به‌ڕێزان ( عوسمان عه‌به پێنجوێنی یان عوسمان قه‌ڵادزه‌یی) و( جه‌واد حه‌یده‌ری) به‌داخه‌وه وتیان به‌ڵێ ڕاسته و كۆچی دوایی كردووه؟
هونه‌رمه‌ند و پێشمه‌رگه ، سروودبێژ و گۆرانیبێژ...
کۆڕەوو شەنگال وتووەو دەیڵێت و بەشداریی کاریگەری لەئاهەنگەکانی سەرفیرازیدا بووەو دەبێت.
مستەفا داداری موکریانی مەهابادی خۆی بەخوێندکاری (مام هێمنی شاعیر ١٩٢١-١٩٨٦) دەزانێ و کاتێک قسە دەکا...
باسمان بۆ بکەن، ئەو ئۆرکێسترەی ئێوە چەنساڵێک ژەنیاری بوون؟ئەو ئۆرکێسترە بە ئۆرکێستری رادیۆ کرماشان ناسراو بوو و لە سەرەتاشەوە سەرپەرەشتییەکەی بەدەستی بەڕێز عەبدولسەمەدیان بوو کە...
بەر دەکەوێت بەڵام لەو لایشەوە هەر بە پاڵپشتی ئەو سامانە دەوڵەمەندە،خۆی دوو هێندە لە نێو ڕووبەری فەرهەنگیی کورددا دەردەخات. هێشتاکەیش کتێبخانەکەی پڕیەتی لە دەیان بەرهەمی...
کوردە ئێزدییەکانی رۆژئاوای کوردستان داوایان لەحکومەتی هەرێمی کوردستان کرد بەهانایانەوە بچێت و لەمەترسی چەکدارانی بەرەی نوسرەی ئیسلامی رزگاریان بکات.
شیخ سەعید عزەدین ئیبراهیم، کە یەکێکە لەگەورە پیاوانی ئێزدی رۆژئاوای کوردستان لە لێدوانێکیدا بۆ سۆمەریە نیوز گوتی" گوندەکانی غەزویەو باسفان و فەقیران و قەسرعەلی جندو و سەرنتاو قتمەو عشقبارو گەنگەران و شەحدیر لەناوچەی عەفرین چەند رۆژێکە لەلایەن چەکدارانی بەرەی نوسرە گەمارۆدراون".
شێخ سەعید گوتیشی" بەهۆی گەمارۆی چەکدارانی بەرەی نوسرەی ئیسلامی دانیشتوانی ئەم گوندانە بەدەست نەبوونی خزمەتگوزاری و ئاو و کارەباو خواردن و پێداویستییە مرۆییەکان دەناڵێنن.
سەعید داوای لەدەسەڵاتدارانی هەرێمی کوردستان کرد لەئاست ئەم دەست درێژیە بێدەنگ نەبن و هەوڵبدەن ئەو گەمارۆیە لەسەر گوندەکانمان هەڵگرن و یارمەتی پێویستیشمان بۆ رەوانە بکەن.
دوێنێ شەممە 10/8/2013 سەرۆکایەتی هەرێمی کوردستان داوای پێکهێنانی لێژنەیەکی کرد بۆ لێکۆڵینەوە لەو بارودۆخەی کوردانی سووریا تێیکەوتوون ، دووپاتیشیکردەوە هەرێمی کوردستان بەهەموو شێوەیەک ئامادەیە بەرگری لەکوردانی سووریا بکات.
چەند رۆژێکە ناوچە کوردنیشینەکانی سووریا پێکدادانی چەکداری لەنێوان چەکدارانی بەرەی نوسرەی ئیسلامی و هێزەکانی بەرگری میللی کوردی بەخۆوە دەبینێ و بەهۆیەوە دەیەها کەس کوژراون.
بۆ شەرمەزارکردنی ئەم دەستدرێژییانەی چەکدارانی بەرەی نوسرە دژبە دانیشتوانی مەدەنی ناوچە کوردییەکانی سووریا پارتە سیاسی و رێکخراوەکانی مەدەنی خۆپیشاندانی گەورەیان ئەنجامدا.
سەمیع زوبێر
رووداو ـ سۆمەریە
12/08/2013
هاوسەرۆكی گشتی KCK رایدەگەیەنێت " ستراتیژی كوردستانێكی سەربەخۆمان نییە، داوای ئۆتۆنۆمیەكی ئیداری دەكەین".
بەسە هۆزات ( هۆلیا ئۆران ) كە لە كۆنگرەی نۆیەمی KCK هاوشانی جەمیل بایك بە هاوسەرۆكی ئەو رێكخراوە هەڵبژێردرا، پێیوایە لەم قۆناخە بۆ كورد دەرفەتێكی گەورە بۆ هاوپەیمانیەتی لەگەڵ هێزەكانی دیكە هاتۆتە ئاراوە.
بەسە هۆزات، هاوسەرۆكی گشتی KCK، لە دیمانەیەكی لەگەڵ رۆژنامەی سەباحی توركی دەڵێت:" هەموو شەڕێك رێگا بۆ زیانی ماددی و مەعنەوی دەكاتەوە، ئەوە شایانی ئەو ناوچەیە نییە، بۆ ئەوەش پێویستە ململانێیەكی جدی دیموكراتی بگیرێتەبەر، ئەمەش تەنیا بە كورد ناكرێ، بەڵكو پێویستە هەموو خەڵكی توركیا بەشداری لەو پرۆسەیەدا بكات".
هۆزات لە بەشێكی دیكەی دیمانەكەدا ئاماژە بە بارودۆخی تەندروستی رێبەری PKK عەبدولڵا ئۆجەلان دەكات و دەڵێ:" كاتێ لە سوریاش بوو كێشەی تەندروستی هەبوو، بەهۆی زیندانیكردنیشی لە ئیمڕالی دۆخی تەندروستی خراپتر بووە".
هاوسەرۆكی گشتی KCK روونیدەكاتەوە ئۆجەلان زۆر باسی ئەو مەسەلەیە ناكات بۆ ئەوەی پڕۆسەكە پەكی نەكەوێت، ئەو ئەكتەرێكی سەرەكی پرۆسەكەیە ئەگەرچی رۆڵی سەرەكی دەگێڕێت، بەسە هۆزات دەشڵێت:" كاتێك تەندروستی ئۆجەلان تێكبچێت چۆن دەتوانێت پڕۆسەكە بەڕێوەببات؟ ئەگەر شاندێكی پزیشكانی سەربەخۆ بچێتە ئیمڕالی و كەسانێكی نزیك لە ئێمە لەگەڵیان بچن، دڵمان ئۆقرە دەگرێت".
دەربارەی دەوڵەتێكی سەربەخۆی كوردیش هاوسەرۆكی گشتی KCK دەڵێ:" كوردستانێكی سەربەخۆی لە ستراتیژیەتی ئێمەدا نیە،پێمانوایە دەوڵەتی نەتەوەیی بۆ گەلان مایەی چارەسەری نیە، ئەوەی لەسەر دەوڵەتی نەتەوەیی قوڵ دەبێتەوە دەسەڵاتە، ئەو دەسەڵاتەی لەسەر ئەمەش قوڵ دەبێتەوە، داگیركەری، فشار و زوڵم بەرهەم دێنێ، لەساڵی 2000 دەوڵەتی نەتەوەییمان لە بەرنامەی خۆمان دەرهێناوە".
هاوسەرۆكی KCK بانگەشەی خۆ بەڕێوەبردن بە واتای پارچەبوونی توركیا دانانێ و دەڵێ :" لەناو سنووری فەرمی داوای ئۆتۆنۆمیەكی ئیداری دەكەین".
12/08/2013
بۆ ڕای گشتی کوردستانی وجیهانی.
