به‌ڕێزان ( عوسمان عه‌به پێنجوێنی یان عوسمان قه‌ڵادزه‌یی) و( جه‌واد حه‌یده‌ری) به‌داخه‌وه وتیان به‌ڵێ ڕاسته و كۆچی دوایی كردووه؟
هونه‌رمه‌ند و پێشمه‌رگه ، سروودبێژ و گۆرانیبێژ...
کۆڕەوو شەنگال وتووەو دەیڵێت و بەشداریی کاریگەری لەئاهەنگەکانی سەرفیرازیدا بووەو دەبێت.
مستەفا داداری موکریانی مەهابادی خۆی بەخوێندکاری (مام هێمنی شاعیر ١٩٢١-١٩٨٦) دەزانێ و کاتێک قسە دەکا...
باسمان بۆ بکەن، ئەو ئۆرکێسترەی ئێوە چەنساڵێک ژەنیاری بوون؟ئەو ئۆرکێسترە بە ئۆرکێستری رادیۆ کرماشان ناسراو بوو و لە سەرەتاشەوە سەرپەرەشتییەکەی بەدەستی بەڕێز عەبدولسەمەدیان بوو کە...
بەر دەکەوێت بەڵام لەو لایشەوە هەر بە پاڵپشتی ئەو سامانە دەوڵەمەندە،خۆی دوو هێندە لە نێو ڕووبەری فەرهەنگیی کورددا دەردەخات. هێشتاکەیش کتێبخانەکەی پڕیەتی لە دەیان بەرهەمی...
سه‌باره‌ت به ئاماده‌كاریه‌كانی خه‌ڵكی كوردستان بۆ شه‌ڕی داعش، به‌ختیار عه‌لی ده‌ڵێت لە بەرامبەر هێزو‌و گروپی وه‌ك (داعش)دا هەموو تاڪێڪ بۆ ڕزگارڪردنی ژیانی خۆی ئیشدەڪات‌و ده‌یشڵێت، "لە خۆرهەڵاتدا بە گشتی، مرۆڤ بۆ مرۆڤ وەڪ مرۆڤ نییە، بەڵڪو تەنیا زیندەورێڪە و هیچی دی."
ده‌رباره‌ی ئه‌و هه‌وڵه‌ی له هه‌رێمی كوردستاندا خه‌ڵكانێكی سڤیل ده‌ستیان پێكردووه بۆ چه‌ك هه‌ڵگرتن‌و روبه‌ڕوبونه‌وه‌ی داعش، توانا ئه‌مین، چیرۆكنوس، گفتوگۆیه‌كی له‌گه‌ڵ نوسه‌ر‌و رۆماننوس، به‌ختیار عه‌لی، ئه‌نجامداوه‌‌و له په‌یجی تایبه‌تی خۆی له تۆڕی كۆمه‌ڵایه‌تی فه‌یسبوك بڵاویكردۆته‌وه، له‌و گفتوگۆدا به‌ختیار ده‌ڵێت، "لە بەرامبەر ئەمجۆرە گروپانەدا مرۆڤ ناتوانێت قسە لە سوود و قازانج بڪات. لێرەدا هەموو تاڪێڪ بۆ ڕزگارڪردنی ژیانی خۆی ئیشدەڪات. وەڪ چۆن لەسەردەمی نازییەتدا جوولەڪەیەڪ ئەوپەڕی بیتوانیایە ژیانی خۆی لە گرتن و دەستبەسەری لە ئاوشفیتز و هۆلۆڪۆست قوتاربڪات."
ده‌یشڵێت، "چەمڪی بەرگری «مقاوەمەت» لەم دۆخانەدا بەرگرییە لە «ژیانی ڕووت»... بە بڕوای من دووجۆر لە بەرگریڪردن هەیە، یەڪێڪیان بەرگری ئینسانە لە ئایدۆلۆژیایەڪ، لە جیهانبینییەڪ، ڪە بەرەو بەرگری دەبات لە «دین» لە «شوناس» لە «خاڪ»، لەگەڵ بەرگریڪردن لە «ژیانی ڕووت»، لە «خۆت» دەمێڪ دەبیتە بوونەوەرێڪی زیندووی ڕووت و ژیانت دەڪەوێتە بەر مەترسییەڪی ڕاستەوخۆوەوە. تێزەڪەی من ئەوەیە ڪە فاشیزم بریتییە لە گەمارۆدانی ئەویدی تا ئەو ئاستەی نەتوانێت لە ژیانی رووتی خۆی زیاتر بەرگری لە هیچ بڪات. فاشیزم ڪورتڪردنەوەی ئینسانە بۆ «زیندەوەر»ێڪ... واتە بەلاوەنانێتی وەڪ «سوبێڪت» و وەڪ ڪەسێڪی «مافدار» و ڪورتڪردنەوەیەتی بۆ «زیندووییەڪ»، واتە مەخلوقێڪ هیچ ماف و نرخ و شوناسێڪی نییە بیپارێزێت."
به‌ختیار ئه‌وه‌شی راگه‌یاندووه كه "لە خۆرهەڵاتدا بە گشتی، مرۆڤ بۆ مرۆڤ وەڪ مرۆڤ نییە، بەڵڪو تەنیا زیندەورێڪە و هیچی دی. گەر سەیری فەیسبوڪی عەرەبەڪان بڪەیت، بە هەزاران ڕستە دەخوێنیتەوە دەربارەی ئەوەی «ڪورد مرۆڤ نین» «ڪورد ئاژەڵی ڪێوین» «شیعە ئادەمیزاد نین» «سوننە حەیواناتن»، گەر فەیسبوڪی ڪوردەڪانیش بگەڕێیت بەر هەزاران گوزارشت و ڕستەی لەوجۆرە دەڪەویت. بۆ ئەوەی ماشێنێڪی فاشیستیمان هەبێت، دەبێت مرۆڤێڪمان هەبێت ئەویدی وەڪ «ئاژەڵ» تەماشابڪات. لە خۆرهەڵات ئەو هێڵەی شوناسێڪ لە شوناسێڪ جیادەڪاتەوە، وەڪ ئەو هێڵەی لێهاتووە ڪە «مرۆڤ» لە «ئاژەڵ» جیادەڪاتەوە، واتە ئەو مێژووەی مرۆڤ هەیەتی بۆ خۆ جیاڪردنەوە لە ئاژەڵ، لێرەدا دووبارە زیندوودەبێتەوە، لە مێژوودا، لە پەیوەندی مرۆڤ بە مرۆڤدا دووبارەدەڪرێتەوە."
هه‌ربۆیه "ئەوی بەرامبەرمان «مرۆڤ» نییە، بەڵڪو «زیندوییەڪە» «گیاندارێڪە» ڪە دەشێت هەر بەهانەیەڪی بچوڪ بەس بێت، ببێتە هۆی ڪوشتن و سوڪایەتی پێڪردنی. لەم ئاستەشدایە فەیلەسوفێڪی وەڪ ئاگامبن دەبێتە فەیلەسوفێڪی گرنگ بۆ ئێمە. ئەوەی لەم گۆڕەدا شوناسی هەیە ماشێنە فاشیستییەڪانن، واتە ئەو مەڪینە جەنگاوەرانەی ڪە بە ناوی نەتەوە و شوناس و مەزهەبەوە بەرامبەر یەڪ دەوەستن، ئیتر مرۆڤی ئاسایی تەنیا زیندەگییەڪی ڕووتە ڪە یان ئیشڪەری ماشێنەڪەیە یاخود خۆراڪی ماشێنەڪەیە. لێرەدا بۆ مرۆڤەڪان لۆژیڪی «مانەوەی ڕووت» ئیشدەڪات. مرۆڤ گەر هوشیار نەبێت و بە ناوی ماشێنەڪەوە بچێتە جەنگەوە، بە ناوی شیعە یان سوننە یان عەرەب یان تورڪمان یان ڪورد، دەبێتە بەشێڪ لەو ئامێرە فاشیستییە گەورانەی لێرەدا لە شەڕدان. بەڵام دەمێڪ ڪە تێگەیشت، دەزانێت بۆ ئەو وەڪ تاڪ تەنیا شتێڪ دەتوانێت شەڕی بۆ بڪات «ژیانی خۆیەتی»... ژیانێڪ ڪە بەدبەختانە، بۆتە قوربانی ئەو قاڵبە دینی یان نەتەوەییەی تێیدا لەدایڪبووە، ڪە بەردەوام دەیهاڕێت و وردیدەڪات و دەیگۆڕێ بۆ ڪەرەستەی جەنگ. ژیانی رووت بەپێی ئاگامبن واتە بوونەوەری بێ ماف، لە خۆرهەڵاتیشدا، و بەو مۆراڵە فاشیستییەی سەدەیەڪە گەورەدەبێت، هەموو ئەوانی دی، هەموو ئەوانەی وەڪ من نین، مرۆڤی بێ مافن، یان لە ڕاستیدا مرۆڤ نین و ژیانی ڕووتن. ئەم جەنگە گەرچی بە چەڪی سەدەی بیست و یەڪ دەڪرێت، بەڵام جەنگێڪی دڕندانەی سەرەتاییە، ئەوەی تێیدا سەرڪەوت دەبێتە پادشای جەنگەڵ و ئەوەی شڪا دەبێت بە ئاژەڵ."
به‌ختیار ده‌شڵێت، "لە دوا وێستگەی شەڕی نێوان ماشێنە فاشیستییەڪاندا، شەڕ لەوە دەردەچێت وەڪ شەڕی بیروڕا و ئایدۆلۆژیا بێت، بەڵڪو دەبێتە شەڕی هەندێڪ زیندەوەر ڪە تەنیا بۆ مانەوە دەجەنگن. لێرەدا مرۆڤ گەر نەزانێت ئەم جەنگە چ جۆرە جەنگێڪە، هەر هەڵوێستێڪ وەربگرێت لە نیگا و ڕوانگەی یەڪێڪ لە ماشێنەڪانەوە وەریدەگرێت، بە بڕوای من سیستمەڪە وا ئیشدەڪات ڪە هەمووان لە جەنگەوە بئاڵێن، فاشیزم بەجۆرێڪ لە جۆرەڪان هونەری ئاڵاندنی ئینسانە لە شەڕەوە، شەڕی سیاسی و نەتەوەیی و مەزهەبی. نزیڪی پەنجا ساڵیشە مرۆڤی خۆرهەڵاتی بەردەوام لەم جەنگە گەورانەوە دەئاڵێنرێت و بەردەوام واعیزە ئایدۆلۆژییەڪان شەرعییەت بەم جەنگە ترسناڪ و بێهودانە دەبەخشن، جوانی دەڪەن، بەهانەی سیاسی و ناسیونالیستی و مەزهەبی بۆ دەدۆزنەوە و وا دەیڕازێننەوە، تا جەنگاوەرەڪان خۆیان بە پێی خۆیان و بەو پەڕی حەماسەوە بەشداربن. ڕەنگە مرۆڤ زۆرجار ناچار بێت ئەم جەنگە بڪات، ڪە وادەڵێم بیر لە گەنجێڪ دەڪەمەوە ڪە ئێستا لە بەغداد ناچارە چەڪ هەڵبگرێت تا نەهێڵێت وەڪ ئاژەڵ سەری ببڕن. جەنگاوەری ئیمان و جەنگاوەری ژیان دوو شتی جیاوازن، وە ڕەنگە تاڪە جیاوازییەڪی ڕاستەقینە و رادیڪال و قووڵیش بێت ڪە ئێستا بوونی هەبێت. مرۆڤ دەبێت هەمیشە لە خۆی بپرسێت چ جۆرە جەنگاوەرێڪە؟ مرۆڤ دەبێت بزانێت جەنگ بەس بۆئەوە دەڪات نەگاتە دۆخی ئاژەڵێڪی دۆڕاو و سەربڕدراو... بە بڕوای من دەبێت لە دەرەوەی هەر وەهمێڪی ئایدۆلۆژیی و نەتەوەیی و دینی ئەو شەڕە بڪات، لەدەرەوەی هەر مۆتیڤێڪ خزمەت بە ماشێنە فاشیستییەڪان بڪات. بەوەشدا لە خۆرهەڵاتدا هێزی سیاسی جیاواز و مرۆڤدۆست بوونیان نییە، هێزێڪ شوناسی داخراوی نەبێت، ئامێرێڪی دینی یان مەزهەبی یان نەتەوەیی نەبێت، هەر بەو مانایەش جەنگاوەری ژیان هەمیشە جەنگاوەرێڪی تەنیایە... ڕەنگە ئەمجۆرانە لە جەنگاوەر ڪەم بن، بەڵام لەگەڵ ڪەمبوونیشیاندا تەنیا ئاماژەن بۆ ئەوەی ڪە ماشێنە فاشیستییەڪان ناتوانن سەرتاسەریی و بێ ڪەلێن بن، ناتوانن هەموومان بخۆن، هەموومان بڪەنە سوبێڪتی فاشیستی ڕامڪراو."
