<sup>سەرۆكوەزیرانی توركیا چاودێری بیانی، یان وەك خۆی دەڵێ "چاوی سێیەم" بۆ چاودێریكردنی پڕۆسەی ئاشتی رەتدەكاتەوە. ئەو دەڵێ "لەگفتوگۆكانی ئۆسلۆ تاقیمانكردەوە، بەڵام نەگەیشتە ئەنجام".

ئەحمەد داودئۆغڵو، لە كاتی گەڕانەوەی لە فلیپین بۆ توركیا لەنێو فڕۆكەی تایبەتی سەبارەت بە پرۆسەی ئاشتی وەڵامی رۆژنامەنووسانی دایەوە و گوتی: "ئەم پرسە پرسی نێوخۆیی توركیایە و دەبێ لەنێو هاونیشتمانیانی خۆماندا باسی لێوە بكەین، ئەگەری بوونی هیچ چاودێرێكی بیانی لەئارادا نییە".

لەماوەی رابردوودا، بەتایبەت لەدوای خۆپێشاندانەكانی 6 و 7 ی تشرینی یەكەمی 2014 چەند سەركردەیەكی كۆما جڤاكێن كوردستان KCK و پارتی كرێكارانی كوردستان PKK رایانگەیاند كە گەریلاكانیان گەڕاندوونەتەوە نێو خاكی توركیا و بە چەكی باشتر و هێزی زیاترەوە لە ئامادەباشیدان. لەبەرامبەر ئەو لێداوانانە داودئۆغڵو گوتی: "PKK بەڵێنەكەی خۆی نەبردەسەر".

لەوبارەیەوە زیاتر گوتی: "ئەوان هیچ بەڵێنێكی خۆیان نەبردەسەر، بڕیاربوو توركیا بەجێبهێڵن و چەكەكانیان دابنێن، دەبوو ئەمانە زۆر زووتر بكرابان، بەڵام ئێمە ئەوەی پێویستبوو بۆ پڕۆسەی ئاشتی بەجێمانهێناوە".

لەبارەی هاتنی چەكدارانی بیانی لەرێگەی توركیاوە و چوونیان بۆ نێو ریزەكانی چەكدارانی دەوڵەتی ئیسلامی لە سووریا داودئۆغڵو ئەوەی ئاشكرا كرد: "وەزیری دەرەوەی یەكێك لە وڵاتە گرنگەكانی ئەوروپا دوو ساڵ پێش ئێستا داوای لێكردم كە "رێوشوێنی پێویست بگرینەبەر" منیش گوتم ئێوە رێگە مەدەن ئەو چەكدارانە لە وڵاتی ئێوەوە بێنە دەرەوە، ئەویش گوتی ئێمە وڵاتێكی دیموكراسین و ناتوانین ئازادی گەشتكردن لە خەڵك بگرین، دوای ئەم قسانە ئێمە رێگریمان لە 700 چەكداری بیانی كردووە، كە لە وڵاتانی ئەوروپاوە هاتوون".
"بە رژێمی سووریامان گوت ناسنامە بە كورد بدەن".

سەرۆكوەزیرانی توركیا دەڵێ: "ئێمە ئەو كاتەی پەیوەندیمان لەگەڵ رژێمی ئەسەد باش بوو پێمانگوتن ناسنامە بە كورد بدەن، بەڵام PYD  دەچێت پەیوەندی لەگەڵ رژێمی بەشار ئەسەد دادەنێ و هەماهەنگی لەگەڵ دەكات".

ئەو قسانەی داودئۆغڵو لەكاتێكدان كە هێشتا لە دەستووری توركیا "یەك زمان" و "یەك نەتەوە" هاتووە و نەتەوە و كەمینەكانی دیكە لە توركیا بۆیان نییە لە خوێندنی فەرمیدا بە زمانی دایكی خۆیان بخوێنن و جگە لە ناسنامەی "توركبوون" هیچ ناسنامەیەكی دیكەیان هەبێت.</sup>

فەرهاد چۆمانی/rudaw

^19/11/2014

<sup>شێخ موعتەسەم شێخ سەعید بەرزنجی، شێخی تەریقەتی قادری ولیانی،  كە لە شارۆچكەی ئاكرێ دادەنیشێت، شەوی رابردوو لە ئەنقەرەی پایتەختی توركیا بە نەخۆشی كۆچی دواییكرد.