کۆمەڵانی تێکۆشەری خەڵکی کوردستانی مەزن!
تامەزرۆیانی ئاشتی و تەبایی و یەکڕیزی نەتەوەی گەورەی کورد!
دوای تێپەڕبوونی نزیک بە ساڵێک و پاش چەندین دانیشتن و کۆبونەوە لە نیۆان سەرکردایەتی هەردوو پارتی سەربەستیی کوردستان و پارتی ئازادی و دیمۆکراسی کوردستان و بۆ هەرچی زیاتر خزمەت بە نەتەوەی کورد و لە پێناو بەرژەوەندی گشتی نەتەوە و وڵاتەکەمان لە لایەک و؛ لە پێناو وەسەریەک خستنەوەی هێز و تواناکانمان و بۆ هەرچی زیاتر مەحکەمکردنی سەنگەری خەباتی نەتەوایەتی لە لایەکی دیکەوە، هەردوو لایەن لە سەر ئەوە ڕێکەوتین کە وەک یەک لایەنی سیاسی و لە ژێر ناوی* پارتی سەربەستیی کوردستان* درێژە بە خەبات و تێکۆشانی خۆمان بدەین.
هەر لێرەوە داوا لە سەرجەم هێز و لایەنەکانی دیکەی کوردستانی دەکەین کە بە کەڵک وەرگرتن لە خاڵە هاوبەشەکانی نێوانیان و لە پێناو بەرژەوەندی گشتی نەتەوەکەمان دا، با چاوپۆشی لە قازانج و بەرژەوەندیە تاکەکەسی و گروپیەکان بکەن و پێکەوە لە یەک ریکخراو و بۆ یەک ئامانج کە ئەمیش سەربەخۆیی کوردستانە درێژە بە تێکۆشانیان بدەن، چونکە هەلومەرجی ئەمرۆی کوردستان پێویستی بە یەکریزی، تەبایی، هاوهەڵوێستی و پاڵپشتی یەکتری هەیە .
هەر لەم راستایە و وەک هەردوو لایەنی پادک و پ س ک داوا لە گشت لایەنە سەربەخۆخوازەکانی دیکەی ڕۆژهەڵاتی کوردستان دەکەین و داوایان لێدەکەین: کە بۆ هەرچی زیاتر خزمەت بە نەتەوەکەمان و لە پێناو بەرژەوەندی گشتی دا، با لەگەڵ یەکتر دڵپاک و بە دیالۆگ و دانیشتن ڕێگای یەکگرتن و لێکنزیکبوونەوە خۆشبکەین، گومانی تێدانی یە کە هەمچون هەنگاوگەلێک کە ئەمرۆ پسک و پادک ناویانە، گەورەترین خزمەتە بە نەتەوەکەمان و ڕێگاخۆشکەری ڕەوتی خەباتی نەتەوایەتی یە لە پێناو رزگاری کوردستان.
هەر شەکاوە بێت ئاڵای خەباتی یەکڕیزی ڕٶڵەکانی نەتەوەی گەورەی کورد لە پێناو کوردستانێکی ئازاد و دێمۆکرات و سەربەخۆدا.
ئەنجوومەنی سەرکردایەتی پارتی سەربەستیی کوردستان:
عارف باوەجانی سەرۆکی گشتی پ س ک :
قادری خەندەڕەش سەرۆکی پادک
ئەنجومەنی سەرۆکایەتی پارتی ئازادی ودیمۆکراسی کوردستان
11/08/2013
تەرمی شاعیری گەورەی كورد شێركۆ بێكەس لەرێگەی فرۆكەخانەی نێو دەوڵەتی هەولێرەوە گەیشتەوە هەرێمی كوردستان.
بڕیارە له‌ڕێوره‌سمێكدا ته‌رمه‌كه‌ی ببرێته وه‌زاره‌تی رۆشنبیری‌‌و ئه‌مشه‌ویش له‌شاری هه‌ولێر ده‌مێنێته‌وه‌‌و دواتریش بەرەو سلێمانی بەڕێبکرێت.
چاوه‌ڕوانده‌كرێت سبەینێ لە مەراسیمێکی جەماوەریی و بە پێشوازیکردن لە تەرمەکەی، لە ناو پارکی ئازادی شاری سلێمانیدا، لە سەر وەسیەتی خۆی بە خاکبسپێردرێت
شێركۆ بێكه‌س رۆژی یه‌كشه‌ممه 4-8 دوای مانه‌وه‌ی بۆ ماوه‌ی زیاتر له‌سێ مانگ له‌ژێر چاره‌سه‌ری پزیشكیدا به‌هۆی شێرپه‌نجه‌وه له‌نه‌خۆشخانه‌ی كارۆلینسا له‌ستۆكهۆڵمی پایته‌ختی سوید كۆچی دوایكرد.
شێركۆ بێكه‌س (73 ساڵ) ماوه‌ی چه‌ند ساڵێكه به‌هۆی تێكچونی ژێكانی ده‌نگیه‌وه باری ته‌ندروستی تێكچوه‌‌و زۆرجار ده‌نگی نوساوه، تاوه‌كو نه‌خۆشی زۆری بۆ ده‌هێنێت‌و بۆ چاره‌سه‌ر 17ی نیسانی ئه‌مساڵ ره‌وانه‌ی سوید ده‌كرێت.
به‌پێی پشكنینه پزیشكیه‌كانی سوید یه‌كێك له‌ژێكانی قورگی شێركۆ توشی پچڕان بوه له‌ئه‌نجامی مانوبونی زۆره‌وه، به‌هۆی جگه‌ره كێشانی زۆریشه‌وه سییه‌كانی توشی هه‌وكردن بوه تاه‌كو روبه‌ڕوی شێرپه‌نجه‌ی كردۆته‌وه.
شێركۆ بێكه‌س پێش نه‌خۆشكه‌وتنی له‌وه‌سێتنامه‌یه‌كدا شوێنی به‌خاكسپاردنی دیاریكردوه‌‌و چاره‌نوسی كتێب‌و هه‌وڵه‌كانی خستۆته‌ڕو.
شارەوانی سلێمانی رەزامەندی نيشاندا لەسەر ناشتنی تەرمی شێركۆ بێكەس لەپاركی ئازادی.
hawlati
11/08/2013
ساڵح موسلیم، هاوسەرۆکی پارتی یه‌کێتی دیموکرات (PYD) بە رۆژنامەی ئەلحەیاتی راگەیاند "گفتوگۆمان لەسەر شەڕی گرووپە ئیسلامییە توندڕەوەکان کردووە، لەگەڵ ئێران".
موسلیم رایگەیاندووە "ئێران لەو باوەڕەدایە، پەیەدە و ئەلپارتی دوو هێزی سەرەکی رۆژئاوای کوردستانن و دەیەوێت پەیوەندییەکانی لەسەر بنەمای هاوکاری و دیالۆگ بێت".
هاوسەرۆکی پەیەدە ئاشکرایکرد "لەگەڵ سکرتێری ئەلپارتی لە تاران یەکتریان بینییووە و هەندێک بابەتی ناوخۆییان تاووتوێ کردووە".
موسلیم ئاماژەی بەوەشدا، هیچ کێشەیەکی وا گەورە لە نێوان ئەوان و ئەلپارتی لە ئارادانییە.
11/08/2013
كەمال كەركووكی، ئەندامی مەكتەبی سیاسی پارتی دیموكراتی كوردستان بە رووداوی راگەیاند:" دوێنێ هەینی 9ی ئابی 2013، خۆی لەگەڵا سەعدی ئەحمەدپیرە، نوێنەری یەكێتی نیشتیمانی كوردستان سەردانی قەندیلیان كردوو لەگەڵ جەمیل بایك، هاوسەرۆكی كۆما جڤاكێن كوردستانێ )PKK( كۆبوونەوە".
