به‌ڕێزان ( عوسمان عه‌به پێنجوێنی یان عوسمان قه‌ڵادزه‌یی) و( جه‌واد حه‌یده‌ری) به‌داخه‌وه وتیان به‌ڵێ ڕاسته و كۆچی دوایی كردووه؟
هونه‌رمه‌ند و پێشمه‌رگه ، سروودبێژ و گۆرانیبێژ...
کۆڕەوو شەنگال وتووەو دەیڵێت و بەشداریی کاریگەری لەئاهەنگەکانی سەرفیرازیدا بووەو دەبێت.
مستەفا داداری موکریانی مەهابادی خۆی بەخوێندکاری (مام هێمنی شاعیر ١٩٢١-١٩٨٦) دەزانێ و کاتێک قسە دەکا...
باسمان بۆ بکەن، ئەو ئۆرکێسترەی ئێوە چەنساڵێک ژەنیاری بوون؟ئەو ئۆرکێسترە بە ئۆرکێستری رادیۆ کرماشان ناسراو بوو و لە سەرەتاشەوە سەرپەرەشتییەکەی بەدەستی بەڕێز عەبدولسەمەدیان بوو کە...
بەر دەکەوێت بەڵام لەو لایشەوە هەر بە پاڵپشتی ئەو سامانە دەوڵەمەندە،خۆی دوو هێندە لە نێو ڕووبەری فەرهەنگیی کورددا دەردەخات. هێشتاکەیش کتێبخانەکەی پڕیەتی لە دەیان بەرهەمی...
هاوپەیمانیی نیشتمانیی شیعەکان لەسەر بەرنامەی حکومەتی نوێی عێراق رێککەوتن بۆئەوەی بەرنامەکە بخەنە بەردەستی لایەنەکانی دیکە.
نووسینگەی ئیبراهیم جەعفەری سەرۆکی هاوپەیمانی نیشتمانی ئاشکرایکرد، هاوپەیمانێتییەکەیان لەناوخۆیدا لەسەر بەرنامەی حکومەتی نوێ گەیشتووەتە رێککەوتن و بەرنامەکە بۆ لایەنە سیاسییەکانی دیکە دەخەنەڕوو". داواشی لە کوتلە سیاسییەکان کرد "پەلە بکەن لە پێشکەشکردنی پاڵێوراوانیان بۆ وەرگرتنی پۆستە وەزارییەکان".
نووسینگەی سەرۆکی هاوپەیمانی نیشتمانی، لە راگەیێندراوێکدا ئاماژەی بۆ ئەوە کردووە، "سەرۆکی هاوپەیمانی نیشتمانی لەگەڵ شاندی دانوستاندنی هاوپەیمانی نیشتمانی بۆ پێکهێنانی حکومەت کۆبووەتەوە و ئەنجامی دانوستاندنیان لەگەڵ کوتلەکان گفتوگۆ کردووە". هەروەک ئاشکراکراوە "هاوپەیمانی نیشتمانی، لەناوخۆیدا لەسەر بەرنامەی حکومەتی نوێی عێراق گەیشتووەتە رێککەوتن بۆ ئەوەی بەرنامەکە بخەنە بەردەستی لایەنەکانی دیکە، تاوەکو لەوادەی یاسایی دیاریکراوی خۆیدا بتوانن حکومەت پێکبهێنن، داواش لە کوتلە سیاسییەکان دەکەین پەلە بکەن لە پێشکەشکردنی پاڵێوراوانیان بۆ وەرگرتنی پۆستە وەزارییەکان ".
مەرجەعی باڵای ئایینی، رۆژی هەینی 29ی ئابی 2014 داوایکرد، پەلەبکرێت لە پێکهێنانی حکومەت و خستنە دەنگدانییەوە لەلایەن پەرلەمانەوە، هاوکات جەختی لەوەکردەوە لایەنەکان لە دیاریکردنی پاڵێوراوەکان بۆ وەرگرتنی پۆستە وەزارییەکان وردبن و کەسانی گونجاو دەستنیشان بکەن.
رۆژی 25ی ئەم مانگە حەیدەر عەبادی، دانوستاندنەکانی پێکهێنانی حکومەتی بە ئیجابی باس لێوەکرد و ئاشکراشیکرد، کە پەرۆشی پێکهێنانی حکومەتێکە، کە هەموو لایەنەکان لەخۆ بگرێت.
30/08/2014
رێكخراوی نەتەوەیەكگرتوەكان رایگەیاند ژمارەی ئەو پەنابەرە سووریانەی بەهۆی پێكدادانەكانی نێوان هێزەكانی ئۆپۆزسیۆنی سووریا و رژێمی بەشار ئەسەد هەڵاتوون گەیشتە سێ ملیۆن كەس، دەشڵێت نیوەی دانیشتوانی سووریا ئاوارەن.
ئەنتۆنیۆ گوتێرس، كۆمسیاری باڵای نەتەوەیەكگرتوەكان لە بەیاننامەیەكدا رایگەیاند: "ژمارەی ئەو پەنابەرە سووریانەی بەهۆی پێكدادانەكانی نێوان هێزەكانی ئۆپۆزسیۆن و سوپای سووریا هەڵاتوون و روویان لە وڵاتانی دەوروبەری سووریا كردووە، ئەمڕۆ هەینی 29/8/2014 گەیشتە سێ ملیۆن پەنابەر".
گوتیشی: "بەبەراورد لەگەڵ ساڵی رابردوو ژمارەی پەنابەرەكان یەك ملیۆن زیادیكردوە، سەرەڕای ئاوارەبوونی 6.5 ملیۆن كەس لەنێوخۆی سووریا، هاوكات نیوەی دانیشتوانی ئەو وڵاتە ناچاركراون لە پێناو رزگاركردنی گیانی خۆیان شوێنەكانیان جێبێڵن".
ئەنتۆنیۆ گوتێرس ئاماژەی بەوەشدا كە تەنگژەی سووریا بووەتە گەورەترین حاڵەتی فریاكەوتنی مرۆیی رێكخراوی نەتەوەیەكگرتوەكان، سەرەڕای شكستهێنانی جیهان لە رووی دابینكردنی پێداویستی بۆ پەنابەران و ئەو وڵاتانەی روویان تێكردوە".
دوای تێكچوونی رەوشی ئەمنی و بەرزبوونەوەی ئاستی پێكدادانەكانی نێوان هێزەكانی ئۆپۆزسیۆن و سوپای سووریا، لە مانگی ئازاری ساڵی 2011 دانیشتوانی زۆربەی شارەكانی سووریا هەڵاتن و رووویان لە وڵاتانی دەورروبەركرد، تاوەكو ئێستاش شەپۆلی ئاوارەبوونی دانیشتوانی ئەم وڵاتە بەردەوامە. بەهۆی شەڕی سێ ساڵەی ئەو وڵاتەش تاوەكو ئێستا زیاتر لە 190 هەزار سووری كوژراون، كە هۆكاری هەڵگیرسانەكەی سەركوتكردنی ناڕەزاییەكانی هاووڵاتیان بوو لەلایەن رژێمی بەشار ئەسەد.
