمێكی سه‌ربه‌خۆی كوردان له رۆژئاوای كوردستان، هاوكات به‌شار ئه‌سه‌د پشتیوانی له پێكهێنانی ئه‌و هه‌رێمه ده‌كات به‌مه‌رجێك بۆ رووبه‌ڕووبوونه‌وه‌ی سوپای ئازادی سووریا و ئۆپۆزسیۆنی ئه‌و وڵاته بێت، ئه‌نجومه‌نی نشتمانیی كوردیش له سووریا پێی وایه ئه‌م پشتیوانییه‌ی ئه‌سه‌د ته‌ڵه‌زگه‌یه‌كه بۆ تێكبه‌ردانی توركیا و لایه‌نه‌كانی ئۆپۆزسیۆنی چه‌كداری سووریا.
كوردانی رۆژئاوا له راگه‌یاندنی هه‌رێمێكی سه‌ربه‌خۆ نزیك ده‌بنه‌وه و ئه‌نجومه‌نی نیشتیمانیی كوردیش له سووریا پێیوایه ئه‌و هه‌رێمه ناتوانێ له‌سه‌ر پێی خۆی راوه‌ستێت و خه‌ونی كوردانی ئه‌و پارچه‌یه‌ی كوردستان له گۆڕ ده‌نێ، چونكه هه‌لومه‌رجی ئێسته‌ی كورد له‌و وڵاته و زه‌مینه‌ی پێكهێنانی ئه‌و هه‌رێمه له رووی پشتیوانیی وڵاتانی دراوسێ و جیهانییه‌وه له‌بار نییه، هاوكات ئه‌و هه‌رێمه له رووی ئابووریشه‌وه توانای خۆبه‌ڕێوه‌بردنی نابێت، ئه‌وه‌ش وا ده‌كات هه‌مان ئه‌زموونی كۆماری مهاباد كه ته‌مه‌نی ساڵێك تێپه‌ڕی نه‌كرد، له رۆژهه‌ڵاتی كوردستان له ساڵی 1946 دووباره بێته‌وه، هه‌ربۆیه‌ش پارته كوردییه‌كانی دیكه‌ی رۆژئاوا جیا له (په‌یه‌ده) له‌گه‌ڵ راگه‌یاندنی سه‌ربه‌خۆیی ئه‌و هه‌رێمه‌دا نین و هۆشداریش به به‌رپرسانی ئه‌و پارته ده‌ده‌ن كه كوردانی رۆژئاوا نه‌خه‌نه دۆخێكه‌وه، كه دواجار زه‌ره‌ری زۆر زیاتر بێت له قازانج.
به‌پێی ئه‌و زانیاریانه‌شی كه له سه‌رچاوه‌یه‌كی چاودێر له ره‌وشی رۆژئاوای كوردستانه‌وه به (باس) دراون، ئێسته پارتی یه‌كێتیی دیموكراتی كورد (په‌یه‌ده) له رۆژئاوای كوردستان ده‌ستی گرتووه به‌سه‌ر زۆر له شاره كوردییه‌كانی رۆژئاوا و پارێزگاری له ده‌زگه ئه‌منی و سه‌ربازیه‌كانی رژێمه‌كه‌ی به‌شار ئه‌سه‌د ده‌كات، به جۆرێك كه ئاڵای په‌یه‌ده و سووریا به‌یه‌كه‌وه له شوێنه فه‌رمیه‌كانی ئه‌و وڵاته له‌گه‌ڵ وێنه‌ی به‌شار ئه‌سه‌د به‌رز كراونه‌ته‌وه، له دوایین راگه‌یاندراوی رژێمه‌كه‌ی سووریاشدا، به‌شار ئه‌سه‌د پشتیوانیی خۆی بۆ پێكهێنانی ده‌وڵه‌تی كوردی راگه‌یاندووه، كه چاودێرانی سیاسی وای بۆ ده‌چن مه‌به‌ستی رۆژئاوا و باكوری كوردستان بێت.