كەركووكی كەهاوكات ئەندامی لیژنەی ئامادەكاری كۆنگرەی نەتەوەیی كوردە، كە بڕیارە كۆنگرەكە 24ی ئەم مانگە لە شاری هەولێر ئەنجامبدرێ گوتی "پێشتر بڕیارماندابوو سەردانی قەندیل بكەین، بەڵام كاتەكە واگونجا ئەو سەردانە لەم كاتەدا بكرێت".
كەركووكی ئاماژەی بەوەدا" لە سەردانەكەدا بە تێرو تەسەلی باسی پرۆسەی ئاشتی لە تووركیا كرا كە لەلایەن رەجەب تەیب ئەردۆغان، سەرۆك وەزیرانی توركیا و عەبدوڵڵا ئوجەلان، رێبەری زیندانی كراوی پارتی كرێكارانی كوردستان (پەكەكە) دەستیپێكردوەو تەئكیدمانكردەوە كە دەبێ ئەو پرۆسەیە سەربگرێت".
ئەو ئەندامەی مەكتەبی سیاسی پارتی زیاتر باسی تەوەرەكانی كۆبوونەوەكەكرد و خستیەڕوو"مەسەلەی رۆژئاوا بەشێكی دیكەی كۆبوونەوەكە بوو و خودی جەمیل بایك پاڵپشتی خۆی لە داوایەكەی مەسعود بارزانی، سەرۆكی هەرێمی كوردستان، دەربڕی بۆ ئەوەی لیژنەیەك پێكبهێنرێ بۆ ئەنجامدانی لێكۆڵینەوە لەو دەنگۆیانەی باس لەوە دەكرێ كوردانی رۆژئاوای كوردستان سەردەبرێن و دەكۆژرێن".
سەبارەت بەم گرژیانەی ئەم دواییەش كە لە نێوان پارتی دیموكراتی كوردستان و پەكەكە روویاندان كەلەسەر گوتارێكی جەمیل بایك بوو لە رۆژنامەی ئازادی وڵات و تیدا رەخنە لە هەڵوێستی پارتی گرت لەسەر مەسەلەی دەروازەی سێمالكا كە باشووری كوردستان و رۆژئاوای كوردستان پێكەوە دەبەستێت، كەركووكی گوتی :"بڕیارماندا ئەو بابەتە كۆتای پێبهێت و كۆتای پێهات".
لە درێژەی لێدوانەكەیدا كەمال كەركووكی گوتی "لێژنەكە بەم نزیكانە پێكددەهێنرێت و سەردانی رۆژئاوای كوردستان دەكات بۆ ئەوەی راستیەكان بزانێرێن".
پێشتر مەسعود بارزانی، سەرۆكی هەرێمی كوردستان نامەیەكی ئاراستەی لیژنەی ئامادەكاری كۆنگرەی نەتەوەیی كردو داوایكرد بۆ لیژنەیەك پێكبهێنرێت بۆ دەرخستنی راستییەكان لە رۆژئاوای كوردستان.
11/08/2013
دیاریكردنی پێنج نوێنەر بۆ لێژنەی ئامادەكاری كۆنگرەی نەتەوەیی كورد، حیزبەكانی رۆژهەڵاتی كوردستانی بەسەر دوو بەرەدا دابەش كرد، بەڵام هەندێك لایەنیشی لێك نزیككردەوە كە پێشتر ناكۆكی زۆریان لەنێواندا هەبوو.
دەنگدانی سێ باڵی كۆمەڵە و دوو لایەنەكەی حیزبی دیموكرات بە یەكدی بۆ بەدەستهێنانی كورسی ئەندامێتی لە دەستەی ئامادەكاری كۆنگرە، بە قۆناخێكی نوێ لە پەیوەندییەكانی نێوان ئەو لایەنانە دەژمێردرێت. بەر لە یەكەم دانیشتنی كۆبوونەوەی ئامادەكاری كۆنگرەی نەتەوەیی لە رۆژی 22ی تەمموزی رابردوو، هیچكات ئەو پێنج لایەنە بە فەرمی پێكەوە كۆنەببوونەوە.
نۆ حیزبی رۆژهەڵاتی كوردستان بۆ بەشداری لە یەكەم كۆبوونەوەی ئامادەكاری كۆنگرەی نەتەوەیی بانگهێشت كرابوون. لەو كۆبوونەوەیەدا بڕیاردرا كە پێنج ئەندام لە لێژنە 21 كەسییەكەی دەستەی ئامادەكار، لە نێوان ئەو حیزبانە هەڵبژێردرێن.
هەشت حیزب خۆیان بۆ وەرگرتنی ئەندامێتی پاڵاوت و تەنیا پارتی سەربەخۆیی كوردستان بەشداری ئەو هەڵبژاردنەی نەكرد، كە سێ لایەنی كۆمەڵە و هەردوو دیموكراتەكە تێیدا براوە بوون.
لەو دەنگدانەدا پژاك، سازمانی خەبات و پارتی ئازادی دەنگیان نەهێنا و ناڕەزایەتییان دەربڕی و رایانگەیاند كە دیموكراتەكان و كۆمەڵەكان بۆ سەركەوتن لەو هەڵبژاردنەدا پێشتر رێككەوتبوون. لە بەرامبەردا ئەو پێنج لایەنەش دەڵێن ئەوانەی كە دەنگیان نەهێناوە خۆیان پێشنیازی هەڵبژاردنیان كردووە.
لە نێو ناڕازییەكاندا، تەنیا پژاك توانی ببێتە ئەندامی دەستەی ئامادەكاری كۆنگرە كە تا ئێستا شێوازی بەشداریكردنی بە فەرمی رانەگەیەندراوە، تەنیا بەرپرسی پەیوەندییەكانی ئەو پارتە رایگەیاندووە كە لەسەر حیسابی رۆژهەڵاتی كوردستان لە كۆبوونەوەكاندا بەشداری دەكەن.
بەپێی زانیارییەكان، PKK پێداگری لەسەر بەشداركردنی پژاك كردووە و ئامادە نەبووە بەبێ ئەو لایەنە لە دەستەی ئامادەكاردا بەشداری بكات. كۆمەڵە و دیموكراتەكانیش هەرچەندە پژاك بە پارتێكی سەربەخۆ نازانن، بەڵام تا ئێستا لە بارەی بەشداریكردنی لە دەستەی ئامادەكاردا هەڵوێستیان دەرنەبڕیوە.
لێكترازانی ساڵی 2006 لە نێو ریزەكانی حیزبی دیموكراتی كوردستانی ئێران (حدكا)، لایەنێكی دیكەی بە نێوی حیزبی دیموكراتی كوردستان (حدك) لێكەوتەوە.
ئەو دوو لایەنە ئەگەرچی سەرەتا هیچ پەیوەندییەكیان پێكەوە نەبوو، بەڵام وەكو مستەفا هیجری، سكرتێری گشتی حدكا لە هەڤپەیڤینێكدا لە تەلەڤزیۆنی (Rudaw) گوتی “لە ماوەی یەك ساڵی رابردوودا پەیوەندییەكانی نێوان ئەو دوولایەنە بەرەو ئاساییبوونەوە چووە، لە داهاتووشدا باس لە میكانیزمەكانی یەكگرتنەوە دەكەن”.
هەرچەندە حدكا پێشتر ئامادەنەبوو حدك وەكو لایەنێكی سیاسی بە فەرمی بناسێت و مەرجی نێو گۆڕینی بۆ دانابوون، بەڵام لە ئامادەكارییەكانی كۆنگرەی نەتەوەییدا ئەو مەرجە گرنگییەكی ئەوتۆی پێنەدرا و ماڵپەڕی فەرمی حدكا ئاماژەی بە نێوی حیزبی دیموكراتی كوردستان دا وەكو حیزبێكی بەشدار لە كۆبوونەوەی یەكەمی ئامادەكاری كۆنگرە.