29/08/2014
دەزگایەكی تەندروستی چینی دەڵێت 70%ی ئەوانەی ئاڵوودە بوون بە یارییە ئەلیكترۆنییەكانەوە، نیشانەكانیان هاوشێوەن لەگەڵ نیشانەكانی لەناوچوونی هەندێك خانەی مێشك كە پەیوەندییان بە هەڵسوكەوتەوە هەیە.
راپۆرتەكان ئاماژە بەوە دەدەن كە نزیكەی 699 ملیۆن بەكارهێنەری ئینتەرنێت لە چیندا هەن، 100 ملیۆن هاونیشتمانی نیشانەكانی ئاڵوودەبوون بە یارییە ئەلیكترۆنییەكانیان تێدا دەركەوتووە.
باوترین ئەو نیشانانەی لە ئاڵوودەبوواندا دەردەكەوێت، لاوازییانە لە كۆنترۆڵكردنی خۆیان لە هەڵسوكەوتەكانیاندا، بەشێوەیەك یارییە ئەلیكترۆنییەكان هەڵسوكەوتی كۆنترۆڵكردوون.
گەنجانی چین سكاڵای ئەوە دەكەن كە لە ماڵەكانیاندا هەست بە بۆشایی زۆر دەكەن، لەبەر ئەوەی دایك و باوكیان كاتێكی زۆر بە ئیشكردنەوە بەسەردەبەن لە دەرەوە، ئەوەش وایان لێدەكات خوو بە یارییە ئەلیكترۆنییەكانەوە بگرن و روو بكەنە یانەكانی یارییە ئەلیكترۆنییەكان لە ئینتەرنێتدا، ئەو یارییانە زیاتر سەرنجیان رادەكێشێت وەك لە تەماشاكردنی تەلەفزیۆن.
توێژەرانی كۆمەڵایەتی چین هۆشداری دەدەن لە پەرەسەندنی زیاتری ئاڵوودەبوون بە یارییە ئەلیكترۆنییەكان لە جیهاندا، بانگی حكومەتەكانی جیهان دەكەن بۆ هاندانی گەنجان بە خەریكبوونیانەوە بە كاروبارەكانی كۆمەڵگا و پەیوەندییە كۆمەڵایەتی و مرۆییەكان.
29/8/2014
سەرباری هەموو قەیران و كێشەكانی خۆی، حكومەتی باشووری كوردستان رووبەڕووی لێشاوێك لە داواكاریی ئاوارەكان و بیانییەكان بووەتەوە بۆ پەیداكردنی كار. ئێستا جگە لە خەڵكی نێوخۆیی و ئاوارەكان، ژمارەیەكی زۆر لە بەنگلادیشی و ئەسیوپی و نیپالی، داوای كار دەكەن. بەڵام تاوەكو ئێستاش خەڵك خواستی لەسەر كرێكاری بیانییە و نایانەوێت كار بە كرێكاری نێوخۆیی بكەن.
حاجی كەریم، جێگری بەڕێوەبەری كاروكاروباری كۆمەڵایەتی، لیستێكی ناوی داواكاریی ئەو ئاوارە عەرەبانەی لەبەردەم بوو كە ماوەیەكی زۆرە ناویان تۆمار كردووە بۆ كاركردن لە ماڵ و كۆمپانیاكاندا "ئاوارە سوورییەكان زۆریان ناویان لە بەڕێوەبەرایەتیەكەمان تۆمار كردووە، بەڵام تا ئێستا هیچ كەسێك نەهاتووە داوای كاركردن لەو ئاوارانە بكات".
حاجی كەریم پێیوابوو ئاوارەكان پێویستیان بەكاركردنە "بەڵام ئەوەی ئێمە دەیزانین خەڵك حەز ناكات هیچ كام لە ئاوارەكان لە ماڵ یاخود لە كۆمپانیاكانیاندا كار بكەن، هەرچەندە نرخەكەشی كەمتر بێت". حاجی كەریم هەروەها گوتی تاوەكو ئێستا ئاوارەكانی ئێزدی و شەبەك ناوی خۆیان تۆمار نەكردووە.
هەرچەندە كرێكارانی بیانی نرخیان زۆر زیاترە لە كرێكارە نێوخۆییەكان، بەڵام حاجی كەریم دەڵێت "خەڵك گوێ بە نرخ نادەن و بیر لە باشیی ئیشكردن دەكەنەوە".
ناسك محەممەد، فەرمانبەرە و ماوەی 4 ساڵە خزمەتكارێكی نیپاڵی لە ماڵەكەیدا كار دەكات، دەڵێت "دەمێكە ئەم كچە لە ماڵەكەم كار دەكات، هیچ كێشەیەكم لەگەڵی نەبووە، ئیشەكانی زۆر بەجوانی دەكات و منداڵەكەشم بۆ بەخێو دەكات، ئەو كارانەی كرێكارێكی بیانی دەیكات كرێكاری خۆماڵی و ئاوارەكان ناتوانن بیكەن".
ناسك گوتیشی "هەرچەندە كرێكاری بیانی خەرجی زیاترە، بەڵام دەتوانی دڵنیا بیت لەوەی ئەوان كارەكانیان بەجێناهێڵن، چونكە بە گرێبەست كاریان لەگەڵ دەكەین" .
حكومەت بۆخۆی بووە بەژێر باری قەرز و گەمارۆی ئابووریی بەغدا و ئەركی قورسی ژیاندنی ئاوارەكانەوە، كەچی هێشتا 24 كۆمپانیای بەڵێندەرایەتی لە سنووری پارێزگای سلێمانی، بە بەردەوامی كرێكاری بیانی لە وڵاتە هەژارەكانەوە دێننە ئەو پارێزگایە بۆ كاری خزمەتگوزاریی نێو ماڵان و كۆمپانیاكان.
بەپێی ئاماری بەڕێوەبەرایەتی كار و بەكارخستی كۆمەڵایەتی لە سلێمانی، لە 7 مانگی رابردووی ئەمساڵدا 652 كرێكاری بیانی هاتوونەتە سلێمانی كە 113یان لە رەگەزی نێرن و 539 یان لە رەگەزی مێن. هەر لەو ساڵەدا هەزار و 32 كەسی بیانی لە سنووری ئەو پارێزگایە ڤیزای هاتنە ناوەوەیان پێدراوە.
