پاش ئەوەی باراک ئۆباما سەرۆکی ئەمریکا بەبۆنەی مانگی ڕەمەزانەوە پیرۆزبایی خۆی ئاڕاستەی موسوڵمانانی جیهان کرد، بەکارهێنەرێکی تۆڕی کۆمەڵایەتی تویتەر وەڵامی ئۆبامای دایەوە و وەڵامەکەش بووە جێی سەرنجی میدیاکانی جیهان.

پێگەی ئێن سۆن هەبەری تورکیا بڵاویکردەوە، پاش ئەوەی دوو ڕۆژ لەمەوبەر باراک ئۆباما سەرۆکی ئەمریکا بەبۆنەی دەستپێکی مانگی ڕەمەزانی پیرۆزەوە، پیرۆزبایی خۆی ئاڕاستەی موسوڵمانانی جیهان کرد، کەسایەتی بەناوبانگی بواری کۆمیدی به‌ناوی (فرانکی بۆیل)ی بەڕەگەز سکۆتلەندی، وەڵامێکی توندی ئۆبامای دایەوە.

باراک ئۆباما لەسەر لاپەڕەی تایبەتی خۆی و لەتۆڕی کۆمەڵایەتی تویتەر پیرۆزبایی خۆی ئاڕاستەی موسوڵمانانی جیهان کرد و تێیدا هاتبوو "خوازیارم ببێتە مانگێکی پیرۆز و خۆشی هێن بۆ خێزانەکان و ببێتە مانگی ئاشتی و لێک تێگەیشتن بۆ موسوڵمانانی ئەمریکا و سەرتاسەری جیهان".

فرانکی بۆیل بەڕەگەز سکۆتلەندی، لە بەرامبەر پیرۆزباییەکەی ئۆبامادا وەڵامێکی توندی ئۆبامای دایەوە و بە توانجەوە وتی " پێرۆزباییه‌كه‌ت بۆ ئەو کەسانەیه‌ کە له‌ گوانتانامۆدا بەزۆر خۆراکییان پێدەدەی ؟ یان بۆ ئه‌و کەسانەیه‌ کە بۆمبارانیان دەکەی؟".

ئەم لێدوانانەی بۆیل لە وەڵامی ئۆبامادا بووە جێی سەرنجی میدیاکانی جیهان، پێگەی (تویچی) وەڵامی ژمارەیەکی زۆر لە بەکارهێنەرانی تۆڕی کۆمەڵایەتی تویتەری خستە ڕوو کە بەشێوازی جیاجیا پشتگیری خۆیان بۆ ئەم ئەکتەرە کۆمیدییە دەربڕیووە کە نزیکەی 1.4 ملیۆن شوێنکەوتووی هەیە لە تویتەر-دا.

باراک ئۆباما لە لێدوانێکیدا لە 30ی نیساندا بەڵێنی داخستنی گرتوخانەی گوانتانامۆی ڕاگەیاند، بەڵام بیانوی نەبوونی هەماهەنگی هێناوە، لەلایەن کۆنگرێسی ئەمریکاوە.

لە ئینگلیزییەوە هاوڕێ فەریق

xendan

12/07/2013

بەپێی بەڵگەنامەیەكی سعودی كە لێی نوسراوە زۆر نهێنی و دەست رووداو كەوتووە، ئەو وڵاتە هەر لەسەرتاوە دژایەتی خۆی بۆ محەممەد مورسی، سەرۆكی لە كارلابروای میسر دەربڕیوە.

دیكۆمێنتەكە لەلایەن وەزیری دەرەوەی ئەو وڵاتە نێردرواوە بۆ باڵوێزخانەی سعودیە لە میسر، تێیدا داوا دەكات هەموو رێوشوێنێك بگەرنەبەر بۆ رێگەگرتن لە كاندیدەكانی ئیخوان موسلیمین بەتایبەت لە هەڵبژاردنەكانی ساڵی 2012 دا.

بەڵگەنامەكە كۆپیەكی دەست رێبوار كەریم وەلی، نێردراوی تۆڕی میدیای رووداو بۆ قاهیرە كەوتووە، كە واژووی وەزیرەی دەرەوەی سعودیەی پێوەیەو لەسەری نوسراوە زۆر نهێنی.

