سكرتێری ڕۆژنامه‌وانیی سه‌رۆكوه‌زیرانی هه‌رێمی كوردستان، ڕایگه‌یاند بە داوەتێكی فەرمیی سەرۆكوەزیرانی توركیا، ڕەجەب تەییب ئەردۆغان، سبەی پێنجشەممە سەرۆكوەزیرانی هەرێمی كوردستان، نێچیرڤان بارزانی سەردانی توركیا دەكات و لەگەڵ گەورەبەرپرسانی ئەو وڵاتەدا كۆ دەبێتەوە. 

له‌ لێدوانێكی تایبه‌تدا بۆ ماڵپه‌ڕی فه‌رمیی حكوومه‌تی هه‌رێمی كوردستان، سامی ئه‌رگۆشیی سكرتێری ڕۆژنامه‌وانیی سه‌رۆكوه‌زیرانی هه‌رێمی كوردستان، ڕایگه‌یاند دووسبه‌ی پێنجشه‌ممه‌ 31ی ئۆكتۆبه‌ری 2013، به‌ داوه‌تێكی فه‌رمیی سه‌رۆكوه‌زیرانی توركیا، ڕه‌جه‌ب ته‌ییب ئه‌ردۆغان، سه‌رۆكوه‌زیرانی هه‌رێمی كوردستان، نێچیرڤان بارزانی سه‌ردانی توركیا ده‌كات.

له‌باره‌ی به‌رنامه‌ی سه‌ردانه‌كه‌شه‌وه‌ گوتی: نێچیرڤان بارزانی له‌ میانی سه‌ردانه‌كه‌یدا له‌گه‌ڵ هه‌ریه‌ك له‌ سه‌رۆكوه‌زیران، ڕه‌جه‌ب ته‌ییب ئه‌ردۆغان و وه‌زیری ده‌ره‌وه‌ی توركیا، ئه‌حمه‌د داوود ئۆغلۆدا كۆ ده‌بێته‌وه و له‌باره‌ی په‌یوه‌ندییه‌كانی هه‌رێمی كوردستان و توركیا و ڕه‌وش و پێشهاته‌كانی ناوچه‌كه‌وه‌؛‌ گفتوگۆ ده‌كه‌ن.

30/10/2013

بە پێی تەواوی جاڕنامە جیهانییەکانی مافی مرۆڤ، مافی ژیان بنەڕەتیترین مافی هەر تاکێکە و دەسەڵاتەکان بۆیان نییە کە ئەم مافە لە تاکەکان زەوت کەن.

دەسەڵاتە پاوانخوازەکان بۆ مانەوەی خۆیان دژ بە هەر چەشنە بیرێکین کە ئاقاری ڕوونکردنەوەی کۆمەڵگا بە دوای خۆیدا بێنێت. هەر لەو پێناوەشدا چالاکانی مەدەنی و سیاسی کە ئامانجیان وەدیهێنانی ژیانێکی مرۆیی و دوور لە چەوسانەوە و پێشێلکردنی مافەکانی مرۆڤە، وەک دوژمنی سەرەکەی ئەم جۆرە دەسەڵاتانە دێنە ئەژمار و دەسەڵاتداران بە دڕندانەترین شێوە بەرەوڕووی چالاکان و ڕۆشنگەران دەبنەوە. یەکێک لەو شێوانە کە دەسەڵاتی پاوانخواز دەیگرێتە پێش، لە سێدارەدانی چالاکان و نوخبەکانی کۆمەڵگایە و بەم شێوەیە لە هەوڵی بەرگرتن بە هەر چەشنە دەنگی ناڕەزایەتییە.
کۆماری ئیسلامی ئێران وەک یەکێک لە دەسەڵاتە پاوانخوازەکان بەردەوام بە جێبەجێ کردنی سزای لە سێدارەدان بەری بە دەنگی ناڕازییانەی کۆمەڵانی خەڵک گرتووە.
نەتەوەی کوردیش وەک یەکێک لە نەتەوەکانی دانیشتووی ئێران بە درێژایی تەمەنی کۆماری ئیسلامی دەنگی مافخوازانە و ئازادیخوازانەی خۆی دەربڕیوە و وەک یەکێک لە گەورەترین دژبەرانی بیری زاڵ بە سەر دەسەڵاتی ئێراندا بەردەوام لە گۆڕەپانی خەباتدا بووە.
ئەم دەسەڵاتە لە سەرەتای تەمەنیەوە هەزاران کەس لە چالاکانی سیاسی و مەدەنیی کوردی بە تاوانی مافخوازی و ئازادیخوازی بە سزای درێژخایەنی زیندان حوکم داوە. کۆماری ئیسلامیی ئێران وێڕای سزاگەلی وەک زیندان و بێبەش کردن لە خوێندن و ... سزای دژەمرۆییانەی سێدارە وەک ئامڕازێک بۆ ترساندنی کۆمەڵگا و بەرەنگار بوونەوە لەگەل دەنگە ناڕەزایەتییەکان، مافی ژیانی لە زۆرێک لە ڕۆڵەکانی نەتەوەی کورد زەوت کردووە.
هەر لە درێژەی سیاسەتی لە سێدارەدانی چالاکانی سیاسی و مەدەنی، ڕۆژی شەممە ڕێکەوتی ٤ی گەڵاڕێزان دوو چالاکی سیاسیی کورد بە ناوەکانی حەبیبوڵڵا گوڵپەری‌پوور و ڕەزا ئیسماعیلی لە زیندانی ناوەندی شاری ورمێ لە سێدارە دران.
لەو ڕووەوە کە زیاتر لە ٢٠ کەس لە چالاکانی سیاسیی کورد سزای سێدارەیان لە سەرە، بێدەنگی سەبارەت بە لە سێدارەدانی ئەم دوو چالاکە سیاسییە بێ‌گومان کارەساتی تری لەم چەشنەیە لێ دەکەوێتەوە.
بۆیە ئێمە وەک کۆمەڵێک لە چالاکانی سیاسی، مەدەنی و خوێندکاری سەرەڕای مەحکووم کردنی لە سێدارەدانی حەبیبوڵڵا گوڵپەری‌پوور و ڕەزا ئیسماعیلی، دژایەتی خۆمان لە سەر سزای سێدارە دووپات دەکەینەوە و داوایش لە کۆمەڵانی خەڵک لە ڕۆژهەڵاتی کوردستان دەکەین کە بە داخستنی دووکان و بازاڕ لە ڕۆژی یەکشەممە ١٢ی گەڵاڕێزان، ناڕەزایەتی خۆیان لە سەر سزای سێدارە و لە سێدارەدانی ئەم دوو چالاکە سیاسییە دەرببڕن.
بە دڵنیایەوە پاڵپشتی و هاتنەدەنگی هاووڵاتیان بەر بە دووپات بوونەوەی کارەساتی لەم شێوەیە دەگرێ، بۆیە زۆر بە پێویستی دەزانین کە سەرجەم چین و توێژەکان، حیزب و لایەنەکان، ڕێکخراوەکان، چالاکانی سەربەخۆ، ژنان، خوێندکاران و ... بە یەکڕیزی و یەکدەنگییەوە باوەش بۆ ئەم بانگەوازە بکەنەوە.