جەزا رەشید، نوێنەری كۆمپانیای نیۆركز بۆ هێنانی كرێكاری بیانی، باس لەوە دەكات كە ئێستا كەمتر كرێكارە بیانیەكان دێنە هەرێمی كوردستان و زۆربەیان دەترسن لەو بارودۆخەی كە ناوچەكانی هەرێمی كوردستانی گرتووەتەوە.
وەك ناوبراو باسیدەكات، هەندێك لەو كرێكارانەی لێرە كارەكانیان تەواوبووە، گەڕاونەتەوە وڵاتەكانی خۆیان یاخود ئەوانەی بۆ پشوو گەڕاونەتەوە، دەڵێن لەبەر ئەوەی ئێستا لە وڵاتی ئێوە شەڕە، ناوێرین بگەڕێینەوە بۆ كوردستان.
جەزا باسی لەوە كرد، هەرچەندە فەرمانبەران گلەیی نەبوونی مووچە دەكەن و باری ئابووریی خەڵك باش نییە، بەهۆی خراپی بارودۆخی ئەمنیشەوە بە گشتی ئیش كەمبووە "بەڵام هێشتا خواست لەسەر كرێكاری بیانی هەیە، چینێكی دەوڵەمەند هەیە كە پارەی زۆرە و دەیەوێت خزمەتكاری هەبێت لە ماڵەوە، یان لە كۆمپانیا و كارگە، بەڵام تا ئێستا كەس داوای كرێكاری خۆماڵی نەكردووە، چونكە هەندێك لە خەڵك بەبیانووی ئەوەی كرێكاری بیانی ئیش باشتر دەكەن و كارەكانیان بەجێناهێڵن، دەیانەوێت كرێكارە بیانییەكان كاریان بۆ بكەن".
29/8/2014
هەرێمی کوردستان و ئەمریکا پێیان وایە داعش مەترسییەكی گەورەیە لەسەر ناوچەكە و جیهان و بەرەنگاربوونەوەیشی هەوڵێكی هەمەلایەنە و نێودەوڵەتی پێویستە. هەردوولایش جەخت لە هەماهەنگیی بەردەوامی هێزەكانی ئەمەریكا و پێشمەرگە لەشەڕی دژی داعش دەکەنەوە.
چوارشەممە 27ی ئاب 2014 مەسعود بارزانی سەرۆكی هەرێمی كوردستان لەگەڵ جەنەڕاڵ لوید ئۆستن فەرماندەی فەرماندەیی ناوەندیی هێزەكانی ئەمەریكا و شاندێكی سەربازیی یاوەری کۆبووەوە.
بە پێی هەواڵێکی ماڵپەڕی سەرۆکایەتی هەرێمی کوردستان جەنەڕاڵ لوید ئۆستن، ڕۆڵی پێشمەرگەی لە بەرەنگاربوونەوە و تێكشكاندنی داعش بەرز نرخاندووە، بارزانیش سوپاسگوزاریی خۆی بۆ سەرۆك و گەلی ئەمەریكا نیشاندا بەهۆی پاڵپشتی و یارمەتیدانی هەرێمی كوردستان و پێزانینشی بۆ ڕۆڵی جەنەڕاڵ لوید ئۆستن هەبوو لە پڕۆسە سەربازییەكانی بەرەنگاربوونەوەی داعش.
هەر لەم كۆبوونەوەیەدا هەردوولا لەسەر ئەوە هاوڕابوون كە داعش مەترسییەكی گەورەیە لەسەر ناوچەكە و جیهان و بەرەنگاربوونەوەیشی هەوڵێكی هەمەلایەنە و نێودەوڵەتی پێویستە. هەروەها هەردوولایش جەختیان لە هەماهەنگیی بەردەوامی هێزەكانی ئەمەریكا و پێشمەرگە لەشەڕی دژی داعش كردووە.
سەبارەت بە پڕۆسەی سیاسیی عێراقیش ئەوە دووپات كراوەتەوە كە پێویستە حكوومەتێكی هەمەلایەن دابمەزرێت كە خزمەتی بەرژەوەندیی هەموو پێكهاتەكانی عێراق بكات.
28/08/2014
مەسعود بارزانی، سەرۆكی هەرێمی كوردستان تیشك دەخاتە سەر سەركەوتنە مەیدانییەكانی پێشمەرگە بەسەر داعشدا و رایدەگەیەنێ ، هێزەكانی پێشمەرگە بە سەركەوتنەكانیان سیحری تیرۆریستانیان بەتاڵكردەوە كە خۆیان بە هێزێك دەزانی كە هەرگیز ناشكێن.
بارزانی جەختیشدەكاتەوە كە هێزەكانی پێشمەرگە لە دۆخی هێرشبردندان و ئاماژەكانی رووخان و تێكشكانی داعش لەسەر دەستی پێشمەرگە بە روونی دەركەوتوون.
28/08/2014
پێشمەرگە رۆژ بە رۆژ پشتیوانی نێودەوڵەتی بۆ دروستدەبێ دژ بە چەكدارانی دەوڵەتی ئیسلامیی ناسراو بە (داعش)، ئەوەش وایكردووە داعش تاكتیكی شەڕكردنی بگۆڕێ بۆ بەرگری.
چەكدارانی داعش بە پێچەوانەی رۆژانی رابردوو گۆڕانكاری لە شێوزای شەڕكردنیان دژی هێزەكانی پێشمەرگە دەكەن، لە قۆناغی ئێستادا زیاتر هێڵەكانی پێشەوەیان پتەوتر دەكەن وەك لەوەی هێرش بكەنە سەر پێشمەرگە.
لە سەردانەكانی تیمی رۆژنامەوانی ئاژانسی ئانادۆڵ بۆ سەنگەرەكانی پێشەوەی پێشمەرگە لە میحوەرەكانی مەخموور و گوێڕ، ئەفسەرە سەربازییەكان باسیان لەوەكردووە كە بە پێچەوانەوەی رابردوو، لە ئێستادا چەكدارانی داعش هێرش ناكەن.
ئەوەشیان خستەڕوو كە لە چەند ناوچەیەكی گوێڕ، بە تایبەتی گوندی زمارە، چەكدارەكانی داعش خەریكی لێدانی خەندەق و دروستكردنی بەربەستن لە بەرامبەر سەنگەری هێزەكانی پێشمەرگە.
بەپێی زانیارییەكان، رۆژانی سێشەممە و چوارشەممە لە هەردوو سنووری گوێڕ و خازر هیچ پێكدادان و رووبەڕووبوونەوەیەك لە نێوان هێزەكانی پێشمەرگە و چەكدارانی داعش رووینەداوە.