هەردوو وڵاتی سعودیە و ئیمارات بەوە ناسراون كە سپۆنسەری خۆپیشاندانەكانی 30ی مانگی رابردوویان كرد كە توانیانیان محەمەد مورسی، لە رێگەی هاوكاری كودەتای سوپای میسر لەسەر كورسی دەسەلات بهێننە خوارەوە.

دوای رووخانی حكومەتی میسریش سعودیەو ئیمارات 8 ملیار دۆلاریان وەك هاوكاری پێشكەش بەو وڵاتەكرد.

هاوكات ئەم بەڵگەنامەیە هیچ لایەنێی فەرمی پشتراستی نەكردۆتەوە كە راستە، وڵاتی سعودیەش چەندین جار رەتیكردۆتەوە كە دەستی لە كاروباری ناوخۆی میسر وەردابێت.

12/07/2013

شاندێکی پزیشک و تەندروستکارانی کۆماری ئیسلامیی ئێران کرد، سەردانی بەرێوەبەرایەتی گشتی تەندروستی گەرمیانیان کردو بە وتەی سەرچاوەیەک شاندەکە بە نیازن لە دەڤەری گەرمیان کلینکێکی گەورەی پزیشکیی بکەنەوە.

لەو بارەیەوە د.حەسەن رەمەزان ناسر، بەڕێوەبەری گشتی تەندروستی گەرمیان، بە ئاژانسی ھەواڵی پەیامنێری راگەیاند؛ وەکو تەندروستی گەرمیان ھەموو ھاوکاری و پشتگیرییەکی ئەو شاندە پزیشکییە دەکەین، چونکە پێویستی زۆریان بە ئەزموون و شارەزایی پزیشکانی کۆماری ئیسلامیی ئێران دەبێت بەتایبەت لەو پسپۆرییانەی کە لەگەرمیاندا پزیشکیان کەمە.
د.حەسەن ئاماژەشیدا، شاندەکە ژمارەیەک پرسیار و تێبینیان خستەڕوو لەبارەی شێوازی خزمەتگوزاریی تەندروستی لە دەڤەرەکەو چۆنیەتی گەیاندنی خزمەتگوزاریی بە ھاوڵاتیان و ھەروەھا بەڵێنیشیاندا لەنزیکترین کاتدا دەست بەکار بن.

سیروان حەسەن/ ی.ا
pna

11/07/2013

- ئێوارەی ئەمڕۆ لە سەڵاحەدین, مەسعود بارزانی سەرۆکی ھەرێمی کوردستان پێشوازی لە عادل عەبدوالمەھدی سەرکردەی دیاری ئەنجوومەنی باڵای ئیسلامیی عێراق کرد و لە کۆبوەنەوەیەکدا ھەر دوولا لەسەر ئەوە ھاوڕا بوون کە چارەسەرکردنی کێشەکانی نێوان ھەولێر و بەغدا سەرەتایەکیشە بۆ چارەسەرکردنی ئەو قەیرانانەی لەنێوخۆی عێراقدا ھەن.


لە دیدارێکدا ڕەوشی سیاسیی ناوچەکە و بارودۆخی سیاسیی عێراق و پەیوەندییەکانی نێوان ھەرێمی کوردستان و عێراق تاوتوێ کرا و جەخت لەسەر پێویستیی دانیشتن و گفتوگۆی بەردەوامی نێوان ھەولێر و بەغدا کرایەوە.
ھەروەھا ھەر دوولا لەسەر ئەوە ھاوڕا بوون کە چارەسەرکردنی کێشەکانی نێوان ھەولێر و بەغدا سەرەتایەکیشە بۆ چارەسەرکردنی ئەو قەیرانانەی لەنێوخۆی عێراقدا ھەن.
pna

11/07/2013

ئەندامێكی كۆمیسیۆنی ئاقڵمەندان رایگەیاند كە رۆڵی كۆمیسیۆنەكەیان تەواو بووە و ئەوان بەشێك نین لە قۆناغی دووەمی پرۆسەی چارەسەری كێشەی كورد لە توركیا، ئەوە لەكاتێكدایە كە حكومەتی توركیا پێیوایە شتێك نییە بەناوی قۆناغی دووەمی چارەسەری و سیاسییەكانی BDP ئەو قۆناغبەندییەیان دروستكردووە.