19/06/2014
ئەفسەرێكی پێشووی سوپای عێراق دەڵێت، بەهۆی ئەزموونی گەریلایی دوورودرێژیانەوە، هێزەكانی پێشمەرگەی كوردستان تەنیا دیوارن لەبەردەم هێرشی دەوڵەتی ئیسلامی لە عێراق و شام (داعش).
حكومەتە شیعییەكەی عێراق لە چەند رۆژی رابردوودا تووشی شۆك هات بەرامبەر لەدەستدانی كۆنترۆڵی دووەم گەورەترین شاری عێراق و داگیركردنی لەلایەن چەكدارانی داعش.
بە درێژایی نزیكەی 7 ساڵ، حكومەتی عێراق لە سێ پارێزگای عێراقدا، دیالە، سەڵاحەدین و ئەنبار بەبێ سەركەوتن سەرقاڵی شەڕی دژ بە تیرۆر بووە.
ئەو ئەفسەرەی سوپای پێشووی عێراق كە ئێستا شرۆڤەكاری ئەمنییە، دەڵێت چەكدارەكانی داعش لە ناوچە مەدەنییەكاندا خۆیان حەشار دەدەن و سوپا ناتوانێت رووبەڕوویان ببێتەوە لەو جۆرە شوێنانە.
"بۆ ئەوەی كۆنترۆڵی ئەو ناوچانە بكرێتەوە و زەرەری گیانی هاووڵاتیان زۆر نەبێت، حكومەت پێویستە شەڕی شەقام بە شەقام بكات و یەكەی سەربازی پیادە بنێرێتە نێو گەڕەكەكان". ئەو ئەفسەرە كە لە بەغداوە قسەی دەكرد، نەیویست ناوی ئاشكرا بكرێت. ئەو هەروەها پێیوایە هەندێك لە كاربەدەستانی عێراقی كارێكی باشیان كردووە كە داوای هاوكاری هێزەكانی پێشمەرگەیان كردووە بۆ رووبەڕووبوونەوەی داعش، چونكە وەك ئەو گوتی "پێشمەرگە ئەزموون و شارەزایی و زانیاری باشیان هەیە لە شەڕی ناو شاردا".
ئەفسەرەكە پێیوایە هێزەكانی پێشمەرگە كە لەلایەن حكومەتی هەرێمی كوردستانەوە فەرمانداری دەكرێن، هێزێكی گونجاوە بۆ رێگەگرتن لە پێشكەوتنی هێزەكانی داعش "چونكە ئەوان زانیارییان دەربارەی ناوچەكە هەیە و ئەو ناوچەیە نزیكە لە خۆیانەوە".
لەبەریەك هەڵوەشانی سوپای عێراق لە مووسڵ چەند رۆژێك دوای رادەستكردنی یەكەم فڕۆكەی F16ی ئەمریكی دێت بۆ عێراق. سەرۆك وەزیرانی عێراق نوری مالیكی داوای ئەو فڕۆكانە و هەندێك ئامێری دیكەی سەربازی لە ئەمریكا كردووە بۆ ئەوەی شەڕی دژ بە چەكدارانی پێبكات. رێككەوتنێكی چەند ملیۆن دۆلاری لە نێوان عێراق و ئەمریكا هەیە بۆ كڕینی چەك و تەقەمەنی ئەمریكی لەلایەن عێراقەوە.
بەڵام ئەو شارەزا ئەمنییە دەڵێت هێزی ئاسمانی ناتوانێت چۆك بە چەكداران دابدات "پشتبەستن بە هێزی ئاسمانی و گەمارۆدانی شارەكان بۆ ئەوەی چۆك بە چەكداران دابدەی، نەك هەر بێ سوودە، بەڵكو وای لە داعش كردووە كە دەسەڵاتی بگاتە سێ پارێزگا".
ئەو هەروەها گوتی گرتنی خێرای مووسڵ و ناوچەكانی دیكەی باكووری رۆژئاوای عێراق لەلایەن داعشەوە "ئەوە دەسەلمێنێت كە تاكتیكی سەربازی ئاژانسی ئەمنی عێراقی هەڵەیە، نا كاریگەرە و چاودێرییان نەخستووەتە سەر جموجۆڵی داعش".
شاری موسڵ 400 كیلۆمەتر لە باكووری بەغدا دوورە. هەر لەو كاتەوە كە سوپای عێراقی شوێنەكانیان چۆڵكرد، جلە سەربازیەكانیان دڕاند و هەڵهاتن لەكاتی پێشكەوتنی هێزەكانی داعشدا، ترس و تۆقین و بێ سەروبەری باڵی بەسەر شارەكەدا كێشا.
محەممەد ئەلشەممەری، 35 ساڵ، هاووڵاتییەكی موسڵە كە خۆی بۆ بەغدا هەڵهاتووە دەڵێت "هەزارەها كەس لە موسڵ هەوڵدەدەن بەرەو بەغدا یان بەرەو كوردستان هەڵبێن". ئەو هەروەها دەڵێت "زۆرینەی ئەو خەڵكە پێویستیان بە شوێنی مانەوە و نیشتەجێبوون هەیە".
ئەلشەممەری هۆشداری لەمەڕ هاتنە ئارای كارەساتی مرۆیی دەدا ئەگەر حكومەت بەدەم ئاوارەكانەوە نەچێت.
سەرۆكی پەرلەمانی عێراق، ئوسامە نوجێفی كەوتنی موسڵی بە "داگیركاری بیانی" وەسف كردو چەكدارەكانی داعشی بە چەكداری بیانی و هاووڵاتی چەند وڵاتێكی جیاواز ناوبرد.
"ئەم گروپانە پشتگیری دەكرێن، بەڵام ئێمە دەبێت ئێستا تەركیز بكەینە سەر شكاندنیان و گێڕانەوەی وڵات بۆ سەر رێچكەی راست. دوای ئەوە دەتوانین لە سەرچاوەی پشتگیرییان بكۆڵینەوە". نوجێفی ئەم وتەیەی لەمەڕ ئەو لێكدانەوانە راگەیاند كە دەڵێن داعش پشتگیری ناوخۆییان هەیە.
مالیكی، ئەو سەرۆك وەزیرانەی كە مایەی ناكۆكیی سوننەكان و كورد و هەندێك گرووپی شیعیە، داوای كرد "هەر كەس دەتوانێت با چەك هەڵگرێت و بەرگری بكات لەدژی داعش".
بەڵام لە موسڵ تووڕەیی زیاتر رووبەڕووی حكومەتەكەی مالیكییە وەكو لە چەكدارەكانی داعش. پێشڕەویی چەكدارەكانی داعش پرسیاری جددی لەمەڕ توانای سوپای عێراقی كە لەلایەن ئەمریكاوە پشتگیری دەكرێن و مەشق پێدەكرێن هێناوەتە ئارا.
زۆر عێراقی دەپرسن چۆن سوپاكەیان كە بە چەكی قورس ئامادە كراوە، بەرامبەر بە هێزێكی چەكداری چەكی سووك، رووخاو بەرگری لە خۆی نەكرد؟
19/06/2014
كۆشكی سپی جەختیان لەوەكردۆتەوە كە جێگری سەرۆك كۆماری ئەمریكا جۆ بایدن لەگەڵ هەریەك لە بارزانی و مالیكی و نوجێفی دەدوێت بۆ ئەوەی هانیان بدات بە رووی چەكدارانی (داعش) بوەستنەوە.
بە پێی هەواڵێكی ئاژانسی(رۆیتەرز) لە بەیاننامەیەكدا كە كۆشكی سپی بڵاویكردۆتەوە، رایانگەیاندووە" جۆ بایدن لە هەموو گفتوگۆكانیدا جەختی لە یەكڕیزی نیشتیمانی كردۆتەوە، تاوەكو رووبەڕووی مەترسیەكانی چەكدارانی دەوڵەتی ئیسلامی لە عیراق و شام(داعش) ببنەوە."
لە درێژەی ئەو بەیاننامەیەدا هاتووە، بایدن سوور بووە لەسەر ئەوەی كە هەماهەنگی لە مەبەستی ئەمنی هەبێت لە داهاتوودا بۆ ئەوەی هەنگاوهەڵهێنانێك بۆ ئەوەی بە پێی دەستور حكومەتێكی نوێ پێكبهێنرێت.
پێشتر و دوای كۆبوونه‌وه‌ی له‌گه‌ڵ دیلما رۆسیف، خانمه سه‌رۆكی به‌ڕازیل، جۆ بایدن، جێگری سه‌رۆكی ئه‌مریكا به‌پێویستی زانی عیراقییه‌كان به سه‌رجه‌م پێكهاته‌كانییه‌وه، پێكه‌وه بكه‌ونه جووڵه بۆ روبه‌ڕٍووبوونه‌وه‌ی ئه‌و كێشه تایه‌فییانه‌ی بوونه‌هۆی ئه‌وه‌ی عیراق به‌م دۆخه‌ی ئێستادا بڕوات.
به‌وته‌ی بایدن، له‌پێناو گه‌یشتن به چاره‌سه‌رێكی سیاسیی سه‌رتاسه‌ری، ئیداره‌ی ئه‌مریكا له په‌یوه‌ندیی به‌رده‌وامدایه له‌گه‌ڵ به‌رپرسانی عیراق.
جێگری سه‌رۆكی ئه‌مریكا وتیشی: بێگومان ئێستا عیراق پێویستی به هاوكاریی به‌په‌له هه‌یه بۆ روبه‌ڕوبوونه‌وه‌ی ئه‌و هه‌ڕه‌شانه‌ی ماوه‌یه‌كی زۆره له‌سه‌ریه‌تی، واشنتۆنیش له په‌یوه‌ندیی به‌رده‌وامدایه بۆئه‌وه‌ی عیراقییه‌كان بگه‌یه‌نێته چاره‌سه‌رێكی سیاسیی سه‌رتاسه‌ری.
19/06/2014
سەعید، تەمەنی 12 ساڵ بوو كە بەهۆی كێشەیەكی كۆمەڵایەتی دەستی بە خوێنی كەسێك سوور بوو، بەوهۆیەشەوە پێنج ساڵی لە زیندان بەسەربرد، بەڵام كێشەكەی بەوە كۆتایی نەهات و دوای هاتنە دەرەوەی لە زیندان، نەك خۆی برایەكیشی لە تۆڵەی كوشتنی ئەو كەسەدا كوژرانەوە. پۆلیس دەڵێت "كێشەكە لەسەر كچێك بووە".
كاژێر 5ی ئێوارەی 13/6/2014 لە ناوچەی بەختیاری لە شارۆچكەی خانەقین، دوو برا بە ناوەكانی سەعید مستەفا عەلی، 17 ساڵ و حوسێن مستەفا عەلی، 29 ساڵ كوژران. ئەوان لەلایەن كوڕ و باوكێكەوە كوژران بە ناوەكانی (ق.م.ع) و (م.ع). دوای رووداوەكە هەردووكیان لەلایەن پۆلیسەوە دەستگیر كران.
ئەو دوو برایە لە كاتێكدا لەناو بازاڕی خانەقین كوژران كە هەموو چاوەكان لەو شارۆچكەیە لەسەر شەڕی داعش و پێشمەرگە و سوپای عێراقە لە شار و شارۆچكەكانی جەلەولا و سەعدیەی نزیك لە خانەقین. خەڵك سەرەتا وایانزانی ئەوان لەلایەن داعشەوە كوژراون.