بە پێچەوانەی دیموكراتەكان، لایەنەكانی كۆمەڵە تا ئێستا نەیانتوانیوە پەیوەندییەكانی نێوان خۆیان ئاسایی بكەنەوە. لە ساڵی 2000دا كۆمەڵەی شۆڕشگێڕی زەحمەتكێشانی كوردستانی ئێران، لە كۆمەڵە- رێكخراوی كوردستانی حیزبی كۆمۆنیستی ئێران، جیابووەوە كە دواجار ئەو حیزبەش لە ساڵی 2007 تووشی لێكترازان هات و “كۆمەڵەی زەحمەتكێشانی كوردستان” پێكهات.
رەزا كەعبی، جێگری سكرتێری كۆمەڵەی زەحمەتكێشانی كوردستان لە میانەی بەشداریكردنی لە بەرنامەی (رووداوی ئەمڕۆ)ی تەلەڤزیۆنی Rudaw رایگەیاند، ئامادەكارییەكانی كۆنگرەی نەتەوەیی كاریگەری لەسەر لێكنزیكبوونەوەی لایەنەكانی كۆمەڵە هەبووە و گوتی “هەرچەندە جارێ ناتوانین بەڵێنی یەكگرتنەوەی كۆمەڵە بدەین، بەڵام پەیوەندی نێوان ئەو سێ لایەنەی كۆمەڵە بە بەراورد لەگەڵ پێش دانیشتنەكانی كۆنگرەی نەتەوەیی زۆر باشتر بووە”.
لەو چەند ساڵەی دواییدا كەم حیزبی رۆژهەڵاتی كوردستان هەیە، تووشی لێكترازان نەبووبێت، بەڵام وەكو خالید عەزیزی، سكرتێری گشتی حیزبی دیموكراتی كوردستان لە هەڤپەیڤینێكدا بە تەلەڤزیۆنی (Rudaw)ی راگەیاند، چاوەڕوانییەكانی خەڵك لە رۆژهەڵاتی كوردستان، حیزبەكانی بەرەو هەوڵدان بۆ یەكڕیزی و یەكگرتوویی هانداوە. عەزیزی پێیوایە “لەتبوون و جیابوونەوە و حیزب حیزبێنە ئیحترامی حیزبایەتی هێناوەتە خوارێ”.
خەباتی یەكگرتووانەی حیزبەكان و گوتاری هاوبەش لە نێوان ئەو حیزبانە و چالاكوانانی نێوخۆ، ئاواتێكی لەمێژینەی خەڵكی رۆژهەڵاتی كوردستانە. لە تۆڕە كۆمەڵایەتی و میدیاییەكانی رۆژهەڵاتی كوردستاندا ئەوە بەئاشكرا هەستی پێدەكرێ.
خەڵك بۆ وەدیهاتنی ئەو ئاواتەیان چاویان بڕیوەتە ئەنجامەكانی كۆنگرەی نەتەوەیی كورد كە بڕیارە لە 24ی ئابدا ببەسترێ.
rudaw
11/08/2013
به‌ره‌ی نوسره خۆی ئاماده ده‌كات بۆ هێرشێكی خوێناوی دژی كوردانی خۆرئاوا و بۆ ئه‌و مه‌به‌سته سه‌رقاڵی خۆكۆكردنه‌وه‌یه.
له‌لێدوانێكی ته‌له‌فۆنیدا بۆ خه‌ندان ، باسم هاشم چاودێرو چالاكوانی سیاسی سوریا رایگه‌یاند:" به‌ره‌ی نوسره له‌هه‌وڵی دروستكردنی بنكه‌یه‌كی سه‌ربازیی فراواندایه له‌ناوچه كوردنشینه‌كانی باكوری خۆرهه‌ڵاتی سوریا و به‌وهۆیه‌وه له‌به‌رنامه‌یدایه هێرشێكی دڕندانه بۆسه‌ر كوردانی خۆرئاوا ده‌ست پێبكات ".
به‌وته‌ی باسم هاشم پلانه نوێیه‌كه‌ی به‌ره‌ی نوسره له‌وه‌وه سه‌رچاوه‌ی گرتووه كه" كورد به‌دوژمنی سه‌ره‌كی خۆی ده‌زانێت له‌جه‌نگی روبه‌روبوونه‌وه‌ی هاوڵاتیانی سوریا – سوریاو بۆ مه‌به‌ستی ئه‌نجامدانی ئه‌و په‌لاماره خوێناوییه‌ش سه‌رقاڵی كۆكردنه‌وه‌ی هێزه به‌پشتیوانیی گروپه چه‌كداره شۆڤێنیه‌كانی دیكه".
به‌وته‌ی چالاكوانه سیاسیه‌كه‌ی سوریا، ئامانجی به‌ره‌ی نوسره له‌دامه‌زراندنی ئه‌و بنكه سه‌ربازییه له‌باكوری خۆرهه‌ڵاتی سوریا بۆ ئه‌وه‌یه له رێی سنووره‌كانی ئه‌و ناوچه‌یه‌وه له‌گه‌ڵ توركیا درێژه به‌چالاكیه‌كانی بدات.
چالاكوانه‌كه‌ی سوریا ئه‌وه‌شی راگه‌یاند كه، به‌ره‌ی نوسره له‌ئێستادا ده‌ستی ناپارێزێت له‌هیچ كام له پێكهاته جیاوازه مه‌زهه‌بی و ئه‌تنیكیه‌كانی سوریا، له‌وانه‌ی له‌گه‌ڵ بۆچوونه‌كانی ئه‌ودا نین و "ئاماده‌یه له‌پێناو سه‌پاندی خۆیدا ده‌ستبداته سه‌ربڕین و قه‌تلوعام كردنی سه‌دان كه‌س له خه‌ڵكی بێدیفاعی ناوچه كورد نشینه‌كان و ناوچه‌كانی دیكه‌ش".
پێشتر مه‌سعود بارزانی سه‌رۆكی هه‌رێمی كوردستان رایگه‌یاندبوو ، گه‌ر راستی هه‌واڵی سه‌ربڕین و قه‌تلوعام كردنی ژنان و منداڵانی كورد به‌ده‌ستی به‌ره‌ی نوسره یه‌كلایی بێته‌وه، ئه‌وا هه‌رێمی كوردستان هه‌موو تواناكانی ده‌خاته‌گه‌ڕ بۆ پاراستنی سه‌روماڵی ژنان و منداڵانی کورد له خۆتئاوای کوردستان.
خه‌ندان
10&08&2013
"خۆ نوێنەرە كوردەكان و وەزیرە كوردەكانیش زۆر پەیوەندییان لەگەڵ دانیشتووانە كوردەكەی بەغدا باش نییە و تەنانەت زمانی كوردیش بەكارناهێنن". ئەوە قسەی بەشیر عەلییە كە كوردێكی دانیشتووی بەغدایە.
خێزانەكەی بەشیر لەناوەڕاستی حەفتاكانەوە لەبەغدای پایتەخت گیرساونەتەوە و ئێستا لە نانەوایەك كاردەكات "لە بەغدا خوێندن بە كوردی بایەخی پێنادرێ، چێشتخانە و هوتێلە كوردییەكان خەریكە نامێنن".
