ئەمرۆ یەكشەممە 30 ی حوزەیرانی 2013، ئاهەنگی دەرچوونی یەكەمین خولی قوتابیانی خوێندنی باڵای زانكۆی مێردین لە باكووری كوردستان بەڕێوەدەچێت .

ژمارەیەك كەسایەتی كورد بۆ ئەو رێوڕەسمە داوەتكراون، لەوانەش د. عیسمەت خالد، وەزیری پەروەردەی هەرێمی كوردستان و نووسەر و سیاسەتمەداری كورد فەلەكەدین كاكەیی.

لەبارەی بەشداریكردنی لەو بۆنەیەدا فەلەكەدین كاكەیی، بۆ (رووداو) گوتی:" بۆنەیەكی مێژووییە، چونكە یەكەمجارە لە باكووری كوردستان و توركیا شتێكی بەوشێوەیە رووبدات ".

فەلەكەدین كاكەیی، زیاتر گرنگییەكە لەوەدا دەبینێتەوە كە بۆ یەكەمجارە رێوڕەسمێك بۆ دەرچووانی خوێندنی زمان و رۆشنبیری كوردی لە باكووری كوردستان و توركیا بەڕێوەبچێت .

فەلەكەدین كاكەیی گوتیشی:" بەوشێوەیە زانكۆی مێردین دەچێتە نێو مێژووەوە".

30/06/2013

سەرۆكی هەڵبژێردراوی ئێران لە ناوەندی دەنگ و رەنگی ئێران رایگەیاند "ئێمە كۆمەڵگایەكی فرەنەتەوەمان نییە، بەڵكوو یەك هەرێمی ئێران و یەك نەتەوەی ئێرانیمان هەیە كە لە بواری مەعنەوی ئیسلامدا هەناسە دەدەین."

رۆحانی رەخنەی لە ناوەندی دەنگ و رەنگی ئێران گرت و گوتی:"ئێمە دەبێت بە شێوەیەك هەنگاو بنێین كە هەر هاووڵاتییەكی ئێرانی هەست بەوە بكات پێداویستییەكانی خۆی لە میدیای نیشتمانی خۆی دەبینێتەوە."

حەسەن رۆحانی لە بەشێكی دیكەی وتارەكەیدا ئاماژەی بەوەدا حكومەتێك كە رەگی لە پشتیوانی خەڵكدا كوتاوە و شەرعیەتی خۆی لە دەنگدانی خەڵك وەرگرتووە، نەك لە میدیای ئازاد ناترسێت، بەڵكوو بە هەبوونی میدیای ئازاد و یاسایی پێگەكانی بەهێزتر دەبێت.

رۆحانی داوای لە هێزەكانی سەر بە وەزارەتی ناوخۆ كرد بەرامبەر شادی و خۆشیەكانی خەڵك دان بەخۆیاندا بگرن و گووتی :"شادی و خۆشی مافی خەڵكە، بچووككردنەوەی خەڵك قبووڵ ناكرێت، لەگەڵ كچ و كوڕاندا با وەك كچ و كوڕی خۆمان قسە بكەین، ئەگەر هەندێ كاتیش پێویست بە سەرزەنشت بكات دەبێت بە شێوەیەك بێت كە كەرامەت و كەسایەتییان نەشكێت".

رۆحانی ئەوەشی خستەڕوو هەموو مرۆڤێك لە جێگەی خۆیدا رێزی هەیە، بەتایبەت كەسانێك كە لە ناوخۆی وڵاتدا وەك هاووڵاتی ناوزەد دەكرێن.

گووتیشی" ناكرێت ئەگەر زوڵمێك لە وڵاتی دوژمن روویدا بڵێین زوڵمە بەڵام ئەگەر هەمان زوڵم لە وڵاتێكی دۆستمان روویدا بڵێین زوڵم نییە یان كەمتر زوڵمە".

