به‌ڕێزان ( عوسمان عه‌به پێنجوێنی یان عوسمان قه‌ڵادزه‌یی) و( جه‌واد حه‌یده‌ری) به‌داخه‌وه وتیان به‌ڵێ ڕاسته و كۆچی دوایی كردووه؟
هونه‌رمه‌ند و پێشمه‌رگه ، سروودبێژ و گۆرانیبێژ...
کۆڕەوو شەنگال وتووەو دەیڵێت و بەشداریی کاریگەری لەئاهەنگەکانی سەرفیرازیدا بووەو دەبێت.
مستەفا داداری موکریانی مەهابادی خۆی بەخوێندکاری (مام هێمنی شاعیر ١٩٢١-١٩٨٦) دەزانێ و کاتێک قسە دەکا...
باسمان بۆ بکەن، ئەو ئۆرکێسترەی ئێوە چەنساڵێک ژەنیاری بوون؟ئەو ئۆرکێسترە بە ئۆرکێستری رادیۆ کرماشان ناسراو بوو و لە سەرەتاشەوە سەرپەرەشتییەکەی بەدەستی بەڕێز عەبدولسەمەدیان بوو کە...
بەر دەکەوێت بەڵام لەو لایشەوە هەر بە پاڵپشتی ئەو سامانە دەوڵەمەندە،خۆی دوو هێندە لە نێو ڕووبەری فەرهەنگیی کورددا دەردەخات. هێشتاکەیش کتێبخانەکەی پڕیەتی لە دەیان بەرهەمی...
به‌پێی گۆڤارێكی ئه‌ڵمانی: كورده‌كان گه‌وره‌ترین گه‌لن له رۆژهه‌لاَتی ناوین دا كه ده‌وڵه‌تیان نه‌بێت، باس له‌وه‌ش ده‌كات، ئێستا چانسی به‌ده‌ستهێنانی ده‌وڵه‌ت بۆ كورد ره‌خساوه.
گۆڤارێكی ئه‌ڵمانی به ناوی (زینت) كه گۆڤارێكی سیاسیه‌و زۆرترین خوێنه‌ری هه‌یه له‌و وولاَتانه‌ی كه به زمانی ئه‌ڵمانی قسه ده‌كه‌ن، ژماره‌ی ئه‌م جاره‌ی گۆڤاره‌كه ته‌رخان كراوه به كورد و له‌به‌رگه‌كه‌یدا نه‌خشه‌ی كوردستانی یه‌كگرتوو بلاَوكراوه‌ته‌وه و پێشتریش به‌دواداچونی ده‌كرد بۆ بابه‌ته سیاسی و ئابوری و كولتوری وولاَتانی رۆژهه‌لاَتی ناوین و جیهانی ئیسلامی .
ئه‌و گۆڤاره نزیكه‌ی 30 لاپه‌ڕه‌ی ته‌رخان كردوه بۆ نوسینه‌كانی له‌سه‌ر كورد كه ژماره‌یه‌ك له زانای رۆژهه‌لاَتی ناوین و كه‌سانی ئاكادیمی نوسیویانه و ئاماژه‌یان به‌وه كردوه كه كیانی كورده‌كان به شێوه‌یه‌ك گه‌شه‌ی كردوه كه ناتوانرێت بوه‌ستێنرێت .
له ئاماژه‌یه‌كی تر دا باس له‌وه‌كراوه، كورده‌كان گه‌وره‌ترین گه‌لن له رۆژهه‌لاَتی ناوین دا كه ده‌وڵه‌تیان نه‌بێت، ئیتر چانسی به‌ده‌ستهێنانی ده‌وڵه‌تیان بۆ ره‌خساوه و ئاشكرا كراوه: قۆناغی چاره‌سه‌ری له توركیا و شه‌ڕی نێوان سوننی و شیعه‌ی عێراق و كێشه‌كانی حكومه‌تی به‌غدا و شه‌ڕی ناوخۆی سوریاش ده‌ستی كورده‌كانی به‌هێزكردووه.
له گۆڤاره‌كه دا ئه‌وه‌ش هاتووه : پێكهێنانی ده‌وڵه‌تی كوردی كابوسێكه به‌ڵام دێته‌دی.
خاوەنی تاوەری بازرگانی جیهان لە ئەمریکا داوایەکی یاسایی لەدادگای فیدڕاڵی تۆمار کردووە و تێیدا داوای قەربووکردنەوەی چەند ملیار دۆلارێک دەکات لەلایەن ئەو هێڵە ئاسمانیانەی کە فڕۆکەکانیان لە 11ی سێپتێمبەری 2001 دا بوونە هۆی تەقاندنەوەی دوو تاوەرەکەی بازرگانی جیهان لە شاری نیویۆڕکی ئەمریکا.
پێگەی دەیلی مەیڵ لە هەواڵێکدا بڵاویکردەوە، لاری سیلڤەرستێین خاوەنی تاوەری بازرگانی جیهان لە نیۆڕک داوایەکی یاسایی لەسەر هەریەک لە کۆمپانیاکانی هێڵی فڕۆکەوانی (یونایتد ئێیەرلاین و یو ئێس ئێیەر وەی و هێڵی فڕۆکەوانی ئەمریکا) لە دادگای فیدڕالی تۆمار تۆمارکردووە.
لە هەواڵەکەدا هاتووە، سیلڤەرستێین پێشر بڕی پێنج ملیار دۆلاری وەک قەرەبوو لەو کۆمپانیایانە وەرگرتووە، بەڵام لە داواکەی ئەم دواییەدا لە دادگای فیدڕاڵی، داوای بڕی 3,5 ملیار دۆلاری دیکە لەو کۆمپانیایانە دەکات بەو پێیەی کە هێرشەکەی 11ی سێپتێمبەر بۆ سەر تاوەرەکان، زیانی زیاتر لە حەوت ملیار دۆلاری پێگەیاندووە و ئەمەش زیاترە لەو بڕەی کە وەک قەرەبوو لەو کۆمپانیایانەوە وەری گرتووە.
لە ئێستاشدا تاوەرێکی نوێ لە شوێنی تاوەرە ڕوخێنراوەکان بە ناوی (تاوەری بازرگانی جیهانی یەکەم) دروست کراوە کە بڕی 3.9 ملیار دۆلاری تێچووە بەشێکە لە دیزاینێکی ئاڵۆزی سەرلەنوێ بنیاتنانەوەی تاوەری بازرگانی جیهان و بە درێژترین تاوەر دادەنرێت لە نیوە گۆی ڕۆژئاوادا و بڕیارە لەساڵی 2014دا بکرێتەوە.
بەپێی هەواڵەکە دادوەری دادگای ناوچەی مانهاتن لە نیویۆڕک ڕایگەیاندووە کە لێدوان لە هەردوو لا وەردەگرێت تا یەکلایی ببێتەوە ئایا داواکەی سیلڤەرستێین لەجێی خۆیەتی لەدژی ئەو کۆمپانیای هێڵە ئاسمانیانە و وابڕیاریشە دوابەدوای وەرگرتنی وتەی شایەت حاڵەکان لەو بارەیەوە، دادگا بڕیاری کۆتایی لەسەردا داواکە بدات.
لە ئینگلیزییەوە هاوڕێ فەریق
17/07/2013
کۆمەڵەی ئیخوان موسلیمین، ئەمریکا بە هۆکاری سەرەکی بارگرژییەکانی میسر و دەستێوەردانی سوپا بۆ لەسەرکار لابردنی موحەمەد مورسی (سەرۆکی پێشوی میسر) تاوانبار دەکات و لەوبارەیەشەوە ڕونکردنەوەیەکیان بڵاوکردەوە.
پێگەی ئاكشام-ی تورکیا لە هەواڵێکدا بڵاویکردەوە، کۆمەڵەی ئیخوان موسلیمین لە ماڵپەڕی ڕەسمی خۆیان ڕونکردنەوەیەکیان بڵاوکردۆتەوە و تێیدا هاتووە "ئەمریکا تاوانباری سەرەکییە بە لەسەرکار لابردنی یەکەم سەرۆک کۆماری بەڕەسمی هەڵبژێردروای میسر و ڕفاندنی لەلایەن هێزە چەکدارەکانی میسرەوە".
هەروەها دەڵێن " ئەمریکا گڵۆپی سەوزی بۆ هێزە چەکدارەکانی میسر داگیرساند و بووە ڕێخۆشکەر بۆ هەڵپەساردنی دەستور و لەناوبردنی پەرلەمانی وڵاتەکە".
لە ڕونکردنەوەکەی کۆمەڵەی ئیخواندا ئاماژە بەوەشکراوە "کەشو هەوای ئێستای میسر بەتەواوی دژی بنەماکانی دیموکراسی و مافەکانی مرۆڤە و سەرەڕای ئەمانەش ئەمریکا خۆی بەدوور دەگرێت لە ڕوودان یان ڕوونەدانی دەستێوەردانی هێزی چەکداری و هەڵویستێکی ڕوونی لەوبارەیەوە نەخستۆتە ڕوو".
لە کۆتایی بڵاوکراوەکەیاندا، کۆمەڵەی ئیخوان گەشبینانە تێڕوانینی خۆیان بۆ وەرگرتنەوەی دەسەڵاتی میسر دەخەنە ڕوو و ڕایانگەیاند "گرژییەکان کۆتاییان دێت، ڕزگاری لەدەست ئاژاوەگێڕان بەرپا دەبێت و ئازادی و سەرفرازیمان دووبارە بەدەست دەهێنینەوە".
