به‌ڕێزان ( عوسمان عه‌به پێنجوێنی یان عوسمان قه‌ڵادزه‌یی) و( جه‌واد حه‌یده‌ری) به‌داخه‌وه وتیان به‌ڵێ ڕاسته و كۆچی دوایی كردووه؟
هونه‌رمه‌ند و پێشمه‌رگه ، سروودبێژ و گۆرانیبێژ...
کۆڕەوو شەنگال وتووەو دەیڵێت و بەشداریی کاریگەری لەئاهەنگەکانی سەرفیرازیدا بووەو دەبێت.
مستەفا داداری موکریانی مەهابادی خۆی بەخوێندکاری (مام هێمنی شاعیر ١٩٢١-١٩٨٦) دەزانێ و کاتێک قسە دەکا...
باسمان بۆ بکەن، ئەو ئۆرکێسترەی ئێوە چەنساڵێک ژەنیاری بوون؟ئەو ئۆرکێسترە بە ئۆرکێستری رادیۆ کرماشان ناسراو بوو و لە سەرەتاشەوە سەرپەرەشتییەکەی بەدەستی بەڕێز عەبدولسەمەدیان بوو کە...
بەر دەکەوێت بەڵام لەو لایشەوە هەر بە پاڵپشتی ئەو سامانە دەوڵەمەندە،خۆی دوو هێندە لە نێو ڕووبەری فەرهەنگیی کورددا دەردەخات. هێشتاکەیش کتێبخانەکەی پڕیەتی لە دەیان بەرهەمی...
له مه‌راسیمی ته‌واو بوونی نه‌خۆشخانه‌ی شار له سلێمانی، سه‌رۆكی حكومه‌تی هه‌رێمی كوردستان له وتارێكدا رایگه‌یاند،" ئەم پرۆژەیە سەرەتایەكی نوێ بوو بۆ حكومەتی هەرێمی كوردستان، چونكە پڕۆژەی وا گەورە پێشتر لە هەرێمی كوردستان ئەنجام نەدرابوو، پەرەپێدانی كەرتی پەروەردە و تەندروستی دوو ئامانجی هەرە سەرەكی حكومەتی هەرێمی كوردستانه كە ئێستا كاری لەسەر دەكەین"، هه‌رووه‌ها باسی له ده‌رمانی خراپ و نه‌خۆشه‌كانی هه‌ولێر كرد، له‌باره‌ی بارودۆخی سیاسی وتی، تەوافوق و سازانی نیشتمانی لە كەشێكدا دروستنابێ كە پڕبكرێت لە هەڕەشە و مەرج سەپاندن.
سه‌رۆكی حكومه‌تی هه‌رێمی كوردستان له وتاره‌كه‌یدا وتی: پەرەپێدانی كەرتی پەروەردە و تەندروستی دوو ئامانجی هەرە سەرەكین لە كارنامە و پلانی ستراتیژی حكومەتی هەرێمی كوردستان كە ئێستا كاری لەسەر دەكەین . لە كوردستان و بەردەوام دەبین، بۆ ئەوەی كەرتی تایبەتیش لەگەڵ حكومەتدا، بتوانێ نەخۆشخانەی پێشكەوتوو و ناوەندی چارەسەری لە كوردستان بكاتەوە. هەر لێرەوە من دەمەوێ هانی ئەو وەبەرهێنەرانە بدەم كە دەیانەوێت كار لەسەر ئەم كەرتە بكەن بۆ خزمەتكردنی هاوڵاتیانی ئازیزی هەرێمی كوردستان.
ئاماژه‌یدا: ئەوەی تائێستا كراوە، كارێكی زۆربووە، بەڵام هێشتا زۆری دیكەش ماوە بیكەین. بەتایبەتیش گۆڕینی سیستەمی تەندروستی بۆ سیستەمێكی هاوچەرخ و دروستكردنی سیستەمی بیمەی تەندروستی بۆ هاووڵاتیان لە هەرێمی كوردستاندا، ئێمە كارێكی زۆرمان لەپێش خۆمان داناوە بۆ پێشخستنی كەرتی تەندروستی و، بە پشتیوانی خەڵك و ئێوەی خۆشەویست ئەم كاروانە دەگەیێنینە ئامانج .
سه‌باره‌ت به‌و كه‌سانه‌ی له ماوه‌ی رابردوو له هه‌ولێر بینینیان له‌ده‌ستدا، نێچیرڤان بارزانی وتی: لەو ماوەیەی رابردوودا، رووداوێكی جەرگبڕ هەموومانی تاساند، ئەویش بەهەڵە بەكارهێنانی چارەسەری بوو بۆ چەند هاووڵاتییەك لە هەولێر، كە بەهۆیەوە هەندێكیان بیناییان لەدەستدا، ئەوانە وەك هەموو خەڵكی كوردستان كەس و خۆشەویستی ئێمەن و بەڕاستی زۆر دڵتەنگین بۆ ئەوەی بەسەریان هات . ئێمە بەپێی یاسا ، بەدواداچوونی ورد و لێپێچینەوەیەكی تووندمان دەستپێكرد ، وەزارەتی تەندروستیش لە بەدواداچوونەكەیدا بەردەوامەو هیوادارین بگاتە ئەنجام.
سه‌رۆكی حكومه‌ت دووپاتی ده‌كاته‌وه كه بەهیچ شێوەیەك رێگە نادەین هیچ بازرگان و كۆمپانیایەك زیان بە هاووڵاتیانی كوردستان بگەیێنێ و، هەر كۆمپانیایەك ئەوەبكات لێخۆشبوونی بۆ نییە و رووبەڕووی تووندترین سزا دەبێتەوە بەپێی یاسا. ئێستا سەردەمی سەروەری یاسایە، هەموو كارێكی ئێمە لەبواری تەندروستیدا ، لە چوارچێوەی یاسای تەندروستیدایە كە بە ژمارە 15 لەساڵی 2007 لەلایەن پەرلەمانی كوردستانەوە دەرچووە. ئەم سەروەركردنەی یاسا، هەنگاوێكی بنەڕەتییە لە بەدامەزراوەییكردنی سیستەمی تەندروستی لە هەرێمی كوردستاندا.
روونیكرده‌وه: بڵاوبوونەوەی دەرمانی خراپ و ساختە زۆر فراوانبووە لە جیهاندا، بەڵام ئێمە سوورین لەسەر كاركردن بۆ نەهێشتن و رێگە لێگرتنی. ئێمە دەمانەوێ لەو بوارەدا چاو لە وڵاتە چالاكەكان بكەین لە بواری بەرنگاربوونەوەی دەرمانی ساختەدا. هەروەها لیژنەی كۆنترۆڵی خۆراك و، ئەو لیژنانەی بەردەوام رێستۆرانت و دووكان و سوپەرماركێتەكان دەپشكنن ، كارێكی زۆر گرنگ دەكەن لە بواری پاراستنی هاووڵاتیان لە خۆراكی خراپ. لەو بوارەشدا زۆر سوپاسی لیژنەكەی شاری سلێمانی دەكەم و كارەكانیان زۆر بە باخ و بەرزییەوە سەیر دەكەین .
وتیشی: ئێستا كوردستان ناوبانگی بەوە دەركردووە لە جیهاندا كە بەردەوام پێشدەكەوێ و خۆشگوزەرانی تێدا زیاتر دەبێت . ئەوە هەروا دروستنەبووە، بەڵكو بەكارێكی زۆر ئەو ناوبانگەی دەستكەوتووە. بۆیەش بەڕاستی هەر هێز و لایەنێك ، ژیان لە كوردستان لەبەرچاوی خەڵك رەش بكات، كارێكی خراپ دەكات. ناكرێ ئۆپۆزیسیۆن، بۆ مەرامی ئینتیخابی، ژیان و وڵات بە رەشی پیشانبدات. ناكرێ بۆ مەرامی سیاسی و ئینتیخابی، درز بخاتە نێوان حكومەت و هاووڵاتیانەوە.