29/10/2013

له‌ هه‌ولیر بۆ ناره‌زایی‌ ده‌ربرین به‌رامبه‌ر به‌ له سیداره‌دانی‌ زیندانیانی‌ سیاسی‌ كورد له‌ ئێران خۆپیشاندان به‌ریوه‌ده‌چیت
بە دەستپیشخەری یەکیەتی نەتەوەیی خویندکارانی کورد‌و کەمپینی "نا بۆ لە سێدارەدانی لاوانی کورد"‌و بۆ ناره‌زایی‌ ده‌ربرین به‌رامبه‌ر به‌ له‌ سیداره‌دانی‌ زیندانیانی‌ سیاسی‌ كورد، رۆژی پینجشەممە(٣١/١٠/٢٠١٣) کاتژمیر ١٠ی پیش نیوەڕۆی خۆپیشاندان‌و ناره‌زایی‌ ده‌ربرینیكی‌ هیمنانە لە بەر دەرکی پارکی "سامی عەبدوڵڕەحمان بۆ بەردەرکی UN بەڕیوە دەچیت.
خۆپیشاندانەكه‌ بە مەبەستی نیشاندانی ناڕەزایی‌ ده‌ربرین به‌رامبه‌ر به‌ لە سێدارەدانی حەبیبولڵا گوڵپەری پوور و رەزا ئیسماعیلی و هەروەها بۆ پێشگیریکردن لە ئێعدامی زیندانیانی سیاسیی کورد و بە تایبەتی زانیار و لوقمان مورادی بەڕێوە دەچێ

هاتن تان هه‌ولدانه‌ بۆ به‌رگرتن له‌ سیداره‌دانی‌ زیندانیانی‌ سیاسی‌
یەکیەتی نەتەوەیی خویندکارانی کورد‌
کەمپینی "نا بۆ لە سێدارەدانی لاوانی کورد"‌

29/10/2013

<sup>ھاسەرۆکی پارتی ئاشتی و دیموکراتی BDP  لەمیانی کۆڕێکدا لەسەر رۆڵی کورد لە رۆژھەڵاتی ناوەڕاست، کە نوێنەراتیەتی BDP لە ئەمریکا سازیکردبوو، باسی رەوشی چارەسەری پرسی کوردی لەتورکیا کرد و ئاماژەی بەوە دا، ئازادکردنی ئۆجەلان چارەسەریی خێراتر دەکات.

سەڵاحەدین دەمیرتاش، گهاوسەرۆکی پارتی ئاشتی و دیموکراتی BDP روونیکردەوە، ئێستا  قۆناغی چارەسەری تووشی جۆرێک لە ئاستەنگی ھاتووە و زۆر بە ھێواشی بەڕێوەدەچێ، ئەگەر حکومەت ھەنگاوێکی جددی بنێ، ئەوا دەکرێ قۆناغەکە خێراییەکی دیکەی پێ بدرێ.

دەمیرتاش گوتی: "لە قسەکانی ئەردۆغان وا دەردەکەوێ، کە خێری ئاشتیمان پێبکەن، ئەگەر کورد نەخشە رێی چارەسەری بۆ ئاشتی پێشکەش کردبێ، ئەوا بۆ بەھێزبوونی زیاتری تورکیایە نەک بێ ھێزکردنی، گرنگە ئیرادەیەک ھەبێ بۆ مانەوە لەسەر مێزی گفتوگۆ، دەبێ لە چواردەوری پرۆژەیەک کۆبینەوە بە ئامادەبوونی لایەنی سێیەم وەک چاودێر.  بەڵام دەوڵەتی تورکیا ئامادە نییە و ھەر جارە و بیانوویەک دەھێنێتەوە بۆ راکردن لە مێزی گفتوگۆ."

