لە هەڵبژاردنی سەرۆككۆماری توركیا  كە 10/08/2014 بەڕێوەچوو، لە بەشێك لە ناوچە كوردییەكانی باكووری كوردستان، لە جیاتی كارتی دەنگدان بە سێ پاڵێوراوەكە، كارتی "سەربەخۆیی كوردستان" خرابووە سندووقەكانەوە.

لەو هەڵبژاردنەدا، رەجەب تەیب ئەردۆغان، سەرۆک وەزیران و کاندیدی پارتی داد و گەشەپێدان AKP، سەڵاحەدین دەمیرتاش، کاندیدی پارتی دیموکراسی گەلان HDP و ئەکمەلەدین ئیحسانئۆغڵو، کاندیدی هاوبەشی پارتی نەتەوەپەرست MHP و پارتی گەلی کۆماری CHP، خۆیان بەربژێر کردبوو و لە ئەنجامیشدا، ئەردۆغان، بە بەدەستهێنانی ن%52ـی دەنگەکان، بووە 12ـهەمین سەرۆککۆماری تورکیا.

گرووپێك بە ناوی "تاگیر- Tagir" بەشێوەیەكی سەرنجڕاكێش بایكۆتی هەڵبژاردنی سەرۆككۆماریی توركیای كرد، بەجۆرێك كارمەندانی  دەستەی باڵای هەڵبژاردنەکانی توركیا، كاتێك دەستیان بە هەژماركردنی دەنگی نێو سندووقەكان كرد، سەرسامبوون.

یەكێك لەو كارمەندانەی لەسەر سندووقەكانی دەنگدان بوو، بە تۆڕی میدیایی رووداوی راگەیاند، "لە گوندیكێ مەلێ-ی سەر بە جۆلەمێرگ، جزیرە،  سلۆپی، مێردین، وان و ئامەد، زیاتر لە هەزار كارت، کە (كوردستانی سەربەخۆ)ی لەسەر نووسرابوو و ئاڵای كوردستانی بەسەرەوە بوو، خرایە نێو سندووقەکانی دەنگدان.

ئەو كارتەی كە "كوردستانی سەربەخۆ" ی لەسەر نووسراوە، تەنیا بژاردەیەك، كە لەسەر نوسراوە، "بەڵێ"یە. یەكێك لە چالاكانی كاپمینەكە، كە نەیویست ناوی ئاشكرابكرێت رایگەیاند، کە ئەم چالاكییەیان چالاكییەكی سیمبولی بووە، بۆیە چەند كارتێكی سنوورداریان دابەشكردووە.

بە گوتەی ئەو چالاكە، "ئێمە لایەنگیری سەربەخۆیی كوردستانین، لایەنگری یەكپارچەیی نین، بەم هەنگاوەش بە مەبەستەكەمان گەیشتین".

12/08/2014

حكومەتی بەریتانی فڕۆكەی جۆری RAF تۆرنەیدۆی سەربازی بۆ كوردستان دەنێرێت. ئەمەش بەپێی رۆژنامە بەریتانییەكان، نیشانەی فراوانتركردنی چالاكییەكانی بەریتانیایە بۆ یارمەتیدانی كورد لە دژی داعش.

هەرچەندە حكومەتی بەریتانی دەڵێت، ئەم هەنگاوەی زیاتر بۆ ئاسانتركردنی یارمەتیدانی مرۆیی ئاوارەكانی شەڕی داعشە لە ناوچەكانی نزیك باشووری كوردستان، بەڵام ئەم فڕۆكە بەریتانییانە تەنها كاری مرۆیی ئەنجام نادەن.

حكومەتی بەریتانی لە بەیاننامەیەكی فەرمیدا رایگەیاندووە، "ئەم فڕۆكانە لەوانەیە كاری چاودێریش ئەنجامبدەن".

رۆژنامەی گاردیانی بەریتانی نووسیویەتی، "فڕۆكە بەریتانییەكان ئامێری چاودێریکردنی سەربازیان پێیە". 

چەك و هێرشی ئاسمانی بۆ پشتیوانی كورد

فلیپ هەمۆند، وەزیری دەرەوەی بەریتانیا رایگەیاند، كە "بەریتانیا وەكو ئەمریكا هێرشی ئاسمانی لەعێراق ئەنجام نادات"، بەڵام فیلیپ باسی ناردنی چەك بۆ كورد ناكات. 