نێچیرڤان بارزانی رایگه‌یاند: پارتی دیموكراتی كوردستان و یەكێتی نیشتمانی كوردستان ، كە ئەمڕۆ بەپێی ئەنجامەكانی هەڵبژاردن حوكمی هەرێمی كوردستان دەكەن لەگەڵ چەند لایەنێكی دیكەدا، ئامادەن بۆ دانیشتن و كۆدەنگی لەسەر پرسە نیشتمانییەكان، بەپێی بنەما یاساییە كار پێكراوەكانی وڵاتەكەمان. بەڵام لە هەمانكاتیشدا زمانی هەڕەشەكردن لەلایەن یەكێتی و پارتی و خەڵكی كوردستانەوە زمانێك نییە كە قەبول بكرێت، چونكە تەوافوق و سازانی نیشتمانی لە كەشێكدا دروستنابێ كە پڕبكرێت لە هەڕەشە و مەرج سەپاندن.
ئه‌وه‌شی خسته‌روو: ئێستا هەموو نەتەوەی كورد لە دۆخێكی زۆر هەستیاردایە. لەعێراقیش كێشەی خاك و جێبەجێكردنی مافەكانی كورد لە دەستووردا هێشتا چارەسەرنەكراون، ئەوەش پێویستی بەوەیە كە كێشە نیشتمانی و نەتەوەییەكانمان بۆ مەسەلە ئینتیخابییەكان لەبیر نەكەین، لەبەرئەوەش ئێمە داوای دروستكردنی یەكدەنگی دەكەین لەسەر مەسەلە نیشتمانییەكانی گەلی كوردستان، بۆ ئەو مەبەستە ئامادەی هەموو گفتوگۆ و راگۆڕینەوەین لەگەڵ هەموو لایەنەكان.
س . س
pna
29/05/2013
نوێنەرانی پارتە کوردییەکانی رۆژئاوای کوردستان، داوادەکەن وەک نوێنەری کوردانی رۆژئاوای کوردستان لە کۆنفرانسی جنێف بەشداری بکەن.
شێروان ئیبراهیم، ئەندامی پارتی یەکێتی دیموکراتی (PYD) لە لێدوانێکیدا بۆ رۆژنامەی (حورییەت دەیلی نیوز)ی تورکی رایگەیاند: "ئێمە دەمانەوێت لە کۆنفرانسەکەدا بەشداری بکەین، جا وەک ئەندامی ئیئتلاف بێ یان بە سەربەخۆیی وەک نوێنەری باڵای کورد ".
رووسیا و ئەمریکا دەیانەوێ بەهۆی کۆنفرانسی جنێف‌ەوە نوێنەرانی ئۆپۆزیسیۆن و رژێمی سووریا لەسەر یەک مێز کۆبکەنەوە بەمەبەستی کۆتاییهێنان بە تووندوتیژییەكانی سووریا.
ئێمە چەندین دەیەیە لەژێر دەستی رژێمی سووریا دەچەوسێینەوە
هاوکات، بەهزاد ئیبراهیم، ئەندامی ئەنجوومەنی نیشتیمانی کورد، رایگەیاند، كە ئەوانیش دەیانەوێت بەشداربن لە کۆنفرانسەکە و گوتی: " ئێمە چەندین دەیەیە لەژێر دەستی رژێمی سووریا دەچەوسێینەوە و بەر لە دەستپێکردنی شۆڕشی سووریاش تێکۆشانمان کردووە."
لیژنەی باڵای کورد لە مانگی تەمموزی 2012 دامەزرا و ئەندام نییە لە ئیئتلافی نیشتمانی سووری.
رۆژی 26-5-2013، وەلید موعەلیم، وەزیری دەرەوەی سووریا، لە میانی سەردانێکیدا بۆ عێراق، رایگەیاند: "حکومەتی سووریا بەشداری لە کۆنفرانسی ئاشتی دەکات، کە لە جنێف بەڕێوەدەچێت".
ئامانجی کۆنفرانسەکە راگرتنی شەڕی ناوخۆی سووریایە، کە بەهۆیەوە زیاتر لە 70 هەزار کەس کوژراون و چەندین ملیۆنیش سووریایان بەجێهێشتووە.
28/05/2013
لەماوەی دوو مانگی رابردوودا، 24 كەس لە رۆژهەڵاتی کوردستان خۆیان کوشتووە. لەنێو ئەوانەشدا ژنان زۆرترن. بە گوتەی كۆمەڵناسێكیش، حاڵەتەكانی خۆكوشتن لە پارێزگای ئیلام زیاتر لە ناوچەکانی دیکە روودەدات.
لە ماوەی چەند رۆژی رابردوودا، دوو گەنجی دانیشتووی دیواندەرە سەر بە پارێزگای سنە، بە خۆهەڵواسین کۆتاییان بە ژیانی خۆیان هێنا.
بە پێی ئامارەکان، ژنان زیاتر لە پیاوان خۆیان دەکوژن
هەفتەی رابردووش کچێکی تەمەن 10 ساڵان خەڵکی ئاوایی پەسوێ لە پیرانشاری سەر بە پارێزگای ورمێ، کە پێشتر ئاگری لە جەستەی خۆی بەردابوو، گیانی لەدەست دا.
بەپێی ئەو ئامارەی ناوەندی هەواڵی کوردپا بڵاویکردووەتەوە "لە ماوەی 65 رۆژی رابردوودا، 24 کەس لە رۆژهەڵاتی کوردستان خۆیان کوشتووە، کە 14 کەسیان ژنن".
د. خالید تەوەکولی، مامۆستای بەشی کۆمەڵناسی زانکۆی سەقز، لە لێدوانێکدا بۆ (رووداو) گوتی: "ئەو ئامارانە بە تەواوی رەنگە دروست نەبن، چونکە لەلایەن ناوەندێکی زانستی سەربەخۆوە کۆنەکراونەتەوە".
تەوەکولی پێیوایە، بەرزبوونەوەی رێژەی کێشە کۆمەڵایەتییەکان تایبەت بە رۆژهەڵاتی کوردستان نییە و کێشەیەکی گشتییە. جەخت لەوەش دەکاتەوە "خۆکوشتن بە شێوەیەکی بەرچاو لە رۆژهەڵات زیادیکردووە".
بەرزبوونەوەی رێژەی کێشە کۆمەڵایەتییەکان تایبەت بە رۆژهەڵاتی کوردستان نییە و کێشەیەکی گشتییە
سەبارەت بە هۆکارەکانی پەرەسەندنی كێشە كۆمەڵایەتییەكان، مامۆستاكەی زانكۆی سەقز ئاماژە بە "نایەکسانی چینایەتی، بێباوەڕی و نائومێدی بە ژیان و بایەخە کۆمەڵایەتییەکان، دژایەتی لەنێوان نەریت و بەها کۆمەڵایەتییە مۆدێڕنەکان و گیرۆدەیی بە ماددە سڕکەرەکان" دەکات.
تەوەکولی گوتیشی: "لە پارێزگای ئیلام بە بەراورد لەگەڵ ناوچەکانی دیکەی رۆژهەڵاتی کوردستان رێژەی خۆکوشتن زیاترە و بە پێی ئامارەکانیش، ژنان زیاتر لە پیاوان خۆیان دەکوژن".
بەگوێرەی ئاماری رێکخراوی تەندروستی جیهانی، ئێران لەدوای چین و هیندستان سێیەمین وڵاتە لە بەرزی رێژەی خۆکوژی و لەو نێوەندەشدا پارێزگاکانی رۆژهەڵاتی کوردستان زۆرترین ئاماری خۆکوشتنیان تێدا تۆمار کراوە.