قوربانییەكان و بكوژەكانیان كە یەكێكیان پێشمەرگەیە، خزمی یەكدی نین، بەڵام پێشتر دراوسێی یەكدی بوون و هەردوولایان كوردن.
رائید یوسف داراخان، بەڕێوەبەری پۆلیسی بەختیاری كە لێكۆڵینەوە لە رووداوەكە دەكەن بە (تۆڕی میدیایی رووداو)ی گوت "پێنج ساڵ لەمەوبەر، لە 14/6/2009 سەعید بە چەقۆ كوڕێكی (ق)ی كوشت بە ناوی رەعد، ئەوكات كێشەی كۆمەڵایەتییان هەبوو، كێشەكە لەسەر كچ بوو، گوتیان پەیوەندی بە كێشەی نامووسەوە هەیە، ئەوكات سەعید تەمەنی 12 ساڵ بوو، دەستگیر كرا، دادوەر 12 ساڵ حوكمی دا، بەڵام لەبەرئەوەی منداڵ بوو، 5 ساڵ لە زیندان مایەوە و ئازاد كرا".
سێ مانگە سەعید ئازاد كراوە، 5 ساڵ بەسەر رووداوەكە تێپەڕیبوو، ئینجا لە ساڵیادی رووداوەكەدا كوژرایەوە. لە باشووری كوردستان ئەو كەسانەی دەستیان چووەتە كوشتنی كەسێك، ئەگەر زیندانی بكرێن و سزای یاسایی خۆیان تەواو بكەن، بەڵام سوڵحیان نەكردبێت، بنەماڵەی كوژراو هەر تۆڵەی خۆیانی لێدەكەنەوە و سزای یاسایی بە تۆڵە نازانن.
رائید یوسف گوتی "سەعید و براكەی لەسەر ماتۆڕسكیل بوون، دیارە كەسوكاری كوژراوەكە بە دوایانەوە بوون، برا و باوكی رەعدی كوژراو لە نێو ئۆتۆمبێلێكەوە بە چەكی كڵاشینكۆف تەقەیان لێكردوون، هەر یەكەیان سێ گوللەیان بەر كەوتبوو، ئێمە ئاگادار كراینەوە كە دوو تەرم لەسەر شەقامی بەختیاری لە خانەقین كەوتوون، كە چووینە سەر رووداوەكە تەرمی سەعید و حوسێنمان بینی".
دوای رووداوەكە سەرەتا تۆمەتبارەكان هەڵاتن، پاشان (ق) خۆی رادەستی فەوجەكەی خۆی كرد، (م)ی باوكیشی خۆی رادەستی پۆلیس كرد، بەپێی قسەكانی بەڕێوەبەری پۆلیسی بەختیاری لە خانەقین حوسێن هیچ پەیوەندی بە كێشەكەوە نەبووە، بەڵام ئەویش لەسەر ماتۆڕەكە بووە و كوژراوە، ئەوە یەكەم حاڵەتی كوشتنە لە ماوەی شەش مانگی یەكەمی ساڵی 2014 لە سنووری بنكەی پۆلیسی بەختیاری لە خانەقین.
18/06/2014
فه‌رمانده‌یه‌كی پله به‌رزی سوپای پاسدارانی ئێران رایگه‌یاند هه‌رێمی كوردستان به بڕیاری ئه‌مریكا شه‌ڕی چه‌كدارانی داعش ناكات و ده‌شڵێت ئه‌و شه‌ڕه‌ی ئێستا له ناوچه‌كه‌دا هه‌ڵگیرساوه بۆ ئێران له شه‌ڕی هه‌شت ساڵه‌ی عێراق مه‌ترسیدارتره.
دوای ئه‌وه‌ی كه له كۆبونه‌وه‌ی دوێنێی سه‌رۆكی هه‌رێم له‌گه‌ڵ لایه‌نه سیاسییه‌كان بڕیاردرا كورد شه‌ڕی داعش و گروپه چه‌كداره توندڕه‌وه‌كان نه‌كات، ئه‌مڕۆ محه‌مه‌د ڕه‌زا نه‌قدی كه به‌رپرسێكی باڵای سه‌ربازی ئێرانه رایگه‌یاند كورد له سه‌ر داوای ئه‌مریكا بڕیاری داوه شه‌ڕی داعش نه‌كات.
ئه‌و سه‌ركرده سه‌ربازییه ئێران راشیگه‌یاندوه به‌رپرسانی ئه‌مریكی به به‌رپرسانی كوردیان راگه‌یاندوه خۆیان له‌و شه‌ڕه به دوور بگرن بۆ ئه‌وه‌ی جارێكیتر خۆیان ده‌ست به سه‌ر عێراقدا بگرنه‌وه.
جه‌ختیشی كردوه‌ته‌وه جموجۆڵه‌كانی ئه‌مدوایانه‌ی داعش و گروپه چه‌كداره توندڕه‌وكان پیلانگێڕییه‌كه‌ی مه‌ترسیداری ئه‌مریكایه له ناوچه‌كه‌دا.
ئه‌و سه‌ركرده‌یه‌ی سوپای پاسدرانی ئێران ده‌شڵێت، ئه‌مریكا نایه‌وێت شیعه كۆنتڕۆڵی نه‌وت و وزه بكات له ناوچه‌كه‌دا و ده‌ترسێت له داهاتوودا وه‌ك وه‌ره‌قه‌یه‌كی فشار له دژی رۆژئاوا به كاری بێنێت.
محه‌مه‌د ره‌زای نه‌قدی ئاماژه‌ی به‌وه‌شداوه ئه‌و شه‌ڕه‌ی ئێستا له ناوچه‌كه‌دا هه‌ڵگیرساوه بۆ ئێران زۆر له شه‌ڕی هه‌شت ساڵه‌ی له‌گه‌ڵ عێراق مه‌ترسیدارتره و راشیگه‌یاندوه كه ئێران له‌و شه‌ڕه‌دا براوه ده‌بێت.
18/06/2014
جۆزیف بایدن جێگری سه‌رۆكی ویلایه‌ته یه‌كگرتوه‌كانی ئه‌مریكا رایگه‌یاند وڵاته‌كه‌ی یارمه‌تی به‌په‌له پێشكه‌شی هێزه ئه‌منییه‌كانی عێراق ده‌كات بۆ روبه‌ڕوبونه‌وه‌ی رێكخراوه چه‌كدارییه‌كان.
بایدن ئاماژه‌ی به‌وه‌كرد، پشتیوانی ئه‌مه‌ریكا بۆ عێراق مه‌رجداره به‌وه‌ی سیاسه‌تمه‌دارانی عێراقی ناكۆكییه‌كانیان وه‌لابنین‌و رێزه‌كانیان یه‌كبخه‌ن بۆ روبه‌ڕوبونه‌وه‌ی پێشكه‌وتنی چه‌كداران.
له‌په‌راوێزی سه‌ردانێكیدا بۆ به‌رازیل جۆزیف بایدن وتی"ئه‌مه‌ریكا ئاماده‌یه یارمه‌تی پێویست‌و خێرا پێشكه‌شی هێزه ئه‌منییه‌كانی عێراق بكات، به‌ڵام پێویسته عێراقییه‌كان یه‌كبگرن بۆ روبه‌ڕوبونه‌وه‌ی كرده‌وه توندوتیژییه چه‌كدارییه‌كان كه توندڕه‌وه‌كان ئه‌نجامی ده‌ده‌ن به‌مه‌به‌ستی هه‌ڵوه‌شاندنه‌وه‌ی وڵات".
ئاشكراشیكرد، مه‌رجی ئه‌مه‌ریكا بۆ یارمه‌تیدانی عێراق له شه‌ڕ دژ به چه‌كدارانی ده‌وڵه‌تی ئیسلامی له عێراق‌و شام كه به داعش ناسراوه ئه‌وه‌یه نوری مالیكی سه‌رۆك وه‌زیران بچێته ریزی سیاسه‌تمه‌دارانی سوننه.
ئۆباما له‌گه‌ڵ كۆنگرێس كۆده‌بێته‌وه
له‌لایه‌كی تره‌وه سیناتۆر میچ مكونیل سه‌رۆكی كه‌مینه‌ی كۆمارییه‌كان له ئه‌نجومه‌نی پیران رۆژی سێ شه‌ممه ئاشكرایكرد، سه‌رۆك ئۆباما داوای له رێبه‌رانی ئه‌نجومه‌نی پیران‌و نوێنه‌رانی ئه‌نجومه‌ن كردوه رۆژی چوار شه‌ممه له كۆشكی سپی ئاماده‌بن به‌مه‌به‌ستی سازدانی كۆبونه‌وه‌یه‌ك سه‌باره‌ت به دۆخی عێراق.
كۆشكی سپیش هه‌واڵی ئه‌و كۆبونه‌وه‌یه‌ی له‌نێوان ئۆباما‌و سه‌ركرده‌كانی كۆنگرێسی پشتڕاستكرده‌وه‌‌و وه‌ك به‌شێك له‌و "راوێژكارییانه" ناوی برد كه ئۆباما سه‌باره‌ت به سیاسه‌تی ده‌ره‌وه‌ی ئه‌مریكا‌و به‌تایبه‌تیش دۆخی عێراق ده‌یكات.
18/06/2014
به‌پێی ئامارێكی رێكخراوی یونیسَف-ی سه‌ربه نه‌ته‌وه‌یه‌كگرتووه‌كان، زیاتر له 100 ملیۆن و كچ و ژن روبه‌ڕووی شێواندنی كۆئه‌ندامی زاوزێیان بوونه‌ته‌وه و له چه‌ند ساڵی داهاتووشدا ده‌یان ملیۆنی دیكه دووچاری ئه‌و مه‌ترسییه ده‌بنه‌وه.
به‌پێی راپۆرتێكی رێكخراوی یونیسێف، رێژه‌ی خه‌ته‌نه‌كردن و شێواندنی كۆئه‌ندامی زاوزێیی مێینه، گه‌یشتووه‌ته 125 ملیۆن كه‌س له ناوچه جیاجیاكانی جیهان، راپۆرته‌كه هۆشداریشی داوه له‌وه‌ی كه له ده‌یه‌ی داهاتوودا 30 ملیۆن مێینه‌ی دیكه روبه‌ڕووی خه‌ته‌نه‌كردن ببنه‌وه.
هاوكات راپۆرته‌كه سه‌رنجی بۆئه‌وه‌ش راكێشاوه كه خه‌ته‌نه‌كردنی مێینه، نه‌ك هیچ سوودێكی ته‌ندروستیی نییه، به‌ڵكو زیانێكی قووڵی ئه‌وتۆ به جه‌سته‌ی مێینه ده‌گه‌یه‌نێت كه ده‌بێت مێینه سه‌رتاسه‌ری ژیانی به‌ده‌ستییه‌وه گیر بخوات.
راپۆرته‌كه باسی له‌وه‌شكردووه كه ره‌نگه خه‌ته‌نه‌كردنی مێینه ئه‌گه‌ری گیانله‌ده‌ستدانی كۆرپه له‌لایه‌ن ئه‌و دایكانه‌وه زیاتر بكات كه خه‌ته‌نه كراون.
له به‌شێكی دیكه‌ی راپۆرته‌كه‌یدا، ئه‌و رێكخراوه‌ی سه‌ربه نه‌ته‌وه‌یه‌كگرتووه‌كان خه‌ته‌نه‌كردنی مێینه، به‌تایبه‌ت منداڵانی تازه له‌دایكبووی به جۆرێك له جۆره‌كانی جیاوازی و توندوتیژی و پێشێلكردنی مافی له‌ش و هزری مرۆڤ هه‌ژمار كردووه.
له نێوان ساڵانی 2005 بۆ 2010، خه‌ته‌نه‌كردنی مێینه له‌سه‌ر ئاستی جیهان ته‌نها به‌ڕێژه‌ی 5% كه‌مبووه‌ته‌وه، هاوكات نه‌ته‌وه‌یه‌كگرتووه‌كان مه‌زه‌نده‌ی كردووه ساڵی 2074 ساڵی دیكه رێژه‌كه بۆ نیوه دابه‌زێت، بۆیه پێی وایه 60 ساڵ چاوه‌ڕوانی بۆ به‌ره‌و بنبڕكردنی ئه‌و دیاره‌ده‌یه، كاتێكی درێژخایه‌نه.