هەرچەندە سەرچاوەیەكی حكومەتی بەریتانی بەگاردیانی گوتووە "هێشتا بڕیارماننەداوە لەسەر ناردنی چەك"، هەندێ بەرپرسی بەریتانی ئەوەیان نەشاردووەتەوە، كە حكومەتی بەریتانی بە جدی بیر لە ناردنی چەك بۆ هێزەكانی پێشمەرگەی کوردستان دەکاتەوە.

لە هەفتەی رابردوودوەوە  گوشارێكی زۆر دەكرێتە سەر حكومەتی بەریتانی بۆ زیاتر فراوانتركردنی یارمەتییەكانی بۆ كورد و گرووپێكی بەهێزی پشتیوان لە كورد لە بەریتانیا داوا دەكەن، بەریتانیا هێرشی ئاسمانی لە عێراق ئەنجامبدات.

رای گشتی بەریتانی دژی ناردنی سەربازی زیاترن بۆ عێراق

بەریتانیا هاوپەیمانی سەرەكی ئەمریكا بوو لە "پرۆسەی ئازادی عێراق" و نزیكەی 200 سەربازی بەریتانی لە شەڕی عێراق كوژران.

بەپێی چەند راپرسییەك، لە ساڵی 2009وە زۆربەی بەریتانییەكان بڕیاری بەشداریكردن لە شەڕی عێراق بە هەڵە دەزانن و زیاتر لە %27ی هاووڵاتییانی بەریتانیا، تۆنی بلێر، سەرۆك وەزیرانی پێشووی بەریتانیا بە تاوانبار دەزانن و هەندێكیان داوای دادگاییكردنی دەكەن.

حكومەتی بەریتانی لە سێ ساڵی رابردوودا لیژنەیەكی لێكوڵینەوەی تایبەتی داناوە زیاتر بۆ لێكۆڵینەوە لەوەی چۆن بەریتانیا گەیشتە بڕیاری بەشداریكردن لە شەڕی عێراق. 

بەڵام جاك سترۆ و چەند بەرپرسێكی پێشووی حکومەتی بەریتانی دەڵێن، باری ئێستای عێراق یارمەتی زیاتری بەریتانیا دەخوازێت.

بەپێی حكومەتی بەریتانی نزیكەی 500 هاووڵاتی بەریتانی لە ریزەكانی گرووپی چەكدارانی داعشن.

گەڕانەوەی بەریتانییەكانی نێو داعش لەوانەیە ببێتە هەڕەشەیەكی ئەمنی راستەوخۆ بۆ بەریتانیا. چاودێرانی ئەمریكی و چەند بەرپرسێكی وەزارەتی بەگری ئەمریكی چەندین جار باسی هەڕەشەی گەڕانەوەی ئەو چەكدارانەیان كردووە، كە لە بەرەكانی شەڕی سووریا و عێراق دەگەڕێنەوە وڵاتانی خۆیان.

بێجگە لە پاراستنی هاوپەیمانەكانیان لە ناوچەكە، زۆربەی جار پشتگیرانی چارەسەری سەربازی لە ئەمریكا و بەریتانیا، باس لە هەڕەشەی راستەوخۆی داعش دەكەن بۆ سەر وڵاتانی رۆژئاوا.

12/08/2014

هۆشیار زێباری هۆشداری دەدات، کە مالیكی بەرێگای سوپا و هێزە ئەمنییەكان كودەتا بەرپا بكات و دەڵێت، "عێراق رووبەڕووی كارەساتێكی مەزن دەبێتەوە".

هۆشیار زێباری، وەزیری دەرەوەی عێراق، دەڵێت، "ئەگەر مالیكی لەبەرامبەر راسپاردنی حەیدەر عەبادی بۆ سەرۆكایەتی وەزیران، پەنا بباتەبەر كودەتا، عێراق رووبەڕووی كارەساتێكی مەزن دەبێتەوە".