بەگوێرەی ئاماری وەزارەتی تەندروستی ئێران، پارێزگای ئیلام لە بەرزبوونەوەی ئاستی خۆکوژی، بەتایبەت خۆکوژی ژنان لە پلەی یەکەمەوە دێت. (ساڵانە 400 کەس) و ئەوە لە کاتێکدایە، کە بەگوێرەی ئامارە فەرمییەکان ئیلام زۆرترین رێژەی بێکاری لە ئاستی ئێراندا تۆمارکردووە و 21%ی دانیشتوانی بێکارن.
rudaw
28/05/2013
سەرچاوەیەك بە هەفتەنامەی "باس"ـی ڕاگەیاندووە، ئەمەریكا لە هەوڵدایە هەریەك لە كورد، توركیا و قەتەر رازی بكات بۆ ئەوەی تا ساڵی 2014 بەشار ئەسەد لە حوکمدا بمێنێتەوە، لەم ماوەیەیشدا زەوینەی هەڵبژاردنێكی ڕەوا و یەكسان بسازێنێت.
لەو پێوەندییە تەلەفۆنییەدا كە چەند ڕۆژێك لەمەوبەر جێگری سەرۆكی وڵاتە یەكگرتووەكانی ئەمەریكا، جۆو بایدن لەگەڵ سەرۆكی هەرێمی كوردستان، مەسعوود بارزانی سازی دا، ئەمەریكا داوای لە بارزانی كردووە، یارمەتیدەری بێت بۆ چارەكردنی ئاشتیانەی قەیرانی ئێستای سووریا.
سەچاوەكە هەروەها دەڵێت، لایەنی كوردی هەڵوێستی لە بەرانبەر چارەی ئاشتیانەی كێشەی سورریا نەرمە، بەڵام بەو مەرجەی مافی كورد لەو وڵاتەدا مسۆگەر بكرێت، هەرچی قەتەریشە لەگەڵ ئەو چارەسەرەدا نییە، چونكە بە سازشی سیاسیی دەزانێت لە بەرانبەر ئێران، هێشتا توركیایش بە فەرمی هەڵوێستی خۆی ڕانەگەیاندووە.
بە گوتەی سەرچاوەكەی "باس" كە لە ژمارەی ئەمڕۆ سێشەممەیدا بڵاوی كردووەتەوە، بایدن هاوكات پشتیوانیی خۆی بۆ داواكانی كورد نیشان داوە و داوایشی كردووە كە كۆبوونەوەكانی هەولێر و بەغدا درێژەیان هەبێت و لایەنی سوننەیش بهێنرێتە نێو گفنوگۆكانەوە.
لەم بارەیەوە ئەندامی ئەنجوومەنی نوێنەرانی عێراق، حەسەن جیهاد، باوەڕی وایە كە ئەمەریكا لەوە گەییشتووە كە سەركردایەتیی كورد لە هەرێم دەتوانن ڕۆڵ لە هاوكێشەكەدا بگێڕن، بۆیە لە پێوەندییەكانیاندا پرس بە كوردیش دەكەن.
گوتەبێژی هاوپەیمانیی كوردستانی، موئەییەد تەییبیش ئەوەی ڕاگەیاند كە كورد لە پێووتریش و ئێستایش هەمیشە هۆكاری سەقامگیری بووە لە عێراق و ناوچەكە، هەربۆیە هێزێكی وەكو ئەمەریكا ڕاوێژی پێ دەكات.
گوتیشی، سەركردایەتیی سیاسیی كورد حەكیمانە مامەڵە لەگەڵ پرسەكانی عێراق و سووریادا دەكات، چونكە دەزانێت ئەوەی هەیە ملمڵانێی ئیقلیمیشی تێدایە، بۆیە كورد بۆ كێشەكانی عێراق لەگەڵ گفتوگۆ بووە بۆ كێشەی سووریا، لەگەڵ پێدانی مافەكانی كورد بووە لەو هەرێمە وێڕای ئەوەیش پێداگر بووە لەسەر ڕای خەڵكی سووریا لەسەر كێشەكانی خۆیان.
pna
28/05/2013
لە ناوچەی سەردەشتی رۆژهەڵاتی کوردستان کاسبکارێک بە تەقەی هێزەکانی پۆلیسی ئێران كوژرا.
هێزەکانی ئێران شەوی رابردوو لە ناوچەی "شیلانێ"ی سەردەشت هێرشیان کردە سەر پۆلێک کاسبکاری کورد و لە ئەنجامدا کەسێک بە ناوی "زانکۆ قوربان" كوژرا.
بە پێی یاسای بەكارهێنانی چەک لە ئێراندا، هێزە چەکدارەکان دەبێ لە پێشدا گومان لێکراو یان تاوانبار ئاگادار بکەنەوە و لە قۆناخی دووەم تەقەی هەوایی بکەن و دواتر ئەگەر خۆی بە دەستەوە نەدا تەقە لە پێی بکەن.
لە مانگی رابردوودا، ١٤ كاسبكاری كورد بە تەقەی هێزەکانی ئێران و یان تەقینەوەی مین لەناوچە سنوورییەكانی نێوان رۆژهەڵات و باشووری کوردستان گیانیان لەدەست داوە.
27/07/2013
سه‌عدی ئه‌حمه‌د پیره، ئه‌ندامی مه‌كته‌بی سیاسی یه‌كێتی نیشتمانی كوردستان رایده‌گه‌یێنێت عێراق هی هه‌موو عێراقییه‌كانه‌و په‌یوه‌ندی كوردو شیعه‌ش به مێژوویی "مێژووییه" وه‌سف ده‌كات .
سه‌عدی ئه‌حمه‌د پیره گوتی "په‌یوه‌ندی ئێمه په‌یوه‌ندیه‌كی مێژووییه‌و چه‌ندین شه‌هیدمان پێكه‌وه‌داوه، له ئێستاشدا به‌ره‌وباشی ده‌ڕوات ئه‌گه‌رچی له چه‌ند رۆژی رابردوو نه‌یارو تێكده‌رانی عێراق بۆ ئه‌وه‌ی بارودۆخه‌كه ئاڵۆز بكه‌ن هه‌وڵیاندا كه‌لێن بخه‌نه نێوان كوردو شیعه".
به گوێره‌ی هه‌واڵێكی ماڵپه‌ری (PUKmedia ) زمانحاڵی یه‌كێتی نیشتمانی كوردستان پیره زیاتر روونیكرده‌وه "دوای سه‌ردانی عه‌مار ئه‌لحه‌كیم بۆ هه‌رێمی كوردستان و به راوێژ و دانووسان و وه‌فدی كوردی بۆ به‌غداو سه‌ر له نوێ په‌ره به‌و په‌یوه‌ندییه دراوه هیوادارین له‌داهاتووشدا عێراق بۆ هه‌موان بێت ئه‌و ئاڵۆزییه‌ی ئێستاش هه‌یه به‌شێوازی گفتوگۆو دانووسان چاره‌سه‌ربكرێت".
ئه‌ندامه‌كه‌ی مه‌كته‌بی سیاسی یه‌كێتی ئاماژه‌ی به‌وه‌شكرد "له هه‌رێمی كوردستان بوژانه‌وه‌و ئاوه‌دانكردنه‌وه به‌شێوه‌یه‌كی به‌رچاو په‌ره‌ی سه‌ندوه، ئێستاش به‌ره‌و قۆناخی هه‌ڵبژاردن ده‌ڕۆین، وه‌ك یه‌كێتیی نیشتمانیی كوردستان و سیاسه‌تی یه‌كێتی پێش مام جه‌لال و له غیابی مام جه‌لال هه‌مان هه‌ڵوێستمان هه‌یه و به‌رده‌وامی سیاسه‌تی ئه‌و ده‌بین".