تەریقەتی قادری ولیانی تەریقەتێكی گەورەی باشووری كوردستانە و دوو تەکییەیان هەیە و رۆژانە سەدان كەس سەردانی ئەو تەکییانە دەكەن، یەكێكیان لە قەزای ئاكرێ و ئەوی دیكەشیان لە شارەدێی روڤیایە.

بڕیارە تەرمی شێخ موعتەسەم لە تەکییەی شێخ ئیسماعیل ولیانی لە روڤیا بنێژرێت.

ئەم تەریقەتە هەزاران شوێنكەوتە و دەروێشی هەیە، لە باشووری كوردستان، عێراق، ئێران، توركیا، پاكستان، سودان.

چاوەڕوان دەکرێت ئەمڕۆ چوارشەممە 19ـی تشرینی دووەمی 2014، تەرمی شێخ موعتەسەم لە دەروازەی نێودەوڵەتی ئیبراهیم خەلیل بگەڕێندرێتەوە باشووری كوردستان.</sup>

^19/11/2014

^{تاهیر عەبدوڵڵا جێگری پارێزگاری هەولێر بە تۆڕی میدیایی ڕووداوی ڕاگەیاند، تەقینەوەکەی ئەمڕۆی بەردەم پارێزگاری هەولێر خۆکوژی بووە و ویستوویەتی بچێتە نێو بینای پارێزگای هەولێر خۆی بتەقێنێتەوە.} 

^{جێگری پارێزگاری هەولێر ڕایگەیاند؛ خۆکوژەکە ویستوویەتی بە ئۆتۆمبێلێکی بۆمبڕێژکراو بچێتە نێو بینای پارێزگا و لە لایەن پاسەوانەکان ڕێگری لێکراوە و لە بەردەم دەرگای پارێزگا خۆی تەقاندۆتەوە.}

^PNA

^19/11/2014

<sup>سەرۆكی پەرلەمانی كوردستان دەڵێ "سروودی ئەی رەقیب بووەتە درووشمی یەكپارچەیی خاكی كوردستان". جەختیكردووەتەوە كە پەرلەمانی كوردستان سازش لەسەر ئەو سروودە ناكات و دەڵێ "هێڵی سوورە".

د.یوسف محەممەد سادق، سەرۆكی پەرلەمانی كوردستان ئەمڕۆ سێشەممە پێشوازیكرد لە گرووپی بەرگری نەتەوەیی كوردستان، كە لە ژمارەیەك رۆژنامەنووس و نووسەر و هونەرمەند و چالاكوانی مەدەنی پێكهاتوون.

بەپێی راگەیێندراوێكی نووسینگەی سەرۆكی پەرلەمان، لە سەرەتای دانیشتنەكەدا ، شاندەكە داوایان كردووە لە دەستەی سەرۆكایەتی پەرلەمان و سەرجەم فراكسیۆنەكانی پەرلەمانی كوردستان پارێزگاریی لە سروودی (ئەی رەقیب) بكەن و بە پڕۆژە یاسا ئەو سروودە بكەنە سروودێكی نەتەوەیی كورد.

سەرۆكی پەرلەمان رایگەیاندووە "كورد لە هەر چوار پارچەكەی كوردستان لەسەر چەندین شت جیاوازیمان هەیە، بەڵام لەسەر سروودی نەتەوەیی (ئەی رەقیب) هەمو‌ومان تەباین و پێمانوایە سرو‌ودێكی گرنگە بۆ نەتەوەكەمان، لەبەر ئەوە ئەو سروودە بۆ ئێمە لە پەرلەمانی كوردستان هێڵی سوورە و سازشی لەسەر ناكەین".