زێباری لە لێدوانێكی رۆژنامەوانیدا، هۆشداریشی داوە لەئەگەری گرتنەبەری رێوشوێنی تووندوتیژی لە رێگای بەكارهێنانی سوپا و هێزە ئەمنییەكانەوە، وەك كاردانەوەیەك بەرامبەر راسپاردنی حەیدەر عەبادی، سەركردە لە حیزبی دەعوە،  لەلایەن فوئاد مەعسوومی سەرۆك كۆمارەوە بۆ پێكهێنانی حكومەت، "ئەو ئەگەرە، كە كودەتایە، كارەساتێكی گەورە دەبێت".

هۆشیار زێباری ئاماژەی بۆ ئەوەشكردووە، "كە نووری مالیكی، سەرۆك وەزیرانی کاربەڕێکەری عێراق، متمانەی نزیكترین هاوپەیمانەكانی خۆیشی لە ناوەوە و دەرەوەی عێراق لەدەستداوە، لەوانە متمانەی ئەمریكا، ئێران، نەتەوە یەكگرتووەكان و مەرجەعیەتی باڵای شیعە".

زێباری رەتیكردەوە سەرۆككۆمار دەستووری پێشێلكردبێت، كاتێك حەیدەر عەبادی راسپاردووە بۆ پێكهێنانی حكومەت، بە ئاماژەكردن بۆ ئەوەی "دەوڵەتی یاسا بە سەرۆكایەتی مالیكی، نەزۆرینەیە و نە زۆرترینە، بەڵكو زۆرینە هاوپەیمانی نیشتمانییە".

زێباری جەخت لەوەشدەكاتەوە، حكومەتی داهاتوو "ئەركی قورس و رێگری گەورە"ی لەبەردەمدایە، هەروەك دەڵێت "ئەگەر مالیكی لەمپەر دروست بكات لەبەردەم ئەوانی دیكە، ئەوا دوور نییە کارەسات رووبدات".

12/08/2014

راگەیاندنە فارسییەكان هەواڵی دەستبەسەرداگرتنی جەلەولا لە لایەن هێزەكانی دەوڵەتی ئیسلامی ناسراو بە داعش ، وەك مەترسی بۆ سەر سنوورەكانی ئێران باسدەكەن و تۆڕی هەواڵی بی بی سی فارسی نووسیویەتی، "چەكدارانی داعش جارێكی دیكە جەلەولایان گرتەوە و بەو شێوەیە لە سنوورەكانی ئێران نزیكبوونەوە، بە جۆرێك كە داعش ئێستا 50 كیلۆمەتر لە مەرزی خوسرەویی ئێران لە پارێزگای كرماشان، دوورە".

هەروەها پێگەی ئەلەكترۆنی ئاژانسی هەواڵی فەرەنسا بە زمانی فارسی، نووسیویەتی، دەوڵەتی ئیسلامی بە گرتنەوەی شاری جەلەولا لە سنوورەكانی ئێران نزیك بووەوە، لە هەواڵەكەدا هاتووە، شاری جەلەولا لە نزیك سنوورەكانی ئێرانە و چەكدارانی دەوڵەتی ئیسلامی بە هۆی بەرەوپێشچوونەكانیان لە پارێزگای دیالە و گرتنەوەی شاری جەلەولا، لە سنوورەكانی ئێران نزیكبوونەوە.

ئەمەش لە كاتێكدایە كە هەندێك لە راگەیاندنەكان باس لە هاوكاری سەربازی و ناردنی چەك دەكەن لە لایەن ئێرانەوە بۆ باشووری كوردستان بە مەبەستی بەكارهێنانیان لە رووبەڕووبوونەوەی چەكدارانی دەوڵەتی ئیسلامی ناسراو بە داعش.

12/08/2014

^{مەسعود بارزانی، سەرۆكی هەرێمی كوردستان لە بڕیارێكیدا بۆ هێزەكانی پێشمەرگە داوای كرد، کە لە بەرەكانی جەنگ دا، جگە لە ئاڵای پیرۆزی كوردستان بۆیان نییە هیچ ئاڵایەكی دیكە هەڵبكەن.}