دەمیرتاش ئاماژەی بە بە ھێواشی بەڕێوەچوونی قۆناغی چارەسەری دا و گوتی: "سەرەتا زۆر بە خێرایی  بەڕێوەچوو، دواتر ھێواش بووەوە. بۆ تێپەڕین لەم قۆناغە حکومەت دەتوانێ ھەنگاوێکی جددی بنێ، بۆ نموونە ئازادکردنی عەبدوڵڵا ئۆجەلان بەڕووی دەرەوەدا دەکرێ ھۆکارێکی باشبێ بۆ دووبارە خێرا کردنەوەی قۆناغی چارەسەر."</sup>

^{عەبدوڵڵا ئۆجەلان، رێبەری پارتی کرێکارانی کوردستان PKK، لە ساڵی 1999 لە نایرۆبی پایتەختی کینیا دەستگیرکرا و لە تورکیا سزای زیندانی هەتاهەتایی بۆ بڕایەوە.}

رووداو/ ئەنادۆڵ

^29/10/2013

بیژەن نامدار زەنگەنە، وەزیری نەوتی دەوڵەتی ڕووحانی لە كۆبوونەوەی نێودەوڵەتیی سندووقی گەشەی میللی‌دا رایگەیاند گەمارۆ نێودەوڵەتییەكان بەدژی نەوتی ئێران هه‌ڵده‌گیرێن.
ناوبراو ده‌ڵێ نموونەی ئه‌و وانەو ده‌سکه‌وته‌كانی گەمارۆ نێودەوڵەتییەكان یه‌کیان ئەوەیە كە دەتوانین بە داهاتی 1 میلیۆن بۆشكە نەوت لە رۆژدا وڵاتی ئێران بەڕێوە ببەین، هەرچەند ئەگەر گەمارۆكان نەمێنن دەتوانین 1 میلیۆن و 500 هه‌زار بۆشكەی دیكە به‌ هەناردی نەوتی وڵات زیاد بكەین كە لە ئاكامدا ئێران ساڵانە پتر لە 54 میلیارد دۆلاری دیکه‌ی داهات ده‌بێ.
وەزیری نەوتی حه‌سه‌ن ڕووحانی لەم كۆبوونەوەیەدا ئاماژەی بەوە نەكرد كە چۆن گەمارۆ نێودەوڵەتییەكان بەدژی نەوت و گازی ئێران بەسەر دەچن، لە حاڵێكدا كە هەناردەی نەوتی ئێران بەپێی راپۆرتی رێكخراوی نێودەوڵەتیی وزە لە 500 هەزار بۆشكە لە رۆژدا تێناپەڕێ، ئه‌گه‌رچی بیژەن نامدار زەنگەنە وا پیشان ده‌دا که‌ هەناردەی نەوتی ئێران له‌ ئێستادا دەگاتە 1 میلیۆن بۆشكە لە رۆژدا.
جێی باسە ئێران ساڵی 1356‌و ساڵیک پێش هاتنه‌ سه‌رکاری کۆماری ئیسلامی رۆژانە 5 میلیۆن و 200 هەزار بۆشكە نەوتی هەناردە دەكرد.
هه‌ر له‌و کۆبوونه‌وه‌یه‌دا وه‌زیری نه‌وت گوتی که‌ سه‌نعه‌تی نه‌وتی ئێران پێویستی به‌ 80 میلیارد دۆلار سه‌رمایه‌ بۆ بووژانه‌وه‌ی هه‌یه‌، به‌ڵام وەزیری نەوتی دەوڵەتی "مشوورو هیوا" نەیگوت كە بە چ شێوەیەك داوای 80 میلیارد دۆلار لە سەرچاوەكانی سندووقی گەشەی میللی بۆ سەرمایەدانان لە بواری پیشەسازی نەوت ده‌کا، لە حاڵێكدا كە بڕە پارەی نێو ئەم سندووقە لە 30 میلیارد دۆلار تێناپەڕێ.
ناوبراو روونیشی نەكردەوە كە لەبەرچی سەرەڕای خەرج كردنی دەیان ملیارد دۆلار سەرمایە لە پیشەسازیی نەوت و گازی وڵات هه‌ر لە ماوەی 3 ـ 4 ساڵی رابردوودا، بەرهەمهێنانی نه‌وت له‌ سەرچاوە سەربەخۆو هاوبەشەكانی نەوت و گازی ئێران  ئه‌وه‌نه‌ له‌ که‌می داوه‌.

29/10/2013

س کوردستان وکورد

کەمپەینی نێونەتەوەیی مافی مرۆڤ لە ئێران، دوا زانیارییەکانی سەبارەت بە چۆنییەتی لە سێدارەدرانی "حەبیبوڵا گوڵپەری پوور و رەزا ئیسماعیلی"، گیراوانی سیاسیی کورد لە گرتووخانەکانی ورمێ و سەڵماس بڵاوکردەوە.
بە گوێرەی سەرچاوەکە، ئەو دوو گیراوە کوردە، رۆژی هەینی، ٣ی خەزەڵوەر، لە گرتووخانەی ورمێ و سەڵماسەوە بۆ ژووری تاکەکەسی راگوێزراون و رۆژی شەممە[٤ی خەزەڵوەر]، بە بێ ئاگادارکردنەوەی بنەماڵە و پارێزەرانیان، لە ژێر چاوەدێری نوێنەرانی وەزارەتی ئیتلاعات و دەزگای قەزایی، لە سێدارە دراون.

سەرەتا، رۆژی هەینی، بەرپرسانی گرتووخانەی ورمێ، بە بیانووی راگوازتنی بۆ گرتووخانەیەکی تر، حەبیبوڵا گوڵپەری پوور، لە بەندی گیراوانی سیاسی بردۆتە دەر و بۆ قەرەنتینەی گرتووخانەکەیان گوازتۆتەوە و پاش چەند کاتژمێر، بە هەمان بیانوو، کەلوپەلی شەخسی حەبیب، لە بەندی ١٢ لەگەڵ خۆیان دەبەن.

کاتژمێر شەشی ئێوارەی هەمان رۆژ، هاوکات لەگەڵ داخرانی بەند و پچڕانی تەلەفۆنەکان، نیگەرانییەکان لەمەڕ رەوشی حەبیبوڵا زیادی کردووە و گیراوانی بەندی ١٢ و باقی بەندەکانی زیندان، دەستیان کردووە بە ناڕەزایەتی دەربڕین و داوایان لە بەرپرسان کردووە کە "یوسف کاکەمەمی"، بە نوێنەرایەتی گیراوان، چاوی بە حەبیب بکەوێ.