لە سەرەتای مانگی حوزەیرانی ئەمساڵەوە چەكدارانی دەوڵەتی ئیسلامیی ناسراو بە (داعش) توانییان سوپای عێراقی بشكێنن و لە ماوەیەكی كەمدا شاری موسڵ كۆنترۆڵ بكەن.
دوا بەدوای ئەوە هێزەكانی پێشمەرگە لەو سنوورە بۆ ماوەیەك بڕیاری شەڕكردنیان نەدا دژ بە داعش، لەو كاتەدا سەركردایەتی كورد بەرگریكردنی بە بژاردەیەكی باش زانی.
دواتر داعش هێرشی كردە سەر ناوچەكانی قەزای شنگال و سنووری قەزای مەخمور و ناحییەی گوێڕ و پێشمەرگە لەو ناوچانە كشایەوە.
بۆ دوو مانگ دەڕوا لە زۆربەی سنوورەكانی كورد لەگەڵ سونە، كە ناوچەی كوردنشینی دەرەوەی ئیدارەی هەرێمی كوردستانە، شەڕ لە نێوان چەكدارانی داعش و هێزەكانی پێشمەرگە بەردەوامە.
ئەگەرچی چەكدارانی داعش لە سنووری پارێزگای نەینەوا و دەوروبەری دەستپێشخەربوون لە هێرشكردنە سەر هێزەكانی پێشمەرگە، كەچی لە ماوەیەكی كەمدا پێشمەرگە توانی قەزای مەخموور و بەنداوی موسڵ و چەند ناوچەیەكی سەر بە پارێزگای كەركوك و ناحییەی جەلەولا لە چەكدارانی داعش وەربگرێتەوە.
سەرۆكی هەرێمی كوردستان مەسعود بارزانی دەڵێ، "پێشمەرگە لە پێشڕەویدایە و تا ئەو شوێنەی كوردی تیایە هێزەكانمان دژ بە چەكدارانی داعش دەجەنگن."
پاشەكشەی چەكدارانی داعش بە بڕوای چاودێران بۆ بەهاناوەهاتنی وڵاتانی نێودەوڵەتی دەگەڕێتەوە بۆ هەرێمی كوردستان، كە لە ماوەیەكی كەمدا هاوكاری مرۆیی و سەربازییان گەیاندە هەرێمی كورستان.
وەزیری بەرگریی ئەمریكا جاك هیگڵ ئەو هاوكارییە سەربازییانەی بۆ هێزەكانی پێشمەرگە دژ بە داعش ئاشكراكرد.
لە بەیاننامەیەكدا وەزارەتی بەرگریی ئەمریكا رایدەگەیەنێ، ئەمریكا، كرواتیا، دانیمارك، ئەلبانیا، كەنەدا، ئیتاڵیا، فەڕەنسا و بەریتانیا هاوكاری سەربازییان پێشكەش بە هێزەكانی پێشمەرگە كردووە لە هەرێمی كوردستان، بۆ رووبەڕووبوونەوە دژ بە چەكدارانی داعش.
قادر ئوتمان ئەندامی لیژنەی پێشمەرگە و ناوخۆ لە پەرلەمانی كوردستان لە لێدوانێكدا بۆ ئاژانسی ئانادۆڵو دەڵێ: "لە ماوەی دوو مانگی شەڕی چەكدارانی داعش لەگەڵ هێزەكانی پێشمەرگە، لە ئێستادا دەردەكەوێ ئەوان تاكتیكی شەڕیان گۆڕیوە لە هێرشەوە بۆ بەرگری، ئەمەش هۆكارەكەی بۆ ئەوە دەگەڕێتەوە كە هێزی پێشمەرگە نهێنی شەڕی داعشی لا ئاشكرابووە."
ئەو پەرلەمانتارەی كوردستان پێیوایە داعش "شكستیهێناوە"، هۆكارەكەی بۆ "ئازایەتی پێشمەرگە و ئەو هاوكارییە نێودەوڵەتییە" دەگەڕێنێتەوە، كە وایكردووە لە قۆناغی ئێستادا داعش شەڕی هێرش بگۆڕێ بۆ بەرگری.
28/08/2014
بەپێی لێدوانی سەرچاوەیەك لە هێزی پێشمەرگە بۆ تۆڕی میدیایی رووداو ، هێزەكانی پێشمەرگە ژمارەیەك گوندی دیكەیان لە دەوروبەری بەنداوی موسڵ كۆنترۆڵكردن . بەپێی ئەو سەرچاوەیە كە لە فەرماندەیی هەڵگوردەوە قسەی لەگەڵ تۆڕی میدیایی رووداو دەكرد ، هێزەكانی پێشمەرگە گوندەكانی : بەدریێ ، سوفەیە، خان سوفەیە ، تەڵگەڕان ، تاجیك و بارزانۆكا و تەعتۆكایان كۆنتۆڵكردووە. بەپێی زانیارییەكانی تۆڕی میدیایی رووداو ، ئەمڕۆ سەرلەبەیانی هێزەكانی پێشمەرگە هێرشێكی بەرفراوانیان لە ناوچەی زوممار و رەبیعە دەستپێكرد و پێشڕەوی پێشمەرگە بەردەوامە .
28/08/2014
هێزی ئاسمانی ئەمریكا لە 8ی ئەم مانگەوە 98 جار بە فڕۆكەی بێ فڕۆكەوان و فڕۆكەی جۆری دیکە هێرشی كردووەتە سەر چەكدارانی دەوڵەتی ئیسلامی ناسراو بە داعش لە عێراق. ئەوەی كە فەرماندەیی هێزەكانی ئەمریكا ئاماژەی پێناكات ئەوەیە، كە ئەم فڕۆكانە لە چ فڕۆكەخانەیەكەوە هەڵدەستن و لە گروپە جیهادییەكان دەدەن.
بەپێی بەدواداچوونێكی واشنتن پۆست زۆربەی ئەو هێرشانە لە سێ فڕۆكەخانەی سەربازی قەتەر، ئیمارات و كوەیتەوە سەرچاوە دەگرن، بەڵام لەبەر هەستیاریی ئەو پرسە نە ئەمریكا و نە دەوڵەتانی كەنداو ئامادە نین زانیاریی لەسەر بڵاو بكەنەوە. ژمارەیەكی دیکە لە هێرشەكان لەلایەن فڕۆكە بێ فڕۆكەوانەكان لە فڕۆكەخانەی ئینچێرلیك لە توركیا و كەشتیە جەنگییەكان وەك كەشتی جۆرج بوش كە لە ئاوەكانی كەنداوە سەرچاوە دەگرن.