^{دەقی بڕیارەكە:}

^بڕیار

^{لەپێناو پابەندبوون بە بنەما نیشتیمانییەكان و دیسپلینیی سەربازی و یەكخستنەوەی گشت توانا مەعنەوی و سیاسی و جەماوەرییەكانی خەڵك و لایەنە سیاسییەكانی كوردستان و هەروەها پاڵپشتیكردنی زیاتری هێزەكانی پێشمەرگە لە بەرەكانی ڕووبەڕووبوونەوەدا، بڕیارماندا كە نابێ ئەو هێزانەی لە بەرەكانی جەنگ بەشدارن بە هیچ شێوەیەك جگە لە ئاڵای پیرۆزی كوردستان ئاڵایەكی دیكە هەڵبكەن، ئەگینا ڕووبەڕووی لێپێچینەوەی یاسایی دەبنەوە.}

^{مسعود بارزانی
سەرۆكی هەرێمی كوردستان
11ـی 8ـی 2014}

هیلاری كلینتۆن، وه‌زیری پێشووی ده‌ره‌وه‌ی ئه‌مریكا هێرشی توندی كرده‌سه‌ر باراك ئۆباما-ی سه‌رۆكی وڵاته‌كه‌ی و ساسیه‌ته‌كانی له‌ سوریا به‌ شكستخواردوو وه‌سفكرد.

هیلاری كلنتۆن له‌گه‌ڵ گۆڤاری ئه‌تلانتیك چاوپێكه‌وتنێكی سازكردووه‌ و تیایدا هێرشی توندی كردووه‌ته‌سه‌ر باراك ئۆباما به‌وه‌ی ئه‌و سیاسه‌ته‌ی كۆشكی سپی بۆ كاروباره‌كانی ده‌ره‌وه‌ گرتوویه‌تیه‌به‌ر، سیاسه‌تێكی راسته‌قینه‌ نییه‌، به‌ڵكو واده‌رده‌كه‌وێت كه‌ واشنتۆن له‌ گۆڕه‌پانه‌كه‌ پاشه‌كشه‌ی كردبێت.

وه‌زیره‌ هاوپه‌یمانه‌كه‌ی ئۆباما راشیگه‌یاندووه‌ كه‌ دروشمه‌كه‌ی ئۆباما (هه‌نگاوی شێتانه‌ به‌رامبه‌ر پرسه‌ نێوده‌وڵه‌تییه‌كان نانێین)، ناچێیته‌ چوارچێوه‌ی بنه‌مای سیاسه‌تێكی رێكخراو.

چاودێرانی سیاسیش پێیان وایه‌ كه‌ باراك ئۆباما له‌ ولایه‌تی دووه‌می سه‌رۆكایه‌تییه‌كه‌یدا چه‌ند پرسێكی گرنگی نێوده‌وڵه‌تیی پیشتگوێخستووه‌، وه‌ك توندوتیژی له‌ خۆرهه‌ڵاتی ناوه‌ڕاست و قه‌یرانی نێوان حه‌ماس و ئیسرائیل و ته‌نگژه‌ی نێوان روسیا و ئۆكرانیا.

هیلاری، كه‌ چاوه‌ڕوان ده‌كرێت بۆ هه‌ڵبژاردنی سه‌رۆكایه‌تیی داهاتووی وڵاته‌كه‌ی خۆی كاندید بكات، ئاشكراكردووه‌ كه‌ چه‌ندین جار له‌گه‌ڵ ئۆباما دانیشتووه‌ و ده‌زانێت كه‌ چه‌ند دووربین و ژیره‌ له‌ سیاسه‌تدا، به‌ڵام رایگه‌یاند كه‌ له‌هه‌ندێك دۆسیه‌ی وه‌ك سوریا، سیاسه‌ته‌كانی ئۆباما شكستخواردوو بوون.

11/08/2014

هاوپه‌یمانی نیشتمانی كاندیدی پۆستی سه‌رۆك وه‌زیران دیاریده‌كات, سه‌رۆك كۆماریش كاندیده‌كه‌ی هاوپه‌یمانی نیشتمانی بۆ پێكهێنانی حكومه‌ت ڕاسپارد.

به‌گوێره‌ی هه‌واڵێكی ماڵپه‌ڕی (وای نیوز)، (ئه‌حمه‌د جه‌مال) وته‌بێژی ڕه‌وتی چاكسازی نیشتمانی ڕایگه‌یاندوه‌، له‌كۆبونه‌وه‌ی هاوپه‌یمانی نیشتمانیدا، به‌كۆی ده‌نگی بڕیاردراوه‌ به‌كاندیدكردنی (حه‌یده‌ر عه‌بادی) جێگری یه‌كه‌می سه‌رۆكی ئه‌نجومه‌نی نوێنه‌رانی عێراق، وه‌ك كاندیدی فه‌رمی شیعه‌كان بۆ پۆستی سه‌رۆك وه‌زیرانی نوێی عێراق.