حەسەن رۆحانی لە رۆژی 14حوزەیرانی 2013، لەلایەن خەڵكی ئێرانەوە بۆ ماوەی 4 ساڵ بۆ پۆستی سەرۆكایەتی ئێران هەڵبژێردرا و وابڕیارە لە رۆژی 3-8-2013 بە شێوەیەكی رەسمی لەلایەن عەلی خامنەیی رێبەری ئێران دەسەڵاتی سەرۆكایەتی پێبدرێت.

عومەر شایان
رووداو- ئاژانسەكان

30/06/2013

یەكێتی و پارتی رێككەوتن هەڵبژاردنی سەرۆكایەتیی هەرێمی كوردستان دوابخرێت، هاوكات خستنە ریفراندۆمی پرۆژەیاسای دەستووریش دوابخرێ.
بەپێی زانیارییەکانی ماڵپەڕی (رووداو)، لە كۆبوونەوەی دوێنێ شەممە 29-6-2013ی هەردوو مەكتەبی سیاسیی پارتیی دیموكراتی كوردستان و یەكێتیی نیشتمانیی كوردستان، كە دوور لە چاوی كامێراكان لە سلێمانی بەڕێوە چوو، هەردوولا لەسەر پرسەكانی دواخستنی ریفراندۆم لە سەر دەستوور، سازانی نیشتمانی و هەڵبژاردنی سەرۆكایەتیی هەرێمی كوردستان رێككەوتن.
لە ئەنجامی گفتوگۆكان پارتیی دیموكراتی كوردستان رازی بووە بەوەی، كە دەستوور نەخرێتە ریفراندۆمەوەو سازانێكی نیشتمانی لەسەر ئەنجام بدرێت.
هەر بەپێی زانیارییەكان، هەروەها بڕیار دراوە كە هەڵبژاردنی سەرۆكایەتیی هەرێمی كوردستان بۆ ماوەی دوو ساڵ دوا بخرێت، بە شێوەیەك كە ئەم دوو ساڵە زیاد نەكرێت و قابیلی درێژكردنەوە نەبێت.
بڕیارە لە دانیشتنی ئەمڕۆی پەرلەمانی كوردستانیشدا، تاوتووی ئەم بابەتە بكرێت و بخرێتە دەنگدانەوە.

30/06/2013

سەرۆک مەسعوود بارزانی، لە درێژەی سەردانەکەیدا بۆ دەرەوەی وڵات، گەیشتە پاریس و لەلایەن سەرۆک کۆماری فەرەنساوە لە کۆشکی کۆماریی پێشوازیی لێکرا.


بە گوێرەی سەرچاوەی هەواڵمان، لە دیداری نێوان فرانسۆ هۆلاند سەرۆک کۆماری فەرەنسا و مەسعوود بارزانی سەرۆکی هەرێمی کوردستاندا، باس لە پێوەندییەکانی نێوان هەرێمی کوردستان و فەرەنسا و چەند پرسێکی ناوچەکە دەکرێت.

شاندی هاورێی سەرۆک مەسعوود بارزانی ، لە فوئاد حسێن سەرۆکی دیوانی سەرۆکایەتی هەرێمی کوردستان، عیماد ئەحمەد جێگری سەرۆکی حکوومەتی هەرێمی کوردستان، مەسرور بارزانی سەرۆکی دەزگای ئەنجوومەنی ئاسایشی هەرێمی کوردستان و فەلاح مستەفا بەپرسی پێوندییەکانی دەرەوەی حکوومەتی هەرێمی کوردستان پێکهاتووە.
سەرۆکی هەرێمی کوردستان، لە ١٩/٦/٢٠١٣ بۆ بەشداریی لە کۆربەندی سانت پتروسبۆرگی ئابووری نیودەولەتی لە روسیا، سەردانەکەی بۆ دەرەوەی وڵات دەست پێکرد.
پێشتریش لە سالی ٢٠١٠دا، سەرۆکی پێشووی فەرەنسا، نیکۆلا سارکۆزیی لە کۆشکی کۆماریی ئێلیزێ، پێشوازیی لە سەرۆک مەسعوود بارزانی کردبوو.