وەزارەتی بەرگریی ئەمریكا پێش كشانەوەی بە تەواوەتی هێزەكانی لە عێراق لە كۆتایی 2011، چوار فڕۆكەی بێ فڕۆكەوانی جۆری "پرێدێتێر"ی كە لە عێراق بوون گواستەوە بۆ فڕۆكەخانەی ئینچرلیك لە توركیا.
مستەفا ئەلانی بەرپرسی لێكۆڵینەوەی ئاسایش و بەرگریی لە سەنتەری لێكۆڵینەوەی كەنداو، کە بنكەکەی لە جنێڤی سویسرایە دەڵێت: هۆكاری ئەوەی كە سەرۆكی وڵاتانی كەنداو بە ئاشكرا ناڵێن كە پاڵپشتی ئەمریكا دەكەن دژی داعش ترسە لەوەی كە ئەگەر بێت و خەڵكی مەدەنی لەو هێرشانە بمرن، لەوانەیە ببێتە هۆی توڕەبوونی خەڵکی كەنداو.
"ئەلعەدید" لە قەتەر گرنگترین بنكەی ئاسمانیی ئەمریكایە لە ناوچەكە و سەنتەری فەرماندەیی هێزی ئاسمانی ئەمریكا بۆ هەمو رۆژهەڵاتی ناوەراست و ئەفغانستان لەخۆ دەگرێـت. ئەلعەدید بەبۆنەی شەڕی ئەفغانستانی 2001 و عێراقی 2003 پەرەی پێدراو ئێستا نزیكەی 9000 سەرباز و كارمەندی ئاسایشی تێدایە. لەو بنكە ئاسمانییە لقی 379 هێزی ئاسمانی ئەمریكا بوونی هەیە، كە 90 فڕۆكەی شەری پاڵپشتی تێدایە لەوانە فرۆكەی جۆری ئێف-16 فاڵكن و ئێف-15ی سترایك ئیگلڵ و بی-1 بۆمبەر.
بنكەی ئاسمانیی "عەلی ئەلسالم" لە كوەیت بنكەیەكی دیکەی هێزی ئاسمانی ئەمریكایە كە لەلایەن سەربازە ئەمریكییەكانەوە بە "تاشە بەرد" ناسراوەو نزیكترین بنكەی فرۆكەی بێفرۆكەوانی جۆری "پرێدێتێر"ە بۆ عێراق و تەنیا 65 كیلۆمەتر لە سنووری عێراق دوورە.
كردنەوەی ئەو بنكە هەوایی و سەربازییانە لە ناوچەی رۆژهەڵاتی ناوەراست ئەگەرچی رێگەی زۆرتری كردووەتەوە بۆ حكومەتی ئەمریكا بو جێبەجێكردنی سیاسەتەكانی لە ناوچەكە، بەڵام لەهەمانكاتدا دەسەڵاتێكی باشی بۆ كاریگەریكردنە سەر سیاسەتی ئەمریكا بەخشیوە بەو وڵاتانەی كە شوێنی بنكە سەربازییەكانیان كردووەتەوە.
بۆ نموونە لە هێرشكردنە سەر داعش لە عێراق مەرجێكی سەرەكی وڵاتانی كەنداو و توركیا لابردنی نووری مالیكی سەرۆك وەزیران بوو لەسەر كارەكەی، چونكە ئەمیرەكانی وڵاتانی كەنداو و سەرۆك وەزیران رەجەب تەیب ئەردۆغان لەو دەترسان كە بۆردوومانكردنی داعش لە داهاتوودا ببێتە هۆی بەهێزكردنی مالیكی لە عێراق.
لەهەمانكاتدا كە وڵاتانی كەنداو و توركیا ئاسانكاری دەكەن و رێگا دەكەنەوە بۆ سیاسەتی ئەمریكا لە رۆژهەڵاتی ناوەراست، لەلایەكی دیکەشەوە كێشەی گەورەیان بۆ بەرپرسانی ئەمریكا دروستكردووە. توركیا بۆ ماوەیەكی زۆر رێگەی دەدا بە چەكدارە تووندرەوەكان لە وڵاتەكەیەوە بڕۆنە ناو سووریا بۆ شەر دژی بەشار ئەسەدی سووریا و دەزگا سیخورییەكانی وڵاتانی كەنداو پەیوەندی نزیكیان هەیە لە گەڵ هێزە جیهادییەكان لە سووریا.
چەند رۆژێك پێش ئێستا سەرۆكی دەزگای هەواڵگریی قەتەر یارمەتیدەری سەرەكی بوو بۆ ئەوەی رۆژنامەنووسێكی مەیدانی ئەمریكی لە لایەن گرووپی نوسرەوە ئازاد بكرێت.
شەشی ئەم مانگەش وەزارەتی دارایی ئەمریكا سێ كوەیتی خستە لیستی رەشەوە لەبەر ناردنی یارمەتی بۆ گرووپە جیهادییەكان وەك نوسرەو و داعش.
بەڵام ئەم پەیوەندییەی حكومەتی باراك ئۆباما و وڵاتانی كەنداو و توركیا بۆ هەردوولا سوودی گەورەی هەیە بە مەرجێك نە شیشەكە بسووتێت و نە كەبابەكە.