ئەم ڕونکردنەوەیەی کۆمەڵەی ئیخوان موسلیمین پاش سەردانە فەرمییەکەی دوێنێی ویلیام بێرنس جێگری وه‌زیری ده‌ره‌وه‌ی ئه‌مریكا دێت کە لەگەڵ دەسەڵاتدارانی حکومەتە کاتییەکەی میسردا کۆبووەوە و لە کۆنگرەیەکی ڕۆژنامەوانیشدا پشتیوانی خۆی بۆ حکومەتە کاتییەکەی میسر ڕاگەیاند و جەختی لە هێنانەوە ئارای دیموکراتی و کۆتایی هێنان بە ئاشوبەکانی ئەو وڵاتە کردەوە.
خەندان/ لە تورکییەوە هاوڕێ فەریق
17/07/2013
مەسعود بارزانی لە پەیامێكیدا كە لە ماڵپەری سەرۆكایەتی هەرێمی كوردستان بڵاویكردەوە، هەڵوێستی خۆی لەبارەی یاسای درێژكردنەوەی ماوەی سەرۆكایەتی هەرێمی كوردستان و پرسی دەستوور دەربڕی.
سەرۆكی هەرێمی كوردستان رایگەیاندووە، كە ئەو هیچ كات لە هەوڵی بەدەستهێنانی پلەو پۆستدا نەبووە، بۆیە یاسای درێژكردنەوەی ماوەیەی سەرۆكایەتییەكەی واژوو نەكردووە. هۆكاری رەتنەكردنەوەشی دەگێڕێتەوە بۆ هەوڵدان بۆ یەكڕیزی لایەنە سیاسییەكانی هەرێم و رێزگرتن لە هاوپەیمانیی ستراتیژی یەكێتی و پارتی.
دەقی پەیامەكەی بارزانی:
بەناوی خوای گەورە و میهرەبان
گەلی خۆشەویستی كوردستان....
هێز و لایەنە سیاسییەكان و رێكخراوەكانی كۆمەڵگەی مەدەنی...
بۆ من خۆشترین بڕیار ئەوە بووە كە لە تەمەنی 16 ساڵیدا لە پێناو ئازادی و مافە نەتەوەیی و دیموكراتییەكانی گەلی كوردستان و ڕزگاركردنی خاكی كوردستاندا بوومە پێشمەرگەی كوردستان.
پێشمەرگایەتیش گەورەترین شانازیی ژیانی منه و، لە هەر پلە و پۆستێكدا بووبم بە گیانی پێشمەرگانە كار و خەباتم كردووە و، بە بیروباوەڕی پێشمەرگانەوە كارم بۆ بەرژەوەندیی گەلەكەم كردووە و، هەر لەو ڕوانگەشەوە هەموو پۆستەكانم بۆ بەرژەوەندیی باڵای نیشتمانەكەم بەكارهێناوەن.
زۆریش سەربەرزم بەوەی كە هەر لە سەرەتای راپەڕینی شكۆداری گەلی كوردستان لە بەهاری 1991ـەوە وەك پابەندبوون بە ئامانجەكانمان لە ئازادی و دیموكراسی لە كاتی شۆڕش و خەباتی پێشمەرگایەتیدا لە شاخ، هەروەها وەك ئەركێكی نیشتمانی و چەسپاندنی بنەماكانی دیموكراسی و دامەزراندنی سیستەمێكی سیاسی و ئیداریی دیموكراسیانە، داوام كرد بەرەی كوردستانی بە زووترین كات هەڵبژاردنێكی ئازاد ئەنجام بدات، بۆ ئەوەی گەلی كوردستان لە ڕێگەی سندوقەكانی دەنگدانەوە، چارەنووس و سیستەمی سیاسیی خۆی دیاری بكات.
لەوكاتەوە گەلی كوردستان، بە هاوكاریی هەموو لایەنە شۆڕشگێرەكانییەوە پڕۆسەیەكی دیموكراسییانەی دەستپێكرد. ئێستاش بە پشتێوانیی خوای گەورە و هاوكاریی دڵسۆزان و خەبات و خۆڕاگریی گەلەكەمان، پێشكەوتنی گەورە لە هەموو ئاستەكانی ژیانی خەڵكی كوردستاندا بەدیهاتوون. هەر بەو هۆیەوە كوردستان ئەمڕۆ نێوبانگێكی باشی هەیە لە ڕووی جێگیریی سیستەمی سیاسی و سەقامگیریی باری ئەمنی و پێكەوەژیان. هەروەها پێشكەوتنەكان لە بواری ئابووری و ئاوەدانیدا، ڕۆژ بە ڕۆژ پێگەی كوردستان لە جیهاندا بەهێزتر دەكەن.
لە ماوەی ڕابردوودا لە هەرێمی كوردستاندا، وەك بەشێك لە نەریتی دیموكراسی، گفتوگۆ و گەنگەشەیەكی زۆر لەسەر سروشت و پێناسەی سیستەمی سیاسی و پڕۆژەی دەستوور هاتە ئاراوە.
بۆ پێشكەشكردنی نموونەیەكی جوانتری پڕۆسەی دیموكراسی و پابەندبوون بە یاساوە، نامەی فەرمیم نارد بۆ كۆمسیۆنی باڵای سەربەخۆی هەڵبژاردنەكان، تاوەكو لە مانگی 9ی ئەمساڵدا هەڵبژاردنەكانی پەرلەمان و سەرۆكایەتیی هەرێمی كوردستان ئەنجام بدرێن. بەو شێوەیە ئەوەی ئەركی سەرشانی من بووە بەجێمگەیاندووە، لە نامەناردن و داواكردنی ئەنجامدانی هەڵبژاردنەكان و پاشان دیاریكردنی كاتی هەڵبژاردنەكان، كە ئەویش رۆژی 21/9/2013 بووە. لە دوای ئەو فەرمانە و پێش دەرچوونیشی، جیاوازیی بیروڕا هەبوو لەسەر میكانیزمی هەڵبژاردنی سەرۆكی هەرێمی كوردستان، كە ئایا بەپێی یاسای سەرۆكایەتی هەرێمی كوردستان ژمارە 1ی ساڵی 2005ی هەمواركراو و پڕۆژەی دەستوور بێت، كە سەرۆكی هەرێم راستەوخۆ لە لایەن خەڵكەوە هەڵبژێردرێت، یان بە پێی بۆچوونی چەند حیزبێك كە داوا دەكەن سەرۆكی هەرێمی كوردستان لە نێو پەرلەماندا هەڵبژێردرێت. ئەمەیش جیاوازی خستە ناو لایەنەكانەوە پاشان پرسی پڕۆژەی دەستووری هەرێمی خرایە سەر و دەرئەنجام بەداخەوە مامەڵەكردنی توندی هەندێ لایەن پڕۆسەی سیاسی بەرەو قەیران برد.
بۆ ئەوەی بتوانین زەمینەی پێكەوەكاركردنێكی باشتر بهێنینە ئارا سەبارەت بەو پرسانە و بۆ ئەوەی نموونەیەكی جوانتری پڕۆسەی سیاسی لە هەرێمی كوردستان پێشانی خەڵكی خۆمان و دەرەوەش بدەین، هەروەها بۆ ئەوەی بتوانین زەمینەی تەوافوق بڕەخسێنین و لایەنە سیاسییەكان و پێكهاتەكانی كۆمەڵگەی كوردستان، سەرنج و تێڕوانینی خۆیان لەسەر شێوازی هەڵبژاردنی سەرۆك و پڕۆژەی دەستوور بخەنەڕوو، بەنامەیەك لە 25ـی 5ـی 2013 داوام لە هەموو لایەنە سیاسییەكانی كوردستان كرد، تێبینی و سەرنجەكانیان لەسەر پڕۆژەی دەستوور بۆ ئێمە بنێرن. دوای گەیشتنی وەڵامەكان، داوام لە سەرۆكایەتیی پەرلەمان كرد لەگەڵ سەرجەم لایەن و پێكهاتەكانی كۆمەڵگەی كوردستان كۆ ببنەوە بۆ ئەوەی بگەنە ئەنجامێك.
ئامانجی من لە ناردنی تێبینیی لایەنەكان بۆ سەرۆكایەتیی پەرلەمان بۆ ئەوە بوو كە تەوافوقی لایەنەكانی ناو پەرلەمان و دەرەوەی پەرلەمان و سەرنجی هەموو پێكهاتەكان ببێتە نەخشەڕێگەیەكی باشتر و زەمینەیەكی گونجاوتر دابین بكەین بۆ پڕۆژەی دەستوور و هەڵبژاردنەكان، ئینجا بە هەموو سەراحەتێكەوە بە گەلی كوردستان ڕابگەیێنم كە من وەك شەخسی خۆم هیچ نییەتێكم بۆ خۆكاندیدكردنەوە نییە و ڕێز لە هەموو یاساكان دەگرم و ئەمانەتی سەرۆكایەتی هەرێمی كوردستان ڕادەستی هەر بەڕێزێكی دیكە دەكەم كە هەڵدەبژێردرێت.
بەڵام بە داخەوە ئۆپۆزیسیۆن سەركەوتوو نەبوون لە هاوكاریكردن بۆ سەرخستنی پڕۆسەكە، بەڵكو بەو شێوە ڕەفتارەیان كە قبووڵیان نەكرد لایەنەكانی دیكە لە كۆبوونەوەكانی سەرۆكایەتی پەرلەماندا بەشدار بن، هەوڵ و پرۆسەكەیان پەكخست. لەوەدا دەركەوت كە مەفهوومی تەوافوق لای ئۆپۆزیسیۆن تەنیا سەپاندن و جێبەجێكردنی ئەو داوایانەیە كە خۆیان هەیانە، بە بێ گوێدانە داواكانی لایەنەكانی دیكە.