بەشیر گلەیی لە پەراوێزخستنی زمان و كولتووری كوردی هەیە لەو پایتەختەی ساڵانێك هێندەی دانیشتووانی ئێستای پارێزگای دهۆك كوردی لێدەژیا، بەڵام هەواڵی لەوە ناخۆشتریش هەن. بەگوێرەی حكومەتە ئەلیكترۆنییەكەی عێراقی نوێ، زمانی كوردی هێشتا هەر لەمدیوی حەمرینەوە سەیری بەغدا دەكات. تەنانەت لە ماڵپەڕی ئەو وەزیرە كوردانەشدا كە نوێنەری كوردن لەو حكومەتەی تەنیا بەعەرەبی قسەدەكات. ئەمە لە كاتێكدایە، لە بەغدا و دەوروبەری، ئێستا هەندێك لە هاووڵاتییە عەرەبەكان هەوڵدەدەن منداڵەكانیان فێری زمانی كوردی بكەن.
حوسێن جاف، بەڕێوەبەری خوێندنی كوردی لە بەغداوە بۆ (رووداو) قسەی كرد و گوتی، بەهۆی درووستبوونی هاتوچۆ لەگەڵ هەرێمی كوردستان و بەسەربردنی پشووەكان لە شوێنە گەشتیارییەكانی هەرێمی كوردستان، هەندێك "هاووڵاتی عەرەب لە بەغدا منداڵەكانیان فێری كوردی دەكەن". گوتیشی"چونكە ئەوان لە كوردستان دەمێننەوە و پێویستیان بەوە هەیە خۆیان فێری كوردی بكەن".
لە حكومەتی ئێستای عێراقدا وەزارەتەكانی دەرەوە، تەندروستی، بازرگانی، كۆچ و كۆچبەران بەدەست كوردەوەن، جگە لەوەش لە زۆربەی وەزارەتەكاندا، كوردێك پۆستی بریكاری وەزیری هەیە، بەڵام كاروچالاكییەكانیان تەنیا بە زمانی عەرەبی و ئینگلیزی بڵاودەكەنەوە. ئەمە لە كاتێكدا گلەیی سیاسی كورد بە بەردەوامی لەسەر كەمیی پشكی كورد بووە لەنێو ئەو حكومەتەدا، جگە لەشەڕی جێكردنەوەی زمانی كوردی لەسەر پاسپۆرت و دراو و شوێنە فەرمییەكان.
ئایا حكومەتی بەغدا رێگەی گرتووە لەوەی وەزیرە كوردەكان لە نێو ماڵپەڕی وەزارەتەكانیاندا، بەشی كوردی بكەنەوە؟ كەس ناڵێ بەڵێ، بەڵام هێشتا پاساو دەهێنرێتەوە بۆ نەبوونی زمانی كوردی لە نێو وەزارەتێكدا كە وەزیرەكەی كوردە.
د. خەیروڵڵا حەسەن، وەزیری بازرگانی عێراق ، دەڵێ هەوڵی زۆریداوە بۆ ئەوەی تەنانەت نووسراوەكانی ناو وەزارەتیش بكاتە كوردی "بەڵام دیارە ئەو كەسەی ماڵپەڕەكەمان بەڕێوەدەبات، كوردییەكەی باش نییە و بەهۆی ئەوەوە ناتوانێ بەشی كوردییەكەی بكاتەوە".
ناوبراو هەروەها دەڵێ، ئەگەر ئێوە كەسێك شك دەبەن "لەگەڵمان بێت و كوردییەكی زۆر باش بزانێ و بەشی كوردی بكاتەوە پێمان بڵێن، بەداخەوە ئێستا ئەو كوردانەی لە بەغدا دەژین كوردیەكەیان باش نییە، زۆر هەوڵیشمان دا كەسێك بدۆزینەوە كوردییەكەی بەهێزبێ و شارەزابێ، بەڵام نەبوو".
تەنیا ماڵپەڕی ئەنجوومەنی نوێنەران و سەرۆكایەتی كۆمار بەشی كوردییان هەیە، ئەوەی سەرۆكایەتی كۆمار لەدوای نەخۆشكەوتنی تاڵەبانییەوە هەواڵی نوێی تێدا بڵاونەكراوەتەوە، كەچی بەشە عەرەبی و ئینگلیزییەكەی بەردەوام هەواڵی نوێ لەبارەی كاروچالاكییەكانی سەرۆكایەتی كۆمار بڵاودەكاتەوە. بۆیە دەكرێ بگوترێ ئێستا وەشاندن بە كوردی لەو ماڵپەڕەدا وەستاوە و رەنگە ئەو تۆزە كوردییەش چاوەڕوانی چارەنووسی تاڵەبانی بكات.
هەریەك لە ماڵپەڕەكانی وەزارەتی تەندروستی و دەرەوە و كۆچ و كۆچبەرانیش بەهەمانشێوە بەشی كوردییان نییە. وەزارەتی رۆشنبیری كە بریكارەكەی كوردە، وشەیەك كوردیی تێدا نییە. فەوزی ئەتروشی، بریكاری وەزارەتی رۆشنبیری عێراق دەڵێ "بەرپرسی چاپ و بڵاوكردنەوە لە وەزارەتی رۆشنبیری كەسێكی عەرەبە، بۆیە چاپ و بڵاوكردنەوە بە كوردی نییە".
یاسین حەسەن، وەزیری بێ وەزارەت لە كابینەی پێشووی حكومەتی بەغدا، دەڵێ هەموو كەمتەرخەمییەكە وەزیر و نوێنەرە كوردەكان خۆیان دەگرێتەوە "دیارە ئەوان یان ئینتیمای نەتەوەییان لاوازە، یان نایانەوێ ئەوە بكەن"، ناوبراو هەروەها دەڵێ، بە درێژایی ساڵانی دروستكردنی حكومەتی عێراق تەنیا هاووڵاتی كورد ناچار بووە خۆی فێری عەرەبی بكات "دەبێ سەركردایەتی كورد كۆبوونەوەیان پێبكات و داوایان لێبكات ئەو كارە بكەن".
یاسین حەسەن دەڵێت، ئەگەر ئەوان خۆیان بیانەوێ دەتوانن ئەو كارە بكەن و رێگریشیان نییە "بەڵام رەنگە هەندێك لەو وەزیر و نوێنەرە كوردانە خۆیان بە میوان بزانن لە بەغدا".
دوای 10 ساڵ لە پێكەوەنانەوەی عێراق، ئێستا هاووڵاتیانی هەرێمی كوردستان پێویستیان بە وەرگێڕێكی زمانی عەرەبی هەیە بۆ ئەوەی بزانن وەزیر و نوێنەرە كوردەكان لە بەغدا رۆژانە خەریكی چین لە وەزارەتەكانیاندا.
بەڵام بە پێچەوانەوە دانیشتووانی بەغدا و ناوەڕاست و باشووری عێراق تەنیا یەك كلیكیان بەسە بۆ ئەوەی بزانن وەزیرەكانی حكومەتی هەرێمی كوردستان لە هەولێر چی دەكەن. چونكە بە پێچەوانەی حكومەتی بەغداوە، تەواوی وەزارەتەكانی حكومەتی هەرێمی كوردستان، بەبێ ئەوەی بەغدا داوای لێكردبن لە پاڵ زمانی كوردیدا، زمانی عەرەبی بەكاردێنن.
یاسین حەسەن، پێیوایە ئەگەر بەشی كوردی هەبێ لە ماڵپەڕی وەزیرە كوردەكاندا، لەوانەیە هاووڵاتیانی عەرەب هەوڵ بدەن لەو رێگایەوە هەندێك وشەی كوردی فێر ببن. یان هەرنەبێ خەڵك بیری بكەوێتەوە كە لەو وڵاتەدا زمانێكی فەرمی دیكەش هەیە.
نەوزاد مەحموود
رووداو - سلێمانی
10/08/2013
مەسعود بارزانی، سەرۆكی هەرێمی كوردساتان، لەبارەی رۆژئاوای كوردستان نامەیەك ئاراستەی لیژنەی ئامادەكاری كۆنگرەی نەتەوەیی دەكات.