ئاماژه‌ به‌وه‌شدراوه‌، حه‌یده‌ر عه‌بادی توانیویه‌تی (127) ده‌نگی ئه‌ندامانی هاوپه‌یمانی نیشتمانی به‌ده‌ست بهێنێت.

هه‌ر ئه‌مڕۆش (د. فوئاد مه‌عسوم) سه‌رۆك كۆماری عێراق, (حه‌یده‌ر عه‌بادی) بۆ پێكهێنانی حكومه‌تی نوێی عێراق ڕاسپارد.

شه‌وی ڕابردو (نوری مالكی) سه‌رۆكی كاربه‌ڕێكه‌ری حكومه‌تی عێراق له‌وتارێكدا ڕایگه‌یاند، داوای یاسایی له‌دادگای فیدراڵی له‌دژی سه‌رۆك كۆمار تۆمار ده‌كات، به‌تۆمه‌تی پێشێلكردنی ده‌ستور.

11/08/2014

^{_{هەولێر-KDP.INFO-  (سەرۆک بارزانی) لە نامەیەکیدا بۆ سەرۆککۆماری ئێران(حەسەن ڕۆحانی) ڕایدەگەیەنێت، "یارمەتییەكانتان سەلماندی كە كۆماری ئیسلامیی ئێران هەروەكچۆن لە ڕابردوو و لە ڕۆژانی تەنگانەدا دۆست و یارمەتیدەری نزیكی گەلی كوردستان بووە، ئێستایش دۆست و برای گەلی كوردستانە و ئەوەیان مانایەكی زۆری هەیە و جێگەی پێزانیە."}}

^{_{دەقی نامەی سوپاسگوزاریی (سەرۆك بارزانی) كە ئاراستەی سەرۆكی كۆماری ئیسلامیی ئێران كراوە}}

^{_{بسم الله الرحمن الرحیم}}

^{_{بەڕێز جەنابی د. حەسەن روحانی سەرۆكی كۆماری ئیسلامیی ئێران}}

^{_{سڵاوی خواتان لێ بێت..}}

^{_{بە ناوی خۆم و گەلی كوردستانی عێراق سوپاسی ئەو هاوكاری و پشتیوانییە دەكەین كە پێشكەشی هەرێمی كوردستانتان كردووە. یارمەتییەكانتان سەلماندی كە كۆماری ئیسلامیی ئێران هەروەكچۆن لە ڕابردوو و لە ڕۆژانی تەنگانەدا دۆست و یارمەتیدەری نزیكی گەلی كوردستان بووە، ئێستایش دۆست و برای گەلی كوردستانە و ئەوەیان مانایەكی زۆری هەیە و جێگەی پێزانیە.}}

^{_{لەوە دڵنیام كە بوونی پەیوەندیی دۆستانە و یارمەتیدان و هاوكاریكردنی یەكتر زەمینەی تەبایی و برایەتیی نێوان هەر دوو گەلی ئێران و هەرێمی كوردستان خۆشتر دەكات.}}

^{_{ئارەزووی تەندروستی و خۆشیتان بۆ دەخوازم.}}

^{_{مسعود بارزانی}}

^{_{سەرۆكی هەرێمی كوردستان}}

^{_{10ـی ئابی 2014}}

نوری مالیكی سەرۆكی حكومەتی كاربەڕێكەر و سەرۆكی ئیئتیلافی دەوڵەتی یاسا، درەنگانی شەوی رابردوو رایگەیاند كە فوئاد مەعسوم، سەرۆك كۆمار دەداتە دادگا ، بەڵام ئەمریكا یەكسەر هاتە دەنگ و رایگەیاند كە ئەوان پشتیوانی لە سەرۆك كۆمار دەكەن .