بەرپرسانی گرتووخانەکە نەتەنیا ئیزنیان نەداوە کەس چاوی بە حەبیب بکەوێ بەڵکوو هەڕەشەشیان کردووە کە ئەگەر ناڕەزایەتی دەربڕین درێژەی هەبێ، ناڕازییان دەگوازنەوە بۆ ژووری تاکەکەسی. هاوکات راشیان گەیاندبوو کە حەبیب بۆ ژووری قەرەنتینە گوازراوەتەوە تا ئێعدام بکرێ.

هاوبەندییەکی حەبیب کە ئەو زانیارییانەی داوە، لە درێژەدا وتوویەتی: کاتژمێر ٩ی شەو، هێزەکانی ئیتلاعات هاتنە ناو بەندی گیراوانی سیاسی و ئەمجار "عەلی ئەحمەد سلێمان"، کە ئەویش مەحکووم بە ئێعدامەیان برد و خستیانە ناو ژووری تاکەکەسی. ئەمەش نیگەرانییەکانی ئێمەی سەبارەت بە ئەگەری لە سێدارەدانی عەلی و حەبیب زیاتریش کرد. عەلی لە کاتی گوازتنەوەی بۆ ژووری تاکەکەسیدا، بە عەلی وتبوو کە فەرمانی جێبەجێکرانی حوکمەکەی دراوە و تا چەند کاتژمێری دیکە، لە سێدارە دەدرێ.

حەبیب وتبووی کە "داوا لە گیراوانی سیاسیی دۆستم دەکەم نیگەرانی من مەبن، بە خۆشحاڵییەوە بەرەوپیری مەرگ دەچم و چ ترسێکم لە جەستەیدا نییە.

پاش نیو کاتژمێر، عەلی ئەحمەد سلێمان گەڕێندراوەتەوە بەندی ١٢ و کاتژمێر ١١ و نیوی شەو، دوو گیراوی تر بە ناوەکانی "قودرەت و یەدوڵا"، کە بەهۆی شەڕکردن، پێشووتر گوازرابوونەوە ژووری تاکەکەسی، شایەتی بردنی حەبیب بۆ شوێنی لە سێدارەدانی بوونە. بە گوتەی ئەو دوو شایەتحاڵە، حەبیب لە کاتی بردرانی بەرەو تەنافی دار، سروودی "ئەی رەقیب"ی وتۆتەوە و سەرئەنجام کاتژمێر ١٢ی شەو، لە ژێر چاوەدێری نوێنەری وەزارەتی ئیتلاعات و دەزگای قەزایی ئێعدام کراوە و نزیک کاتژمێر پێنجی بەیانیی رۆژی شەممە، بە ماشێنێکی سپیی ئیتلاعات، تەرمەکەی بۆ نەخۆشخانەی ئیمام خومەینی ورمێ گوازراوەتەوە.

بە گوێرەی دایکی "حەبیب"، پاش ئەوەی هەواڵی گوازتنەوەی کوڕەکەی بۆ ژووری تاکەکەسییان بیستووە، داوایان لە پارێزەری حەبیب کردووە بەدواداچوونی مەسەلەکە بکات و ئەویش وێڕای ئەوەی کە ئاگادارنەبوونی خۆی لە مەسەلەکە راگەیاندووە، وتووشییەتی کە شەممە وەدوای مەسەلەکە دەکەوێ. بەهۆی نیگەرانی بنەماڵە، لە سنەوە بەرەو ورمێ کەوتوونەتە رێ و بەیانی شەممە لە بەر دەرگای گرتووخانەی ورمێ پێیان راگەیاندوون کە کوڕەکەیان لە سێدارە دراوە و تەرمەکەی بۆ ساردخانە گوازراوەتەوە. دایکی حەبیب وتوویەتی کە سەرەڕای سەردانی پزیشکی قانوونی، ساردخانە، پارێزگاری و … تەرمی رۆڵەکەیان نەدراوەتەوە و پێیان راگەیاندراوە کە کوڕەکەتان بە تاوانی موحارەبە/شەڕ لەگەڵ خوا، ئێعدام کراوە و هەر بۆیەش، تەرمەکەتان نادەینەوە.

حەبیبوڵا گوڵپەری پوور، کوڕی ناسر، لەدایکبووی ساڵی ١٣٦٣ی سنە، رۆژی ٥ی رەزبەری ساڵی ١٣٨٨، لە رێگەی مهاباد بەرەو ورمێ، بە هەندێک کتێبەوە، لە لایەن هێزەکانی حەفازەتی ئیتلاعاتی سپای مهاباد قۆڵبەست کرا و پاش چەندین مانگ ئەشکەنجە و ئازاری توندی جەستەیی و دەروونی لە گرتووخانەکانی ئیتلاعاتی مهاباد، سنە و ورمێ، دواجار لە ٢٤ی رەشەممەی ٨٨، لە لقی یەکی دادگای شۆڕشی ئیسلامیی مهاباد، لە لایەن قازی خودادادییەوە لە دانیشتنێکی چەند خولەکیدا، بە تۆمەتی ئەندامەتی لە پارتی ژیانی ئازادی کوردستان، بە ئێعدام مەحکووم کرا. ناوبراو داوای پێداچوونەوەی بەسەر حوکمەکەیدا کرد و داواکەی بۆ لقی ٣١ی دیوانی بەرزی ئێران رەوانە کرد بەڵام دادگای پێداچوونەوەش ئێعدامەکەی پەسەند کرد.

کەسانی نزیک لە حەبیب، هەموو دەڵێن کە حەبیب لە سەرجەم قۆناخەکانی لێکۆڵینەوە، لە دادگا و ئیتلاعاتدا، رەتیکردۆتەوە کە بەشداری لە ئۆپێراسیۆنی چەکداریدا کردبێ و ئیتلاعات تەنیا بە هۆکاری هەبوونی چەند کتێب و پێوەندی بە دایکانی ئاشتیی مهاباد، ناوبراوی بە هاوکاریی کاریگەر لەگەڵ پەژاک، تۆمەتبار کردووە و تا ساتی لە سێدارەدرانیشی، ئەو گیراوە سیاسییەی لەژێر زەخت و گووشاری دادگادا بووە.