دوای دامركانەوەی خۆپیشاندانەكانی پاركی گەزی لە ئیستەنبوڵ، جارێكی دیكە پڕۆسەی چارەسەری كێشەی كورد بووە رۆژەڤی توركیا، ئەم هەنگاوەش بە كۆبوونەوەی سەرۆك وەزیرانی توركیا رەجەب تەیب ئەردۆغان لەگەڵ كۆمیسیۆنی ئاقڵمەندان دەستیپێكرد. كۆمیسیۆنی ناوبراو بەبۆنەی تەواوبوونی ئەركەكانی راپۆرتی خۆی پێشكەشی ئەردۆغان كرد، ئەویش لە لێدوانێكدا گوتی كە كشانەوەی گەریلا لەنێو خاكی توركیا تەنیا 15%ی جێبەجێكراوە، لەكاتێكدا وەك ئەو گوتی BDP باس لە تەواوبوونی قۆناغی یەكەمی پرۆسەی ئاشتی دەكات كە بریتییە لە كشانەوەی چەكدارانی PKK.

كشانەوەی گەریلا لەنێو خاكی توركیا تەنیا 15%ی جێبەجێكراوە

پێشتر بەرپرسانی PKK چەندین جار رایانگەیاندووە كە ئەوان بە كشاندنەوەی گەریلاكانیان بۆ دەرەوەی سنوور هەنگاوی یەكەمیان لە پرۆسەی ئاشتی جێبەجێ كردووە و ئیدی تۆپەكە لە گۆڕەپانی حكومەتی توركیایە كە رێكارەكانی چارەسەری بگرێتەبەر.

جومعە ئیچتان، پەرلەمانتاری كوردی سەر بە AKP و نوێنەری ئامەد لە پەرلەمانی توركیا، پێیوایە ئەو زانیارییەی ئەردۆغان پشت بە زانیاری وردی چەندین دەزگای هەواڵگری مەدەنی و سەربازی دەبەستێ. ئیچتان بە (رووداو)ی گوت “توركیا دەوڵەتێكە دەزگای هەواڵگری هەیە و دەتوانن بەشێوەیەكی بابەتی و راست زانیاری كۆبكەنەوە. بۆیە دڵنیاتان دەكەمەوە كە PKK نیازی بەجێهێشتنی خاكی توركیای نییە”. لەبارەی دەستپێكردنی قۆناخی دووەمی پڕۆسەكەش ئەو پەرلەمانتارە كوردە گوتی “لە نامەی ئۆجەلاندا كە لە نەورۆزی ئەمساڵ لە ئامەد خوێندرایەوە، شتێك نییە بەناوی قۆناغی یەكەم و دووەم، ئەوە سیاسییەكانی BDP ئەو شتە دروستدەكەن. ئێمە 10 ساڵە هەنگاو بۆ چارەسەری كێشەی كورد دەنێین، ئەوەشمان لەبەر بوونی چەكدارانی PKK لە شاخ نەكردووە”.
ئیدی تۆپەكە لە گۆڕەپانی حكومەتی توركیایە كە رێكارەكانی چارەسەری بگرێتەبەر

ئەوەی زیاتر گومانی لەسەر ئەو پڕۆسەیە دروستكرد رووداوەكانی شارۆچكەی لیجە بوو لە 28ی مانگی رابردوو كاتێك هاووڵاتیان بە دروشمی “سەربازگەمان ناوێ، چارەسەریمان دەوێ” ناڕەزاییان دەربڕی دژی دروستكردنی سەربازگەیەكی نوێ، بەڵام لەلایەن سوپاوە تەقەیان لێكرا و لەئەنجامدا كەسێك كوژرا و 8ی دیكەش بریندار بوون.

جومعە ئیچتان دەڵێت بڕیاری دروستكردنی ئەو سەربازگانە پێش 3 ساڵ دەرچوون “سێ ساڵ لەمەوبەر گرێبەستی دروستكردنیان كراوە، ئەوانە تەنیا ئەركیان بەرەنگاربوونەوەی PKK نییە، بەڵكو بۆ پاراستنی ئاشتی كۆمەڵایەتی و بەرەنگاربوونەوەی چاندنی حەشیشە. BDP باسی ئەو 77 سەربازگەیە ناكات كە هەڵمانگرتوون”.