دەمەوێت لێرەدا زۆر بە ڕاشكاوی بیڵێم، تەوافوق ئەوە نییە كە تەنیا پارتی و یەكێتی و سێ لایەنەكەی ئۆپۆزیسیۆن رێكبكەون، بەڵكو پەیوەستە بەوان و هەموو لایەن و پێكهاتە جیاجیاكانی دیكەی كوردستانیشەوە. پڕۆژەی دەستوور كاتی خۆی لە لایەن 36 حیزب و هەموو نەتەوەكانی كوردستانەوە گفتوگۆی لەسەر كراوە، لەبەر ئەوەش ئەمڕۆ نابێ پشتگوێ و پەراوێز بخرێن، چونكە كوردستان هەر تەنیا ئەو پێنج لایەنەی تێیدا نییە. لێرەشدا دووبارە داوا لە هەموو لایەنەكان دەكەمەوە، لەسەر پرسی دەستوور بەرەو تەوافوق هەنگاو بنێن و منیش بە هەموو توانایەكەوە پشتیوانیتان دەكەم، با قەیرانی سیاسی دروست نەبێ و بۆ ئەوەی ئارامیی ژیان لە خەڵكی كوردستان تێكنەدرێت و، هەموو هێز و توانای خۆمان بخەینە گەڕ بۆ ئەوەی سوود لەو دەرفەتانە وەربگرین كە ئەمڕۆ بۆ گەل و نیشتیمانەكەمان لە ناوچەكەدا هاتوونەتە پێش.
هەموو هەوڵێكی خۆم دەخەمە گەڕ بۆ ڕەخساندنی زەمینەیەكی نوێی گەییشتن بە تەوافوق. خەڵكی كوردستان و حیزبەكان شایەتی ئەوەم بۆ دەدەن، كە لە سەروبەندی پەسەندكردنی پڕۆژەی دەستووری هەرێمی كوردستان لە ساڵی 2009دا لە لایەن پەرلەمانەوە، هەوڵێكی زۆرمدا بۆ ئەوەی تەوافوقی لەسەر دروست ببێ و بە دڵی هەموو لایەنەكانی كوردستان بێت و، پێداگیریم لەسەر ئەوە كرد كە دەبێ تێڕوانینی هەموو نەتەوە و پێكهاتە ئایینییەكانی تێدا جێبكرێتەوە. هەرواش كرا و، دوای ئەوە لە پەرلەمان دەنگی لەسەر درا. ئەمجارەش دەمویست دوور لە هەموو گرژی و هەڵچوونێكی ناو پڕۆسەی سیاسی هەمان زەمینە دروست بكەمەوە بۆ گەییشتن بە تەوافوق.
بەداخەوە ئۆپۆزیسیۆن بە ڕەفتار و شێوەی مامەڵەكردنیان لەو چوار ساڵەی رابردوودا، ئەو تێڕوانینەی بەشێكی زۆر لە خەڵك و لایەنەكانیان لەسەر خۆیان چەسپاندووە، كە بە هیچ شتێك رازی نابن و، تەوافوق لە ڕوانگە و بە لێكدانەوەی ئەوان سەپاندنی بیروڕاكانی خۆیانە كە ئەوەش پێچەوانەی ڕێسا و عورفە سیاسی و دیموكراسییەكانە.
سێ لایەنەكەی ئۆپۆزیسیۆن دەبێ بزانن كە جگە لە پارتی و یەكێتی، زۆر حیزبی دییش هەن لە كوردستاندا لە سەختترین ڕۆژگاری ژێر دەستەییدا ئەو پەڕی فیداكارییان نواندووە بۆ بەرگریكردن لە هەبوونی گەلەكەمان و مانەوەی ناوی كوردستاندا، هەروەها زۆر حیزبی دیكەی مۆڵەتپێدراو هەن ئەمڕۆ ڕا و قسەیان هەیە بۆ پێشكەوتنی كوردستان. نابێ سێ لایەنەكەی ئۆپۆزیسیۆن ڕێگە بە خۆیان بدەن و هەوڵی ئەوە بدەن لە لایەن دەزگا باڵاكانی كوردستانەوە ڕا و بۆچوونی لایەنەكانی دیكە نادیتە بگیرێن. یان رێگە بە خۆیان بدەن بە شێوەیەك لە سووكایەتی پێكردنەوە باسیان بكەن، چونكە بە هیچ شێوەیەك ئەوە نەریتێكی دیموكراسیانە نییە. بۆیە داوا لە برایانی ئۆپۆزیسیۆن دەكەم بە سینگێكی فراوانی یەكترقبوڵكردنەوە و بە پێی بنەما دیموكراسییەكان كار و چالاكییە سیاسییە یاساییەكانیان ئەنجام بدەن و، هەموو ڕەفتار و مامەڵەكانیان لەسەر بنەمای قبوڵكردنی ئەوانیترەوە بێت.
خەڵكی خۆڕاگری كوردستان....
پەرلەمانی كوردستان، لە ڕۆژی 30/6/2013 دا بە دەركردنی دوو یاسا، ماوەی پەرلەمان و سەرۆكایەتی هەرێمی كوردستانی درێژ كردەوە، ئەوەش دواكەوتنی هەڵبژاردنی سەرۆكی هەرێمی كوردستانی لێكەوتەوە. لێرەدا دووپاتی دەكەمەوە هیچ كات خولیای كورسی و پۆست نەبوومە. ئەمڕۆش نامەوەێ مێژووی خۆم لە خەبات بۆ رزگاری و ئازادی كوردستان بە هیچ شتێكی دیكە بگۆڕمەوە. مرۆڤ زیاتر بە خەبات و كار و بەخشش بۆ گەل و نیشتمان و مرۆڤایەتی دەناسرێتەوە نەك بە پلە و پۆست و ناونیشانی وەزیفی و ئیدارییەوە.
یاسای درێژكردنەوەی ماوەی پەرلەمانی كوردستانم ئیمزا كرد تاوەكو هیچ بۆشاییەكی یاسایی و دەستووری لە هەرێمی كوردستاندا دروست نەبێت. ماوە و ویلایەتی سەرۆكایەتی هەرێمی كوردستان، لە لایەن پەرلەمانی كوردستانەوە بە دەنگی فراكسیۆنی كوردستانیی (پارتی و یەكیێتی) لەگەڵ فراكسیۆنەكانی حیزب و نەتەوەكانی دیكەی ناو پەرلەمان و سەربەخۆكان جگە لە فراكسیۆنەكانی حیزبەكانی ئۆپۆزیسیۆن، درێژكرایەوە.
ئێستا من لەبەردەم ئەركەكانی ئەو هاوپەیمانییەتەدام كە لە نێوان پارتی دیموكراتی كوردستان و یەكێتی نیشتمانی كوردستاندا هەیە، كە پێكەوە لەگەڵ چەند حیزب و نەتەوەی كوردستاندا لەناو پارلەمان بڕیاریان داوە ماوەی سەرۆكایەتی هەرێمی كوردستان بۆ دوو ساڵ درێژ بكرێتەوە، بە بێ ئەوەی من تێیدا بەشدار بووبم.
هەروەها من لەبەردەم بەرپرسیارێتیی ئەخلاقی و كۆمەڵێ ئەرك و كاری هاوبەشی درێژخایەندام لەگەڵ برای خۆشەویستم مام جەلال بۆ درێژەدان بە هاوپەیمانێتییەكە، بۆ ئەوەی وەفاداری ئەو كاروانە بم كە دەستمان پێكرد و ئەنجامەكانیشی بە ئیجابییەوە بەردەوام بن و، ئینشاڵڵا كە ئەویش بە خۆشی دەگەڕێتەوە بۆ كوردستان، هەموو شتێك لەوپەڕی سەقامگیریدا ببینێ. لە هەمانكاتدا من باش لە ئەركەكانی هاوپەیمانێتی نێوان یەكێتی و پارتی تێدەگەم، كە بە ڕاستیش ئەو هاوپەیمانێتییە سەقامگیری و پێشكەوتنێكی زۆر گەورەی لە كوردستاندا دروستكردووە، كە بەرهەمەكەشی ئەوەیە كە ئێستا هەرێمی كوردستان جێگەی سەرنجی هەموو جیهانە، هەروەها وایكرد كورد بەشدارێكی چالاك بێت لە گۆڕانكارییەكانی عێراق و ناوچەكەدا. ئەمڕۆش كە جەنابی مام جەلال لەبەر باری تەندروستی لە كوردستان نییە هەست دەكەم بەرپرسیارێتییەكەی ئەویش دەبێ من ئەنجامی بدەم لە پاراستن و بەهێزكردنی ئەو هاوپەیمانییەتییەدا وەك وەفادارییەك بۆ پێكەوەكاركردن و هاوخەباتیی و هاوكاریی چەندساڵەی نێوانمان لە پێناو گەل و وڵاتەكەماندا.
هەروەها بۆ رەچاوكردنی نیگەرانییەكانی پێكهاتە نەتەوەیی و ئایینییەكانی كوردستان لەمەڕ ئەگەری قوڵتربوونی قەیرانی سیاسی و پاراستنی سەقامگیری لە كوردستاندا و، لەبەردەم داوای كەسایەتییە خەباتگێڕەكانی كوردستانی عێراق و پارچەكانی دیكەی كوردستاندا، و پاش ڕاوێژكردن لەگەڵ زۆربەی هێز و لایەنە سیاسییەكانی كوردستان یاسای درێژكردنەوەی ماوەی سەرۆكایەتی هەرێمی كوردستانم ڕەتنەكردەوە. بەڵام ئەو ڕەتنەكردنەوەیەش بەو مانایە نییە كە من لەگەڵ شێواز و ناوەڕۆكی یاسای درێژكردنەوەی ویلایەتی سەرۆكی هەرێمدا بم، بۆیەش ئیمزام نەكرد.