ئه‌و قسانه‌ی سه‌عدی ئه‌حمه‌د پیره ئه‌ندامی مه‌كته‌بی سیاسی یه‌كێتی ئه‌مڕۆ یه‌كشه‌ممه له‌شاری هه‌ولێر له‌میانه‌ی ئه‌و كۆبوونه‌وه‌یه هات كه له‌گه‌ڵ محه‌ممه‌د ئه‌لحه‌یده‌ری كه‌سایه‌تیی ئایینی و سیاسی دیاری عێراق و په‌رله‌مانتاری پێشوی عێراق و وه‌فدێكی هاوڕێی ئه‌نجامیدا.
rudaw
27/05/2013
مەسعود بارزانی، سەرۆكی هەرێمی كوردستان لە گوتارێكدا بەبۆنەی یادی شۆڕشی گوڵان، كە ئێوارەی ئەمڕۆ لە پاركی شانەدەر لە شاری هەولێر پێشكەشی كرد، تیشكی خستە سەر پرسی گەڕانەوەی دەستوور بۆ پەرلەمان و هەروەها باسی لە چۆنێتی بەڕێوەچوونی هەڵبژاردنەكانی داهاتووی هەرێم و دوایین رێككەوتنی هەولێرو بەغدا كرد.
لەبارەی پرسی گەڕانەوەی دەستوور بۆ پەرلەمان، سەرۆكی هەرێمی كوردستان گوتی:"لە دەسەڵاتی هیچ كەسێكدا نییە دەستوور بگەڕێنێتەوە پەرلەمانی كوردستان تاوەكو میلـلەت قسەی لەسەر نەكات". داوای گەڕانەوەی دەستووریشی، كە هەندێك لایەن داوای دەكەن، بە "نا یاسایی" وەسف كرد.
گوتیشی: "ئەو كاتەی دەستوور پەسەندكرا 36 حیزب لە هەرێمی كوردستان مۆڵەتی یاساییان هەبوو، هەر 36یان دەنگیان بە پرۆژەیاسای دەستوور دا".
سەرۆكی هەرێمی كوردستان ئەوەشی خستەڕوو "لە هەڵبژاردنی 25/7/2009 زۆر هەوڵماندا دەستوور بخرێتە دەنگدانەوە، بەڵام كۆمسیۆن ئامادە نەبوو".
بارزانی، هۆشداریی لە بارەی دواكەوتنی ئەنجامدانی راپرسی لەسەر دەستوور دا‌و گوتی: "چەند راپرسی لەسەر دەستوور دوابكەوێت، كێشەكە زیاتر دەبێ". ئاماژەی بەوەشكرد: "هەمواركردنی دەستوور بووەتە مەسەلەیەكی سیاسی و كردوویانەتە كەرەستەی ململانێكان".
بارزانی راشیگەیاند: "ئەگەر دەستوور خراپە با میللەت دەنگی پێ نەدات و ئەگەر بە باشی دەزانێت با پەسەندی بكات".
لەبارەی هەڵبژاردنی سەرۆكی هەرێمی كوردستانەوە، مەسعود بارزانی رایگەیاند: "سەرۆكی هەرێمی كوردستان نوێنەرایەتی هەموو خەڵكێكی كوردستان دەكات نەك حیزبێك، بۆیە گرنگ نییە كێ دەبێتە سەرۆكی هەرێمی كوردستان، گرنگ ئەوەیە خەڵك هەڵیبژیرێ، دڵنیاشم زۆر خەڵكی لێهاتوو هەن ئەم رۆڵە ببینن".
لەبارەی چۆنێتی بەڕێوەچوونی هەڵبژاردنەكانەوە، بارزانی گوتی: "پێمانخۆشە هەڵبژاردنەكان بەشێوازی نیمچەكراوە بەڕێوەبچن و گەلی كوردستان مافی خۆیەتی حەسمی بكات".
مەسعود بارزانی، سەرۆكی هەرێمی كوردستان، باسی لە بارودۆخی عێراقیش كرد‌و گوتی: "داوا لە لایەنە عێراقییەكان دەكەین، دەست بكەن بە گفتوگۆ و تەوافوقی نیشتمانی".
لەبارەی دوایین رێككەوتنی هەولێر و بەغداش، گوتی: "ئومێدەوارین ئەو رێككەوتنە جێبەجێ بكرێ و بە كردەوە ئیسپاتی بكەن كە جێبەجێی دەكەن، چونكە هەموومان ماندووبووین لە بەڵێنی بێ كردار".
26/05/2013
ئه‌مرۆ شاندێكی بەدەپە بۆ جاری شەشەمین سەردانی ئیمراڵی به‌رێكه‌وتن، پاش ئه‌وه‌ی شاندەكە سەردانی وەزارەتی دادی توركیایانكردئەوەش دوای مانگێك دێت بەسەر سەردانی پێنجەمدا.
ماڵپه‌ری فورات نیوز بڵاویكرده‌وه، ئه‌مرۆ شه‌ممه هه‌ریه‌كه له گوڵته‌ن کشاناک، سڕی سوره‌یا ئۆنده‌ر و په‌روین بوڵدان ئاماده‌كاریان ته‌واوكردوه‌و به‌ره‌و ئیمرالی به‌رێده‌كه‌ون.
پێشتر پەروین بوڵدان جێگری سەرۆكی فراكسیۆنی بەدەپە و یەكێك لەئەندامانی شاندەكە رایگەیاند بۆ ماوەی مانگێك دەبێت سەردانی ئۆجالانیان نەكردووە و لەماوەی ئەو مانگەشدا چەندین رووداوی گرنگ دروستبوون و بۆیە دەیانەوێت لەماوەیەكی كورت دا سەردانی ئیمراڵی بكەن.
پەروین بوڵدان وتی “خۆمان ئامادە دەكەین بۆ جاری شەشەمین بچینە ئیمراڵی و چاومان بە بەرێز ئۆجالان بكەوێت”.
بوڵدان هیوادارە لەماوەیەكی كورتدا چاویان بە ئۆجالان بكەوێت و لەسەر پرۆسەی ئاشتی و ئەو هەنگاوانەی بۆقۆناخەكە نراون گفتوگۆ بكەن.
گەریلاكانی PKK لە رۆژی 8ی مانگەوە دەستیان بەكشانەوە كردووە و تا ئێستاش پرۆسەكە بەردەوامە. پەروین بوڵدان وتی “دەمانەوێت هەم لەسەر ئەو بابەتە بۆچوونەكانی ئۆجالان وەربگرین، هەمیش لەسەر پێشهاتەكانی قۆناخەكە بیروبۆچوونەكانی وەربگرین “.
26/05/2013
مه‌سعود بارزانی، سه‌رۆكی هه‌رێمی كوردستان داوای ئازادكردنی عه‌بدوڵڵا ئۆجه‌لان ده‌كات و په‌یامێك بۆ باكوور و رۆژهه‌ڵاتی و رۆژئاوای كوردستان ده‌نێرێ.
له سێزده‌مین كۆنگره‌ی نه‌ته‌وه‌یی كوردستان كه ئه‌مڕۆ له برۆكسلی پایته‌ختی به‌لجیكا ده‌ستی به‌كاره‌كانی كرد، مه‌سعود بارزانی، سه‌رۆكی هه‌رێمی كوردستان وتارێكی پێشكه‌ش كرد كه له‌لایه‌ن هێمن هه‌ورامی، به‌رپرسی په‌یوه‌ندییه‌كانی ده‌ره‌وه‌ی پارتی دیموكراتی كوردستان خوێندرایه‌وه و له به‌شێكی وتاره‌كه‌یدا مه‌سعود بارزانی، داوای ئازادكردنی عه‌بدوڵڵا ئۆجه‌لان رێبه‌ری زیندانیكراوی پارتی كرێكارانی كوردستان (PKK)ی كرد.