ئاماژەی بەوەدا دەستەی سەرۆكایەتی پەرلەمان بەهەمان تێڕوانینی نەتەوەییەوە سەیری سر‌وودی ئەی رەقیب دەكات.
سەرۆكی پەرلەمان راشیگەیاندووە "ئێستا لەپەرلەمان یاسایەك بۆ ئەو مەبەستە هەیە و خوێندنەوەی یەكەمی بۆ كراوەو لە داهاتووشدا دەنگی لەسەر دەدرێت و سروودەكە وەك سرو‌ودێكی نەتەوەیی كورد دەناسێنرێت".</sup>

rudaw

^18/11/2014

<sup>جێگری سەرۆكی پارتی داد و گەشەپێدان AKP گوتی: "بەهۆی كۆمەڵكوژی دێرسیم و هەموو ئەو زوڵمەی كە دەوڵەت لەماوەی رابردوودا لە رۆژهەڵات و باشووری رۆژهەڵاتی توركیا لە كوردی كردووە، داوای لێبوردن دەكەم".

ئۆزنور چەلیك، جێگری سەرۆكی پارتی داد و گەشەپێدان AKP لە بارەی ئەو كەشوهەوایەی پڕۆسەی ئاشتی هێناویەتییە ئاراوە گوتی: "لە هەموو توركیا گەڕاوین، لە هەموو شوێنێك تورك، كورد، عەلەوی و سوننی داوامان لێدەكەن كە پڕۆسەی ئاشتی بەردەوام بێت".

بە بۆچوونی ئەو: "بەهۆی پڕۆسەی ئاشتییەوە گەورەترین ئاستەنگ لەبەردەمی توركیا لادەچێت و پێویستە ئەو ئاستەنگە بخەینە بەردەم ئەوانەی دەیانەوێ پڕۆسەكە پەكبخەن".

لەبارەی كۆمەڵكوژی دێرسیم و داوای وەڵامدانەوەی خۆپێشاندەرانی دێرسیم بۆ داوای لێبوردنی حكومەت، گوتی: "حیزبێك بێنە بەرچاوت كە خۆی لە رابردوو بێبەری دەكات، كۆمەڵكوژی دێرسیم بە كۆمەڵكوژی نازانێت، كوشتنی 13 هەزار كەس و ئاوارەكردنی 12 هەزاری دیكە وەك نەبوو دادەنێن".

جێگری سەرۆكی پارتی داد و گەشەپێدان AKP گوتیشی: "ئەو داوای لێبوردنە وەك كەسێكی پلەباڵای نێو AKP دەكەم، ئێمە دوێنێ دێنینەوە بیر و ئەمڕۆ دەژین و داهاتوو بنیات دەنێین، هیچ كەسێكیش بۆی نییە ئینكاری رابردوو بكات".</sup>

 فەرهاد چۆمانی/rudaw

^18/11/2014

<sup>نووسینگەی عەلی سیستانی، گەورە مەرجەعی شیعە لە عێراق رایگەیاند فەتوای جیهادی كیفائی، كە مەرجەعی سیستانی بۆ شەڕ لە دژی گرووپی دەوڵەتی ئیسلامی (ناسراو بە داعش) دەركرا سەركردە سەربازییەكانی ئێران ناگرێتەوە.

نووسینگەی عەلی سیستانی  لە راگەیێندراوێكدا دەڵێ: "مەرجەعییەتی باڵای نەجەف رەتیدەكاتەوە پێشوازی لە بەشداریكردنی چەند فەرماندەیەكی سەربازی ئێرانی كردبێت لە شەڕی دژی داعش لە عێراق و بە بەشێك لە جیهادی كیفائی ناساندبێت، ئەو هەواڵانەی كە باس لەوە دەكەن بێبنەمان".

نووسینگەی عەلی سیستانی ئاماژەی بەوەكردووە، "پێشتر نوێنەرانی سیستانی لە وتاری نوێژی هەینی لە كەربەلا لە سەر زاری ئەوەوە داوایان لە وڵاتانی جیهان و وڵاتانی دۆستانی عێراق كرد بەشداری لە جەنگی دژی تیرۆر بكەن، هیچ پێشهاتێكی نوێیش لەو بارەوە نەهاتووەتە ئاراوە".