27/08/2014
حكومەتی بەلژیكا بڕیاردەدات هاوكاریی مرۆیی پێشكەش بە باشووری كوردستان بكات و بۆ ئەو مەبەستەش 2 ملیۆن یۆرۆ تەرخاندەكات. دلاوەر ئاژگەیی، نوێنەری حكومەتی هەرێمی كوردستان لە یەكێتی ئەوروپا بە تۆڕی میدیایی رووداوی گوت، حكومەتی بەلژیكا بڕیاریداوە هاوكاریی مرۆیی پێشكەشی كوردستان بكات و بۆ ئەو مەبەستەش دوو ملیۆن یۆرۆی تەرخانكردووە، بڕیارە ئێوارەی ئەمڕۆ فڕۆكەیەكی جۆری (C-130) راستەوخۆ لە بەلژیكاوە بەرەو هەولێری پایتەخت بەڕێبكەوێ و هاوكارییەكان بگەیەنێت. بەپێی قسەی دلاوەر ئاژگەیی، حكومەتی بەلژیكا وەك ستراتیژی سیاسەتی دەرەوەیی هاوكاریی سەربازیی پێشكەشی هیچ لایەنێكی دەرەكی ناكات، "بەڵام لەگەڵ ئەوەشدا بە لەبەرچاوگرتنی ئەو ئەركە قورسەی كە لە سەرشانی هێزی پێشمەرگەی كوردستانە، پرسی هاوكاریی سەربازی بۆ پێشمەرگە تاوتوێ دەكەن و ئەو پرسە بە كراوەیی دەهێڵنەوە". جگە لە هاوكاریی مرۆیی، تاوەكو ئێستا حەوت وڵاتی جیهان ئامادەیی خۆیان بۆ هاوكاری سەربازی كورد نیشانداوە و رایانگەیاندووە كە كورد پێویستی بە چەكە لە جەنگی دژ بە داعش، لەو وڵاتەناش وەك فەرەنسا، بەریتانیا، ئیتاڵیا، دانیمارك، كرواتیا، كەنەدا و ئەلبانیا. جگە لەو حەوت وڵاتە، چەند وڵاتێكی دیكە هەن ئامادەییان بۆ ناردنی چەك نیشانداوە یان هاوكاریی سەربازی هێزی پێسمەرگەی كوردستانیان كردووە، لەوانە ئەڵمانیا، كە هەردوو وەزیری دەرەوە و بەرگری باسیان لە پێویستی ناردنی چەك بۆ هێزی پێشمەرگە كردووە. ئێرانیش یەكێكە لەو وڵاتانەی كە هاوكاریی سەربازی كوردى كردووە و رۆژی سێشەممە 26-8-2014 مەسعود بارزانی سەرۆكی هەرێمی كوردستان، لە میانەی كۆنگرەیەكی رۆژنامەوانیدا لەگەڵ محەممەد جەواد زەریف كە لە هەولێر سازدرا، رایگەیاند كە یەكەمین وڵات وەڵامی داواكاری كوردی داوەتەوە بۆ هاوكاری سەربازيی ئێران بووە. نەرویژ و ئوسترالیاش لەو وڵاتانەن كە باسی ئەگەری هاوكاری سەربازییان بۆ كورد كردووە، بەڵام تا ئێستا بڕیارێكی یەكلاییكەرەوە لەو بارەیەوە نەدراوە. هەروەها لە راگەیێندراوێكدا وەزارەتی بەرگریی ویلایەتە یەكگرتووەكانی ئەمریكا، داوای لە هاوپەیمانەكانی ئەمریكا لە جیهان كرد كە هاوكاری زیاتری خەڵكی عێراق و هێزی كورد بكەن لە جەنگی دژ بە چەكدارانی داعش.
27/08/2014
بەپێی نوێترین ئامارەکانی فەرمانگەی تۆمارکردنی باری کەسێتی پارێزگای ورمێی رۆژهەڵاتی کوردستان، رێژەی تەڵاق لەو پارێزگایەدا بە بەراورد لەگەڵ ساڵی رابردوو لەسەدا 40 بەرزبووەتەوە، بەجۆرێک کە لە هەر 24 کاژێردا 15 حاڵەتی تەڵاق تۆمار دەکرێت.
رەنگە لە ئێرانێک کە رێژەی بێکاریی خوێندەواران زیاترە لە سەدا 40 و رێژەی هەڵاوسان مانگانە زیاترە لە 25 لەسەد ، دەستەبەرکردنی ژیانێکی خۆش شتێکی ئاسان نەبێت، چاوەڕوانیی زۆر و قسەی سۆرە و تۆرەش لەوێ راوەستێ.
بەپێی نوێترین ئامارەکانی ئیدارەی تۆمارکردنی باری کەسێتی پارێزگای ورمێی رۆژهەڵاتی کوردستان ، رێژەی تەڵاق لەو پارێزگایە بە شێوەیەکی چاوەڕواننەکراو هاوتای هەموو ئێران بەرزبوونەوەی بە خۆیەوە بینیوە.
کارناسانی حکومی لە ساڵانی رابروودا چەندین جار هۆشدارییانداوە سەبارەت بە بەرزبوونەوەی رێژەی تەڵاق.
لەساڵی 1375ی هەتاویدا کۆی حاڵەتەکانی تەڵاق لە هەموو ئێراندا نزیکەی 38 هەزار حاڵەت بووە، ئەوە رێژەیە لە ساڵی 1386ی هەتاویدا گەیشتووەتە 100 هەزار حاڵەت.
ئامارە فەرمییەکانی کۆماری ئیسلامی ئێران دەریدەخات ، کە لە خولی دووەمی سەرۆککۆماری مەحموود ئەحمەدی نەژاددا ئەوە تەنیا نرخ و رێژەی هەڵاوسان و دۆلار و زیندانیانی سیاسی نەبوون کە بەرزبوونەوە، بەڵکو ئاماری تەڵاقیش بەشێوەیەکی بەرچاو بەرزبوونەوەی بە خۆیەوە بینیوە.
لە ساڵی 1392ی هەتاویدا 159 هەزار حاڵەتی تەڵاق لە ئێران تۆمارکراوە .
بە گوتەی سەرۆکی ئیدارەی تۆمارکردنی باری کەسێتیی پارێزگای ورمێ، تەنیا لەو پارێزگایە لە شەش مانگی رابردوودا هەزار و 849 حاڵەتی تەڵاق تۆمارکراوە ، کە بە بەراوردی کاتی هاوشێوەی ساڵی رابردوو 40 لەسەد بەرزبوونەوەی بە خۆیەوە بینیوە.
بە گوتەی ئەو بەرپرسە رێژەی تەڵاق لە گوندەکانی ئەو پارێزگایە بەرەو کەمی دەچێت ، بەڵام لە شارەکان بە پێچەوانەوە تا دێت زۆرتر دەبێت .
کارناسانی حكومی دووکەوتنەوەی گەنجان لە بنەماکانی ئایین بە هۆکاری سەرەکی تەڵاق دەزانن، بەڵام لە بەرامبەردا کارناسانی کۆمەڵایەتی کێشەی بێکاری، هەڵاوسانی ئابووری ، بەرزبوونەوەی چاوەڕوانییەکان و پرسی ماددە هۆشبەرەکان بە هۆکارە سەرەکییەکانی تەڵاق دەزانن .
27/08/2014
شاندێكی حكومەتی هەرێمی كوردستان بە سەرۆكایەتی نێچیرڤان بارزانی، سەرۆكی حكومەت، قوباد تاڵەبانی، جێگری سەرۆكی حكومەت، مەولود باوەموراد، وەزیری هەرێم بۆ كاروباری پەرلەمان و حكومەت، لەگەڵ یوسف محەممەد، سەرۆكی پەرلەمان و فەخرەدین قادر، سكرتێری پەرلەمان لە كۆبوونەوەدان.
بەپێی زانیارییەكانی تۆڕی میدیایی رووداو، لە كۆبوونەوەكەدا پرسی ئەمنی و دوایین گۆڕانكارییە سەربازییەكان، پێشڕەویی و سەركەوتنەكانی هێزی پێشمەرگەی كوردستان بە سەر چەكدارنی داعش و بەرگریكردن لە خاكی كوردستان، چەند بابەتێكی ناوخۆیی تایبەت بە سووتەمەنی و مووچە و بودجەی دروستكردنی هەمانگی زیاتر لە نێوان دەسەڵاتی چاودێری و جێبەجێكردن گفتوگۆیان لەسەر دەكرێت.