بارزانی گوتی " دۆزی كورد له قۆناخێكی گرنگ دایه و هیوامان به ئاینده‌یه‌كی گه‌ش زۆره، نه‌یارانی گه‌له‌كه‌مان له هه‌ڵوێستی لاوازدان و ئیتر سه‌رده‌می نكۆڵی كردنی گه‌لی كورد به‌سه‌رچووه".
بارزانی زیاتر ده‌ڵێت سه‌ده تارییكه‌كانی كورد به‌سه‌رچووه، سه‌ده‌ی 21 سه‌ده‌ی گه‌یشتنی كورد ده‌بێ به ئاواته‌كانی، له‌و قۆناخه گرنگه‌دا له هه‌موو كات زیاتر پێویستمان به هاوده‌نگی و كاری هاوبه‌شه هه‌یه، بۆ ئه‌وه‌ی بتوانین به باشترین شێوه خزمه‌تی دۆزی كورد بكه‌ین".
سه‌رۆكی هه‌رێمی كوردستان ئاماژه به‌وه‌شكرد "كه ناوچه‌كه له گۆڕانكاری خێرا و یه‌كلاییكه‌ره‌وه دایه، بۆیه پێویسته خۆمان بۆ گۆڕانكارییه‌كان ئاماده‌كه‌ین، راسته ده‌رفه‌ت بۆ گه‌لی كورد هه‌یه، به‌ڵام له هه‌ركاتێكیش زیاتر هه‌ڕه‌شه و مه‌ترسی له‌سه‌ر دۆزی ره‌وای كورد هه‌یه".
بارزانی ئاماژه‌ی به پرۆسه‌ی ئاشتی و ئه‌و گۆڕانكارییانه‌كرد كه له هه‌ڵوێستی توركیا روویانداوه و داواشی له هه‌موو لایه‌ك كرد " هه‌وڵی به‌رده‌وام بده‌ن بۆ سه‌رخستنی پرۆسه‌ی ئاشتی و به پشوو درێژ و وردبینی مامه‌ڵه بكه‌ن، بۆ سه‌رخستنی هه‌رچی زووتری پرۆسه‌ی ئاشتی هیودارم به‌ڕێزم عه‌بدوڵڵا ئۆجه‌لان ئازاد بكرێت، ده‌ستووری توركیا هه‌موار بكرێت بۆ ئه‌وه‌ی هه‌ردوو گه‌لی كورد و تورك به ئاشتی له ته‌ك یه‌كتری بژین".
له باره‌ی رۆژئاوای كوردستانه‌وه، سه‌رۆكی هه‌رێمی كوردستان داوای له هه‌موو پارته كوردییه‌كانی رۆژئاوای كوردستان كرد "پابه‌ندی رێككه‌وتنی هه‌ولێر بن و به برایه‌تی و ته‌بایی هاوكاری یه‌كتربن، نه‌ك له رێگه‌ی چه‌ك و خۆسه‌پاندن رووبه‌ڕووی یه‌كتر ببنه‌وه، به‌كارهێنانی چه‌ك و توندتیژی رێك ئه‌و شته‌یه كه نه‌یارانی گه‌لی كورد له‌و قۆناخه‌دا چاوه‌ڕێی ده‌كه‌ن".
له‌باره‌ی پرسی كورد له رۆژهه‌ڵاتی كوردستان بارزانی گوتی" به هه‌موو توانایه‌ك پشتگیری له رێگه چاره‌ی خه‌باتی ئاشتیانه ده‌كه‌ین و هیوادارین دۆزی ره‌وای كورد له‌و پارچه‌یه‌دا پێشكه‌وتنی باش به‌خۆوه ببینێ، ئه‌وه‌ش وا ده‌زخوازێت هێزه كوردییه‌كانی رۆژهه‌ڵاتیش وتاریان و ریزیان یه‌كخه‌ن، په‌یامی ئاشتی و پێكه‌وه ژیانی گه‌لان هه‌ڵبگرن".
26/05/2013
سه‌عات 10:00ی پێشنیوه‌ڕۆی ئەمڕۆ هەینی له‌مه‌كۆی سه‌ره‌كی بزوتنه‌وه‌ی گۆڕان له‌سلێمانی، به سه‌رپه‌رشتی رێكخه‌ری گشتی، جڤاتی نیشتیمانی بزوتنه‌وه‌ی گۆڕان كۆبوه‌وه.
كارنامه‌ی كۆبونه‌وه‌كه له چه‌ند ته‌وه‌رێكدا خۆی بینییه‌وه، وه‌ك: هه‌لومه‌رجی سیاسی كوردستان و ناوچه‌كه و یه‌كترناسینی دوای هه‌ڵبژاردنه ناوخۆییه‌كان و ئاماده‌كاری بۆ هه‌ڵبژارنه گشتییه‌كانی ئاینده‌ی هه‌رێمی كوردستان و خۆئاماده‌كردن بۆ كۆنفرانسی ئاماده‌كاریی كۆنگره‌ی نیشتمانی بزوتنه‌وه‌ی گۆڕان .
له كۆبونه‌وه‌كه‌دا نه‌وشیروان مسته‌فا، رێكخه‌ری گشتی بزوتنه‌وه‌ی گۆڕان پیرۆزبایی سه‌ركه‌وتنی هه‌ڵبژاردنه ناوخۆییه‌كانی له ئاماده‌بوان كرد و پاشان هه‌لومه‌رجی سیاسی ناوچه‌كه و كوردستانی باس كرد و رۆڵ و پێگه‌ی بزوتنه‌وه‌ی گۆڕانی له ناوچه‌كه‌دا رونكرده‌وه، كه بوه‌ته لایه‌نێكی گرنگی هاوكێشه سیاسییه‌كان، دواتر له‌ڕوی پێكهاته‌ی رێكخراوه‌ییه‌وه جیاوازی نێوان بزوتنه‌وه‌ی گۆڕان و شێوازی هه‌ڵبژاردنه‌كانی له‌گه‌ڵ پارته‌كانی تری هه‌رێمی كوردستاندا خسته‌ڕو و رایگه‌یاند: ئێمه مۆدێلێكی جیاوازمان له حیزبایه‌تی داهێناوه به‌وه‌ی پێكهاته‌ی بزوتنه‌وه‌ی گۆڕانمان له خواره‌وه بۆ سه‌ره‌وه داڕشتوه نه‌ك له سه‌ره‌وه بۆ خواره‌وه، هه‌ر له چوارچێوه‌ی جیاوازییه‌كاندا، رۆڵ و پێگه‌ی ژنی له‌ناو بزوتنه‌وه‌ی گۆڕاندا باس كرد و له‌و روهوه ئاماژه‌ی به‌وه‌كرد، بۆ یه‌كه‌مجاره ژن به ده‌نگی ژن و به كۆتایه‌كی دیاریكراو ده‌چێته سه‌ركردایه‌تی جوڵانه‌وه‌یه‌كی سیاسییه‌وه، ئه‌مه داهێنانێكی نوێی بزوتنه‌وه‌ی گۆڕانه، هه‌ر له‌و روهوه رێكخه‌ری گشتی رۆڵ و پێگه‌ی ژنی له‌خه‌باتی سیاسی و ئاینده‌ی كوردستاندا له بواره جیاوازه‌كاندا به گرنگ وه‌سف كرد.
له‌درێژه‌ی وته‌كانیدا رێكخه‌ری گشتی باسی له رۆڵی بزوتنه‌وه‌ی گۆڕان كرد له كوردستاندا كه به كۆشش و ماندوبونی هه‌مو لایه‌ك له ئۆرگانه جیاوازه‌كانی بزوتنه‌وه‌ی گۆڕان و كه‌سایه‌تییه دیاره‌كانی ده‌ره‌وه‌ی ئۆرگانه‌كان و میدیاكان، له‌چوار ساڵی رابردودا توانراوه مۆدێلێكی نوێ له به‌ره‌نگاربونه‌وه‌ی سیاسی دابهێنرێت له‌بری به‌ره‌نگاربونه‌وه‌ی چه‌كداری.