مالیكی لەو وتارەدا كە لە رێگەی كەناڵی عێراقییەی حكومییەوە پێشكەشی كرد، باسی تەواوبوونی ماوەی دەستووریی راسپاردنی سەرۆكی حكومەتی نوێی كرد. مالیكی گوتی كە ئەو "لە روانگەی هەستكردن بە بەرپرسیارێتی یاسایی و ئەخلاقی و شەرعی"، سەرۆكایەتی پەرلەمان، سەرۆكایەتی كۆمار و دادگای فیدراڵی " لە بەزاندنی دەستوور لەم كاتە ترسناك و هەستیارەدا كە وڵات پێیدا تێدەپەڕێت" ئاگادار دەكاتەوە.

ئەوەش دوای ئەوە هات كە كۆدەنگییەك دروستبوو لە ئاستی نێوخۆ و دەرەوەی عێراق بۆ دروستكردنەوەی تەوافوق لە عێراقدا كە پێویستە رێگە بە مالیكی نەدرێت بۆ جاری سێیەم ببێتەوە سەرۆك وەزیران ، ئەویش بەهەموو شێوەیەك هەوڵدەدات خۆی ببێتەوە بە سەرۆك وەزیران .
مالیكی هۆشداری دا كە "بارودۆخی ئەمنی خراپتر دەبێت و كارەساتی گەورە روودەدەن و زیانێكی زۆر بە بەرژەوەندیی باڵای گەلی عێراق دەكەوێت".

گوتیشی "ئێمە لەبەردەم رووبەڕووبوونەوەیەكی سەختداین كە ترسناكترە لەهەموو قەیرانەكان و بەرەنگاربوونەوەكانی دیكە كە چەندین ساڵە دووچارمان بوونە".

بەڕای مالیكی "بەڕێز سەرۆك كۆمار دووجار دەستووری پێشێل كردووە، جارێك بە درێژكردنەوەی ماوەی یاسایی راسپاردنی كاندیدی گەورەترین كوتلەی نێو ئەنجوومەنی نوێنەران كە رۆژی پێنجشەممەی رابردوو كۆتایی هات، جاری دووەمیش كاتێك سەرۆك كۆمار سوور دەبێت لەسەر ئەوەی كاندیدی دەوڵەتی یاسا رانەسپێرێت كە گەورەترین كوتلەی ناو ئەنجوومەنی نوێنەرانە بەپێی ئەوەی لەلایەن دادگای فیدراڵییەوە حوكمی لەسەر دراوە".

مالیكی ئەوەشی راگەیاند كە رۆژی دووشەممە (ئەمڕۆ) لە دادگای دەستووری سكاڵا لەسەر د.فوئاد مەعسوم تۆمار دەكات لەبەرامبەر پێشێلكردنی دەستوور لەپێناو حیساباتی سیاسی و پاراستنی بەرژەوەندی گرووپێكی دیاریكراو، لەسەر حیسابی بەرژەوەندی گشتی باڵای گەلی عێراق .

هەروەها داوای لە سەلیم جبووری سەرۆكی پەرلەمانی عێراق كرد لێپرسینەوە لە فوئاد مەعسووم سەرۆك كۆماری عێراق بكات بەهۆی ئەو پێشێلكردنە راشكاوانەی دەستوور.

بەڵام برێت ماك گوێرك ، یاریدەدەری جێگری وەزیری دەرەوەی ئەمریكا بۆ كاروباری عێراق ، هەڵوێستەكەی مالیكی رەتكردەوەو رایگەیاند " ئێمە بە تەواوی پشتیوانی لە هەڵوێستی سەرۆك كۆماری عێراق فوئاد مەعسوم دەكەین، وەك پارێزەری دەستووری عێراق ". هەروەها گوتی " ئێمە پشتیوانی كاندیدێك دەكەین بۆ سەرۆك وەزیران كە كۆدەنگیی نیشتمانیی لەسەر بێت".

مالیكی لە وتارەكەیدا گوتی ئەوەی سەرۆك كۆمار دەیكات "كودەتایە لەسەر دەستوور و پرۆسەی سیاسی" ، بەڵام شرۆڤەكاران ئەو هەڵوێستەی مالیكی بە هەوڵدان بۆ كودەتای سیاسی لێكدەدەنەوە .
 مالیكی بەشێوەیەكی ناڕاستەوخۆ هۆشداریی ئەوەی دا كە رانەسپاردنی خۆی بۆ پێكهێنانی كابینەی تازەی حكومەت " وڵات بەرەو دابەشبوون دەبات و ئەزموونی دیموكراسی لەباردەبات ". بەڵام لە هەمانكاتدا گوتی "ئێمە گەشبینین بەوەی لە شەڕی بەرگریكردن لە دەستوور سەردەكەوین ".