لەگەڵ رووداو بن... سەنگەر عەبدولرەحمان، پەیامنێری تۆڕی میدیایی رووداو لە پەرلەمان زانیار زۆرتر دەخاتەڕوو.
26/08/2014
وەزیری دەرەوەی نەرویژ رایگەیاند، كە ئەمڕۆ بڕیاریداوە بڕی 10 ملیۆن دۆلاری دیكە بخاتە سەر ئەو هاوكارییە مرۆییانەی، كە وڵاتەكەی بڕیاریداوە پێشكەشی ئاوارەكانی باشووری كوردستانی بكات.
سەرلەبەیانیی ئەمڕۆ وەزیری دەرەوەی نەرویژ گەیشتە باشووری كوردستان و دوای ئەوەی كەمپێكی پەنابەرانی بەسەركردەوە، لەگەڵ مەسعود بارزانی سەرۆكی هەرێمی كوردستان كۆبووەوە.
دواتر لە كۆنگرەیەكی رۆژنامەوانیدا وەزیری دەرەوەی نەرویژ رایگەیاند، كە لەگەڵ بارزانی بەوردیی باسیان لە بارودۆخی ناوچەكەو مەترسییەكانی داعش كردووە.
بۆرگ بریندە، وەزیری دەرەوەی نەرویژ ئامانجی سەردانەكەی باسكردو گوتی "هاتنی من بۆ پیشاندانی هاوكاریی و پاڵپشتیی هەرێمی كوردستانە".
پێشتر حكومەتی نەرویژ بڕیاریدابوو بە بڕی 25 ملیۆن دۆلار هاوكاریی مرۆیی پێشكەشی پەنابەرانی هەرێمی كوردستان بكات، لە كۆنگرە رۆژنامەوانییەكەدا وەزیری دەرەوەی نەرویژ گوتی "دوای ئەوەی ئەمڕۆ كەمپێكی ئاوارەكانم بەسەركردەوە بڕیارمدا بڕی 10 ملیۆ دۆلاری دیكە بخەینە سەر ئەو هاوكارییە".
وەزیری دەرەوەی نەرویژ گوتیشی "مایەی خۆشحاڵییە كە هەرێمی كوردستان هەموو ئایین و نەتەوە جیاوازەكانی لەخۆگرتووە".
26/08/2014
پارێزگاری سنە رایگەیاند لە داهاتوویەکی نزیکدا پلانی دامەزراندنی لقی زمان و ئەدەبی کوردی لە زانکۆکانی ئەو پارێزگایەدا جێبەجێ دەکرێت.
عەبدولمحەممەد زاهیدی، پارێزگاری سنە لە کۆبوونەوەیەکی رۆژنامەوانیدا رایگەیاند، یەکێک لە داواکارییە سەرەکییەکانی خەڵکی کوردستان گرینگیدانە بە کولتووری نەتەوەییان، بەو هۆیەشەوە خراوەتە پلانی کاری حکومەتەوە و بەو مەبەستە بڕیاریانداوە وانەی زمان و ئەدەبی کوردی لە زانکۆکانی پارێزگای سنەدا بگوترێتەوە.
بە گوتەی پارێزگاری سنە، وەزیری کولتووری ئێران بەڵێنیداوە ئەو پلانە لە داهاتوویەکی نزیکدا دەخرێتە بواری جێبەجێکردنەوە و دەیانەوێ بە شێوەیەی گونجاو ئەو کارە جێبەجێ بکەن تاوەکو داواکارییەکانی خەڵک لەو بەشەدا بە کەموکوڕییەوە جێبەجێ نەکرێت.
بەپێی دەستووری ئێران، نەتەوە جیاوازەکانی ئەو وڵاتە مافی خوێندن بە زمانی دایکیان هەیە، بەڵام ئەو یاسایە تاوەکو ئێستا جێبەجێ نەکراوە. هەروەها لە ساڵی 2004ی زاینییەوە بڕیاری کردنەوەی لقی زمان و ئەدەبی کوردی لە زانکۆی کوردستانی سنە دراوە، بەڵام بە گوتەی بەرپرسانی ئەو زانکۆیە بەهۆی نەبوونی مامۆستای شارەزا و سەرچاوەی زانستییەوە نەیانتوانیوە جێبەجێی بکەن. هاوکات لەماوەی رابردوو ژمارەیەکی بەرچاو لە مامۆستایانی زمانی کوردی نێوخۆی رۆژهەڵاتی کوردستان و هەروەها وەزارەتی خوێندنی باڵای حکومەتی هەرێمی کوردستان ئامادەییان دەربڕیوە، بۆ جێبەجێکردنی ئەو پلانە هاوکاری بەڕێوەبەرایەتی زانکۆکانی رۆژهەڵاتی کوردستان و ئێران بکەن
26/8/2014
وەزارەتی بەرگریی ویلایەتە یەکگرتووەکانی ئەمریکا، لە راگەیێندراوێکدا داوا لە هاوپەیمانەکانی ئەمریکا لە جیهان دەکات، کە هاوکاری زیاتری خەڵکی عێراق و هێزی کورد بکەن لە جەنگی دژ بە چەکدارانی گرووپی دەوڵەتی ئیسلامی ناسراو بە داعش.
لە راگەیێندراوەکەدا هاتووە: "دوو هەفتە لەمەوپێش ئەمریکا دەستیکردووە بە پێدانی چەک بە هێزی کوردی لە عێراق بۆ رووبەڕووبوونەوەی داعش، جگە لەوەش کاریکردووە بۆ ئەوەی حکومەتی ناوەندی بەغدا هاوکاریی سەربازی کورد بکات".
هەر بەگوێرەی ئەو راگەیێندراوە، حەوت وڵاتی دیکەی جیهان تائێستا ئامادەیی خۆیان بۆ هاوکاری سەربازی کورد نیشانداوە و رایانگەیاندووە کە کورد پێویستی بە چەکە لەکاتی جەنگی دژ بە داعش، لەو وڵاتەناش وەک فەرەنسا، بەریتانیا، ئیتاڵیا، دانیمارک، کرواتیا، کەنەدا و ئەلبانیا.