18/06/2014
بۆ به‌ره‌نگاربوونه‌وه‌ی ئه‌و هه‌ڕه‌شانه‌ی لێی ده‌كرێت، جێگری سه‌رۆكی ئه‌مریكا له‌و باوه‌ڕه‌دایه كه عیراق پێویستیی به هاوكاریی به په‌له‌یه.
دوای كۆبوونه‌وه‌ی له‌گه‌ڵ دیلما رۆسیف، خانمه سه‌رۆكی به‌ڕازیل، جۆ بایدن، جێگری سه‌رۆكی ئه‌مریكا به‌پێویستی زانی عیراقییه‌كان به سه‌رجه‌م پێكهاته‌كانییه‌وه، پێكه‌وه بكه‌ونه جووڵه بۆ روبه‌ڕٍووبوونه‌وه‌ی ئه‌و كێشه تایه‌فییانه‌ی بوونه‌هۆی ئه‌وه‌ی عیراق به‌م دۆخه‌ی ئێستادا بڕوات.
به‌وته‌ی بایدن، له‌پێناو گه‌یشتن به چاره‌سه‌رێكی سیاسیی سه‌رتاسه‌ری، ئیداره‌ی ئه‌مریكا له په‌یوه‌ندیی به‌رده‌وامدایه له‌گه‌ڵ به‌رپرسانی عیراق.
جێگری سه‌رۆكی ئه‌مریكا وتیشی: بێگومان ئێستا عیراق پێویستی به هاوكاریی به‌په‌له هه‌یه بۆ روبه‌ڕوبوونه‌وه‌ی ئه‌و هه‌ڕه‌شانه‌ی ماوه‌یه‌كی زۆره له‌سه‌ریه‌تی، واشنتۆنیش له په‌یوه‌ندیی به‌رده‌وامدایه بۆئه‌وه‌ی عیراقییه‌كان بگه‌یه‌نێته چاره‌سه‌رێكی سیاسیی سه‌رتاسه‌ری.
18/06/2014
بەرپرسێکی باڵای نەتەوە یەکگرتووەکان دەڵێت تا رادەی زۆر دڵنیان لەوەی کە گرووپی دەوڵەتی ئیسلامی لە عێراق و شام (داعش) تاوانی جەنگی ئەنجامداوە.
ناڤی پیللای، بەڕێوەبەری بەشی مافەکانی مرۆڤ لە نەتەوەیەکگرتووەکان، لە لێدوانێکی رۆژنامەنووسیدا گوتی: “هەرچەندە هێشتا ناتوانین ژمارەی ئەوانەی گیانیان لەدەستداوە پشتڕاست بکەینەوە، بەڵام ئەو کوشتنانەی بە مێشکێکی ساردەوە و بەشێوەیەکی سیستماتیک و زنجیرەیی، لە ناوچەی جیاجیای دەوروبەری تکریت ئەنجامدراون، تا رادەیەکی زۆر دڵنیاماندەکاتەوە کە تاوانی جەنگ ئەنجامدراوە”.
لە رۆژانی رابردوودا لەلایەن چەکدارانی داعشەوە دیمەنی کوشتنی بەکۆمەڵی خەڵک لەو ناوچانەی لەلایەن ئەو گرووپەوە کۆنترۆڵکراون بە تۆڕە کۆمەڵایەتییەکانی وەکو فەیسبووک و تویتەردا بڵاوکرانەوە.
16/06/2014
ئەوەی بۆ یەكپارچەیی عێراق دەگری با رێز لەدەستوورەكەی بگرێت
ژەنراڵ پیتەر مەنسور كە ئەفسەری جێبەجێكاربووە لەگەڵ ژەنراڵ پەتریۆس لەماوەی ساڵانی 2007- 2008 لە عێراقدا، هەفتەی رابردوو لە لێدوانێكدا ئاماژەی بەوەكردووە، جۆرج دەبلیو بوش وەك كۆریای باشوور سەیری عێراقی دەكرد، ئەمەش بەو مانایەی بوش بەنیاز بوو ماوەی 60 ساڵ هێزەكانی لەعێراقدا بمێنێتەوە و سەرەنجام عێراقیش وەك كۆریای باشوور بەرەو سەقامگیری و دیموكراتی هەنگاو هەڵبگرێت، بەڵام عێراق بۆ ئیدارەی ئۆباما وەك ڤیتنام سەیری لێكرا و ئۆباما بەهەرنرخێك بووبێت هەوڵیدا لە عێراق پاشەكشە بكات.
ئەم قسەیەی پیتەر مەنسور دەكرێت لەو چوارچێوەیە بخوێنرێتەوە، بەوەی ئیدارەی ئۆباما وەك شەڕێكی دۆڕاو سەیری شەڕی عێراقی كردووە، بۆیە بەكشانەوەی هێزەكانیشی لە عێراق، هەروەك چۆن ریچارد نیكسۆن دوای كشانەوەی هێزەكانی لە ڤێتنامی باشوور بە تەواوەتی وازی لە ڤێتنام هێنا، باراك ئۆباماش دوای ساڵی 2011 و كشانەوەی هێزەكانی لەعێراق، بەهەمان شێوە مامەڵەی لەگەڵ عێراقدا كرد.
دیارە شێوازی سیاسەتی ئەمریكا لەدوای كشانەوەی هێزەكانی لە 2011ـەوە تائێستا ئەو راستیە دەسەلمێنن كە ئیدارەی ئۆباما بە هاوشێوەی سیاسەتی ریچارد نیكسۆن لەگەڵ ڤیتنامی باشوور دوای 1973 مامەڵە لەگەڵ عێراقی دوای 2011 دەكەن.
ئاشكرایە دوای كشانەوەی ئەمریكا لە ڤێتنامی باشوور، هەردوو ڤێتنامی باكوور و باشوور یەكیان گرتەوەو لەبەرەی بلۆكی سۆشیالیستی دژ بە ئەمریكا خۆیان بینییەوە، راشكاوانەتر هەردوو ڤێتنام بووەوە بەیەك ڤێتنام و یەك دوژمنی ئەمریكا، لە عێراقی دوای 2011ش، نوری مالیكی سەرۆك وەزیرانی عێراق هەر لەیەكەم رۆژەوە هەوڵیدا هەیبەت و شكۆی سەركردەكانی عەرەبی سوننەی عێراق بشكێنێت، ئەمەش بە راوەدوونانی تاریق هاشمی جێگری سەرۆك كۆمار و دوای ئەویش بە دەستگیركردنی رافع عیساوی وەزیری دارایی ئەوكاتی عێراق كۆتایی پێهات، ئەمە جیا لەوەی لەناو گرین سەربازگەی شەرەفی كردە بەندیخانەیەكی نهێنی و تێیدا ئەشكەنجەی ئەو بەندكراوانەی عەرەبی سوننە دەدران بەوەی ئیعتراف بكەن و بە كار و كردەوەی تیرۆیستی تاوانباریان بكەن و پاشان ئەم دانپێدانانە بە ڤیدیۆ تۆمار دەكران و نەیارە سیاسییەكانی بە تیرۆریست پێ تۆمەتبار دەكرا و لە پرۆسەی سیاسیی دوور دەخرانەوە.
نوری مالیكی تارادەیەكی زۆر لەناو شاری بەغدا بەم سیناریۆیەی سەركەوت، بۆیە دوای بەغدا و سنورداركردنی دەسەڵاتی عەرەبی سوننە لە پرۆسەی سیاسیدا، هەوڵیدا ئەمجارەیان بەناوی دروستكردنی فەرماندەیی دیجلە خۆی لەگەڵ كورد تاقی بكاتەوە، بەڵام ئەمەی بۆ نەچووە سەر و هێزی پێشمەرگەی كوردستان زوو سنوری بۆدانا.
بەڵام پرسیار ئەوەیە ئایا نوری مالیكی وازی لەو خەیاڵ پڵاوییە هێناوە بەوەی ناتوانێت ئەوەی 1973 لە ڤێتنام روویدا، ئەو لە 2014 ئەمەی لە عێراقدا بۆ دووبارە نابێتەوە؟ لەوەڵامی ئەم پرسیارەدا رەفتارەكانی نوری مالیكی پێمان دەڵێت: فەرامۆشكردنی عێراق لە سیاسەتی ئەمریكادا وایكردووە هێشتا لە خەیاڵی مالیكدا ئەم شەڕە بەردەوام بێت و دەیەوێت بەهەر نرخێك بێت، سیناریۆكەی بەرامبەر كورد سەركەوتنێك بەدەست بهێنێت هەر وەك چۆن بەرامبەر عەرەبی سوننە سەركەوتنی بەدەست هێنا.
لەوانەیە هەندێك هەبن ئەم بەراوردكردنەی نێوان كشانەوەی 1973ی ئەمریكا لە باشووری ڤێتنام لەگەڵ كشانەوەی 2011ی ئەمریكا بەوجۆرە سەیر بكەن، كە كارێكی شیاو نییە ئەم دوو حاڵەتە بە یەكتری بەراورد بكرێت، بەڵام ئەو رووداوانەی لەسەر ئەرزی واقیعی پرۆسەی سیاسیی عێراق روودەدەن و هەڵوێستی ئەمریكا وەك بینەرێك بەرامبەریان، ئەو راستیە دەردەخەن كە ئیدارەی ئۆباما بە هاوشێوەی كشانەوە لە ڤێتنام مامەڵە لەگەڵ عێراق دەكات، وەك ئەوەی چۆن ڤێتنام چووە دەرەوەی میحوەری سیاسەتی ئەمریكا لە دوای 1973، بە هەمان شێوە ئیدارەی ئۆباماش ئێستا بە شێوەیەك لە شێوەكان عێراق لەدەرەوەی میحوەری سیاسەتی خۆی سەیر دەكات.
دوای كشانەوەی ئەمریكا
عێراق كەوتۆتە بەردەم شەش بژاردەی خراپ
پرۆفیسۆر دانیال بایمەن گەورە تۆژەری ئەمریكی لە ساڵی 2005 توێژینەوەیەكی بڵاوكردەوە بەناونیشانی (پێنج بژاردەی خراپ بۆ عیراق. Five Bad Options for Iraq)، بەپێیی بۆچوونی بایمەن ئەو پێنج بژاردە خراپە بریتی بوون لە:
1. مانەوە لەسەر هەمان رێچكەو ئاراستەی سیاسیی و ئاستی ئەو هێزانەی لەعێراق بوونیان هەیە.
2. فراونكردنێكی دراماتیكی هێزەكانی ئەمریكا لەگەڵ بوونی هاوپەیمانەكانی.
3. فراوانكردنی كەم، لەگەڵ وەرچەرخانێكی گەورە لەشەڕی یاخیبوواندا.
4. دانانی بەرنامە بۆ مانەوەی هێزێكی كەم، بەڵام ئەو هێزە ئەركەكانی سنوردار بێت.
5. كشانەوەی تەواو لە عێراقدا.
پرۆفیسۆر دانیاڵ بایمەن لەم توێژینەوەیەدا هۆشداری ئەوەی پێشوەختە داوە، پەنابردن بۆ هەریەكێك لەم پێنج بژاردانە پێویستی بە ستراتیژیەت و دووربینیەكی لەرادەبەدەر هەیە، لەبەر ئەوەی هەریەك لەم بژاردانە، بژاردەی خراپن و دەبێت هەوڵبدرێت زیرەكانە جڵەوگیری لایەنە خراپەكانیان بكرێت.
ئەگەر سەرنجی ساڵانی 2005- 2009ی ئیدارەی بوش بدەین، هەست دەكەین لەگەڵ چوار بژاردەی یەكەم زۆر زیرەكانە مامەڵەی كرد، هەر بۆ نموونە:
* لە ساڵی 2005-2006 لەسەر هەمان سیاسەت و ئاستی هێزەكانی كە لەعێراقدا هەیبوو، بەردەوام بوو.
* لە ساڵی 2007 لەچوارچێوەی پرۆسەی زیادكردنی بەپەلەی هێز، هێزەكانی بەشێوەیەكی دراماتیكی زیادكرد.