له‌مباره‌یه‌وه محه‌مه‌د ئیسماعیل ئه‌ندامی مه‌كته‌بی سیاسیی پارتی دیموكراتی كورد له سووریا (الپارتی) بۆ (باس) ئاماژه‌ی به‌وه دا، ئێسته هه‌ڵوێستی كوردی و هه‌ڵوێستی ئۆپۆزسیۆنی سووری بۆ راگه‌یاندنی ئه‌و هه‌رێمه له‌بار نییه.
گوتیشی: "جگه له‌وه‌ش هه‌لومه‌رجی رۆژئاوا له دۆخی ئێسته‌یدا ناتوانێ سه‌ربه‌خۆ بێت، ئه‌وه‌ش وایكردووه هه‌ڵوێستی ئه‌نجومه‌نی گه‌لی رۆژئاوای كوردستان و پارته سیاسییه‌كانی كوردستان، له‌گه‌ڵ ئه‌وه‌دا بێت كه بۆ هه‌لومه‌رجی ئێسته ده‌وڵه‌تی سووریا ده‌وڵه‌تێكی یه‌كگرتوو بێت و هه‌موو نه‌ته‌وه‌كان له چوارچێوه‌ی ده‌وڵه‌تێكی یه‌كگرتوودا به دیموكراسییانه بژین".
ئه‌و به‌رپرسه‌ی كورد له سووریا، جه‌ختی له‌سه‌ر ئه‌وه‌ش كرده‌وه كه ده‌وڵه‌تێكی یه‌كگرتووی فیدڕاڵی بۆ كورد له قۆناغی ئێسته‌دا گه‌ره‌نتیی ئه‌وه ده‌دات به كورد كه ناكه‌وێته دۆخێكی ناهه‌مواره‌وه.
گوتیشی: "جگه له‌وه‌ش هه‌لومه‌رجی رۆژئاوای كوردستان له رووی ئابووری و سیاسییه‌وه له‌بار نییه كه سه‌ربه‌خۆ بێت، ئه‌وه‌ش وا ده‌كات ته‌مه‌نی ئه‌و سه‌ربه‌خۆییه كورت بێت و نه‌توانێ له‌سه‌ر پێگه‌و پێی خۆی بوه‌ستێ".
له‌لایه‌كی دیكه‌شه‌وه جه‌عفه‌ر حه‌نان نوێنه‌ری پارتی یه‌كێتی دیموكراتی كورد له سووریا (په‌یه‌ده) له هه‌رێمی كوردستان بۆ (باس) ئاماژه‌ی به‌وه دا، ئه‌وان ئامانجیان خۆبه‌ڕێوه‌بردنی دیموكراتیانه‌ی هه‌رێمه‌كانه له سووریا و ئه‌وه‌ش ئامانجێكه له هه‌لومه‌رجی ئێسته‌دا له ده‌وڵه‌ت گه‌وره‌تره.
گوتیشی: "له‌و هه‌رێمه‌دا گه‌ل خۆی خۆی به‌ڕێوه ده‌بات و هه‌موو كه‌س له كرێكار و جوتیار و ئه‌ندازیار و توێژه‌كانی كۆمه‌ڵگه، خاوه‌نی پێگه‌ی خۆیان ده‌بن و به‌شداری له پرۆسه‌ی سیاسیدا ده‌كه‌ن".
ئه‌و به‌رپرسه‌ی په‌یه‌ده داواشی له وڵاتانی دراوسێی ئه‌و هه‌رێمه كرد كه هاوكاریان بن بۆ چاره‌سه‌ركردنی دۆخی ئێسته‌ی سووریا.