لە نامەكەی بارزانیدا هاتووە" ماوەیەكە لە میدیاكان و هەندێ ناوەندی سیاسی و راگەیاندەكاندا كۆمەڵێك هەواڵ و دەنگۆ بڵاو بووەتەوە كە گوایە لە لایەنە تیرۆریستانەوە لە رۆژئاوای كوردستان نەفیرعام لەدژی هاووڵاتیانی كورد راگەیەنراوە و تیرۆریستانی سەر بە ئەلقاعیدە پەلاماری خەڵكی مەدەنی و بێتاوان دەدەن و سەری ژن و منداڵی كورد دەبڕن. بۆ دەركەوتنی راستی و دروستیی ئەم هەواڵانە داواتان لێ دەكەم لیژنەیەكی تایبەت پێك بهێنن بۆ ئەوەی سەردانی ڕۆژئاوای كوردستان بكەن و لێكۆلینەوە لەسەر ئەو هەواڵانە بكەن".
بارزانی لە نامەكەدا راشیدەگەیەنێَت" ئەگەر بێتوو ئەم زانیاریانە راست بن و هاووڵاتی و ژن و منداڵی بێتاوانی كورد لەژێر هەڕەشەی كوشتن و بڕین و تیرۆردا بن ئەوا هەرێمی كوردستان هەموو تواناكانی دەخاتە گەڕ بۆ ئەوەی بەرگری لە ژن و منداڵ و هاووڵاتی بێتاوانی كورد لە رۆژئاوای كوردستان بكات".
دەقی نامەكە:
بۆ لیژنەی ئامادەكاریی كۆنگرەی نەتەوەیی كورد
سڵاوێكی گەرم...
ماوەیەكە لە میدیاكان و هەندێ ناوەندی سیاسی و ڕاگەیاندەكاندا كۆمەڵێك هەواڵ و دەنگۆ بڵاو بووەتەوە كە گوایە لە لایەنە تیرۆریستانەوە لە ڕۆژئاوای كوردستان نەفیرعام لەدژی هاووڵاتیانی كورد ڕاگەیێندراوە و تیرۆریستانی سەر بە ئەلقاعیدە پەلاماری خەڵكی مەدەنی و بێتاوان دەدەن و سەری ژن و منداڵی كورد دەبڕن. بۆ دەركەوتنی ڕاستی و دروستیی ئەم هەواڵانە داواتان لێ دەكەم لیژنەیەكی تایبەت پێك بهێنن بۆ ئەوەی سەردانی ڕۆژئاوای كوردستان بكەن و لێكۆلینەوە لەسەر ئەو هەواڵانە بكەن.
ئەگەر بێتوو ئەم زانیاریانە ڕاست بن و هاووڵاتی و ژن و منداڵی بێتاوانی كورد لەژێر هەڕەشەی كوشتن و بڕین و تیرۆردا بن ئەوا هەرێمی كوردستان هەموو تواناكانی دەخاتە گەڕ بۆ ئەوەی بەرگری لە ژن و منداڵ و هاووڵاتی بێتاوانی كورد لە ڕۆژئاوای كوردستان بكات.
مسعود بارزانی
سەرۆكی هەرێمی كوردستان
8ـی 8ـی 2013
10/08/2013
سەركردەیەكی دەوڵەتی یاسا رایگەیاند ئەوان بەستنی كۆنگرەی نەتەوەیی كوردیان لەهەولێر پێ ئاساییە، بەو مەرجەی هیچ بڕیار و ئاماژەیەك بۆ جیابوونەوە و سەربەخۆیی پارچەكانی كوردستان لەخۆ نەگرێ و هەڕەشە لە عێراق و وڵاتانی دراوسێ نەكات.
بەپێچەوانەی هەڵوێستەكانی پێشتری، بەتایبەت پێش سەردانەكەی سەرۆك وەزیرانی عێراق بۆ هەولێر و سەردانی سەرۆكی هەرێمی كوردستان بۆ بەغدا كە هەمووی رەخنەئامێزبوون لەهەر هەڵوێست و بڕیارێك لەلایەن هەولێرەوە درابا، دەوڵەتی یاسا تاوەكو ئێستا لەهەمبەر كۆنگرەی نەتەوەیی كورد بێدەنگی هەڵبژاردووە.
دوای چەندین ساڵ چاوەڕوانی، پارتەكانی هەر چوار پارچەی كوردستان گەیشتنە كۆدەنگییەك بۆ بەستنی كۆنگرەی نەتەوەیی كورد و وا بڕیارە لە 24ی ئەم مانگە كۆنگرەكە لەشاری هەولێر ببەسترێ.
عەلی شەللا، گوتەبێژی هاوپەیمانی دەوڵەتی یاسا بە(رووداو)ی راگەیاند "ئەگەر بەستنی كونگرەی نەتەوەیی كورد لەهەرێمی كوردستان لەپێناو بەدیهێنانی خۆشگوزەرانی بۆ گەلی كوردە لە عێراق و وڵاتانی دراوسێ، ئەوا هیچ تێبینیەكمان لەسەری نابێ، چونكە دیكتاتۆریەتی زۆرینە و پەراوێزخستنی لایەنەكان و پێكهاتەكانی دیكە باوی نەماوەو نابێ دەست بەسەر بیركردنەوەمان بگرێ". بەڵام گوتی "ئەگەر ئامانج لەو كۆنگرەیە جیابوونەوەو دابەشكردنی عێراق و وڵاتانی دراوسێ بێت، ئەوا بێگومان بەغدا ئەوكات هەڵوێستی دەبێ".
ئەو بەرپرسەی هاوپەیمانی دەوڵەتی یاسا خۆزگەی خواست كە لەكاتی بەستنی كۆنگرەكە پەرلەمانتارانی عێراق لەبیر نەكرێن "هیوادارین چەند پەرلەمانتارێكی عێراق بەتایبەتی ئەو پەرلەمانتارانەی بە دۆستی كورد ناسراون، بانگهێشتی كۆنگرەكە بكرێن بۆ ئەوەی بەغداش ئاگاداری ئەو بڕیار و هەڵوێستانە بێ كە لە كۆنگرەكەدا رادەگەیێندرێ و گومانی لا دروست نەبێ".
غەفور مەخمووری، گوتەبێژی كۆنگرەی نەتەوەیی كورد لەهەرێمی كوردستان بە(رووداو)ی راگەیاند "بڕیارە 300 كەسایەتی بیانی داوەتی كۆنگرە بكرێن". مەخمووری گوتیشی "بۆ عێراق بەدڵنیاییەوە نوری مالیكی، سەرۆك وەزیرانی عێراق و سەرۆكایەتی كۆمار و پەرلەمانتارانی عێراق داوەت دەكرێن، هەروەها كۆمەڵێك كەسایەتی عەرەب كە رۆڵیان لە دۆزی كورددا گێڕاوە و لە سەریان نووسیوە".
هەرچەندە كۆنگرەی نەتەوەیی هێشتا لە قۆناغی ئامادەكاریدایە و نەبەستراوە، بەڵام چاودێران هاوڕان لەسەر ئەوەی كۆنگرەكە جێی سەرنجی حكومەتی عێراق و وڵاتانی دراوسێ دەبێ، بۆیە بێدەنگی بەغدا لەو رووەوە خوێندنەوەی جیاوازی بۆ دەكرێ.