بەپێی زانیارییەكان تووڕەبوونی مالیكی بەهۆی ئەوەیە كە ئەمڕۆ بڕیاربوو حەیدەر عەبادی لە لیستی دەوڵەتی یاسا بكرێتە ئەلتەرناتیڤی ئەو، بۆیە بەو شێوە توندە ئەو خیتابەی دا .

بەپێی ئەو زانیاریانەی دەست (تۆڕی میدیایی رووداو) كەوتوون، دوای وتارەكەی نووری مالیكی ، چەند كەسێك لە لیستی دەوڵەتی یاسا كە مالیكی سەرۆكایەتی دەكات ، پەیوەندییان بە د.فوئاد مەعسوم سەرۆك كۆماری عێراقەوە كردووەو پێیانڕاگەیاندووە كە ئەو وتارەی مالیكی ، گوزارشت لە بۆچوونی خۆی دەكات و دەربڕی بۆچوونی ئێمە نییە .

هەر دوای وتارەكەی مالیكی ، پۆلیس و هێزە ئەمنییەكان بەشێوەیەكی بەربڵاو بەنێو كۆڵانەكانی شاری بەغدادا بڵاوكرانەوە، كە ئەوە وەك راگەیاندنی "باری نائاسایی" لێكدرایەوە . لە هەمانكاتدا هەواڵی ئەوە بڵاوبووەوە كە هێزەكانی مالیكی كۆشكی كۆمارییان گەمارۆ دابێت .

بەڵام سەرچاوەیەك لە نووسینگەی سەرۆك كۆمار ، بە (رووداو)ی راگەیاند كە " بارودۆخی كۆشكی كۆماری ئارامە و هیچ هێزێكی مالیكی كۆشكی كۆماریی گەمارۆ نەداوەو گاردی كۆماریش لە ئامادەییدان بۆ پاراستنی كۆشكی كۆماری"، هەروەها لە درێژەی لێدوانەكەیدا رایگەیاند كە ئەو هەواڵانەی تەلەڤزیۆنە عێراقییەكان بڵاویانكردەوە سەبارەت بە گەمارۆدانی كۆشكی كۆماری لەلایەن گاردی پاراستنی سەرۆك وەزیرانەوە، "دوورن لە راستی".

11/08/2014

وڵاتی ئیسرائیل رازیدەبێت لەسەر درێژكردنەوەی ئاگربەست لەگەڵ چەكدارانی بزووتنەوەی حەماس بۆ ماوەی 72 كاژێر لە كەرتی غەزە.

ئاگربەستە سێ رۆژییەكەی نێوان ئیسرائیل و بزووتنەوەی حەماس لە چەند رۆژی رابردوودا كۆتاییهات، ئەو ئاگربەستەی دوای تێپەڕبوونی یەك مانگ جەنگ درێژترین ماوەبوو كە بووە هۆی ئەوەی ئارامی باڵ بەسەر كەرتی غەزەدا بكێشێت. ئەمڕۆ بۆ جارێكی دیكە ئیسرائیل ئاگربەستێكی دیكەی بۆ ماوەی 72 كاژێر راگەیاند.

ئیسرائیل پێشتر رایگەیاندبوو كە بێ هیچ مەرجێك ئامادەیە ئاگربەستەكە درێژبكاتەوە، بەڵام لە چەند رۆژی رابردوودا حەماس رایایگەیاند كە ئەوان بەم ئاگربەستە رازینین. ئێستا گومان دەكرێت كە لەسەر داواكارییە نێودەوڵەتییەكان حەماسیش لەسەر 72 كاژێری دیكە لە ئاگربەست رازی بووبێت.

ئەو ئاگربەستە 72 كاژێرییەی كە پێشتر راگەیەندرابوو درێژترین ئاگربەست بوو كە لە ماوەی یەك مانگ جەنگی نێوان ئیسرائیل و حەماس درێژەی كێشابێت، كە لەو جەنگەدا بە لایەنی كەم هەزا رو 900  فەڵەستینی و 70 ئیسرائیلی كوژراون.

10/08/2014