لێرەدا وەك ڕێزگرتنێك لە دەنگی زۆربەی فراكسیۆنەكانی پەرلەمانی كوردستان و بۆ ئیحراج نەكردنیان، بە گەلی خۆشەویستی كوردستان رادەگەیێنم، كە من بە شێوەیەكی كاتی تا وەكو خولی چوارەمی پەرلەمانی كوردستان دەست بەكار دەبێت و بە پەلە دەگەنە تەوافوقێك، ئەو ئەرك و ئەمانەتەی كە خراوەتە سەرشانم بەجێیدەگەیێنم، هەر لە ئێستاشەوە داوا لە سەرۆكایەتیی خولی داهاتووی پەرلەمانی كوردستان دەكەم كە لەژێر ڕۆشنایی ئەو نامەیەم كە لە 12ـی 6ـی 2013ـدا ئاراستەی سەرۆكایەتیی خولی ئێستای پەرلەمانم كردبوو، دوای هەڵبژاردنەكانی 21/9/2013 دەستبەجێ لە كۆبوونەوە دەستپێكییەكانی سەرۆكایەتیی پەرلەماندا بە زووترین كات میكانیزمێك بدۆزنەوە بۆ ئەوەی لە ماوەی كەمتر لە ساڵێكدا بگەنە تەوافوق لەسەر هەمواركردنی پڕۆژەی دەستوور و ئالییەتی هەڵبژاردنی سەرۆكی هەرێم. ئەو كات هەڵبژاردنی سەرۆكێكی نوێی هەرێمی كوردستان ئەنجام بدرێت و ئەو ئەمانەتەی لە دەست ئێمە دایە بدەینە هەر بەڕێزێكی دیكە كە متمانەی گەلی كوردستان بەدەست دەهێنێت. خۆم و كاك كۆسرەت، جێگری سەرۆكی هەرێمی كوردستان و دیوانی سەرۆكایەتی هەرێمی كوردستانیش، وەك دەزگای سەرۆكایەتی هەرێمی كوردستان هەموو هاوكارییەكی سەرۆكایەتی پەرلەمانی تازە دەكەین بۆ ئەو مەبەستە.
دەبێ بە هەموومان نموونەیەكی جوانی دیموكراسی پێشكەش بكەین، نابێت هیچ كەس بە كورسییەكەیەوە بچەسپێت و، نابێت ڕێگە بدرێت سەرۆكی هەتا هەتایی هەبێت لە كوردستاندا. من خۆم باوەڕێكی تەواوم بەوە هەیە كە كاتێك پۆستێك لە لایەن كەسێكەوە بەجێدەهێڵدرێت، دەبێ گەل ئەو پرسیارە بكات كە بۆچی ئەو پۆستە بەجێدەهێڵێت، نەك گەل بگاتە رادەی ئەوەی ئەو پرسیارە بكات كە بۆ چی ناڕوات.
گەلی خۆشەویستی كوردستان من دڵنیاتان دەكەمەوە كە تەنیا ئێوە دەتوانن بڕیار لەسەر چارەنووسی خۆتان بدەن و، كەس ناتوانێ ئەو مافەتان لێ زەوت بكات.
بژی كوردستان...
نەمری بۆ شەهیدانی ڕێگەی رزگاری كوردستان و سەرفرازی
سەربەرزی بۆ گەلی كوردستان
مسعود بارزانی
سەرۆكی هەرێمی كوردستان
16ـی 7ـی 2013
له شاری سه‌رێکانی رۆژئاوای کوردستان دوای ئه‌وه‌ی گرووپێک چه‌کدار و چه‌ته‌ی سه‌ر به به‌ره‌ی نه‌سرا ( جه‌بهه‌ت ئه‌لنه‌سرا ) هێرشیان کرده سه‌ر ئۆتۆمبێلێکی یه‌کینه‌کانی پاراستنی ژن YPJ ی سه‌ر به YPG و شۆفێری ئۆتۆمبێله‌که‌یان ده‌ستگیرکرد و شه‌ڕ و پێکادان روویدا، راگه‌یه‌ندرا که شه‌ڕه‌که به‌رده‌وامه و یه‌کینه‌کانی YPG ناوه‌ندێکی چه‌ته‌کانیان کۆنترۆڵکردووه و به‌گشتی تا ئێستا (6) ئه‌ندامی گرووپه چه‌کداره‌که‌ی سه‌ر به نه‌سرا کوژراون .
دوای ئه‌وه‌ی له کاتژمێر 11:00 ــ 11:30ی نیوه‌ڕۆدا ئۆتۆمبێلێکی یه‌کینه‌کانی پاراستنی ژن YPJ که له چوار رێیانی به‌ریده‌که‌ی له گه‌ڕه‌کی محه‌ته‌ی شاری سه‌رێکانی سه‌رقاڵی جێبه‌جێکردنی ئه‌رکی خۆیاندا رووبه‌ڕووی هێرشێکی گرووپی چه‌ته‌ی سه‌ر به به‌ره‌ی نه‌سرا ده‌بنه‌وه، پێکدادان دێته ئاراوه و زانرا که (6) که‌س له گرووپه چه‌ته‌کان کوژراوه .
به‌پێی ئه‌و زانیارییانه‌ی له سه‌رچاوه‌کانی YPG وه به‌ده‌ستگه‌یشتوون، گرووپه هێرشکاره‌که راسته‌وخۆ سه‌ر به به‌ره‌ی نه‌سرا ( جه‌بهه‌ت ئه‌لنه‌سرا )یه و هه‌مان سه‌رچاوه ئه‌وه‌شی خسته‌ڕوو له پێکدادانه‌که‌دا ناوه‌ندی گروپی ( عه‌میل موسلیمین ) ی سه‌ر به به‌ره‌ی نه‌را که پێشتر وه‌کو ناوه‌ندی سیاسی سوپای رژێمی سوریابوو، له‌لایه‌ن شه‌ڕڤانانی YPG ه‌وه کۆنترۆڵ کراوه و له شه‌ڕه‌که‌دا (6) چه‌کدار کوژراون و (4)ی تریش برینداربوون .
هاوکات ئه‌وه‌ش خرایه ڕوو که ئه‌و شه‌ڕڤانه‌ی YPG ش ئازاد کراوه که له‌لایه‌ن گرووپه چه‌کداره‌کانه‌وه ده‌ستگیرکرابوو .
پێشتریش راگه‌یه‌ندرابوو که دوابه‌دوای هێرشی یه‌که‌می گرووپه چه‌ته‌کان بۆسه‌ر یه‌کینه‌که‌ی سه‌ر به YPJ ، هێزه‌کانی YPG به هه‌رێمه‌که‌دا بڵاوه بوونه‌ته‌وه و ته‌کبیری پێویستیان وه‌رگرتووه . له‌سه‌ر رووداوه‌که‌ش به‌ره‌ی نه‌سرا ئه‌ندامێکی خۆیان به‌مه‌به‌ستی چاوپێکه‌وتن ره‌وانه‌ی لای YPG کردووه، به‌ڵام فه‌رماندارانی YPG داوایان کردووه که به‌رپرسیاری گرووپه بێته‌لایان . دوای ئه‌وه‌ی به‌رپرسیاری گرووپه‌که رێگای هاتن بۆ لای فه‌رماندارانی YPG ده‌گرێته به‌ر، جارێکی تر له‌لایه‌ن گرووپه‌که‌وه به چه‌ک هێرش ده‌کرێته سه‌ر یه‌کینه‌یه‌کی YPG و پێکدادان هاته ئاراوه .
سه‌رچاوه هه‌رێمییه‌کان راشیانگه‌یاند که شه‌ڕه‌که له ناوه‌ندی شه‌بیبه‌ی گه‌ڕه‌کی محه‌ته ناوبه‌ناوێک به‌رده‌وام ده‌کات
ANF
ئەندامێكی مەكتەبی سیاسیی یەكێتی رایدەگەیەنێت، كە بارزانی یاسای درێژكردنەوەی ماوەی سەرۆكایەتییەكەی ئیمزا ناكات، بەڵام بەپێی یاسای پەرلەمان پەسەند دەكرێ.
دوای دوو رۆژ لە پەسەندكردنی هەردوو پرۆژەیاسای درێژكردنەوەی ماوەی پەرلەمان و سەرۆكایەتی هەرێمی كوردستان، كە لە 30-6-2013 لە پەرلەمانی كوردستان پەسەندكران مشتومڕێكی زۆری بەدوای خۆیدا هێنا هەردوو یاساكە لە 2-7-2013 گەیشتنە سەرۆكایەتی هەرێمی كوردستان. بەم پێیەش تەنیا دوو رۆژ لەبەردەم سەرۆكی هەرێمی كوردستان ماوە، كە ئاخۆ یاسای درێژكردنەوەی ماوەی سەرۆكایەتی خۆی بۆ دوو ساڵی دیكە پەسەند دەكات یان نا.
ئەندامێكی مەكتەبی سیاسیی یەكێتیی نیشتیمانیی كوردستان بە (رووداو)ی گوت "بارزانی گوتی پەسەندكردنی ئەو یاسایە بەو شێوەیە بۆ من زۆر قورسە".
ئەو مەكتەب سیاسییەی یەكێتی كە نەیویست ناوی بڵاوبكرێتەوە گوتیشی: "دواجار بارزانی رازی بووە یاساكە نەگەڕێنێتەوە پەرلەمان و رەتی نەكاتەوە".
ئەوەشی خستەڕوو "بە ئاگاداری هەردوو مەكتەبی سیاسیی یەكێتی و پارتی، بارزانی ئیمزا لەسەر یاساكە ناكات و بەگوێرەی یاسای پەرلەمانیش ئەگەر سەرۆكی هەرێمی كوردستان لەماوەی 15 رۆژدا یاساكە ئیمزا نەكات، ئەوا بەشێوەیەكی ئۆتۆماتیكی بە پەسەندكراو دادەنرێ و دەكەوێتە بواری جێبەجێكردنەوە".