هاشم ئەلحەبوبی، شرۆڤەكاری سیاسی بە(رووداو)ی راگەیاند "هۆكاری بێدەنگی حكومەتی عێراق لە ئاست بەستنی كۆنگرەی نەتەوەیی كورد لە هەولێر زۆرن و دیارترینیان سەرقاڵبوونی حكومەتی مالیكییە بە رەوشی ئەمنی عێراق، كە لەبارێكی خراپدایەو شڵەژانێكی گەورەی بەخۆیەوە بینیوە، ئەوە جگە لە قەیرانی سیاسی و ئامادەكاری بۆ هەڵبژاردنی پەرلەمانی عێراق كە بڕیارە سەرەتای ساڵی داهاتوو ئەنجام بدرێ، هەموو ئەم هۆكارانەو هەستیاری باری ئێستای پەیوەندییەكانی نێوان بەغداو هەولێر كە ماوەی چەند ساڵێكە بەقەیراندا تێدەپەڕێ، حكومەتی عێراقیان بێدەنگ كردووە".
ئەو شرۆڤەكارە سیاسییە هەروەها گوتی "لە عێراقدا رانەهاتووین پێشوەخت راوبۆچوونی خۆمان لەبارەی رووداوێك یاخود هەڵوێستی لایەنێك دەربرین، چاوەڕێ دەبین هەتا ئەوكاتەی ئەو هەڵوێستە روون دەبێتەوە و دەبێتە بڕیار".
حەبوبی كە هاوكات ئەمینداری گشتی گردبوونەوەی كۆماری عێراقییە، پێیوایە "دەبێ كورد سنووری شەرم بشكێنێ و بە ئاشكرا و پێشوەخت بانگەشە بۆ هەر كۆنگرەیەكی هاوشێوە بكات و هەموو لایەكی بۆ داوەت بكات".
هەرچەندە هێشتا دیار نییە ئەنجامەكانی كۆنگرەی نەتەوەیی چی دەبن، بەڵام چاوەڕوان دەكرێ كۆنگرەكە گۆڕانكاریەك لە ئاستی پەیوەندیی نێوان هێزەكانی پارچەكانی كوردستان بەدی بێنێ، هاوكات مەترسی ئەوەشی لێدەكرێ گۆڕان بەسەر پەیوەندییەكانی نێوان هەرێمی كوردستان و بەغدا بێنێ.
هاشم ئەلحەبوبی پێیوایە دوای ئەو كۆنگرەیە گۆڕانكاری گەورە بەسەر رەوشی كورد دێت لە ناوچەكەدا و دەڵێت "گەلی كورد ئەمڕۆ زیاتر لە هەموو كاتێك پێویستیان بە یەكدەنگی و بڕیاردان هەیە بەهۆی ئەو رەوشە نێودەوڵەتی و هەرێمایەتییەی كە لەناوچەی رۆژهەڵاتی ناوەڕاست هاتووەتە ئاراوە، بەتایبەتی لە سووریا و توركیا، پێشبینی دەكەم كۆنگرەكە كاریگەری گەورەی بەسەر بزووتنەوەی رزگاریخوازی كوردەوە هەبێ لە ناوچەكەدا".
9/0872013
دەستەی گەشتوگوزاری هەرێمی کوردستان دەڵێت، له شەش مانگی سەرەتای ئەمساڵ زیاتر له یەک ملیۆن گەشتیار سەردانی هەرێمیان کردووه و ئەمساڵیش جیاواز له ساڵانی رابردوو به ستاندارێکی جیهانی پێشوازی له گەشتیاران دەکرێت.
"نادر رۆستایی" بەرپرسی دەستەی گەشتوگوزاری هەرێمی کوردستان سەبارەت به پلانی جەژن به رادیۆ و ئاژانسی پەیامنێری راگەیاند: بەڕێوەبەرایەتییەکانی گەشتوگوزار له هەولێر، سلێمانی، دهۆک و گەرمیان ئەمساڵ ئامادەکارییەکی بەرفروانیان کردووه. لێژنەکانمان له بازگەکانی ئەم شارانه به دابەش کردنی شیرینی و ئاو پێشوازییان له گەشتیاران کردووه و هەروەها برۆشەریشیان دراوەتێ که رێنمایی تەواوی لەسەر شوێنه گەشتیارییەکان و هۆتێل و مۆتێل و... تێدایه.
نادر رۆستایی گوتی: هەروەها ئەمساڵ جیاواز له ساڵانی دیکه، به شێوەیەکی سەردەمیانه ئامادەکاری کراوه و به رێبەری ئەلکترۆنیی گەشتیاریمان بۆ گەشتیاران ئاماده کردووه که دەتوانن لەسەر مۆبایل دایبەزێنن و دواتر بەبێ ئینتەرنێت بەکاری بێنن که رێنماییەکه زیاتر له ٦٠٠شوێنی گەشتیاری لەخۆ دەگرێت که بریتین له هۆتێل، شوێنی مێژوویی، هاوینەهەوار، بازاڕ، مۆڵ و چەندین شوێنی دیکەی تایبەت به گەشتیاری. ئەم پرۆگرامانەش هەوڵی ٨مانگی رابردووی دەستەی گەشتوگوزاره.
رۆستایی روونی کردوه: پێشبینی دەکەین ژمارەی گەشتیاران زیاد بێت، له شەش مانگی سەرەتای ئەمساڵ یەک ملیۆن و دووسەد هەزار گشتیار سەردانی هەرێمی کوردستانیان کردووه که به بەراورد لەگەڵ شەش مانگی سەرەتای ساڵی رابردوو، سەدا٢٩ زیادی کردووه. ساڵی رابردوو٢٦٠هەزار گەشتیار بۆ جەژن هەبوو و چاوەڕوان دەکرێت ئەمساڵ زیاد بکات چونکه بەردەوام له جێژنەکان ژمارەی گەشتیاران به بەراورد لەگەڵ ساڵانی پێش خۆی زۆرتر بووه.
بەرپرسی دەستەی گەشتوگوزاری ئاشکراشی کرد: فستیڤاڵ و کەرنەڤاڵ کاریگەریی لەسەر هاتنی گەشتیاری و ناساندنی هەرێمی کوردستان دەبێت. فستیڤاڵ بەبازاڕ کردنی هەولێر که دوای جەژن لەلایەن دەستەی گەشتوگوزار به هاوکاریی کۆمپانیای بابیلیۆن بۆ دووەمین ساڵ ئەنجام دەدرێت، ماوەی مانگێک دەخایەنێت که یەکێک له بڕگەکانی تایبەت به هەڵبژاردنی شاجوانی هەرێمه. هەروەها کۆمەڵێک چالاکیی دیکەشمان دەبێت که دواتر رایاندەگەیەنین.
X.A
pna
9/08/2013
ئەمڕۆ بەشار ئەسەد، سەرۆكی سووریا لە مزگەوتی ئەنەس بن مالیك، كە دەكەوێتە نێو سنووری ئەمنیی شام نوێژی جەژنی كرد، بەڵام بەر لە گەیشتنی بۆ مزگەوت هێرشدەكرێتە سەر كاروانی ئۆتۆمبێلەكانی.
دیمەنی نوێژكردنی ئەسەد لە تەلەفیزیۆنی فەرمی سووریاوە پەخش كرا، كە ژمارەیەك بەرپرسی حكومەتەی یاوەرییان دەكرد.
بەر لەوەی كاروانی ئۆتۆمبێلەكانی بەشار ئەسەد بگاتە مزگەوتی ئەنەس بن مالیك، لیوای تەحریر ئەلشام، كە سەر بە سووپای ئازادی سووریایە، بڵاویكردەوە: سەرلەبەیانی ئەمڕۆ چەكدارەكانیان كاروانی ئۆتۆمبیلەكانی بەشار ئەسەدیان كردۆتە ئامانج.
كەناڵی ئەلعەرەبییەش لەسەر زاری فیراس بیتار، فەرماندەی لیوای تەحریر ئەلشام بڵاویكردەوە، كە چەكدارەكانیان 17 مووشەكی هاوەنیان ئاراستەی كاروانی ئۆتۆمبێلەكانی بەشار ئەسەد كردووە.