حەبیب لە مانگی رەشەممەی ساڵی ١٣٩٠ی هەتاویدا، نامەیەکی سەرئاوەڵای سەبارەت بە ئەشکەنجەکرانی دەروونی و جەستەیی لە ماوەی گیرانی لە گرتووخانەی ئیتلاعات لە ورمێ و مهاباد بڵاوکردەوە. ناوبراو لە بەشێک لە نامەکەیدا نووسیبووی: "سەرەڕای ئەوەی کە سکاڵام سەبارەت بە دەستبەسەربوونی درێژخایەن و ئەشکەنجەدرانی دەروونی و جەستەییم تا ئاستی مردن، بۆ ناوەندە جیاجیاکانی دەوڵەت ناردووە، لەو مەملەکەتەدا دەنگی ئێمە تەنانەت لە ژوورەکانی گرتووخانەش تێناپەرێ چ بگا بەوەی کە بیسەرێکی هەبێ".

حەبیبوڵا گوڵپەری پوور، مانگی رەشەممەی ١٣٩٠، بە بڕیارێکی لەناوکاو، لە لایەن هێزە ئەمنیەتییەکانەوە بۆ گرتووخانەی سمنان گوازرایەوە و پاش ١٤ مانگ راگیران لە بەندی گیراوانی مەترسیداری سمنان، دووبارە لە ٢٣ی گوڵانی ١٣٩٢دا بۆ گرتووخانەی ناوەندی ورمێ گوازرایەوە.
هەمان رۆژ، لەگەڵ لە سێدارەدانی حەبیب، گیراوێکی سیاسی تر لە گرتووخانەی سەڵماس لە سێدارە درا.

"رەزا ئیسماعیلی"، کوڕی تۆفیق، خاوەن هاوسەر، ٣٤ ساڵان و خەڵکی گوندی دێرکی سەڵماس، پاش تێپەڕبوونی ٤٩ مانگ لە دەستبەسەربوونی، لە سێدارە درا".

رەزا ئیسماعیلی مانگی خەرمانانی ساڵی ١٣٨٨، دەستبەسەر و مانگێک لە ئیتلاعاتی سەڵماس بە تۆمەتی هاوکاری پەژاک ئەشکەنجەی جەستەیی و رۆحی کرا و لەژێر لێدان و کوتان دابوو. ناوبراو دواتر بۆ گرتووخانەی سەڵماس گوازراوەتەوە و پاش شەش مانگ، بە تۆمەتی موحارەبە[بە مانای شەڕ لەگەڵ خوا لە عورفی قەزایی کۆماری ئیسلامیدا] لە رێگەی ئەندامەتی لە پەژاکدا لە لایەن دادگای شۆڕشی ئیسلامیی خۆی بە ئێعدام مەحکووم کرا.

دەگوترێ بنەماڵەکەی ٣٥ میلیۆن تمەنیان دەستحەق بە چەند پارێزەر داوە تا لە دیوانی باڵای دادی ئێران بەدواداچوونی دۆسیەکە بکەن و حوکمی ئێعدامەکە هەڵبوەشێننەوە بەڵام هەوڵەکان سەری نەگرتووە و حوکمەکە وەک خۆی پەسەند کراوەتەوە.

سەرلەبەیانیی شەممە، ٤ی خەزەڵوەر، هاوڕێیانی رەزا لە گرتووخانەی سەڵماس بە بنەماڵەکەی رادەگەیەنن کە کوڕەکەیان چەند کاتژمێر لەمەوبەر، لەسێدارە دراوە. پاش ئەوەی کە بنەماڵە و خزم و قەومی ئەو گیراوە سیاسییە ئێعدامکراوە لەبەر دەرگای زیندانی سەڵماس کۆدەبنەوە، پێیان رادەگەیەندرێ کە تەرمەکەی لە شوێنێک بەخاک ئەسپێردراوە.

بنەماڵەی ناوبراو لە رێگەی خزمێکەوە شوێنی بەخاکسپێردرانی کوڕەکەیان دەدۆزنەوە و کاتێک دەیانهەوێ تەرمەکە لە گۆڕ دەربهێننەوە و بیبەنەوە گوندەکەی خۆیان، تووشی تێکهەڵچوون لەگەڵ هێزە ئاسایشییەکان بوونە بەڵام بەهۆی قەرەباڵغی خزم و کەسی رەزا ئیسماعیلی، چەکدارانی ئێران ناتوانن پێش بە جەماوەر بگرن.

دواجار بنەماڵەی ئەو گیراوە ئێعدام کراوە، تەرمی رۆڵەکەیان دەبەنەوە دێرکی سەڵماس و ئەسپەردەی خاکی دەکەن بەڵام ناوچەکە بە چەکداری دەوڵەتی تەنراوە و هەڕەشە لە بنەماڵەکەی کراوە کە بۆیان نییە پرسە لە مزگەوتی ئاوایی بگرن و جگە لە ماڵی خۆیان و ئەویش بە ئاستیکی سنووردار".

ئامادەکردن و وەرگێڕان: ناوەندی نووچە و شرۆڤەی رۆژ

29/10/2013

کۆمەڵێک لە چالاکانی بواری ژنان، لە نامەیەک روو لە حیزبەکانی رۆژهەڵاتی کوردستاندا، وێڕای رەخنەگرتن لێیان، داوای هاوکاری و هاوخەباتییان لێکردوون.