گوتیشی: "پێكهێنانی ئه‌و هه‌رێمه بۆ لێدانی نه‌ته‌وه‌كانی دیكه و پێكهاته‌كانی دیكه‌ی سووریا نییه، به‌ڵكوو ده‌مانه‌وێ به هاوكاری و بێ كێشه له‌گه‌ڵ یه‌كتردا بژین، هیواخوازیشین ئه‌و حكوومه‌ته‌ی له‌و هه‌رێمه‌دا دروست ده‌بێت، بۆ هه‌مووان بێت و گه‌ل خۆی خاوه‌نی بێت نه‌ك كه‌س و حزبێكی دیاریكراو".
له‌باره‌ی ره‌وشی ئابووریی ئه‌و هه‌رێمه‌ش، ئه‌و به‌رپرسه‌ی په‌یه‌ده ئه‌وه‌ی به گرفت نه‌زانی و جه‌ختی له‌سه‌ر ئه‌وه كرده‌وه كه بۆ خۆئاماده‌كردن و خۆڕێكخستن، بێگومان كات پێویسته، ئه‌و چاره‌سه‌رییانه‌ش پێویستی به هاوكاریی هه‌موو پێكهاته و هێزه سیاسییه‌كانی ئه‌و هه‌رێمه‌وه هه‌یه كه تا چه‌ند توانای خۆبه‌ڕێوه‌بردنیان ده‌بێت.
(باس) هێمن ساڵح-
له بیست و پێنجه‌م ساڵیادی كیمیابارانی هه‌ڵه‌بجه‌دا سه‌رۆكی هه‌رێمی كوردستان په‌یامێكی خسته‌روو، تێیدا ریگه‌یاند، پێویستە هەردوو حکومەتی فیدراڵی لە بەغدا و هەرێم هەموو توانایەکیان بخەنەگەڕ بۆ چارەسەرکردنی ئەو قوربانییانەی کیمیاباران کە تا ئێستاش بەدەست ئازاری ئەو کارەساتەوە دەناڵێنن، وتیشی، باشترین وەفاداری بۆ هەڵەبجە ئەوەیە بە یەکگرتوویی کار بۆ وەدەستهێنانی مافە ڕەواکانی گەلەکەمان بکەین و داهاتوویەکی ئارام و دوور لە کارەسات بۆ وڵاتەکەمان مسۆگەر بکەین.
ئه‌مه‌ش ده‌قی په‌یامه‌كه‌ی سه‌رۆكی هه‌رێمه :
به‌ناوی خوای گه‌وره و میهره‌بان
لە بیست و پێنجەمین ساڵیادی کیمیابارانکردنی هەڵەبجەی شەهیددا هاوسۆزیی خۆم بۆ کەسوکاری قوربانییانی ئەو کارەساتە دڵتەزێنە ڕادەگەیەنم. ئەو کارەساتەی کە بووە هۆی شەهید و بریندار بوونی هەزاران هاووڵاتیی بێ تاوانی ئەو شارە ئازیزە.
هەڵەبجە بوو بە قوربانی بەڵام گرێی بەختی کوردی کردەوە و هەموومان قەرزداری هەڵەبجەین و هەرچی بکەین ناتوانین لەژێر باری ئەو قوربانیدانە بێینەدەر. باشترین وەفاداری بۆ هەڵەبجە ئەوەیە بە یەکگرتوویی کار بۆ وەدەستهێنانی مافە ڕەواکانی گەلەکەمان بکەین و داهاتوویەکی ئارام و دوور لە کارەسات بۆ وڵاتەکەمان مسۆگەر بکەین.
لە کاتێکدا ئەوە بە ئەرکی پلە یەکی حکوومەتی فیدراڵیی عێراق دەزانم کە قەرەبووی قوربانییانی ئەو کارەساتە بکاتەوە، پێویستیشە هەردوو حکوومەتی فیدراڵی لە بەغدا و حکوومەتی هەرێمی کوردستان هەموو توانایەک بخەنەگەڕ بۆ چارەسەرکردنی ئەو قوربانییانەی کیمیاباران کە تا ئێستاش بەدەست ئازاری ئەو کارەساتەوە دەناڵێنن.