ئەمە لەكاتێكدایە چەند دەزگایەكی راگەیاندن پێشوەخت وێنەی قاسم سلێمانی، فەرماندەی فەیلەقی قودسی سوپای پاسدارانی ئێرانیان لەگەڵ چەند سەركردەیەكی سیادی عێراق لە بەرەكانی شەڕ لە دژی داعش بڵاوكردەوە و راشیانگەیاند كە سلێمانی لەلایەن سیستانییەوە پاڵپشتی دەكرێت.</sup>

^18/11/2014

<sup>لە کۆبوونەوەکەی 17-11-2014 ی نێوان شاندی دانوستاندنکاری پارتی دیموکراسی گەلان HDP و جێگری سەرۆکوەزیرانی تورکیا، داواکەی HDP بۆ پێکهێنانی شاندێکی چاودێری پەسەندکراوە.

سەرچاوەیەکی تایبەت بە تۆڕی میدیایی رووداو راگەیاند، لایەنی حکومەت رەزامەندی دەربڕیوە بۆ پێکهێنانی شاندی چاودێری کە لە 16 کەس پێکدێت، 8 یان لەلایەن حکومەت و 8 یان لە لایەن HDP دیاریدەکرێن.

پێکهێنانی ئەم شاندە یەکێک بوو لە داواکارییەکانی HDP بۆ بەرەوپێشبردنی پرۆسەکە. چاوەڕێدەکرێت شاندی چاودێری لە نزیکەوە بەدواداچوون بۆ هەنگاوەکانی هەردوو لایەنی حکومەت و کوردی  بکات.

بەڵام لەگەڵ ئەوەی قۆناغێکی باش بڕدراوە لە دانوستاندنەکان، هەتا ئێستا بابەتی دامەزراندنی سکرتاریەت بۆ عەبدوڵڵا ئۆجەلان لە دوورگەی ئیمراڵی یەکلا نەبووەتەوە. سەبارەت بەو شاندەش کە سەردانی ئیمراڵی دەکات، چاوەڕێدەکرێت هەردوو سیاسەتمەداری کورد خەتیب دیجلە و لەیلا زانا ببن بە بەشێک لەو شاندە.</sup>

^18/11/2014

^{پەرلەمانی روسیا کە ناسراوە بە ( دوما) بوو بەیەکەم وڵات کە بەفەرمی دانی بەمافی کوردا ناو دژی قڕکردنی گەلی کوردو کەمایەتییەکانی تر لە سوریا وەستایەوە.}

^{بەپێی راگەیەنراوی پەرلەمانی ئەو وڵاتە لەکۆی ٤٥٠ ئەندامی هێزە سەرەکییەکانی پەرلەمان بەراست و چەپەوە، ٤٤٢ ئەندام پەرلەمانیان لەگەڵ ناساندنی مافی نەتەوەی کوردابوون بە فەرمی.}

^{ڕاگەیەنرا کە لە کۆی ٤٥٠ پەرلەمانتاری ڕووسیا ٤٤٢ پەرلەمانتاری دەنگی بەلێیان دا.}

^{ئەو پرۆژەیە پێشکەش پەرلەمان کرابوو لەلایەن سەرۆکی پەرلەمان سەرگی ناریشمین ەوە کە سەرۆک پارتی رووسیای یەکگرتووە ئامادەکرابوو.}

^{سەرۆکی کۆمیتەی دەرەوەی پەرلەمانی ڕوسیا ئەلەکسی پوشکۆڤ دوای بڕیارەکە بەمیدیاکانی راگەیاند " لە رۆژهەلاتی ناوەراست، دەبێت بزانرێ کە لە عێراق و سوریا تەواوی کورد لە ژێر هەرەشەی قرکردن دایە بەدەستی ئیسلامی رادیکال".}

^{پوشکۆف وتیشی " چەتەکانی داعش دوژمنی مرۆڤایەتین و سنورناناسن ، ئەو دۆخەکە خراپە ئەنجامی سیاسەتی دەوڵەتانی رۆژئاوایە دەبێ ئەو پرسە بە پێی پەیماننامەی نێونەتەوەیی ، حقوقی گەردوونی و بە ئەرێکردنی مافی گەلان و لە ژێر چەتری نەتەوەیەکگرتووەکان دا چاەرسەر بکرێ".}

^17/11/2014

<sup>دوای 20 رۆژ وەستانی پڕۆسەی ئاشتی، ئەمڕۆ جارێكیتر شاندی پارتی دیموكراتی گەلان HDP و حكومەتی توركیا كۆدەبنەوە.