ئیچتان پێیوایە حكومەت درێژە بەهەنگاوەكانی چارەسەری كێشەی كورد دەدات و گوتی “PKK چەك دابنێ یان نا، شەڕ بكات یان، ئێمە درێژە بە هەنگاوەكان بۆ چارەسەری كێشەی كورد دەدەین، چونكە ئێمە لە روانگەی ئازادی و مافەكانی مرۆڤەوە سەیری ئەو مەسەلەیە دەكەین”.

پەرلەمانتارێکی کوردی AKP: ئێمە 10 ساڵە هەنگاو بۆ چارەسەری كێشەی كورد دەنێین

بەڵام حوسامەدین زەندەلیئۆغڵو پەرلەمانتاری بەتلیس سەر بە BDP سوورە لەسەر ئەوەی كە دوای تەواوبوونی قۆناغی یەكەمی چارەسەری قۆناغی دووەم دەستپێدەكات. زەندەلیئۆغڵو لە لێدوانێكدا بە (رووداو) گوت “هێشتا قۆناغی یەكەم تەواو نەبووە، گەریلا بەتایبەتی لە هەرێمە دوورەكانی وەكو دێرسیم، دەریای رەش و ئامەد نەكشاونەتەوە، چونكە پڕۆسەكە ئاسان نییە و بەرپرسیارێتیەكی گەورەیە. بەڵام ژمارەی ئەوانەی كشاونەتەوە زۆر لەوە زیاترە كە دەگوترێ”.

ئەو نوێنەرە كوردە نایشارێتەوە كە جددیەتێك بە حكومەتی AKPەوە دیارە بۆ چارەسەری كێشەی كورد “پێموایە حكومەت بڕیاری چارەسەری داوە، بەڵام زۆر لەسەرخۆ هەنگاو دەنێت، دواكەوتنی هەنگاونانیش بۆ چارەسەری مەترسیدارە، چونكە بەرەی دژە ئاشتی لە بۆسەدایە”.

بۆچی BDP مەسەلەی دروستكردنی سەربازگەیەك ئەوەندە گەورە دەكات و باسی ئەو سەربازگانە ناكات كە حكومەت هەڵیگرتوون؟ زەندەلیئۆغڵو دەڵێ “ئەو سەربازگانە لە شوێنی ستراتیژی دروست دەكەن، لەو شوێنانە دروستی دەكەن كە گەریلا لێیان دەكشێتەوە”.

ژمارەی ئەوانەی كشاونەتەوە زۆر لەوە زیاترە كە دەگوترێ

لەدوای رووداوەكانی لیجە، وەزارەتی ناوخۆی توركیا 2 لێكۆڵەری رەوانەی ناوچەكە كرد بۆ ئاشكراكردنی راستییەكان. لە كۆبوونەوەی گرووپی پارتەكەشی، سەرۆك وەزیرانی توركیا رۆژی 2/7/2013 رایگەیاند كە رووداوەكانی لیجە پەیوەندی بەو ئۆپەراسیۆنە بەرفراوانە هەیە لەناوچەكە بۆ بنبڕكردنی چاندنی حەشیش. بەڵام پەرلەمانتارەكەی BDP ئەو قسانەی رەتكردنەوە و گوتی “ئەوانەی حەشیش دەچێنن سەر بە دەوڵەتن و بە رەزامەندی دەوڵەت ئەو كارە دەكەن و بە ئۆتۆمبێلی دەوڵەتیش حەشیش دەگوازنەوە، بەڵام قوربانییەكانی لیجە خەڵكی هەژارن و خۆیان بە بەرپرسیار دەزانن لەبەرامبەر پڕۆسەی چارەسەری”.

رای گشتی توركیا چاوەڕێ دەكات لە چەند رۆژی داهاتوودا كۆمەڵێك گۆڕانكاری رووبدات و تەكانێكی دیكە بە پێشڤەچوونی پڕۆسەی ئاشتی بدرێت. تاریق چەلەنگ ئەندامی كۆمیسیۆنی ئاقڵمەندان و چاودێری سیاسی پێیوایە قۆناغی دووەمی پڕۆسەی ئاشتی بە هەنگاوی پەرلەمان و هەمواركردنەوەی یاسای بەرەنگاربوونەوەی تیرۆر دەستپێدەكات.
قۆناغی یەكەم بریتی بوو لە رەواندنەوەی ترس و تووڕەبوونی هاووڵاتیان