کۆمەڵێک لە چالاکانی بواری ژنان، لە نامەیەکی سەرئاوەڵادا بۆ "سەرجەم حیزب و ڕێکخراوە سیاسییەکانی ڕۆژهەڵاتی کوردستان"، وێڕای ئاماژە بە کوژران و لە سێدارەدرانی گەنجانی کورد و سەرکوتی بەردەوام و زەبروزەنگی رەژیم دژ لە خەڵکی کوردستان، رەخنەیان لە حیزبەکان گرتووە کە "لەم هەلومەرجە هەستیارەدا بە سیاسەتێکی ناشەفاف و نادروست، پاراستنی بەرژەوەندی تەنگی حیزبی، هەوڵ بۆ تەنیا بەدەست هێنانی دەسەلات و ڕقەبەرایەتی" دەدەن.

بە گوێرەی ئەو چالاکانە "ئەم جۆرە سیاسەت کردنە، وزە و تێکۆشانی ژنان و پیاوانی کورد هەرچی زیاتر کردۆتە قۆچی قوربانی" و هەر بۆیەش، داوایان لە حیزبەکان کردووە کە "لە ئاست ئەو گرفتانە، کە خۆشیان بەشێک لە پێک هێنانیانن" وڵامدەر بن.  

ئەو کۆمەڵە چالاکەی بواری ژنان وتوویانە کە ئێمە نامانەوێ "چیتر شاهیدی دروشمی ناوەڕۆک بەتاڵ و نمایشی حیزبەکانمان بین و لەو سۆنگەوە، داوایان کردووە کە "لانیکەم ئەحزابی کوردی لە سەر کێشەی زندانیانی سیاسیی کورد هاودەنگ بن،  بەرامبەر به كوشتن و له سێدارەدانی لاوانی كورد هاوهەڵویست بن" و جەنایەتەکانی کۆماری ئیسلامیی بە هاودەنگی مەحکووم بکەن.

لە بەشێکی تر لە نامەکەدا هاتووە: زۆر ئاشکرایە کە  ئەرکی هەموو لایەنێکە کە بە ناردنی سکاڵای هاودەنگ بۆ ئۆرگانەکانی ماڤی مرۆڤی لە جیهان، ئەمنێستی، چاوەدێری مافی مرۆڤ بۆ سەر ئێران بەڕێز ئەحمەد شەهید، ڕووکردن لە ئۆرگانەکانی دادی نێونەتەوەیی و هاوکاری بەردەوام لە سەر کێشەی زندانیان، لەو مشتومڕە ناشایستە بێنە دەر و دەستی هاوکاری بۆ یەکتر دڕێژ بکەن".

ئەو کۆمەڵە چالاکە هەروەها هۆشداریان داوە کە "هەر حیزب و ئالیانسێک لەمپەر بخاتە سەر ڕێگای ئەو هاوکارییە و پشت لەو ئەرکە ئینسانی و نەتەوییە بکا، دەکەوێتە بەر قەزاوەتی خەڵک و دەبێ وڵامدەری مێژو و خوێنی شەهیدانی ڕۆژەهەڵاتی کوردستان بێ". واژۆی ئەو کەسانە، لەژێر نامە سەرئاوەڵاکەدایە، کە وێنەیەکیشی بۆ ناوەندی نووچە و شرۆڤەی رۆژ رەوانە کراوە: مینا لبادی، نەدا شەهبازی، جەمیلە ڕەحیمی، شەهلا دەباغی، مەرزە جەوانمەرد، ئەسمەر مێعماری، ناهید موکری، روفیا ڕەمەزانعەلی، فەریبا محەمەدی، بەدری تەوحیدی، چنوور مێهرپەروەر، گوڵالە شەڕەفکەندی، شلێر شبلی، جەمیلە ئەنوەری، سۆهەیلا قادری، سیمین نەسروڵاهی، شەهین شەهلایی، کوێستان عومەرزادە، ڕۆژە عەزیزی، سارا محەمەدی، فەریدە قوبادی، پەخشان ئەحمەدی، پەروین شەڵماشی، سەحەر دیناروەند، پەری ڕەشیدیان، شەڕاڕە شەمامی، هێلین یونگ.بەری، شەمزین جیهانی، مەهین شوکڕووڵاپوور، گوڵاڵە سەمیعی، لەیلا محەمەدی، شەهناز شەهلایی، نەهیە خۆشکەلام، نەسرین ڕەحیمی، سوڕەیا ساتوری، کوێستان گادانی، پەروین خاڵەندی

^{دوای له‌سێداره‌دانی حه‌بیبولڵا گوڵپه‌ری پوور له‌زیندانی ورمێ ، دایه‌ ( سه‌ڵته‌نه‌ ) دایکی ( فه‌رزاد که‌مانگه‌ر ) و ژماره‌یه‌ک له‌دایکانی ئاشتی رۆژهه‌ڵاتی کوردستان بۆ دیدار له‌گه‌ڵ‌ بنه‌ماڵه‌ی گوڵپه‌ری پوور چوونه‌ شاری سنه‌ . دایکانی ئاشتی مهابادیش له‌په‌یامێکدا به‌ هۆی له‌سێداره‌دانی دوو کادیری پێشه‌نگی PJAK سه‌ره‌خۆشی له‌که‌سوکاری بنه‌ماڵه‌که‌ی و گه‌لی کورد کرد .
دوێنێ یه‌کشه‌ممه‌27ی تشرینی یه‌که‌م دایکی ( فه‌رزاد که‌مانگه‌ر ) مامۆستای تێکۆشه‌ری کورد که‌ له‌ساڵی 2010 له‌لایه‌ن کۆماری ئیسلامی ئێران له‌سێداره‌ درا ، له‌گه‌ڵ‌ ژماره‌یه‌ک له‌دایکانی ئاشتی بۆ ده‌ربڕێنی هاوخه‌می و هاوسۆزی و سه‌ره‌خۆشی له‌خانه‌واده‌ی گوڵپه‌ری پوور ماڵیان به‌سه‌ر کرده‌وه‌ .
گرووپی دایکانی ئاشتی له‌لایه‌ن دایک و خوشکانی حه‌بیبولڵا گوڵپه‌ری پوور پێشوازیان لێکرا . له‌دیداره‌که‌دا دایکانی ئاشتی سه‌ره‌خۆشی خۆیان ئاراسته‌ی دایک و خوشکان و سه‌رجه‌م بنه‌ماڵه‌که‌ی و گه‌لی کورد کرد و هه‌روه‌ها یادی سه‌رجه‌م گیانبه‌ختکردوانی تێکۆشه‌رانی رێگای ئازادی به‌رز راگیرا .
له‌و دیداره‌دا هه‌روه‌ها که‌سوکاری حه‌بیبولڵا گوڵپه‌ری پوور و دایکانی ئاشتی رایانگه‌یاند که‌ یادی رۆڵه‌کانیان زیندوو ده‌بێت و ئه‌وه‌ی له‌ناو ده‌چێت زوڵم و تاوانی رژێمی ئێرانه‌ .
له‌هه‌مانکاتدا گرووپێک له‌دایکانی ئاشتی و خانه‌واده‌ی تێکۆشه‌رانی گیانبه‌ختکردووی مهاباد له‌په‌یوه‌ندیه‌کی ته‌له‌فۆنی بۆ ته‌له‌فیزیۆنی newroz tv  سه‌ره‌ڕای سه‌ره‌خۆشی کردن له‌گه‌لی کورد و خانه‌واده‌که‌ی رایانگه‌یاند: "سیاسه‌تی له‌سێداره‌ ناتوانێت ئازادیخوازانی گه‌لی کورد له‌تێکۆشان پاشگه‌ز بکاته‌وه‌ ".}