ئەم راگەیاندنەی وەزارەتی بەرگریی ئەمریکا لەکاتێکدایە کە جگە لەو حەوت وڵاتەی ناویان هێنراوە، چەند وڵاتێکی دیکە هەن ئامادەییان بۆ ناردنی چەک نیشانداوە یان هاوکاریی سەربازی هێزی پێسمەرگەی کوردستانیان کردووە، لەوانە ئەڵمانیا، کە هەردوو وەزیری دەرەوە و بەرگری باسیان لە پێویستی ناردنی چەک بۆ هێزی پێشمەرگە کردووە، بەڵام ئەو بڕیارەی ئەڵمانیا هێشتا لەژێر لێکۆڵینەوەدایە و بەرپرسانی ئەڵمانی باس لەوە دەکەن کە وڵاتەکەیان سەرقاڵی لێکۆڵینەوەی زیاترە بۆ ئەوەی بزانن کورد پێویستی بە چ جۆرە چەکێکە کە ئەڵمانیا لە چوارچێوەی هاوکاریی سەربازیدا بۆی بنێرێت.
ئێرانیش یەکێکە لەو وڵاتانەی کە هاوکاریی سەربازی کردووە و رۆژی سێشەممە 26-8-2014 مەسعود بارزانی سەرۆکی هەرێمی کوردستان لە میانەی کۆنگرەیەکی رۆژنامەوانیدا لەگەڵ محەممەد جەواد زەریف کە لە هەولێر سازدرا، رایگەیاند کە یەکەمین وڵات وەڵامی داواکاری کوردی داوەتەوە بۆ هاوکاری سەربازی ئێران بووە.
هەروەها نەرویژ و ئوسترالیاش لەو وڵاتانەن کە باسی ئەگەری هاوکاری سەربازییان بۆ کورد کردووە، بەڵام تا ئێستا بڕیارێکی یەکلاییکەرەوە لەو بارەیەوە نەدراوە.
راگەیاندنەکەی وەزارەتی بەرگری ئەمریکا ئەوەشی ئاشکرا کردووە، کە لەماوەی چەند رۆژی داهاتوودا هاوکارییەکان زیاتر دەبن و ئۆپەراسیۆنی سەربازی فراوانتر دەکرێت، باس لەوەش دەکات چەند وڵاتێکی دیکە هاوکارییە سەربازییەکانیان بۆکورد دەنێرن.
هەروەها باس لەوەش کراوە حکومەتی ناوەندی بەغدا بەشداری لە هەوڵی گەیاندنی هاوکاری سەربازی بۆ کورد کردووە و کورد ئێستا جەنگ لە دژی هەڕەشەیەکی ترسناک دەکات.
هەر بەگوێرەی ئەو راگەیێندراوە ئەمریکا لە هەوڵی بەردەوامدایە بۆ ئەوەی دۆستەکانی ئەمریکا لە هەموو جیهانەوە هاوکاریی ئەو هەوڵانەی ئەمریکا بکەن لە هاوکاریکردنی سەربازی کورد و رووبەڕووبوونەوەی داعش.
لەو راگەیێندراوەدا باس لە جۆری ئەو چەکانە نەکراوە کە بۆ کورد هاتوون یان دەنێردرێن، بەڵام سەرکردایەتی کورد چەند جارێک دووپاتی کردووەتەوە کە هێزی پێشمەرگە پێویستی بە چەکی قورس و پێشکەوتوو هەیە، لەوانەش چەکی ئەنتی تانک و چەکی دیکەی پێشکەوتوو.
27/08/2014
- ژمارەیەک لە چالاکانی سیاسی، مەدەنی و میدیایی کوردستان داوای هەڵوەشاندنەوەی سزای لەسێدارەدانی پەخشان عەزیزی و هەموو زیندانیانی سیاسیی سزادراو بە لەسێدارەدان دەکەن
- ئێران..کۆبوونەوەکەمان لەگەڵ وڵاتانی ئەورووپا ئەرێنی بوو
- مەزڵوم عەبدی و نوێنەری سەرۆک بارزانی کۆدەبنەوە
- ئەمڕۆ شاندی دەمپارتی بۆ گەیاندنی پەیامی ئۆجەلان لەگەڵ ئاکپارتی کۆدەبێتەوە
- خراپترین دراوەکانی جیهان لە ساڵی 2024 دا
- تولای حاتەمئۆگیولاری: دیدار بەس نییە، دەبێت دەرگاکانی ئیمراڵی بکرێنەوە
- کامیان مەترسیدارترن: ئێران یان ئیخوان؟
- ههسهده و چەک؛ هاوکێشە سەختەکە لە بنیاتنانەوەی سوپای سوریادا
- ئیدارەی نوێی سوریە ئەمیرێكی پێشوی بەرەی نووسرەی وەك سەرۆكی دەزگای هەوالگریی سوریە دیاری كڕد
- وەزیری دەرەوەی روسیە دەلێ دەگەل ئیدارەی تازەی سوریە پەیوەندیمان هەیە
- ئیسرائیل فرۆكەخانەی نێودەولەتی سەنعا لە یەمەن بۆمباران كرد
- شاندێكی بالای عێراقی دەگەل ئیدارەی نوێی سوریە دیداری كرد
- دوای روخانی رژیم بەعسی ئەسد، عەلەوییەكان چییان بەسەر دێت
- وەزیری دەرەوەی ئیسرائیل دەلێت: هێرشەكان دژ بە كوردەكان دەبێ بوەستێنرێن
- چیروکی نەبیستراویی ناو زیندانەكانی سوریە
- حشدی شەعبی هەرشە لە توركیەدەكات
- ترامپ دەلێ: لە هیچ لایەك قەبوول ناكەیین جێگرەوەی دۆلار بەرهەم بێنێت
- ناوەرۆكی دیداری نێوان وەزیری دەرەوەی ئێران و بەشار ئەسەد بلاوبووە
- فەرانسە رێگای بەكارهێنانی مووشەكی دورمەودای بە ئوكرایین دا كە لە دژی روسیە بەكاری بێنێت
- جۆزف بۆرێل دەلێ: بیرت لە لێواری دارماندایە
- پیرۆزبایی بزووتنەوەی کۆماریخوازانی ڕۆژهەڵاتی کوردستان بە بۆنەی جێژنی پیرۆزی قوربان
- پەیامی پیرۆزبایی بزووتنەوەی کۆماریخوازانی رۆژهەڵاتی کوردستان بە بۆنەی پێنجەمین کۆنگرەی ئاسایی هەدەپە
- پەیامی پیرۆزبایی بزوتنەوەی کۆماریخوازی ڕۆژهەڵاتی کوردستان بە بۆنەی جێژنی ڕەمەزانی پیرۆزەوە
- راگەیەندراوی بزووتنەوەی کۆماریخوازان بەبۆنەی رۆژی جیهانی کرێکاران
- بزووتنەوی کۆماریخوازان ئیدانەی هێرشەکانی رێژیمی تورکیە بۆ سەر باشووری دەکا