* دوای سەركەوتنی لە پرۆسەكە، هێزەكانی لەناو شارەكان كەمكردەوە و ئەركی هێزەكانی ئەمریكای سنوردار كرد.
* وەرچەرخانی لەشێوازی رووبەڕووبوونەوەی یاخیبووان دورستكرد، كە ئەویش دامەزراندنی هێزەكانی سەحوە بوو.
بەڵام بە هاتنی ئۆباما بۆ كۆشكی سپی، تێڕوانینی ئیدارەی ئۆباما بۆ عێراق گۆڕانكارییەكی ریشەیی بەسەرداهات، ئیدارەی ئۆباما دەستبەرداری چوار بژاردە خراپەكەی یەكەمی بوو، پەنای بۆ هەرە خراپترین بژاردە برد كە ئەویش كشانەوەی هێزەكانی بوو لە عێراق.
ئەم هەڵبژاردنەی ئیدارەی ئۆباما بۆ هەرە خراپترین بژاردە كە پێنج ساڵ لەوەو پێش مەزندەی بۆ كرابوو، بژاردەیەكی دیكەی خراپی لەبەردەم عێراق دروست كرد، كە ئەویش دروستبوونەوەی دیكتاتۆریەت بوو كە دوای كشانەوەی هێزەكانی ئەمریكا بەتەواوەتی سەرەتاكانی لە عێراقدا دەركەتووە و ئێستاش ئەو حاڵەتە گەیشتۆتە ئەوەی هەموو پێكهاتە سیاسییەكانی عێراقی پەرت كردووە بە پێكهاتەی سەرەكی شیعەشەوە.
دەوڵەتێكی داڕماو لەبەردەم
بژاردەی خراپی دیكتاتۆریەتدا
ئەگەر ئەو پرسیارە لەخۆمان بكەین بەوەی بۆچی لە توێژینەوەكەی بایمەن ئاماژە بە بژاردەی شەشەم نەكراوە كە سەرهەڵدانەوەی دیكتاتۆریەت و تاكڕەوییە؟ ئایا ئەمە بۆ ئەوە دەگەڕێتەوە كە ئەوكات مەزندەی ئەوە نەكراوە دیكتاتۆریەت لە عێراقدا سەرهەڵبداتەوە؟ تاكڕەوی مالیكی لە حكومڕانی كارێكی لەناكاوو لەپڕ بووە و بیرمەندان و سیاسەت داڕێژەرانی ئەمریكا حسابیان بۆ نەكردووە؟
لەوانەیە وەڵامدانەوەی ئەم پرسیارە پێویستی بە ئاراستەكردنی پرسیارێكی دیكە بێت، بەوی ئەگەر ئەمریكا بۆ رووخاندنی دیكتاتۆریەتی بەعس و سەدام حوسێن لەژێر چەتری نێودەوڵەتی هاتبێتە دەرەوە و ئەو هەموو خەرجی و قوربانییەی دابێت بۆ ئەوەی لە عێراقدا دیكتاتۆریەت نەمێنێت، پرسیارەكە ئەوەیە مەزندەكردن بۆ دروستبوونەوەی دیكتاتۆریەتێكی دیكە چ مانایەك بە سیاسەتی ئەمریكا دەبەخشێت؟ یان ئایا ئەمریكا كە ئەو هەموو قوربانییەی داوە بۆ رزگاركردنی عێراق، ئایا مانای رزگاركردن لە فەرهەنگی سیاسیی ئەمریكادا گۆڕینی دیكتاتۆرێكی سوننی مەزهەبە بۆ دیكتاتۆرێكی شیعە مەزهەب؟
ئەم پرسیارانە كە هەر یەكەیان لەبری وەڵامدانەوە چەندین پرسیاری دیكەی بەدوای خۆیدا دەهێنن، نەك ئێمەی سەرسام كردووە، بەڵكو ناوەندەكانی توێژینەوەشی لەسەر ئاستی جیهان سەرسامكردووە، لەمەش زیاتر بۆ ئەوەی رای گشتی ئەمریكا لە بەهەدەردانی زیاتر لە 6 ترلیۆن دۆلار و دەیان هەزار سەرباز لە كوژراو بریندار ئاگادار نەبێت، لەدوای 2011ـەوە تەعتیمێكی ئیعلامی خراوەتە سەر بارودۆخی عێراق لەنێو میدیاكانی ئەمریكا بۆ ئەوەی رای گشتی لەو بەهەدەردانە گەورەیە ئاگادار نەبێت.
بەڵام پرسیاری گرنگتر لێرەدا ئەوەیە ئەگەر ئەم بەهەدەردانە لەرای گشتی ئەمریكا شاردرایەوە و ئەگەر دیكتاتۆریەت عێراقی بەرەو لێكترزان و لەبەریەكهەڵوەشان برد، كە پریشكەكانی لەوانەیە ناوچەكە بەتەواوەتی بگرێتەوە، ئایا ئەوكاتە چۆن ئەم حاڵەتە دەشاردرێتەوە؟
وەڵامی ئەم پرسیارە پێش ئەوەی عێراقیەكان بیدەنەوە، دەبێت ئیدارەی ئەمریكا بیداتەوە، لەبەر ئەوەی كشانەوەی هێزەكانی ئەمریكا لە 2011 و فەرامۆشكردنی عێراق لە سیاسەتی ئەمریكادا لەماوەی سێ ساڵی رابردوو ئەو بژاردە خراپ و تاڵەی دروستكردووە، عێراق وەك دەوڵەتێكی داڕماو پێناسە بكرێت، دەوڵەتی داڕماویش كە دوایین و خراپترین حاڵەتی دەوڵەتی فاشیلە، مەترسییەكانی سنوری دەوڵەت دەبەزێنێت و ئاسایشی ئیقلیمی و جیهانیش دەخاتە مەترسییەوە.
هەتا ئێستاش عێراق كلیلی
سیاسەتی ئەمریكایە لەناوچەكە
دەوڵەتان زۆرن كە دەگەنە لێواری هەڵدێر و داڕمان و كۆتاییشیان نایەت، بەڵام گرنگ ئەوەیە رزگاركردنی دەوڵەت لە حاڵەتی داڕمانەوە، گواستنەوە نەبێت بۆ حاڵەتی دەوڵەتی لاواز و لەرزۆك، بەڵكو بەپێی نەخشەی رێگەیەك بێت، كە دەوڵەتەكە قۆناخی شكست تێپەڕێنێت و هەنگاو بەرەو دەوڵەتێكی بەهێز هەڵبگرێت.
بۆ ئێستای عێراق كە قۆناخی دوای هەڵبژاردنەكان و دەسپێكی دانوستاندنە لەنێوان پێكهاتەكانی عێراقدا بۆ پێكهێنانی حكومەتێكی نوێ، ئاكامی هەڵبژاردنەكان ئەوەیان دەرخستووە كە نوری مالیكی و لیستەكەی و ئەوانەشی بەرێگەی جیاواز بوونە هاوپەیمانی كەمینەن و لەبەرامبەردا زۆرینەیەك كە مەزندە دەكرێت نزیكەی 200 كورسی پەرلەمانی لە هاوپەیمانیەكدا كۆبكەنەوە بوونیان هەیە، هەروەها دەستوورێكیش بوونی هەیە كە نەخشەی رێگەی ئەو دەستوورە عێراق لەسەر بنەمای دەوڵەتێكی فیدرالی و فرەیی و دیموكراتی و پەرلەمانی بونیاد دەنێتەوە، كەواتە ئەگەر هاوكاری عێراقیەكان بكرێت، رزگاركردنی عێراق زۆر قورس نییە. بەڵام گرنگ ئەوەیە ئەم هەنگاوە بۆ رزگاركردنی عێراق بێت لە قۆناخی دەوڵەتێكی فاشیل و هەنگاو هەڵگرتن بێت بەرەو دەوڵەتێكی بەهێز، دەوڵەتی بەهێزیش بە مانا كلاسیكیەكەی سەدەی بیست نا، بەڵكو بە مانا تازەكەی دەوڵەتی هاوچەرخ لەسەدەی بیست و یەك، ئەمەش مانای دەوڵەتی بەهێز ئەوەیە كە ئەو دەوڵەتە بتوانێت رێز لە پێكهاتەی فرەیی نەتەوەیی و ئایینی هاووڵاتیانی بگرێت و توانای ئەوەی هەبێت ئاسایش و سەقامگیری دابین بكات و خزمەتگوزارییە سەرەكیەكان دابین بكات.
ئەم تێگەیشتنە بەم ئاراستەیە بۆ رزگاركردنی عێراق لە حاڵەتی دەوڵەتی داڕماو، ئەوەمان بەراشكاوی بۆ دەخاتەڕوو، كێشەی ئێستای عێراق ئەوە نییە كە هەڕەشە لەسەر یەكپارچەیی عێراق هەبێت، بەڵكو كێشەی سەرەكی ئەوەیە هەڕەشە لەسەر دەستوورەكەی عێراق هەیە و نوری مالیكی سەرۆك وەزیرانی عێراق ئەو دەستوورە پێشێل دەكات كە یەكپارچەیی عێراق مسۆگەر دەكات.
لەم چوارچێوەیەدا لەبری ئەوەی باسی دەرەنجام بكرێت كە ناویان لێناوە هەڵوەشانەوەی عێراق، باشترە باس لە چۆنیەتی جێبەجێكردنی دەستوورەكەی بكرێت كە رێگە لە هەڵوەشانەوەی عێراق دەگرێت، بۆیە قسەكردن لەسەر مانەوە و نەمانەوەی عێراق بەندە بەوەی تاچەند ئەو دەستوورەی عێراقیەكان دەنگیان بۆداوە لەلایەن هەموو پێكهاتەكانەوە رێزی لێدەگیرێت و وەك خۆی جێبەجێ دەكرێت، هەروەها تاچەند ئەو دەوڵەتانەی كە مەبەستیانە عێراق بە یەكپارچەیی بمێنێتەوە، هەوڵدەدەن هاوكاری عێراقیەكان بن بۆ ئەوەی دەستوورەكە جێبەجێ بكەن.
بەهەردوو بارەكەدا، ئەمریكا هاوكاری عێراقیەكان بێت بۆ ئەوەی دەستووری عێراق جێبەجێ بكرێت، یان وەك دووسێ ساڵی رابردوو بارودۆخەكە فەرامۆش بكات و رێگە بۆ دروستبوونەوەی دیكتاتۆریەت خۆش بكات، ئەوا هەتا ئێستاش ئاكامی عێراق دەبێتە ئەو كلیلەی كە ئاراستەی سیاسەتی ئەمریكا لە رۆژهەڵاتی ناوەڕاست دیاری دەكات، هەر بۆ نموونە ئەگەر هەڵوەستەیەك لەسەر هەردوو حاڵەتەكە بكەین و وەك گریمانە راڤەیان بكەین:
1. گریمان ئەمریكا هاوكاری عێراقیەكانی كرد بۆ جێبەجێكردنی دەستوور.
ئەگەر ئەمریكا هاوكاری عێراقیەكان بێت بۆ جێبەجێكردنی دەستوور، ئەوا ئەمریكا دەبێتە خاوەنی نموونەیەكی دەوڵەتی لێكدراو (دولە المركبە) لەناو نەخشەكەی سایكس پیكۆ، ئەوجا لەبەر ئەوەی لەناو نەخشەی سایكس پیكۆدا نەتەوەكان پێكەوە لكێنراون بەبێ ئەوەی حسابی ناسنامە و مافی چارەنووس كرابێت، ئەوا بەبوونی عێراق بەدەوڵەتێكی فیدرالی، واتە بەچەند هەرێمێكی فیدرالی خاوەنی ئیدارەیەكی نیمچە سەربەخۆی دەسەڵات فراوان و حكومەتێكی فیدرالی دەسەڵات سنوردار، ئەوا ئەمریكا كلیلێكی دەكەوێتە دەست كە كێشەی سوریا و تەنانەت چەند وڵاتێكی دیكەش دەتوانێت چارەسەر بكات و لەو مەترسیە دوور دەكەوێتەوە كە شەڕ و توندوتیژی سنورەكان لەبەریەك هەڵبووەشێنێت.