بەرگەشت ئاکرەیی/ش.ب
pna

29/06/2013

سه‌رۆكایه‌تی هه‌رێم له‌ لێدوانێكدا سه‌باره‌ت به‌ رووداوه‌كانی عاموده‌ نیگه‌رانی خۆی ده‌ربڕی و هیوای خواست به‌زووترین كات كۆتایی به‌ كێشه‌كان بهێنرێت و دوپاتی كرده‌وه‌ كه‌ نابێت به‌ هۆیچ شێوه‌یه‌ك په‌نا بۆ چه‌ك ببردرێت، راشیگه‌یاند، دەبێ هەموو لایەنە کوردستانییەکان بە ڕۆحێکی بەرپرسیارانەوە خوێنڕشتنی کورد بە دەستی کورد حەرام بکەن.

ئه‌مه‌ش ده‌قی لێدوانه‌كه‌ی گووته‌بێژی سه‌رۆكایه‌تی هه‌رێمه‌:

سەرۆکایەتیی هەرێمی کوردستان لە بارەی ڕووداوەکانی چەند ڕۆژی ڕابردووی شاری عامودا لە رۆژائاوای کوردستان نیگەرانە و هیواخوازە هەرچی زوتر هەموو لایەک کۆتایی بە کێشە و ناکۆکییەکان بهێنن.
هەڵوێستی خۆمان دوپات دەکەینەوە کە نابێت بە هیچ شێوەیەک بۆ چارەسەری کێشەکان، پەنا بۆ چەک ببردرێت و دەبێت لە ڕێگای دیالۆگ و لێکتێگەیشتن کۆتایی بە گرفتەکان بهێندرێت.
دەبێ هەموو لایەنە کوردستانییەکان بە ڕۆحێکی بەرپرسیارانەوە خوێنڕشتنی کورد بە دەستی کورد حەرام بکەن و نابێت لە هیچ دۆخیکدا ڕێگا بدەن لە ڕێی چەک و ‌هێزەوە ناکۆکییەکان یەکلایی بکەنەوە.

دکتۆر ئومێد سەباح
گوتەبێژی فەرمیی سەرۆکایەتیی هەرێمی کوردستان
29ـی 6ـی 2013

گرژیی سیاسیی نێوان ڕیاز و مۆسکۆ، بە هۆی قەیرانی سووریا تونتر بووەتەوە و ڕووسیا، هەڕەشەی بۆردومانکردنی هەریەک لە ڕیاز و دەوحە دەکات.
ڕۆژنامەی "دیار"ـی لوبنانی، ئەمڕۆ شەممە بڵاوی کردووەتەوە، گرژیی سیاسیی نێوان ڕیاز و مۆسکۆ، بە هۆی قەیرانی سووریا تونتر بووەتەوە و تۆمەتبارکردنی یەکدی لە دوو ڕۆژی ڕابردوودا گەیشتووەتە ئاستێک، گەورەبەرپرسێکی سەربازیی ڕووسیا ئاستی گرژییەکان بە ئاقاریکی چاوڕواننەکراودا ببات و بڵێت، وڵاتەکەی پلانی ئامادەی هەیە بۆ بۆردومانکردنی ڕیاز و دەوحە.
سەرباری ئەوەی کە پێوەندییەکانی ڕووسیا و سعوودیە هەڵبەز و دابەزی بە خۆیەوە بینیوە، بەڵام نەگەیشتووەتە ئاستی ئەمڕۆی و نێوان وەزیری سعوودیە لە کۆبوونەوەیدا لەگەڵ وەزیری دەرەوەی وڵاتە یەکگرتووەاکنی ئەمەریکادا کە چەند ڕۆژێک لەمەوبەر بوو، ڕووسیای بە پشتیوانیکردنی ڕژێمەکەی ئەسەد لە کۆمەڵکوژیی سووریاییەکان تۆمەتبار کرد.
لای خۆیشیەوە، گوتەبێژ بە ناوی وەزارەتی دەرەوەی ڕووسیاوە، ڕایگەیاند، "عەرەبستانی سعوودیە، پشتیوانی لە تیرۆر دەکات.