^28/10/2013

^ANF

^{پەرلەمانی ئێران دەنگی متمانەی بە رەزا ساڵح ئەمیری، وەزیری پێشنیازکراوی حەسەن رۆحانی بۆ وەزارەتی تەندروستی نەدا، بەڵام دوو وەزیری دیکە نوێ دیاری کران و دەنگی متمانەی پەرلەمانیان وەرگرت . عەلی ئەسغەر فانی، وەزیری پێشنیازکراوی وەزارەتی پەروەردە و راهێنان و رەزا فەرەجی دانا، وەزیری پێشنیازکراو بۆ وەزارەتی علوم دەنگی متمانەی پەرلەمانیان بەدەست هێناو بە شێوەی فەرمی دەستیان بە کارکرد . ئەلیاس نادران، نوێنەری رێی و شێمیرانات لە پارێزگای تاران هێرشی کردە سەر رەزا ساڵح ئەمیری، وەزیری پێشنیازکراوی وەزارەتی تەندروستی و بە وەرگرتنی بەرتیل و ئەشکەنجەی زیندانیان وقاچاغ و بوونی لەناو خۆپیشاندانەکانی ساڵی 2009ی تۆمەتبارکرد .  تەلەفزیۆنی حکومەتی ئێران بریار وابوو لە بەیانییەوە دانیشتنی پەرلەمان راستەوخۆ بگوازێتەوە، کە دوای ئەم بریارە، راستەوخۆ نەگوازرایەوە ، کە بووە هۆیی نارەزایەتی دەربرینی چەند پارلەمانتارێک. لە میانەی دانیشتنەکەدا حەسەن روحانی بۆ پشگری کردن لە وەزیرە پێشنیازکراوەکانی قسەی کرد و ئاماژەی بەوە دا، کە دەبێت سەربەخۆیی زانکۆکان بپارێزرێ و نابێت زانکۆکان ئەمنییەتی بن و بە ئاماژە بە قسەیەکی موتەهەری گوتی : من پێم خۆشە تەنانەت کورسی بدین بە مارکسیستەکانیش تاوەکو بێن و قسەی خۆیان بکەن و ئێمەش وەڵامیان بدەینەوە . بە پێی راپۆرتی هەواڵییەکانی ئێران، حەسەن رۆحانی لە میانەی تاووتوێکردنی شیاوی وەزیرانی پێشنیازکراو، ئاماژەی بە زمانی زگماکی کرد و گوتی : له‌ وه‌زاره‌تی پەروەردە و راهێناندا، ده‌بێ گۆڕانکاری جیددی بکرێت و په‌روه‌رده‌ به‌ زمانی زگماکی بخرێته‌ به‌رنامه‌ی کاری ئەو وه‌زاره‌ته‌وه‌. رۆحانی گوتیشی: "ئێمه‌ ده‌بێ ماددەی 15ی دەستوور جێبه‌جێ بکه‌ین و ئه‌م کاره‌ ده‌بێ له‌ قۆناغی بنه‌ڕه‌تییه‌وه‌ ده‌ستپێبکات و له‌ قۆناغه‌ جۆربه‌جۆره‌کانی په‌روه‌رده‌ تاوەکو کۆتایی دوازده‌ی ئاماده‌یی به‌رده‌وام بێت."} 

^28/10/2013

^{دوو فیلمی سینه‌مایی له‌ ده‌رهێنانی سینه‌ماكارانی هه‌رێمی كوردستان، له‌ میانه‌ی حه‌وته‌مین خولی فیستیڤاڵی نێوده‌وڵه‌تی فیلمی ئه‌بووزه‌بی له‌ وڵاتی ئیمارات نمایش ده‌كرێن.} 