لەلایەكی دیكە ئەگەر ئەمریكا هاوكاری عێراقیەكان بێت بۆ ئەوەی دەستوور جێبەجێ بكرێت، ئەوا وەك ساڵی 2007 و 2008 عێراقیەكان بە تایبەتی عەرەبی سوننەی عێراق هاوكار دەبن بۆ نەهێشتنی تیرۆریستان لە عێراق، بەمەش زۆنێكی گەورەی تیرۆریستان كە ئێستا ناوەڕاستی عێراقەو ئێستا تیرۆریستان توانایان گەیشتۆتە ئەو ئاستەی شارەكانی عێراق داگیر بكەن، ئەوا ئەو زۆنە پاكدەكرێتەوە، بەمەش سەركەوتنێكی گەورە لە شەڕی دژە تیرۆر بەدەست دەهێنێت و دەبێتە سەرەتایەك بۆ سەركەوتنی شەڕی دژە تیرۆر لە رۆژهەڵاتی ناوەڕاستدا.
2. گریمان ئەمریكا لەسەر لایەنی فەرامۆشكردنی عێراق بەردەوام بێت و زەمینەی زیاتر خۆش بكات بۆ پێشێلكردنی دەستوور.
ئەگەر ئەمریكا لەسەر ئەم سیاسەتەی بەردەوام بێت، ئەوا بارودۆخی ئێستای سامەڕا، بەغدا، دیالە، فەلوجە، ئەنبار، موسڵ وەك خۆی بەردەوام دەبێت و رۆژ لەدوای رۆژ بەرەو خراپتر دەچێت، هۆكاری سادە بۆ مەزندەكردنی ئەوەی بارودۆخەكە بەرەو خراپتر دەچێت، ئەوەیە كە شێوازی شەڕی تیرۆریستان لە ئێستادا بۆ كۆنترۆڵكردنی ناوچەیەك یان بەشێكی دیاریكراو نییە لە عێراقدا، بەڵكو شێوازێكی هەڵكوتانە سەر و پاشەكشەكردنە، بۆ ئەوەی لەبەشێكی فراوانی عێراقدا ترس و تۆقاندن دروست بێت و ژیانی تێدا نەمێنێت.
ئەوجا لەبەر ئەوەشی پێكهاتەی عەرەبی سوننە لەلایەن حكومەتی ئێستای عێراقەوە پەراوێزخراون و خواست و داواكارییەكان لە چوارچێوەی شەڕی دژە تیرۆردا مامەڵەی لەگەڵ دەكرێت، ئەوا ئەگەر هاریكاری تیرۆرستانی (داعش)یش نەكەن، ئەوا هاوكاری حكومەتی عێراق ناكەن لە هێرشەكانی بۆ سەر (داعش) لەم حاڵەتەشدا زەمینەیەك دروست دەبێت بۆ ئەوەی بازنەی توندوتیژی لە ناوەڕاستی عێراقەوە درێژ بێتەوە تا لوبنان، ئەم توندوتیژییەش وادەكات، عێراق و سوریا پێكەوە لەبەریەك هەڵوەشێن، كە ئەمەش روویدا لە كۆنترۆڵی ئەمریكا دەردەچێت.
هەرێمی كوردستان
لە ناو عێراقێكی داڕماودا
هەرێمی كوردستانی عێراق لە چوارچێوەی بڕیاری 688ی ئەنجوومەنی ئاسایشی نێودەوڵەتی بەشێك نەبووە لە عێراقێكی دیكتاتۆری و كۆمەڵگەی نێودەوڵەتی بەپێی بڕیاری ئەنجوومەنی ئاسایشی نێودەوڵەتی ئەو مافەی پێبەخشیوە، ئەمەش وەك رێزگرتن لە كۆڕەوە مێژووییەكەی بەهاری 1991 كە خۆی لە خۆیدا ریفراندۆمێك بوو بۆ هەڵبژاردنی مەرگ، یان جیابوونەوە لە دیكتاتۆریەت.
بەدرێژایی ساڵانی 1991-2003 كۆمەڵگەی نێودەوڵەتی و نەتەوەیەكگرتووەكان رێزیان لەم تایبەتمەندیەی هەرێمی كوردستان گرتووە، تەنانەت دوای دەرچوونی بڕیاری 986ی ئەنجوومەنی ئاسایش كە بە بڕیاری (نەوت بەرامبەر خۆراك) ناسراوە، بەشە داهاتی كوردستان بەرێژەی 13% جیاكرابۆەوە و راستەوخۆ لەلایەن نەتەوە یەكگرتووەكانەوە بۆ كوردستان خەرجدەكرا.
كەواتە پرسی كورد و جیابوونەوە لە دیكتاتۆریەت نزیكەی چارەكە سەدەیەكە بە بڕیاری 688ی ئەنجوومەنی ئاسایش ئەو مافە بەكورد دراوە كە لەژێر دەستی دیكتاتۆریەت نەژی و بڕیاری جیابوونەوە بدات و ئەركی كۆمەڵگەی نێودەوڵەتیشە ئەو بڕیارە و جیابوونەوەی كورد لە دیكتاتۆریەت بپارێزێت.
بۆیە عێراقی ژێر دەسەڵاتی دیكتاتۆریەت لە ساڵی 2003 ئەو بەشەی عێراق بووە كە كوردستان هاوپەیمانی هاوپەیمانان بووە بۆ رزگاركردنی لە دیكتاتۆریەت، پاش ئەوەی عێراق لە دیكتاتۆریەت ئازاد كراوە، لە چوارچێوەی دەستوورێكی تازەدا، هەرێمی كوردستان بڕیاریداوە ببێتەوە بەبەشێك لە عێراق، بەڵام ئەم بوونەوە بەبەشێك مەرجدارە بە جێبەجێكردنی ئەو دەستوورەی دوای بڕیاری 688 و 986ی ئەنجوومەنی ئاسایش بۆتە گرێبەستی مانەوەی هەرێمی كوردستان لەگەڵ عێراقدا.
ئەم حاڵەتە بۆتە ئەمری واقیع لەسەر ئاستی ناوچەكە و ئەوروپا و جیهانیش، هەربۆیە هەموو جیهان لە چوارچێوەی دەستووری عێراق كە گرێبەستێكە بۆ مانەوەی كوردستان لە عێراق مامەڵە لەگەڵ هەرێمی كوردستان دەكەن و دەوڵەتان كونسوڵگەری خۆیان لە هەولێر دەكەنەوە.
بۆیە ئەگەر هەر كەسێك حكومڕان بێت لە بەغدا، ئەوجا مالیكی بێت یان هەر كەسێكی دیكە، دەبێت ئەوە باش بزانێت، لەدوای ساڵی 1991ـەوە كێشەی كورد بەگشتی و كیانی هەرێمی كوردستان بەشێوەیەكی تایبەتی شەرعیەتێكی نێودەوڵەتی هەیە و مەرجدارە بە شێواز و جۆری حكومڕانی لە بەغدا، ئەگەر بەغدا حكومڕانیەكی دەستووری پیادە بكات و بەپێی دەستوور مامەڵە لەگەڵ هەرێمی كوردستان بكات، ئەوا كوردستان ئارەزوومەندانە بەشێك دەبێت لە عێراق، خۆ ئەگەر حكومڕانانی بەغدا ئەو مافە پێشێل بكەن، ئەوا ناتوانن لە حەمرین ببپەڕنەوە و ئەركی كۆمەڵگەی نێودەوڵەتیشە ریز لەو شەرعیەتە بگرن كە بەدوو بڕیاری ئەنجوومەنی ئاسایش بە هەرێمی كوردستانیان داوە.
بۆیە لە كاتێكدا سیاسەتی تاكڕەوی و دیكتاتۆری ئێستای حكومڕانانی عێراق، عێراقیان وەك دەوڵەتێكی داڕماو خستۆتە ناو تونێلێكی تاریكەوە، ئەوا هەقە ئەو راستیە ببینین كە هەرێمی كوردستان لەدەرەوەی ئەو تونێلە تاریكەیەو، هەرێمی كوردستان بەخۆیی و ئاڵای كوردستانەوە لە كۆشكی ئەلیزی و تین داون ستریت هاوشانی ئاڵای بەریتانیا و فەرەنسا دادەنرێت، راستە ئێستا لەگەڵ ئاڵای كوردستان ئاڵای عێراقیش دادەنرێت، بەڵام ئەگەر عێراق بەتەواوەتی بووە دیكتاتۆریەت، ئەوا ئاڵای عێراق لادەبرێت و بەتەنیا ئاڵای كوردستان هاوشانی ئاڵای دەوڵەتانی دیموكراتی دەشەكێتەوە.
16/06/2014
سەرچاوە گوڵـان میدیا
نیوەڕۆی ئەمرۆ د . بەرهەم ساڵح بە هاورێیەتی هەڤال د. ئەرسەلان باییز سەردانی شاری كەركوكی كرد
لە سەرەتای سەردانەكەدا سەردانی مەڵبەندی رێكخستنی دووی كەركوكی كرد و بەئامادە بونی هەڤاڵان رزگار عەلی و ئاسۆ مامەند و ژمارەیك لە بەرپرسان و هەڤاڵانی یەكێتی لە كەركوك كۆبونەوە.
پاشانیش سەردانی پاریزگای كەركوكی كردو لە لایەن د. نەجمەدی كەریم پارێزگاری كەركوك پێشوازی لێكرا.
د. بەرهەم رایگەیاند، ناوچەكە رووبەڕووی هەژانی گەورە و بنەڕەتی دەڕوات بۆیە ئەركی سەرەكیمان پاراستنی كوردستانە لەم ساتە مێژویەدا لە كەركوك هێزی پیشمەرگەو ئاسایش و گشت لایەنە سیاسەكان دەبێت هەماهەنگ و هاوكار بین بۆ پاراستنی ئاسایشی ناوچەكە و پارێزگاریكردن لە سەرو ماڵی هاولاتیان و دام ودەزگا گشتیەكان.
راشیگەیاند، ئەمڕۆ شاڵاوی تیرۆر و توند و تیژی زور ناوچەی عیراقی گرتۆتەوە ناكرێت بێباك بین لە جێگیر بوونی توندرەوەكان لە دەروازی وڵاتی خۆمان. بۆیە هەموو پێكهاتەكان عیراق دەبێت هاوكار بین بو روبەروبونەوەی تیرۆر و باش بزانین كە مەترسیە بو سەر هەمووان بێ جیاوازی , لە هەمان كاتیشدا پێوستە زوو بە زوو ئەو كێشە بنەڕەتیانەی عیراق چارەسەر بكرێت كە بوونەتە هۆی تەشەنە كردنی تیرۆر و نا ئارامی و قەیرانی گەورە لە پرۆسەی سیاسی عیراقدا.
لەم قۆناغەشدا لە بەرامبەر ئەركەكاندا , ئەركمان یەكڕیزی خەڵكی كوردستان و پاراستنی كوردستانە بە ناوچە دابڕێنراوەكانەوە بۆیە هەمووان هاوكار ئەبین لەگەڵ سەرجەم پێكهاتەكانی عیراق و ناوچەكە لە رووبەرووبونەوەی نا ئارامی و تیرۆر تیرۆرستان.
دواتریش، لەگەل ژمارەیك لە هۆزە عەرەب و توركمانەكانی كەركوك كۆبووەوە.
لەو كۆبوونەوەیەدا، د. بەرهەم رایگەیاند، ئێمە وەكو كورد لە بەر رۆشنایی هەڵویستی نەگۆڕی جەنابی مام جەلال بە ئەركی خۆمانی دەزانین هاوكاری گشت پێكهاتە رەسەنەكانی شاری كەركوك بین و بیان پارێزین دوور لە هەموو جیاكارییەك ك و دەزگاكانمان لە خزمەتی هەموو هاوڵاتیانی ئەم ناوچەیە دەبێت.