له ته‌وه‌رێكی تردا نه‌وشیروان مسته‌فا گرنگی و بایه‌خی هه‌ڵبژادنه گشتییه‌كانی ئاینده‌ی كوردستانی باس كرد و پێگه‌ی بزوتنه‌وه‌ی گۆڕانی خسته‌ڕو، له‌مڕوه‌وه باسی ئه‌وه كرا، كه به هه‌مو لایه‌ك هه‌وڵی سه‌رخستنی په‌یامی بزوتنه‌وه‌ی گۆڕان بدرێت، هه‌ر له‌و چوارچێوه‌یه‌دا باسی كۆبونه‌وه‌ی ده‌زگاكانی هه‌ڵبژاردنی لایه‌نه‌كانی ئۆپۆزسیۆن كرا و هاوكاری و هاوئاهه‌نگییان له‌پێناو سه‌رخستنی هه‌ڵبژاردنه گشتییه‌كانی ئاینده‌ی كوردستان به گرنگ باس كرا، پاشان جڤاتی نیشتیمانی به‌تێكڕای ده‌نگ بڕیاریدا، كه (نه‌وشیروان مسته‌فا) وه‌ك سه‌رۆكی قه‌واره‌ی گۆڕان، له هه‌ڵبژاردنه گشتییه‌كانی ئاینده‌ی كوردستاندا بمێنێته‌وه.
دواتر ده‌رگای گفتوگۆ بۆ به‌شداربوانی كۆبونه‌وه‌كه كرایه‌وه‌و چه‌ندین سه‌رنج و پێشنیار خرانه‌ڕو، كه سه‌رجه‌میان له خزمه‌تی ده‌وڵه‌مه‌ندكردنی به‌رنامه‌ی كاری كۆبونه‌وه و سه‌رخستنی په‌یامی بزوتنه‌وه‌ی گۆڕاندا بون.
له پاشنیوه‌ڕۆدا ته‌وه‌ره‌كانی كۆبونه‌وه‌ی جڤاتی نیشتیمانی به‌رده‌وامیی هه‌بو، له‌م به‌شه‌ی كۆبونه‌وه‌كه‌دا خۆئاماده‌كردن بۆ كۆنفرانسی ئاماده‌كاری كۆنگره باس كرا و له‌مڕوه‌وه چه‌ندین سه‌رنج و پێشنیازی به‌سود خرانه‌ڕو، ئاماده‌بوانی كۆبونه‌وه‌كه به تێكڕای ده‌نگ بڕیاری به‌ستنی كۆنفرانسی ئاماده‌كاریی كۆنگره‌یان په‌سه‌ند كرد، بڕیاردرا له ئاینده‌دا به‌مه‌به‌ستی خۆئاماده‌كردن و سه‌رخستنی كاره‌كان، كۆبونه‌وه‌كان به‌رده‌وام بن.
سبەی
25/05/2013
سەرچاوە ناوخۆییەکان ئاماژە بە هاتنەناوەوەی سوپای پاسدارانی ئێران بۆ ناو سنووری ناحییەی سیدەکان دەکەن، بەڵام بەڕێوەبەری ناحییەكە دەڵێ: "هیچ جموجوڵێکی نائاساییمان لە هێزەکانی ئێران نەبینیوە".
هەندێک سەرچاوە ئاماژە بە جووڵەپێکردن و هاتنەناوەوەی هێزەکانی سوپای پاسدارانی ئێران لە ناوچەکانی: کانی رەش، کانی سپی، چاڵاوان و بەرزێوە لە سنووری باڵەکایەتی دەکەن. بەگوێرەی ئەو سەرچاوانە هێزەکانی ئێران لەو ناوچانە سەرقاڵی دروستکردنی بنکەی سەربازی نوێن.
محەممەد ئیسماعیل، بەڕێوەبەری ناحییەی سیدەکان، کە هەندێک لەو ناوچانە دەکەوێتە سنووری بەڕێوەبەرایەتی ناحییەکە بە (رووداو)ی راگەیاند: "بەپێی زانیارییەکانی ئێمە، کە لە پۆلیسی پاراستنی سنوور و هێزەکانی ئاسایش بەدەستمان گەیشتووە، رەوەندی کوردی لەودیو سنوور روو لە ناوچە کوێستانییەکان دەکەن و بۆ ئەو مەبەستە هەڵمەتێکی پاککردنەوەی رێگاوبانی خاڵ و ناوچە سنوورییەکان لەلایەن هێزەکانی کۆماری ئیسلامی ئێران بەڕێوەدەچێت و ئەوەش نەریتێکی ساڵانەیە، کە ئێران لە کۆتایی وەرزی بەهاردا ئەنجامی دەدات".
بەڕێوەبەری ناحیەی سیدەکان: هیچ جموجوڵێکی نائاساییمان لە هێزەکانی ئێران نەبینیوە
محەممەد ئیسماعیل روونیكردوە: "حکومەتی ئێران زستانان ژمارەی بنكە سەربازییەكانی کەم دەکاتەوە و لە وەرزی بەهار و هاوینیش هێزی سەربازی زیاتر لە ناوچە سنوورییەکان جێگیر دەکات، بۆ پاراستنی سنوورەکانی خۆی. لەبەر ئەوە رێژەیەکی زیاتری هێزی ئێران لەسەر سنوور دەبینرێن، بەپێی سەرچاوە سنوورییەکانی هەرێمی کوردستان هیچ جموجۆڵێکی نائاسایی لەلایەن هێزەکانی ئێرانەوە بەدی نەکراوە".
ماڵپەڕی كوردستان میدیای زمانحاڵی حیزبی دیموکراتی کوردستانی ئێران لەو بارەوە راگەیاندووە "ماوەی 4 رۆژە هێزێكی زۆری سوپای پاسداران بە چەكی قورسەوە لەخاڵە سنوورییەكانی پیرانشار جێگیر كراون و شوێنی هێزی ئەرتەشیان گرتووەتەوە، کە تایبەتن بە کۆنترۆڵکردنی سنوورەکان".
هەر لەو بارەوە زۆسک چۆمانی، کە رۆژنامەنووسێکی سنووری باڵەکایەتییە بە (رووداو)ی راگەیاند: "لە بەرزاییەکانی کانی سپی لەنێوان گوندەکانی دۆڵی سەکران‌ی قەزای سۆران، سوپای ئێران لە هەوڵی دروستکردنی بنكەیەكی سەربازی نوێیە، لەكاتێكدا پێشتر 3 بنكەی دیکەی دروستکردبوو لەو سنوورە".
بەڕێوەبەری ناحییەی سیدەکان دەربارەی دروستکردنی بنکەی سەربازی نوێ لەلایەن ئێرانەوە، دەڵێت: "لە سنووری ناحییەی سیدەکان زستانان 12 بنکەی سەربازی هەیە و هاوینان دەکرێنە 20، کە هەندێکیان جێگیرن و بە کۆپتەر لە ورمێوە کەلوپەلی پێویستیان بۆ دەنێردرێت، بۆیە ئەو بنکانە لە سنووری سیدەکان زیاد نەکراون، بەڵام لە سنوورەکانی دیکە من هیچ زانیارییەکەم لەسەر نییە".
ناوچەی باڵەکایەتی لە 160 گوند پێک دێت، کە هەندێک لە گوندەکانی بەهۆی بۆردومانەکانی ئێران چۆڵکراون.
25/05/2013
دوای تەواوبوونی باڵەخانەی نوێی ئەنجوومەنی وەزیرانی ژاپۆن، سەرۆك وەزیرانی ئەو وڵاتە هێشتا دەوامی لەو باڵەخانەیە نەكردووە، ئەویش وەك ئاژانسەكان باسی لێوەدەكەن لە ترسی جنۆكەیە.