29/06/2013

نیلسۆن ماندێلا وەسێتنامەیەکی بڵاکردەوە کە لەسەر پارچەیەک کاخەز نوسیویەتی و تێیدا داوادەکات لەشوێنی لەدایکبوونی باوباپیرانی بنێژرێت.
ئەمڕۆ شەممە )٢٩ی حوزەیرانی 2013) پێگەی دەیلی مەیڵ بڵاویکردەوە، (نیلسۆن ماندێلا)ی تەمەن 94 ساڵ و سەرۆکی پێشوی ئەفریقای باشور پاش ئەوەی 21 رۆژ لەمەوبەر و بەهۆی خراپی باری تەندروستییەوە رەوانەی نەخۆشخانە کرا، وەسێتنامەیەکی لە پارچەیەک کاخەزدا نوسیوە.
ماندێلا کە ئێستا لە نەخۆشخانە لە دۆخێکی مەترسیدار بەڵام جێگیردایە، لە وەسێتنامەکەیدا تەنها داوای کردووە لە شوێنی لە دایکبوونی باو باپیرانی و لەسەر گردێکی گوندی (کونو)ی شوێنی لە دایکبوونی، بنێژرێت.
پێشتر لە ساڵی 1996دا و لەو کاتەدا کە هێشتا لەژیانی سەرۆکایەتیدا بوو، ماندێلا وەسێتنامەیەکی ئاسایی بڵاوکردەوە و تێیدا داوای مەراسیمێکی سادەی ناشتنی کردبوو لە شوێنی لەدایکبوونیدا، هەروەها راشی گەیاندبوو، لەکاتێکدا کە خۆشحاڵە بە بوونی مەراسیمێک لە چوارچێوەی خزمەتی وڵاتەکەیدا لە شاری (پێرتۆریا) لە باشوری ئەفریقا، بەڵام خوازیارە کە تەنها بەردێکی ئاسایی وەک کێلی قەبرەکەی بەکاربهێنرێت تەنها بۆ ناسینەوەی قەبرەکەی.
لە هەواڵەکەدا هاتووە، هاوڕێیەکی کۆنی ماندێلا بە ئاژانسەکانی هەواڵی ئەفریقای باشوری راگەیاندووە "ماندێلا هەرگیز بایەخێکی ئەوتۆی بە بیرکردنەوە لە مردن نەداوە، بەڵام هەرگیز شتێکی تایبەتی بۆخۆی نەویستووە".
سەرەڕای ئەو راستییەی کە ماندێلا کتێبێکی بەناوی (ڕێگایەکی درێژ بۆ سەربەستی) و چەندین کاری هونەری دیکەی هەبووە و توانیویەتی لەو رێگایەوە بە ملیۆنەها پارەی دەستبکەوێت، بەڵام وەسێتنامەکەی بە تەنها پێک هاتبوو لە چەند دێڕێک لەسەر پارچەیەک کاخەزی (A4).

لە کۆتاییدا هەواڵەکە ئاماژەی بە سەردانێکی ئەمڕۆی (باراک ئۆباما) سەرۆکی ویلایەتە یەکگرتووەکانی ئەمریکا و خانمی یەکەمی ئەو وڵاتە (میشێل ئۆباما) کردووە، تا لە نزیکەوە چاویان بە خێزانەکەی ماندێلا بکەوێت، هەر دوێنێش خێزانی پێشوی (نیلسۆن ماندێلا ) رایگەیاندبوو کە دۆخی ماندێلا بەرەو باش بوون رۆیشتووە.