لای خۆشیەوە تاریق جەوهەر، راوێژكاری راگەیاندنی سەرۆكی پەرلەمانی كوردستان، بۆ (رووداو) گوتی: "سەرۆكی هەرێمی كوردستان بۆی هەیە تاوەكو 17-7-2013 وەڵام بداتەوە، ئەگەر پەسەندیشی نەكات، ئەوا بەپێی یاسا بە پەسەندكراو هەژماردەكرێت".
هیوا میرزا سابیر، ئەندامی مەكتەبی سیاسیی یەكگرتووی ئیسلامیی كوردستان، بە (رووداو)ی گوت:" تا دوایین سات داوا لە سەرۆكی هەرێمی كوردستان دەكەین یاساكە رەتبكاتەوەو بیگەڕێنێتەوە پەرلەمان".
گوتیشی: "بڕیارە لەم هەفتەیەدا هەرسێ لایەنی ئۆپۆزیسیۆن كۆببنەوە‌و تێیدا هەڵوێستی خۆمان لەسەر مەسەلەی پەسەندكردنی یاساكە دەربڕین‌و چەندین ئەگەریش بۆ هەڵوێست وەرگرتن لەلایەن ئۆپۆزیسیۆنەوە واڵان" .
rudaw
15/07/2013
بۆ یەكەمجار رووسیای فیدراڵی بەشێوەیەكی فەرمی یەدەگی نەوت و غازی خۆی رادەگەیەنێت كەچەندین ساڵ بوو ئەو زانیارییانە دووربوون لەبڵاوكردنەوە.
سێرگی دۆنسكوی، وەزیری سامانە سروشتی و ژینگەییەكانی رووسیا رایگەیاند: " یەدەگی نەوتی رووسیا كە بتوانرێت دەربهێنرێت پێش دوو ساڵ گەیشتبووە 17 پۆینت هەشت ملیار تۆن كەدەكاتە 129 پۆینت نۆ ملیار بەرمیل، لەبارەی یەدەگی غازی سروشتیش قەبارەكەی گەیشتبووە 48 پۆینت 8 تریلیۆن مەتر سێجا".
دۆنسكوی روونیكردەوە كەئەو یەدەگانە دەبنە گەورەترین قەبارەی جیهانی، گوتیشی:" رەنگە ئاشكراكردنی ئەو زانیارییانە ببێتە هۆی دەرهێنانی سەرچاوەكانی ووزە لە رووسیا".
حكومەتی مۆسكۆ لە 5ی تەمموزی ئەمساڵ بڕیاریدا نهێنی زانیاری لەبارەی یەدەگی گشتی وڵاتەكەی لەنەوت و غاز هەڵبگرێت.
رووسیا بەیەكێك لەگەورەترین وڵاتی بەرهەمهێنەری نەوتی خاو دادەنرێت لەجیهانداو لەمانگی ئایاری رابردوو قەبارەی بەرهەمهێنانی گەیشتۆتە 10 پۆینت 48 ملیۆن بەرمیل لەرۆژێكدا، بەمەش بەرزترین ئاستی لەساڵی 2013 دا تۆماركرد، ئەویش بەپاڵپشتی زۆربوونی بەرهەمهێنانی رۆس نەوت كە بە گەورەترین بەرهەمهێنەری رووسیا دادەنرێت.
بەپێی ئامارەكانی وەزارەتی ووزەی رووسیا، بەرهەمهێنانی غازی سروشتی لەو وڵاتە دابەزینی بەخۆیەوە بینیوە و گەیشتۆتە 1 پۆینت حەوت ملیار مەتر سێجا لەرۆژێكدا، هۆكارەكەشی بۆ گەڕانەوەی بەرهەمهێنانی كۆمپانیایی غازپڕۆمی رووسی دەگەڕێتەوە كە بەڕێژەی 11% كەمیكردووە، ئاستەكەشی گەیشتۆتە یەك پۆینت 18 ملیار مەتر سێجا لەرۆژێكدا .
15/07/2013
نوێنەری حکومەتی هەرێمی کوردستان لە یەکێتی ئەوروپا، دلاوەر ئاژگەیی، لە درێژەی کار و چالاکییەکانی نوێنەرایەتیی حکومەتی هەرێمی کوردستان لە یەکێتی ئەوروپا، بە یاوەری شاندێکی نوێنەرایەتی، لە شاری لاهای سەردانی وەزارەتی دەرەوەی هۆڵەندای کرد.
شاندەکەی هەرێمی کوردستان، لە لایەن خاتوو "دیانا خۆزنس" بەرپرسی باڵای بەشی ڕۆژهەڵاتی ناوەڕاست و ئەفریقای باکوور لە وەزارەتی دەرەوە و "کۆن ئارتسما" بەرپرسی کاروباری عێراق و وڵاتانی کەنداو، پێشوازیی لێکرا.
لە سەرەتای دیدارەکەدا خاتوو خۆزنس بەخێرهاتنی گەرمی شاندەکەی حکومەتی هەرێمی کوردستان کرد و خۆشحاڵی خۆی بەو سەردانە ڕاگەیاند و بوونی پەیوەندی ڕاستەوخۆ لەگەڵ حکومەتی هەرێمی کوردستان بە گرنگ وەسفکرد.
دلاوەر ئاژگەیی، سوپاسی هەڵوێستی حکومەتی هۆڵەندای کرد کە بایەخ و گرنگیی تایبەت بە هەرێمی کوردستان دەدات و لەو نێوەندەشدا بۆ پێشخستنی پەیوەندییە سیاسی و بازرگانییەکان داوای کردنەوەی کونسوڵخانەی گشتیی هۆلەندای لە هەرێمی کوردستان کرد و هیوای خواست کە پرۆسەی وەرگرتنی ڤیزەی هۆڵەندا بۆ هاووڵاتیانی هەرێمی کوردستان ئاسانتر بکرێت.
لە درێژەی دیدارەکەدا هەندێ پرسی پراکتیکی پەیوەندار بە نوێنەرایەتی حکومەتی هەرێم و وەزارەتی دەرەوەی هۆڵەندا باسیان لێوەکرا و لەو چوارچێوەیەشدا هەردوولا لە سەر بەفەرمیکردنی ئەو پەیوەندییانە و بەردەوامبوونی دیدار و کۆبوونەوەکان لەو پێناوەدا هاوڕا بوون.
م.ش
pna
15/07/2013
سەرۆکی لیستی پارتی ئاشتی و دیموکراتی (بەدەپە) لە پەرلەمانی تورکیا ڕەخنەی توند لە هەردوو پارتی گەلی کۆماری و پارتی نەتەوەپەرستی تورکیا دەگرێت بەوەی کە پێیان خۆش نییە خوێنڕشتنی چەند ساڵی ڕابردوو لە تورکیادا بوەستێت .
ئەمڕۆ شەممە (١٣-ی تەمووزی ٢٠١٣ ) سایتی ئەکشامی تورکی بڵاویکردەوە: پەروین بوڵدان، سەرۆکی لیستی پارتی ئاشتی و دیموکراتی بەدەپە لە پەرلەمانی تورکیا لە میانەی وتارێکیدا دەربارەی دوایەمین گۆڕانکارییەکانی دەستووری تورکیا و دەنگنەدانی هەردوو پارتی گەلی کۆماری (جەهەپە) و پارتی نەتەوەپەرستی تورکیا (مەهەپە) دەربارەی کۆمیسیۆنێک دەربارەی پرۆسەی چارەسەریی ڕایگەیاند: "ئەو کەسانەی دەمرن ، هاوڵاتی ئەم جوگرافیایەن ، لەم وڵاتەدا کەسانێک بە وەستانی ڕشتنی خوێن بێئارام دەبن، ئەم جەنگە پێویستە کۆتایی پێبهێنرێت، پێویستە ئاشتی ڕووبکاتە ئەم وڵاتە ، مەهەپە و جەهەپە بەشداریی پرۆسەی چارەسەرییەکەیان نەکردووە و دەنگیشیان بە کۆمسیونی چارەسەریی نەداوە".
ئەم وتانەی پەروین بوڵدان دوای ئەوەبوو ئینگین ئالتای سەرۆکی لیستی پارتی گەلی کۆماری (جەهەپە) لە پەرلەمانی تورکیا پێشتر ڕایگەیاندبوو کە ناتوانرێت پرۆسەکە بەرەو پێشبچێت بە دانانی پارتی کرێکارانی کوردستان لەناو کۆمیسیۆنەکەدا.
هەروەها ئۆکتای ڤورالی سەرۆکی لیستی پارتی نەتەوە پەرستی تورکیا (مەهەپە) ڕایگەیاندبوو ئەم کۆمیسیۆنە داواکاریی پارتی کرێکارانی کوردستانە بۆیە دەنگمان پێنەداوە.
لە تورکییەوە: هەڵوێست ئەنوەر
سەرچاوە: ئەکشام
14/07/2013
هۆشیار زێباری، وەزیری دەرەوەی عێراق لەچاوپێكەوتنێكیدا لەگەڵ رۆژنامەی شەرقولئەوسەت رایگەیاند، ئێستا عێراق كەوتوەتە نێوان ئاگری ئێران و ئەمریكا، بەڵام پابەندی بێلایەنی خۆی دەبێت.
زێباری ئاماژەی بەوەدا وڵاتەكەی ناتوانێ پرۆسەی ناردنی چەك لەتارانەوە بۆ سووریا بوەستێنێ، گوتیشی:" ئەگەر شتێكی وا هەیەو سەرپێچی بڕیارەكانی ئەنجومەنی ئاسایشی نێودەوڵەتییە با خۆیان رایگرن.