چەلەنگ بە (رووداو)ی گوت “ قۆناغی یەكەم بریتی بوو لە رەواندنەوەی ترس و تووڕەبوونی هاووڵاتیان و رازیكردنیان بەو پڕۆسەیەی دەستیپێكردووە، هەروەها بریتی بوو لە بێدەنگكردنی چەك و كشانەوەی گەریلاكانی PKK. رۆڵی كۆمیسیۆنی ئاقڵمەندان لە ئامادەكردنی كۆمەڵگای توركیا بۆ ئەو پڕۆسەیە زۆر گرنگ بوو. بەڵام ئیدی رۆڵەكەی كۆتایی هات، جێبەجێكردنی پڕۆسەكە لە ئەستۆی پەرلەمان و هاوكاری رێكخراوەكانی كۆمەڵگای مەدەنیە”.

10/07/2013

ئێواره‌ی‌ دوێنێ‌، شاندێكی‌ پارتی‌ یه‌كێتی‌ دیموكراتی‌ (په‌یه‌ده‌) له‌ هاوینه‌ هه‌واری‌ سه‌ڵاحه‌دین، له‌لایه‌ن سه‌رۆكی‌ هه‌رێمی‌ كوردستانه‌وه‌ پێشوازیی‌ لێكرا.

له‌م دیداره‌دا باس له‌ بارودۆخی‌ سیاسیی‌ كوردستانی‌ سووریا و قه‌یرانی‌ ئێستای‌ سووریا به‌گشتی‌ كرا و شاندی‌ میوان بۆچوونی‌ خۆیان سه‌باره‌ت به‌ په‌یوه‌ندیی‌ حیزبه‌ كوردستانییه‌كانی‌ سووریا و كێشه‌كانی‌ نێوانیان، راگه‌یاند.
مه‌سعوود بارزانی‌، سه‌رۆكی‌ هه‌رێمی‌ كوردستان، له‌ دیداره‌كه‌دا دۆخی‌ ئێستای‌ سووریای‌ به‌ ده‌رفه‌تێكی‌ پڕبایه‌خ وه‌سف كرد بۆ ئه‌وه‌ی‌ گه‌لی‌ كورد له‌و به‌شه‌ی‌ كوردستان، مافه‌كانی‌ خۆی‌ مسۆگه‌ر بكات.
بارزانی‌ هه‌روه‌ها ته‌ئكیدی‌ له‌وه‌ كرده‌وه‌ سه‌ره‌ڕای‌ بوونی‌ جیاوازیی‌ بیروڕا له‌ نێوان لایه‌نه‌ كوردییه‌كانی‌ سووریا، پێویسته‌ هه‌موو لایه‌ك له‌سه‌ر خاڵه‌ هاوبه‌شه‌كان و ستراتیژییه‌كی‌ دیاریكراو رێكبكه‌ون.

ماڵپه‌ڕی‌ سه‌رۆكایه‌تیی‌ هه‌رێم/ ئا. ر
10/07/2013

دوای ئیمزا كردنی رێكەوتننامەی ئابوری و بازرگانی نێوان هەرێم و كۆماری ئیسلامی ئێران دوێنێ 9ی 7ی 2013 لەشاری هەولێر وەزیری ئاوەدانكردنەوە و نیشتەجێ‌ كردنی حكومەتی هەرێمی كوردستان ناوەرۆكی ئەو رێكەوتنە و ئەنجامی سەردانەكەی بۆ كەناڵەكانی راگەیاندن ئاشكرا كرد.

سەرەتا كامەران ئەحمەد وەزیری ئاوەدانكردنەوەی حكومەتی هەرێم رایگەیاند: رێكەوتنەكە چەند تەوەرێك لە خۆدەگرێت لەوانە دۆزینەوەی چارەسەری گونجاو بۆ بەكارخستنی گواستنەوەی كاڵاكان لە هەردوولا ، هەروەك دامەزراندنی شارۆچكەیەكی پیشەسازی هاوبەش لە سنورەكان و دروستكردنی كۆمپانیای هاوبەش لە بوارەكانی گواستنەوە و وەبەرهێنان و گەشت و گوزار و هێڵی ئاسمانی .

كامەران ئەحمەد وتیشی: لە رێكەوتنەكە باس لە كەمكردنەوەی رۆتین لە كارەكانی نیشینگەی ئەو هاوڵاتیانە كراوە كە سەردانی هەروولا دەكەن، هەروەك باس لەوە كراوە كە ئەو دەروازە سنوریانەی كە تا ئێستا رەسمی نین لە نێوان هەردولا بە رەسمی بكرێن.