16/06/2014
وه‌زاره‌تی به‌رگری ئه‌مریكا (په‌نتاگۆن) فه‌رمانیدا، كه‌شتیه‌كی هه‌ڵگری فڕۆكه رووبكاته كه‌نداو، به مه‌به‌ستی خۆئاماده‌كرد بۆ بڕیاری
باراك ئۆباما، سه‌رۆكی ویلایه‌ته یه‌كگرتووه‌كانی ئه‌مریكا به وه‌شاندنی گورزی سه‌ربازی له عیراق.
جۆن كیریی، وته‌بێژی په‌نتاگۆن، رایگه‌یاند :" ئه‌مریكا كه‌شتی هه‌ڵگری فڕۆكه (جۆرج بۆش)ی ره‌وانه‌ی كه‌نداو، كرد.
ئه‌و وته‌بێژه، وتیشی :"ئه‌و فه‌رمانه‌ی چاك هیگڵ، وه‌زیری به‌رگری ده‌ریكردووه، نه‌رمی زیاتر ده‌به‌خشێته فه‌رمانده‌ی باڵا ئه‌گه‌ر پێویستی كرد هه‌ڵمه‌تێكی سه‌ربازی له پێناو پاراستنی گیانی ئه‌مریكییه‌كان و هاوڵاتییان و به‌رژه‌وه‌ندییه‌كانی ئه‌مریكا له عیراق، ئه‌نجام بده‌ین.
لای خۆیه‌وه، حه‌سه‌ن روحانی، سه‌رۆكی ئێران، دوێنێ نیگه‌رانی خۆی و سه‌ركرده‌كانی ئێرانی ده‌ربڕی به هاتنی چه‌كدارانی رێكخراوی ده‌وڵه‌تی ئیسلامی له عیراق و شام (داعش) بۆ شاری موسڵ و شاره‌كانی تری عیراق.
له كۆنگره‌یه‌كی رۆژنامه‌وانیشدا، روحانی روونیكرده‌وه، "جیاوازی هه‌یه له نێوان هاوكریكردن و ده‌ستێوه‌ردان". جه‌ختیشیكرده‌وه، ده‌ستێوه‌ردانی هێ.ه‌كانی ئێران، له‌ئارادا نییه، ئه‌و هه‌واڵانه‌شی ره‌تكرده‌وه گوایه هێزه‌كانی له سه‌ر خاكی عیراق بڵاوه پێكردبێت، وتیشی :" ره‌نگه پرس و راوێژمان پێبكرێت بۆ رووبه‌ڕووبوونه‌وه‌ی تیرۆر".
سه‌رۆكی ئێران به‌دووریشی نه‌زانی، له‌گه‌ڵ ئه‌مریكا هاوكاری یه‌كتر بكه‌ن بۆ رووبه‌ڕووبوونه‌وه‌ی "داعش"، به پێكه‌نینیشه‌وه، وتی " چه‌ند رێگایه‌كی فه‌رمی و نا فه‌رمی هه‌یه بۆ په‌یوه‌ندیكردن به لایه‌نی ئه‌مریكییه‌وه".
له عه‌ره‌بییه‌وه: سۆران كه‌ریم
سه‌رچاوه: شه‌رق ئه‌لئه‌وسه‌ت
15/06/2014
فه‌رمانده‌ی هێزه‌كانی پاراستنی سنوری ئێران ئاشكرایكرد، رێوشوێنی پێویست گیراوه‌ته‌به‌ر له‌سه‌ر ناوچه سنوریه‌كانی نێوان ئێران و عیراق و له‌سه‌ر ئاستی پارێزگاكانیش ئه‌نجومه‌نی ئاسایش پێكهێنراوه بۆ به‌رپه‌رچدانه‌وه‌ی ئه‌گه‌ری هه‌ر پالامارێكی داعش.
ئاژانسی هه‌واڵی ئێران له‌زاری عه‌مید حسێن زولفه‌قاری، فه‌رمانده‌ی هێزه‌كانی پاراستنی سنوری ئێران بڵاویكرده‌وه،" رێوشوێنه‌كانی چڕكراونه‌ته‌وه له‌سنوری نێوان ئێران - عیراق"، وتیشی: له‌سه‌ر ئاستی پارێزگاكانیش ئه‌نجومه‌نی ئاسایشی پارێزگاكان پێكهێنراوه بۆ به‌ره‌نگاربوونه‌وه‌ی هه‌ر په‌لامارێكی داعش بۆ سه‌ر ناوچه‌كانی ئێران.
به‌وته‌ی حسێن زولفه‌قار،" هه‌موو رێوشوێنی پێویست گیراوه‌ته‌به‌ر، وه‌ك ئاماده‌كاریی پێشوه‌خت"، وتیشی: ژماره‌یه‌ك هاوڵاتیانی عیراق به‌هۆی بارگرژیی ئه‌منی ناوچه‌كانیان به‌ناچاری روویانكردۆته ناوچه سنوریه‌كانی ئێران، ئێمه‌ش سه‌روو خۆمان له ئه‌گه‌ری زیادبوونی ئه‌و حاڵه‌ته ئاگادار كردۆته‌وه.
حسێن زولفه‌قار، ئه‌وه‌شی وت كه،" به‌ره‌نگاریی هه‌موو هاتوچۆیه‌ك ده‌بنه‌وه بۆ كه‌سانی نایاسایی و ئه‌وانه‌ی گومانده‌كرێت سه‌ربه گروپه توندڕه‌وه‌كان بن، بۆیه هه‌موو رێوشوێنێكی ئه‌منی توندوتۆڵ گیراوه‌ته‌به‌ر بۆ چاودێریی كردنی سنوره‌كانی ئێران".
15/06/2014
ئه‌وه‌ی له عیراق روو ده‌دات مه‌ترسیداره و ره‌نگه ببێته رووداوێكی مێژوویی، به‌ڵام به‌لای هه‌ندێك كه‌سه‌وه شتێكی چاوه‌ڕوان نه‌كراو نه‌بووه و له‌خۆیه‌وه دروست نه‌بووه، چونكه پێشتر شاره‌زایان و پسپۆڕان هۆشدارییان دابوو له‌و پێنچ خاڵه مه‌ترسیداره كه ئه‌وانیش: ده‌وڵه‌تی خه‌لیفه‌كان و هه‌ڵوه‌شاندنه‌وه‌ی سوپای عیراق و په‌شیمانیی ئه‌مریكا و جه‌نگی سوریا و دابه‌شبوونی عیراق.
به‌درێژایی ماوه‌ی رابردوو، شاره‌زایان هۆشدارییان داوه و هاواریان كردووه و پێشبینییان كردووه كه چه‌ند هۆكارێكی مێژوویی و هه‌ندێك هۆكاریش كه بڕٍیاری سیاسییان له‌پشته، ره‌نگه ببنه ئه‌و به‌نزینه‌ی كه ده‌وترێت ده‌كرێت به ئاگردا.
سایتی سی ئێن ئێن بڵاویكرده‌وه: ئه‌مه‌ی خواره‌وه ئه‌و پێنچ هۆشدارییه‌یه كه پێشتر شاره‌زایان زۆریان له‌سه‌ر وتن و كه‌س گوێی پێ نه‌دا:
1- هۆشداریی یه‌كه‌م: هه‌ڵوه‌شاندنه‌وه‌ی سوپای سه‌دام، ده‌بێته‌هۆی بێسه‌روبه‌ره‌یی و نانه‌وه‌ی پشێوی:
هه‌رچه‌نده سوپاكه‌ی سه‌دام وه‌ك ساڵانی پێش 1991 به‌و گه‌وره‌یی به‌هێزییه نه‌مابووه‌وه، به‌ڵام ئه‌و كاته‌ی ئه‌مریكا له ساڵی 2003 هێرشی كرده سه‌ر عیراق، هێشتا ئه‌و سوپایه 430 هه‌زار سه‌ربازی به ئه‌زموونی هه‌بوو كه نزیكه‌ی 400 هه‌زاری دیكه له شێوه‌یه یه‌كه‌ی نیمچه سه‌ربازیدا، پشتیوانیی ده‌كرد.
هۆشداریی زۆر به پۆڵ بریمه‌ر-ی حاكمی مه‌ده‌نیی ئه‌و كاته‌ی عیراق درا كه سوپا هه‌ڵنه‌وه‌شێنێته‌وه، به‌ڵام دواجار بڕیاره له‌سه‌ر هه‌ڵوه‌شاندنه‌وه‌ی ئه‌و سوپایه و هه‌ردوو وه‌زاره‌تی به‌رگری و راگه‌یاندنی رژێمی به‌عس درا و ئه‌مه‌ش وایكرد هه‌زاران كه‌س كاره‌كانیان له‌ده‌ست بده‌ن و چه‌ندین پله‌داری گه‌وه‌ره به په‌لی عه‌قید و به‌ره‌وژوور كه ئه‌زموونی باشیان له شه‌ڕدا هه‌بوو، له حكومه‌تی نوێدا بێ به‌ش بكرێن و بێكار بن، هه‌ر ئه‌مه‌ش وایكرد ئه‌و پله‌دارانه روو له شوێنی دیكه بكه‌ن و به‌دوای كاردا بگه‌ڕێن.
به‌پێی وته‌ی فه‌واز جه‌رجیس، پرۆفیسۆر له په‌یمانگای له‌نده بۆ زانیستی سیاسی و ئابووری، سه‌دان له‌و پله‌دار و ئه‌فسه‌ره به ئه‌زموونانه‌ی سه‌دام، په‌یوه‌ندییان كرد به رێكخراوه توندڕه‌وه‌كانی وه‌ك داعشه‌وه، ئه‌مه‌ش مانای ئه‌وه‌یه كه داعش و ئه‌ندامه‌كانی ئه‌گه‌ر بیانیش بن، زۆر شاره‌زای جوگرافیا و ناوچه‌كانی عیراق بن و ئه‌زموونه‌كه‌یان بۆ ئه‌و رێكخراوه به‌كاربهێنن.
2- هۆشداریی دووه‌م: شه‌ڕی ناوخۆی سوریا، قه‌یران و ئاژاوه له‌ناوچه‌كه‌دا ده‌نێته‌وه:
داعش هه‌ر شه‌ڕ ناكات، به‌ڵكو سه‌ركه‌وتنیش تۆمار ده‌كات، پێشڕه‌وییه‌كانی ئه‌و رێكخراوه‌ش له عیراق و سوریا ئه‌وه ده‌رده‌خه‌ن كه داعش هێزێكی شه‌ڕكه‌ری گورزوه‌شێنه. ئه‌م هێزه‌ی داعش له‌وه سه‌رچاوه‌ی گرت كه سوریا كه‌وته شه‌ڕی ناوخۆوه، به‌وهۆیه‌شه‌وه داعش بواری مه‌شق و راهێنانی بۆ ره‌خسا و سه‌رچاوه‌یه‌كی دارایی باشی ده‌ستكه‌وت.
ره‌مزی ماردینی، توێژه‌ر له سه‌نته‌ری ئه‌نجومه‌نی ئه‌تڵه‌سی له ئوردن له‌وباره‌یه‌وه ده‌ڵێت: "هه‌وڵێكی ئاشكرا هه‌بوو بۆئه‌وه‌ی عیراق و سوریا بكرێته گۆڕه‌پانێكی تایه‌فی، ئه‌جیندای داعش دامه‌زراندنی ده‌وڵه‌تی خه‌لافه‌ته و بۆئه‌وه‌ش چاوی له رووبه‌رێكی فراوان بڕیووه و ده‌یه‌وێت سوریا و عیراق بخاته ناو ده‌وڵه‌ته‌كه‌ی خۆیه‌وه."
ئه‌م قسانه‌ش، ویلیام هیگ، وه‌زیری ده‌ره‌وه‌ی به‌ریتانیا پشتڕاستی كرده‌وه كه وتی: "قه‌یرانی سوریا كاریگه‌ریی له‌سه‌ر وڵاتانی دراوسێی ده‌بێت، به‌تایبه‌ت عیراق، بۆیه ده‌بێت هه‌موو لایه‌ك بگه‌نه جۆره رێككه‌وتنێك سه‌باره‌ت به سوریا ئه‌گه‌ر ئه‌و رێككه‌وتنه هه‌موو ئامانجه‌كانیشی نه‌پێكێت. بۆیه ئه‌مه‌ی ئێستا له عیراق رووده‌دات، ئه‌وه زیندوو ده‌كاته‌وه كه پێویسته له چه‌ند مانگی داهاتوودا چاره‌سه‌رێك بۆ قه‌یرانی سوریا بدۆزرێته‌وه.