لەویادە خەمناکەدا سەری ڕێز و نەوازش بۆ شەهیدانی هەڵەبجە و هەموو شەهیدانی کوردستان دادەنەوێنین و سوپاسی خۆڕاگریی خەڵکی قارەمانی هەڵەبجە دەکەم کە لە قوربانیدان و گیانفیداییدا بوونە نموونەیەک بۆ هەموو مرۆڤایەتی.
مسعود بارزانی
سەرۆكی هەرێمی كوردستان
- ژمارەیەک لە چالاکانی سیاسی، مەدەنی و میدیایی کوردستان داوای هەڵوەشاندنەوەی سزای لەسێدارەدانی پەخشان عەزیزی و هەموو زیندانیانی سیاسیی سزادراو بە لەسێدارەدان دەکەن
- ئێران..کۆبوونەوەکەمان لەگەڵ وڵاتانی ئەورووپا ئەرێنی بوو
- مەزڵوم عەبدی و نوێنەری سەرۆک بارزانی کۆدەبنەوە
- ئەمڕۆ شاندی دەمپارتی بۆ گەیاندنی پەیامی ئۆجەلان لەگەڵ ئاکپارتی کۆدەبێتەوە
- خراپترین دراوەکانی جیهان لە ساڵی 2024 دا
- تولای حاتەمئۆگیولاری: دیدار بەس نییە، دەبێت دەرگاکانی ئیمراڵی بکرێنەوە
- کامیان مەترسیدارترن: ئێران یان ئیخوان؟
- ههسهده و چەک؛ هاوکێشە سەختەکە لە بنیاتنانەوەی سوپای سوریادا
- ئیدارەی نوێی سوریە ئەمیرێكی پێشوی بەرەی نووسرەی وەك سەرۆكی دەزگای هەوالگریی سوریە دیاری كڕد
- وەزیری دەرەوەی روسیە دەلێ دەگەل ئیدارەی تازەی سوریە پەیوەندیمان هەیە
- ئیسرائیل فرۆكەخانەی نێودەولەتی سەنعا لە یەمەن بۆمباران كرد
- شاندێكی بالای عێراقی دەگەل ئیدارەی نوێی سوریە دیداری كرد
- دوای روخانی رژیم بەعسی ئەسد، عەلەوییەكان چییان بەسەر دێت
- وەزیری دەرەوەی ئیسرائیل دەلێت: هێرشەكان دژ بە كوردەكان دەبێ بوەستێنرێن
- چیروکی نەبیستراویی ناو زیندانەكانی سوریە
- حشدی شەعبی هەرشە لە توركیەدەكات
- ترامپ دەلێ: لە هیچ لایەك قەبوول ناكەیین جێگرەوەی دۆلار بەرهەم بێنێت
- ناوەرۆكی دیداری نێوان وەزیری دەرەوەی ئێران و بەشار ئەسەد بلاوبووە
- فەرانسە رێگای بەكارهێنانی مووشەكی دورمەودای بە ئوكرایین دا كە لە دژی روسیە بەكاری بێنێت
- جۆزف بۆرێل دەلێ: بیرت لە لێواری دارماندایە
- پیرۆزبایی بزووتنەوەی کۆماریخوازانی ڕۆژهەڵاتی کوردستان بە بۆنەی جێژنی پیرۆزی قوربان
- پەیامی پیرۆزبایی بزووتنەوەی کۆماریخوازانی رۆژهەڵاتی کوردستان بە بۆنەی پێنجەمین کۆنگرەی ئاسایی هەدەپە
- پەیامی پیرۆزبایی بزوتنەوەی کۆماریخوازی ڕۆژهەڵاتی کوردستان بە بۆنەی جێژنی ڕەمەزانی پیرۆزەوە
- راگەیەندراوی بزووتنەوەی کۆماریخوازان بەبۆنەی رۆژی جیهانی کرێکاران
- بزووتنەوی کۆماریخوازان ئیدانەی هێرشەکانی رێژیمی تورکیە بۆ سەر باشووری دەکا