هاوكات دەستوەردانی سەربازیشی لەسووریا بەدوورزانی و دووپاتیكردەوە رووسیاو ئەمریكا كۆكن لەسەر مانەوەی ئەسەد تاوەكو كۆتایی ئەمساڵ.
لای خۆیەوە ئەركان ئەرشەد ئەحمەد، ئەندامی لێژنەی پەیوەندییەكانی دەرەوە لەپەرلەمانی عێراق، بۆ (رووداو) گوتی، مەسەلەی سووریا مەسەلەیەكی هەستیارە هەندێك لایەن مەیلی حكومەتیان هەیەو هەندێك لایەنیش مەیلی ئۆپۆزسیۆنیان هەیە بۆیە دەبێ وەڵامەكانمان ژیرانەبێت چونكە لەسەرمان حیسابە، ئێمە حەزناكەین وەڵامی ئەو پرسیارانە بدەینەوە چونكە بابەتێكی هەستیارەو كاریگەری گەورەی بۆسەر عێراق دەبێ، لەلایەكی دیكەوە عێراق كەسێك و حزبێك نیە تەنانەت حكومەتیش یەك حزب نیە هەیە لای حكومەت دەگرێ هەیە لای ئۆپۆزسیۆن دەگرێ واتا بیرورای جیاواز هەیە لەهەمبەر ئەو پرسە".
هاوكات زێباری باس لەوە دەكات "دەستوەردان لەكاروباری ناوخۆی عێراقدا هەیە، سەرەڕای ئەمەش پێموانیە شەڕی ناوخۆ رووبدات، ساڵی 2006 ـ 2007 شەری ناوەخۆ روویدا بەڵام بەردەوام نەبوو، حكومەتیش دژی ئەو جۆرە ناكۆكیانە دەوەستێتەوە، بەهاری رابردوو هێزەكانی حكومەت و پێشمەرگە بەرامبەر یەكتری وەستانەوە شەڕیش بەرپا نەبوو".
لەلایەكی دیكەوە، بەهۆی نەخۆش كەوتنی فەخامەتی سەرۆك تاڵەبانی بۆشایەكی دەستووری دروست بووە بەڵام لەبەر پێگەو كەسایەتی تاڵەبانی كەس جورئەت ناكات ئەو بابەتە باس بكات.
تەنگژەی سووریاش رۆژ بەرۆژ بەرەو خراپتر دەچێت هیچ لایەنێكیش كۆنتڕۆڵی تەواوی بۆ ناكرێت نەئۆپۆزسیۆن نەرژێم، ئێستا هەموویان چاویان لە پرۆژەكەی كۆنگرەی جنیف2 كە سازانێكی نێودەوڵەتی رووسی ئەمریكیە.
كاتێك وەزیری دەرەوەی سووریا هاتە بەغدا ئامۆژگاریمان كرد، بە ئۆپۆزسیۆنیشمان گوت مەرجی پیشوەختەیان نەبێ، لەشاندی رژێممان پرسی چیتان قبولە گوتیان هەموو شتێك جگە لەلادانی ئەسەد ئەوە هێڵی سوورە.
دەمانەوێ بۆ ئەوروپیەكان رونبكەینەوە كە بەهەڵە لە هەڵوێستی عێراق تێگەیشتون لەئاست تەنگژەی سووریا، كێشەی ئێمە ئەوەیە چۆن بتوانین بیلایەن بمێنینەوە.
هاوكات ئێمە هیچ هاوكاریەكی مادی و مەعنەوی سووریا ناكەین شاندی سووریا داواشیكرد بەڵام رەتمانكردەوە. یان دەڵێن عێراق ئاسانكاری بۆ خۆبەخشان دەكات تاوەكو بچن لەسووریا بجەنگن بەڵام ئەو پرسە بە هاندان و پاڵپشتی كردنی حكومەت نیە.
هەڵبژاردنی حەسەن روحانی و بەدەستهێنانی ئەو رێژەی زۆرەی دەنگدەران پەیامێكی ئاشكرای ئێرانە بۆ جیهان كە ئێران دەیەوێ لەبارەی كێشەكانی گفتوگۆ لەگەڵ رۆژئاوا بكات.
rudaw
14/07/2013
ئه‌مڕۆ داواكاری گشتی میسری له‌به‌یاننامه‌یه‌كدا رایگه‌یاند، چه‌ندین سكاڵامان له دژی محه‌ممه‌د مورسی سه‌رۆكی پێشوو و چه‌ند سه‌ركرده‌یه‌كی دیكه له ئیخوان موسلمین به‌ده‌ست گه‌یشتووه، تۆمه‌تی هه‌واڵگری له‌گه‌ڵ وڵاتانی بیانی و هاندان بۆ كوشتنی خۆپیشانده‌ران و زیانگه‌یاندن به ئابووری وڵاتیان خراوه‌ته‌پاڵ.
له به‌یاننامه‌یه‌كدا داواكاری گشتی وتیشی، سه‌رقاڵی كاركردنین له‌سه‌ر ئه‌و سكاڵایانه وه‌كو سه‌ره‌تاییه‌ك بۆ ئه‌وه‌ی لێپرسینه‌وه له‌گه‌ڵ تۆمه‌تباران بكرێت، به‌ڵام ناوی سكاڵاكاریان رانه‌گه‌یاند.
به‌یاننامه‌كه روونیكرده‌وه: ئه‌و سكاڵایانه‌ی تۆماركراون، مورسی و هه‌ندێ كه‌سی دیكه به تاوانی هه‌واڵگۆڕینه‌وه له‌گه‌ڵ چه‌ند لایه‌نێكی بیانی بۆ زیانگه‌یاندن به به‌رژه‌وه‌ندی نه‌ته‌وه‌یی وڵات، تاوانبارده‌كات، هه‌روه‌ها تۆمه‌تی كوشتن و هاندان له دژ خۆپیشانده‌رانیان خراوه‌ته‌پاڵ، له هه‌مانكاتدا هه‌ڵگرتنی چه‌ك و ته‌قه‌مه‌نی و ده‌ستدرێژی كردنه سه‌ر مۆڵگه سه‌ربازییه‌كان و خستنه مه‌ترسی سه‌لامه‌تی وڵات و خاكه‌كه‌ی و زیانگه‌یاندن به ئابووری وڵات چه‌ند تۆمه‌تێكی دیكه‌یه.
به‌یاننامه‌كه ناوی هه‌شت كه‌سی ئیسلامی هێناوه، له نێویدا رێنوێنی گشتی ئیخوان موسلمین محه‌ممه‌د به‌دیع و جێگری سه‌رۆكی پارتی ئازادی و دادپه‌روه‌ری عیسام عره‌یان، رێنوێنی پێشوی ئیخوان مه‌هدی عاكف، هه‌روه‌ها محه‌ممه‌د به‌لته‌جی و مه‌حمود غه‌زلان دوو سه‌ركرده‌ی ئیخوان، له‌گه‌ڵ ئه‌وانه‌ش سه‌فوه‌ت حیجازی و عیسام سولتان هه‌یه، به‌ڵام ده‌سه‌ڵات رایگه‌یاند له نێو ئه‌و به‌رپرسه باڵایانه به‌دیع عره‌یان داواكراوه، به تۆمه‌تی هاندانی توندوتیژی تۆمه‌تباركراوه.
ئه‌لعه‌ره‌بیه / س . س
pna
14/07/2013
هاوسەرۆكی گشتی BDP سەڵاحەدین دەمیرتاش رایدەگەینێت، كە گومانەكانی ئۆجەلان لەبارەی تەندروستی خۆی شەخسی نین، باس لەوەش دەكات كە لە دوا چاوپێكەوتنیان لەگەڵ ڕێبەری پەكەكە گرفتە تەندروستیەكانی نەدەكردە كێشە، بەڵام كاتێك سەردانمان دەكرد، بەردەوام لە چاوەكانیدا فرمێسك دەهاتنە خوارەوە بە پارچە قوماشێك دەیسڕی و لەو كاتانەی قسەی دەكرد چاوەكانی دادەخست.
هاوسەرۆكی BDP لەناو هۆڵی پەرلەمانی توركیادا لەمیانەی كۆنگرەیەكی ڕۆژنامەوانیدا رایگەیاند: پێویستە حكومەت لەچوارچێوەی بەرپرسیارێتییەكانی خۆیدا مامەڵە لەگەڵ قۆناغەكەدا بكات، هەروەها دەبێت دەوڵەتی توركیا ڕێگە لەبەردەم سیاسەتی دیموكراتیدا بكاتەوە.
دەمیرتاش لە وەڵامی پرسیاری یەكێك لە ڕۆژنامەنوساندا سەبارەت بە تەندروستی عەبدوڵڵا ئۆجەلان وتی: "لە دوا چاوپێكەوتنمان ئۆجەلان گرفتە تەندروستیەكانی نەكردە كێشە، بەڵام دەمانبینی بەردەوام فرمێسك لە چاوەكانی دێتە خوارەوە و كاتێكیش قسەی دەكرد چاوەكانی دادەخست، وتیشی: ئۆجەلان تەمەنی (64-65) ساڵەو لەو كەش و هەوایەی تیایدا بەندكراوە تەنانەت گەنجێكیش ناتوانێت تیایدا دان بەخۆیا بگرێت.