ئاژانسی کیۆدۆی ژاپۆنی ئاماژەی بەوە کردووە، شینزۆ ئابی، سەرۆک وەزیرانی ژاپۆن، هێشتا نەچووەتە باڵەخانەی نوێی ئەنجوومەنی وەزیران، بە هۆی ئەوەی رەنگە باوەڕی بە دەنگۆی بوونی جنۆکە کردبێ لە باڵەخانەکە.
جنۆکەكان رۆحی ئەو سەربازە لاوانەن، كە پەیوەندییان بە کودەتای 1936 كردووە
کین کاجایا، پەلەمانتاری پارتی دیموکراتی ژاپۆنی، داوای لە حکومەت کرد روونکردنەوە بدات دەربارەی راستی دەنگۆی بوونی جنۆکە لە باڵەخانەی نوێی ئەنجوومەنی وەزیران.
دەنگۆکان باس لەوە دەکەن، کە جنۆکەكان رۆحی ئەو سەربازە لاوانەن، كە پەیوەندییان بە کودەتای شکستخواردووی شوباتی 1936 كردووە و گیانیان لەدەستداوە.
لەو بارەیەوە ئەمڕۆ هەینی حکومەتی ژاپۆن رایگەیاندووە، كە هیچ زانیارییەکی نییە بە بوونی جنۆکە لە بارەگای نوێی ئەنجوومەنی وەزیران.
ئاژانسی کیۆدۆ
24/05/2013
بەرپرسێکی باڵای سەرۆکایەتی هەرێمی کوردستان دەڵێ، "تاوه‌كوPYD بە سیاسەتەکانیدا نەچێتەوە، سنوور ناکرێتەوە". بەرپرسێکی PYDش دەپرسێ "دەبێ هەڵوێستمان چۆن بێت".
رۆژی دووشەممە 2013/5/20، سەرۆکایەتی هەرێمی کوردستان لە روونکردنەوەیەکدا سەبارەت بە داخستنی سنووری رۆژئاوای کوردستان، رایگەیاند: "لایەنێكی دیاریكراو بە سەفەقاتی گوماناوی خۆی پڕچەككردووە، رۆژ لە دوای رۆژ خۆی لە رێككەوتننامەی هەولێر دوورخستووەتەوە و لایەنەكانی دیكەی پەراوێز خستووە، هەتا كار گەیشتە كوشتن، گرتن، رفاندنی خەڵك و رەچاونەكردنی بۆچوونی لایەنە سیاسییە كوردییەكان".
د. حەمید دەربەندی، بەرپرسی فەرمانگەی پەیوەندییە گشتییەکانی سەرۆکایەتی هەرێمی کوردستان دەربارەی کاتی کرانەوەی سنووری نێوان هەرێمی کوردستان و رۆژئاوای کوردستان رایگەیاند "ئەو بابەتە پەیوەستە بە هەڵوێستی پارتی یەکێتی دیموکراتی PYD و تا ئەو لایەنە بە هەڵوێستی خۆیدا نەچێتەوە سنوور ناکرێتەوە".
د. حەمید دەربەندی کە لە هەمانکاتدا بەرپرسی کەیسی رۆژئاوای کوردستانە لە سەرۆکایەتی هەرێمی کوردستان، راشیگەیاند "تاوه‌كو ئێستا هیچ هەڵوێستێکی ئەرێنیمان لە لایەن PYD نەبینیوە".
لەو بارەوە د. جەعفەر حەنان، نوێنەری پارتی یەکێتی دیموکراتی PYD بە (رووداو)ی راگەیاند "سەرۆکایەتی هەرێمی کوردستان دەڵێ ئێمە سیاسەتی PYD لە رۆژئاوای کوردستان بە سیاسەتێکی هەڵە دەبینین و داواکارە بە سیاسەتەکانماندا بچینەوە. ئێمەش ئەو پرسیارەمان لە سەرۆکایەتی هەرێمی کوردستان هەیە، کە دەبێ هەڵوێستمان چۆن بێت؟ تێکەڵیمان لەگەڵ هیچ وڵاتێک نییە. پابەندی رێککەوتننامەی هەولێرین و لەژێر رکێفی دەستەی باڵای کوردین. ئێمە نازانین سیاسەتی هەڵەی PYD چییە".
جەعفەر حەنان راشیگەیاند "هێزی پێشمەرگە ئێستا لەسەر سنووری رۆژئاوای کوردستانە، ئێمە چاوەڕوانمان نەدەکرد، کە رەوشەکە بگاتە ئەو ئاستە. هیوادارین بەو نزیکانە سنوور بکرێتەوە و کێشەکان چارەسەر بکرێت. هیوای گەلی ئێمە سنووری نێوان رۆژئاوا و باشووری کوردستانە. پەیوەندی و تێکەڵی ئێمەش لەگەڵ دونیای دەرەوە لەڕێگای ئەو دەروازە سنوورییەیە".
نوێنەری PYD لە هەرێمی کوردستان گوتیشی "ئەو یارمەتییەی کە سەرۆکایەتی هەرێمی کوردستان بۆ رۆژئاوای کوردستان رەوانەی دەکات، ئێمە لەبەر چاوی دەگرین و بەرزی دەنرخێنین. بەڵام پێویستە لە هەڵوێست وەرگرتندا بێ لایەنی بپارێزرێت. لەکاتێکدا کە رۆژئاوای کوردستان ئاسایش و هێزی چەکداری خۆی هەیە، لایەنەکانی یەکێتی سیاسی (یەکێتی نێوان 4 لایەنی پارتی دیموکراتی کورد لە سووریا (ئەلپارتی)، هەردوو پارتی ئازادی کورد و پارتی یەکێتی کورد لە سووریا) لێک نزیکبوونەتەوە و هەوڵ بۆ پێکهێنانی هێزێکی سەربازی دەدەن و پشتگیری لەو هەوڵەیان دەکرێت".
ئەو بەرپرسەی PYD رەخنە لە پارتەکانی ئەندام لە ئەنجوومەنی نیشتمانی کورد دەگرێ و دەڵێت "پێشنیازمان کرد کە مادام هەردوو ئەنجوومەنی نیشتمانی کورد و ئەنجوونی گەلی رۆژئاوای کوردستان لەژێر رکێفی دەستەی باڵای کورد دان، با دوو ئەنجوومەنی نەمێنێت و ئەنجوومەنێک پێک بێت، بەڵام ئەو داوایە رەتکرایەوە. رێککەوتننامەیەک مۆر دەکرێت و دواتر کەس بەپێی ئەو رێککەوتننامەیە ناجوڵێتەوە. ئێمە هیوادارین کە گوتار و بەرنامەیەکی هاوبەش و دیاریکراو هەبێت و سەرجەم لایەنەکان بەپێی ئەو بەرنامە دیاریکراوە کار بکەین".
جەعفەر حەنان سەبارەت بە ئەگەری سەردانی سالح موسلیم، هاوسەرۆکی پارتی یەکێتی دیموکراتی بۆ هەولێر دەڵێت "بە مەبەستی چارەسەرکردنی کێشەکان، هەوڵێک لە ئارادایە بۆ ئەوەی کۆبوونەوەی پارت و لایەنە سیاسییەکان لە هەرێمی کوردستان ببەسترێت و بڕیارە لە رۆژانی داهاتوودا کۆبوونەوەکە بەڕێوە بچێت و رەنگە ساڵح موسلیم بۆ ئەو مەبەستە سەردانی هەرێمی کوردستان بکات و لەگەڵ بەرپرسانی باڵای هەرێمی کوردستان کۆببێتەوە".