ئیدریس بالوكەن، یەكێك لە ئەندامانی شاندی HDP رایدەگەیەنێت: "تاوەكو هەلومەرجی كاركردنی عەبدوڵڵا ئۆجەلان نەگۆڕدرێ، ناگەینە هیچ رێككەوتنێك".

بالوكەن، كە هاوكات سەرۆكی گرووپی پەرلەمانتارانی HDPیە گوتی: "تاكە دەروازەیەك كە ئۆجەلان لێیەوە پەیوەندی لەگەڵ دونیای دەرەوە هەبێت، شاندی پارتەكەی ئێمەیە، بەم تێگەیشتنەشەوە ناكرێ بگەینە ئەنجامی رێككەوتنێك، ئەگەر باس لە رێككەوتن دەكرێ دەبێ سكرتاریەتێك بۆ ئۆجەلان پێكبێ كە نووسین و نامەكانی بپارێزێ".

بڕیار وایە یاڵچین ئەكدۆغان، یاریدەدەری سەرۆكوەزیرانی توركیا كاژێر 13:00 لەگەڵ شاندی هادەپە لە بینای ئەنجوومەنی وەزیران كۆببێتەوە، وەك چاوەڕوانیش دەكرێ شاندی هادەپە لە پەروین بوڵدان، ئیدریس بالوكەن و سری سورەییا ئۆندەر پێكدێن.

یاریدەدەری سەرۆكوەزیرانی توركیا لە بارەی خۆپێشاندانەكانی 6 و7 ی تشرینی یەكەمی 2014 گوتی: "وامەزانن ئەمە جووڵانەوەیەكی دەرەوەی كۆنتڕۆڵە، ئەمە ستراتیژییەتێكی زانراو و دیاریكراوە، دەیانەوێ  ئەوانەی وەك خۆیان بیرناكەنەوە لە ناوچەكە (باكووری كوردستان) وەدەربنێن".

هەروەها گوتی: "ئەو كەسانەی بە باری ئەوان ناگۆڕێن، ئەو پیاوانەی كار كە پشتگیریان ناكەن، سەندیكا، پارتە سیاسییەكان، رێكخراوە ناحكومییەكان و هەر كەسێك وەك ئەوان بیر نەكاتەوە دەیانەوێ كۆچی زۆرەملێی پێبكەن".</sup>

فەرهاد چۆمانی

^{رووداو - ئەنکەرە}

^17/11/2014

<sup>وەزارەتی دەرەوەی عێراق رایگەیاند، كۆماری ئیسلامی ئێران بە فەرمی داوەتنامەیەكی ئاراستەی حكومەتی عێراق كردووە بۆ بەشداریكردن لە كۆنگرەی وەزیرانی راگەیاندنی وڵاتانی ئەندام لە نێو رێكخراوی هاریكاری ئیسلامی.

وەزارەتی دەرەوەی عێراق لە بەیاننامەیەكدا گوتی: "باڵیۆزخانەی عێراق لە تاران لە كۆبوونەوەی ئامادەكاری ئەنجامدانی كۆنگرەی وەزیرانی راگەیاندنی وڵاتانی ئەندام لە رێكخراوی هاریكاری ئیسلامی بەشداریكردووە، كە بڕیارە لە 3ی مانگی داهاتوو لە تارانی پایتەختی ئێران بەڕێوەبچێت".

گوتیشی: "بەمەبەستی بەشداریكردنی عێراق لەم كۆنگرەیەدا وەزارەتی رێنوێنی ئێران بە فەرمی داوەتنامەیەكی ئاراستەی حكومەتی عێراق كردووە".

رێكخراوی هاریكاری ئیسلامی 57 وڵات و رێكخراو لەخۆدەگرێت، ئامانجی یەكدەنگی و كۆكردنەوەی سەرجەم مسوڵمانانی جیهانە كە ژمارەیان لە نێوان 1.3 تاوەكو 1.5 ملیار كەس دەبێت. رێكخراوێكی نێودەوڵەتییەو ئەندامی هەمیشەیی رێكخراوی نەتەوە یەكگرتووەكانە.</sup>

^17/11/2014