لە ئینگلیزییەوە هاوڕێ فەریق

xendan
سەرچاوە دەیلی مەیڵ

سكرتێری پارتی دیموكراتی پێشكەوتنخوازی كورد لە سووریا رایدەگەیەنێت، كە قبوڵ ناكەن PYD كۆنترۆڵی رۆژئاوای كوردستان بكات. ئاماژە بەوەش دەكات بەشار ئەسەد سێ جار داوای كۆبوونەوەی لێكردووەو ئەو رەتیكردووەتەوە.

حەمید حەجی دەروێش، یەكێكە لە كۆڵەگەكانی بزووتنەوەی سیاسی كورد لە رۆژئاوای كوردستان، ئەو كۆنترین سیاسەتمەداری رۆژئاوای كوردستانە كە لە ژیاندا مابێت، سكرتێری پارتی دیموكراتی پێشكەوتنخوازی كوردە لە سووریا و دۆستێكی نزیكی جەلال تاڵەبانی، سەرۆك كۆماری عێراقە و ئێستا لە سلێمانی دادەنیشێت.

دەروێش باسی پەیوەندییەكانی دەكات لەگەڵ بزووتنەوەی كورد لە باكووری كوردستان. هەروەها باسی دیدارەكانی لەگەڵ بارزانی، بوركای و ئۆجەلان دەكات. دەڵێ لەكاتی چاوپێكەوتنی لەگەڵ موراد قەرەیلان، سەرۆكی كۆنسەی كۆما جڤاكێن كوردستان KCK، داوای لێكردووە ئەو پرۆسەیە بەشێوەیەكی سیاسی تەواو بكەن.

دەروێش لە هەڤپەیڤینێكیدا لەگەڵ (رووداو) لەبارەی پەیوەندی نێوان پارتەكەی و PYD گوتی "ئێمە لەسەر دوو خاڵ رێككەوتین، یەكەم: شەڕكردن لەگەڵ رژێم. دووەم: شەڕكردن لە دژی ئەو گرووپە توندڕەوانەی پەلاماری كوردستان دەدەن و یەكێكیان نەواف بەشیرە. تەنانەت هەندێك لەو گرووپانە گوتیان حەمید و هاوڕێكانی ئێمەیان تێكشكاند، نەك PYD. ژمارەیەكیان لەلایەن ئێمەوە وەكو دیل دەستبەسەركران. رۆژانە تەلەفۆنی برادەران و PYDشم دەكرد و پێمدەگوت نابێت پەنجەی یەكێك لەو دیلانە بریندار ببێت. دەبێ بە باشی رەفتاریان لەگەڵدا بكرێت".

حەمید حەجی دەروێش لەبارەی پەیوەندی PYD لەگەڵ رژێمی سووریا دەڵێ "دەڵێن PYD لە ناوچە كوردییەكان دەوروتەسلیمی لەگەڵ رژێم كردووە. ئەوە شتێكی باشە. ئەوان كاتێك هەرێمەكەمان، عفرین، كۆبانی و جزیرە رادەستی ئێمە بكەن، بەسەرچاو. ئەگەر بەبێ شەڕ و فڕۆكە قامشلۆش رادەستی ئێمە بكەن ئێمە مەمنوونیان دەبین".

بەڵام ئەگەر PYD كۆنترۆڵی رۆژئاوای كوردستان بكات، هەڵوێستیان چی دەبێت؟ حەمید حاجی دەروێش دەڵێ "ئەو كاتە ئێمە قبوڵ ناكەین ، ئێمە پارتی پێشڤەرۆین، ئێمە هەروا بێدەنگ نابین و شەڕێكی توند دەكەین".
سەبارەت بە پەیوەندی پارتەكەیان لەگەڵ حكومەتی سووریا، ئایا ئەگەر داوایان لێبكرێت لەگەڵ رژێم دادەنیشن؟ حەمید حەجی دەروێش گوتی "پەیوەندیمان لەگەڵ حكومەت نییە، بەڵام ئەگەر داوامان لێبكرێت و بەبڕیاری پارتە كوردییەكان بێت، ئێمە لەگەڵی دادەنیشین".