3- هۆشداریی سێیه‌م: كێشه‌ی سوننه و شیعه به‌هیچ جۆرێك چاره‌سه‌ر ناكرێت:
به‌وه‌ی ئاماژه‌ی بۆ "پێشكه‌وتنی سیاسی" كرد، ویلیام هیگ، مه‌به‌ستی دابه‌شبوونی تایه‌فی بوو له عیراق كه چووه‌ته ناو كرۆكی چینی سیاسییه‌وه، ئه‌و چینه‌ی كه نوری مالیكی سه‌رۆك وه‌زیرانی شیعه مه‌زهه‌ب سه‌رۆكایه‌تیی ده‌كات و تیایدا سوننه‌كان په‌راوێز خراون.
وه‌ك جه‌یمس جێفری، باڵیۆزی پێشووی ئه‌مریكا له عیراق ده‌ڵێت: " سوننه‌كان مێژوویان له عیراقی نوێدا هه‌یه به‌تایبه‌ت له سوپادا، زۆربه‌ی جه‌نڕاڵه‌كانی سوپا له پێكهاته‌ی سوننه بوون، كه‌چی ئێستا هیچ هه‌وڵێك نادرێت بۆ هێنانی سوننه‌كان بۆ ناو حكومه‌ت."
دووباره فه‌واز جه‌رجیس، پرۆفیسۆر له په‌یمانگای له‌نده بۆ زانیستی سیاسی و ئابووری، داعش ململانێی نێوان سوننه و شیعه‌ی قۆستووه‌ته‌وه و زیاتر به‌ناوی سوننه‌وه شه‌ڕ ده‌كات، بۆیه ده‌كرێت سوننه‌كان له‌وه تێبگه‌یه‌نرێن كه ئه‌گه‌ر له‌گه‌ڵ حكومه‌تی ناوه‌ندیی به‌غدا بن، داهاتوویان باشتر ده‌بێت ئه‌گه‌ر بواری بدرێت، به‌شداریی زیاتر له حكومه‌تدا بكه‌ن.
هه‌رله‌وباره‌یه‌وه جه‌یمس جێفری پێی وایه، مه‌سه‌له‌كه ئه‌وه‌نده ئاسان نییه، سوننه‌كان پێیان خۆش نییه داعش ببێته سه‌ركرده‌یان، له ساڵی 2004 ئه‌زموونێكی تاڵیان بینی، له‌ملاشه‌وه سوننه بێ هیوا بووه له حكومه‌تی به‌غدا و متمانه‌یان پێ نه‌ماوه و پێیان وایه مامه‌ڵه‌كردن له‌گه‌ڵ ئه‌و حكومه‌ته "وه‌هم"ه، هه‌ربۆیه كێشه‌ی نێوان ئه‌و دوو مه‌زهه‌به، ئاسته‌مه چاره‌سه‌ر بكرێت.
4-هۆشداریی چواره‌م: ئه‌مریكا په‌شیمان ده‌بێت له جێهێشتنی عیراق:
سوپای ئه‌مریكا له عیراق كشایه‌وه و هیچ ئاماژه‌یه‌كی بۆ ئه‌وه نییه كه دووباره ئه‌و سوپایه بگڕێته‌وه، مایكڵ هیدن، فه‌رمانده‌ی ده‌زگای هه‌واڵگری له‌سه‌رده‌می جۆرج بوشی كوڕ، له‌كاتی خۆیدا، ره‌خنه‌ی توندی له باراك ئۆباما گرت كه بریاری كشانه‌وه‌ی بۆ سوپاكه‌ی له عیراق ده‌كرد و وتی: "ئه‌و بڕیاره هه‌ڵه‌یه‌كی گه‌وره‌یه و كاریگه‌رییه‌كی كه‌می له‌سه‌ر ناوچه‌كه ده‌بێت."
هه‌ر له‌وباره‌یه‌وه جه‌یمس جێفری پێی وایه مه‌گه‌ر كاتێك ئه‌مریكا بگه‌ڕێته‌وه عیراق كه ئه‌گه‌ر توركیا له‌سه‌ر بنه‌مای هاوسنووری و به‌بیانووی رفاندنی ژماره‌یه‌ك له دیپلۆماتكاره‌كانی له‌لایه‌ن داعشه‌وه، له‌شكركێشی بكاته‌سه‌ر عیراق، یان كاتێك ئێرانی شیعه‌ی هاوپه‌یمانی مالیكی بێته عیراقه‌وه، ئه‌گینا به لێخۆشبوون له هه‌ندێك چه‌كداری سوننه، یان پیكهێنانی حكومه‌تی هاوبه‌ش، كێشه‌كه له ره‌گه‌وه چاره‌سه‌ر ناكرێت، ئه‌مه‌ش ئه‌و هه‌ڵه‌یه بوو كه له‌پای كشانه‌وه‌ی ئه‌مریكا له عیراق كه‌وته‌وه.
5- هۆشداریی پێنجه‌م: دابه‌شبوونی عیراق:
جه‌یمس جێفری ده‌ڵێت: رووداوه‌كانی ئه‌م دواییه دڵخۆشكه‌ر نین، عیراق ناتوانێت یه‌كپارچه‌یی خاكه‌كه‌ی بپارێزێت، ئه‌وه‌تا سوپاكه‌ی هه‌رچی چه‌ك و جبه‌خانه‌ی له موسڵ هه‌یه به‌جێیان هێشت.
ده‌شڵێت: سوپای عیراق ناتوانێت یه‌ك فیشه‌ك بته‌قێنێت و فه‌رمانده‌كانیشیان له به‌غداوه متمانه‌یان پێ ناكه‌ن.
ره‌مزی ماردینی، توێژه‌ر له سه‌نته‌ری ئه‌نجومه‌نی ئه‌تڵه‌سی له ئوردن، پێی وایه حكومه‌تی عیراق نایه‌وێت جگه‌له شیعه، په‌یوه‌ندیی له‌گه‌ڵ هیچ كه‌سێكی دیكه‌ی سوننه‌ی عه‌ره‌ب یان كورد هه‌بێت، هه‌ر ئه‌مه‌ش وایكردووه ئه‌سته‌م بێت به‌ره‌یه‌كی یه‌كگرتوو له دژی داعش پێك بێت.
ئه‌وه‌ی له هه‌مووی زیاتر ترسناكتره، ئه‌وه‌یه كه عیراقییه‌كان ئێستا ئینتیمایان بۆ گروپه چه‌كداره‌كان زیاتره وه‌ك له ده‌وڵه‌ت، ئه‌مه‌ش قسه‌كانی جۆ بایدن، جێگری سه‌رۆكی ئه‌مریكا به‌بیرده‌هێنێته‌وه كه تاكه هۆكار بۆ پاراستنی یه‌كپارچه‌یی خاكی عیراق ئه‌وه‌یه هه‌ر گروپێكی عیراقی به‌پێی ئایین و مه‌زهه‌ب و تایه‌فه‌كه‌ی خۆی، مافی ئه‌وه‌ی پێ بدرێت، خۆی ئیداره‌ی خۆی بكات، به مانایه‌كی دیكه واته عیراق بكرێته چه‌ند هه‌رێمێك و هه‌ریه‌كه و به‌شی خۆی پێ بدرێت.
14/08/2014
سێ پێشمەرگە لە نزیك موسڵ بەهەڵە دەچنە بازگەیەکی چەکدارانی رێكخراوی دەوڵەتی ئیسلامی لە عێراق و شام ناسراو بە "داعش" و دەستبەسەردەکرێن.
رزگار عەباس سمایل، ئەفسەر لە هێزەکانی زێرەڤانی كە ئێستا لە ناوچەی گۆگجەلیلی نزیک شاری موسڵە، بە تۆڕی میدیایی رووداوی راگەیاند "ئەمڕۆ ئاگادارکراینەوە کە 3 پێشمەرگەی لیوای 4 ی هێزەکانی پێشمەرگەی کوردستان بە هەڵە، بە ئۆتۆمبێلی سەربازی و بە چەکەوە رۆیشتوونەتە ناو بازگەیەکی چەکدارانی داعش لە مەعمەلۆن و دەستبەسەرکراون."
سەبارەت بە دۆخی ئەو پێشمەرگانە، ئەو ئەفسەرەی زێرەڤانی گوتی "بە پێی زانیارییەکانی ئێمە زۆریان لێداون، بەڵام زیندوون و ئێستا دەستبەسەرن". ئاماژە بۆ ئەوەش دەكات تاوەکو ئێستا هیچ بڕیارێک نییە بۆ ئازادکردنیان.
15/06/2014
- ژمارەیەک لە چالاکانی سیاسی، مەدەنی و میدیایی کوردستان داوای هەڵوەشاندنەوەی سزای لەسێدارەدانی پەخشان عەزیزی و هەموو زیندانیانی سیاسیی سزادراو بە لەسێدارەدان دەکەن
- ئێران..کۆبوونەوەکەمان لەگەڵ وڵاتانی ئەورووپا ئەرێنی بوو
- مەزڵوم عەبدی و نوێنەری سەرۆک بارزانی کۆدەبنەوە
- ئەمڕۆ شاندی دەمپارتی بۆ گەیاندنی پەیامی ئۆجەلان لەگەڵ ئاکپارتی کۆدەبێتەوە
- خراپترین دراوەکانی جیهان لە ساڵی 2024 دا
- تولای حاتەمئۆگیولاری: دیدار بەس نییە، دەبێت دەرگاکانی ئیمراڵی بکرێنەوە
- کامیان مەترسیدارترن: ئێران یان ئیخوان؟
- ههسهده و چەک؛ هاوکێشە سەختەکە لە بنیاتنانەوەی سوپای سوریادا
- ئیدارەی نوێی سوریە ئەمیرێكی پێشوی بەرەی نووسرەی وەك سەرۆكی دەزگای هەوالگریی سوریە دیاری كڕد
- وەزیری دەرەوەی روسیە دەلێ دەگەل ئیدارەی تازەی سوریە پەیوەندیمان هەیە
- ئیسرائیل فرۆكەخانەی نێودەولەتی سەنعا لە یەمەن بۆمباران كرد
- شاندێكی بالای عێراقی دەگەل ئیدارەی نوێی سوریە دیداری كرد
- دوای روخانی رژیم بەعسی ئەسد، عەلەوییەكان چییان بەسەر دێت
- وەزیری دەرەوەی ئیسرائیل دەلێت: هێرشەكان دژ بە كوردەكان دەبێ بوەستێنرێن
- چیروکی نەبیستراویی ناو زیندانەكانی سوریە
- حشدی شەعبی هەرشە لە توركیەدەكات
- ترامپ دەلێ: لە هیچ لایەك قەبوول ناكەیین جێگرەوەی دۆلار بەرهەم بێنێت
- ناوەرۆكی دیداری نێوان وەزیری دەرەوەی ئێران و بەشار ئەسەد بلاوبووە
- فەرانسە رێگای بەكارهێنانی مووشەكی دورمەودای بە ئوكرایین دا كە لە دژی روسیە بەكاری بێنێت
- جۆزف بۆرێل دەلێ: بیرت لە لێواری دارماندایە
- پیرۆزبایی بزووتنەوەی کۆماریخوازانی ڕۆژهەڵاتی کوردستان بە بۆنەی جێژنی پیرۆزی قوربان
- پەیامی پیرۆزبایی بزووتنەوەی کۆماریخوازانی رۆژهەڵاتی کوردستان بە بۆنەی پێنجەمین کۆنگرەی ئاسایی هەدەپە
- پەیامی پیرۆزبایی بزوتنەوەی کۆماریخوازی ڕۆژهەڵاتی کوردستان بە بۆنەی جێژنی ڕەمەزانی پیرۆزەوە
- راگەیەندراوی بزووتنەوەی کۆماریخوازان بەبۆنەی رۆژی جیهانی کرێکاران
- بزووتنەوی کۆماریخوازان ئیدانەی هێرشەکانی رێژیمی تورکیە بۆ سەر باشووری دەکا