وەزیری ئاوەدانكردنەوەی حكومەتی هەرێمی كوردستان ئەوەشی ئاشكرا كرد: قەبارەی ئاڵوگۆڕی بازرگانی نێوان هەرێمی كوردستان و كۆماری ئیسلامی ئێران ساڵانە 4 ملیار دۆلارە و كۆماری ئیسلامی ئیرانیش ئارەزووی ئەوە دەكات كە زۆر لەوە زیاتر بێت.

شایەنی باسە لە 6ی ئەم مانگە وەزیری ئاوەانكردنەوەی هەرێم بەیاوەری وەفدێك سەردانی كۆماری ئیسلامی ئیرانی كرد و لە گەڵ محمد رەزا رەحیمی جێگری یەكەمی سەرۆك كۆماری ئیسلامی ئێران و د. سەعید لو یاریدەدەری سەرۆك كۆماری ئیران بۆ كاروباری نێودەوڵەتی و كازم قومی لێپرسراوی كۆمیتەی پەرپێدانی ئابوری نێوان ئێران و عێراق بە جیا كۆبۆوە ، دواتر رێكەوتنامەی پەرپێدانی پەیوەندی بازرگانی و ئابووری نێوان كۆماری ئیسلامی ئیران و حكومەتی هەرێمی كوردستان ئیمزا كرد.

خەندان – رەهێل سەمەد

10/07/2013

بەبۆنەی ھاتنەوەی مانگی رەمەزانی پیرۆز مەسعود بارزانی سەرۆکی ھەرێمی کوردستان پەیامێکی پیرۆزبایی ئاراستەی مۆسڵمانانی کوردستان و جیھان کرد و ھیواشی خواست ئەم مانگە ببێتە مایەی خێر و خۆشی بۆ ھەموو لایەک .
بسم الله الرحمن الرحيم

(شهر رمضان الذي انزل فيه القرآن هدى للناس و بينات من الهدى و الفرقان)

- صدق الله العظيم-

به‌ بۆنه‌ی هاتنه‌وه‌ی مانگی ره‌مه‌زانی پیرۆزه‌وه‌ ، گه‌رمترین پیرۆزبایی له‌ سه‌رجه‌م موسڵمانانی جیهان به‌ گشتی و هه‌رێمی كوردستان و عیراق به‌ تایبه‌تی ده‌كه‌م.

هیوادارم هاتنه‌وه‌ی مانگی پڕ به‌ره‌كه‌ت و ره‌حمه‌تی ڕەمەزان ببێته‌ مایه‌ی خێر و خۆشی بۆ گه‌لی كوردستان و هەموو گه‌لانی عێراق و چه‌سپاندنی گیانی برایه‌تی و پێكه‌وه‌ ژیان لەنێو گشت پێكهاته‌كان و دوور کەوتنەوە لە هزری نکۆڵیکاری و توندڕۆیی. با مانگی پیرۆزی ڕەمەزان بکەینە دەرفەتێک بۆ کارکردن بۆ ئاشتی و یەکتر قبوڵکردن کە پەیامی سەرکیی ئایینی پیرۆزی ئیسلامە.

مسعود بارزانی

سه‌رۆكی هه‌رێمی كوردستان

30 ی شه‌عبان 1434ی كۆچی

9/7/2013

یەكێتی زانایانی كوردستان راگەیەنراوێك سەبارەت بە مانگی رەمەزان بڵاودەكاتەوەو تێیدا داوا دەكات حیزب و لایەنە سیاسییەكان ئەم مانگە بكەنە هۆی لێكنزیكبوونەوەو كۆتاییهێنان بە شەڕی راگەیاندن.

هەروەها داوا دەكات راگەیاندنەكان دەكات رەچاوی هەستی خەڵكی رۆژووەوان بكەن و " شتێك پەخش نەكەن، كە هەستی خەڵكی رۆژووەوان بریندار بكات، لە بڵاوكردنەوەی فیلم ‌و زنجیرە دراماكان".