^{فیلمی سینه‌مایی "تاڵ، شیرین، وڵاته‌كه‌م" له‌ ده‌رهێنانی سینه‌ماكاری كورد هونه‌ر سه‌لیم، له‌ به‌شی پێشبڕكێی سه‌ره‌كی و فیلمی سینه‌مایی "پێش به‌فربارین" له‌ ده‌رهێنانی سینه‌ماكاری كورد هیشام زه‌مان، له‌ به‌شی پێشبڕكێی "ئاسۆی نوێ"ی حه‌وته‌مین خولی فێستیڤاڵی نێوده‌وڵه‌تی فیلمی ئه‌بووزه‌بی له‌ دوو سانسی جیاوازدا له‌ هۆڵی سینه‌مایی كۆشكی ئیمارات و هه‌روه‌ها ناوه‌ندی سینه‌مایی "مارینا ماڵ" له‌ شاری ئه‌بووزه‌بی له‌ وڵاتی ئیمارات یه‌كگرتووی عه‌ره‌بی ده‌چنه‌ سه‌ر په‌رده‌ی سینه‌ما و بۆ به‌ده‌ستهێنانی خه‌ڵاته‌ سه‌ره‌كییه‌كانی ئه‌م فێستیڤاڵه‌ له‌گه‌ڵ كۆمه‌ڵێك فیلم له‌ وڵاتانی جۆراوجۆری جیهان له‌ ركابه‌ریدا ده‌بن.}

^{فیلمی سینه‌مایی "تاڵ، شیرین، وڵاته‌كه‌م" به‌رهه‌می هه‌ریمی كوردستان و وڵاتانی فه‌ڕه‌نسا، ئه‌ڵمانیا و ئیماڕاته‌، ٍبه‌ ئاماده‌بوونی ده‌رهێنه‌ری فیلمه‌كه‌ هونه‌ر سه‌لیم، ئه‌كته‌ری ناوداری سینه‌مای ئێران گوڵشیفته‌ فه‌راهانی و ئه‌كته‌ری كوردی باكووری كوردستان و دانیشتووی وڵاتی ئه‌ڵمانیا كوركماز ئه‌رسه‌لان نمایش ده‌كرێت.}

^{فیلمی سینه‌مایی "پێش به‌فربارین" كه‌ به‌رهه‌می هه‌ریمی كوردستان، كۆمپانیای میتۆس فیلمی ئه‌ڵمانی و وڵاتی نۆڕوێژه‌، ٍبه‌ ئاماده‌بوونی ده‌رهێنه‌ری فیلمه‌كه‌ هیشام زه‌مان، به‌رهه‌مهێنه‌ری فیلمه‌كه‌ و به‌رپرسی كۆمپانیایی سینه‌مایی میتۆس فیلمی ئه‌ڵمانی مه‌مه‌د ئه‌كتاش و ئه‌كته‌ری سه‌ره‌كی فیلمه‌كه‌ تاهیر عه‌بدوڵڵا تاهیر پێشكه‌ش ده‌كرێت.}

^{ئه‌ندامانی لێژنه‌ی دادوه‌رانی به‌شی پێشبڕكێی سه‌ره‌كی حه‌وته‌مین خولی فیستیڤاڵی نێوده‌وڵه‌تی فیلمی ئه‌بووزه‌بی كه‌ فیلمی سینه‌مایی "تاڵ، شیرین، وڵاته‌كه‌م" له‌ هونه‌ر سه‌لیم و 13 فیلمی سینه‌مایی دیكه‌ تیایدا نمایش ده‌كرێن، بریتین له‌: خاتوو جاكی وه‌یڤێر سه‌رۆكی لێژنه‌ی دادوه‌ران و ئه‌كته‌ر له‌ وڵاتی ئۆستۆڕاڵیا، ئادریان ووتۆن ـ ئه‌كته‌ر و به‌رهه‌مهێنه‌ر له‌ وڵاتی به‌ریتانیا، خاتوو هیام عه‌بباس ـ ئه‌كته‌ر له‌ وڵاتی فه‌ڕه‌نسا، خاتوو دۆڕا بۆچۆچا ـ به‌رهه‌مهێنه‌ر له‌ وڵاتی توونێس و خاتوو ساندرا دێن هامێڕ ـ ده‌رهێنه‌ر و به‌رهه‌مهێنه‌ر له‌ وڵاتی هۆڵه‌ندا.}

^{ئه‌ندامانی لێژنه‌ی دادوه‌رانی به‌شی پێشبڕكێی "ئاسۆی نوێ"ی حه‌وته‌مین خولی فێستیڤاڵی نێوده‌وڵه‌تی فیلمی ئه‌بووزه‌بی كه‌ فیلمی سینه‌مایی "پێش به‌فربارین" له‌ ده‌رهێنانی سینه‌ماكاری كورد هیشام زه‌مان و 14 فیلمی سینه‌مایی دیكه‌ تیایدا نمایش ده‌كرێن، بریتین له‌: خاتوو یێسیم ئۆستاگلۆ ئاڕتیست له‌ وڵاتی توركیا، خاتوو ئێرێنێ بیگناردی ـ رخنه‌گری سینه‌ما له‌ وڵاتی ئیتالیا، نووره‌دین له‌خماری ـ ده‌رهێنه‌ر له‌ وڵاتی مه‌غریب، والێری تودورۆوسكی ـ ده‌رهێنه‌ر له‌ وڵاتی رووسیا و میشێل كامۆن ـ فیلمساز له‌ وڵاتی لوبنان.}   

^{حه‌وته‌مین خولی فێستیڤاڵی نێوده‌وڵه‌تی فیلمی ئه‌بووزه‌بی به‌ نمایشی كۆمه‌ڵێك فیلم له‌ سینه‌ماكارانی وڵاتانی جۆراوجۆری جیهان له‌ چه‌ندین به‌شی جۆراوجۆری پێشبڕكێی و ده‌ره‌وه‌ی پێشبڕكێی، له‌ ڕۆژانی 24ی تشرینی یه‌كه‌م/ ئۆكتۆبه‌ر تا رۆژی 2ی تشرینی دووه‌م/ نۆڤه‌مبه‌ر 2013 له‌ هۆڵی گه‌وره‌ی كۆشكی ئیمارات و هه‌روه‌ها ناوه‌ندی سینه‌مایی "مارینا ماڵ" له‌ شاری ئه‌بووزه‌بی له‌ وڵاتی ئیمارات یه‌كگرتووی عه‌ڕه‌بی به‌ڕێوه‌ده‌چێت.} 

^{مه‌نسوور جیهانی/ پ. ف}