گوتیشی "بەشار ئەسەد، سەرۆكی سووریا سێ جار داوای لێكردم لەگەڵی كۆببمەوە، بەڵام قبوڵم نەكرد. ئەو فڕۆكەی كە پێویست بوو لەگەڵی بچمە دیمەشق، بۆ ماوەی نیو سەعات چاوەڕێی كردم لە فڕۆكەخانەی قامشلۆ. بەڵام نەچووم. زۆر هەوڵیاندا بەڵام هەر نەچووم".

rudaw

29/06/2013

جێگری سەرۆك وەزیرانی سووریا رایگەیاند "رووسیا، ئێران و چین هەر مانگێك بڕی 500 ملیۆن دۆلار دەبەخشنە رژێمی سووریا".

قەدری جەمیل، جێگری سەرۆك وەزیرانی سووریا بە رۆژنامەی فاینەنشاڵ تایمزی راگەیاندووە "رووسیا، ئێران و چین لە رووی سیاسی، ئابووری و سەربازییەوە هاوكاریی سووریا دەكەن و هەر مانگێك بڕی 500 ملیۆن دۆلار دەبەخشنە رژێمی سووریا".

قەدری جەمیل كە بە رەگەز كوردە، ئەوەشی خستووەتەڕوو "رژێمی سووریا مامەڵە ئابوورییەكانی خۆی بە ریاڵی ئێرانی، رۆبڵی رووسی و یوانی چینی ئەنجام دەدات، بۆ ئەوەی خۆی لە سزای وڵاتانی رۆژئاوا بەدوور بگرێت".

جەختیشی لەوە كردەوە "هەرسێ وڵات لە ئەگەری هەر هێرشێكی دەرەكیدا هاوكاریی سووریا دەكەن".

قەدری جەمیل، كە خۆی وەك ئۆپۆزیسیۆنی نێوخۆیی سووریا دەزانێت گوتی "رەوشی ئابووری سووریا زۆر ئاڵۆز بووە، بەڵام تاوەكو ئێستا نەگەیشتووەتە ئاستێك كە بەتەواوی تێكبچێت".

29/06/2013

سەرۆک مەسعوود بارزانی، لە درێژەی سەردانەکەیدا بۆ دەرەوەی وڵات، گەیشتە پاریس و پاش کەمێکی تر لەلایەن سەرۆک کۆماری فەرەنساوە لە کۆشکی کۆماریی پێشوازیی لێدەکرێت.
بە گوێرەی سەرچاوەی هەواڵمان، لە دیداری نێوان فرانسۆ هۆلاند سەرۆک کۆماری فەرەنسا و مەسعوود بارزانی سەرۆکی هەرێمی کوردستاندا، باس لە پێوەندییەکانی نێوان هەرێمی کوردستان و فەرەنسا و چەند پرسێکی ناوچەکە دەکرێت.

سەرۆکی هەرێمی کوردستان، لە ١٩/٦/٢٠١٣ بۆ بەشداریی لە کۆربەندی سانت پتروسبۆرگی ئابووری نیودەولەتی لە روسیا، سەردانەکەی بۆ دەرەوەی وڵات دەست پێکرد.

پێشتریش لە سالی ٢٠١٠دا، سەرۆکی پێشووی فەرەنسا، نیکۆلا سارکۆزیی لە کۆشکی کۆماریی ئێلیزێ، پێشوازیی لە سەرۆک مەسعوود بارزانی کردبوو.

بەرگەشت ئاکرەیی/ش.ب

pna
29/06/2013