هاوسەرۆكی BDP باسی لەوەشكرد كە لەیەكێك لە دیدارەكاندا لەگەڵ ڕێبەری پەكەكە پێی وتین: من لە ناوەندی پرۆسەكەدام، من دەستم پێكرد و بانگەوازم بۆ كرد، ئەگەر پرۆسەكە بەسەلامەتی نەگاتە ئەنجام لێرە لەناكاو دڵم بوەستێت چی بەسەر قۆناغەكەدا دێت؟ لە دۆخێكدا كە پێكەی من لە قۆناغەكەدا ئەوەندە جێگەی گرنگی بێت، بۆیە ئەوەی من لەسەر تەندروستی خۆم دەیڵێم گومانی شەخسی نین، دەبێت بەشێوەیەكی ڕاست لێكبدرێتەوە و هەمان پەیامیش دەدەمە حكومەت.
سەڵاحەدین دەمیرتاش لەبارەی گومانەكانی لەسەر هەڵسوكەوتی حكومەتی توركیا و پرۆسەی ئاشتی وتیشی: "دروستكردنی سەربازگەو بەنداو برەودان بە سیستمی جاشایەتی ڕێگە بۆ گومان و نوێگەرانی گەورە دەكاتەوە".
دەمیرتاش لەبارەی دیداری نوێیان لەگەڵ ئۆجەلان دەڵێت: سەردانی وەزارەتی دادمان كردووە دەبێت لەم هەفتەیەدا دیدارێكی نوێ لەگەڵ ڕێبەری پەكەكە ڕێكبخرێت، ئاماژەی بەوەشكرد: كە ئەوان بەهەموو شێوەیەك بەردەوام دەبن لە چالاكییەكانیان بۆ پرۆسەی ئاشتی
خەندان – سامان قوبادی.
بەڕێوەبەری راگەیاندن و چاپەمەنییەكان لەوەزارەتی رۆشنبیری حكومەتی هەرێمی كوردستان لەبارەی داخستنی سێ كەناڵی كوردی لە دانیمارك رایدەگەیەنێت: كە بڕیارەكە لە سەدا 100 یاسایی نییە، ئاماژە بەوەشدەكات ئەگەر ئەو سێ كەناڵە پابەندی رێنمایی و یاساكانی هەرێم و عێراق بن، دەتوانن پەخشەكانیان بهێننە هەرێمی كوردستان.
هەڵگورد عەبدولوەهاب بەڕێوەبەری راگەیاندن و چاپەمەنییەكان لە وەزارەتی رۆشنبیری حكومەتی هەرێمی كوردستان بە خەندانی راگەیاند: هەرچەندە ناتوانین بڵێین بڕیاری داخستنی ئەو كەناڵانە سەدا 100 یاساییە، بەڵام ئەوە بڕیاری دادگای ئەو وڵاتانەیە كە پەخشی كەناڵەكانی لێدەكرێ، بۆیە ئێمە وەك حكومەتی هەرێم و وەزارەتی رۆشنبیری ئەگەر نارازیش بین، بەڵام ناتوانین تەداخول بكەین، بەڵكو پێویستە لە رێگای پارێزەرانی داكۆكی لە دۆسیەكە و هەوڵی وەستانی بڕیارەكەی بۆ بدرێت.
هەڵگورد عەبدوڵوەهاب وتیشی: مەسەلەی داخستنی ئەو كەناڵانە هەر ئەمجارە نییە، بەڵكو لەنەوەتەكانەوە سەری هەڵداوە، كاتێك چەند جارێك كەناڵی (مەد تیڤی) داخرا و ناوەكەی گۆڕا، هۆكارەكەشی بۆ ئەوە دەگەڕێتەوە كە هەندێكجار ئەو كەناڵانە بەیاسای ئەو وڵاتانە ناجوڵێنەوە كە پەخشەكەی لێیە، توركیاش فرسەت وەردەگرێت سكاڵای یاساییان لەسەر تۆكاردەكات، ئینجا هەندێكجار دەیدۆڕێنی و هەندێكجاریش دەیباتەوە بەداخستنی ئەو كەناڵانە تەواو دەبێت وەك ئەمجارە بینیمان.
سەبارەت بە هێنانی پەخشی ئەو كەناڵانە بۆ هەرێمی كوردستان، بەرێوەبەری راگەیاندن و چاپەمەنیەكانی وەزارەتی رۆشنبیری رایگەیاند: ئەگەرچی تاكو ئێستا داوایەكی لەو جۆرەمان بەدەست نەگەیشتوە، بەڵام هەر كەناڵێك پابەند بێت بە یاسا و رێنماییەكانی هەرێمی كوردستان و عێراق دەتوانێت بەخشەكانی بهێنێتە كوردستان، بۆیە ئەوانیش بەو مەرجانە دەتوانن پەخشەكانیان بكەنەوە، لەكاتی ئێستاش جگە لە كەناڵی كوردی كەناڵی عەرەبی هەیە رێگای پێدارە لە هەرێمی كوردستان بەخشی هەبێت.
شایەنی باسە لەچەند رۆژی رابردوو دادگای دانیمارك بڕیاری داخستنی هەرسێ كەناڵی (رۆژ TV و نوچە TV و mmc) ی نزیك لە پارتی كرێكارانی كوردستان بە بیانوی هاندانی توندوتیژی دەركرد.
خەندان- رەهێل سەمەد
١٢/٧/٢٠١٣
نوێنەری کاتی ئەمریکا لە نەتەوە یەکگرتووەکان، لە هەوڵی ئیران و سوریا بۆ بوونە ئەندام لە ئەنجوومەنی مافی مرۆڤی نەتەوە یەکگرتووەکان نیگەرانی دەربریوە و هەڵوێستی وەرگرتوە.
رۆزماری دیکارلو، نوێنەری کاتی ئەمریکا لە نەتەوەیەکگرتووەکان، دوێنی پێنج شەممە لەبارەی ئامانجی ئێران وسوریا گوتی:" بە بۆچوونی ئێمە و بە سەرنج دان بەو بەرپرسیارەتییە کە ئەو ئەنجومەنە لەسەر شانیەتی بۆ پێشلکارییەکانی مافی مرۆڤ لەو دوو وڵاتەدا و باکگراوەندی خراپی ئەوان بۆ مافەکانی مرۆڤ و هاوکاری بۆ سەرکوتکردنەکانی خەلک لە سوریادا، بە ئەندامبوونیان لەو ئەنجومەنەدا بە نەگونجاو دەزانین".
بەرپرسانی ئیرانی کە پێشێلکردنی مافی مرۆڤ لە ولاتەکەیاند ارەت دەکەنەوە، تا ئێستا هیچ هەلوێستیێکیان بەرانبەر ئەو نارەزایەتیانە دەرنەبریوە.
ئێران لە سالی ٢٠١٠دا هەولی دابوو کە ببێتە ئەندام لەو ئەنجوومەنە، بەلام بە هۆی نارەزایەتییەکانی کە چالاکانی مافی مرۆڤ و ولاتانی رۆژئاوا، کشایەوە.
کۆماری ئیسلامی لەو چەند سالەی دواییدا لەگەل ئەنجوومەنی مافی مرۆڤ نەتەوەیەکگرتووەکان لەسەر بنەمای راپۆرتەکانی ئەحمەد شەهید، نێردراوی تایبەتی نەتەوەیەکگرتووەکان بۆ مافی مرۆڤ لە ئێراندا، پێوەندییەکی ئالۆزیان هەیە.
لە مانگی مارسی ئەمسالدا ئەندامانی ئەم ئەنجومەنە بەرپرسایەتی ئەحمەد شەهیدیان بۆ یەک سالی دیکە لە ئیراندا درێژ کردەوە.
ئەنجوومەنی مافی مرۆڤی نەتەوەیەکگرتووەکان لە ٤٧ ئەندام پێک دێت کە بنکەی سەرەکی لە شاری ژنێڤی سویسە.
ش.ب
pna
12/0772013
رۆشنبیر و سیاسەتمەدارانی رۆژئاوای كوردستان پێیانوایە بوونی دەستەی باڵای كورد بەو شێوەیەی ئێستای هیچ سوودێكی بۆ ئەو بەشەی
كوردستان نابێت. هەروەها دەڵێن بنەمای فیفتی – فیفتی نەیهێشت ئەو دەستەیە خۆی لەسەر پێ بگرێت و نەبووە نوێنەری كورد. ئەندامێكی دەستەی باڵای كوردیش دەڵێت “یان دەبێت بە رێككەوتنی هەولێردا بچینەوە یان ئەوەتا دەستەی باڵای كورد دەبێتە بەشێك لە مێژوو”.
رۆژی 12/7/2012، بەدەستپێشخەری سەرۆكایەتی هەرێمی كوردستان ئەنجوومەنی نیشتمانی كورد لە سووریا (كە لە 15 حیزب پێكدێت) و ئەنجوومەنی گەل لە رۆژئاوای كوردستانی سەر بە (PYD)، دەستەی باڵای كورد دامەزرا. ئەو دەستەیە لەسەر بنەمای فیفتی فیفتی دامەزرا كە هەر ئەنجوومەنێك 5 نوێنەری تێدا هەبوو. هەرچەندە ئەو كاتە ئەمە وەكو دەستكەوتێكی گەورەو سەرەتایەكی گرنگ بۆ بزوتنەوەی كورد لە رۆژئاوا لە قەڵەم درا، بەڵام ئەوەندەی پێنەچوو، ناكۆكی و كێشمەكێش كەوتە نێوان هەردوولا.
ئەحمەد قاسم، نووسەر و چاودێری سیاسی خەڵكی رۆژئاوای كوردستان، پێیوایە لەكاتی دامەزراندنی ئەو دەستەیە سیاسییەكان دركیان بەو هەڵەیە نەكرد كە كردوویانە “ئەمڕۆ هەندێك لایەن وەكو ئەوەی لەخەو هۆشیار ببنەوە دەڵێن چیمان بەسەرخۆمان هێنا”. ئەحمەد قاسم لەدرێژەی قسەكانیدا گوتی “من ئەوكاتە لە وتارێكدا نووسیم ئەو رێككەوتنە ناچێتە سەر. یان ئەوەتا ئەو رێككەوتنە بەدڵ سافی كراوە، یان دەستێك خۆی بەسەر ئەنجوومەنی نیشتمانی كورد سەپاندووەو ناچاری كردووە ئەو رێككەوتنە پەسەند بكات”.