24/05/2013
کۆمپانیای ئێران خودرۆ بۆ دروستکردنی ئۆتۆمبێل رایگەیاند ''هەموو ئامادەکارییەک تەواو بووە، بۆ دروستکردنی ئۆتۆمبێل لە ناوچەی ئەسکەندەریەی پیشەسازی لە پارێزگای بابل، یەکێ لە تایبەتمەندییەکانی ئەم ئۆتۆمبێلانە بۆ گەرمای عێراق دروستکراوە''.
قوسەی جومعە عەبادی، ئەندامی لیژنەی ئابووری لە پەرلەمای عێراق هەواڵەکەی بۆ (رووداو) پشتڕاستکردەوە و گوتی ''ئێمە لە پەرلەمانی عێراق وەکو لایەنێکی چاودێری ئاگاداری دامەزراندنی کۆمپانیای کۆکردنەوەی ئۆتۆمبێلی ئێرانین لە ناوچەی ئەسکەندەرییە لە پارێزگای بابل، هەروەها عێراق لە رێگەی کۆمپانیا ئێرانییەکانی تایبەت بە دروستکردنی ئۆتۆمبێل لە ساڵی رابردوودا نزیکەی 44 هەزار ئۆتۆمبێلیان هاوردە کردووە''.
عەبدولعەزیم سەعدیان، جێگری بەڕێوەبەری کۆمپانیای ئێران خودرۆ بۆ دروستکردنی ئۆتۆمبێل لە بەیاننامەیەکدا رایگەیاند، سەرجەم ئامادەکارییەکان تەواو بووە بۆ دروستکردن و کۆکردنەوەی ئۆتۆمبێل لە ناوچەی ئەسکەندەریە و توانای دروستکردنی 30 هەزار ئۆتۆمبێلی دەبێت لە ساڵێکدا، کە تایبەتمەندییەکی سەرەکی ئەوەیە بەرگەی گەرمای عێراق دەگرێت، هەروەها لە جۆری سەمند و رانان'.
عەبدولعەزیم سەعدیان، باس لە تایبەتمەندی و مێژووی هەناردەکردنی ئۆتۆمبێلی ئێرانی دەکات بۆ عێراق و دەڵێت ''نزیکەی دە ساڵە ئێمە ئۆتۆمبێل بۆ عێراق هەناردە دەکەین، دوای ئەوەی لەگەڵ کۆمپانیای دروستکردنی ئۆتۆمبێل لە عێراق چەندین گرێبەستمان مۆر کردووە و تا ئێستاش هەناردەکردنی ئۆتۆمبێل بەردەوامی هەیە، ئۆتۆمبێلەکانی سەمند و رانا بەرگەی50 پلەی گەرمی و 30 پلەش لە ژێر سفرەوە دەگرێت ''.
ئۆتۆمبیلەکانی سایبەی ئێرانی کە چەند ساڵێکە هاوردەی عێراق کراوە رووبەڕووی رەخنەی زۆر بووەتەوە، لەوانە لاوازی تەکنەلۆژیاکەی و کەمی تووندو تۆڵی، بەڵام لە بەر ئەوەی لە بەکارهێنانی بەنزین زۆر کەم خەرج ده‌كات بۆیە هێشتا داواکاری لە سەری هەیە.
24/05/2013
-ناوەندی لاوانی چۆمان بە هاوكاریی تێبینەرایەتی ئەوقافی چۆمان یارمەتی و هاوكاری بۆ كوردانی ڕۆژ ئاوا كۆدەكەنەوە.
كارگێری ناوەندی لاوانی چۆمان، كەمال سەدرەدین، بە ئاژانسی هەواڵی پەیامنێری ڕاگەیاند: بەمەبەستی یارمەتیدانی كوردانی ڕۆژئاوا لە كەمپی دومیز، ناوەندی چالاكی و پێگەیاندنی لاوانی چۆمان بە هاوكاریی تێبینەرایەتی ئەوقافی چۆمان هەڵمەتێكی كۆكردنەوەی یارمەتی و هاووكاریان دەست پێكردووە و ڕێژەیێكی زۆر لە كەل و پەل و خۆراكیان كۆ كردووتەوە. دوای كۆتایی هاتنی كۆكردنەوەی یارمەتیەکان، لیژنەیەک پێک دێت و یارمەتییەکان دەگەیەنێتە كەمپی دومیز.
رائب زراری/م.ش
pna
25/05/2013
- ژمارەیەک لە چالاکانی سیاسی، مەدەنی و میدیایی کوردستان داوای هەڵوەشاندنەوەی سزای لەسێدارەدانی پەخشان عەزیزی و هەموو زیندانیانی سیاسیی سزادراو بە لەسێدارەدان دەکەن
- ئێران..کۆبوونەوەکەمان لەگەڵ وڵاتانی ئەورووپا ئەرێنی بوو
- مەزڵوم عەبدی و نوێنەری سەرۆک بارزانی کۆدەبنەوە
- ئەمڕۆ شاندی دەمپارتی بۆ گەیاندنی پەیامی ئۆجەلان لەگەڵ ئاکپارتی کۆدەبێتەوە
- خراپترین دراوەکانی جیهان لە ساڵی 2024 دا
- تولای حاتەمئۆگیولاری: دیدار بەس نییە، دەبێت دەرگاکانی ئیمراڵی بکرێنەوە
- کامیان مەترسیدارترن: ئێران یان ئیخوان؟
- ههسهده و چەک؛ هاوکێشە سەختەکە لە بنیاتنانەوەی سوپای سوریادا
- ئیدارەی نوێی سوریە ئەمیرێكی پێشوی بەرەی نووسرەی وەك سەرۆكی دەزگای هەوالگریی سوریە دیاری كڕد
- وەزیری دەرەوەی روسیە دەلێ دەگەل ئیدارەی تازەی سوریە پەیوەندیمان هەیە
- ئیسرائیل فرۆكەخانەی نێودەولەتی سەنعا لە یەمەن بۆمباران كرد
- شاندێكی بالای عێراقی دەگەل ئیدارەی نوێی سوریە دیداری كرد
- دوای روخانی رژیم بەعسی ئەسد، عەلەوییەكان چییان بەسەر دێت
- وەزیری دەرەوەی ئیسرائیل دەلێت: هێرشەكان دژ بە كوردەكان دەبێ بوەستێنرێن
- چیروکی نەبیستراویی ناو زیندانەكانی سوریە
- حشدی شەعبی هەرشە لە توركیەدەكات
- ترامپ دەلێ: لە هیچ لایەك قەبوول ناكەیین جێگرەوەی دۆلار بەرهەم بێنێت
- ناوەرۆكی دیداری نێوان وەزیری دەرەوەی ئێران و بەشار ئەسەد بلاوبووە
- فەرانسە رێگای بەكارهێنانی مووشەكی دورمەودای بە ئوكرایین دا كە لە دژی روسیە بەكاری بێنێت
- جۆزف بۆرێل دەلێ: بیرت لە لێواری دارماندایە
- پیرۆزبایی بزووتنەوەی کۆماریخوازانی ڕۆژهەڵاتی کوردستان بە بۆنەی جێژنی پیرۆزی قوربان
- پەیامی پیرۆزبایی بزووتنەوەی کۆماریخوازانی رۆژهەڵاتی کوردستان بە بۆنەی پێنجەمین کۆنگرەی ئاسایی هەدەپە
- پەیامی پیرۆزبایی بزوتنەوەی کۆماریخوازی ڕۆژهەڵاتی کوردستان بە بۆنەی جێژنی ڕەمەزانی پیرۆزەوە
- راگەیەندراوی بزووتنەوەی کۆماریخوازان بەبۆنەی رۆژی جیهانی کرێکاران
- بزووتنەوی کۆماریخوازان ئیدانەی هێرشەکانی رێژیمی تورکیە بۆ سەر باشووری دەکا