دەقی راگەیەنراوەكە:

پەیامی یەكێتی زانایان بەبۆنەی مانگی پیرۆزی رەمەزان

بەناوی خوای گەورەی میهرەبان

(يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِنْ قَبْلِكُمْ لَعَلَّكُمْ تَتَّقُونَ)

بەبۆنەی هاتنەوەی مانگی پیرۆزی رەمەزان پیرۆزباییەكی گەرم لە تەواوی موسڵمانانی جیهان‌و كوردستان دەكەین‌و، لە خوای گەورە داواكارین خواپەرستی هەموو لایەك قبوڵ بكات‌و، هەنگاوێكی دیكە بێت بەرەو ئاسوودەیی دڵان‌و خۆشەویستی‌و لێكنزیكبوونەوە.

هەر بەبۆنەی هاتنەوەی مانگی رەمەزانی پیرۆز بە پێویستی دەزانین چەند خاڵێك بدەینە بەرچاوی هاووڵاتیانی كوردستان:

یەكەم: داوا لە مامۆستایانی ئاینی بەڕێز‌و خۆشەویستمان دەكەین، مانگی رەمەزان هەوڵ‌و هیممەتێكی زیاتر‌و جۆش‌و خڕۆشێكی بەتینتر بدەنە نێو رێورەسمە ئایینیەكان‌و رنگی زیاتر بەلایەنی دڵپاكی‌و باوەڕداری بدەن.

دووەم: داوا لە راگەیاندنەكان بە شێوەیەكی گشتی دەكەین، رەچاوی كەش‌و هەوای مانگی رەمەزان بكەن‌و، شتێك پەخش نەكەن، كە هەستی خەڵكی رۆژووەوان بریندار بكات، لە بڵاوكردنەوەی فیلم‌و زنجیرە دراماكان، بەتایبەتی ئەوانەی پەیوەندیان بەلایەنی ئایینیەوە هەیە، كە دەبێ‌ رەچاوی شەرعیبوون‌و نە وروژاندنی بابەتگەلێك، كە كار لە هەستی مەزەبی‌و تائیفی بكات‌و، دواجار ببێتە مایەی پشێوی نانەوە، بەتایبەتی چەند تەلەفزیۆنێك، كە ریكلام بۆ زنجیرە درامای ئایینی دەكەن‌و، پێشتر وەكو یەكێتی زانایان لەگەڵیان دانیشتووینە‌و، باسی مەترسی ئەو كارانەمان بۆ كردوونە، هیوادارین پابەندی ئەو ئەخلاقیە رۆژنامەوانییە بن‌و، سنووری رەسەنێتی نەبەزێنن.

سێیەم: داوا لە لایەن پەیوەندیدارەكانی حكومی دەكەین، وەك هەموو ساڵێك بە ئەركی سەر شانی خۆیان هەڵبستن‌و، رەچاوی هەست‌و سۆزی موسڵمانانی كوردستان بكەن‌و، رێگە بە كردنەوەی ئەو شوێنانە نەدەن، كە پێچەوانەی شەرعی پیرۆزی ئیسلام‌و ئادابی گشتی كۆمەڵگای كوردستانن.

چوارەم: داوا لە حزب‌و لایەنە سیاسییەكانی كوردستان دەكەین، مانگی رەمەزان بكەنە دەرفەتێك بۆ زیاتر لێك نزیك بوونەوە‌و، نەرم‌و نیانی‌و گفتوگۆكردن، بەتایبەتی كە خەڵكی كوردستان لە مانگی رەمەزان پێویستی بە پشوو‌و هێمنی زیاترە، نەك ململانێ‌و شەرە راگەیاندن.
یەكێتی زانایانی ئاینی ئیسلامی كوردستان

8/ 7 / 2013

لەمیانەی سەردانەکەیدا بۆ بەغدا ئەمریکا و ئێران و تورکیا و لایەنە شیعییەکانی عێراق داوایان لە مەسعود بارزانی کردووە، دوای هەڵبژاردنەکانی داهاتووی عێراق ببێ بە سەرۆک کۆماری عێراق. بارزانی لەو سەردانەدا ئەم بابەتەی لە کۆبوونەوەیەکی دوو قۆلی لەگەڵ مالیکی باسیکردووە.
ئەندامێکی شاندی کوردی بۆ بەغدا لەو بارەیەوە دەڵی شیعەکان داوایان لە بارزانی کرد لە بەغدا بمێنێتەوە.

rudaw

9/07/2013