قاسم پێیوایە شتێك بەناوی دەستەی باڵای كورد لە ئارادا نەماوە “پێویستە بەدوای چارەسەرێكی دیكەدا بگەڕێین. پێویستمان بە كۆنگرەیەكی نیشتمانی هەیە كە تەواوی پارت و رێكخراوە سیاسییەكانی رۆژئاوا لەخۆ بگرێت و لە قامشلۆ ئەنجام بدرێت”.
ئەحمەد قاسم باسی ناكۆكی نێوان ئەو دوو ئەنجوومەنە دەكات و دەڵێت “جیاوازی لە ئەجندای لایەنەكان هەیە. ئەجندای PYD جیاوازە لە ئەجندای ئەنجوومەنی نیشتمانی كورد. PYD دەخوازێ بەتەنیا دەسەڵاتدار بێ و كەس پێی نەڵێ پێت خوار داناوە. ئەلپارتی كە میحوەری دووەمە خۆی لە PYD كەمتر نابینێ دەڵێ دەبێت 51% هی من بێت. ئەویش بە نیوە رازی نییە. كێشەی رۆژئاوای كوردستان لەسەر ئەو بنەمایە دروستبووە”.
ناكۆكییەكانی نێوان پێكهێنەرانی ئەو دەستەیە گەیشتە ئاستی خوێنڕشتن، رۆژی 30/6/2013 لە رووبەڕووبوونەوەی چەكدارانی YPG و خۆپیشاندەرانی ئەلپارتی لە ئاموودا 7 كەس گیانیان لەدەستدا و زیاتر لە 30 كەسیش برینداربوون، بەگوێرەی سەرچاوەكانی هەواڵ زیاتر لە 100 كەسیش دەستگیركراون، بە رای زۆر لە چاودێرانیش رووداوەكەی ئاموودە هەڵوەشانەوەی بەكردەوەی دەستەی باڵای كورد بوو. وەكو ناڕەزایەتییەكیش 3 ئەندامی دەستەی باڵای كورد سەر بە ئەنجوومەنی نیشتمانی كورد دەستیان لەكاركێشایەوە.
د.مەحمود عەباس نووسەر و لێكۆڵەر، پێیوایە هیچ كاتێك دەستەی باڵای كورد نوێنەری كورد نەبووە. عەباس لە لێدوانێكدا بە(رووداو)ی گوت “رۆڵی ئەو دەستەیە پڕ بوو لە ناكۆكی. سێگۆشەی (هەولێر – سلێمانی – قەندیل) دەستەی باڵای كوردی بە سەقەتی دامەزراند”. عەباس پێیوایە دوو لۆژیك هەیە كە نەیهێشت ئەو دەستەیە بتوانێ نوێنەرایەتی كورد بكات و گوتی “بۆ رۆژێكیش پارتە كوردییەكان نەیانتوانی ببنە خەمخۆری شەقامی كوردی و نەیانتوانی خەمەكانی بگوازنەوە ناو كۆمەڵگای نێودەوڵەتی. دیسان دەستەی باڵا لەسەر خواستی هەندێك لایەن دروست بوو، بۆ ئەوەی دژی لاوانی شۆڕشگێڕی كورد بوەستنەوە”.
بە بڕوای د.مەحموود عەباس “رووداوەكەی ئاموودا سەلماندی كە حیزبە كوردییەكان خاوەن كولتووری خۆپەرستین. شەرم لە بەهەدەردانی خوێنی میللەت لە پێناوی بەهێزبوونی حیزب ناكەنەوە”. گوتیشی “پڕۆسەی نیوە بە نیوە یارییەك بوو هەموو حیزبەكان بەشدارییان تێدا كرد، پارتە كوردییەكان بەدوای یارییەكدا دەگەڕان PYD لاواز بكەن، بەڵام PYD گرەوەكەی لەوان بردەوە”.
هەرچەندە بەپێی رێككەوتنی نێوان هەردوو ئەنجوومەنەكە دەبووایە چەند كۆمیتەیەك دروست بكرێن بۆ بەڕێوەبردنی شارەكانی رۆژئاوای كوردستان، بەڵام بە كردەوە هەر PYD شارەكان بەڕێوەدەبات.
فەیسەڵ یوسف، ئەندامی دەستەی باڵای كورد پێیوایە كاتی ئەوە هاتووە بە رێككەوتنی هەولێردا بچنەوە. لەوبارەوە بە (رووداو)ی گوت “ئەو رێككەوتنە نەبووە هۆی یەكگرتنی كورد. دەبێت بە كردەوە بەو هۆكارانەدا بچینەوە كە نەیانهێشت ئەو یەكڕیزییە رووبدات”.
یوسف دەڵێت ئەو پەیمانە بە گوێرەی داخوازییەكانی ئێمە نەبوو “ئەوانەی واژۆیان كرد هەموو شتێكیان لەبەر چاو نەگرت. یان ئەوەتا دەبێت ناوەڕۆكی رێككەوتنی هەولێر بگۆڕدرێت، یان ئەوەتا دەستەی باڵای كورد دەبێتە شتێك لە مێژوو”.
دوای تێپەڕبوونی نزیكەی ساڵێك بەسەر دامەزراندنی ئەو دەستەیە، ئەنجوومەنی گەل لە رۆژئاوای كوردستان تاكە لایەنە كە داوای پاراستنی دەستەی باڵای كورد دەكات و وەكو دەستكەوتێكی مێژوویی ناوی دەبات.
عەبدولسەلام ئەحمەد، هاوسەرۆكی ئەنجوومەنی گەل لە رۆژئاوای كوردستان دەڵێت “ئەوانەی بەدوای فیتنەدا دەگەڕێن، ئەوانەی ئەمسەر و ئەوسەر دەكەن و بەشداری كۆبوونەوە نێودەوڵەتییەكان دەكەن، هەموو هەوڵ و ئامانجیان هەڵوەشاندنەوەی دەستەی باڵای كوردە”.
رووداو - هەولێر
- ژمارەیەک لە چالاکانی سیاسی، مەدەنی و میدیایی کوردستان داوای هەڵوەشاندنەوەی سزای لەسێدارەدانی پەخشان عەزیزی و هەموو زیندانیانی سیاسیی سزادراو بە لەسێدارەدان دەکەن
- ئێران..کۆبوونەوەکەمان لەگەڵ وڵاتانی ئەورووپا ئەرێنی بوو
- مەزڵوم عەبدی و نوێنەری سەرۆک بارزانی کۆدەبنەوە
- ئەمڕۆ شاندی دەمپارتی بۆ گەیاندنی پەیامی ئۆجەلان لەگەڵ ئاکپارتی کۆدەبێتەوە
- خراپترین دراوەکانی جیهان لە ساڵی 2024 دا
- تولای حاتەمئۆگیولاری: دیدار بەس نییە، دەبێت دەرگاکانی ئیمراڵی بکرێنەوە
- کامیان مەترسیدارترن: ئێران یان ئیخوان؟
- ههسهده و چەک؛ هاوکێشە سەختەکە لە بنیاتنانەوەی سوپای سوریادا
- ئیدارەی نوێی سوریە ئەمیرێكی پێشوی بەرەی نووسرەی وەك سەرۆكی دەزگای هەوالگریی سوریە دیاری كڕد
- وەزیری دەرەوەی روسیە دەلێ دەگەل ئیدارەی تازەی سوریە پەیوەندیمان هەیە
- ئیسرائیل فرۆكەخانەی نێودەولەتی سەنعا لە یەمەن بۆمباران كرد
- شاندێكی بالای عێراقی دەگەل ئیدارەی نوێی سوریە دیداری كرد
- دوای روخانی رژیم بەعسی ئەسد، عەلەوییەكان چییان بەسەر دێت
- وەزیری دەرەوەی ئیسرائیل دەلێت: هێرشەكان دژ بە كوردەكان دەبێ بوەستێنرێن
- چیروکی نەبیستراویی ناو زیندانەكانی سوریە
- حشدی شەعبی هەرشە لە توركیەدەكات
- ترامپ دەلێ: لە هیچ لایەك قەبوول ناكەیین جێگرەوەی دۆلار بەرهەم بێنێت
- ناوەرۆكی دیداری نێوان وەزیری دەرەوەی ئێران و بەشار ئەسەد بلاوبووە
- فەرانسە رێگای بەكارهێنانی مووشەكی دورمەودای بە ئوكرایین دا كە لە دژی روسیە بەكاری بێنێت
- جۆزف بۆرێل دەلێ: بیرت لە لێواری دارماندایە
- پیرۆزبایی بزووتنەوەی کۆماریخوازانی ڕۆژهەڵاتی کوردستان بە بۆنەی جێژنی پیرۆزی قوربان
- پەیامی پیرۆزبایی بزووتنەوەی کۆماریخوازانی رۆژهەڵاتی کوردستان بە بۆنەی پێنجەمین کۆنگرەی ئاسایی هەدەپە
- پەیامی پیرۆزبایی بزوتنەوەی کۆماریخوازی ڕۆژهەڵاتی کوردستان بە بۆنەی جێژنی ڕەمەزانی پیرۆزەوە
- راگەیەندراوی بزووتنەوەی کۆماریخوازان بەبۆنەی رۆژی جیهانی کرێکاران
- بزووتنەوی کۆماریخوازان ئیدانەی هێرشەکانی رێژیمی تورکیە بۆ سەر باشووری دەکا