بەڵام دەركەوتنی بەشار ئەسەد لەدوای هێرشەكە لە تەلەفیزیۆنی فەرمی سووریاوە شكستی هەوڵی لیوای تەحریر ئەلشام-ی بۆ كوشتنی بەشار ئەسەد دەرخست.
9/08/2013
پەیامی پیرۆزبایی بزووتنەوەی کۆماریخوازی ڕۆژهەڵاتی کوردستان بە بۆنەی جێژنی پیرۆزی ڕەمەزانەوە!
به نێوی خودای مەزن و دلۆڤان
خەڵکی موسڵمانی کوردستان!
بزووتنەوەی کۆماریخوازی رۆژهەلاتی کوردستان، بەبۆنەی هاتنی جێژنی پیرۆزی ڕەمەزان، واتە ئەۆ جێژنەی کە پاش مانگیک عیبادەت و خواپەرستی و خۆماندووکردن بۆ ڕامکردنی نەفس و دەروون، وه سەرکەوتنی ئیرادەی باوەڕمەندانه‌ی موسلمانان به ئایینی پیرۆزی ئیسلام، وەک نیشانەی کۆتایهاتنی ئه‌م مانگه پیرۆزه، و هه‌روه‌ها وه‌ک رەمزی خێرو بەرەکەت، خۆشی و شادی، تەبایی و ئاشتی، بەهەموو پیرۆزیەکانیەوە، ناۆ مالی گشت موسلمانانی جیهان و کوردستان، پیرۆز و رازاوە و نوورانی دەکات، پڕ بەدڵ پیرۆزبایی ئاراستەی گشت لایەک دەکات، و ئاواتەخوازە تاعەت و خواپەرستیی هەموو خوشکان و برایانی موسڵمان، پەسندی پەروەردگاری بێ‌هاۆتا و بەخشەندە و میهرەبان بێت.
شووڕای هه‌ماهەنگیی بزووتنەوەی کۆماریخوازی ڕۆژهەڵاتی کوردستان
16 گەلاوێژی 1392ی کۆچیی- هەتاوییی
7ی ئەگۆستی2013ی زاینی
لە رێورەسمی جەژنی رەمەزان کە لە سەرۆکایەتی ئەستەنبوڵی پارتی ئاشتی و دیموکراتی AKP بەڕێوەچوو، رەجەب تەیب ئەردۆغان رەخنە لە کۆمیتەی دابەشکردنی خەڵاتی نۆبڵ بۆ ئاشتی دەگرێت، کە لە 7/10/2005 درایە محەممەد بەرادعی، یاریدەدەری سەرۆکی میسر.
ئەردۆغآن دەڵێت "ئەو کەسەی خەڵاتی نۆبڵتان پێیدا ئێستا یاریدەدەری سەرۆک کۆماری ئەو دەسەڵاتەیە کە کودەتای سەربازی ئەنجام دا، بۆیە لێرەوە بانگی کۆمیتەی خەڵاتی نۆبڵ دەکەم، چۆن خەڵات بە کەسێک دەبەخشن کە لە ریزی کودەتا چییەکان دایە ".
سەبارەت بە توندوتیژییەکانی سووریاش گوتی "برایانمان لەسووریا بە درێژایی مانگی رەمەزان لە گەمارۆی کۆمەڵکوژی رژێمی ئەسەد دابوون و بە فرمێسک و خوێنەوە پێیان نایە نێو جەژنەوە، پیرۆزی مانگی رەمەزان و خەڵکی سیڤیلییان ژێرپێ خست و رۆژوەوانانیان بە کۆمەڵ کوشت".
سەبارەت بە هەبوونی 3 منداڵ و ئەو رەخنانەی بەم هۆیەوە روبەڕووی بوونەوە گوتی "من وەک سەرۆک وەزیران پێشنیاری بوونی 3 منداڵ دەکەم، ئەمەش سروشتیترین مافی خۆمە، داوا لە خاتوونەکانیش دەکەم تا ئەوەی هەر کامیان 3 منداڵ پێشکەش بە نیشتیمانەکەیان بکەن".
هاوکات بانگی پارتە سیاسییەکانی وڵاتەکەی کرد بە تێڕوانینێکی تازە و زمانێکی نوێوە برایەتی لە وڵاتەکەیان پەرە پێ بدەین".
9/08/2013
- ژمارەیەک لە چالاکانی سیاسی، مەدەنی و میدیایی کوردستان داوای هەڵوەشاندنەوەی سزای لەسێدارەدانی پەخشان عەزیزی و هەموو زیندانیانی سیاسیی سزادراو بە لەسێدارەدان دەکەن
- ئێران..کۆبوونەوەکەمان لەگەڵ وڵاتانی ئەورووپا ئەرێنی بوو
- مەزڵوم عەبدی و نوێنەری سەرۆک بارزانی کۆدەبنەوە
- ئەمڕۆ شاندی دەمپارتی بۆ گەیاندنی پەیامی ئۆجەلان لەگەڵ ئاکپارتی کۆدەبێتەوە
- خراپترین دراوەکانی جیهان لە ساڵی 2024 دا
- تولای حاتەمئۆگیولاری: دیدار بەس نییە، دەبێت دەرگاکانی ئیمراڵی بکرێنەوە
- کامیان مەترسیدارترن: ئێران یان ئیخوان؟
- ههسهده و چەک؛ هاوکێشە سەختەکە لە بنیاتنانەوەی سوپای سوریادا
- ئیدارەی نوێی سوریە ئەمیرێكی پێشوی بەرەی نووسرەی وەك سەرۆكی دەزگای هەوالگریی سوریە دیاری كڕد
- وەزیری دەرەوەی روسیە دەلێ دەگەل ئیدارەی تازەی سوریە پەیوەندیمان هەیە
- ئیسرائیل فرۆكەخانەی نێودەولەتی سەنعا لە یەمەن بۆمباران كرد
- شاندێكی بالای عێراقی دەگەل ئیدارەی نوێی سوریە دیداری كرد
- دوای روخانی رژیم بەعسی ئەسد، عەلەوییەكان چییان بەسەر دێت
- وەزیری دەرەوەی ئیسرائیل دەلێت: هێرشەكان دژ بە كوردەكان دەبێ بوەستێنرێن
- چیروکی نەبیستراویی ناو زیندانەكانی سوریە
- حشدی شەعبی هەرشە لە توركیەدەكات
- ترامپ دەلێ: لە هیچ لایەك قەبوول ناكەیین جێگرەوەی دۆلار بەرهەم بێنێت
- ناوەرۆكی دیداری نێوان وەزیری دەرەوەی ئێران و بەشار ئەسەد بلاوبووە
- فەرانسە رێگای بەكارهێنانی مووشەكی دورمەودای بە ئوكرایین دا كە لە دژی روسیە بەكاری بێنێت
- جۆزف بۆرێل دەلێ: بیرت لە لێواری دارماندایە
- پیرۆزبایی بزووتنەوەی کۆماریخوازانی ڕۆژهەڵاتی کوردستان بە بۆنەی جێژنی پیرۆزی قوربان
- پەیامی پیرۆزبایی بزووتنەوەی کۆماریخوازانی رۆژهەڵاتی کوردستان بە بۆنەی پێنجەمین کۆنگرەی ئاسایی هەدەپە
- پەیامی پیرۆزبایی بزوتنەوەی کۆماریخوازی ڕۆژهەڵاتی کوردستان بە بۆنەی جێژنی ڕەمەزانی پیرۆزەوە
- راگەیەندراوی بزووتنەوەی کۆماریخوازان بەبۆنەی رۆژی جیهانی کرێکاران
- بزووتنەوی کۆماریخوازان ئیدانەی هێرشەکانی رێژیمی تورکیە بۆ سەر باشووری دەکا
